رواية علي حافة الثأر الفصل الواحد والعشرون 21 زينب نور

عقدت حاجبي وباوعته باستغراب .. 

غيد عمه امه اخته اخوه اطفاله .. يباوعلهم مدا يباوعلي .. سلم عليهم محد منهم سلم عليه ابد .. 

حجه عمه : كبل لا تحجي اكعد كبالنا نحاجيك 

حجيت : اني ارجع لبيت ماما .. اعتذر 

لزم معصم ايدي بسرعة وخزرني .. اشرتله بعيوني بمعنى : شكو مدا تشوف 

حجه : ادخلي للغرفة جوا 

حجيت : لا ما راح اكعد قبل لا افتهم شديصير هنا 

- هو اني مفتهمممممم حتى افهممممج 

حجه عمه : وما تكعدون حتى تفتهمون 

حجت امه : اذا رايدة تروح شكو كاض بذويلها خلها تمشي 

صاح : يممممممممه . 

اندارلي : اكعدي 

- ولا راح اكعد واريد افتهم .

حجه عمه : شنهو التفتهمينة غير مرته وجهاله رجعتهم وانت مكانج محفوظ تريدين تظلين اهلا وسهلا ما تريدين هم اهلا وسهلا 

حجيت : لما اوجه الكلام الك استاذ وقتها جاوب اني مدا احجي وياك 

عباس : فييييان 

- سبق وكتلك اني ما اقبل ولا راح اقبل اكون بمكان غيري موجود بيه تنهي هالمهزلة هذه فووووورا اكولك تأمر واكعد ما عندك كلام تحجي بيه ويايا اتركني اروح وعيش مثل متريد 

                                            

              

                    

- وانت اطيتيني مجاااااال احجيييييييي 

- ماكو مجال للاخذ والعطا هالشي انت تدري بيه لو لا 

صاحت امه : وانت عليمن تصايحين ونافشة ريشج عليه شو ولي وراوينه عرض اجتفاج .. امشي 

- يا ست انت امرأة كبيرة بالعمر وميجوزلي ولا حلوة بحقج ان اتجاوز عليج فاحترمي عمرج ولتدخلين 

صرخت بشكل فضيح ولطمت على وجهه 

وهو صرخ : احترمي نفسسسسسسج وروحي ادخلي بالغرفة 

- اني محترمة نفسي كلش زين انتم اللي مدا تحترمون وجودي .. وانت.... قاطعني عمه وهو يصيح 

- شنهي بعد ابوج انت شايفتنه اصغار كدامج من اكوملج انعل ابوج لابو الخلفج بت الاوادم .. ولييي 

وامه تصيح وعباس يسحبني .. 

كتله : اللي يتدخل بامر ميخصه ميستحق الاحترام حتى احترمك ومدام دخلت نفسك بينا فنعم مالك احترام عندي . 

تخبل وصار يترادم هو وامه 

وعلياء اخذت غيد والجهال وراحو للمطبخ .. 

وعباس واكف كدامي شي يصيح عليه وشي يصيح بامه وعمه ومحمد يفازع بينهم ويحاول يهدي عباس ويهديهم .. لكن .. عبث

اخر شي كاللهم : الظاهر كلامها صح .. وانتم مو مال واحد يحجي وياكم 

سحب ايدي وراد يطلع من البيت .. 

ومحد طلع وراه يلزم بيه: عباس عباس بس اصبر 

            

              

                    

- شصبر رحمة لاهلك محمد شصبر ما شفت اني وعمي شمسوين عود شني رايدة تلوي ذراعي والعباس ما تلوي ذراعي ولو مو تتورط ويا اهلها لو تنكلب الدنيا اني ما اسويها . 

- زين بس اكعد نحجي 

- انتم سمعتهم شيغلطون ويفشرون شظل للحجي واحجي روح مني محمد دروووح 

- عباس امي لو رحت تموت لا تموتها 

- امي راح تموتني اني بتصرفاتها .. مستغلة مرضها وكاعد تفرض عليه امور اني ما اريدها يا اخي جزعت .. اخذ اني يمك وفضها شنييييه 

- هسه بس اكعد شني اظل الزم بيك .. دكف 

وكف : شرايد محمد 

- امشي نحجي 

- وهم يغلطون ويفشرون علينا 

- جا تحط ايدك بيد مرة وتعرف امك محتركة وراك 

- وامي ياهو مالتها احط ايدي بيد منوووو محمد هاااااي حياتي ما من حقها تروح تجيب غيد وتحطها كدامي 

- اني كتلها الحجي هذا والحجي بس خل نتفاهم 

باوعلي خوية ابوس راسج بس اهدي واكعدوا نتفاهم 

فيان :- نتفاهم على ايش ؟ الامر منتهي عزيزي بامكانك تاخذ الست وتوديها لبيت اهلها وينتهي كل الموضوع غير هيج ماكو اي كلام قابل للنقاش 

            

              

                    

- اخذها والعباس اخذها بس اكعدوا 

- عباس انت اكعد اتفاهم اني اروح وترجعلي بعدين 

- هو تروحيييين شنو مندلة هي بكيييفج 

- اي تمام اذا اذا على كيفك حلها 

- ادخلي جوا واني احلها 

- جوا وين 

- دخلييييييي جوا واني احلها كتلج 

- لا ادفع .. احترم 

- فيان بس طبي 

- راح ادخل وكدامك ربع ساعة فقط لو ما انتهى الموضوع انهي بنفسي 

- بس دفوتي 

رجعت دخلت ومحمد يلزم بعمه ويصيح بامه حتى متشمرلها حجاية عليه .. مشيت للغرفة .. مقفولة ومفاتيحها مموجودة بالباب 

وعمه يحجي : انت مو وافقت وكلت اي ارجعها وهاي جبناها .. شنهي يومية خضي جذعج ينخلة وما اريد ردوها شني بنات الوادم لعبة عندك 

- اني خابرت غيد وكتلها ما اريد وما نرهم نرجع .. 

- لعب جهااااال يومية اريد ها لا ما اريد

- ما لعبت لعب جهال عمي بس من كثر ما امي حجت وزنت براسي واني بوكت صعب والدنيا مفتوة عليه كتلها يمه هاهية سوي اللي تريدينه .. 

            

              

                    

- وسوت 

- اي وحسيت استعجلت ورحت خابرت غيد وينها غيد صيحيلها علياء خل تجي احاجيها 

- لا ما تصيحلها انت شني تلعب ع المرة ولك هاي ام جهالك استحي على روحك 

- جهالي على عيني وراسي .. بس ... ما 

وكفت غيد صاحلها عمها .. تعاي بويه رايدة رجلج لو لا 

صاح عباس : هي شني الرايدة رجلج عمي صدك تحجي اني مو خابرتج وكتلج ما اريد بلغي اهلج وبلغي الاهل لو لا احجيييي

توجهت للصالة اللي ديحجون بيها ووكفت اباب الغرفة ... حجه عمه : روحي غاد انت خلينا نحجي ويا البت. 

غيد حجت : اني اجيت لهنا لان خابرتني وحجينا وحلينا الموضوع وبعدين تكلب عليه شنو حاسبني بت شوارع تواعدني بالليل وتكلب عليه الصبح والله من اروح لابوي هسه لا يخلي عاليها واطيها ويكلبها فوك راسك خوش لو لا 

 - امشي انعل ابوج لابو التهدديني بيه بت الاوادم 

- والله اعلمك ابوي شنهو لا ما اخلي يربيك من جده وجديد وخل يفيدنك الدايحات .. 

- - اشرف منج ومن ابوج العاااااار 

كاموا يتعاركون وهي تريد تطلع وعمه يجر بيها وامه تحاجيها .. 

            

              

                    

صار الفشار يتطافر بيناتهم 

اتراجعت لورا .. واني اباوعلهم .. لمحتني امه اندارتلي وهي تكلي : ناخية الله واهل بيته يالحية الما يوفقج ولا يخليج باكية .. يالدايحة يالساقطة لو بيج خير وبت اصول ما تناميلج بحضن زلمة وانت مكو* بغير دولة لا تستحن لا نخجلن تبوكن الكحلة من العين مو بس تبوكن زلم . 

تركتها .. مجاوبتها 

وهي تفشر بشكل مقرف .. كتفت اديه بملل واني احاول اصبر نفسي على الوضع اللي هم بيه .. 

غيد سوت هوسة واخذت اولادها وطلعت 

وامه تخبلت شلون طلعت وراح نختزي وراح ننفضح .. وعمه طلع وراها ومحمد يلزم بامه التصيح وكعدت اختنكت .. وعباس يصيح ويحاجي بعلياء ويسمع امه . 

يحجي بعصبية ويمشي بالبيت ويدفع بهالباب ويشمر باديه .. صرت كدامه باوع بوجهي ويحجي .. ابتسمت .. ولميت شفايفي دا احاول ابلع الابتسامة اللي كلش مو وكتها 

صاح : شبيييج 

فريتها وكتله :- دا احاول افتح الباب مديفتح 

صاح : علياااااء مفاتيح الباب هذا وييين 

- عد امي 

- دجيبي بسرعة 

راحتلها وامه تصيح وتدعي 

كامت تزيد بدعاويها عليه .. وتفشر 

تنهد واني احاول استوعب الموقف .. جابت علياء المفاتيح وطلعت بوجهي فجأة وصاحت : هااااج . 

            

              

                    

كمزت .. 

اخذت المفاتيح دا افتح وكف عباس وخرت فتحه بسرعة وفات .. فتت وراه سديت الباب .. ودعاوي امه يصدح بالبيت . 

وعباس يصيح : تكلي تريد مصلحتك اسمع الدعاوي اسمع مصلحة هاااااي  

لو تمشي باللي تريده لو تدعي علييييييي 

- اهدأ كافي تصيح بداعتي و ألله راسي صار يوجعني. 

باوعلي بعصبية ودار عني وهو يكعد على طرف السرير 

واني اباوع للغرفة : انت اشتريت الغرفة ؟ 

- هسه هذا موضوعناااا فيان 

- دا اسالك بس ! 

- امي اشترته اقصاد 

- حتى تجيب غيد 

باوعلي وهز راسه باستنفار ورجع ظهره وهو يحط ايده على راسه بحيره .. نزعت القميص مني .. بقيت بالسترابلس .. 

تقربت منه هو متمدد 

تمددت على طوله وحطيت راسي على صدره 

تميل وهو يكلي : جج فيان ابألله .. شوية والله روحي طالعة . 

تلزمت بيه مقبل يتسحب : اعرف حبيبي .. اهدأ 

بسته بخده بوسة خفيفة ورجعت راسي لصدره 

تنهد .. ومد ايده ورا ظهري لزمني .. 

مديت ايدي لايده اخذتها وكمت اشبك اصابعي بين اصابعه .. هو يباوع شدا اسوي بدون ردة فعل وباله مشغول .. 

            

              

                    

همست : كلشي حيتصلح ويتعدل ويترتب لوحده والكل حيتقبل الموضوع بابا امك .. عمك كلهم مدام احنا مقررين .. كل صعب حيسهل 

- لحد ما يسهل تصبرين لو مثل اليوم توكفيلي سجينة خاصرة بنصهم 

- مجنت ادري انت ما عندك خبر لما دنكت تسلم ومشفتك مستغرب حسبت غير احساب 

- شنوه الغير احساب اني متزوج من وراج وجايبها ورايد اجبرج وبس اعتقدتي وخططتي براسج كعدتي ترادديني بنصهم اكلج فوتي توكفيلي عين بعين بدون مستحى اني شنو بعينج .. ما تستحييين شفتيني سكتت وحجيتي شفتيني رضيت تتسرعين بكلشي وتحطينا بمواقف نظل لنلف وندور على ارواحنا من وراج .. كافي جزعت 

يحجي بعصبية وصياح ويشمر بايده وراسي على صدره .. باوعتله .. همست : اسفة والله . 

ذب حسرة واتنهد .. 

ورجع ايده وره ظهري وهو يكلي : اني ما جاي ارزلج فيان بس اهلي ما تكدرين تتصرفين وياهم كانهم موظفين عندج .. هالشي ياذيني الي ما ياذيج .. الحجي يصير عليه يمكن الحجي ما ياذيج بس والعباس يأذيني 

- اسفة بس والله دا اتحمل هماتينه والا انت سمعت شكد فشرت وغلطت اني متجاوزت بحرف .. 

- وابوج ما اتجاوز ما غلط 

- وانت مسكتت لابويه كل ما بابا يتمادى انت توكف وياه وجه بوجه وتتعارك وتغلط 

            

              

                    

- حاسبة عليه كم مرة غلط ابوج وواجهته ما حاسبة من يوم اللي عرف بموضوعنا لليوم شسوا بيه وباهلي ومع هذا اني يمج لا لمتج ولا كتلج ليش ابوج سوا بيه هيج هالقرار الاخذناه احنا نتحمل عواقبه ومثل متكولين راح يمر بس ما يمر بالعرك والصياح بكل مرة . 

- طيب اوكي اشون رح اعيش وياهم وهمه محابتني ومطايقيني بالبيت 

- مالج علاقة بيهم لتحاجيهم ولتوصليهم . 

حجاها بعصبية ونرفزة .

ابتسمت وكتله : صار .. تأمرني امر 

باوعلي هز راسه .. وسحبني لحضنه اكثر رجعت راسي .. باسني بشعري .. 

بقينا صامتين لمدة حسيته ديشخر 

باوعتله نايم .. كمت من مكاني دا ادور على غطا حس بسرعة فتح : وين 

- اجيب غطا 

اشرلي ع المكان .. طلعت غطا وجبته .. تغطيت بيه وياه ونمنا .. 

لفد ساعة طفت الكهرباء .. اني كاعدة وهو غاط بنومته 

بقت بالعشر دقايق يلا اجت .. احتريت 

كمت من مكاني .. دا اريد اجيب جنطتي اطلع منها ملابس .. 

عديت من الصالة .. 

امه كامت تصيح : ولج العايقة الماتستحين طالعة مصلخة بنص البيت طبي لا والحسن هسه هوا اكسرنج فوووتي 

- دا اريد اخذ ملابسي 

كامت تصيح : ادخلييي 

            

              

                    

اتجاهلتها وطلعت دا اجيب جنطتي ملكيتها 

انداريت للمطبخ علياء واكفة: الجنطة وينها 

- واني سارحة بجنطتج متولين اتدوريها . 

- دا احاجيج باحترام لويش دا تغلطين !؟ 

- دوليييي 

مشت باوعت وراها واهز ايدي .. 

بقيت افتر .. لحد مكعد عباس على صوت صياح امه كالي : شكو 

- دا ادور جنطتي مدا الكاها اريد اغسل ابدل ماكو ! 

مشى سالها 

مجاوبته وامه تكله : لو بيك ذرة غيرة ومستحى ما تخلي مرتك مصلخة هيج كدام جهال اختك بس كلش نزعتها 

كام يصيح : الجنطة وين ليش تخلوني ا*** بيكم والله الجنطة ويييين 

علياء دفعت ابنها راح ركض جاب الجنطة طلعها من جوا الدرج .. وانطانياها عفته لعباس يتحاجه ويا امه واني دخلت اخذت طلعت الملابس كلها حطيتهم ع السرير واختاريت لبسة رحت اسبح 

سبحت ورجعت للغرفة هو كاعد ديفتح بالتلفزيون وكفت امشط .. شفته كعد تركت المشط ع الميز وكعدت يمه .. حجيت : جوعانة ! 

باوعلي : متعرفين تطبخين 

ابتسمت : اجرب 

- دكومي 

كمت وياه للمطبخ 

فتح الثلاجة .. اكو طماطة كال : نسوي طماطة وبيض 

            

              

                    

- ماشي 

- دكصصي الطماطة على ما اروح اجيب بيض واجي 

مشى واني افتر اريد شي اكصص عليه مندليته اجا واني بعديني افتح واسد .. طلعها فوك الكاونتر .. حطها وكام يكصص وياشرلي ع المكان اسحب طاوة .. 

اخذت حطيتها ع النار 

حطي زيت .. كمت ادور الزيت دلاني .. فتحته شو الزيت ممفتوح بس مضروب بسجينة .. مدا ينفتح كامل كالي : بس صبي هو يصب 

صدك شمرت صار يبز دهن 

حط الطماطة وقبقها .. وطلع بصل كام يسوي وبيض كام يضرب .. وسواها واني اباوعله حجه : اتعلمتي 

ابتسمت : ما اعرف يمكن 

- ممجربة بحياتج اتطبخين 

- لا ما احب المطبخ ولا احب شغل البيت 

- جا شتحبين لخاطر الله ما تكليلي وين كضيتي عمرج 

- دراسة و عمل وماجستير وتعرف نمط حياتي بس اعرف اسوي قهوة تركش كلش طيبة 

- صدك عليج العباس 

ابتسمت عرفت ديستهزأ : راح اتعلم 

مد راسه وباسني بخدي : على راحتج حبيبتي 

سوا الاكل واني اباوع وين راح ناكل ماكو ميز طعام 

لحد مكلي : جيبي الصينية 

انطيته حط الطاوة بيها كتله : حناكل بيض بغرفة النوم ! 

            

              

                    

- ناكل هنا 

- بس ماكو ميز طعام 

- نشوف فراش 

كام يباوع حط الصينية وجاب فراش كعدنا ناكل .. خلصت كمت اخذت فرجة الاسنان فرچت وكعدت بالغرفة وهو اجا .. شو شوية وسمعوا صياح علياء 

كام هو طلع .. 

دا تصيح ع الصينية عايفيها بالكاع ومغاسليها 

كالي : روحي اغسليها وارجعي 

- وهالصياح كله على طاوة ! 

- دكومي 

مشيت شلتها وذبيت الباوقي بس الطاوة مو تيڤال البيض لازك بيها اقرف اوخره بأيدي .. ردت اشمرها للطاوة خفت متقبل وغسالة صحون ماكو.. تركتها بالحوض بلا غسل . 

طلعت واكفتلي تراقبني : تعاي تعاي .. شنو عايفتلياها شنو منتظرة اني اغسلها .. غسليها 

- الاكل ملتصق بيها صعب تنغسل 

- مشكلتج .. يلااااا 

اخذت نفس شلت الطاوة من الحوض مال السنك شمرتها بالزبالة : انتهت المشكلة 

اني سويت هيج لو هي تخبلت 

وكامت تصيح وتعيط وتصيح هاي طاوتي صارلها سنين عدنا تذبين الطاوة خايسة جايفة 

- وييي طاوة صارلها سنين شدعوة هسه تلكيها كلها بكتيريا اني اجيبلج باجر افضل منها 

            

              

                    

- انت شايفة علينا روحج بفلوسج .. 

طلعتها من الزبالة هسه تغسليها 

تركتها ومشيت 

بقت تصيح وتهوس 

دخلت حجيت لعباس .. تنهد وما حجه شي بس كام طلع .. كعدت كدام التلفزيون ولزمت تليفوني . 

سهرت ع التليفون ل٣ بالليل 

ثان يوم عباس طلع لدوامه واني نايمة .. 

بس طلع عباس امه فتحت الباب ودخلت الغرفة .. سحبت الغطى من فوكايا وهي تصيح : ولج الخايسة نايمة وغرفتج الوصخ كاتلها شوفي الهدوم الغراض نايمة فوووووك الوصخ كووومي 

بارك مصلخة ونايمة 

واني اكول الزلمة شبي معمي وصاير مطي يطبخلج ويوكلج ثاري لاعبة بعقله بهالسووووووالف كومي 

من صياحها وهوستها اريد استوعب شكو 

مدا افتهم بس تعيط وهاجمة عليه واني اكوم بلا ما احس ودا احول افتهم .. راسي كلش مأذيني وعيوني كوة دا افتحها من النوم . 

وتجر بادي حيل وتدفعني 

اندفعت للميز واني اكولها : هاي شبيج شكووو 

- وشبابة الشبت بيج طايحة الحظ لا تكليلي شبيييييج كووومي نظفي يلا والله لا ما امشيج على الصراط المستقيم ما اتسمى ام حميد .. كوووومي 

- ارجوج راسي ديأذيني اتفضلي برا . 

- مني هاي التطلع برا 

هجمت عليه بسرعة رفعت اديه وتريد تلزم بشعري ركضت علياء تكولها : يمه يمه مو هيج لو اذيتيها غير يطلع ابوها يهجم بيوتنا .. يا يمه دعوفيها 

            

              

                    

- وج شوفي الوصخ شوفي الهوسة 

اكو مشط ينحط ع الميز هييييييج اكو ملابس مرة محترمة هيجججججج هي هاي المثقفة الووووووصخة 

- يا ست مطالبة منج تنامين عليهم ولا حاطة المشط على سريرج اطلعي دا اكولج راسي ديوجعني 

علياء : جا هو هذا حظ الجايفات ما سامعة بيه 

- هسه تكومين تنظفين هاي الهوسة كلها يلااااا اكصبج والله لو ما اشتغلتي بسرررعة 

- شوفي دا احاول احترمج قدر الامكان بس احيانا الإنسان يضر المقابيله انو يهينه .. كافي ارجوج اطلعي ولتخليني اتجاوز بحقج راسي مأذيني دا اكولج 

دا احجي وهي تخبلت شلون اكولها هيج 

كامت تشيل وتشمر عليه وعلياء تجر بيها .. اخذت كم قطعة من الملابس وكامت تشكك بيهن .. وتفشر 

تنهدت واني اباوعلها 

وارفع اديه لراسي احاول افرك بيه 

طلعت من الغرفة راحت للحمام جابت سطل مي وشمري ع الحرباية والكاع 

صارت الغرفة ناكعة بالمي .. 

صفنت هسه هذه انسانة عاقلة ! 

يبدو مو اني وحدي المريضة نفسية .. مرضها اكثر مني 

تركتها لعبت نفسي طلعت بالحديقة 

دا اريد اتقيئ .. واجت ورايا تلطم شلون طالعة بثوب النوم للحديقة .. 

            

              

                    

اريد اتقيئ وهي تجر بيه 

دفعتها مني واتقيئت .. فات عباس وهي تلكته تكوله : ولك شوف شهرتنا شوف بيش طالعة بالحووووش ولك هاي تاليتك يالاغم ملفي علينا الكحاااااااااااا* 

ركضلي وهو يكلي : فيان .. شبيج .. فيان 

كمت اتقيى احس روحي دا تطلع .. وامه تصيح 

صاح بامه بصوت عالي طبت جوا .. 

وهو راح ديجيبلي مي 

اخذت منه المي واني ارفع بوجهي اريد اتنفس اختنكت 

حط ايده ورا ظهري : بس طبي ميصير بملابس ذني اتطلعين 

شربت المي ودمعوا عيوني 

انطيته الكلاص ودخلت ابجي وهي تصيح وتفشر 

تبعني للغرفة وهو يباوع الدنيا ناكعة 

: هاي شصاير هنا شكو ليش هذا المي 

- دا احاول احترمها لكن امك مدا تتركلي مجال 

شوف شنو سوت بالغرفة .. امك مريضة نفسية ودا تطلع عقدها بينا .. اتصرف وياها اكثر من هيج اخاف انفجر بيها ووالله اااذيها لو فاض صبري كااافي 

- هسه اني احير بامي احير بابوج والحسين طلعت روحي والعباس .. من خ* بهالصباح الاكشر منين اتلكااااها .. طلعت روووووحي 

كام يصيح وطلع بنص البيت يدفر ويتصايح 

سحبت روحي لبسته فوك الثوب بس نصه مبلل .. مهتمت طلعت لعباس واني اسأله : بابا شمسوي .. 

            

              

                    

- ابوج فاسخ عقدي ويا الوزارة .. ومن الصبح اداوم اليوم يكلولي مفصول .. يابه شنو السبب ! 

متجاوز حدود العمل .. 

يا حدود اتزوجت بيا شرع وبيا ديييين الزواج حرااااام .. 

هو يحجي واني صافنة بيه .. 

مشيت ادور على تليفوني خفت بس لا واصله المي وتبلل 

طلع جوا الخدة مواصلة المي اخذته وخابرت ع الوزارة .. جاي كتاب فصل بحقه .. 

عرفت ابويه بلش يحاربني حتى يضيق عليه عيشتي وياه ويجبرني اتركه 

كمت ادور على ملابس ناشفة من بين الملابس 

لبستهم وعلاس وامه يتناحرون .. اخذت تليفوني وجنطة صغيرة .. صاح : تعاي هنا ويييييين 

- حروح لبابا شغلة ساعة وارجع ما اتأخر 

- عوفي فيان .. ادخلي جوا 

- ارجوك لتمنعني بابا لو ما وكفت بوجهه مراح يوكفه شي وراح يتمادى اكثر واكثر 

امه : دهر الدهرج كون يالعرمة حتى اعلى ابوها تتجاسر ولك هالملة الزفرة وين لكيتها وجبتها لينا يالمصخمممم 

تركتهم ورايا وطلعت 

اخذت تكسي .. وخابرت بابا .. رد : الو 

- الو بابا وين انت 

- راح اوصل المكتب .. شعندج ؟ 

- تمام 

سديته وتوجهت للمكتب مالته 

وصلت هو هستوه داخل لكيت هوشيار موجود منتقل يمه والسكرتير كالي : عنده ضيف ست 

            

              

                    

دخلت كبل .. جان بالفعل عنده ضيف 

خزرني وهو يكولي : اهلا بنتي صاير شي 

- لازم نحجي بابا 

- اعتذر منك يبدو ان موضوع مهم 

كام من مكانه بسرعة بانحراج 

وطلع من المكان : شنو هالهمجية بالتصرف شلون اتدخيليييين بهشكل نسيتييييي الادب 

 -انسى الادب وانسى كلشي لما تتعدى على حياتي تركتلك كلشي ومشيت ومطالبتك بشي تروح تكعد عباس من شغله حتى تحاربني بيه ليش اكدر افهم 

- امر فصله بيه مصلحة عامة تعرفيها فيما بعد وما اسمحلج توكفين كدامي هشكل وتحاسبيني على خلك واحد مهتلف اني ابوج اصحي .. لتخليني اصيج بطريقتي 

- انت شمفكر بدونك ما اكدر اعيش .. ما اكدر اشتغل .. مراح اعرف ادبر نفسي 

- شوفي روحج بابا واتباهي بيها بس من توكعين بمصيبة حليها لوحدج .. واخذي حذرج 

- لازم اخذ حذري منك .. لانك اكثر انسان اذاني بحياتي .. اذا ما راح تتركني بحالي والله انسى انت ابويه واتصرف وياك بغير طريقة . 

- ما يصير تتجاوزين حدودج ويا ابوج لخاطر رجل مصار كم يوم من عرفتي اصحيييييي 

- اني صاحية انت اللي مدا تعرفني بحالي 

عاجبك وضعي واني عايشة ع المهدئات ابيتك 

يعجبك اموت كدامك يوم ورى يوم 

بس ميعجبك اعيش 

كافي بابا عوفني بحااااالي كااافي 

            

              

                    

- اطلعي برا 

- مو قبل متعوفني اني وزوجي .. 

- اطلعي برا قبل ما اخليهم يهينوج ويطلعوج برا بدون احترام ... برا 

- مجاية حتى ابقى جيت دا احذرك بس

لكن عيش وشوف .. مع السلامة بابا . 

تركت وطلعت من المكتب الخاص بيه 

ورحت على بيتي حتى اخذ بقية ملابس بس لكيته مقفول بالكامل ومتغيرة الاقفال .. 

خابرت على ماما 

كلتلها : تبلغي لبابا اني اريد اغراضي بالبيت والا اضطر اكسر الاقفال الموجودة داخل البيت 

- فيان لتواجهين ابوج 

- لهسه ما واجهته اني اريد اغراضي اللي بداخل البيت ما من حقه يمنع اغراض يالماك بوك اجهزتي كل شغلي عليه اريد اغراااااضي مو حالة هذه . 

- هسه اخابره بس اهدي 

بقيت داخل البيت 

بالحديقة افتر .. عقلي افتر واني افكر لازم الكي شغل قوي اكدر استند عليه وما احتاج لبابا .. لازم اتواصل مع الوفد الالماني واوصل وياهم على اتفاق بس .. ما اعرف شلون اكدر لازم اسافر لالمانيا حتى اكدر اقنعهم بعقد 

اخذت تليفوني خابرت ازاد اخوية 

سلم عليه وفرح باتصالي 

وكمت اسولفله ع الديصير ويايا وابويه منع مني كلشي واحتاج انو ابرم عقد مع شركة المانية وافتح الوكالة 

            

              

                    

كال: عندي صديق الماني ممكن يساعدنا لحظة اشوفلج الموضوع . 

سده من عندي .. 

شوية ورجع خابرني كال : فيان يحتاجلج جية هوا حتى نكدر نقنع الشركة ونشتري منهم الوكالة 

- طيب لازم اتراصل وياهم حتى يدزولي دعوة 

- اني راح ادزلج دعوة لايطاليا ومنا اني وياج ناخذ العقد اني مدام عندي الجنسية الايطالية .. يسهل الموضوع عليج . 

- تمام .. انتظر الدعوة باسرع وقت 

كمت ارتب ويا ازاد لفتح مشروع وكالة المانية داخل العراق .. وهو يحجيلي عن المشروع وارباحه واذا ممكن هو يدخل ويايا ويساعدني ويفكر يرجع للعراق يشتغل ويستقر بهولير 

واحنا دنحجي اجا رسول 

انطاني المفاتيح .. صعدت لغرفتي .. 

الماك بوك موجود واجهزتي اللوحية ايضا موجودة بس مجوهراتي بالكامل مموجودة .. حتى فلوسي اللي ضامتهم بالكنتور ماكو ! 

اتضايقت 

طيب لانو هذه ممتلكاتي الشخصية ما من حق ابويه ياخذهم .. مع هذا تركت كلشي بالبيت وما اخذت غير ملابسي واجهزتي .. 

رجعت للبيت 

عباس عصبي وهو يكولي : وين جنتي وليش اخاااااابر عليج متجاوبين 

- هياتني اجيت ليش دا تصيح حبيبي 

- دا اخابرج شني الليش تصيييح ما تجاوبين 

            

              

                    

تقربت منه وهو ديصيح لفيت اديه على ركبته وقربت وجهي بست شفايفه لزم اديه وبعد وجهه : صدك تحجين اهلي منا شبيج وخري .

- ماااااه .. مالتي

لفيت اديه على خصره وشبكته حيل 

-يمعودة امي هسه اذا شافتنا اطلعنا من الملة والله 

-اي وتطلعنا نفتر شوية ونرجع مو مشكلة 

-شو اتسخفتي هسه احجي وين جنتي 

لحظت علياء وراه تعدلت من وكفتي وياه : مدشوف الجنط جنت ابيتي جبت غراضي وحجيت وياه يكولي مصلحتج والمصلحة ودائما بابا كعادته يهدنا ويكول مصلحتكم بس هالمرة محتعدي مثل كل مرة 

-اتركي شغله وهو وراها ما اريدها اني اشرفلي شغلة 

-لا حخابرلك احمد 

-يا احمد؟ 

-صديقنا يامنلك شغل باسرع وقت حتى متضوج

-احمد ابن **** لو غيره ؟ 

-بلي هو 

-وانت شعندج تواصل وياه هاذ؟ 

- صديق 

-اسمعي فيان ترا اني مخبل وعلي .. وعلي من اطلع عليج سواديني اسودنج وهو محمد توبي 

-شبيك ليش دا تحجي هيج 

-هذا الجان حاط عينه عليج لو غيره 

            

              

                    

- اي بس ما بينا شي 

-دنجبييييي شلون تبرر ما عدها شي 

رفعت اديه ولزمته من خدوده حيل : اكولك انت لويش متصير حباب ؟ 

لزمني من شعري : اييي اي اي لا لا لا عليك الله لا والله راسي ياذيني 

باسني بخدي : دكومي طبي خل اشيل الجنط 

غمزتله : انتظرك 

ابتسم ومشى للجنط واني دخلت للبيت 

امه نايمة .. عبرت الصالة للممر وكفت اخته : اذا خلصتي بوس المطبخ ينتظرج .. مو خدامة هنا اني وانت اطلعين واطبين على كيفج . 

اتجاهلتها ودخلت للغرفة 

عباس لام الغرفة ومطلع الدوشك برا .. دخل الجنط ورايا .. حجيت واني انزع السترة : ووين حنكعد 

- هسه اجيب جودلية موقت بين مينشف الفراش برا 

- طيب عباس هالوضع حيطول هيج !؟ 

- شسوي يعني 

- ما اعرف بس لازم نوصل لصورة حل ونكعد ونتناقش مع امك واختك اذا حابين يعيشون ويايا لو ناوين يخلصوها عرك وهوسة كل يوم 

- تمام نحجي بس اكو شغلة .. 

- اللي هي ؟ 

- سالفة علياء تشتغل وحدها صعبة...... قاطعته 

            

              

                    

- راح اشوف مساعدة منزل باسرع وقت 

- وامي راح تقبل مرة غريبة اتطب البيت ! 

- يعني ؟

- ما ادري امي كلش صايرة صعبة ومريضة اخاف حتى اتعارك وياها تروح تتخربط ويصير بيها شي 

- اني حامل ما اكدر انظف واطبخ واساسا ما اعرف ولا هذا شغلي واعتقد اتفقنا على هالشي مسبقا وكتلك اني اتحمل تكاليف هالموضوع . 

- هسه ما ادري .. الله كريم هالايام كلش تعبتني .. احس راسي راح ينفجر ما ادري من امي من عمي لو خالي الكلساع يخابر لو الشغل لو ابوج .. ما اعرف كلش تعبان 

- كلشي حينحل وصدكي افضل من السابق .. خابرت ازاد على موضوع الوكالة الالمانية 

- يا وكالة 

- سابقا اجا وفد الماني للوزارة وفتحت ويا بابا موضوع نستغل الوفد بفتح وكالة المانية وقدمت مشروع مهم مبدئيا رحبوا بالفكرة داخل العراق كمشروع استثمار وبابا وافق الان قررت امضي بالامر بدون ابويه لكن بمساعدة ازاد 

اذا كدرنا نحصل الموافقة على الوكالة امورنا تصير مو بس توب .. توب التوب . 

- اني ما افتهم بهالمواضيع وما ادخلها 

            

              

                    

- الموضوع مو معقد نحصل الموافقة ونحجي بالتفصيل وقتها بس خلي تصير .. اللي اريده حاليا اشتري سيارة هاي مال نروح ونرجع بتكسي امر مزعج 

- السيارة اللي دعمتيها من استهدفوج مو جانت باسمج 

- بلي اني مشتريتها بس اني مسوية وكالة لبابا صلحها وباعها .

- مددي وارتاحي .. وشوفي غداج ذاك بالجرارة عزلته اتغدي لتنامين بدون اكل 

- بالمجر ! ليكون بايكة 

غمزلي : هيج شي 

- هههههههههههههه .. يا الوضع اللي احنا بيه ويييي 

- سهلة بابا .. حللي وارتاحي والله كريم 

طلعت الاكل ضامه بحافظة اكلت ورحت غسلت ورجعت هو متمدد ع الفراش مال نفر .. عاد اتمددت فوكاه وهو ضحك .. وغطاني وياه . 

ما مرت ساعة ساعة ونص 

اندكت الباب خاله اجا .. كام بدل وطلع واني بقيت نايمة .. سمعتهم يتصايحون صحيت استمع الهم 

مقابلين بموضوعنا وشلون لغى رجوع طليقته وديتعارك وياه .. ونفس الحجي يعيد ويصقل بيه وباقين بنفس الدائرة يكولهم ما اريدها وهم يكولوله ام جهالك مرتك عائلتك 

بدلت وكمت .. رفعت شعري لميته 

وطلعت للصالة .. دخلت : مساء الخير 

            

              

                    

رد خاله : هلا مساء النور .. كعدي بتي خلي نتفاهم 

بويه هذا رجلج من اخذتي ما تعرفين عنده فروخ ما تعرفين عنده عايلة ويوم من الايام يردهم .. 

شيضرج لو رجعاهم وكعد مرته وجهاله بدال ما ابوها ضال يهدد ويكاوم 

- عفوا .. وحدة وحدة 

اولا اني لما عرفته هو كان مطلق زوجته من سنتين اعتقد سؤال يتراود للذهن وين كنتم بهذه السنتين محد منكم سعى لرجوعهم على العكس اني اتعرفت على والدته مسبقا شكت من طلقيته وما كان لها اي نية رجوع شصار وتغير كلشي وصار الكل مهتم لامر اولاده !؟ 

- وانتي ياهو مالتج شنهي تمنعينه من جهاااااااله!؟

- العفو انت دا تتناقش ويايا وتريد تسمع جوابي لو ما الي شغل !؟ سألتني دا اجاوبك اما انو تكولي انت معليج فاكدر اكولك نفس الشي .. انت شعليك تدخل بامورنا ! 

حجيتها و بسرعة عباس وخاله حجوا بنفس الوقت : فيان كومي 

اشرلي يمكن التليفون جاي يرن 

خاله : ولج انت شنو من بت ما تستحين تحجين ويا الزلم هيج بس هذا تاليته اليحترم نسوان ويحاجيهن امشيييي كوووومي لج بت الكلببببببب

عباس: كومي التليفون كاعد يرن 

- لحظة عباس .. لمجرد جاوبتك بنفس طريقتك دا تنعتني بعدم الحياء وتقلل من احترامي .. انت شنو ومنو حتى شايف نفسك افضل مني ويحقلك اهانتي .. يقال لكل مقام مقال شنو مقامك بلا زحمة حتى انطيت النفسك الاذن بالتقليل من المقابل .. مجرد زلمة ! 

            

              

                    

عباس : فياااان .. كومي كااااافي 

كام من مكانه ووكف كدامي : هسه انت شطلعج كومي 

عباس يكومني واني اكمل كلامي ويا خاله : 

مالك وزن علمي .. ولا الك وزن اداري ولا الك وزن مالي 

والحجاب اللي حاطه على كتفك وتسمي عكال ونافخ نفسك بيه لكونك رجل عشائري .. لعلمك حتى النساء تكدر تلبسه . 

شالني عباس من مكاني وهو يسد بحلكي .. 

ودخلني جوا بالقوة : كاااااافي جاي اسكتج اسكتييييي ليش ما تحترميييين اني جاي احجي ويا خالي اتطلعين اتدخلين نفسججججججج ليش 

- واكعد استمعلهم وهم يقنعوك برجوعها واني موجوده كلامهم اخانة اليه وانت ساااااااااكت 

- اني سااااااااكت ولج بت الاوادم ليش تخليني هسه اتوازه وياج ياهو الساكت مو جاي اترادم وياه تحطين روووووحج بالساااااالفة ليش 

- ولويش تترادم بشي منتهي تكدر تنهي الجدال بكلمة انت دا تقلل مني لما تاخذ وتنطي بالكلاااااام كلهم متروووووج كلهم زوجتي ما تقبل تستحي تكولهم ما اقبل حتى ليكولون عليك تتبع زوجتك .. انت دا تهيني 

-محد هاينج غيرج احذرج مرة لخ والله لو حجيتي ويا امي لو واحد من اهلي وقللتي احترم اطيييييح حظج واااالله 

            

              

                    

- دا تغلط عليه ! 

- واهيييينج بعد خوووووووش 

من تهينيني وما تحترمين وجودي كدامهم واكلج كووووومي وما تكووووومين اهينج 

- طيب شكرا ..

تركته وانداريت انتجيت ع الميز وهو يصيح 

واني افرك براسي .. مديسكت .. 

تركته يحجي ودا اريد اطلع من الغرفة كام يصيح : من احجي ويااااااج لا تتتجاهلين 

دفع الباب بقوة وجرني وهو مستمر بالصياح 

مجاوبته ابداً .. بس اتراجعت وكعدت ع السرير ودنكت راسي ولزمته باثنين اديه وهو مستمر يدفر ويصيح .. 

هوالزواج هشكل لو اني غلطانة لو شنو؟ 

هو المفروض يصيح ويغلط ويفرغ عصبيته واني اسكت لو لازم ارد .. اذا رديت شراح يصير ؟ وراح يفيد ردي لو يتعقد الامر اكثر

رفعت وجهي اباوعله واني براسي امرين 

يا اتحمله بهالوضع هذا واتحمل صياحه وتجاوزه وعصبيته .. لو انهي كلشي واترك وامشي . 

فرغ كلشي بكلبه 

صفك الباب وراه وطلع 

نزلت من السرير كعدت بالكاع .. لميت رجليناتي لصدري وحضنت نفسي وخليت راسي على اركباتي .. وساكتة 

احتمال اني غلطت 

مكان لازم اطلع احجي ويا خاله 

بس دا اتضايق من كثرة كلامهم وياه وهم باوموه على رجوعنا ويعاتبوه وكانه طلق زوجته بسبب ما كانوا اتطلقوا من سنتين ! 

            

              

                    

خابرتني ماما 

كمت اخذت تليفوني .. اول ما رديت فتح الباب ودخل :الو 

-هلو ماماتي شلونج 

-ما اعرف 

-شكو 

-مدا اعرف شكو ما ادري 

-صاير شي 

-ماما اعتذر مالي نفس احجي .. نحجي بعدين 

-لما ترتاحين خابريني ضروري 

- تمام 

شمرت التليفون من ايدي 

وبقيت كاعدة بمكاني وهو كاعد بالطرف الثاني من السرير واني بالكاع .. 

شغل تلفزيون طلع اخبار .. بقى يباوع واني اباوع بدون اي ردة فعل .. ساعةاكثر واحنا على نفس الوضع 

كام طلع واني كاعدة بمكاني 

رجع ورا كم ساعة اني كامشة تليفوني 

حط يمي علاكة بقلاوة ومشويات .. متقربت الهم ولا لزمتهم .. ولا حتى باوعتلهم وهو يحطهم 

راح دخل الدوشك هو وولد اخته 

صحت على ابن اخته : امير 

باوعلي : هاك حبيبي 

شلت علاكة المشويات والبقلاوة 

وديهم لماما واتعشوا .. 

امير ضل يباوع لخاله 

حجه : عوفهن خالوا .. روح جيب المخاد 

طلع وهو يكلي : ما عاجبج تاكلين ضمي لما تشتهين .. ما تعرفين اتطبخين ومحد هنا مستعد يسويلج اكلج ابقى اضملج بالختلة .. ضمي اكلج وخلصيني 

            

              

                    

كمت من مكاني .. 

اخذت العلاكة ورحت حطيتها بالهول بنصهم ومشيت للحمام غسلت اسناني ورجعت للغرفة عاقد حاجبه .. 

وشايل الفراش اللي جنت كاعدة عليه .. 

تنهدت .. 

سحبت المخدة شمرتها بالكاع 

وكعدت .. وبقيت على تليفوني 

راسلتني ماما فايبر .. جاوبتها : اكو شي 

- لا 

- لعد شصاير 

- مشاكل بسيطة 

- على شنو 

- هيج بيناتنا .. عصبي ويصيح وما اعرف اذا اسكت او لازم ارده .. واحتريت 

- خل يولي لتسكتيلا 

- واذا مسكتت شراح يتغير !؟ 

- وعيشتج عليه دخلي يرووووح 

- تمام .. ماما اني محتاجة المساعدة مالتج لانو ام نور ما اعتقد راح تكدر تجي للسيدية .. غرفتي تحتاج ترتيب اضافة الى .. احتاج وحدة تجهزلي اكلي يوميا لانو دا اعاني بسبب هالموضوع 

- ليش وميحطلج مساعدة العينيتن 

- بابا فصله من الشغل 

- وهسه لازم يكعد يجدي حتى يعيشج مو 

- ماما اني وين دا احجي وانت وين 

- تمام راح ادزلج المساعدة مالتي بيد السايق واشوف شنو عندي بالثلاجة من تجهيزات ادزلج حطي بالمايكرو وحمي وقت اللي تريدين . 

            

              

                    

- ما اعتقد عدهم مايكرو 

بس مو مشكلة ادبرها انت سوي اللي كلتي عليه 

- شعدهم لعد متكليلي اذا مايكرو ماعدهم بيش يحمون 

-نعست ، تصبحين على خير . 

تمددت ع الكاع ونمت صفح دا اتصفح 

اجا وكف كدامي : كومي نامي ع الجرباية 

تجاهلت مجاوبته وحطيت السماعات براسي وشغلت اغنية ( لا ترحلين ) لرائد جورج ... حتى ما اسمعه

نزل وكعد يم راسي .. انداريت وانطيته ظهري

اتمدد ويايا ع الكاع وصار ورايا .. متحركت ابد بس هو يطخطخ ويحاول يحاجيني .. وما اسمعه اخذ الهيتفون وحدة من اذني وكام يستمع ويايا .. 

ويوخر بشعري من اذني ويرجع بيه 

ويمشي ايده على زندي يتحسس نعومة جسمي .. تقرب وكام يبوسني بكتفي بزندي ويرجع يمسح .. تقرب اكثر وهو يهمس : اسف .. حبيبتي لتزعلين والله ما اتحمل زعلج .. فيااان .. مو احاجيج 

طفت الكهرباء بقى بس صوت الاغنية باذني 

كام يهمس : لا تخلين صوتنا يطلع مسامتحني لو لا 

انداريت اباوعله : اي اي انداري حاجيني لتسكتين 

- متسوى الكلام 

-هااااااه هذا مو تجاوز !؟ 

-شفت التجاوز يأذيك لما يمسك بس ما لازم اتاذى ولا ازعل ولا اندار وعادي لازم اكون مبتسمة كدام تجاوزاتك وصياحك واسامحك وافتحلك الحضن بمية هلا بس تجي .. كوم عباس 

            

              

                    

-هسه مو اتجاوزتي وسكتت 

-مالي نفس احجي كوم 

-ماشي لا تحجين بس ابقي هيج 

حضني من ورا .. روحي وراحتي انت .. مالي راح بدونج يروحج فدوة عمي وفوكه خالي وغيد واهلها والدنيا كلها تروحلج فدوة ..انت روحي 

ما انداريتله ولا كسرت وياه 

بس ارتاحيت واستمتعت بالشعور وهو يغازلني ويحتويني ويحسسني بقيمتي عنده بعد ما نسفها وقت عصبيته . تركته يرمم الزعل البداخلي بكلماته بدون ما اجاريه.

بقى حاضني ونايمين بالكاع .. 

غفينا بمكانه .. بس نص الليل مدري شصار وطفت الكهرباء .. هسه تحول هسه تحول ما حولت 

اندكت الباب ..

كام من مكانه علياء دا تكوله كوم شوف المهرباء ليش ماكو احتركنا حرك . 

راح هو واني ظهري تكسر من الكاع 

كمت للجرباية بس حارة تكتل .. رجع وهو يكول : المولد عطلانة للظهر تتصلح 

علياء : وهسه اشلون يكتلنا الحر 

- شسوي كلها طافية .. مثلنا . 

اجا للغرفة اني متمددة محجه ابد بس الاطفال كعدوا وصار صوت بالبيت هو بدل وطلع من البيت .. متت حر مو طبيعي يربي دا تطلعلي امور اتكولي شردي .. ابيتي اكو مولد كهرباء جبير اباب بيتنا لا ادري شنو وطنية ولا ادري شنو سحب شوكت تطفى وشوكت يتشغل المولد حتى ما اتذكر يوم عطل وكعدت اعاني من هالموضوع .. 

            

              

                    

 ب٧ الصبح الا شوية اجت الوطنية

استغليتها ونمت .. ساعتين وهم طفت بقيت بمكاني 

خابرتني ماما .. كالتلي : المساعدة دزيتها الج بيد السايق .. 

كمت من مكاني .. 

دخلت حمام وغيرت سمعت الباب يندك .. 

طلعت امه صاحت وراي : وين وين تعاي جاي بت الاوادم ما تشوفينه يندك شعدج فاتحة 

باوعت باستغراب هاي شبيها 

وفتحت الباب وهي تلف بشيلتها .. وكف السايق كال : صباح الخير ست انتظر لو اروح ؟

- لا انتظر .. اتفضلي 

عمتي دا تباوع سديت الباب وهي تشوف مرة غريبة 

اشرتلها تفوت من المطبخ .. صاحتلي : تعاي هنا شني هاي المرة المطببتها النص بيتنا 

- مساعدة 

- تريد مساعدة ومطببتها النا طلعيها 

- مساعدة منزل ..

- مساعدة منزل شني هسه غير افتهم هاي ياهي حاجيني 

علياء : خدامة جايبتلها يمه خدامة 

- يووووووع وشعدج بالخدامة وشنعرف عنها ومدخلينها بيتنا 

- ماما تعرفها .. فوتي امي الغرفة جوا 

- ما تفوت والله يمه شني الغريبة تفوت بيتنا وانت شناقصج ايد رجل وشعدج هن اهديمات تلميهن وتتنظف غرفتج مدخلة الغريبة تخدمج لا والله ما اخليها 

            

              

                    

- خالة هذا الامر ميخصج .. مراح تجي يمج ولا راح تلعب باغراضج راح تنظف غرفتي وبس .. 

- لا والله حرام ما اتطب .. طلعيها بسرعة طلعيها .. طلعي خالة احنا ما عدنا غربة تنظف النا .. كومي 

- معناها كومي نظفيلي غرفتي اذا متقبلين احد ينظفها 

- الخايسة الجايفة اني انظف غرررررفتج طايحة الحظ 

وكامت تصيح صياح وتعيط 

وسحبت المساعدة طلعتها برا وسدت الباب .. 

تنهدت واني طالعة روحي والدنيا حارة 

صرت اباوعلها بنص عين .. اشون ويا هالمرة هذه اللي لا تخليك ولا تخلي رحمة الله تنزل عليك .. صبح وراسي ماذيني ومبيه حيل احجي واريد اتقيئ وهذه حيلها اقوى مني ولا كانها مريضة عندها طاقة للعرك والصياح بشكل عجيب 

- خلي تدخل ع الاقل تسويلي ريوك وخري .. 

- وما تكومين لروووووحج شبيج مشلوووولة 

- انت شعلييييج امي كافي ليش دا تخليني اطلع المرراسي كله بيكم .. اكعدي بمكانج ولتدخلين 

- انعل والد والديج والله البيت مو هيته ويدخله ياهو الجان بس مو صوجج صوج الطرن العايفج على حل شعرج 

دخلت بدلت ملابس وطلعت ملزمتني 

صعدت ويا السايق لبيت ماما اني دخلت لغرفتي ارتاح واجر هوى والمساعدة راح تسويلي ريوك وصاحتلي اتريكت قليل ورجعت لفيت راسي ونمت .. 

            

              

                    

رجعت ماما الظهر كعدتني : ها خير شصاير 

- مصاير شي بس امه مقبلت المساعدة تدخل تنظف 

- ليش 

 - تكول ما اخلي الغريبة تدوس بيتي 

- صدك تحجين هذه وين عايشة 

-ما اعرف راسي كلش ماذيني 

- انت متعاركة ويا عباس 

- اممم 

- ع شنو ؟ 

- هيج مشاكل بسيطة 

- تحسين مجبورة بهيج ملة .. هذا بيتي فارغ اكعدي انت وياه ويايا ممجبورة تكعدين ويا امه المختلة 

- محيقبل 

- وليقبل هو شنو حتى تنتظرين رضاه 

- ماما مالي خك احجي 

- دا تاذين نفسج بهالحب 

- وقبلها مجنت متأذية !؟ اقلها لما اتاذى وازعل واضوج ميتركني مثل الكلبة لوحدي احترك وانطفي .. يهتم يسالني شبية يبقى يمي .. اني محتاجة احد مهتم يشاركني حياتي باقي المور كلها تنحل تدريجياً 

دنحجي اندكت الباب 

راحت ماما طلع عباس .. مطنكر مقبل يدخل اسمعه يكول لامي : بس صيحيها تعبان خل تجي . 

كمت من مكاني وماما طلعتلي اكل من الثلاجة وجدورة طبخ وخلتها كبال عباس كاللها : شني ما عدنا اكل وومطيتنا ما اريده 

            

              

                    

- مو الك .. الها هي تحب هالاكلات ومتعرف تطبخهن 

اخذهن وشالهن .. 

طلبت من السايق يوصلنا مقبل .. اخذ تكسي ورجعنا 

دخلت المولد متصلحة .. حط الاكل بالمطبخ ودخل للغرفة : اني هنا شنو فيان ! اتطلعين بدون متسمحيلي 

- كبل لتدور احترامك لازم تحطلي حد ويا امك للصبر حدود واني ما اعتقد اصبر عليها اكثر 

- ليش ما حاجيتيني الخدامة تجي اليوم 

- وليش اكوووووول جاية تنظف وتروح ليش كله استأذان 

- كتلج امي متتقبل 

- على روحها اني مالي علاقة ما اكعد ادور امك شتحب وشتكره هذا مو شغلي 

- كتلج احجي ويااااااه انت ليش ما تفهميييييييين 

- طيب اوكي بدون صياح تفضل احجي وياها 

- مو كبل ما اعرف ليش تاركة البيت وطالعة 

- حارة وردت اروح انام .. حراااام بدل متكعد تحاسبني حطلك مولدة خاصة بالبيت افضل مما تكعد تنتظر مولد خارجي .. 

- المولد التحجين عليها وتريدين مثل مولدة بيتج سعرها ب١٨ مليون .. واني تجة فلوسهن ما عندي تفتهمين لو لا ما كتلج راح اعيشج بجنة هذا العندي وجاي اشتغل ومن الفجر طلعت اشتغل عمالة .. حتى اجيب مسواك تروحين تكولين لامج جوعانة تحطلج اكل انت جاي تقللين مني وشحطلج ما جااااااي يعجبج 

            

              

                    

- اني مطلبت من ماما شي ..

كام يستغفر ويروح منا ويجي منا ويكول : شلون تخلص ربييييييي واحد يجي من ضيم الدنيا تعبان يرتاااااح لو يكعد يتعاااارك

- لتفر المشكلة عليه برفع الصوت اكدر ارفع صوتي اذا تحب اني ما عندي مشكلة بشي امك اساس المشكلة روح حل الموضوع وياها افضل مما اني اضطر احلها 

- كاعد تهددين انت لو شنو .. كاعد تهددييييين 

دفع كتفي 

- لتلمسني ما اسمحلك 

مدا اهددك اني دا احذر من مشكلة ربما تكبر 

اسلوبي تعرفه ما اعرف اتفاهم مع احد بكلمتين ممكن احجي ربما تتاذى وتروح تتمرض وتصير المشكلة مشكلتين فحلا افضل مما اضطر للكلام بنفسي . 

راح للصالة وكعد ويا امه وصاحني 

وكعد يحجي يكللها هي متعودة وهذا نظام حياتها ما تعرف تشتغل شغل بيت يمه الموضوع مو يمج شي يخصها .. ترجع تكوله وشبيها ما عدها ايد تشتغل كام يصيح .. يمه ياهو ماتج انت فكيني رحمة الوالديج ترا طكت روحي لو هنا اتحلينها لو تضطريني اخذها واهج والله 

كامت تصيح شلون يهددها 

يريد يحاجيها كامت تغلط .. يريد يعديها حتى تحجي كامت تلوص بالحجي .. تركتهم ودخلت هو خابر محمد اخوه .. اجا يحجون وياها ويكلولها يمه شنو الحل انضل يومية صايحنا واحنا .. ما صايرة 

            

              

                    

وهي تكلهم : ما اريدها تريدون تريحوني اتطلعونها مني ما اريد اشوفنها 

عباس كاللها : معناها كليلي اخذ مرتك واطلع 

-اغضب عليك والله الى يوم الدين يعبيس ولا محالل ولا ماهوب لو عفتني لخاطر مرة 

كام يصيح : جا الحل يمه شنو 

-الحل طلكها ما اريدها 

كام يتصايح وياها وطلع منها محترم طالعة روح روحه 

اني مشغلة الماك بوك كبالي ودا اشتغل على ملف واستمع لمشكلتهم .. فات يصيح

شسويلها .. 

راح اطك راح اموت 

طلعت روحي .. 

كمت من مكاني طلعت للثلاجة جبت مي بارد واجيت للغرفة وهو يصيح .. باوعلي : شنو الحل فهميني راح اتخبل 

دنكت وبسته بخده : اهدأ ويصير حل . 

اخذ نفس وتنهد وشرب مي .. شكت ورجع باوعلي : مو بس انت تعبتي من اني اني جاي اعجز ويا تصرفاتها وعلي وهاي مو بس وياج ويا غيد جان الموضوع نفسه بس اتعودت اني افضلها على نفسي وعلى المرة تريد ينعاد نفس الشي اطلكج حتى ارضيها وهاي اني تعبت منها غيد ما جنت متوالم وياها ومترد مني وطلكتها بس اني مو بكيف امي شلون افهمهااااا احجي وياها اكثر اخاف تتمرض وتوكع شلون كليلي 

            

              

                    

- مراح تكدر تلكى حل وانت بهالعصبية اهدا حبيبي وكلشي ينحل 

حجيتها وتركته يهدأ وطلعت دا اشوف الاكل 

جان اكو جدر بيه تشريب لحم وقطع لحم كبار .. حطيته ع النار وحميته بس تمن ما وياه .. دورت على كاسة كبيرة شلت بيه بس اللحم وشوية من السوب واخذت خبز .. وصفنت ... هالزفر حناكله بالغرفة ! 

هي بقت على زفرة اللحم بهالعشية الزفرة 

اني هم مدري شلوني .. اخذت الصينية ورحت للغرفة 

هو كاعد يعدل بالمبردة ويفتح بيها . شغلها واني حطيت الاكل 

كعد كبالي ومقبل ياكل 

اتسمت واني امد ايدي .. حجه : وشنو اليضحك بعد 

- شكلك يصير اجمل من انت عاقد حاجبيك .. مثير 

صفن بوجهي : بالعباس ما شفت فطير بكدج مدري انت الامراد هيج الفطرة عدكم .. صدك تحجين 

- اقلها نحجي البكلبنا 

وضحكت .. ابتسم .. همست : بس هيج تصير احلى 

ضحك وهو يمد ايده لخدي يكرصني بخفة ويبوس ايده : اكل بداعتي 

- ما مشتهي والله امي زقبنتني 

- جاملني حتى اشتهي لان جوعانة 

- اي جان ثاردة مو هيج بكاسة 

- اشون !؟ 

- تثردين الخبز بالكاسة وتصبية 

            

              

                    

- اروح اجيب كاسة ثانية 

- لا اكعدي بابا .. 

كام يسويلي لقمات ويناولني وياكل ويايا 

منحس الا امه فاتت بدون متدك الباب .. اسمع ولك اعبيس يالعايف امك محتركة وكاعد تتزقنب كون سم انت وياها .. هسه تاخذها لاهلها وترد وما تخليها كبالي من اتخليها معناها تكلي يمه طكي ومووووتي امووووت انا امووووت .. اخذها منا يلا 

تحجي وتلهث ومحمد يجر بيها 

وعباس سحب ايده من الاكل وتجى ظهره للجرباية 

جرها محمد وعلياء وهي تصيح وتدعي وتغلط .. ابتسمت باوعلي : فطاريتج مو وكتها 

- يعني شسوي والله موقف يضحك ياخي بعدنا مبالعيها للكمة هنوب دا اريد ابلع .. متنبلع ويايا وكفت هناية 

دنحجي رجع محمد دك الباب بقوة 

صاح عباس : ادخل 

وكام من مكانه 

دخل : عباس هاي مفرزة مال شرطة بالباب رايدين مرتك !

- مرتي شنو .. ليش 

كمت بسرعة لزمته : عباس لحظة 

خزرني : ابقي هنا لتطلعين ابد 

- بس 

خزرني : خل اشوف شكو .. وارجعلج قفلي الباب .. 

اهله ميدرون عن القضية ابد .. 

طلع عباس ومحمد واني بالغرفة .. قفلت الباب 

وهو طلع : تفضل اخي 

- فيان دلشاد موجودة هنا ؟ 

- لا .. مموجودة بس ليش ؟ 

- عليها امر استقدام .. بقضية قتل المغدور سيروان 

- موجودة ابيت امها 

محمد كام يباوع على عباس وامهم ورا الباب تتسمع عبالها القضية على ولدها .. حجه الشرطي : متأكد مموجودة ؟ .... يتبع 

___________