رواية حكاوي الليل الفصل السادس
_لسه مصممه انك تطلقي ؟!
_شايفه ان فيحل احسن من كده؟!
_هو انتي شايفه ان دا حل يا رنا.....انتي كده بتدمري حياتك وحياة يونس......انتي حتي مفكرتيش في يُسر بنتك واللي ممكن يحصلها بسبب قرارك دا
_انا مبقاش يهمني حد غير نفسي يا مريم وانا بصراحه تعبت ومبقتش قادره اكمل مع يونس وعايزه اطلق.....متفكرش ان دي حاجه عيب او حاجه حرام بصراحه
_هو انتي بتتكلمي بجد يا رنا؟!.....انا بجد مش مصدقه اللي انا بسمعه دا انتي كنتي طايره من الفرحه يوم فرحك على يونس ومش مصدقه انك أتجوزتيه فجاه كده مبقتيش طايقاه وعايزه تطلقي منه
_اكتشفت ان انا وهو مننفعش لبعض واننا لازم نطلق يا مريم ولو كملنا مع بعض يُسر بنتي هي اللي هتتأذي بينًا.....بقولك ايه انا تعبانه وعايزه انام شويه ممكن تسبيني دلوقتي وانا هبقي اتصل بيكي بعدين
_ماشي يا رنا ......بس انتي لازم تفهمي ان اللي انتي عايزاه دا مينفعش.....يونس عمره ما هيطلقك يا رنا لانه بيحبك وانتي كمان بتحبيه.....تصبحي على خير
خرجت وقفلت الباب وراها......بصيت علي يُسر اللي نايمه جمبي علي السرير بحُزن.....مسكت ايديها وبوستها......دموعي نزلت غصب عني.....انا معنديش حل غير دا......لازم ابعد عن يونس علشان يقدر يكمل حياته من غيري مينفعش انه يكمل حياته مع واحده زيي.....من يوم ما عرفت ان عندي سرطان وانا مبقاش فارق معايا حاجة غير يونس وبنتي.......انا عمري ما حبيت ولا هحب حد قد حبي ل يونس.....يونس دا كان اول حد احبه وهيبقى اخر حُب ليا......علشان حبي ليه دا وعلشان عارفه انه هو كمان بيحبيني ويمكن حبه ليا اكبر من حبي ليه بكتير فانا شايفه ان دا الحل الوحيد علشان ميتعذبش معايا.....طلاقي منه هيخليه يفتكر اني بقيت بكرهه ومبقاش فارق معايا وساعتها يمكن ينساني ويعيش حياته من جديد .....انا واثقه ان يونس هيقدر يتجوز واحده تقدر تحافظ عليه وعلي بنتنا كويس
_طمنيني يا هاجر.....التحاليل فيها ايه
_ رنا.......هو انتي بدأت بتحسي بالاعراض دي
_يعني بقالي شهرين كده..... بس لما لقيت التعب زاد عليا قولت اجي اكشف واشوف انا عندي ايه.......هو التحاليل فيها حاجة؟!
اتنهدت وبدأت تتكلم وباين علي وشها الزعل
_رنا.....انتي عندك سرطان
اتكلمت بصدمة وانا مش مصدقه
_سرطان؟!
_انا مش عايزاكي تقلقي.....احنا أن شاء الله هنقدر نعالجه وتخفي يا رنا
بدأت اعيط وانا مش مصدقه اللي بسمعه.....قعدت جمبي واخدتني في حضنها
_اهدي يا رنا......يا حبيبتي اللي انتي بتعمليه دا مش هيغير حاجه......ربنا بيمتحن صبرك يا حبيبتي وأن شاء الله انتي هتنجحي وتخرجي من الاختبار دا صدقيني......بس انتي لازم تبقي اقوي من كده
_ بس دا إمتحان صعب اوي يا هدير
_ يا حبيبتي انتي عديتي بحاجات أصعب من دي بكتير وان شاء الله هتعدي من دا كمان......وبعدين احنا كلنا هنبقي جمبك يا حبيبتي وعمرنا ما هنسيبك
بعدت عنها بسرعه......مسحت دموعي
_لا يا هدير ......اوعي يا هدير حد يعرف بالموضوع دا ولا ماما ولا بابا ولا يونس......حتي مريم اوعي تقوليلها حاجة يا هدير
_يعني ايه يا رنا......انتي ازاي عايزه تخبي عنهم حاجه زي كده يا رنا
_علشان خاطري يا هدير اوعي تقولي لحد دلوقتي علي اي حاجة.....انا هبقي اقولهم
_طيب ولما تبداي العلاج يا رنا.....هتعملي ايه ساعتها وهتقولي ايه ل يونس
_لما يجي وقت العلاج هبقي اتصرف يا هدير......انا لازم امشي دلوقتي هبقي أكلمك بعدين......سلام
مشيت بسرعه ومهتمتش ليها ولا لكلامها......خرجت من المستشفى وانا مش مصدقه اللي سمعته......مكنتش خايفه علي نفسي ولا هاممني اي حاجه غير اهلي اللي ممكن يروحوا فيها لو سمعوا بالكلام دا......ويُسر بنتي ايه اللي هيحصلها لو انا حصلي حاجه......ويونس حياته ممكن توقف بعدي.......مكنتش عارفه اعمل ايه ولا اتصرف ازاي......الحاجه الوحيده اللي كنت واثقه منها أن اهلي مينفعش يعرفوا حاجة ابدا
سمعت صوت الباب بيتفتح......اتنهدت جامد اتعدلت في قعدتي.....فتح باب الاوضه ودخل
_مساء الخير يا حبيبتي.....عامله ايه
قرب مني وباس راسي.....فضلت باصه قدامي ومتكلمتش.....قرب من يُسر وباسها
_مالك يا حبيبتي انتي تعبانه ولا ايه
_اه تعبانه شويه.....معلش بقي معملتش اكل انهارده
_ولا يهمك يا حبيبتي.....هطلبلنا اكل انا وانتي دلوقتي.......ارتاحي انتي دلوقتي يا حبيبتي
_لا انا عايزه اتكلم معاك في موضوع مهم الاول
_خير يا حبيبتي.....عايزه ايه
اتنهدت وانا مغمضه عيني وبدات اتكلم وانا مانعه دموعي انها تنزل
_يونس انا عايزه اطلق
فضل باصص عليا وهو ساكت وبعدين بدا يضحك جامد
_هو انتي مش هتبطلي هزارك دا يا رنا ابدا
_ومين قالك اني بهزر يا يونس
_اومال يعني هتتكلمي بجد في موضوع زي دا يا حبيبتي
_ومتكلمش بجد ليه يعني
ملامح وشه في لحظه اتغيرت وبدا يبصلي بصدمه
_هو انتي بتتكلمي بجد يا رنا
_ايوه بتكلم بجد......انا عايزه اطلق
_يعني ايه عايزه تتطلقي؟!
_يعني عايزه اطلق يا يونس ملهاش معني تاني
_ايوه يعني ايه عايزه تطلقي.....عملتلك ايه يعني يخليكي تطلبي الطلاق
_معملتش حاجة يا يونس....بس انا مش عايزه اكمل معاك وعايزه اطلق
_هو حد قالك ان الجواز دا لعبه تلعبي بيها شويه ولما تزهقي ترميها ولا ايه يا رنا.....انتي بتهزري ولا ايه يا رنا
_ولا بهزر ولا حاجة يا يونس انا عايزه اطلق
بدا يتكلم بصوت عالي
_يعني ايه عايزه تطلقي يا رنا......يعني قعدتي مع نفسك شويه لقيتي انك لازم تطلقي يعني ولا ايه يا رنا
_وطي صوتك يا يونس يُسر نايمه
_هو دا اللي همك....ان يُسر نايمه لكن اللي انتي بتقوليه دا عادي جدا وميخلنيش اتعصب واعلي صوتي......انا عايز افهم في ايه وايه اللي مخليكي متغيره معايا بقالك يومين كده
تلفوني رن اخدته وبصيت فيه لقيت هدير بترن
_مين بيرن عليكي دلوقتى؟!
_هدير
_متردي......مستنيه ايه
_انا شايفه ان الموضوع اللي بنتكلم فيه دلوقتى اهم من اني ارد عليها
_لا انا شايف ان ردك عليها اهم من اي حاجة دلوقتي
شد من ايدي التلفون ورد عليها وفتح الاسبيكر وشاورلي اني اتكلم ......بصتله بصدمة وبدأت اتكلم
_ايوه يا هدير
_ايه يا رنا انتي فين…..بحاول اكلمك من بدري وانتي مش بتردي عليا
_معلش يا هدير مخدتش بالي…..في حاجة ولا ايه؟!
_اصل انتي نسيتي محفظتك معايا وكنت بتصل بيكي علشان اقولك
بص علي الترابيزه ولاقي المحفظه بتاعتي…..قرب منها اخدها وفضل باصص عليا بغضب
_الو يا رنا…..انتي معايا
_ماشي يا هدير خليها معاكي وانا بكره هاجي اخدها منك….سلام
قفل التلفون ورماه على السرير بعصبيه
_مش دي محفظتك اللي انتي ناسياها معاها ولا انا بيتهيئلي
_لا مش هي ….هدير قصدها علي واحده تانيه غيرها
_المفروض اني اصدقك يعني ولا ايه مش فاهم؟!
_والله انا مش بكدب….بس انت عايز تصدق صدق مش عايز تصدق براحتك عن اذنك
شدني من ايدي جامد
_سيب ايدي يا يونس انت اتجننت؟!
_انا بردو اللي اتجننت؟!….وتصرفاتك دي عادي…..وصحبتك اللي بتتصل في وقت زي دا وتكدب وتقول انك ناسيه حاجه معاها دا بردو عادي
_هو انت عايز تقول ايه يا يونس…..يا ريت تقول اللي انت عايز تقوله علطول
_افتكر ان كلامي واضح ومش محتاج اني اشرح اكتر من كده
_لا هو واضح يا يونس……بس انا مش مصدقه انك بتفكر فيا بالطريقه دي
_بس انا شايف ان تصرفاتك بتقول ان في حاجه غلط وانك
_سكتت ليه؟!…..متقولها يا يونس ساكت ليه…..اني بخونك صح؟!
_اي حد في مكاني هيفكر في كده يا رنا
_اي حد ميكونش بيثق في مراته يا يونس
بدات اعيط
_انا عمري ما كنت اتخيل انك تفكر فيا بالطريقه دي…..انا عمري ما افكر بالطريقه دي يا يونس لاني بحبك
_طالما انتي بتحبيني عايزه تطلقي ليه؟!
فضلت باصه عليه وساكته…..فكرت للحظه اني اقوله كل حاجه بس مقولتلهوش
_انا هروح انام في الاوضه التانيه وبكره نبقي نتكلم…..مش هينفع نتكلم دلوقتي ف اي حاجة
سابني وخرج من الاوضه وقفل الباب…..قعدت علي السرير وبدات اعيط……انا عارفه ان تصرفاتي غلط وان اللي بعمله مينفعش…..بس انا كل اللي يهمني انه ينساني ويبدا حياه جديده من غيري…..عارفه ان دا غلط وانه صعب عليا قبل ما يكون صعب عليه بس والله انا معنديش حل غير دا لاني خايفه…..خايفه اني قوله هو واهلي وابدا اتعالج والعلاج ميجيبش نتيجة ويحصلي حاجة……ساعتها هو واهلي هيتدامروا وانا مش عايزه دا يحصل…..يا رب خليك معايا وساعدني يا رب علشان انا تعبت ومش عارفه اعمل ايه
دخلت الاوضه وقفلت علي نفسي الباب…..انا مش عارف هي مالها وايه اللي غيرها كده…..انا والله بحبها وعمري ما زعلتها في حياتي……انا طول عمري كنت بتمني انها تكون ليا…..كنت دايما بدعي في كل صلاه انها تكون ليا……يوم فرحنا مكنتش مصدق نفسي انها بقيت ليا اخيرا…..طول الوقت وانا بحاول اسعدها وافرحها علي قد ما اقدر…..عمري ما فكرت اني ازعلها في يوم……ليه عايزه تطلق وليه معاملتها معايا بقيت وحشه كده ليه……انا واثق ان في حاجه هي مخبياها عليا ومش عايزاني أعرفها…..بس اكيد هدير هي اللي تعرفها علشان كده هي اتصلت بيها دلوقتي وكدبت……اكيد كانت حاسه اني موجود جمبها علشان كده كدبت وقالت كده
صحيت تاني يوم خرجت من الاوضه لقيتها قاعده علي الكنبه وماسكه تلفونها
_صباح الخير
فضلت ساكته ومردتش عليا…..روحت قعدت جمبها
_بصي يا رنا…..انا قعدت افكر طول الليل واخدت قراري خلاص
_يا تري ايه هو
_انا مش هطلقك يا رنا……انا بحبك ومش هقدر استغني عنك مهما حصل
_لو سمحت يا يونس
_لو سمحتي انتي سبيني اكمل كلامي للاخر….انا واثق ومتاكد ان انتي كمان بتحبيني واكيد في سبب لكل اللي بيحصل دا…..وانا هعرفه وساعتها هيبقي لينا كلام تاني مع بعض……بس لو انا وجودي مدايقك كده ف انا هسيبلك البيت يومين واروح انا اقعد في شقه بابا الله يرحمه يمكن ساعتها ترتاحي شويه…..انا هسيبلك فلوس هنا ولو احتاجتي اي حاجه ليكي او ل يُسر كلمني علطول
قومت وسيبتها…..دخلت اوضتي وطلعت تلفوني واتصلت ب هدير
_الو يا يونس
_ايوه يا هدير…..عامله ايه
_الحمد لله….في حاجه ولا ايه
_بصراحه يا هدير انا كنت عايز اتكلم معاكي بخصوص رنا
_مالها رنا …..حصلها حاجه ولا ايه……هي كويسه صح؟!
بدات اقلق من طريقه كلامها
_اه يا هدير هي كويسه متقلقيش…..بس احنا لازم نتكلم ضروري…..انا هبعتلك لوكيشن وهقابلك هناك كمان ساعه
قفلت معاها وانا قلقان وشكي في ان في حاجه زاد وخوفها عليها زاد اكتر……غيرت هدومي ونزلت روحت علي المكان اللي قولتلها عليه وفضلت مستنيها لحد ما وصلت
_ازيك يا يونس عامل ايه
_الحمد لله يا هدير…..اتفضلي اقعدي
قعدنا انا وهي وبدات تتكلم
_خير يا يونس في ايه……رنا مالها
_لا ابدا مفيش حاجة…..بس رنا كانت تعبانه شويه
_تعبانه عندها ايه؟!
_عادي شويه تعب كده يا هدير متقلقيش…..انا بس كنت عايز المحفظة بتاعتها علشان كانت شايله فيها حاجة مهمه اوي
_محفظه؟!…..محفظه ايه دي
_المحفظه يا هدير اللي اتصلتي ب رنا بليل علشان تقوليلها انها معاكي
_ااه المحفظه…..معلش يا يونس اصلي بقيت بنسي بطريقه غريبه الفتره دي
_لا ولا يهمك يا هدير…..هي فين بقي
_المحفظه؟!….معايا اه
_ايوه يا هدير انا عارف انها معاكي هاتيها بقي
_شوفت…..مش بقولك انا بنسي كل حاجة…..نسيت احطها في الشنطه علشان اديهالها لما اشوفها
_هدير…..انتي بتكدبي
_اه…..لا……ايه يا يونس اللي انت بتقوله دا……اكدب عليك ليه انا يعني
_يمكن علشان رنا عملت مصيبه ومش عايزاني اعرف مثلا
فضلت ساكته ومتكلمتش
_رنا فيها ايه يا هدير
_بص يا يونس……رنا فعلا فيها مصيبه ومش عايزاك تعرفها بس انا مش هقدر اقولك حاجه علشان متزعلش مني
_قولي ومتقلقيش هي مش هتعرف انك قولتي حاجة
_متاكد يا يونس
_متخافيش والله
_بص يا يونس رنا بقالها فتره تعبانه وكل يوم التعب بيزيد عليها اكتر لحد ما قررت تيجي عندي ف المستشفى وتكشف…..لما جات وكشفت طلبت منها تحاليل علشان اعرف هي فيها اي…….لما التحاليل طلعت اكتشفنا انها عندها سرطان…..بس هي مش عايزه تعرف حد نهائي……حتي مريم مش عايزاها تعرف…..وشكلها كمان مش عايزه تتعالج لاني لما فتحتها في موضوع العلاج مردتش عليا……انا عارفه ان مينفعش نخبي عليك حاجة زي دي بس هي طلبت مني ومكنتش عارفه ساعتها اعمل ايه
كنت بسمعلها بصدمه وانا مش مصدق اللي بسمعه
_سرطان؟!…..يعني رنا عندها سرطان وانا معرفش……كنتوا مستنين ايه علشان تقولوا يا هدير…..لما يحصلها حاجه ساعتها كنتي هتيجي وتقولي؟!
_يا يونس انا كنت ناويه اقولك بس رنا قالتلي مقولش لحد اي حاجه
بدات اتكلم بصوت عالي وعصبية
_وهو الموضوع دا ممكن يتخبي يا هدير…….يعني هي قالتلك متقوليش حاجة ف انتي طبعا لازم تسمعي كلامها وتعملي اللي تقولك عليه
_يا يونس والله انا كنت ناويه اقولك بس كنت مستنيه اما اشوف رنا هتقرر ايه
_هدير ايه اللي انتي بقتوليه دا…..هو انتي مقتنعه بكلامك دا…..هو انتي مفكراه دور برد هيخف مع الوقت
سيبتها ومشيت بعصبيه……ركبت عربيتي وبدات اسوق لحد ما بعدت شويه عن الكافيه……وقفت العربيه……فضلت ساكت شويه وانا مصدوم……مقدرتش امسك نفسي من العياط……بدات اعيط …….انا مش هقدر اتخيل حياتي من غير رنا…..رنا دي كل حياتي ……عمري ما تخيلت انها ممكن يحصلها حاجه انا هقدر اعيش ازاي بعدها…..ازاي متجيش وتقولي علي حاجة زي دي وتطلب الطلاق…..المفروض ان دا اكتر وقت انا اقف جمبها فيه ازاي متقوليش وتخبي عليا…..وايه اللي في دماغها وخلاها تعمل كده
كنت قاعده علي الكنبه وانا بعيط…….يُسر كانت قاعده علي الارض وبتلعب قدامي…..ابتسمت ونزلت قعدت جمبها…..مسكت ايديها وبوستها
الباب خبط…..مسحت دموعي وقومت علشان افتح…..فتحت لقيت مريم قدامي…..سيبتها ودخلت….دخلت وقفلت الباب
_ايه اللي جابك؟!
_دي معامله بتعاملي بيها الضيوف يعني؟!
_بقولك ايه يا مريم انا مش فايقالك بجد
_مش فايقالي ليه يعني…..اوعي تكوني طلبتي الطلاق من يونس بجد
_ايوه طلبت الطلاق منه يا مريم
_لا دا انتي اكيد اتجننتي بجد……انتي ازاي تعملي حاجة زي كده يا بنتي…..هو علشان اتخانقتوا خناقتين تلاته زي اي اتنين متجوزين تقومي تطلبي الطلاق
_انتي مش فاهمه حاجة
_يا ريت تفهميني يمكن انا مبفهمش ولا حاجة
بدات اتكلم بصوت عالي وعصبية
_علشان انا عندي كانسر يا مريم
بصتلي بصدمه
_كانسر؟!
_ايوه يا مريم……انا عندي سرطان……وبعمل كل دا علشان احول اكره يونس فيا علشان انا واثقه ومتاكده ان انا لو حصلي حاجه يونس حياته هتقف وهيدمر وانا مش عايزه كده…..فاهمتي بقي عايزه اطلق ليه
قربت مني واخدتني في حضنها……بدات اعيط في حضنها
_انا خايفه يا مريم…..خايفه اتعالج والعلاج ميجيبش نتيجة …….خايفه يحصلي حاجه…..علشان كده مش عايزاه يعرف ويتعشم في حاجه ممكن متحصلش وممكن اروح منه
_متخافيش يا حبيبتي ان شاء الله خير…..هتتعالجي وهترجعي احسن من الاول……واحنا مش هنسيبك…..هنفضل جمبك لحد متبقي احسن من الاول…..هو احنا لينا غير بعض احنا التلاته يا هبله انتي
_ولا انا ليا غيرها يا مريم
بصينا احنا الاتنين ناحيه الباب لقيناه واقف
_انت هنا من امتي؟!
_من ساعه انك بتحبيني وخايفه عليا لو حصلك حاجه
قرب مني وقعد علي الارض…….مريم سابتنا واخدت يُسر ودخلت الاوضه بتاعت يُسر
_هو انتي فاكره انك لما تطلبي الطلاق وتبعدي ساعتها انا هكرهك؟!……يا رنا انا بحبك وعمر حبي ليكي ما هيقل في يوم…..وبعدين يعني ايه خايفه متخفيش…..لا انتي هتخفي وهترجعي احسن من الاول كمان…..ومش هتسبيني ولا انا ولا بنتك ابدا……انا مش عايز اسمع الكلام الفراغ بتاع العلاج مش هيجيب نتيجه والكلام دا…..انتي هتخفي وهترجعلنا…….دي مش اول مشكله تقابلنا في حياتنا يا رنا ولا هتبقي الاخيره…..احنا عدينا بمشاكل كتيره وهنعدي دي كمان
_انت عرفت منين؟!…..هدير اللي قالتلك صح…..والله لما اشوفها مش هسيبها…..انا قولتلها متقولش لحد
_لا هو انتي تخفي بس وانا مش هسيبك انتي وهي لان دا موضوع مينفعش يتخبي بس دا مش وقت الكلام دا دلوقتي بعدين نبقي نشوف الموضوع دا…..اعملي حسابك اننا بكره هنروح المستشفى وهتبداي علاجك في اسرع وقت ممكن
_بس انا
_بس انتي ايه؟!…..انا قولت اللي هيحصل ومفيش كلام تاني
ابتسمت……مسك ايدي وباسها ومسح دموعي
بعد اربع سنين…..كنت واقف في المطبخ بحضر الغدا ليُسر…….سمعت صوت كلاكس باص المدرسه……سيبت اللي في ايدي ونزلت علشان اخدها من قدام البيت……اول ما شافتني جريت عليا وحضنتني……الباص مشي وانا اخدتها وطلعنا
_وحشتيني اوي اوي يا احلي يُسر في الدنيا
_وانت كمان وحشتيني اوي يا بابا
_عملتي ايه في المدرسه انهارده
_هقولك بس بشرط…..توعدني انك توديني عند ماما علشان هي وحشتني اوي وانا نفسي اشوفها اوي اوي
قعدت جمبها علي الكنبه وابتسمت
_هو انا مش قولتلك يا يُسر يا حبيبتي اني مينفعش اوديكي عند ماما خالص دلوقتي
_ايوه يا بابا بس هي وحشتني اوي
_ووحشتني انا كمان يا حبيبتي…..بس احنا لازم نستحمل شويه صغيرين بس وهنشوفها علطول
_ماشي…..بس قولي انا ممكن اروح اشوفها امتي
_طيب انتي ممكن تروحي تغيري هدومك بسرعه وانا اقولك بالظبط ممكن تقابليها امتي
_ماشي
قامت راحت علي اوضتها…….تلفوني رن……طلعته من جيبي ورديت عليه
_وحشتيني اوي
_وانتم كمان وحشتوني اوي…..عاملين ايه
_كويسين الحمدلله…..بنتك كل شويه عماله تسأل عليكي وتقولي عايزه اشوف ماما عايزه اشوف ماما…..مكنتش اعرف انها بتحبك اكتر مني كده علي فكره
_وحشتني اوي بجد…..ادعيلي علشان انا رايحه الدار علشان امضي عقد الروايه وخايفه اوي يا يونس
_متخافيش يا حبيبتي……انتي احسن كاتبه انا شوفتها علي فكره……بس انا كان نفسي ابقي معاكي والله
_وانا كمان يا حبيبي كان نفسي تبقي معايا بس انت عارف اني مبحبش حد غريب ياخد باله من يُسر وماما وبابا مش هيقدروا يخلوا بالهم منها كويس…..بس متقلقش عليا انا معايا مريم وهدير ومش سايبني لحظه واحده
_انا مش قلقان غير علشان كده اصلا…..خلي بالك من نفسك وابقي طمنيني اول ما تخرجي وتخلصي وترجعي علي اسكندريه…..كفايه انك عند اهلك بقالك يومين وسيباني انا وبنتك لوحدها
_حاضر يا حبيبي هخلص واجي علطول
_رنا
_نعم يا حبيبي
_انا بحبك
_وانا كمان يا حبيبي بحبك اوي…..سلام
_سلام
