رواية الضحية كامله جميع الفصول بقلم امل عبدالرازق
-شاكر: اعملي حسابك يا فريده ان في عريس جاي يشوفك النهارده، الساعة ٩ بالليل تكوني جاهزة
- فريده: بس يا بابا انا قولت لحضرتك انا مش هتجوز تاني، من فضلك كفايه انا مش عايزه اتجوز
- ليلى: سيب فريده براحتها يا شاكر وبلاش تضغط عليها، لما هي تحس انها مستعده تخوض التجربة لتالت مره ابقى خلي العريس يتقدم
- شاكر: مالك يا اختي انتِ وهي ماليين ايدكم كدا ان هي هيتقدم ليها حد اصلا، دا بدل ما تحمد ربنا ان لسه في حد بيفكر يتقدملها، بنتك معروفة بين الناس انها فال وحش ووشها نحس على اي بيت تدخل فيه يا ليلى، انا قُلت كلمتي العريس جاي الساعة ٩ عشان يحدد معانا كل حاجه
- فريده: انا مش فال وحش ولا نحس يا بابا، اللي حصل دا قضاء وقدر، نصيبي كدا والحمد لله انا راضية، بقالي سنه بشتغل وفتحت حضانه لنفسي اعلم فيها الأطفال وبدأت اشوف حياتي، بلاش تخليها توقف تاني يا بابا
- شاكر قالّها بصوت عالي: فوقي لنفسك يا فريده وبلاش تخليني اتعامل معاكِ بوشي التاني، ياريت متزعلنيش منك، انا عارف مصلحتك كويس
- ليلى: اهدى يا شاكر وبلاش صوتك يعلى واحكيلنا عن العريس و عرّف فريده مواصفاته يمكن تقبل بيه
______
- محمود: انا جمعتكم النهارده عشان عايز اتكلم معاكم في موضوع مهم، و اتمنى تسمعوا مني بدون ما اي حد يقاطعني وبالتحديد انتِ يا لبنى
- كريم: اتفضل يا بابا احنا سامعين حضرتك
- محمود: طبعا عارفين ان مر على وفاة رحمة امكم اكتر من سنتين، وانا في السنتين دول اتبدهلت جدا من بعدها، وطبعا انا راجل مدير مدرسة ومحتاج حد يجهزلي فطاري ولبسي ويهتم بالبيت
- لبنى: ايوه يا بابا كل دا عارفينه وافتكر يعني ان انا قولت لحضرتك نجيب شغاله تشوف شغل البيت؛ لأن زي ما حضرتك عارف ان انا مش بفضى ودايما معظم وقتي بقضيه في شقتي
- محمود: أسوأ حاجه انا عملتها موضوع الشقق دَ، بس كنت عايز اوفر ليكم حاجه تأمن مستقبلكم، انا مطلعتش من الدنيا الا بيكم، وكل واحد قاعدلي في شقة لوحده وبقيت بشوفكم صدفة وقت النوم مع اننا كلنا في عمارة واحده، عموما دا مش موضوعنا، انتِ يا لبنى بقى عندك ٢٦ سنه و ان شاء الله هيجيلك نصيبك وتتجوزي، و انت يا كريم ٢٤ سنه وخلاص فاضل على فرحك كام شهر، وهفضل وحيد لحد ما ربنا ياخد أمانته
- لبنى: انا اسفه على المقاطعة بس انا عايزه افهم ليه كل المقدمة دِ يا بابا، ما تقول على اللي نفسك فيه علطول
- كريم : اتكلمي مع بابا كويس يا لبنى
- لبنى: انت مالك بكلامي، واخد بالك انت من ياء الملكية دِ يعني كلامي يخصني واتكلم زي ما انا عايزه، ياريت متدخلش يا كريم، انا مش بحب انك تدخل ليا في اي حاجه
- كريم: اه قولى كدا ما انتِ منفسنه مني ومن روان خطيبتي عشان هنتجوز وانتِ لسه مافيش حد فكر يبص في وشك
- محمود بص لكريم بتحذير و قاله : ايه الكلام اللي انت بتقوله ل اختك دَ يا كريم، اعتذر منها حالا
- كريم: يعني انت مش شايف اسلوبها وكلامها معاك ومعايا عامل ازاي
- محمود: بقولك اعتذر من لبنى حالا يا كريم و إلا هتصرف معاك تصرف مش هتحبه خالص
- لبنى الدموع اتجمعت في عينيها وبصت لكريم وقالتله: لأ يا كريم متعتذرش انت معاك حق في كلامك، انا فعلا مش حلوه ومافيش حد هيبص في وشي، بس انا مستحيل انفسن منك عشان هتتجوز بالعكس انا فرحانه بيك بس يمكن مش عارفه اعبر، بعد اذنكم
خرجت لبنى من الشقة وقفلت الباب وراحت شقتها اللي باباها كاتبها ليها ب اسمها ومجهزها من كل حاجه
- محمود: ايه اللي انت عملته دا يا كريم، ازاي تكسر بخاطرها كدا، ازاي تقول ل اختك حبيبتك كلام زي دا
- كريم: بابا انا اسف والله مش قصدي، انا اتنرفزت من اسلوبها وطريقة كلامها، بقالها فترة مش عجباني
- محمود: اسف دِ لازم تقولها ليها وتروح تراضيها وتجبر بخاطرها، ولو على اسلوبها ف ابوها عايش لسه انت ملكش تغلط في اختك الكبيرة، فاهم ولا لأ
- كريم رد على محمود والندم باين في صوته: فاهم يا بابا و انا اسف، هروح اشتري ليها الحاجات اللي بتحبها واجي اراضيها
- محمود: اختك ست البنات يا محمود بس لسه مجاش اللي يستاهلها، الحمد لله متعلمة وقلبها جميل وشكلها جميل واكيد نصيبها هيكون احلى نصيب، اوعى تقول كلام زي دا ليها
- كريم: حاضر يا بابا، فعلا لبنى جميلة اوي، بس من بعد دخولها الجامعة وتنمر البنات عليها بسبب انها عندها حول خفيف في عينيها وهي بقت دايما متضايقه ومبقتش تشكي من الموضوع دا لكن انا واثق انه سايب أثر جواها حتى بعد ما خلصت الكلية، و اي حد يتقدم ليها ترفضه من غير حتى ما تشوفه عشان خايفه الرفض يجي منه هو بسبب شكلها
- محمود: يعني انت عارف كل دَ، وتيجي في الآخر تقولها كدا، روح يا كريم راضيها ربنا يهديك، وعلى الساعة ١١ بالليل هنتجمع عشان عايزكم في موضوع مهم وبسببك معرفتش اقوله دلوقتي
______
- ليلى: نعم يا شاكر عايز تجوز بنتك لراجل عنده ٤٨ سنه، ليه يا اخويا ايه اللي يجبرها على كدا، دا بنتي أصغر من ولاده، حرام عليك دا انت أصغر منه
- شاكر: يعني انتِ شايفه ان بنتك بيجيلها عرسان اصلا عشان ترفض دا، وبعدين هو راجل مقتدر ومعاه فلوس ومدير مدرسة وعنده بدل العمارة ٣
- ليلى: انا بنتي ست البنات كلهم، ونصيبها جاي، مستحيل توافق على الراجل دا ، متظلمش بنتك يا شاكر ربنا هيحاسبك عليها
- شاكر: انا مش هقعدها جنبي لازم تتجوز ويبقى عندها بيت وتكون اسره، مش هفضل اصرف عليها وهي عندها ٢٥ سنه، مش ناقصني همها هي كمان كفايه اخواتها
- ليلى: بنتك جربت حظها في الجواز بدل المره اتنين وكل مره انت بتجوزها بالعافيه وبتكون هي مش مقتنعه اصلا، سيبها المره دِ تختار شريك حياتها وتكون مقتنعة بيه
- شاكر: ايوه جربت حظها في الجواز وكل راجل تتجوزه يموت واحد بعد مات بعد خمس شهور في حادثه، والتاني مات بعد جوازه منها بسنه، بنتك وشها وحش على الناس ومافيش حد هيبصلها تاني، دا بدل ما تحمد ربنا ان لسه في حد بيفكر يتجوزها
- ليلى: مالك يا فريده يا بنتي، ساكته كدا ليه، انا في ضهرك يا حبيبتي متخافيش
- فريده: انا مش عايزاك تصرف عليا يا بابا، بالعكس انا شغلي هو اللي بيجيب دخل للبيت وتقريبا اخواتي البنات انا اللي بجيب ليهم كل حاجه، والموت دا قضاء الله وقدره انا ماليش اغير فيه حاجه، وعموما انا مستعدة اقابل الراجل اللي اكبر منك في السن وعايز تجوزه ليا، ان شاء الله خير، بعد اذنكم
- دخلت فريدة اوضيتها وفضلت تعيط بسبب قسوة ابوها عليها وانه بيتعامل معاها على انها سلعة كل ما يجي حد يتقدملها ويكون معاه فلوس يجبرها تتجوزه منه، ونصيبها اللي هي بتحاول دايما ترضى بيه، بس ابوها مش سايبلها فرصة عشان هي تحاول تكون بخير،بس اللي مهون عليها تعبها حنية امها عليها هي و اخواتها.
- ليلى: ليه يا شاكر بتعمل مع فريده كدا، البنت حالتها النفسية بقت وحشه، مش بتعصب عليك بنتك، بلاش الجوازه دِ عشان خاطري، قبل كدا كنا بنوافق عشان كان اللي بيتقدموا ليها بيكونوا اكبر منها أقصى حاجه ٥ سنين مش ٢٣ سنه يا شاكر
- شاكر: انتِ هتفضلي غبيه كدا لحد امتى، فريده موقفة حال اخواتها جنبها، لازم تتجوز وتعيش احنا في أرياف يا اختي وسيرة فريدة على كل لسان
- ليلى: يا راجل المفروض انت خريج كلية زراعة ومتعلم وفاهم، المفروض اللي يتكلم عن بنتك توقفه عن حده، هي بنتك فيها ايه يا اخويا عشان الناس تتكلم عليها، جميلة ومتعلمة ومحترمه، عملت ايه هي عشان واحد أو واحده ملهمش لازمه تتكلم عليها، طب هما ناس الجهل والغباء مسيطر عليهم، هنسمع ليهم!
- شاكر: بنتك لما بتتجوز راجل بيفطس بعدها بفترة، مش راجل واحد دول اتنين
- دخلت منه اخت فريده الأصغر منها عندها ٢٢ سنه، قالت ل ابوها بعد ما سمعت كلامه على اختها: كفايه بقى ارحم فريده، انت واثق ان الكلام دا غلط مش كل شوية تردده، ما انت هتموت وانا هموت كلنا مصيرنا واحد، كدا بقى فريده السبب، فريدة اللي بتصرف عليا من لحظة ما دخلت الكلية اللي انت كنت رافض تخليني ادخلها عشان عايز تجوزني وتعمل فيا زي ما عملت مع فريده
- شاكر: اخرسي يا حيوانه طالعه غبيه زي امك، عموما عريسك موجود وهتحصلي اختك
- منه: لأ يا بابا انا في كلية صيدلة وهتعلم كويس، وهتخرج وهشتغل وبتقديراتي هتعين في الكلية وهساعد اخواتي في التعليم مش هيضيعهم وهستنى نصيبي اللي يقدرني ويحافظ عليا، خليك بخلان علينا بفلوسك ان شاء الله مش هنحتاج منك حاجه
- شاكر: انا مش هرد عليكِ دلوقتي بس صدقيني كلامك دا مش هيمر مرور الكرام كدا، دا انا هطلع عينك بس الأول هروح اجيب الفراخ والحمام ل امك عشان تعمل اكله محترمه للراجل اللي جاي عشان ميستقلش بينا
- منه قالت بصوت واطي : ايوه احنا اهم حاجه عندنا المنظره، لكن ولادك يتحرموا من حاجه نفسهم فيها عادي، ربنا ينجيكِ يا فريده
_______
- في القهوة
- سعيد: اقنعتها بالعريس ازاي يا شاكر
- شاكر: غصب عنها او بمزاجها كانت هتوافق، اهم حاجه الراجل اللي جاي دا يسمع الكلام وينفذ كل طلباتنا من غير جدال، البت حلوه وصغيره وهو كبير يعني يتلم كدا ويوافق على اللي انا اقول عليه
- سعيد: انا اول ما عرفت انه بيدور على عروسة دليته على بنتك وشرحت ليه كل ظروفها، كان رافض انه يجي يتقدملها عشان بيقول انها صغيره وأصغر من بنته، بس انا قولتله انها اتجوزت قبل كدا مرتين وحظها وحش وأقنعته بالعافيه
- شاكر: طب يلا تعالى معايا عشان تحضر القاعده دِ وزمان الراجل على وصول.
_________
- محمود راح عند شاكر البيت عشان يشوف فريده ويقعد معاها وينفذ ليها كل طلباتها
- شاكر: البيت نور والله يا استاذ محمود
- محمود: البيت منور بناسه، المهم فين العروسة عشان معطلكمش اكتر من وتاخدوا راحتكم في بيتكم
- شاكر: مستعجل ليه كدا يا عريس، مش الأول نتفق على كل حاجه واقول شروطي وبعد كدا تشوف العروسة
- سعيد: طب خليه يشوف العروسة الأول وبعد كدا نتفق على كل اللي انت عايزه
- شاكر: خلاص ماشي مافيش مشكلة! يشوفها ويعين البضاعة وبعد كدا نحدد السعر بس خلي بالك البضاعة غاليه وتستاهل
- محمود : بضاعة ايه مش فاهم تقصد ايه بالظبط
- سعيد: يقصد العروسة يا استاذ محمود، هو شاكر كدا بيحب الهزار ومش بيعرف يتكلم كلمتين جد على بعضهم
- محمود: حتى لو هزار ازاي تقول على بنتك كدا، انا مش جاي اشتريها، انا جاي اخد موافقتها عليا ويشرفني لو قبلت بيا، دِ انسانه كنوز الدنيا كلها قليلة عليها، تستاهل كل خير؛ لأنها انسانه والانسان أرقى و أسمى مخلوق على الأرض، عيب ان اب يقول على بنته بضاعه ويتعامل على انه بيبيعها بالفلوس
- شاكر: خلاص يا استاذ ما قالك ان انا بهزر مش قصدي حاجه، عموما مش وقت محاضرات احنا مش في مدرسة انا هقوم لنادي على العروسة وانت يا سعيد تعالى اقعد برا عشان نسيبهم مع بعضهم شوية
_____
فريده كانت قاعده في اوضيتها مع اخواتها و امها وسمعت كلام و انه بيتعامل معاها على انها ملهاش لازمه ولا قيمة وكل اللي يفرق معاه الفلوس، وهي بالنسبة ليه بضاعة، كلام ابوها وجع قلبها وكسر بخاطرها وخلى دموعها تنزل، لكنها سمعت رد محمود عليه قلبها ارتاح ليه وبقت بتتمنى تبعد عن بيت ابوها وأذاه ليها ب اي طريقة
_____
- شاكر: قومي يا فريده يلا عشان تشوفي عريسك، الراجل عنده مشواير ومش عايز يتأخر
- ليلى: ما تعقل بقى يا شاكر وتلغي الموضوع دا، البت موقفتش عياط من الصبح
- شاكر: نفسك مش عايز اسمعه، قومي يا فريده يلا الراجل مستني في الصالون
- ليلى: انا مش هشوفك بتضيع بنتي وهسكت، لو فيها تلاقي يا شاكر بس انجي بنتي منك ومن شرك انا مستعده بس اخد بناتي وابعد عنك، بناتك كويسين بلاش تضيعهم
- منه: انا مستعده اشتغل اي و اعمل كل اللي تقول عليه بس سيب فريده تعيش حياتها زي اي حد، حرام يا بابا تجوز بنتك لراجل اكبر من ابوها
- شاكر: انا مش عايز اسمع صوت واحده فيكم، طول عمري كنت بتمنى ربنا يرزقني بولد يشيل اسمي، وفي الاخر حظي كان وحش وجالي ٣ بنات كرهوني في حياتي وعايز أخلص منكم ب اي طريقة عشان لو واحده فيكم عملت اي حاجه بعد كدا ابقى غير مسؤول عنها، مش عايزه واحده منهم تجيبلي العار انا مش ناقصني فضايح كفايه فريده المنحوسه
- ليلى: مالهم البنات دول أجمل حاجه في الدنيا، دا انا مستحملة الحياه معاك عشانهم، هما اللي مهونين عليا، فريده بتعلم اخواتها وبتصرف عليهم، و خريجة كلية دراسات إسلامية وحافظة القرآن، و منه في كلية الصيدلة، و ساره في ٣ ثانوي، بناتك محترمين ومتعلمين المفروض ترفع راسك بيهم، انت اللي استعجلت على فريده وعملت فيها كدا والله ذنب بناتك في رقبتك
شاكر كان اتعصب ولسه كان هيمد ايده اللي تنكسر على مراته ليلى بس فريده وقفت وقالتله لو العريس وافق عليا انا موافقة اتجوز الصبح، بس امانه عليك يا بابا بلاش تزعل امي ولا تمد ايدك عليها، هي ذنبها الوحيد انها خايفه علينا
فريده بصت ل امها والدموع ماليه عينيها وحضنتها وقالتلها: انا عارفه انك زعلانه عشاني ونفسك تشوفيني مبسوطه، عارفه انك خايفه عليا وبتحبيني اكتر من نفسك، عارفه كمان ان لا حول ليكِ ولا قوة وكل اللي بيحصل غصب عنك، مسامحاكِ وبحبك اوي يا ماما، اوعدك ان انا هحاول اكون بخير، بس انتِ خلي بالك من اخواتي وانا طول ما فيا نفس في ضهركم، مش مشكلة لما اكون انا فار التجارب اللي بتتعلموا من اخطائكم فيه، بس الأهم الأخطاء دِ متتكررش ويحصل مع اخواتي زي ما بيحصل معايا.
خبط سعيد على باب الاوضة اللي فيها شاكر وولاده اللي كان اصلا سايبه مفتوح وهو بيتكلم معاهم بصوت عالي، سعيد قال لشاكر: صوتكم عالي وانا سمعت كل الكلام اللي دار بينكم وانا برا، انا خايف يكون محمود كمان سمعه، كفايه فضايح بقى يا شاكر وخلي بنتك تدخل تشوفه وخلي اليوم دا يعدي على خير
________
- فريده خطبت على باب الأوضة اللي فيها محمود ودخلت وقالتله وهي عيونها في الأرض: السلام عليكم ورحمة الله وبركاته
- محمود وقف رد عليها وقالها: وعليكم السلام ورحمة الله وبركاته، بسم الله ما شاء الله اللهم بارك، تعالي اتفضلي اقعدي
- فريده: انا مستعده اجاوب على اي سؤال حضرتك عايز تسأله ليا
- محمود قالها ب ابتسامه: عرفت من والدك ان اسمك فريده، تعرفي يا فريده و انتِ قاعده قدامي حاسس ان بنتي هي اللي قاعده قدامي، انا حقيقي محتار ومش عارف اعمل ايه
- فريده مقدرتش تتحكم في دموعها وقالتله : طب طالما حضرتك شايف كدا وشايف ان انا زي بنتك، ليه جاي تتقدم ليا وتتجوزني، أو على رأي والدي تشتريني بفلوسك، انا فعلا زي ما ابويا قال بضاعة كل واحد بياخدها شويه، ماليش حرية الاختيار
- محمود إتأثر بكلامها وقالها: انتِ مش بضاعة انتِ ست البنات كلهم، والله يا فريده انا لو مش محتاج واحده تكمل معايا معايا اليومين اللي فاضلين من عمري مستحيل كنت اتجوز، انا كنت بحب مراتي ولسه للحظة دِ مخلص ليها، بس انا لا عارف اكل ولا اشرب ولا اغسل لبسي ولا ارتب البيت ولا اعمل اي حاجه في حياتي، في واحده بتيجي مره في الشهر بسيب ليها البيت وبتفضل لبنى بنتي معاها على ما تخلص وترن عليا عشان ارجع، ومقضينها أكل من برا انا وولادي، بس انا فعلا تعبت ومش عارف استحمل ومش عايز ادخل واحده غريبه البيت
- فريده: طيب ما انت عندك بنت ليه مش بتعمل هي الحاجات دِ، وبعدين حضرتك جاي تتجوزني عشان تاخدني خدامه، انا طبعا مش هقدر اغير حاجه ولو انت وافقت على الجواز مني ابويا هيجبرني أوافق، حتى لو خدامه عادي
- محمود: اولا لبنى عندها مشاكل في التنفس ومن اقل مجهود بتتعب و انا بخاف عليها وبعدين هي مش بتعرف تعمل شغل البيت لأن مامتها كانت مدلعاها، بصراحة امها كانت احن ام في الدنيا، من حنيتها عليا كنت بحسها امي مش بس مراتي، من بعدها حالنا اتغير، بس المرض كان أقوى مننا كلنا
ثانيا يا فريده انا مش هتجوزك عشان اخدك خدامة بالعكس انا بس محتاج منك مساعده وكريم ابني هيتجوز يعني انا ولبنى بس اللي هنحتاج تعملي حسابنا معاكِ في الأكل وتغسلي لبسنا معاكِ وهكذا، ثالثا انا قولت لازم اشوفك الأول عشان اسمع منك واوعدك لو رفضتيني انا مستحيل اكمل الجوازه وهقول لوالدك مافيش نصيب
_______
في المطعم
- كريم: اظن بقى بعد الحاجات دِ كلها انتِ كدا متراضيه، وكمان عزمت صحبتك معانا زي ما انتِ عايزه، وجبتلك الحاجات اللي نفسك فيها كلها وجبتلك البيتزا اللي نفسك فيها اهو
- لبنى: الأول شوف نورهان انبسطت والأكل عجبها ولا لأ، لو نورهان مبسوطه خلاص مافيش مشكلة
- كريم: هو انا خلفتكم ونسيتكم، دا بدل ما اعزم خطيبتي على اكله حلوه زي دِ، لأ فضلت اختي حبيبتي وخرجتها الساعة ٩ بالليل وبابا هينفخنا بسببها، بس اهم حاجه اراضي لبنى حبيبة قلبي، تقوم الست لبنى تقولي شوف نورهان، عموما انا زعلت لبنى مش مش نورهان
- نورهان: بقى كدا يعني يا سي كريم، طب خلاص يا لبنى انا زعلانه والاكل كان مش حلو خالص وبصراحة عايزه بيتزا بالفراخ والجبنه و عايزه آيس كريم غير دا و
- قاطعها كريم وقالها: لا ابوس ايدك انا اسف، حتى لو مش مزعلك انا اهم حاجه انبساطك يا ست الكل، هو انا يهمني ايه في الدنيا غير صاحبة اختي الغالية، لا لا لا الا زعلك يا نور، حرام عليكِ انا كدا هفلس
- نورهان ضحكت على كلام كريم وقالتله: خلاص عفوت عنك، مبسوطه والأكل كان لذيذ، تسلم يا كيمو، وبعدين الخروجه دِ كانت عايزه عمو محمود معانا، عمو محمود في الأربعينات وتحس ان عنده ٣٥ سنه ولسه قمر في نفسه كدا
- كريم: ايوه ما انا طالع قمر لبابا انا ولبنى، المهم دلوقتي بابا محلو زياده وشكله بيدور على عروسة وهنعمل فرحنا سوا، المهم يا لولو سامحتي اخوكِ حبيبك ولا لسه
- لبنى: خلاص عفونا عنك يا كيمو، بس بلاش هزارك البارد دا بابا مستحيل يتجوز بعد ماما ولا يفكر في واحده غيرها، دا لو عمل كدا ممكن اجيب مراته من شعرها ارميها برا البيت، مستحيل طبعا بابا يعمل كدا، قال يتجوز قال، دا انا أكلها بسناني اللي تفكر تدخل البيت بعد ماما
- كريم: يا ستير على الشر بهزر يا ستي محصلش حاجه، الراجل كافي خيره شره وبيعمل لينا كل اللي نفسنا فيه ومجبش سيرة الجواز دِ خالص، المهم عايزين نرجع البيت عشان بابا عايزنا في موضوع مهم
- لبنى: خلاص تمام، بس هنروح بيت نورهان الأول بعربيتك عشان أستأذن من أهلها وان شاء الله يوافقوا انها تيجي تبات معايا ونقضي بكرا كله مع بعض ونخرج وننبسط، وابقى خلي خطيبتك تيجي تغير جو معانا وروح انت شغلك
- كريم: يااااااه واخيرا رضيتي عنها، دِ هتفرح اوي لما تعرف انك عايزه تشوفيها، ايوه بالله عليكِ حاولي تحبيها يا لبنى عشان بيتنا يكون هادي ونفضل دايما مع بعض، روان طيبة وبنت حلال والله
- لبنى: خلاص خلاص ايه دا كله يا عم انت، حاضر يا سيدي هحاول احبها بس بردو بحس انها بارده هي و أهلها، كان نفسي اختارلك عروسة على مزاجي انا، بس طالما عجباك يا كيمو مافيش مشكلة هحاول احبها.
_______
- فريده: تعرف انا بحسد بنتك على اب حنين ومتفهم زيك، تعرف كمان انا ابويا عمره ما حضني، عمره ما طبطب عليا وقالي متزعليش يا بنتي، تعرف ابويا بيقولي اني منحوسه ووشي فقر على كل الناس، و ان انا السبب في كل حاجه وحشه بتحصل، ابويا دمر نفسيتي وحياتي، تعرف انا بس لو هتجوز تاني عشان ارحم نفسي من كلامه و ايديه اللي دايما بيمدها عليا، عايزه ارحم اخواتي والفلوس اللي هياخدها منك ممكن تصبره سنه ولا حاجه تكون منه اتخرجت، ربنا اللي يعلم بيعمل بالفلوس دي كلها ايه، بس فعلا يا بخت ولادك بيك
- محمود: ان شاء الله ربنا هيعوضك عن كل دا، وانا عندي اقتراح هقولك عليه أو نسميه اتفاق هيكون بيني وبينك، و صدقيني انا معاكِ في اي حاجه انتِ عايزاها وحقك من والدك هيرجع وان شاء الله ربنا هيحفظك وهيحفظ اخواتك، بس اسمعيني للآخر وبلاش تقاطعيني و ان شاء الله تقتنعي بالكلام اللي هقوله واعرفي اني مستحيل اضرك او افكر حتى أأذيكِ يا فريده.
- فريده: انا بشكر حضرتك على لطفك معايا وفعلا واضح انك انسان كويس، وانا مستعده اسمع اللي هتقوله وطالما انت هتوافق على قراري وسيبت ليا حرية الاختيار انا احترمتك اوي، ابويا نفسه مش بيفكر يسألني حتى عن رأيي.
_______
_ شاكر: كل دا قاعد معاها بيشوفها، انا خايف البت تطفشه، انا هقوم ادخل اشوفهم يا سعيد
- سعيد: لأ يا شاكر سيب الراجل ياخد راحته ويسألها زي ما هو عايز، دا راجل محترم وعارف هو بيعمل ايه كويس، عشان ينفذ ليك اللي انت عايزه بلاش تبين ليه انك رامي بنتك كدا وأهم حاجه عندك الفلوس
- شاكر: ادينا صابرين لما نشوف اخرتها ايه مع محمود أفندي، ياااااااه لو اخلص من فريده دِ بقى عشان افوق ل أخواتها
