رواية علي حافة الثأر الفصل العشرون 20 زينب نور

دخلوا الحرس هو بالكاع يرافس ويصرخ .. 

سحب رسول السلاح .. كتله : اطلع برا 

- ست شسويتي الله يخليج .. 

ودنك يريد يشيله 

صرخت بيه : اطلع برااااااااااا 

كام من مكانه واحمد يكوله : خابر خابر بسرعة 

طلعوا من المكان بسرعة وسيروان بالكاع يرافس ويصرخ من الضربة وبطنه تسيل دم ويكولي : راح اموووت الله يخليج راح امووووت ... اااااخ 

- تتذكر من تركتها تصيح وتتوسل بيك ومتحركلك ساكن وما اسعفتها ودفنتها بليل بدون ميرفلك جفن ؟ 

- فيان راح امووووت .. اتصلي بابويا ااااااااااااااااه 

- سمعتها شكد بجت واتوسلت بيك وانت مهتميت ! 

ها .. سمعتها .. مسمعتها .. تركتها تموت .. 

واي هيج راح اتركك 

كمت من يمه وهو يصيح .. قفلت الباب .. 

ورجعت كعدت مقابيله .. 

يتلوى ويرافس وينزف كدامي 

واني اباوعله بدون اي شعور غير شعور الذاكرة وهي تتخيلي اختي شلون انقتلت وماتت كدامه .. 

دك التليفون سحبته وجاوبت .. 

رديت .. اجاني صوت عباس : الو .. مو اخابرج عود ليش متجاوبين ؟ 

- قتلته 

- منو ! 

- سيروان 

- سيروان منو انت يون شكتلتي فياااان وين انت 

- هشكل جانت تبجي وتتوسل بيه حتى ميموتها بس موتها 

وهسه اني كاعدة دا انتظره يموت 

- وين انت ولج منو هااااااااااااااذ حاجيني 

- اني هسه كلش مرتاحة 

نزلت دموعي بهدوء وبدون بجي ..

تركت الخط من ايدي وكعدت اباوع عليه وهو يشهك .. 

مر وقت ما اعرف شكد .. ماما كامت ادك بالباب قوي والحارس يدفع بيه يريد يكسره بس الباب الخارجي خشب قوي ثكيل مو بسهولة ينكسر كاموا اثنين من الحراس يدافعون وامي تدك وتكولي : افتحي الباب فياااان .. افتحييي الباااااب 

سمعت باب المطبخ انكسر الكزاز مالته .. 

انفتح واجا للباب الثاني يفتح بالخشب مديكدر كاموا يكسرون بيه انكسر .. 

دخل الحارس وامي دخلت وراه ركضتلي 

شافته بالكاع وفاقد كامت تلطم على خدودها وتكولي : عزه بعينج ولج شسويتي بالرجال .. فيان كتلتي .. 

                                            

              

                    

الحارس ضل لازم راسه وامي تلطم .. 

فات عباس وراهم يركض .. دخل اني كاعدة كدامه واباوع لسيروان يمكن مات او فقد ما اعرف .. 

وهو يصيح : شكتلتي وينه شصاير 

باوع بسرعة على سيروان بالكاع تقربله بسرعة وهو ايده على ركبته ما عرف كام يحط اذنه على صدره .. ويتفحصه ميت لو عايش 

شال راسه وباوع : الرجال ميت ! 

كامت تدك على راسها : دخيلك ربي ولج مات .. مات الولد مااااااات شسويتي بيه فيااااان ... كتلتي الرجااااال دخيلك يربي شراح نسووووي شنكول لاهله 

واني كاعدة دا اباوع عليهم 

ما اعرف الحالة المريت بيها .. غريبة 

قتلته وكعدت اباوعله لحد مطلعت روحه بدون ميرفلي جفن 

وكانما دا استمتع واني اباوعله .. احس ع الباقين بس عيوني تحاوط الجثة وشي من داخلي صار يخفت .. 

صرت احس راسي ثكل كلش 

مدا اكدر احرك اي شي .. بمجرد ما غمضت واني كاعدة اتخربطت ووكعت على صفحة .. كامت تصيح ماما ولزمتني تهز بيه احس بيها .. بس جسمي كله فقدته .. 

جرني عباس منها بقوة .. 

كام يضرب على خدي ويصرخ بوجهي 

مدري منو انطاه مي .. شمر على وجهي .. فزيت من برودة المي وفتحت عيوني .. بس فتحتها صارت عندي حالة غريبة 

كمت ارجف بشكل مو طبيعي .. واون 

امي كامت تبجي وتصرخ وتصيح : بنتي تخبلت يربي بنتي راح تروووووح من ادييييه 

دخل ابويه للغرفة وعباس يحاول بس يلزمني ويصرخ على غطى .. 

ركضت اني جابتله البطانية وهو يلفها ويكلي : بس اصحي احجي وياي .. فيااان 

سحبه بابا وهو كاعد وكاله : انت العلماها على هالدرررررب انت الشجعتها اتكتله .. ماكو غيرك دمر البنييييييه 

دفعه عباس وهو يكله : انت الدمرتها ماكو غيرك دمرررررها 

هاك هذا بيتك وهاي فلوسك ومناصبك اخذهننننننن كلهن وساعدها بييييييهن .... ساعدها شوفها شجاي تسوي بروووووحها من وراااااك .. 

تهجموا عليه الحرس يردون يلزموه وعباس يتعارك وياهم واني تبجي وابويه يصيح .. كمت احط اديه على اذني واصرخ بكل قوتي مثل المحترك . 

كلهم صاروا داير مدايري .. 

تقرب عباس كدام ابويه وهو يلف بالبطانية حيل .. ويكلي : بس اهدي واصحي على حالج فيان شجاي تسوين بنفسججججج اصحي . 

- اريد امووووت .. تعبت اريد امووووت .. اكتلوووووني 

حضني وهو يحاول يهديني .. 

وابويه والحرس احتاروا وين يودون الجثة وشيسوون 

يجيبون طبيب يتحققون من حالته .. لو ياخذوه مستشفى ويكولون لكيناه واكع .. لو شيسوون بهالحالة .. 

            

              

                    

وامي وعباس انضربوا على راسهم وهم ديحاولون يهدوني 

شربتني ماما مي وعباس لازمني .. 

حجه ابويه : تعال لك .. كوم مو تريدها .. مو مسوي روحك كاتل نفسك عليها .. انت تتصرف وتشيل القضية 

عباس : تريد الذب الموضوع براسي !؟ 

- مو رجلها مو تكول مرتييي حلها لو رايدها بس لفلووووسها بساعة التسوي المصايب احنا النبتلي هاي مرتك هاهية شيل القضية وهسه تتصرف وتحلها تقدم روحك تشيل الجثة واتصرف بسرررعة . 

كام يباوع على امي .. 

لازمتني وحاطة راسي عليها .. 

عباس يبارع للجثة وللحرس وابويه .. 

حجه : بس لو تصرفت تطلع من حياتها وما تخدل بينا 

- الى قير وبئس المصير انت وياها .. كوووم 

حجت امي : وشيسوي لتتصرفون تصرف محاسبي تروح تتورط هي .. عباس شراح تسوي 

كام للمطبخ امي كعدتني وكامت وراه 

وهو يكللها : بس جيس زبالة شوفيلي وينهن جيس الزبالة 

كاموا يدورون بالجرارة .. ملكوا 

راح جاب بطانية .. 

هم كلهم واكفين وابويه يهدد بالحرس في حال اي كلمة طلعت عن فيان راح يدمرهم هم وعوائلهم .. وعباس يشيل بالجثة ويحطها ع البطانية 

حجه ابويه لو ردت تنقلها وفر سيارة لا تتوقع اورط اي سيارة من سيارات الحماية اللي عندي بهالقضية .. 

اندار لامي عباس وهو يكللها .. ابقي يمها اني رايح شوية واجي 

حجه ابويه : راح تشرد .. وين هنا تعااال

ما جاوبه عباس وهو يمشي بسرعة طلع من البيت 

والحثة ملفلة وابويه يوجهلي الحجية ويصيح : انت انجنيتي رسمي انت لازم تنشم ين بمصحة نفسيه لازم اعرفج بالشماعييييية .. انت مو عاقلة ابدا ماكو انسان عاقل يقتل بشر وانت قتلتي انساااان بريء 

فزت امي وهي تكوله : برييييء مو .. ما قتل بنتي وخلاني بحسرتها سويته بريه بوقت لا م انت تقتله ع السواه ببنتنا .. الله لا ينطيك العافية ان شاءالله الله يهدك ويدمرك مثل مدمرت بناتيييي 

- مخد دمر بناتج غيرج انت امرأة غاوية ونزوانية ومو منضبطة وبناتج طلعوا عليييج مو محترمااااات ... اني ابتليت بخلفة مايلة منج لا بنت ولا ولد فلح منج يا سزززز 

كامت تتعارك وياه 

الحرس طلعوا برا .. اني حاطة ادية على اذاني ونايم صفح وساحبة رجلية لصدري ومتكعورة ويا البطانية وابجي . 

نص ساعة يمكن .. 

اجا عباس .. دخل يباوعوله ميعرفون شيريد يسوي .. حجه : بس كل للحرس خل يطلعون السيارات اني رايد ادخل السيارة 

            

              

                    

ابويه سأله : شراح تسوي اي سيارة 

- مو شغلك بس بلغهم 

انغث ابويه وكام يتنهد .. وبلغهم 

راح عباس دخل السيارة .. كام يحاول يشيل بالجثة .. ابويه رفض اي واحد من الحرس يساعدة 

شاله بالبطانية على ظهره وراح يركض بيه 

كمت من مكاني لزمتني امي : وين رايحة 

-ما اريد ابقى هنا 

-خليه يتصرف بنتي استري علينا لو صارلج شي شلوووون 

- الكلب هذا قتل اختي وبدل متقتلووووه انتم دا تعرفون عباس يشيل القضية وخروا 

ردت اطلع ابويه صاح على امي : دخليها لو حاولت تطلع تنكسر رجلهاااااا 

اني تسحب بيه واني كمت اسحب بنفسي واصرخ .. 

شفت عباس طلع وابويه واكف ع الكاميرات .. حجه ابويه : سدوا الباب وادخلوا نظفوا الاماكن والسلاح اللي انضرب بيه اتلفوه .. بسرعة  

وهو ياشر لرسول يجي بسرعة .. وكفله مد ابويه راسه واني تحجي وتسحب بيه واني اباوعله .. كام يشاوره 

رسول راح يركض طلع من البيت 

كتله : على شنو وصيت رسول !؟ 

: مو شغلج ومن اليوم راح تدخل مصحة نفسية وغصبا عليج بعد ما نخلص من هذا كله .. امسحوا الدم بسرررررررعة . 

- انت دزيته ديراقب عباس ويصوره 

امي كامت تسد بحلكي وابويه كام يصيح ويتهجم بعصبية محمد يركض للحمام ويجيب ادوات تنظيف وامي سحبتني فوك للغرفة 

كمت طلعت جنطة ظهر 

وهي تكولي : شتريدين وين رايحة 

-اتركوووني .. مو تريدون تخلصون مني عوفوني 

كمت اسحب واحط بالجنطة 

دخت الكاع بقت تفتر بيه .. وامي تحجي وساعة ترزل ساعة ترشد وخايفة علية وبعدها كلبها طاير من اللي صار متعرف شتسوي بيه ووين تشردني .. من شافتني دخت سرعت ولزمتني بسرعة 

كعدت .. 

-وتالي بنتي اني حتخبل دا اشوفج دا تموتين كبالي شسوي

- اريد اروح لسليمانية ساعديني 

-تروحين وين بنتي الله يخليج كاااافي 

- اذا محتساعديني اني حروح وحدي 

-شتسوووين بسليمانيييية ؟ 

-ازور جيهان ماما مشتاقتلها .. 

-بيا حال انت بنتي وتزورين انت مريضة خلي اخذج دكتور انت حتكوتلين نفسج بنفسج 

            

              

                    

كعدت ابجي من وجع راسي .. 

شوية وحسيت عباس جوا يتصايح ويا ابويه 

بسرعة فزيت من مكاني اخذت الجنطة وطلعت من الغرفة انزل .. وماما تتبعني وتكولي : فيان مو هيج فيان .. حبيبتي 

وكفت .. وعباس يكله : اخذها وغصبا ما عليك والله 

وابويه يكوله : اطلع منا بسررررعة .. امشي منا اخابر الشرطة عليك والله وكل التصوير عندي من ذبيت الجثة اباب بيت شوان اني مراقبك لو ما ابتعدت من فيان ادمرك 

وابويه يحجي اني نزلت من باب الصالة عبرت ابويه ووكفت كدام عباس : لو بلغت عنه راح اروح بنفسي اعترف .. 

سحبني عباس واني احجي واصيح : وراح افضحك بكل مكان لو ما عفتني بحالي .. السجن والموت اهونلي من اللي تعيشنيااااه 

صاح ابويه- انجبي لج ادخلي جوا 

عباس : امشي اطلعي معليج بيه خل يهدد منا للصبح 

رد: لو طلعتي لا ادبج هالمرة واعلمج الادب طبي جواااا

- راح اخذ مرتي وانت جرب تسويها 

- ما الك مرة عندي لو حاولت تطلع اتبعك بالحثة الحملتها افتهمتتتت 

- حتى تعرف هي على منو طالعة يييا استاذ 

يحجي واني ابجي واحجي : ما اريد ما ابقى عوووفني .. 

سحبني عباس وهو يريد يطلع وابويه يصيح والحراس اعترضونا 

صرخت امي وهي تكوله : انت مكفاك الديصير بينا كافي البنية دا دامر بنفسها اتركها عوفها اذا يكدر يعالجها ويصحيها اتركهااا البنية دا تموووووت 

شمنتظر تحط طلقة براسها وتموووت 

ماتت وحدة عوف الثانية تشوف حيااااتها كافي .. هالمرة ما اخليك تحت رحمتك والله .. امشي 

صرخ : بنتج لو طلعت من هذا البيت مالها عندي اي شي ولا هي بنتي ولا اعرفها وانسى عندي بنية واتبرى منها الى يوم الدين وامام الجميع 

عباس : خير ما كلت .. ولا هي تريد منك شي 

دفع الحارس ويريد يطلع 

والويه يكوله : تحلم تسوف براسها فلس ابن الفكررر عبالك من تاخذها تنام على تل فلوس لا اخليك انت وياها حسرة عليكم الفلس . 

طلعنا من البيت وبابا يصيح 

ماما طلعت ورانا .. انطته سويج سيارتها وصعدنا بالسيارة 

كتلها : اني اريد اروح سليمانية 

- اي سليمانية لا ما ناخذج للدكتور .. اطلع بينا للمستشفى الاهلي 

كمت ابجي واكولها : ما اريد عوفوني .. ما اريد 

وانحب 

            

              

                    

حجه عباس : فيااااان .. بلا بجي كافي اخذج وين متردين بس هالبجي والسوالف .. فضيهن كافي .. 

- كولي تاخذني لاختي 

- اوصل امج لبيتها واخذج وين متردين 

- واعوفها بهالحالة وين تاخذها 

- انتم يمتى تستوعبون حالتها هاي علاجها مو بالمستشفى مجاي تشوفون الادوية الكاعد تنطوها الها حتى تهدونها وتخلونها تحت سيطرتكم جاي اتدمرها كاعد تشوفون شتسوي من كواااارث مرة صوبت زلمة ومرة تكتل ثاني الثالثة تكتل روحها كاااافي فكوا ياخة عنهاااااا . 

-وتريد تاخذها بهالحالة لمقبرة المنبوذات 

- راح اخذها انت استراحي رجعي واتراحي منها مو هي مرتي مو اتبرى منها اتبري منها مثل ما سوا ابوها وخلوها الي .. يمكن اني بيه خير الها اكثر منكم عوووفونا شجلبتووووا يا عمي لا رايد فلوسكم ولا سياراتكم وشلكم خير عدها اخذوووه فكووونا 

- احترم نفسك واحجي ويايا عدل بنتي ما ابيعها ولا انطيها .. 

- محترم نفسي وعلى اخر احترام وجاي اكلج بتج مرتي 

- واني الحجيت هالحجي كبال ابوها وطلعتكم من بيته اني وياك مو ضدك بس اذا اتحاول تنفخ روحك عليه واللهي لا اندمك واخليك بحسرتها والله وتشوف مني شي بعمرك مشايفة 

- اي هسه الرايدته من عدنا شنو ؟ 

-اني اريد منك وانت شنو واخذ منك اني رايدة بنتي 

-بتج طالع بيها سليمانية 

- اطلع وياها وما اتركها 

- يعني اطلع .. 

- اطلع 

.. داسلها وطلع بوجهه لسليمانية .. 

اني نمت وماما بقت كاعدة .. بنص الطريق وكف السيارة عند مطعم سياحي .. ونزل فزيت لكيت ماما تكلب بتليفونها .. حجيت : ليش وكف 

- ما اعرف ! خاف ديروح حمام ؟ 

- بيش ساعة ؟ 

- ب٧ ونص 

- راسي ديوجعني هواية 

- لانو ماخذتي علاجج بنتي .. دا ادمرين نفسج 

خلي اخابر ابوج اشوف شصار عالمصيبة اللي سويتيها 

اتصلت .. رن فتحت سبيكر 

رد ابويه : ها سعاد 

- ها دلشاد كولي شصار 

- شصار بعد البلية البلتنا بيها بتج 

- اي دروا اهله 

            

              

                    

- طبعا دروا وخابروني وهسه اني يمهم .. الشرطة والامة مشتعلة كليلها لبتج هو مخابرج محاجيج .. خلي ابالها لو طلعت السالفة عليها اذبها براس عباس وعندي كل الادلة اللي ادينه محد وصلها الهاحال وشل حالنا غير هالسكط هذا . 

- هسه دشوف الوضع والله كريم 

- وين انتم 

باوعتلي : ابيتي ..

- احسن لتخليها تروح ويا هذا الفكري اخذيها يمج وعقليها خليها تصحى على روحها ترا والله اضطر اسجنها بمصح نفسي تتعالج من الخبال اللي هي بيه 

- ان شالله لا تنسى شيصير بلغنا 

- تمام ديري بالج عليها . 

- ان شاءالله 

قفلته : بس عباس ماله خص بالموضوع لا من قريب ولا من بعيد ليش ورطه بالادلة !؟ 

- ابوج ديحاول يسوي شي ويطلعنا من الورطة اللي انت ورطتينا بيها .. ادعي الله تعدي على خير اذا عرفوا انت ورا السالفة محد مراح يخلصنا من السالفة . 

اندكت الجامة 

باوعت عباس .. نزلت الجام 

انطاني عصير وجاي لأمي اخذت منه وحجه : اذا كاعدة انزلي للحمام خاف نتأخر لحد منوصل للبيت . 

حجت امي : اني اكول نعوف المقبرة هسه ونروح للبيت باجر من الصبح نزورها هي مقبرة مهجورة ومو زين نطب بهيج وقت من الليل 

- لا اريد اشوفها 

عباس : هسه دنزلي عود نحجي بعدين بس فضونا 

حجت ماما : لعد خلي انزل للحمام خاف صدك نتاخر .. تنزلين ؟ 

- لا ما اريد 

نزلت من السيارة وهو يكولي : انزلي مدام كاعدة 

- راسي يوجعني ما اريد 

- انزلي 

حجاها وفتح باب السيارة واخذ ايدي : اااااخ لتجر بيه وخر 

- دمشي 

- ما اريد انزل دكولك راسي يوجعني 

- اي لازم تاكلين 

- ما اريد اكل 

- من تاكلين لروحج عود صومي طبج مرض هسه مو من حقج تصومين من الاكل وجاهل ابطنج 

- ليش تغلط 

- احمدي ربج جاي اعديها بغلط انزلي لا تخليني افتكها وعلي 

            

              

                    

- ما اريد 

جر ايدي حيل : اااااخ عوفني .. 

اجر بيدي هو ينزلني كوا 

- راح اوكع وخر راسي ياذني اني انزل 

نزلت سد باب السيارة ورايا .. واني مشيت بس كوا امشي احس رجليه بيهم بسامير ياذوني حيل .. كمت مثل الاعرج لزم ايدي من العكس .. 

دخلني المطعم فارغ كلش .. يا دوب العاملين يبين واحد منهم 

كعدنا اجا واحد دياخذ طلبات .. كاله كباب نفر وشوربة عدس .. ولبن . 

اخذ الطلب وراح 

باوعت لعباس داير وجهه يباوع للصفحة الثانية حجيت: شجابك 

التفتلي : وياي ؟ 

مجاوبت ضل يباوع بوجهي .. حجه : جابني رجليه 

- بطل هالاسلوب السخيف وجاوبني 

- والله ما اسخف من اسلوبي الا انت والا ما متمرمطين هالمرمطة هاي وما عاجبج 

- مجبرتك تجي ولا طلبت منك حتى 

- وهسه شتريدين 

- ما اريدك 

- تمام 

- لتسد الموضوع 

- شسد الموضوع ترا راسي دايخ ووضعيتي كامزة وام امي مشتعلة صمي حلكج وفكينا 

- محد جابرك تدوخ راسك بيه افتهمت جان تكدر ترجع طليقتك وتكابل اطفالك وتخلص راسك مني 

- نحجيلج وياها 

- انت ليش دائما اسلوبك هيج وتسفه المواضيع اللي احجيها 

- لانج سخيفة وتصرفاتج سخيفة وما تنحملين 

- وشجابرك بيه 

- بعد قسمة ربچ هو شلون تصير شلة الحال بيضة حمرة 

- محد جابرك تكدر ترجع واني اروح لطريقي واتحمل السويته 

- شلون تتحملين تنسجنين قصدج 

- لو بقت عليه ما انسجن بس لو ادخلت انت راح انسجن 

- شلون 

- مو مهم المهم تطلع روحك من الموضوع .. ااااخ 

نزلت راسي واني افرك بيه من الالم .. 

اشر للويتر كاله : مي 

جابله بطل فتحه وحطه كبالي اجتي امي .. وهو يكولي : اشربي يقل الالم 

            

              

                    

وكفت امي : بعدها تتاذى كومي غسلي بلكي ترتاحين 

مجاوبتها .. حجه هو : العناد شلون يصير هي حتى وي روحها تتعاند .. 

- انت معليك 

-انطمري شو انطمري 

-لتغلط 

- انطمرررري لدوخيني 

عدلت كعدتي وامي كالتله : احترم نفسك لتتجاوز عليها 

- انت محد يمج بلا زحمة اني ومرتي لا تدخلين 

حجيت : لا عبالك اني نسيت 

اجا الويتر حط الاكل سكتت .. 

هو يفرك براسه .. حط كدامه كاله : يمها يمها رحم الله والديك 

حطه كبالي .. 

اباوع للاكل كل نفس مال الي لعبت نفسي .. 

ماما اخذت الخبز واخذت نص من الشيش وسوت لفة .. حجه : اكلي 

- معليك 

- انت والعباس لا ما يتكسر راسج ما تمشين عدل وحق هو الحسين 

حجاها وهو يمد ايده يسوي لفة 

- منو هذه اللي اتسكر راسها بالله ؟ 

- انت ! 

- فنك اذا ابن ابوك كوم سويها .. 

ضربني على راسي بسرعة بمجرد ما حجيت صحت : ااااااخ راسي ياذيني 

واني دا اصيح حط اللفة كبالي : هاج اكلي 

- وخر مني ما اريد 

- اكوم احطها بحلكج غصب والله اكلي 

- انت شبيك اليوووم احد دافعك عليييه 

- اي امي حجت باذني واجيت اطيح حظج 

حجت امي : عشتو لا الك ولا لامك 

-هاج اكلي 

- لا شو طيح حظي دا اشوف شلون ؟ 

- خل نوصل مو هسه نتعارك بالبيت نتباطح اطلعلج البكلبي كله.. اكلي هسه خلي نطلع تأخرنا 

- وخر 

- بس شوية بداعتي 

اخذت اللفة من ايده وهو يفتحلي بطل اللبن .. اشربي من هذا شوية يفتح شهيتج ويقلل اللعبان نفس 

بيده وشربني لزمته .. 

بالفعل من شربت اللبن ارتاحيت احسن .. 

كمت اكل من اللفة شوية شوية .. قربلي الشوربة : مفيدة الج اكلي تنطيج طاقة جسمج تعبان . 

            

              

                    

كمت اكل شوية شوية وهو رجع ظهره .. طلع جكارة يدخن 

ماما تباوع عليه .. رجعت باوعتلي اشرتلها بحركة بحواجبي بمعنى شكو 

- دواج و الله .. صارلنا اسبوع كطعنا ارواحنا بس حتى تاكلين شوية تتعززين على روسنا ومتقبلين تحطين لكمة بحلكج ومعتزلتنا وهسه هذا يدك فوك راسج وانت تاكلين ومستمرة 

عباس : غير ما تفتهمون البت طالبة تزاوج اجيبولها اكل شنو .. تريد رجل رجل ما تريد اكل . 

ابتسمت امي واني كتله : انت لتجاوب عني .. يلا 

- انجبي واكلي 

- لتغلط 

- اتزقبني وصمي حلكج . 

خزرته واني ارفع راسي اريد احجي كرص خدي خفيف وباس ايده وابتسم ، حجيت : لتتمادى 

- تأمرين بس كملي يلا بابا .. لنتأخر 

حجاها وكام .. امي تباوع وراه .. انداريت باوعتله راح لابو الكاشير دفع الحساب لفتلي ماما لفة وحطتها اليه وكالتلي : بقي اللبن بأيدج كل شوي اشربي منه يفيدج . 

بقيته بايدي وكمت ويا ماما رحنا طلعنا هو برا : ها نمشي ؟ 

مشيت كدامه حط ايده ورا ظهري وكام يمشي .. وصلت باب السيارة فتحلي الباب ولزم ايدي حطيت رجلي وصعدت للسيارة .. وماما صعدت من ذاك الباب .. سد الباب وومشى يركب 

حجت امي : خلينا نروح لاربيل يمعودين .. هسه بهالليل داخلين مكبرة صدك تحجون الصبح نجي . 

عباس : اذا تريدين اركبج تكسي تروحين للبيت واني اخذها ونرجعلج من نخلص 

- لا حتى عليها مو زين 

هم يحجون اني مرجع راسي ما بيه حيل اناقشهم 

حجت : فيان نروح باجر 

- ماما اخذي تكسي 

- ليش تكسي خو نروح باجر كلنا 

عباس : - مراح تقتنع لتحاولين.. انت كليلي تريدين اخذلج تكسي لو تروحين ويانا وتظلين بالسيارة . 

-شسوي قابل اعرفها هيج امشي . 

طلع بينا لسليمانية اني جبت الطريق لحد ما وصل المقبرة المنبوذة كعدت .. المقبرة ظلممممممة ماكو غير لايت السيارة بالمنطقة بس ظلام كوة يباوع الطريق وصل طريق مسدود كال : تندلين مكانها 

بقيت اباوع مدا اندل منين اجا ! وين هي ..مدا اشوف اي شي حتى اميز! 

حجت امي : ترا اني اخاف والله بهيج ظلام ما انزل 

            

              

                    

- تبقين هنا 

- لا داده لا ابقى وحدي هنا شنو مرايدة روحي طلعلي حيوان مخبل جني وين انطي وجهي ؟ غير اموت 

-تنزلين ويانا يعني 

-ننزل وين انتم من صدك تحجون ننزل بهيج وكت ظلمة 

-بعد غير هي ! 

سحبت تليفوني فتحت لايت ونزلت اريد بس اميز المقبرة .. فتح لايت تليفونه ونزل وكف يمي : اندليتي ؟ 

-راسي دياذيني مدا افتهم شي 

- نروح ونجي باجر امج متأذية 

حجاها وامي صارت وراه باللايت : اي و ألله اذيه عفية خلي نرجع 

-ابقى يم ماما بالسيارة اني راح اندلها

-امشي 

حجاها ومشى كدامي ماما لزمت بايدي وهي لازمة اللايت وتضوي حواليها بخوف .. صرنا نمشي نمشي ومدا يبين شي .. لحد ما هو ميز مكا كال اتذكر هنا وكفت ابو التريلة الصعدتج بيها .. ليكدام المكان 

صرت امشي وراه وهو يضوي .. 

طلع صوت مثل صوت الذيب يسوي اووووووووووووو 

امي اتخبلت من الخوف .. كامت تحجي : والله مو وضع هذا بالله هسه شنو على تالي نصير وجبة للذئاب 

حجه عباس : هذا واوي مو ذيب 

- وشنو الفرق بينهم 

- مثل الفرق بينج وبين بتج 

نزيت من يمي :- شتقصد انت بهالظلمة تشمر حجي ؟ 

-اقصد منا .. امشي 

دخل المقبرة بس مميز القبر بس اني كمت امشي من دخلت ميزت مكانها وين يسرة كبل .. ضليت امشي شفت قبرها دمعت عيوني من مكاني رحت اركض .. وصلت لقبرها شمرت روحي ع التراب وكمت ابجي من كل گلبي 

كمت احاجيها واكوولها 

حبيبتي مشتاقتلج جيو .كلش اشتاقيتلج 

قتلته ومبرد دمي لحد مشفت روحه تطلع كدامي مثل مجان يشوف روحج تطلع وبخس بيج بس ناري مدا تطفى والاشتياق دياذيني هواية كلش افتقدج بنص هالعالم مدا انسى 

كمت ابجي واحاجيها 

ماما متقربت ولا بجت كل الوقت خايفة وترجف ولازمة بأيد عباس تكوله : بداعتي عليك لتعوفني يوكف كلبي من الخوف و الله .. بقى يمها استخطاها 

لحد مشافني كمت ابجي بانهيار ونمت على تراب قبرها وبدا صوتي ينبح .. تركها واجا تقرب مني رفعني من القبر واخذني لصدرة : كافي حبيبي انت هم ابطنج طفل راح يموت ابطنج والله كومي 

- مشتقتلها 

احجي وابجي 

وهو يكلي : اليوم ريحتيها وبردتي كبرها بدم كتالها ارتاحي 

            

              

                    

-ارتاحت 

-ارتاحت والله ارتاحت بس اذا تضلين اتسوين هيج بروحج على كبرها راح تتاذى الميت يحس باهله لا تاذينها

حضنته وكمت ابجي بقوة 

لمني بحضنه وباسني براسه .. وكومني .. وامي واكفة يمنة كلش فزت فزة نشغت من كل كلبها تصيح : هذا ذيب ذيب يبووووووو 

ولزمت بظهر عباس 

اني فزيت بسرعة ووكفت اباوع 

كلب بنص المقبرة كام ينبح علينا عباس يريد شي ينشه بيه ماكو وهو ينبح .. صرخ بيه عباس ونزع من رجله وضربه راح الكلب يركض من الخوف 

اندار : دمشوا بسرعة لا يروح يجيب صحبانه 

امي : دخيلك ربي وعنده صحبان ... امشووووو عزا بعينج فيان هسه وقت مقبرررررة .. راح ييبس كلبي من الخوف ربيييي 

لبس حذائه وامي لازمة بظهرة تمشي وراه .. 

اخذ ايدي وصرنا وراه نمشي ع اللايت تيهنا منين طبينا ومنين اجينا كمنا نروح ونجي وامي تريد تتخربط من الخوف واني كلش تعبت وجلية صارت خيوط واحس الدنيا تفتر بيه كتله : بعد ما اكدر اكمل تعبت 

 لمح السيارة من بعيد كالي : ذيج 

-مدا اشوف وينها

دنك كبالي وكالي : انتجي على ظهري 

حطيت روحي على ظهري سحب رجلية وحطني على ظهره وكالي بس ضويلي باللايتات اثنينهن وركض بيا وامي تركض وراه لحد ما وصل السيارة يتنفس بقوة .. نزلني وفتحلي الباب الكدامي على يمين السيارة .. صعدت كلش تعبانة . 

وماما صعدت بسرعة 

كالت : الله لينطيكم بحياتي مراح انسى هالليلة هذه حيوكف گلبي و ألله . 

رجعت راسي .. 

هو مد ايده على خدي : تعبتي 

- اي ، هواية 

- يلا هسه رايحين اذا تريدين مدي الكرسي ورا واتمددي 

حجت امي : هسه وكت مغازل وشلونج شلون احوالج فدوة لعينك دمشي ليطلعنا ذيب لاخ 

ضحك وهو يشغل السيارة : بس ما جان ذيب جلب 

- يعني مجلوب شيخلصنا منا امشي 

شغل السيارة واستدار ورجع يدور طريق يطلع منا .. كام ميندل الطريق لاربيل منين .. وماما هم متندل .. واللوحات الموجودة بين سليمانية و اربيل بالمردي والانكليزي ماكو عربي .. كامت ماما تترجمله وهو يتبع اللوحة .. اني تركتهم بهوستهم ونمت .. 

لحد ما مدبريها ووصلنا اربيل تقريبا ب٣ ونص بالليل .. ندهني فزيت امي دا تنزل باوعته فاتح باب البصفي : وصلنا 

            

              

                    

- اي يلا انزلي 

كعدت من مكاني اباوع المكان وهو يفرك براسه 

لزمت بيه ونزلت من السيارة .. لزمني ومشيت كدامه دخلنا البيت ماما دا تفتح الباب بالمفاتيح .. دخلت السرير مال عملية ام عباس بمكانه .. حجت : شنو هذا السرير منو حاطه دخيلك ربي منو داخل بيتي 

عباس : احنا احنا .. حجاها واتمدد عليه .. اني كعدت ع الجرباية ومديت نفسي حطيت راسي وكمت اغفي بعدها النومة بعيني .. رجعت غفيت .. 

ماما صعدت فوك وعباس غفى بهدومه واني على كعدتي .. 

بس حارة نوعا ما .. شغل مروحة وراح ديجيب غطا .. حطه ع السرير مالته احس عليه بس شعور خفيف النوم بعيوني 

اجت امي : حتنام هنا 

- اي 

- كعد فيان تجي يمي 

- اخذي راحتج نامي 

- كلش تعبانة تصبحون على خير 

راحت وهو اجا نزع الحذاء من رجليه .. 

فتح جنطتي طلع منها ثوب مال بيت قصير .. واني نايمة سحب التيشيرت من عندي فزيت وهو دينزعني : شترييييد اخ 

- بدلي خوما تبقين بملابسج هاي 

- تعبانة 

- بس شيلي روحج 

حجاها ودخل الثوب براسي .. 

كعدت .. فاتت امي : خابرت ابوج 

اااا العفو 

نزلت القميص 

صاح وراها : تعالي كاعد تبدل .. شكال كاكا 

اجت تباوعلي : ابوج ديسال انت مخابرته قبل ليموت 

- اي جان جاي ديشوفني 

- وتليفونه بجيبه مو 

- ما اعرف 

عباس : ما فتشت جيوبه ما ادير بس شلته وذبيته كبال بيت شوان اللي ابغداد 

- مشافك احد 

- ملثم جنت ودست بالسيارة بسرعة وما جان احد بكالي لا الفرع جان فارغ 

- ابوها كلش قلقان .. لا يعرفون اخر اتصال جان وياها .. تصير مصيبة . 

باوعلي : شحجيتو اخر اتصال 

- جان ديكولي يريد يشوفني فاني فكرت 

حجيتها وسكتت 

نطق عباس : انت لو تبطلين تفكرين احنا بخير .. روحي نامي خالة اخذي راحتج والصباح رباح 

- ولو داهمونا 

- يداهمونا ليش 

            

              

                    

- ما اعرف ممكن 

- محد يداهم روحي نامي .. 

حجاها ومشى قفل الباب وامي راحت تنام .. 

واني تعدلت حتى انام كال : لا لا مو هنا روحي ع السرير اني انام هنا 

- مو مهم 

- مو علمودج لو عليج يطبج طوب بس البطنج يتضايق خطية 

- انت شنو كل ما كمت وكلت مو علمودج علمود الطفل 

- اي قابل باقي لسواد عيونج غير علموده مبقيج 

- هذا منو مبقيني ؟ 

- كومي نامي 

- انت ليش تغث بحجيك 

- تعبان كوووومي لمكانج 

- ما اكوم 

دنك يريد يشيلني كمت اصيح : وخر لا لا اني اكوم وخر 

- يلا دكومي 

- بس ممنوع تجي يمي 

- ماشي 

مشيت للسرير هو وراي 

- شكو ؟ 

- هسه منو يمج دنامي 

- شو ورايه ؟ 

- هسه دنامي والله عاجبتها روحها الكوندريزا رايس 

عدلت المخدة وتمددت شو هذا داس ع الضوا طفاه ودفعني للحايط وحشر روحه بصفي : هاااا 

-وجهاااا خلي انام سكتي 

- مو باقي علمود الطفل دنام بعيد يلا 

-لا ما اكدر ابني يخاف اذا ابتعد 

-لا بالله دمشي كلاواتك وكوم 

عدل نومته ومد ايده جواي : شتريييد وخر 

لف ايده عليه وسحبني بقوة لصدره : وخر 

- تعبان كافي نامي 

-اي عوفني 

-ماشي الصبح من اكعد اعوفج 

اريد اوخر نفسي قابض عليه بقوة 

عدل راسي رجعني وباسني براسي .. سكتت وطلعت ايدي وعدلت نومتي ونمت بحضنه .. المروحة فوكنا تهفي مو نمنا لا كأنما دخلنا بغيبوبة 

لثاني يوم الساعة ب٣ الظهر .. 

فتحت عيني شي يرج جوا راسي هو نايم على ظهره وفاتح حلكه غاط بنومه .. واني على ايده .. شلت راسي ومديت ايدي طلع تليفونه مكتوب ( ام امير ) اعرفها اخته علياء 

            

              

                    

جاوبتها : الو !؟ 

- الو منو انت عباس وين 

- نايم من يكعد يخابركم 

- انت منو ؟ كعدي 

- فيان .. احنا باربيل 

- شيسوي باربيل !؟ 

- اجينا هنا بالليل 

- اي ليل غير عكب باجر زواجه يرجع مرته .. شمودي لاربيل الناس هنا ملها دا تسال عليه وعمي حرك الدنيا عليه مو يخابر عليه كعدي

-هو راح يرجعها ؟

-طيح الله حظج يا بلا كرامة يا ما تستحين زلمة اشترى غرفة ونيشان وكلشي جديد وراح برجعها لعقد وعرس جديد وانت ضلي اتلبدي وياه هنا وهناك .. بس كحـ.... ما عليج عتب

قفلت الخط وعفته على صفحة 

بقيت اباوعله .. لما يكون يمي كلشي بيه يتعافى .. بس اني ما اريده حتى لو يصير عافيتي اموت وما ارضى اتقسم على اثنين لو تكون اله حياة ويا غيري .. لو الي لو ما اريده يروح لمنو ميريد لو اعرف ادوس مو بس على نفسي ادفنها وما ارضى يكون ويا غيري .. 

كمت مكاني وانتجيت عليه اريد اكوم 

اتحرك هو مط نفسه شافني دا انزل .. سحب ايدي : تعاااي 

جرني بقوة سحبني لصدره : اااخ وخر 

- شبيج 

- ما بيه شي 

- دتعاي شبيج 

- وخر لتلزمني 

كمت من عنده 

اندار صفح وباوعلي بتك عين : ها كابت من الصبح 

- تريدهن يكبن عليك ؟ 

- دخل يكبن احسن ما يكبرن وينفجرن 

- كوم دنرجع لبغداد وهناك من نوصل كل واحد يروح بدربه 

- اي ووين دربج بلا زحمة 

- اي طريق مو طريقك افتهمت 

- ها .. هسه حوعان بس سويلي اكل وعود نحجي 

- هسه نرجع بغداد كلت 

- لازم نعرف شكو ابغداد حتى نرجع 

- خايف 

- اي .. عليج 

- يا الله انبهرت .. لتكذب وتتلون .. ارجع وخلي طليقتك تفيدك مو راح ترجعها . 

مشيت للمطبخ بس دمعت عيوني لحكني وهو بالشورت والفانيلة حظني من ورا : شبيج امي وابويه انت ليش تبجين 

            

              

                    

انداريت ودفعته بسرعة -تذبحني وتسالني ليش ابجي جاي يمي وتوهمني باهتمامك وحبك وانت مرتب كلشي لزواجك 

-اششش امج نايمة 

-امشي اطلع برا واتركني 

-ماشي بس اهدي 

-ما اهدى ولا ارتاح لحد متطلع برا 

-مراح اطلع .. واذا طلعت انت وياي 

- اني مو لعبتك ولا لعبة عندك ولا ارضى تحطني هامش وغيري الاصل ما اريدك روح شوف حياتك واتركني .

كمت امسح بدموعي 

هو ساكت ميحجي .. انتفضت : ساكت ليش واذا ما عندك شي تكوله مكابلني ليش شمنتظر ابالك تقنعني وتغريمي باهتمام وحضن .. انت حيل غلطان اني ارضى منك بالقليل لما تكون اليه بسسسسس 

اما لما تكون لغيري انت كلك متعنيلي ولا اريد منك شي لا قليل ولا هواية اتركني وبس اطلع من كدامي واكف ليييييش 

-اهدي 

-ولما اهدأ شراااااح يتغير .. روح اتزوج اني مميتة عليك 

- انت ميتة ولو تركتج ادري تموتين اذا محد موتج منهم انت تموتين نفسج .. ما اكدر امنج حتى عد نفسج 

-اموت لوحدي مرة ولا مرة اموت وياك . 

دخلت امي من برا وهو من شافها بسرعة مشى يبدل ملابسه 

حجت : شكو 

-الاخ عرسه عكب باجر وجاي عندي ما اعرف شنو اباله اقتنع مثلا 

-عرسه شنو معقوله 

-اني تعبت منه كلش تعبت 

دخلت امي وهي تترك الغراض ع الميز وتفوتله : عباس .. وينك 

مشيت وراها هو ديربط بحزام بنطرونه كالتله : اذا تريد تتزوج شعندك جاي الها ؟ 

- مو شغلج هذا الموضوع يخصنا اني وياها 

صحت : واني مااااااات ما راضية وغصبا ما عليييييك اطلكني افتهممممت 

- اتزوجنا بكيفج بس لا تعتقدين الطلاق على كيفج .. كطنه وشيليها من اذنج طلاك ما اطلك 

حجت امي : انت شحاسب روحك فد مندلة غصبا ما عليك اطلكها وتجفينا عرض اكتافك 

- للمرة الثالثة اكلج لا تدخلين

-ادخل ونصصصصصص انت شحاسبها تاااااايهة 

- لا الج ولا لغيرج يدخل اني وياها 

- هسه اتطلقها والله والله ابليك بلية متخبص منها 

            

              

                    

- اعلى ما بخيلج اركبي طلاك ما اطلك 

- هسه اعلمك اللاعلى ما بخيلي شلون اركبه 

.. مشت بهمة للغرفة وهو يكلي : اعرف متضايقة مني بس خلينا ما ندخل احد بمشاكلنا حتى اهلي 

- مشكلتنا انت مو الحوالينا لتغشم روحك 

- ما اغشم روحي ولا تبجين انت بس كليلي شنو اليرضيج واني اسوي اني ما جاي ارتاح بدونج افتهمي اني اريدج وهذا من حقي انت مرتي وحقي عليج تبقيلي 

-ابقالك لما اكون لوحدي مو حاط غيري ومرتب وياها كلشي ومشتريلها غرفة ومهر وحاطني ع الرف شوكت ما ضجت تدورني 

-امريني بس وشوفي والله والحسين اني ما جاي العب عليج وما اجيتج كلبي الجابني والله مو بيدي كاره روحي بنصهم وبس يمج راحتي 

- معناها خابر وانهي كلشي لتخدعني بكلام وتنتظر مني اصدكه سويلي شي يثبتلي انت تحبني صدك ومشتريني حسسني بفعل الكلام بعد ميقنعني ولا يرضيني مستحيل اتقبلك وانت بهالحال مستحييييل حدد انت شتريد لا تلعب عليه وعليهم انهي الموضوع بيني وبينهم واختار اني لو هم 

تنهد وهز راسه ولزم تليفونه 

كام يبحث داس اتصال وكعد .. 

اجتي امي وهي ترفع صوتها وتكله : بسيطة لا... جريتها واشرتلها ديتصل 

-يطلع برا ويتصل بمنو يريد ويطلك غصبا عليه 

-اصبري 

-شكو

هي حجت وهو كال: الو ها غيد

تقربت منه ومديت ايدي على اذانه فز باوعلي يخزرني .. فتحت سبيكر وهي تكوله : ها حبيبي دا اخابرك مشغول مصيفي كتل روحه عليك يصيح بابا بابا ومدا ترد وينه 

تنهد وباوعت لامي .. 

حجه هو : اني مو ابغداد مسافر 

- مسافر وين !؟ 

- اربيل ويا زوجتي 

-زوجتك .. منو تقصد فيان 

-اي 

-يعني شنو شرايد مني اكلك هسه 

- الرايده تبلغين اني ما رايد هالزواج وما رايد نرجع 

سكتت 

بعدها حجت بحسرة : امك تدري بهذا الحجي 

-ما يخص امي هذا الموضوع يخصني اولادي عزيزين عليه بس اني ما مستعد 

-بس احنا حجينا 

-اني كتلج ما راح اطلكها 

- اي وكتلك مو مهم المهم نرجع سوا وانت رجال وحر بس اني وجهالك واهلي الكاعد يحضرون للعرس 

            

              

                    

- اني كلت الكم ما اريد عرس وما اريد هوسه انت وامي جانت افكارجن 

-بس وافقت واجيت بنفسك وحجينا 

-شوفي غيد اني كدام حلين يا انت يا هي .. واني مو غبي حتى افضل وحدة اشترتني واختارني وهي مو بحاجتني وغنية عني .. على وحدة عافتني من اموري مو زينة وتريد ترجعلي من اشتغلت وتحسنت اموري .. من حق كل انسان يختار اللي يناسبه واني اختاريتها .. ويا ريت تبلغين الاهل عني بهالقرار . 

حجاها وقفل التليفون 

: بعد مطلوب مني شي ثاني 

وشمر التليفون 

- واهلك 

- لا تخليني اسب اهلي جاهل اني وتساليني على اهلي 

- ومنو كال انتهت رسمي 

- اكلج ما تولين 

عافنا ومشى للحمام 

باوعت لامي .. حجت : مقتنعة ؟ 

- خابرها كدامي شيجذب بعد 

- ما اعرف .. بس ممحترم ابدا ما اعرف شلون متحملته 

تنهدت : بس ارتاحيت 

كعدت 

- فدوة لان اختارج ! 

وهو المثله وين يلكى وحدة مثلج تكلبه حتى تنتظرين منه يختارج 

- ما اعرف بس ارتاحيت . 

وين جنتي عبالنه نايمة 

- طلعت افتر شوية بالسيارة وتسوكت للغده 

- شحتسوين 

- عاجبني اسوي مقلوبة لحم . 

- اي جوعانة فد مرة ولعبانة نفسي هلكد مجوعانة . 

- واخيرا انفكت الجبسة الظهر هو فاهمج اكثر من عدنا مو مريضة تريديلج رجل على كولته 

ابتسمت وهي مشت .. طلع هو : اشوف الحلو كام يتبسم وجهه 

ابتسمت : معليييك 

- اذا اني المعليه جا ياهو العليه ؟ 

- جا بكيفي 

ضحك بصوت عالي : يلوكلج تحجين بالجا وعلي 

حجاها وفتح التلفزيون وتمدد ع السرير 

وسحبني لصدره وحضني باثنين اديه واخذ ايدي كام يبوس باصابيعي ع الخفيف .. انتبه للساعة كام يباوعلها : جديدة ؟ 

- اي نسيتها من البارحة بيدي ولا نزعتها 

- حلوة . 

- بابا جابلياها هي وجهاز البيبي 

- جهاز بيبي شنو جا هو صار حتى نشتريله جهاز غير نعرفه ولد لو بنية 

            

              

                    

- هو حب يساعدني لانو كلش تعبت 

- ليش تعبتي 

- حسيت وجودي بهذا العالم ماله داعي .. بابا يريد يقتل طفلي وانت قتلتني فردت انتحر بس منعوني 

- انت بكامل قواج العقلية من تفكرين هيج افكار متحسين بروحج مريضة ؟ 

هزيت راسي وحشرت بيه واني اتهرب من الاجابة 

حجه : شتحسين من تفكرين هيج 

-احس بالم غير متناهي .. محاوطني من كل الجهات 

واحس بخذلان وخيبة من كل الحواليه 

ظاهرهم مهتمين بيه لكن واقعهم اني اخر اهتماماتهم 

مرات افكر لو متت شراح ينقص من حياة الكل ! 

لا شيء ما احدث فارق بحياة اي بشر .. 

حضن راسي بقوة وباسني حيل وهو يشتمني : انت تشكلين فارق كلش جبير بحياتي .. انت راحتي بدونج لو اكحف ما ارتاح لا باهلي ارتاح ولا باولاد ولا اصدقاء ولا اي بشر يسد مكانج عندي .. انت عندي الكل .. والكل يجي بعدج . 

ابتسمت وبست صدره .. 

رفع راسي : اوعديني 

- بشنو 

-تتحمليني مثل ما اتحملج وتبقين الي وما تمشين 

اني فد واحد يسموني مسربت 

مطحتلي بوحدة تضبني 

ضبيني عدليني مو بس المرة تميل 

الرجال يميل ويغلط وتاخذه الدنيا عاركيني خبص الدنيا لزمي مسدس وحطي براسي بس لتكليلي فد يوم امشي ولتعوفيني . 

هو يحجي واني اباوعله 

مديت راسي وبسته بوسه خفيفة من جوا شفته 

سحب راسي بسرعة وكام يباوسني .. كمت ابادله البوسه 

بعدني : امج منا عيب 

ضحكت لزمت بطني : شتعتقد اللي ابطني ولد لو بنية ؟ 

- بنية 

- ليش 

-ما ادري اني هيج اتمنى 

- تتمنى يعني مو تتوقع 

- عندي ولد بس ما عندي بنية 

- اسميها افين 

-شني الاسم هذا بالله ؟ 

-حب بالكوردي 

- لا بابا اسميها فاطمة الزهراء 

- دخيلها بس لا .. بعدها صغيرة احب اسم كوردي 

-من اتخلفينها وحدج سميها كردي 

-لتصير دكتاتوري 

-دكتاتوري شنو غير اريد اسميها اسم زين على بنت الرسول واذا ولد اسمي علي لان عدي مصطفى وحيدر بعد يحتاجلي محمد وعلي وفاطمة الزهراء وزينب 

            

              

                    

شلت راسي : ذولة كلهم منو راح يخلفهم بالله ؟ 

- انت ؟ 

كمت من عنده : اي ماخذلك بزونة الله يخليك 

- شرايد منج سبعة هم اربعة 

- لا عوزها .. اربعة يكول 

-لا تخليني اخلف اسويهم اثمانية وعلي 

-روح خلفهم وحدك 

-دصطبري لعد لا ما احبلج بعشرة وازيدهم واحد واسويهم فريق بسيطة 

كمت من عنده واني اضحك.. 

رحت للمطبخ يم امي : تحتاجين مساعدة 

-لا .. 

باوعتلي : اتصالحتوا ؟ 

-اي 

-جنت اكول شعاجبها بيه بس هسه عرفت 

-شنو 

- اسلوبه 

-شبي 

-صوتكم جان يوصلني واسمعلكم .. اسلوبه وياج ما تعرفينه ساعة يكلج كتليني واني جوا ايدج وساعة دكتاتوري ومتمشين كلمتج عليه هيج شخصية احنا النسوان نتعلق بيها ..

-يمكن هالشي جذبني 

-يمكن 

-ما اعرف .. اسلوبه صح جان مختلف 

كل حارس يشتغل عندي جان مثل الروبوت ينفذ المطلوب منه بدون زيادة او نقصان .. عباس الوحيد اللي استغرب شغلة الحراسة ومارسها بمشاعر وكأنما اني اعنيله .. من ابرد يبادر ويهتم من انقهر جان يبادر ويحاول يخليني افضفض يسمعني كلش زين وينطيني حلول .. من اغلط ما كاني مديرته ما يتردد برزالتي .. من اتامر عليه كمديره ينفر ميعجبه وكانه مو حارس شخصي لا كانه زوجي ومسول عني فحسيت يمه بشعور مختلف تماما عن كل اللي حواليه ..

شعور اطمئنان لمجرد هو موجود 

صاح بصوت عالي من الهول : يمعوووووووودين ما وراكم اكل راح اموت جووووع 

حجت امي : وتتأمر فوكاها 

اجا للمطبخ : عمي ما متامر بس جعنا وعلي 

مشى يتفقد اللحم دينسلك 

مد ايده نفرت امي : كش ايدك احتمال وصخة لا تمدها 

-وصخة شبيها هستوني مغسل بس خل اكل متت 

اخذ جفجير واخذ قطعة لحم بعدة ممستوي .. حطه بخبزة وكام يلوك بيه 

واني اضحك : تضحك الفطيرة جاطلتلها زلمة ومخلية الوادم وشرطة وعشاير تترادم وهي كاعدة تتمضحك فيون خانم 

            

              

                    

ضحكت امي : بهاي صدوك لا عاب حلكه 

- والله ما مهتمة ولا ابالها اصلاً 

- مو هامني شي .. اصلا كالوس وانتهى صار سنين واني اتمنى هاليوم وصار ليش ما افرح 

- بس هذا موت 

- لو احد قاتل اخوك شراح تسوي تستعطف اللي قتله وتكول موت لو تصيح ثار 

- اختج غلطت 

- غلطت بحق نفسها ما من حق احد يحاسبها لربما يحق بابا يحبسها او يشوفله طريقة يعاقبها مو احد غيره يحط طلقة براسها وتكولي غلطت وتحلل قتلها .. انت مو الله وتحلل بكيفك 

- عمي اني ياهو مالتي والعباس زلمة لالي غرض ولا اعرفها اختج ولا اطيق شوان واهله بعيشة الله 

سكت وغير الموضوع وكام يحجي ويا امي .. 

ماما سوت النا مقلوبة كلش طيبة عباس اكل تلث ارباعها واني وياها ربع .. 

خلصنا وماما رادت تمر من بيت اهل شوان .. 

حتى تطمن للوضع .. 

كمنا نلف حوالين الفرع 

رفعنا الحامات مظللة ومرينا من شارع 

امي ما شافت بس عباس انتبه سيارة شوان موجودة 

كمت ادور وجهي ملمحت الرقم كدامها سيارة 

التفينا ورجعنا من نفس الشارع .. سيارة شوان بالفعل موجودة 

كالتله : اطلع لمركز الشرطة بسرعة 

نزلت هي وحدها بلغت عن وجوده داخل البيت .. وصعدت 

تحركت مفرزة خاصة ووكفت اباب بيت اهل شوان .. 

ما مرت ساعة وبابا خابر فورا كال : انتم وين 

جاوبته ماما :- طالعين 

-مبلغين على شوان 

- لا 

-شنو لا اجت الشرطة لاهله ببلاغ رسمي هو موجود 

- وشصار ؟ 

-يعني انتم 

-اي اترك حق بنتي يعني 

-بنت الاوادم هسه وكت حق مو بنتج قاتلة واحد منهم 

-وهم قاتلين بنتي 

-انتم ليش ما تكفوني شركم وتسكتون والله والله ابتلي بيكم بلوة لو خطيتوا اي خطوة .. واكيد هاي افكار الكديش الوياجن كاللجن بلغن 

حجه عباس من يمه : مشكلة من واحد يشوف الناس مثلة 

نزيته : ما تسمعينه يغلط شني خدام الخلفوج اني 

            

              

                    

- اسكت لخاطري 

رجعنا للبيت المزاج مو تمام 

هو بقى بالحديقة كال اريد ادخن بس اهله خبصوا الدنيا بالاتصالات وهو ميجاوب يعرف ردهم 

لحد ما كتبتله علياء رسالة ( خابرني يسرعة عباس ) 

فراح يخابرها .. دا تكوله انت متفكر بامي 

وهو يصيح يكلها : امي ياهو مالتها اختار منو وارد منو .. هذه موضوع يخصني .. اكلج علياء امي هي الهيجت السالفة هاي وكعورتها واني من البداية كتلها يمه مو وكتها خل الامور تهدا لا وبيتك ومرتك وهو ماكو احد هجج غيد وحرضني على طلاكها غير اني دكافي شني اني بكيف امي حياتي هاي ياهو مالتها امي 

اي علياء مريضة على عيني وعلى راسي بس فيان حامل وغيد اني من كبل لا اني اتوالم وياها ولا هي تتوالم وياي واطلكنا ارجعها ما راهمة .. اي هي امج الرادت 

روحي عمي جاي يخابرني .. 

رد على عمه 

ونفس الحجي وكام يتصايح وعلى صوته 

تركته برا متسمعت بقى فوك الساعة يلا دخل .. مطايق نفسه 

محجيت وياه شي . 

اجت ماما كالت : اكولكم الصبح اني ببغداد خابروني من المصرف لازم ارجع بسرعة 

عباس : واني اليوم ما داومت هسه يحسبونها علي غياب 

-وين دداوم هسه 

- باللوجستي

-اخابرلك مخلد اخلي ياخذلك اجازة هو من بعدي هم صار سكرتير للمدير الجديد 

- عوفي اني اخابر 

حجت : دا اكولكم لازم نروح بغداد هسه وقت تتناقشون 

- ديلا لموا غراضكم شعدي اني بطرك هدومي 

لمينا غراضنا وطلعنا لبغداد بسيارة امي .. وصلنا تقريبا .. ب٥ الصبح .. انطاها السويج كالتله امي : وين حترحون ؟ 

-للبيت 

-ادخلوا نامو هسه وللصبح عود روحو 

-لا لا نروح هسه 

حجيت : خلينا نبقى هنانه مبقى كم ساعة وتروح لدوامك من تجي تاخذني مو مال ابقى يم امك واختك وحدي اليوم . 

-وتخافين منهن ؟ 

-لا بس خلي ندخل 

حجت امي : دفوتو بسرعة فضوني 

دخلنا اني وياه رحنا لغرفتي .. وهي راحت لغرفتها ..

بقينا ويا بعض لحد مصارت الساعة ٧ ونص كام سبح ولبس ملابسه وراح للدوام . 

اني خلصتها نوم لحد ما حسيت عليه وهو يدخل الغرفة 

شلت راسي : اجيت حبيبي 

فتحتلا اديه 

            

              

                    

-تعبان كلش تعبان وميت نعاس 

حجاها وهو ينزع بملابسه .. بقى بالشورت 

ادنيت واني فاتحتله اديه حضني ونام على صدري 

كمت ابوس براسه وشعره .. احس الدنيا تحلو والعالم يصير الوان من هو يمي كلشي ما احتاج غير استلذ بوقتي .. اكتمل 

غط بنومته .. 

اني تسحبت ورحت طلعت من سمعت صوت امي كعدت .. 

رجعت متضايقة: ها ؟ 

- اني واكرم بعد منرهم 

-ليش ديتهمني عندي شي تخيلي يكولي عند منو بايتة باربيل دا اكوله ويا بنتي وزوجها مدا يصدك 

-اصلا زايد عليج مبقيته خلي يولي 

-بس لو اتطلقت منه راح اخسر شغلي 

-وتخسري ماما كم مرة نعيش بالعمر نخلصها نتحمل فلان وعلان على كم فلس .. يولن نفتحلنا مشروع اني وياج ونصير سيدات اعمال 

ضحكت بس اعرف بداخلها مقهورة ، حجت: لتروحين انتو وعباس ابقوا يمي .

- ماشي بس لتنقهرين 

حضنتها وهي لمتني بحضنها 

-المساعدة مالتج وين مسمعتها اجتي اليوم الصبح 

-ممنطيها شهريتها واني الشهر هذا التهيت وياج فمدفتلها ولا احتاجيتها 

-جوعانة 

-اي هسه اكوم اسويلج اكل عباس تغده 

-لا والله كلش تعبان نام كبل 

- تصدكين اني ارتاحيتله مبين كلبه ابيض واخو خيتة ابقي عليه ماما الجيوبهم مليانة عيونهم فارغة .. اقلها هذا يحبج او يمكن يحبج مندري الدنيا تثبتلج بس مدامه زين ابقي وياه 

هزيت راسي 

كامت وهي مكسورة تلهي نفسها بالشغل 

كمت كعدت يمها .. سوت جلي فراي وبتيتة وبيذنجان وخضرة ولبن وصفطنا السفرة رحت كعدت عباس كوة كعد .. اكل شوية ودايخ حيل .. غسل ورجع نام .. 

ماما راحت لغرفتها 

واني بغرفتي ع التليفون 

تليفونه بس يدك ميبطل يسكت وهو مخلي صامت .

لحد نص الليل كعد 

طلب مني احميله الاكل .. كمت للمطبخ .. 

معرفت احمي البتيتة والبيذنجان لانو مستويات وخفت يحتركون فحميت بس الجلي فراي حطيت عليه زيت شوي ونصيت النار 

دخل هو طلب استكان جاي 

سويتله بس طلع كلش ثكيل شرب منه مر حيل مكدر يكمله حطيت الاكل كدامه كام ياكل وهو يكول : باجر جمعة لازم نرجع للبيت امي حيل اتأذت 

-شوف عباس اني اكول لو اني ابقى ....قاطعني

-وييين تبقين 

            

              

                    

-هنا يم امي 

-واني 

-ما عدها احد بالبيت وهي على وجه طلاق هي واكرم 

-وتطلك احنا ياهو مالتنا 

-اي بس اهلك ميحبوني واني ما اكدر 

-متكدرين شنو 

-ما اكدر ابقى بمكان ممرغوبة بيه 

-بيت منو والمنوراني اجرته ؟ 

-اعرف بس امك تخوف متتفاهم 

-مو حجي هذا نرجع للبيت 

-طيب شنو اليمنع نبقى هنانة 

-انت شنو رايدتني كعيدييييييي 

-لا مو هيج .. بس تجنبا للمشاكل 

-اكعدي بغرفتج ومعليج باحد وهي متصير مشاكل 

- شوكت نروح 

-الصبح 

-بس اني نعسانة فد شوية انام 

-ومنو لازمج نامي 

-محكدر اروح الصبح 

-لا تتحججين . 

سكتت معاجبني اروح وياه واكابل اهله ميتعاشرون 

بس هو صعب مدا يتفاهم وعاقد حواحبه ولاوي خشمه 

كلش مو مال واحد يتحايل عليه ويغازله ويقنعه 

وما اعرف اشون حتوالم .

كمل اكل .. بقى ع التليفون 

اني لوجه الصبح يلا نمت لان حامل استخطاني مفززني من نومتي تركني لحد الظهر ما كعدني .. 

هو كاعد ديلعب لعبة ع التليفون .. واني حاشرة روحي بيه ونايمة 

فجأة سمعنا صياح وعياط بنص البيت 

فزيت وعباس كام ركض كبالي .. 

طلع اكرم جاي ديتعارك ويا امي وديريد يضربها.. عباس صار بيناتهم ولزم ايده شو هذا بلا تفاهم شيل ايدك واضرب عباس بوكس بوجهه 

عباس كانما ممعول .. 

ذب روحه عليه وتولاه بوكسات 

واني وامي نشيل بيه من فوكاه .. 

وخرنا عباس وذاك يفشر 

وعباس يرده بفشار كمت احط ايدي على حلكه واني تكوله : كحلت عيني بعد ايدي .. حيل مستضعفني عباله تايهتله فوك شينة كوات عينه جاي ديريد يضربني .

عباس كام يصيح 

وكالي : لمي هدومج بسرعة 

- خلي يولي لا يهمك 

- يولي شنو كتلت زلمة بنص بيته على مشاكل بينه وبين مرته من وراج كتلج من الصبح نروح امشيييي 

- وامي 

- وامج شنو اني مسؤل عنها 

- خاف يرجعلها ياذيها 

-امشي مالنا علاقة بدلي بسرعة 

بدلت وامي تدك الباب .. طلعت الها وهي تطلب مني منروح 

بس كلت الها : عصبي هسه ميتفاهم خل اروح وياه اني اعرف محكدر اتحمل هنا وراح ارجع اطمني .. بس خلي نروح هسه ونبقى على اتصال 

شكرته واعتذرت منه خلته بهالوضع 

وطلعنا من البيت اخذنا تكسي ودخلنا البيتهم وهنا واجهت شي ممتخيلته يصير . 

دخلت البيت لكيت غيد كدامي 

واطفاله تراكضوله .. هو دنك يبوسهم 

اني هنا وكف عقلي ! ....... يتبع 

——————