رواية خيط الدم الفصل التاسع والعشرون بقلم زينب طالب
ما دَام العِزيز وياك لو هِيمه الدرب يحلى
.........
هدوء...
::جعفررررر
جعفر :: هااا يابة شبيچ تصيحين؟
::بطني توجعني يمكن رااح اجيب
جعفر :: انتِ يومية مركضتني بالمستشفيات نامي بابا نامي خليني اكمل شغلي
::بس بطني توجعني اكثرر من قبل
جعفر :: متجيبين هسة ناامي
::جعفرر
جعفر :: استغفر الله، هاا
::اريد ارگصص
جعفر:: من تجيبين شبعي رگص حبيبتي
::احسك تجذب عليةة
جعفر :: لاصدگي بس ناامي اريد اخلصص شغلي نعست وداعتج
::يلة راح اناام كمل كمل
غمضت عيوني وهو بقى على الميز يشتغل، بذيچ الفترة المرت حياتنا هادئة من بعد المشكلة لسوتها البنت الية بالكلية عرفت جعفر مبلغ اهلها وهمة بدورهم مأدبيها ومبطليها من الجامعة ابد ماانقهرت عليها لأن شوهت سمعتي وخلت الطلاب ينضرولي نضرة سيئة حتى لو تصلح الموقف بس من اذكرة يأذيني
كملت امتحاناتي ونجحت من المرحلة الاولى دخلت بشهري وراح اخلصة واني بعدني مجايبة كل يوم تصير اوجااع ياخذوني للمستشفى بس ادخل يروح الألم ونرجع وهاي صار اسبوعين على هالحالة بس اليوم زاد الوجع من گتلة ماصدگني وچان عندة شغل مااعرف شيكتب
بقيت اتگلب بفراشي بلكت يختفي الالم ماكو شو زاد
گمت للحمام من كثر مامشغول ما انتبه علية دخلت لگيت مي واگع علية واحس الطفل نزل كلش خفت وتشنجت غسلت بصعوبة وطلعت اتمشي صحت عليه باوعلي ابتسم ورجع يكتب عبالة اتشاقى وياه اخرر شي صررخت بووجع
::جعفررر الحگنييي والله موجووعة الطفل راااح ينززل فدوووة تعال
من شافني هيچ نهض بسررعة اجة لزمني ويحچي بخووف
جعفر :: هدووء حبيبتي شبيچ شتحسين مثل كل مرة لو يختلف احچي
::لالا والله يختلف جعفرر الحگنيي فدووة
جعفر :: گعددي هناا اگعد امي واجيج
::خابرر ماما تحضرر نفسهاا
جعفر :: اي اي
گعدني وطلع يركض گعد خالتي اجتني خطية قلقانة
ام جعفر :: هاايمة هدووة صاار الووقت
::اي خالة فدووة بسررعة
ام جعفر :: اي اي جعفررر اتصل على امهاا حتى نمر عليهاا يلةة امي على كيفيك لاتنخبص
حچتها واجت لبستني شالي وعباتي اخذت الجنطة محضرتهاا اني رحت لبست واجت طلعتني هية وياه صعدتني ورة وهية گدام مرو على امي شفتها واگفة هية وبابا بالباب صعدت بسرعة وابوية مد ايدة من الجامعة مسح دموعي ويحچي وياي بحنية
ابو هدوء :: بنيتي هدوء صيري قوية بابا راح ابقى ادعيلچ هناا الى ان يجي ابنچ بالسلامة شدي حيلچ وندبي امنا الزهراء متقصرر ويااچ حبيبتي
هزيت راس الةة مااگدر احچي الوجع ماخذ حيلي باس ايدي ورجع طلع جعفر بينة واني الطريق كلة اتلوى امي يمي تصبرر علية وخالتي تدعي جعفر يسووق مخبووص وصلنة للمستشفى نزولنة راح جعفر يركض قبلنة جاب كرسي متحرك گعدني عليه ودفعني مستعجل روحي احسهاا رايحة من الوجع
حتى دموعي خلصت
وصلوني للباب اخذني الممرضات لزمت ايدة مااقبل
افووت اجة يمي گعد گدامي لازم ايدي واني اتلوى يحجي بهدوي يقنعني مثل الطفلة
جعفر :: هدوء حبيبتي دخلي واني هناا منتضرچ تطلعين وابنة ويااچ
::تعال وياي اخااف وحدي
جعفر :: وعيونچ هناا واگف مااتحرك ميصير افووت جوة يلة حبيبتب انتِ قوية ماادري بيچ هيچ جبانةة
::خااف اموت جعفر
جعفر :: اسم الله عليچ حبيبتي
ام هدوء :: ولچ هدوة لاتحچين هيچ انتِ طبييعي يمة مو عملية هسة شووية وتطلعين يلة بنتيتي
ام جعفر :: هدوة حبيبتي لاتخافين يووم الله وياچ بس ادعي راح تخلص بسرعةة يلة اميي
::اي هسة ، جعفرر اذا اموت مو تتزووج مشكول الذمة
جعفر :: استغفر الله لچ عيني بياا حال هسة انتِ
::اخخخ يمةة معليكك مني بس احچي اوعدنيي گول مااتزوجج احلف
جعفر :: اسم الله عليچ لاتفاولين على نفسسج
هدووء
::اييي احچي بسرررعة
جعفر :: ماازوج ماازوج بس روحي لايصير بيچ شي
سحبتني الممرضة واني بقيت اصررخ اقوة من الوجع ومن الخووف اني شفت الچرباية مال الولادة لازم اصعد عليهاا واني خرطت العافية نداريت اطلع
لزمتني المررضة وحچت
_يمةة انتِ مبينة مخبلة وتعبين صعددي هناا المي مال الطفل خل يمعودة متحسسين انتِ
::لالا عوفيني عفية بطلت
__هو شنو بطلتي بكيفج يلة صعدني حبيبتي لايصير بأبنچ شيي
::عفيةة عيب طلعي برةة
__لعدد منوو يجيبچ عيني دصعديني يا عيني صعدي
سحبتني وصعدني واني كلساع اريد اطفر وتصيح علية تخزرني شلعت گلبهاا الوجع يذبح وهية تصيح دفعي ولچ اجتي ويايها وحدة ثاني تگابلن عليةة
واني كل صوووت اصيحة يگعدد الميت من گبرةة
يمة الووجع يمووت
__لچ دفعييي شگدد فااهيةة
::اخخخخ يمةةة ولچ يمةةة تعاالي جعفرررر ارتااحيت جعفررر كلةة منك ولكك كلة منننك
__دعووفي جعفررر وحييري بنفسسچ
::اخخهه ياالله ياارب ساعدني رااح اموووت يااا علي يابووو الحسن دخيلللك ساعدنيييي
اصرخ بكل صووتي ساعات مرررت يالة نززل الطفل
كل الوجع رااح مني حسيت فقدت غمضت عيووني صااحت بية لاتنامين سمعت صووت الطفل يصرخ نزلت دموعي شالتة خلتة على بطني شبگتة ابچي
صااحت بية
__هسةة كل الوجع يرووح
::راح اصلاً
احچي واناشغ اخذتة مني تكملة واني هم جهزتني ولفتني زين ودتني غرفة ثانية طلعتني على الكرسي لگيت امي وجعفر وخالتي گدامي ركضوا علية تقدمت امي بوستني وخالتي هم وراها هو باسني براسي وحچة بأذني بصوتة الحنين
جعفر :: الحمد لله علة سلامتچ ام موسى
رفعت عيني باوعتلة ابتسمت بوجهه وگعت دمعتي مسحها وابتسم انطتة الممرضة الطفل يباوعلة بحنان دموعة مغرگة عيونة باسة براسة وصار يكبر بأذنة
خالتي تبچي وتطش عليهم چكليت وامي يمي خلص اخذتة امي طلع محفظتة صار يوزع فلووس للممرضات والأبتسامة مالية وجهه خلص اجة اخذ العربانة ودفعني وصلني للغرفة الخاصة بية گومني هو امي والطفل بيد خالتي تمددت متأذية شوية خلوا الطفل بحضني باوعتلة ابيض حيل ومدبدبب
شگد حلو بستة بهدوء اخاف على بشرتة الترفة نايم بعمق
اخذتة امي مني خلتة بمكانة واني تمددت غفيت بسرعةة شوية واحتاجيت حمام اخذتني امي سألت على جعفر لان ماكو گالت يجيب اكل خلصنة ورجعت لگيتة موجود يسولغ وية امة گعدتني امي وهو جاب الأكل مالتي واجة يمي گال لامي اني اوكلها گعد يمي يسويلي لگم صغار ويخلي بحلگي حچيت
::اكل انتَ
جعفر :: معليچ مني هسة اكل تغذي انتِ
::تعبانة جعفر حيل تأذيت
جعفر :: الحمد لله خلصتِ هدوئي حقچ مو سهلة
سبحان الله يخرج النفس من النفس
::هم سمعت صووتي
جعفر :: اسمع وروحي تتگطع عليچ اريد افووت وتلزمني الحجيةة
::حچيت عليك اعذرني
جعفر :: هههه كلشي مبااح الچ اليوم
قاطعتنة خالتي
ام جعفر :: هدوء يوم اكلي حتى ترضعين ابنچ زين الة هااي المادة لبصدرچ
جعفر دنگ استحي واني وجهي صار يطلع ناار خجلت موعبالك زوجي واشايف كلشي بيةة مدري شصارلي
حچيت مستحية
::اي خالة دااكل
ام هدوء :: خالة جعفر مااكلت شي انت
جعفر :: اي خالة هسة اكل
كملنة اكل لمت امي امواعين گامت خالتي انطتني الطفل خلتة بحضني وحچت
ام جعفر :: يلة يلة رضعي الطفل لايخمل خطية يلة امي.
باوعت لجعفر مستحية هو افتهم طلع من الغرفة
خجلان سحبت الشال غطيت نفسي ورضعتة شعور صحيح يأذي بس يخبل حسيت نفسي صدگ ام ومسؤولة عن طفل
ثاني يوم الصبح سجلوا النة خروج من المستشفى طلعونة امي رادت تاخذني وياها للبيت بس ماقبلوا لاخالتي ولاجعفر دخلوني لغرفتي امي بقت يمي
للعصر ابوية اجة دخل علية ماگدرت اگوم دنگ علية يبوسني ويحچي بحنان
ابو هدوء :: مبرووك بنيتي هدوء الف مبروك حبيبتي يتربى بعزكم ودلالكم
::حبيبي بابا صرت احلى جدو كبرك موسى
ابو هدوء :: يموون موسى وامةة هم ويمنة اشوفة
::هذا يمك مخلصها نوم
ام هدوء :: بعدة بالبداية هسة يومين وشوفين السهر الا يبزعچ هااك حجي
حچتها وشالت موسى انطتة لأبوية باسة وخلاة بحضنة يباوع عليه وعيونة مدمعة حچيت اسألة
::حلو ابني بابا؟
ابو هدوء :: عين الله تحرسة يخبل
:: يشبهني لو يشبه جعفر
ابو هدوء :: ماخذ منكم اثنينكم
گعد ابوية بحضنة موسى اجة جعفر سلم عليه وابوية بارك الة بقى للمغرب يلة راح امي هم رجعت وياه خالتي گالت اني يمها واني هم توسلت بيها لان اعرف بيها تتقيد هناا گالت الصبح اجيج
مرت ايام النفاس على خير موسى مشيبني چانت امي عشر ايام تروح وترجع علية وخالتي تنام يمي الى ان صرت زينة وگمت على حيلي يلة راحت لغرفتهاا
اليوم گعدت من وقت باوعت الساعة بتسعة جعفر
طالع يسووگ وخالتي بعدها نايمة موسى نايم گمت
نظفت غرفتي بسرعة ذبيت الملابس بالغسالة كملتها وطلعت سويت ريوگ گعدت خااتي وجعفر اجة تريگنة سوية هو خلص وطلع للجامع واني التهيت اعزل المسواگ موسى بچة راحت خالتي جابتة وگعدت يمي بالمطبخ اني اسوي غدة وهية تسولف وياي وترضعة خليتة على ممة وصدري هم ارضعة لان خاف يجي الدوام ويتبهذل حچت خالتي
ام جعفر :: هدوة يووم
::ها خالة
ام جعفر :: اليوم تجي اختي وبناتهاا هم يشوفوني وهم يباركون الچ گالت العصر يمكم يعني اكيد يتعشون هناا
:: هلا بيهم خالة شنو تحبين اسوي
ام جعفر :: متسوين اي شي اني اوصي جعفر يجيب جاهز بعدچ تعبانة بس گلت اطيچ خبرر
::براحتچ حبيبتي
كملت شغلي اجة جعفر تغدينة ونمنة العصر گعدت هو طلع للجمامع ورة الصلاة يجب العشة ويجي واني بسرعة بدلت لموسى ورضعتة وديتة يم خالتي لچانت گاعدة تنتضر اختهاا وبناتها اني مشايفة بناتهة بس هية مرة اجتي لخالتي خوش مرة حبابة
حيل ركضت سبحت ولبست گلبية حلوة سرحت شعري وسويت مكياج خفيف لبست ذهبي وتعطرت سمعت صوتهم اجوي باوعت لنفسى راضية بالنتيجة طلعت اسلم عليهم همزين ماوياهم زلم حتى ماالبس حجاب
دخلت للصالة چانت الأماية گاعدة يم خالتي من دخلت وگفت على حيلها سلمت عليها وباركلتي وراها بناتها ثلاثة سلمت وگعدت حچت الام
ام علا :: مبروك حبيبتي هدوء يتربى بعزكم
::شكراً خالة الله يبارك بعمرچ
كملت كلامها وية اخالتي باوعت للبنات وحدة بگدي
تباوع علية بحقد عبالك كاتلة اهلها وحدة اصغر منها نفس الشي مبينة مطايقتني مثل اختها بس الصغيرة تباوع الية بطفولة مبنية حبابة بقينة اني وياهن نتبادل النظرات بس هنة ماحچن ولا حتى من باوستهن ماباوسني
سمعت باب الشارع نفتح عرفتة جعفر طلعت اتلگاه
محمل علايگ شافني ابتسم تقرب مني حچة بهدوء
جعفر :: شطالعة هدوئي تخبيلن
::ههههه عيونك حلوة تشوفني هيچ يلة ادخل خالتك تسأل عليك
جعفر :: ياالله
دخل للصالة واني اخذت الاكل ورحت ارتب بيه هنة گامن يصلن وخالتي اجتي وياي وحدة منهن دخلت
حچت وية خالتي
علا :: روحي خالة صلي اني اساعد هدوء
ام جعفر :: الله يرضة عليچ يووم
طلعت خالتي وهية بقت ترتب وياي بدون كلام كلما اندار الگاها تباوعلي احسها تريد تحچي شي اخر شي ماتحملت سألتني
علا :: تحبيه؟
::نعم!؟
علا :: جعفر ابن خالتي تحبيه؟
::طبعاً احبة غير زوجي ليش تسألين هيچ سؤال؟
علا :: ماكو شي لاتخلين أبالچ
حچتها ودنگت تكمل لبيدها حيرتني والفار لعب بعبي على گولة المصرين مااراتاحيت الهاا كملوا صلاة صبينة العشة گعدنة كلنة سوية گعدت بصف جعفر لچان على طول الاكل مدنگ بس من تسألة خالتة يباوعلها ويرد عليها عيوني راحت لعلا لگيتها صافنة علينة وبعيونها حسرةة نقبض گلبي من نضرتهة باوعت لأختها الثانية تباوعلي مستهزءة بيةة حيرني ذني شبيهن
كملنة اكل شلت المواعين نضفت المطبخ گامت وياي اريد احجي وياها مااگدر شنو اگول هسة شتگول علية نچبيت وبقيت ساكتة
كملت ورحت لغرفتي موسى يبچي گعدت ارضعة واسمع سوالفهم برة ندگ الباب غطيت نفسي وصحت اتفصل دخلت اختها الاصغر منهاا وسدت الباب حچت بأسلوب مو حلو
علياء :: اريد احجي ويااچ
::اي تفصلي گعدي ليش واگفةة
علياء :: اي اگعد ليش لاا
گعدت مقابيلي وعيونها تتجول بالغرفة بعدها باوعتلي وگالت
علياء :: تدرين انتِ اخذتي مكان اختي
::نعمم مافهمت يامكان؟
علياء :: هاي الغرفة والبيت وحياتچ لعايشتعا هسةة چانن راح يصيرن من نصيب علا لو مااتنتِ
::شتحچين انتِ عيب هذا كلامچ
علياء :: خليني اكمل لاتقاطعيني علا تحب جعفر من هو صغير تمووت عليه وچانت منتضرة يخطبهاا كملت دراستها وبقت منتضرتة بس هو چان رافض فكرة الزواج بيوم وليلة نسمع جعفر خطب وخالتي تعزمنة على عرسةة شلون وليش
منعرف اختي من سمعت وگعت اجت تنجلط لوما تلاحگنة الهاا
هذا حب طفولتهاا وحلمهاا اجيتِ انتِ على الجاهز اخذتي ليش هيچ مو حرام عليچ
::شنو حراام علية شمدريني اختچ تحبة بعدين هو ممواعدها بشي حتى تنصدم هيچ لو يريد چان خطبهاا بس اختچ مو أبالة اصلاً ولامفكر بيهه
علياء :: جعفر چان رافض فكرة الزواج نهائي وهذا لچان منطيها امل بس انتِ هدمتي احلامهاا وخليتها تتمرض علا عايشة بس جسد ويانة نطفت ضحكتها من يووم زواج جعفر كل شخص يجيها ترفضة ماتتخيل نفسها تكون زوجة لغيرة شنوو تكولين لربچ وانتِ أخذتي حبيبهاا منهاا
::كاافي سكتي شنوو جاي تحمليني ذنب مو ذنبي جعفر خطبني مثل كل البنات واني وافقت علية منين اعرف اختچ تحبةة لو بانية امالهاا علية شنو تحمليني الذنب شعلية اني بعدين هذا كلامچ لايقدم ولايأخر جعفر تزوج وصار عندة طفل ماالة داعي لحچيج هذا
علياء :: لاالة داعي لأن علا عدها استعداد تنزل على ضرة واذا توافقين اني احاجي جعفر لو اعرف ابووس ايدة بس يقبل يتزوجهاا راح اسويها وانقذ اختي وشبابهاا ومااهتم لأي احد حتى لأمي
::گوومي طلعي بررة الغرفة
علياء:: هاي أخلاقچ تطردين ضيوفچ
::لمايكونون الضيوف محترمين نشيلهم على راسنة بس مو مثلچ امششي برة يم اختچ ترةة وصلت حدي ويااچ
علياء :: طالعة لاتخافين بس فكري بكلامي ولاتصيرين انانية موافقتچ راح تنقذ حياة بنية يمكن بأي لحظة تنتحر من ورة الضغوط لعدهاا
حچتها وطلعت من الغرفة شكد شايفة صلفات مثلها ماشفت بكل عين وكحةة تريد مني اوافق على كلامها بقيت بالغرفة حتى ماطلعت اودعهم لأن مااضمن نفسي من اشوفهن اسكت، موسى نام اخذتة بفراشة وبدلت هدوومي احس ثگال عليةة لبست خفيف اريد روحي تهدة ماكو صرت اروح وارجع بالغرفة انتضرة يفووت واطلع حرگة گلبي بيه
سمعت البيبان تتقفل يعني راح يدخل وگفت مقابيل الباب مچتفة ادية واگفة انتضرة فتح الباب صرت بجهةة باوعلي مستغررب وحچة
جعفر :: بس الله الرحمن الرحيم شنو هالوگفة هااي
الله يستر منهاا
::جعفر شضام عليةة؟
جعفر :: شنو ضام كلش ماكوو
::لا تجذب علية احچي الصدگ
جعفر :: احچي عدل هدوء شنوو تچذب مو عيب هالكلمة؟
::اسفة بس نفعلت والله من حرگة گلبي
حچيتها وگعدت ابچي لأن بعد مااگدر اقاووم استغفر ومسح على وجهة يهدي روحة اجة گعد يمي سألني بهدو
جعفر :: شنو صاير احچيلي خليني افهم
::علا بنت خالتك
جعفر :: شبيها؟
: تحبك صحيح؟
جعفر :: شمدريچ
::شنو شمدريچ يعني تدري تحبك وسااكت متگلي؟
جعفر :: وليش اگلچ يعني ؟
::شلوون متگلي مثل هيچ مووضوع جعفر
جعفر :: ليش اگلچ واني اصلاً مامهتم الة ولاشاغل بالي ولامفكرر بيه ليش اگلچ واضووجج يعني
::وهسةة اني عرفت وضجت اكثرر احچيلي جعفرر گلبي راح ينفچر احچيلي شنوو الموضوع لا تعل گلبي
جعفر :: وعيونچ ماكو كل موضوع قبل لااتزووج ولااعرفج أصلاً چنت بعدني ادرس ماستر عرفت علا تحبني امي بلغتني وگالت احجزها الك الى ان تتخرج رفضت رفض قاطع لأن كنت شايل فكرة الزواج من بالي نهائي ولامفكر بيهاا وگلت بوقتها لامي حتى لو اريد اتزوج مااخذ علا ولاغيرها من گرايب مااحب اخذ قرابة لان احتمال نتخارب خلينة بعيدن احسن من يومهها ماسمعت بعد اي شي بخصوص هالموضوع ونسيتة وراح عن بالي ليش تريدن احچي على شي مو أبالي اصلاً؟
::بس هية آالها وتحبك لهسة ومستعدة تتزوجك حتى لو تصير زوجة ثانية لليوم هية ترفض العرسان وعدها امل تاخذك جعفر كلام اختها اليوم سچاچين ونبتن بگلبي
جعفر :: اسم الله على گلبچ حبيبتي شگالت الچ علياء اكيد لأن عهد صغيرة بعدهاا
::اي علياء وتحملني اني الذنب عبالك چنتوا تحبون بعض واني فرقتكم تكلي اذا سوت بنفسهاا شي ذنبهاا برگبتچ
جعفر :: لامتسوي شي هاي تحجي وحدهاا لاتخلين كلامها ابالچ
::تگلي لاتصيرين انانية شايف هيچ تريد اطيك شلووون واني طلعت بذيچ الفجرية لااستحيت ولاخفت خليت الرسالة وشعبتني رزايل وتجي هية تگلي لاتصيرين انانية لا اني انانية بيك
جعفر :: هههههه اروح فدوة للانانية يابة تعالي بحضني
شمرت روحي بحضنة يحضني بقوة ويبوس بيةة حچيت بضوجة
::نقهرت لأن طلعت تحبك قبلي جعفر مااقبل وحدة تحبك ترة بس اني احبك جعفر انتَ مالتي لا تشووف روحك علية وعبالك هواي بناات يحبنك ترة محد تحبك غيري خوشش
جعفر :: هههه اي اي خووش
::ليش تضحك لاتحرگ گلبي جعفر
جعفر :: هسة شمسوي حبيبتي محد تحبني غيرچ واني مااحب احد غيررچ احبچ هدوىي ام موسى انتِ
::جعفرر سؤوال
نايمة على صدرة واحچي وهو يمسد على راسي
جعفر :: جواب
::منو تحب اكثر اني لو موسى
جعفر :: هاي شنو نوب رجعتي على الولد
::احچي عادي ماازعل هو هم ابني
جعفر :: هم ابنچ! همزين تذكرتي هو ابنچ
::لاتغير الموضوع احچي يلةة
جعفر :: اثنينكم حبيبتي كل واحد معزتة شكل انتِ مرتي وشريكة حياتي بنيتي الأحبهاا وعيوني متشوف غيرهاا وهو ابني اول فرحتي ثمرة حبنا هذا
::غلبتني بعد مااگدر احچي
جعفر :: هسة كافي حچي اشتاقيتلك
::بعدني ترة
جعفر :: بس نامي بحضني مااسوي شي رجال عاقل
::لا والله چنها طااعة عينك شيخناا لاتخليني اغير نضرتي بيك
جعفر :: ههههههه لا لا ابد وداعتچ اگعد عاقل طفي الضوة و تعالي يممي
::ادلل عيني
بستة بشفتة وگمت تمدد بفراسة طفيت الضوة ورحت يمة سحبني علية ونومني بحضنة بقينة نسولف شوية الى ان غفة بقيت افكر بموضوع علا يمكن نقهرت عليهاا لأن اني مريت بحالتها من حبيت جعفر من طرف واحد شگد تعذبت بس اني جريئة وتقدمت خطوة وخليتة يخطبني هيةة ماحچت بقت على كلام الأهل هو هذا لخة جعفر مايفكر بيها يمكن لو جاية بنفسهاا وگايلة الةة بذاك الوقت چان خطبهاا
بس الحمد لله ماخطبها چا اني شسووي غير امووت
الله يشيلة من گلبهاا ان شاء الله ويرزقها بشخص يعوضها عنةة نمت واني افكر بالموضوع
ايامي مرت مابيها شي جديد مجرد روتين عادي بين دلال جعفر الية وهوسة موسى وحنية خالتي شفق اخبارها واروح عليها كل فترة الصار وياها طفاها فد مرة الله يعينهاا
اليوم الأربعين مال موسى وعدني جعفر باچر الصبح نروح للأمام الكاظم (عليه السلام) حضرت ملابسة ورضعتة ونومت شوية صاير احسن من ينام ساعتين جرة چان كل نص ساعة يگعد علية موتني نومتة
وگمت للحمام سبحت خطية جعفر راح يصير بيه جفاف ماخليتة يوصل الية كل الأيام الفاتت خالتي وامي خبلني الاتطلع الأربعين يلة والزلمة متحمل سوالفهن
عاد اليوم گلت مابيها مجال بعد خطية خليني اعوضة
هو طالع يجيب حلويات وصيتة ثلاجتي فارغة واني استغليتها دخلت سبحت جلفت نفسي جلف خلصت وطلعت لبست ثوب نووم مال عرسي الأبيض سرحت شعري ومكيجت عطرت نفسي والغرفة صرت اخبل
دخل للغرفة وگف صافن يباوع الية سد الباب بيدة العلاگة تقرب مني حچة يسأل
جعفر :: ها نفك الحصار
::ههههه اي
جعفر :: خير ان شاء الله
حچاها وسحبني عليه وگعت العلاگة منة باسني بشفافي بادلتة القبلة بكل حب شالني للسرير عاملني بكل حب وعبر الية عن حبة واشتياقة شفت اللهفة واضحة بعيونة يبوسني ويشمني شم تروح روحة
سحب شعري اشتمة وباسسة عيونة تلمع ...
سحبني لحضنة يعصرني قوي ويبووس بية غمضت عيوني مرتاحة لقربة مني حچة بأذني بصوت ذايب
جعفر :: احبچ يبنية
::اموت عليك ابو موسى
غفيت بحضنة الصبح گعدت من وقت سبحت وتريگنة وطلعنة خالتي ماقبلت تروح ويانة شگد لح عليها جعفر واني هم بس هية ماقبلت عفناها وطلعنة الطريق حلو مشغل دعاء الصباح على طول الطريق
يسوق هادئ بدون صوت حتى موس نايم مابچي ولاگعد وصلنة نزلنة طبگ السيارة مالتة بالگراج وطلعنة فتت للتفتيش بعد ماافترقنة واتفقنة على مكان بعد ساعة نلتقي يمة دخلت للأمام چام فارغ مو ازدحام ابني شايلتة على گلبي وتقربت من الشباك خليت راسي وحچيت بهدوء وية أمامي
مشكور سيدي مولاي موسى بن جعفر ماقصرت مولاي اجيتك گبل شكاية وگلبي مجرووح واليوم جيتك اتشكر منك سيدي گلبي بارد ومرتاحةة
الله اطاني ورضاني هذا ابني مو سى من حبيبي جعفر تمنيت اقل من هيچ بس الله عظيم اطاني اكثرر مما ردت وحلمت سيدي انتم الوسيلة الى الله
ماقصرتوا سادتي
بست الشباك ورجعت گعدت گبال الامام خليت موسى يمي وصليت ركعتين وبقيت اسبح تسبيح الزهراء (عليها السلام) احس گلبي باررد وشعور حيل حلوو رضعت موسى لأن بقى يتنعووص كملت وگمت طلعت لأن صار اكثر من ساعة طلعت لگيتة واگف منتضرتني شفتة من بعيد عبايتة السودة وعمامتة البيضة وجهة النوراني وطولة الحلوة ونظراتة تسحرني
تقربت منة مبتسمة شافني اخذ موسى مني وحچة
جعفر :: زيارة مقبولة ام موسى
::قبل اعمالك حبيبي . جعفرر؟
جعفر :: عيونة
::قبل اكثر من سنة اجيت للامام ابچي وگلبي يوجعني لأن سمعت بيك راح تخطب وطلبت منة ماقصر وانطاني مرادي واليوم اني اجيت وايدي بيدك وابنة ويانة تتخيل!
جعفر :: ولنعم من ابو الجوادين مايقصر بجاها عند الله، تعالي ذاك المصور ناخذ صورة لان موسى اول مرة يجي يزوور
سحبني من ايدي وگفني بصفة بعبايتي الزينبية وهو بعمامتة وشايل موسة اخذنة صورة حلوة
باوعت عليه وحچيت
::احبك شيخ گلبي
رد علية وعيونة تلمع
جعفر :: اعشگچ وحگ ابو طلبة....
