رواية علي حافة الثأر الفصل التاسع عشر 19 زينب نور

- اني مدا اصدك اللي دا اسمعه ! انت دا تطعن بيه !؟ 

- ما جاي اطعن بيج بس كاعد اسألج 

- تسألني عن اللي ابطني ابن منو ! انت تشك بيه 

- لا تحطين الحق عليه واطلعينيييييني شكاك بعد الصار وياج اني شلون اعرف .... وهو ديحچي بلا وعي قاطعته واني انهد عليه واضربه كف واصرخ : انت تطعن بيه حقيييييييير 

دا ارفع ايدي الثانية لزمني من اثنين اديه : ولج تمدين ايدج عليييييه 

- واقتلك ياااااا حيوااان اني اشرف منك 

كمت ادفع بيه بجسمي وهو لازم اديه 

ما احس الا امه بكل حيلها تطلع وتكمشني من راسي 

مضمد ولافة شاش انجر الشاش بيدها ويا شعري .. وهي تصك بحجيها وتكلي : ولج بربو* اطكين ابني نمررررة اني اطكيييين ابنييييي 

وهو لزم بديها : راسها راسعا يمممه ايدج 

اني كمت اصرخ واريد افل راسي منها .. وهي تجر بيه حيل دخلوا الحرس اثنيناتهم .. كريم وكف يدافعلي ويريد يوخرها بس رسول بسرعة سحب اقسام وكاللها : توخرين ايد امك عنها لا احط الطلقة بيدها والله 

عافت راسي بسرعة وهو انتفض لرسول ويكله : ابن الكـ** اتحط طلقة برجل امي شو تعال 

لزمه كريم واني اوخر بشعري واكوله : ويحطها بكلبك افتهمتتتتت حيواااانات 

علياء طلعت تجر بامه التغلط وتفشر وكريم لازم عباس ورسول يهدد اذا احد لزمني ينفذ .. اندار عليه عباس : منو الحيواناتتت لججججججج 

كاعد يسحب ايدي وكريم لزمه ورسول ضرب طلقة يم رجليه 

امه فرفحت كامت جرت روحها من علياء وتجر بعباس العاف ايدي بسرعة ويريد يلزم رسول .. اشرت لرسول يطلع .. والكريم يتبعه. 

وعباس يريد يلحكهم .. وكفت كدامه : احترم نفسك واعرف قدرك ولتتجاوز احدودك .. من تطعن بيه مو جوا رجليك براسك يخلوها افتهمتتتتتت 

جرني حيل وهو يصرخ : ادفعين جلابج عليييه ولججججج 

سحبت ايدي وصحت : جنت واحد من جلابي اللي اتكول عليهم لا تنسى نفسسسسك حيواااان 

ضربني راشدي بسرعة 

لزمت خدي بدون اي ردة فعل .. اتجمعت الدموع بعيني .. 

وكتلة : هين .. هين 

عفته وانداريت حتى اطلع .. 

هو يصيح ورايا وامه تغلط وتفشر .. تركتهم مرديت عليهم ورحت للسيارة فتحلي الباب رسول .. 

                                            

              

                    

هستوني صعد عباس صار وراي .. 

لزمه رسول من هدومه وعباس تلازم وياه .. كتله : رسول لتقصر 

من اخذ الاذن مني .. رسول بسرعة جابه ببوكس على وجهه 

وعباس جابه نفسه .. واحد كام يضرب بالثاني ويتلاوون .. نزل كريم وهو يجر بعباس من رسول .. بس سحبه رسول دفعه للكاع واتولاه بوكسيات .. دفعه عباس من فوكه وكام عليه لزمه كريم وهو يجر بيه .. 

اجتي دورية مالت شرطة .. على صوت الهوسة 

امه كامت تدك على راسها .. وشرطة اثنين تراكضوا وصاروا بين عباس والحرس .. طلبوا جناسي .. 

كريم طلع الباجات وكاله : حماية للست فيان بنت السيد دلشاد 

وعرف بمكان ابويه السياسي . 

نزلت الجامة واني امسح بعيوني بدون ما ابجي .. 

حجيت : كريم رسول .. صعدوا 

اجاني الشرطي : العفو ست .. لازم ناخذهم للمركز نحقق وياهم بالحادث 

- ما من حقك تحقق مع انسان يادي واحبه وهم ادوا واجبهم اخذ غيرهم بالعافية عليه وعليك .. اصعدوا 

لزم السيارة :- ممنوع ست 

- على روحك . 

صعدوا رسول و كريم بالسيارة .. والشرطي اعترضهم وعباس ديكوله ان .. خلاف بيني وبين مرتي 

وامه تصيح وتكللهم خالة هدوا علينا بنصاص الليالي يمممممه ادخيلك ربي 

وعباس يسحب بيها يريد يدخلها جوا .. 

رسول يسوق .. والشرطي واكف كدامهم .. ميخلينا نطلع  

داس رسول بالسيارة دفع الشرطي شمره لهناك .. نزلوا الشرطة كلهم داسلها رسول وفات بكل سرعته من كدامهم بسرعة وخروا من كدام السيارة . 

عفنا الهوسة ورانا .. 

وطلعنا للبيت .. الطريق كله دموعي منشفوا 

حاسة بخيبة امل كلش چبيرة .. اني معقولة جنت متوهمة بيه ؟ 

اهل شايفين اللي مشايفته اني وفعلا ميناسبني .. حبيته وثقيت بيه وفضلته وارتضيته .. وتالي يطعن بيه ويسالني بكل وقاحة اللي ابطني منين ! 

شلون كدر ينطقها .. 

اشون كدر يكسرني بكلامه وبفعله هشكل .. 

كلش اتأذيت .. 

وصلنا البيت بابا كان على علم مجرد ما سمع صوت السيارة بالباب .. نزلت للبيت هو واكف بالباب الخارجي مال الصالة .. بس شفته استهضمت اكثر .. 

اسرعت ودموعي زادن واني افتح اديه واكوله : بابا 

هو جان كلش عصبي وعاقد حواجبه .. حضنته ابجي وهو يكولي : اني شكلت فيان ؟ ليش ما تحترمين كلامي 

ابتعدت من عنده 

واني مستمرة ابجي اريد اتركه .. سحبني : لج بنتي ارحمي نفسج ليش دا تسوين بنفسج وبينا هشكل 

            

              

                    

- اني كلش دا اتاذى بابا .. هواية 

رجعت حضنته وهو يمسح على راسي : كافي كافي .. ارتاحي .. شسوي وياج بعد حرت والله حرت . 

اخذني للغرفة .. فتحلي الغطا نمت واني الم رجلية لجسمي وانام على جانب .. شهكة بصدري على كد البجي وبابا كاعد يم راسي .. 

اخذ علاج انطانياه وبقى يحجي وياي 

عيب هالتصرفات انت مرة جبيرة هالامور متليق اصحي على نفسج دا تضرين وتضرين امج وكل الحواليج بامور اتعديتيها بابا ومشيناها هاي السوالف لو مسويتها بالمراهقة نكول طايشة وتغلط بس انت بالغة وكبيرة وعاقلة اترفعي عن اللي ميليق بيج بنتي . 

سطرني العلاج وهو يحجي 

خدرت ونمت .. ما اعرف شكد حسيت على صوت ماما وهي تكعدني : فيون .. كومي ماما 

شلت راسي كلش ثكيل : شكو

- لازم نروح للمحكمة كومي بنتي 

- ما اكدر طفي الضو 

- ما اطفي وراح تكومين 

دا تحجي طبت بيداء : انت على اي اساس ادخلين بيتي ومنو سمحلج 

حجت امي : انتظر احد يسمحلي ؟ 

- هذا البيت يتعذرج اخذي بنتج يمج واتفضلي منا يلا 

- اني اكول لو تتفضلين انت وتسدين الباب يكون هواية احسن 

- لتخليني اصيح الحرس يجرجروووج والله 

صحت : اطلعي برااااااااا 

- انت اللي اطلعين انت وامج افتهمتي .. شنو لزكة خو ما لزكة عندج بيت وروحي كعدي بيه مكابلتني شكو 

مشت ماما للباب كالتلها : ننظر بأمرج ولي هسه . 

وسدت الباب بوجها .. وقفلت الباب واجتني : كومي انت خلصيني 

- ما اكدر تعبانة . 

- ما نتأخر نرجع بسرعة 

غصب جرتني غسلت وهي طلعتلي ملابس لميت شعري لفوك وبدون قطرة مكياج طلعت للمحكمة .. المحامي هناك .. دخلنا للقاضي 

حجيتله الصار كله .. 

والمحامي قدمله التقرير و سي دي خاص بشريط التصوير عبر الكاميرات تثبت دخوله للبيت ذاك اليوم .. 

الجاني عليه امر استقدام بس مجاي .. 

فالقاضي طلب امر القاء قبض .. على المغتصب والمثول امام المحكمة . 

رجعت للبيت .. 

ماما الطريق كله توصيني ما اكول لبابا على اجرائات المحكمة واذا سالني اكوله يم امي ما اعرف شي .. 

            

              

                    

اني راسي مو يمها ولا بحال القضية

احس طافية والاكتئآب واصل مراحل بجسمي بحيث مالي خلك افتح حلكي واناقش اي شي . 

نزلتني ماما كدام باب البيت وراحت 

اني دخلت للبيت .. بابا بالصالة اتجاهلت ومشيت للغرفة 

اجا وراي : وين جنتو انت وامج 

مجاوبت .. نزعت الجاكيت

وتمددت بفراشي .. تقربلي : شلون صرتي ؟ 

مجاوبته 

حشرت راسي بالمخدة 

دخلت بيداء : متتغدون ؟ 

- كومي بابا اكلي شي 

- ما اريد .. اريد انام 

- وراح نضل نوم ليل ونهار ارحمي جسمج يا بنتي راح تموتين 

سحبت الغطا فوك راسي وانداريت .. 

سمعت صوت امي رجعت دخلت للبيت .. فتحت باب الغرفة بابا موجود : العفو نست جنطتها بالسيارة .. 

بيداء تضايقت مشت 

باوعلها ابويه : وين جنتم ؟ 

- حاولت اخذها لدكتورة صديقتي تساعدها بس بنتك مدام محابة تساعد نفسها محد مراح يكدر يساعدها ولا امهر الأطباء 

- بفضلج تمريلها مثل الخطار هذا مو دورج تكابليها 

- تجي عندي واكابلها بعيني .. مو حاطها ابيتك وتعاي كابليها 

- حجج .. 

- والله عاد هذا العندي باي 

- وين 

- اريد ارجع لبيتي شكو بعد وين انت شكو وتحاسبني . 

- زوجج وهاجرج كابلي بنتج افضل منا تكابلين الحايط 

- مشاكلي تخصني ومشاكل بنتك انت حلها 

- شاحل بدل ما اكعد اوبخها والقنها درس ما تنساه ع الفضيحة اللي سببتها الي اكعد اتوسل بيها تاكل اني عجزت ويا بنتج ووياج 

- ساعة الزينة تصيح بنتي مالج علاقة بيها وساعة التوكع وتزل تصيح بنتج تعاي كابليها .. عوف السياسة والفلوس شوية وشوف انانيتك شسوت بيها

- انانيتي ، لو هوسج ونزواتج عفتي بنتج وراكضة ورا واحد ما مشتريج بتراب الكاع .. بنتج ما تفرق عنج بشي اثنينجن واحد 

شلت الغطا من راسي : اني مو بنت احد منكم .. اطلعوا برا وصفوا حساباتكم بعيد عني .. اطلعواااااااا 

ماما مشت بسرعة 

وبابا كام طلع من الغرفة وسد الباب 

رجعت البطانية فوك راسي .. بدت عاد اسطوانة بيداء وابويه وسوالف الغيرة . 

            

              

                    

شلت المخدة خليتها فوك راسي 

مجايني نوم ومنعسانة ابد بس مالي رغبة اكعد واواجه الحياة واعيشها .. احس اريد اختفي انام وتطير روحي من هالعالم .. لعالم ثاني كله احلام . 

بقيت بهالحالة تقريبا .. 

٥ ايام .. ما اطلع من الغرفة حابسة روحي ومطفي الضوا .. ومطفية التلفزيون وصافنة ويا نفسي .. مرة ع التليفون العب لعبة اشغل بيها تفكيري .. 

بابا يحاول بس ارفض كل محاولاته مالي رغبة اجالسهم لو احجي .. دا اعيش خيبة امل كلش چبيرة .. يمكن اول مرة اعيش شعور الحب هشكل ... اندفع وشعور واهتمام وغزل فجأة كلشي ينقلب وارجع للصفر 

جان شي بداخلي ينتظر شي 

ما اعرف ربما رسالة عتب .. او اتصال يعاركني يتجادل ويايا .. اي شي لكن ما بادر بشي .. تركني انطفي لوحدي بظلمة مثل شمعة احتركت بغرفة باردة لحد ما طفت وخيم عليها الظلام . 

دخل بابا .. 

شغل ضوا .. باوعلي راسي بالتليفون العب لعبة طوبات لون اشمره على لون .. ومرحلة تجر مرحلة .. حجه : فيان  

مجاوبته 

دخل سحب التليفون : اكعدي خل نحجي 

كعدت من مكاني .. حجه : هذا الوضع لازم يمتهي سواء ردتي او مردتي افتهمتي بابا 

اتفقت ويا الدكتورة واخذت منها موعد ثاني وخابرت امج 

باجر بابا ننهي كلشي لان الكل ما رضى يطلك بحجة الطلاك ما يجوز عدهم وانت حامل لازم يوكع الطفل .. حتى ننهي هالموضوع 

- هو ما رضى يطلك 

- يكول المرة حامل والطلاك بهيج حالة متصير .. بس اني اعرفه ميريد يطلع من السالفة مفلس يريد مالات .. بس يحلم انطي فلس هالصعلوك هذا .. غصبا ما عليه يطلك بعد متنزلين الطفل . 

- بس هذا طفلي بابا 

- اششششش .. اي كلام غير مقبول ننزل الطفل ونخلص واوعدج ما راح اجبرج بشوان .. انت حرة باختيارج لكن غير هذا الحيوان . 

- اني مدا احجي عنه اني دا اكولك اللي بطني ابني بابا 

- الطفل ابن ابوه بنتي .. واني ما اريد شي يربطج بيه شوفة عينج ع الطلاق ديساومنا وميطلق ويلمح لفلوس .. من يصير طفل شيسوي .. هم راح يكعد يشلع كلبج بيه وابني وابني وندخل بمشاكل احنه في غنى عنها. 

- اني ما راح انزل الطفل 

- هذا مو قرارج اني قررت وانتهى وخلي يكون بعلمج .. انت هسه المفروض على عملتج هاي اللي اتزوجتي من ورا ظهري وحملتي من غريب ادفنج بصف اختج بس اني الرحمتج ومبقيج عايشة فاحترمي نفسج .. وكافي اصحي على روحج . 

- طيب .. اذا كملت تكدر تطلع وتسد الباب بابا 

- فيان 

            

              

                    

- فهمت بابا . 

كام بعصبية وطلع من الغرفة .. 

بقيت صافنة .. ادورلي على فكرة اريد اطلع نفسي من هالوضع لكن مدا اكدر افكر .. عقلي مشوش جداً 

اخذت نفس وكمت من مكاني 

غسلت وبدلت وطلعت بابا مجان موجود .. طلبت من الحارس يوديني لبيت امي . 

دخلت بيت ماما 

هي جانت نايمة .. حست على حركتي كامت : ها يماما اجيتي 

- اريدج تفكرين 

- بشنو 

كعدت من مكانها وهي تلف بشعرها 

- بابا يريد يجبرني انزل الطفل اني ما اريد 

- بس هالحل افضل الج 

- مو انتم اللي اتعرفولي الأفضل كافي تقررون بمكاني اني ما اريد 

- طيب محجيتي هالحجي ويا ابوج 

- ميسمع ، دا افكر اطلع لهولير او لا اريد اروح تركيا او يمكن الاردن ما ادري اريد اغيب اريد اختفي ما اريد احد ابد 

- اي اي تمام ماما تمام ارتاحي وخل اكوم اسويلج اكل شوي تاكلين ونحجي وراح نحلها ووين متردين راح نروح اوكي ؟ 

- ممشتهية 

كامت بلا متسمعني .. 

المساعدة مالتها طابخة حامض شلغم .. 

صبتلي بكاسة وكعدتني بالمطبخ .. وكعدت كبالي .. وكلتني غصب اكلت بس لعبانة نفسي كلش مالي شهية لشي ابداً 

وبقت تحجي ويايا دا تقنقعني هالموضوع اله حوانب ايجابية ويفديني افضل منا انورط بطفل من هيج ناس عشائر و قبليين ممكن ياذوني او ياذون ابني مستقبلا وابويه ديفكر بمصلحتي ومن هالكلام اللي كلمة اسمعها وكلمة لخ اعبرها . 

حجيت : انت شديصير وياج 

- شديصير 

- اكرم 

- متعاركين اني وياه ومالي نفس يرجع للبيت . 

- حتطلكون 

- ما اعرف ما اعتقد .. شوف الامور وين تصير 

بيني وبينج اني تعبت من الشغل وهالامور ببالي اخذلي ببيت بتركيا واعيش هناك واخلص يا دائرة يا مصرف يا رجال لج عيني طلعت روحي الواحد كم مرة يعيش تخلصها ترضي فلان وتسلك لعلان .. اريد ارتاح . 

جاوبتها بسؤال اخر يغير الموضوع : شصار ع القضية ؟ 

- شوان مموجود ببغداد وحتى بالدائرة مموجود .. اعتقد بالاقليم لهذا حروح لاربيل هناك اوكل محامي اخر حتى تشتغل القضية عليه بالمركز وبالاقليم دا اشوف وين يروح مني لا ما اهجوله و ألله لا اشوفه نجوم الظهر بس خلي يصطبرلي . 

            

              

                    

حجتها وهي تسحب الملف المجهزته 

وتخلي كبالي : شنو هذا 

- حتى اوكل محامي كردي هناك يستلمه 

فتحت الملف وكعدت اباوع بالتقرير .. 

قريت التقرير كله .. مكتوب ان الاغتصاب سطحي .. لا يوجد حيوانات منوية بالاعتداء الجنسي . 

اخذت الورقة النسخ سحبتها من نص الملف : ماما اني حروح شوية وارجع 

- وين حتروحين 

- محتاجة اطلع شوية اختنكت من جو الداخل 

- انتظريني ابدل ونطلع سوية 

- تتأخرين 

- لا لا بس اسبح والبس ما اتاخر 

حجتها وكامت دا تركض لغرفتها تسبح .. 

كمت من مكاني طبكت الورقة وحطيتها بجيب البنطرون الوراني وطلعت من البيت . 

تمشيت للشارع اخذت تكسي .. 

طلعت للسيدية .. وصلت البيت عباس .. نزلت دكيت الباب .. 

طلعتلي علياء : خير 

دا اريد ادخل وكفتني : هنا هنا هي شحاسبة البيت فالتو 

- ما ادري كولي لروحج شلون دخلتي البيت وكعدتي بيه بدون اذني .. ابتعدي 

دفعتها سحبتني من ملابسي 

- اتركي ملابسي فوراً 

- اطلعي برا 

- كلتلج اتركي 

- البيت يتعذرج كومي امشي منا يلا 

دفعتها حيل من عندي رادت تدافع ويايا ... وتجر بملابسي .. دفعتها حيل واني اكولها : دوخررررري 

دخلت الغرفة وعباس نايم ع التخم على وجهه 

وامه تريد تكوم .. مديت ايدي وعتيته حيل وهي سحبتني تغلط عليه وامه كامتلي لزمتني من زندي حيل : ولج بربو* انت ما تجوزززززين من عدناااا 

على صوت امه فز .. هي فزة هي وكفه 

سحب امه بسرعة وهو يكللها : شكو شكو يمه شكو .. بس اوكفي 

علياء : طلعها بسرعة لا اشرب من دمها والله 

- اذا اكو احد يطلع انت والوياج .. 

عباس : علياء بس اخذي امي شوية 

علياء : طلعها اكلك 

امه : شو تعاي دا تريد تلزم ايدي لزمها ايدها : يمه بس كافي ترا طاكة روحييييي .. انت تعاي 

سحب ايدي راح لغرفتنا .. 

نايم ابن علياء بالغرفة فز من انضرب الباب كاله : روح هناك خالو 

            

              

                    

طلع الولد وسد الباب 

حجه عباس : شبيج فهميني خبلتيني والعباس سودنتيني 

سحبت التقرير من جيبي : اجيت دا انطيك هذا 

واكولك ياريت تستعجل بموضوع الطلاق 

- شنو هذا 

- تقرير الحادث 

فتحه يقرأ بيه 

باوعلي : تريديني تذليني لو تهينيني لو شنو التريدينه بهالتقرير رايدة تذكريني شلون اعتدى عليييج واني مربططططط 

- لا .. اجيت حتى انظف عقلك واوكفك عند حدك 

مكتوب بالتقرير حالة الاغتصاب ما ممكن بهيج حالة يكون حمل واني بالحادث كنت حامل .. بدل متوكف ويايه بهيج موقف صعب اني مشفت منك غير الخذلان 

اتجمعت الدموع بعيني والعبرة خنكتني واتاري الصوتية ترجف الكلمة كوا دا تطلع من بلعومي : اني شنو ذنبي باللي صار حتى تطعن بيه وباللي ابطني .. اني اللي اتأذيت اني اللي انضربت اني اللي انضريت .. 

رفع حواجبه واتنهد واندار من مكانه واتراجع كعد ع الجرباية وحط اديه على راسه : جانت احلامي بيك جبيرة انت هدمت كلشي فوك راسي متأذيت منهم بكد متأذيت منك 

عدل ظهره وهو يرفع ايده ويتسائل بحسرة - شسويت ؟ 

-كل هذا ومسويت ! 

- احسبيني ما افتهم وكليلي شسويت ؟ 

خذلتج ! تسمين الاعيشة خذلان 

ياهو الجان يكلج فيان اسبقي افكارهم وبلغيهم بزواجنا 

فيان احجي فيان ابوج شاك واكيد ما راح يسكت لا تسكتين فياااان وانت كل يووووووووم حجة 

دفر البطانية من كدامه وكام 

يوم حملة انتخابية 

يوم انتخابات 

يوم اعلان فوز 

يوم الوكت مو مناسب وتوزيع مناصب 

ويوم يجر يوم يجر يوم تاليته شنوووووووووو 

يتعدون على مرتي وهي على ذمتيييييي .. يخطفوني ويقيدوني ويهينوووووني يهددوني بعررررررضي .. يتعرضوووووون لاختي 

يحطووووون تهديد بيد ابن اختي امي بالمستشفى اخوي مسودن من وراي بشارع ما يدري وين كاااااااعي ولج انت شنضريتييييي ولج انت جف محد حط على خدج وتكولين اني اتأذييييت 

جربتي تتأذين مثل ما اذوني بيييييج 

شتأذيتي كليلي 

نفسيتج تعبت حبيبي 

صابتج حالة اكتآب حااااااااد 

كليلي شتأذيتييييييييي 

- كل هذا الصار اني ما ادري بيه ومسويته بيك ولا اذيتك ولا خذلتك بس انت سويييييييت .. بالمستشفى بدل متلمني تروح تضربنيييييي وتكولي بشنو تأذيتي شنو فرقك عن السوااااه شوان انت وياه واحد اخس من الثاني 

كام من مكانه وهو يكولي : هاي عاشت ايدج مدام اني وشران واحد رايتج بيضه روحي . 

            

              

                    

- واني مجايه حتى ابقى 

جاية دا اكولك طلكني وخلصني . 

- ماكو طلاك لحد ما ينحل موضوع الطفل اللي ابطنج 

- اللي ابطني ابني مو ابنك وميخصك افتهمت اطلك بدون ولا اي كلممممممة 

- منين جبتي بلا زحمة 

دفعته : بعدك تشك بيه حيواااااان 

لزم اديه حيل وجرني : ما كاتل روحي عليج 

من وراج ما كاعد اطلع وجهي كدام الناس بعيونهم اني ناهب بت ومحبلها وعايفها .. اللي ابطنج ابني يا ينزل ويتصفى البيناتنا يا تكملين شهورج وتجبيبي وتنطينياه وتروحين تشوفين حياتج وتاخذين ورقتج وياج 

- لتحاول تلوي ايدي باللي ابطني حتى تاخذلك كم فلس و تستفاد براسي متشوف مني ولا مليممممممممم 

دا احجي 

قاطعني وهو يضربني بكف احس طبلة اذني انزرفت حطيت ايدي بسرعة اذني كامت تصفر .. 

هجمت عليه واني اريد اخرمشه واضربه : انت منو وتضربني هااااااا .. منو 

سحب اديه ولفهن على جسمي حيل وقيدني : وخر مني ، عوووووفني ... اترك ايديييييييي

- كافي لا تزيدين البيناتنا كل واحد بينا جاي يحترك لحاله عوفينا ننطفي بلا ما تزيدين النار بكلوبنا 

- تضربني وتكولي كاااافي .. وخر 

بجيت . 

-اسف .. كافي 

تركني : كلامج يدوس بالبطن من خ*بهيج حب الواحد ينهان بيه دكااافي .. يمتى اني طالب منكم فلوس فيان جفيني شرج وروحي . 

- اني اكرهك .. حيل 

-عاشت ايدج زين تسوين 

يحجها ويفرك بوجهه .. يلا توكلي شوفي دربج . 

- كافي .. كافي 

كمت اضرب بيه وادفع وابجي : اتمسك بيه ولو مرة 

متعاركت وياك مرة ولا صارت بينا مشكلة مرة .. اذا ما كتلي روحي .. بنفسي فد يوم تكلي لتروحين اني ما اكدر بدونج .. انت محبيتني ابد .. اني اللي اتوهمت تحبني .. الله لينطيك 

- ترا حرت وياج بالقران 

ما اطلك كتيلي طلكني .. اكلج روحي تكليلي لا تكلي روحي اتمسك بيه .. اشتل روحي حتى ترضين كاااافي دمرتينيييي 

جرت دموعي وبلا تردد رفعت اديه وتقربت منه وحضنته واني الف اديه على ركبته وابجي واكوله : كومة مشتاقتلك اني والله .. مدا اكدر بدونك . 

بادر ولف اديه عليه وهو يلمني بحضنه ويشبگني .. 

كمت ابجي بقوة حط راسه بركبتي يشتم وياخذ نفس بقوة .. ويبوسني .. 

            

              

                    

نزلت راسي منه وحشرت روحي بحضنه 

وباسني براسي بخدي .. ورجعني للصدره .. 

تنهد وذب حسرة وكانه ديشمر عن كل الاذية اللي اتاذاها ويحضني حيل .. رجع باسني براسي قوي ومد ايده اخذ ايدي وتمدد ع السرير واني تمددت وخليت راسي على صدره .. 

كام يمسح على راسي وهو يكلي : مشتاقلج حيل 

يحجي وهو يعصر بيه .. اخذ وجهي يبوسيني وضل يتفاعل ويحاول يتقرب مني 

بس فجأة .. اتوقف 

ووخر مني بسرعة ونزل رجليه من ذيج الجهة وكعد ! 

استغربت وحجيت : اكو شي 

- لا . 

- لعد شبيك .. 

- ما بيه شي 

حسيت موضوع الحادث بعده مأثر بيه ميكدر .. فتعديت الموضوع ورحت حضنته من ورا وخليت راسي على كتفه .. رجع نفسه وتمدد ورجع اخذني على صدره 

حجه : تعرفين عمامي لو دروا اني رجعتج شراح يسوون 

- ليش شعليهم 

- انت متعرفين الصار ؟ 

- شصار 

- مكالج ابوج شسوى ؟ 

- لا 

- زين عاركج اذاج شسوالج بعد ما عرف الموضوع 

- لا بس ديكولي صيري قوية وديحاول يرجعني لحيلي بس اني بدونك مالي رغبة وشي وصار عندي انهيار عاطفي . 

- يعني ما اذاج 

- اذاك 

ابتسم : بعد ما قيدني وحبسني .. داز حرس على اهلي متعدين حرمة البيت وفايتين للبيت جانوا بس اختي وجهالها بالبيت امي يم اخوي .. كاتلين اختي وجهالها ورايدين يعتدون عليها لو ما الجيران تتدخل وتفزع الها وتصير هوسة وعمام .. الحرس وهو نكروا ان همه حاولوا يعتدون عليها بس ابوج بنفسه هددني وراد يرجعلياها وحدة بوحدة مثل ما اني تقربت لعرضه واد يكسرني بنفس الطريقة 

_ هذا شوكت الحجي ؟ 

- هو بفترة اللي اني محبوس .. عمامي كاموا وكلبوا الدنيا وراحو بحيل بس من سمعوا منه اني واهب بته ومحبلها كلبوا ضدي .. وركبوا الحق براسي .. سالوا ابوج اللي يريده لان وكتها انت من طلعتيني هو خلاني ارجع لاهلي فسالوه شنو الرايده بعد .. يتزوج البنية كدام الناس والعالم ويسد الفضيحة .. ابوج ما رضى كاللهم اللي اريده يطلك وما يمر بدرب بنتي بعد ابدا

 وعلى هيج اتفقوا عشائرياً

اطلك ويا دار ما دخلج شر ... 

            

              

                    

- وهسه شحنس.... دا نحجي جان امه تفوت للغرفة .. صرخ بوجهاا 

باوعتنا بهالمنظر نايمين طلعت بسرعة وهو فز يدور قميصه .. وكامت تضوب بالباب حيل وتصيح : اطلع كوم كوا* ولك نسيت الصار بينا وصالحتها كووووم لا انعل ابيك وعلي كوووووم 

صرخ بيها .. 

كالتله : رايحة للهول انتظرك بسرعة كوووم 

مشت .. حجيت : ليش جايبهم لهنانه ؟ 

باوعلي وهو يلبس بقميصه : وبعد الصار اكدر اخليهم هناك !؟ 

- وشصار 

- فيان شبيج انت .. مو جاي اكلج ابوج دخل ع البيت وصارت هوسة .. وسالفة اني ناهب بت ومحبلها طشت بالفرع كله مو مال اخليهم جبتهم لهنا . 

- امك واختك اذا بقوا بهالحالة اني ما ممكن اعيش وياهم . 

- هسه اذا على عيشة امي واختي سهلة دخل نحتار الناس شنكللها تصالحنا وهم ناس شادة راس ناس 

ضحكت راد يكوم .. 

رجعت حضنته من ورا : خل اكوم احجي ويا امي 

- مشتاقتلك هواية ما بودي اتركك ابد 

اندارلي واني كاعدة على اركباتي ورافعة نفسي اخذ حنجي باسني بخدي .. علكت اديه بركبته : جوعانة 

- اصيرلج اكل .. كومي بدلي خل اخذج اوكلج 

وخرت راسي من حضنه وبقيت لافة اديه على ركيته واباوعله :- شتوكلني ؟ 

- اليشتهي كلبج 

ضحكت وهو ياخذ راسي ويضمني .. 

انداريت عدلت ملابسي وهو فتح الباب ديطلع .. لحكته 

امه گابه نار بالصالة . 

ويا ما دخل الصالة فات محمد اخوه .. 

باوعلي وراه .. وامه تكله : ولك منتظر يهدموووون البيت فوك روسنا ولك جلب ما كفاااااك السواه باختك وجهااااااالها ولك رادوا يكسروووون عينك باختك ولك اعبيييييس 

لزمها محمد وهو يندارلي :انتظريني بالحديقة 

- تمام 

طلعت من بينهم وصياححهم خابص البيت 

امه تصيح وعباس ومحمد بينهم يحاول يهدي بيهم 

طلع عباس من الصالة ومحمد ركض وراه .. وين عباس تعال جاي 

- دوخر امحمد ووووخر 

- عباس بس تعال اتفاهم وياك 

جراه ..احجيلنا شرايد كلت ما يصير اطلكها وهي حامل وما ارجعها وبس تجيب اطلك وهسه هيج بدون مقدمات اتصالحت وياها وتريد تحطنا وراك يا اخي لا تفكر بس بروحك فكر بينا ابوها مجررررررم احنا مو كده والعشيرة لو كنالهم رجع اخذ بتهم حرام يصفون ويا علينا اصحى عبااااس كافي 

            

              

                    

- اني راح احاول احل كلشي 

- ما راح تكدر تحل شي .. اصحى عباس اذا مو لخاطرك 

ما راح تكدر تحل شي .. اصحى عباس اذا مو لخاطرك لخاطر امي والحسين راح تموت من قهرها عباس البنية هاااي مو ثوبك 

- بس مرتي وحامل بابني 

- وابووووووها عباس ما يرضى بيك 

- نحلها وياه وناخذه هاي مرتي 

- شتحلها بته وما يريد يطها مخبل انت ياهو الناخذه ويحل ويانا العشيرة ما راح تصف ويانا بعملتك هاي والله 

- اني احلها 

- تحلها بيش من يحطون طلقة براسك ولك اصحى عباس لا تتعبنا . 

- يا اخي مو صغير واني اتحمل مسؤلية قراري .. هدلي ايدييييي 

- ولك حتى لو اتبرينا منك اتذكر عدك جهال لو صابوك بواحد منهم شيصير وياك .. عباس لا تتخبل عبااااس 

عافه ومشى وهو يكلي : امشي 

مشيت وراه .. 

وصياح اهله بالبيت اشتعل وامه تكله شلون تخلي يروح 

اخذ ايدي وكام يمشي عكس .. طلعنا الشارع 

كتله : شراح تسوي 

- نروح لابوج 

جريت ايدي : شنروح لابويه ! 

- نروح نكوله احنا نريد نكمل ويا بعض وهذا قرارنا وانت حامل .. عاد يتقبل يتبرى منج بعد شأنه 

- وهسه نروحله 

- جا باجر ! 

- هو اني اصلا تركت البيت بدون علمه ورحت لامي شلون اروحله مراح نكدر نكوله 

- ليش ما نكدر نكله بالله ؟ 

- يعني مو هسه نختفي كم يوم واخابره مخابرة وبعدها من يتقبل الموضوع نروحله مواجهة منكدر 

- فيان شنو يعني مواجهة ما نكدر انت خايفة !

- طبعا اخاف .. هيج نجي كبل نكول رجعنا صعب 

- شنو الصعب بيها 

- ما اكدر ما راح يقبل وراح يصيح و ما اعرف شنو ممكن يسوي 

- تركت اهلي ورانا يصيحون وانت تكليلي اخاف لا يصيح انت عاقلة مخبلة !؟ 

- عباس اهلك مو مثل ابووويه 

- ها ابوج ابو المنصب اللي لازم نحسبلا حساب ونجي بالتدريج بس اني مريضة وعايفها وراي وجاي حتى اخلص الموضوع ويا ابوج .. مممنوع اهلي طز وابوج لا . 

            

              

                    

- مو هيج اني مدا اكول هشكل بس هسه اذا نروح مراح يقبل 

- ليش احنا منتظرين من احد يقبل مو شوفة عينج كلها تصيح للضالين وراي ؟  

- بس عباس مو هيج والله مو هيج 

وكف : يلا كليلي شلون اسمعج 

- نروح كم يوم نبتعد واخابره واكوله باللي صار .. نتركه يتقبل الموضوع تدريجيا افضل منواجهة ومنعرف شيسوي بابا مو سهل وممكن ياذينا 

- هاه ممكن ياذينا بس من نختفي واهلي وراي وشوف شيعمل بحالهم عادي المهم احنا ما نتأذى . 

- اني مدا اكول هيج 

- لعد شلووووووون كليلي 

- عباس خل نروح بمكان نحجيها هنا شارع 

- مكان وين اكعد اتفرفر وياج .. وهم تصير مشكلة لو نحلها لو نفضها 

- يعني شنو 

- لو نروح هسه بوجهنا لابوج ونواجهه ونكله يا كل واحد منا بدرب 

- ها يعني انت بعدك حاط الخيار الثاني بالقائمة .. تمام اختاره لعد وارجع لامك . 

- اي راجع لامي وحليها انت 

سواها واندار ديرجع 

انداريت وراه : انت صدك تحجي !؟ 

- الصدك شنو ..مالها حل لو نروح لو ارجع كليلي شتريدين 

- ارجع وبس . 

- درووووحي 

حجاها واندار يرجع .. 

ضليت اباوع عليه وهو يرجع .. 

دمعت عيوني وانداريت عنه .. حقه وضعه صعب 

بس اني وضعي هم اصعب . 

شلون اكول لبابا اني اختاريته واريد اعيش وياه 

وهم محد منهم صاف ويايا بقراري .. 

رجعت لبيت امي .. 

واني بكلبي حسرة شلون احجي الموضوع 

من جهة هباس حقه بابا يضغط على اهله حتى يخليه يعوفني .. ومن جهة اذا واجهنا مو سهل الموضوع ممكن يحبسني وياخذه الله عليم شنو ممكن يسوي بيه وبيه . 

هم واني مريضة رادوا يدخلوني عملية ينزلون الطفل بدون علمي لو ما الله رحمني وما قبلت ادخل كبل .. حرام اذا درى بابا ينزلني الطفل غصبا عني عباس مدا يتخيل صعوبة الموضوع ويا بابا . 

دخلت .. واني بالي مشغول 

طلعتلي امي : لج حقيرة خليتني ادخل اسبح وطلعتي مو كتلج انتظريني 

- ماما 

- اي ماما طلعت ادور عليج ماكو .. شبيج شو مسطولة ؟ 

            

              

                    

- اني وعباس تطالحنا 

ضربت على خدودها : عزا العزاج ان شاءالله .. شتصالحتوا يولي ؟ 

- تصالحنا ماما .. 

- ومنو الجان مهتم بزعلكم حتى تتصالحون لج ماما هالانسان ميناسبج 

- بس اني احبه .. 

- شتحبين منه .. يولي حتجلطني والله . 

دا تحجي دك تليفوني 

باوعته وهي تحجي شفته رقم ام عباس كلتلها : هاي امه دا تخابرني 

- افتحي سبيكر دا احجي وياها 

- لا اوكفي ماما الله يخليج خل اشوف شتريد . 

رديت عليها : الو 

- ولج انت يمتى تجوزين من ابني وتعوفينه ولج شلج عليه ولج .. ناقصج زلم كل الزلم تفتر داير مدايرج بربووووووو* ما حلالج غير ابني .. ناوي يرجع مرته وجهاله ووافق وقنع تجين انت تنبصين بوووووسطهم 

- منو اللي وافق يرجع طليقته ! عباس ؟ 

- ما كالج حجينا ويا اهلها راح يرجعها لو حاطج للونسه يصلخج ويبوس بيج يل ما تستحييين 

جرت امي التليفون : ماكو احد غيركم ميستحي طايحة الحظ والله من دنعل ابوج لابو ابنج .. منو انت وتحجين على بنتي .. تطولون ومتوصلون كعب حذائها فكووووركامت امه تغلط وامي تغلط 

لحد ما سدت الخط بوجهه .. واندارتلي : هو هذا الحاية فرحانة اتصالحتي وياه خادعج بكم كلمة وهو مرجع مرته وجهاله ولج اصحي بنتي اصحي هذا رايد يتسلق على اكتافج رايد يستفااااد هذا ثعلب . 

اخذت التليفون .. 

ومشيت واني ادور رقم عباس اتصلت 

رد : الو 

- عباس صحيح دا ترجع طليقتك

- شكو شصاير 

- احجيلي صحيح لو لا 

- صحيح امي حجت بالموضوع ويا خالي وخالي حاجاني ووافقت 

- وافقت ! لك اني صدك مخدوعة بيك انت حيوان بكل معنى الكلمة من بابا ترفض تطلكني وتكولي متمسك بيج ومن جهة توافق ترجع طليقتك 

- احترمي نفسج ولا تغلطين لا والحسين اهيج بت الكلب منو الحيووووان 

- ماكو كلب وحيوااااان غيرك .. اني الغبية الصدكتك .. حقييير 

- ولج ياهو الحقير انت ليش ما تحترمين نفسج .. نزلت عد رغبتج وصالحتج وتعاركت ويا اعلي كلهم وتغلطين انعل ساسج لابو البزرج بت الكواااااا*****

            

              

                    

- بابا اشرف منك ومن امثالك .. طايح الحط ادبسز 

خلي طليقتك تفيدك وغصبا ما عليك وع الخلفك تطلكني افتهمتتتتتت 

- ارجعها وطلاك ما اطلك والا اهيج واعلمج التغلطين عليه منو دماغ سز 

حجاها وقفله بوجهي 

تخبلت .. رجعت خابرته ما رد كمت الوب واني اكولها 

ديلعب عليه جان ديكولي امشي نروح لابوج نحجيلا 

- اي يا حبيبتي يريدج تصيرين ضد ابوج وياه حتى يخليج ويستفاد بيج يكولك هاي تكدر تفديني تخليني فوووك طبعا ميفيده تبقين ويا ابوج .. لج ماما هذا ديلعب عليج شوكت تقتنعييييين وتالي مرتي وبيتي وجهالي وانت خلك وحدة اتزوجها بالسر .. ليش دا تنزلين نفسج هييييج 

نزلي الطفل واخلصي منه ومن وجوده بحياتج .. 

لو صدك زلمة هو وما رايد يستفيد .. مجان تمسك ما يطلك وهو يريد يرجع طليقته .. شنو اكثر من هيج بعد حتى تعرفين هو ديتلاااااعب بيييييج ؟ 

هي تحجي واني كاعدة كدام الميز مدنكة وحاطة اديه على راسي 

وهي تكولي .. ولج انت قدرج جبير وناس تحترمج وتهابج تجي وحدة مهتلفة مثل امه تغلط وتفشر عليييج .. شناقصج وتقبليييين بهالمستوى بنتي حتخبلينييييي . 

كمت ابجي وهي تحجي وتلوم .. 

راسي انفجر على كد ما انقهرت .. طلعت من عدها ومشيت اخذت تكسي ورحت ساعة اني افتر بالتكسي بس لا بالي ويا التكسي ولا بالطريق ولا اعرف وين اريد اروح بس صافنة ودموعي تنزل . 

بس رايدة استوعب 

شلون يتمسك بيه وميريد يطلكني واشون وافق يرجع طليقته ! 

هذه شلون اتفهمها وشبرر لكلبي حتى يقتنع هو فعلا ديلعب عليه . 

حجه السايق : وين اختي .. وين تريدين 

باوعتله وفزيت من هوسة افكاري : ما ادري 

حجيتها واني امد ايدي لعيوني امسحها . 

- بيتكم وين 

- لا لا .. ما اريد اروح للبيت .. احنا وين ؟ 

- اعظمية 

- طيب نزلني على جسر الصرافية 

ساق وصف ببداية جسر الصرافية .. نزلني واني صرت اتمشى ع الجسر واباوع للنهر .. كمت ابجي .. جان دنيا ليل 

بقيت بالساعتين اني واكفة ودا احاول اتقبل ان هو ملعب وديلعب عليه وارجع اكول لا يحبني وارجع اكول وين الحب وهو وافق يرجع طليقته !

وكف شرطي كال : العفو ست محتاج شي 

باوعتله ابجي : لا 

-زين امشي ويانا الضابط مال الدورية يريدج 

-الوكفة ع الجسر ممنوع حتى ضابط يريدني 

-لا العفو بس رايد يحجي وياج 

            

              

                    

-واني مرايدة وخر من وجهي ولتدخل 

ابتعد بسرعة .. اجا الضابط : العفو ست اكدر اشوف جنسيتج 

- وخر من وجهي مالي خلك 

-ست بس جنسيات اجرائات امنية 

-امشي مني انت واجرائاااااااتك مجاية هنا حتى اشوف وجهك ... ولييييييي

-ما راح ارد ع الغلط مالج بس هاي اهانة لضابط شرطة اثناء اداء الواجب .. وتتحاسبين عليها من ناخذج للمركز 

- شوف مالي خلك احجي واناقشك تروح منا لا اسويك فرجة لليعجبه يتفرج . 

حجيتها ودا امشي .. 

دك تليفوني باوعته .. بابا جاوبته 

واني اجر بخشمي انشلت من هوى النهر ومن البجي فهو سمعني اجر بسرعة كال : شبيج بابا شصاير وياج 

-بابا اني تعبانة 

وبجيت 

-وين انت بنتي .. شصاير 

حجاها الضابط الوراي : اتفضلي ويانا ست 

-انت والله العظيم محترتاح لا ما اكوم اهينك يا اخي وووووخر مني وخدك واكفة ع النهر وين الجريمة حتى تلطش عووووفني 

-لا تعلييين صوتج واحترمي نفسج لجججج 

ابويه تخبل وهو يكولي : وين انت احجي بسرعة 

- اني على جسر الصرافية 

-خليج مكانج لا تتحركين 

سديته من بابا وبقيت واكفة ع الجسر والدورية لطشت مدا يتحركون والضابط فد غثة فوك المغثة الاني بيها ملازم شاب ومبين فرحان بروحه هستوى صاير ضابط وملكى غيري يشمر عليها . 

نص ساعة 

وصل بابا وسيارتين سود حماية صفت وراه 

نزل منها وهو ينزع سترته كبل ليوصلني ويلفها عليه : اصعدي بالسيارة بسرعة 

فتحلي الحماية الباب ..

صعدت هو حجه ويا الضابط سلم عليه واجا صعد يمي : وين رحتي 

 -لبيت ماما 

-وشوكت يخلص هالوضع فيان مو معقولة انسانة مثلج ابقى المها واركض وراه شوكت ناوية تصحين وترجعين لحياتج وشغلج كوة عليهم مخليج كاعدة .. والدائرة صار بيها مدير عام غيري بابا ميصير تغيبين عن مكانج مو صحيح هذا شغلج 

-بابا اني رايد استقيل واريد اطلع لتركيا ما اريد ابقى بالعراق بعد ولا حتى بكردستان 

-شنو صار 

-مصار بس اني رايدة ابتعد كلش تعبتني عالايام

ننهي موضوع العملية ونشوف بعدها الله كريم 

سحبت نفسي : مراح اسوي العملية 

-الا هذا القرار مالج حق بيه 

-بس بابا ... خزرني وهو ياشرلي ع الحرس ويكولي 

الموضوع منتهي كافي

ابتعدت منه وسحبت نفسي يم الشباك اباوع منه .. 

جمعت بروحي صارت دموعي تنزل .. محجه ويايا اي شي 

وصلني للبيت دخلت البيت 

هو دخل وراي .. بيداء كاعدة دا تباوع بالصالة 

انداريتله : مو من حقك تقرر عني اللي ابطني ابني لا هو يخصك ولا يخص اي احد اني مرايدة منك شي اني رايدة تعوفني وبسسسسسس. 

- روحي ابجي وولولي بغرفتج بابا الموضوع منتهي ما بيه نقاش 

-ما بيه نقاش شنو دا اكولك هذا ابني ومحايبته بحراااام اني ارييييده 

- لغرررررررررفتج 

تركته واني مقهورة وابجي .. 

رحت لغرفتي .. بجيت بجي الماله حول وقوة 

بابا من جهة يريد ينزلني الطفل وعباس يريد يرجع طليقته 

اني لا شيء عدهم .. تني مو شي مهم المهم مصلحتهم 

كلهم يدورون اللي هم يردوه محد سالني شاريد . 

لوجه الصبح على هالحال 

لحد ما نمت بلا ما ادري من التعب 

كعدني بابا الصبح .. مقبلت اكوم 

جانت باجي هنا .. طلب من بيداء وباجي يشربوني حبة غصبا عني .

كمت اجر بنفسي منهم واصيح وابجي 

اجا هو ديحاولي يغصبني واني صامة بحلكي ما اقبل اخذها .. كمت ابجي بقوة وهو يحاول يجبرني 

وخر من عندي : انت مو ابويه انت عدو اني اكرهك 

رايد تهدم حياتي وتحرمني من طفلي لييييش 

كل امنياتي يصير عندي طفل انت دا تحرمني هالامنية بس لان ابوه معاجبك انت لو تحبني كان حسبته ابني مو ابن غيري بس انت ميهمك غير سمعتك ومصلحتك ومنصبك وحياتك اما اني واحساسي واللي احتاجه واريده مو ابالك 

- ابجي وصيحي واخبصي الجو بابا العملية راح تصير سواء رضيتي اولا 

- مدام ميهمك شيصيرلي لو غصبتني معناها اسهلها عليك من الاخر بدون عمليات 

حجيتها ومسحت دموعي 

ومشيت بهمة وهو لحكني .. طلعت برا اركض 

نزلت الحارس واكف بالباب .. ديريد يندار سحبت السلاح منه بسرعة 

صاحله : الزمهااااااا 

لزم الحارس بالسلاح بسرعة واني اجر وهو يجر وابوية 

كام يحاول يفلت اديه من السلاح 

فلتوا ايدي .. 

وكعت ليورا وابويه يصرخ : انت مخبلة انت مريضة 

يا الله 

وهو يحجي كمت من مكاني توجهت للمخزن فتحت الباب طلعت دبة بانزين سحبها تبدت بكاع كلها كام يصيح ابويه بهستريا 

            

              

                    

رجعت ع الدبة الباقي منها تريد اشيله 

كام يحر ويطلب من الحرس يشيلوني 

كمت اصيح : وخر مني تكدر تجبرني انزل ابني متكدر تجبرني اعييييش مووووووتني اني ما ارييييييد اعيششششش خلصنيييييي اريد امووووووت تعبت اريد امووووووت 

سحبوني للغرفة 

وباجي اجت ورايا : لج داده ليش دا تسوين بنفسج هيج اذيتي لابوج خطية .. استقري كااافي 

-اطلعوا مني 

دخل ابويه : كافي ما تروحين للعملية اكعدي 

-ما راح اكعد لو نزلت ابني اني راح اموت بابا لان ماكو شي يستحق اعيش له .. المن اشتغل واتعب واعيش بدون هدف .. اني مليت هالحياة ملييييتها اريد امووووت 

حضني وهو يحاول يهديني 

واني اصرخ اريد اموت .. سمعته يبجي نزلوا دموعه 

باوعتله : الله يخليك بابا لتقتل ابني خليني اعيش لخاطره .. اني اريد اصير ام ما اريد اكثر من هيج بابا الله يخليك لتموتني 

-اهدي مراح تسوين العملية كافي 

احجيها وارجف وهو يهديني .. 

اخذني للسرير نومني على رجله .. وصار يمسح على راسي .. 

بجيت هواية ونمت والشهكة بعدها بصدري . 

يومين ضبط اني على هالحالة 

معتزلة كل شيء بس بفراشي متقوقعة وابجي 

بابا كلش اتاذى من وضعي هذا .. يدخل يحاول يحجي ما اسمعله .. فقدت شغفي بالحياة نهائياً 

رتبلي موعد مع طبيب نفسي مقبل اروح 

جابلياه للبيت مقبلت اكعد وياه ..الدكتور شخص حالتي على ان هي اعلى نوبات الكتئاب واللي ممكن تدفع الإنسان للانتحار .. وانهاء حياته لما ما يلكى شي يعيش له وفقد شغفه بتكملة العيش .. لازم كورسات علاج نفسي ومضادات اكتئاب .. 

بس كل هالامور اني رفضت مقبل اخذ اي حباية علاج منهم ومقبل اطلع من غرفتي او احجي ويا احد .. 

الدكتور اقترح لبابا ان يهيئلي جو يخليني ارجع احب الحياة واكدر اعيش بيها واواجهاا لمة عائلية سفر احتواء اهتمام .. والا باقل نوبة اكتئاب ثانية ممكن تجي تلكاها ناهية حياتها تماما ..

بابا خابر على امي .. 

كالتله جيبها ببيتها حت ابقى وياها ببيتك ما يعجبني 

نقلني ورجعني لبيتي وهم اعتزلتهم .. مالي رغبة بالكلام نهائياً وبس نايمة بدون نعاس حتى لو بس متمددة حتى التليفون تركته مالي نفس حتى العب واستمتع بيه 

شكد حاولت ماما تخليني احجي او تستوعبني لكن ما جانت الي رغبة بالمبادرة .. 

فهنا بابا .. 

وصى على جهاز كامل 

سمعتهم يدخلون غراض ويسفطوها بغرفتي 

مباوعتلهم ولا صابني فضول اعرف شنو ديسوون

تقرب مني بابا وكالي : فيونه بابا .. شوفي شنو جبتلج 

مجاوبته : شي راح يفرحج كلش

وخرت من عنده نزلت واسي من المخدة واريد اجر الغطا اتغطى .. 

كاللها : جيبي 

حط حذاء مال طفل كلش صغار كدامي 

انتبهت عليه .. ضليت اباوع عليه .. حجه : هذا المن شوفي شوفي اشون حلو ؟ هذا لحفيدي 

باوعتله : يلا اكعدي شوفي الغراض البقية اللي جبتهم 

شلت راسي .. 

جايب كاروك وملابس طفل ومميات وحليب وعطور مال اطفال وكلشي يخط الطفل جابه . 

وامي شايلة كماطين 

واحد وردي والثاني ازرق : بالله حفيدي شرتح يطلع ولد لو بنية 

حجه ابويه : لا ولد طبعاً يورثني ويورث مكاني واشوفه افضل مهندس بالعالم . 

ابتسمت وكمت من مكاني 

واني اباوع غراض الطفل حجت ماما : انت دا تمنعينا نقتله وانت بحالتج هذا دا تقتلي اذا تريدي وحابته مو المفروض تعيشين لخاطره وتهتمين بنفسج .. راح ييبس ويموت وميلبس كل هالملابس وانت بهالحالة . 

تنهدت واني اسمعلها واكلب بالغراض 

حسيت بشعور هو فعلا بداخلي .. واني ام لازم اهتم بيه حتى لو ببطني . 

كمت اكلب بالممية .. 

حجه بابا : شوفي شنو جبتلج باعي باعي .. 

باوعت عليه .. 

طلعت علبة فتحها .. ساعة فضي وبيها خط ذهبي ومرصعة

ماما لزمتها قبلي وكالتله : هذا كرستال لو الماس شكلها توب 

حجه : ساعة ذهب ومرصعة بالالماس سعرها ١٢٠ الف دولار 

- تجنن مبينة خوش ساعة شوفيها 

باوعتها وهزيت راسي ملزمتها 

حجه : البسيها بالله خل اشوفها على ايديج 

سحبت ايدي ماما ولبستني الساعة 

وهي تكولي : اتجنن 

بقيت اباوع للساعة .. محجيت 

كاموا يحاولون يخلوني اكوم .. كمت وياهم للصالة 

المساعدة جابتلي اكل .. اكلت شوية بس بعدني مالي خلك بالأكل 

بهالايام ماما مقدمة التقرير اللي كتبه الطبيب النفسي للمحكمة باربيل وان حالة الاعتدى تسببتلي بازمة نفسية حتى الاطباء النفسية ديعجزون عن المعالج . 

فصدر بشوان امر قبض وتعمم بكل ارجاء كردستان 

وهنا شوان نحصر بالاردن ليكدر يجي للعراق عن طريق البر بالمركز اسمه مطلوب ولا عن طريق اقليم كردستان اسمه تعمم .. 

حاولوا ويا ابويه ..

بابا جان كلش متضايق من حالتي فما استجوب وياهم ابدا كاللهم بسبب اللي سواه شوان بنتي دا تموت وانتم دا تكلولي اقنعها تتنازل . 

فبوقتها سيروان خابرني 

اني جنت بعز اكتآبي .. كالي : اكدر احي نحجي اني وياج ونتفق ومراح نخسر شي لو حجينا . 

طلبت منه يجي للبيت .. 

جانت الافكار تروج بداخلي دك تليفوني عبالي سيروان رجع يتصل .. طلع عباس ديدك كل هالفترة اني مكان اللي نفس احاجي او اجاوب عليه بعد ما عرفت هو متفق حتى يرجع طليقته .. ابتعدت 

بس اكو افكار انتحار براسي 

وهي فكرة كلش محببة اليه لان احس بهالشي راح ينتهي كل هذا الالم الموقفني فقط موضوع الطفل البداخلي وكانه شي يخليني اعيش . 

طلعت برا الحرس احمد نايم ورسول واكف بالباب بمكانن 

دخلت لاحمد وهو نايم اسلاحه ع الميز .. سحبته بهدوء وخليته جوا هدومي وطلعت 

ماما والمساعدة بالمطبخ 

طلبت من ماما غراض تجيبلياهم من ماكس مول .. واكل .. واشياء تتاخر يلا تجيبهم كالت اوصي الحرس هسه اخليهم يروحون يجيبوهن 

- لا روحي انت الحرس ميجيبولي الشي اليعجبني .. انت روحي 

- تمام 

حجت ويا المساعدة : ابقي يمها ماشي 

لبست وطلعت اني طلبت من المساعدة تروح 

كالتلي بس تجي ست سعاد اني اروح 

كلت الها : ميحتاج البسي وروحي ما اريد دوخة بالبيت . 

صفيت البيت كله .. 

سلسلة احداث اختي كلها مثل شويط الفلم ديعبر كبالي 

صوتها .. صراخها بجيها وهي تتوسل بيه .. امتلى قلبي حقد وغيض .. وصارت افكار يابو افكار تجي براسي 

هذه اللحظة اني منتظرتها من زماااان 

واتمنى اليوم اليجيني واكدر اخذ حقنا منه . 

وصل للبيت 

سالني الحرس كلت الهم خلي يدخل 

سحبت اقسام وخليت المسدس ع الميز اللي بين القنفات .. وحطيت عليه خاولي .. دخل هو كال : اسف ربما اجيت بوقت حرج 

- شرايد 

- شلونج اول بداية ؟ 

مجاوبته 

حجه : ما تبشر بخير 

اني جاي لهنا ومستعد شتطلبين انفذ .. فلوس اي شي اي شي باللج تردينه .. اسوي بس اتنازلي عن دعوى شوان لخاطر اطفاله ممكن يروح بيها اعدام هو من حبه الج مرتد يخسرج بس صدكي لو تنازلتي يكتبلج تعهد ميمر بطريقج ابدا.. وسويها صدقة وانت كلبج طيب 

- رايد مني مقابل حتى اتنازل بقضيتي 

- مستعد شنو تريدين اني حاضر لو اعرف نجمة من السما اجيبها والله . 

- روحك 

عقد حاجبه 

حطيت ايدي ع السلاح 

هو ما انتبه بقى يسال : شنو روحي 

سحبت السلاح هو بسرع انتبه لجرته 

كاملي يريد يلزمه لزمته باثنين اديه رايد يتلاوى ويايا وينزله ثارت الطلقة ببطنه .. صرخ بس بعده يسحب بالسلاح ويصرخ بكل علو صوته .. اتركاضوا الخرس بسرعة على صوت السلاح .... يتبع 

_________