رواية علي حافة الثأر الفصل الثاني والعشرون بقلم زينب نور
- شني المتأكد بعد اخوك جاي اكلك ما موجودة !
- لا تصيح اني جاي بواجب .. انت زوجها
- اي نعم زوجها
- تكدر تنطيني عنوان بيت الوالدة !؟
- بحي الجامعة ..
محمد يباوعله .. والشرطي يسأله : موجودة حاليا هي ابيت امها
- ما اعرف بعد اخوك اني وياها تعاركنا ووديتها لبيت امها هناك تلكاها ما تلكاها .. ما ادري بعد تلكاها لا .
سلم عليه وراح ..
ومحمد يگله : شصاير عباس شني استقدام شنو مراكز وشرطة تريدها احجي
امه : جذبت ع الشرطي تكله ما موجودة ولك شمصخمة ومبتلي بصخاااامها يمدهوووور
- مشاكل وخلافات عائلية مالنا علاقة
محمد : يا مشاكل يا خلافات .. جاي يكلك الها ايد بقضية المغدور سوان شمدري شسمه
- اي اقاربهم هناك باربيل انكتل وابوها وعائلته داخلين بالقضية بس اني ما ارضى مرتي تطب محاكم لو تروح ويا شرطي لهذا كتله ما موجودة
محمد : ولو راقبوا المكان واكتشفوا هي هنا شراح تسوي ؟
- راح تنحل انتم ليضل بالكم ..
حجاها واجا للغرفة .. سد الباب : جاي بيج امر استقدام
- وشكتله ؟
- شكله كتله ما موجودة يم امها ..
- جيد
- صدك تحجين بهالبرود الشرطة دكوا باب البيت عليج
- شتريد اسوي
-ممهتمة
-ما اعرف بس ينحل
-فيان انت ليش مستسهلة الموضوع وكأنما متعاركة فد عركة بسيطة ويا واحد يا بشرررر انت كاتلة بشرررررر
-وشسوي قابل اكعد ابجي علييييه
-تبجين شنو تأنيب ضمير انت ما عندج لج كتلتي بشر بدم بارد ما شفت ولا حتى اهتميتي
-يانبني ضميري على سيروان وان كل عمري انتظر اللحظة اللي اخلص بيها منه اساسا فرحت لان حققت الشي اللي اريده
-انت مو صاحية والله انت مريضة مريضة
-من الاول انت عرفتني اني مريضة ليش دا تعيرني ؟
- لا اتلوفينها مو قصدي اعيرج بمرض بس تفكيرج كلش مو اوادم .
- ليش دا تتجاوز شنو يعني مو مال اوادم .. كدامك حمير قابل ؟
- تريدين الصراحة لو اجاملج ؟
-لتتواقح بأسم الصراحة .. ولتتكلم من منطق البطران .. لو كان شخص قاتل اخوك ابن امك وابوك راح تتركه لو تتعاطف مع مقتله ؟
-اختج هي... قاطعته
-احذررررررررك تنطقها ولتجيب اختي على السانك احذررررر .. الله وحده اليحقله يحاسب البشر لا انت ولا غيرك ... افتهمتتتتت
حجيتها وكمت من مكاني .. توجهت للباب دا اريد اطلع
صاح : الصينية وياج .. شيليها
- عندك ادين تشيلها .
طلعت الغرفة وضربت الباب ورايا .. صارت علياء مقابيلي سوت نفسها دا تشيل السلة من جوا الدرج .. تركتها ورحت للحمام غسلت وجهي ولميت شعري .. وطلعت ادور على كلينكس حتى انشف وجهي ..
سمعت علياء وهي تكول لامها : اكلها والله العظيم سمعته يكلها كاتلة بشر ..
فتت الغرفة : بلي صدكي كاتلة بشر .. وتعرفين لييييش
تقربت منهن واني احجي بصيغة تحذير : لانو زعجني ووكف حياتي حطيت طلقة بكلبه بدون ميرفلي جفن وكعدت كباله اباوع شلون تطلع روووووحه وما راح اتردد اكتل اي بشر يزعجني ..
وما اخاف لان ماكو قوة تكدر تسجني ..
خليها ترجية بأذنچ .. لإن للصبر حدود
افتهمتييي .
بقن شاهقات نظراتهم عليه بدون مينطقن اي كلمة
تركتهن وطلعت افتريت بالحوش ما اعرف ليش بس متضايقة .. دخلت للمطبخ فتحت الثلاجة طلعت مي شربت رجعته ..
سمعت علياء تصيح على عباس تكله : كوم امي تريدك
مشيت للغرفة .. باوعتلي ومشت وهو كام طلع حتى يشوف امه .. دخلت الغرفة .. شغلت المبردة وعفت شوية من الباب مفتوح .. وكفت كدام المرايا افتح شعري وارجع الف بيه
سمعت امه تتصايح وياه
حطيت اذني بس مدا اسمع شي من صوت المبردة
رحت طفيتها .. وبقيت مشكلة اذني دا اسمع ع شنو ديتعاركون
تكوله
ما ابقى هنا يمه شني جايزة من روحي
نعلت ابيك اعلى هالتربية الخايسة ولك هاي تاليتها وياك اعبيس اتفضل وحدة زايعتها الكاع علي .. انا وياها ما نضل ابيت واحد والله .. ما اظلن
- يمه مو هيج هذا كاتلته لان كاتل اختها ..
- لا تضل اتركعلها يالنكسسسس ولك ماخذلك بت تكتل بشر ولك شنهو من ملة انتتتتتت
- وين رايحة هسه غير افتهم
- وعلي ما اطلن هنا وهي موجودة ابدددددد
- يمه المرة حامل وين اوديها
- يا اني يا هي .. ما نظل بفرد بيت .... انشي ولج انشي جيب الجنطة جدة يلااااا .
لمن ملابسهن وطلعن من البيت اجا للغرفة متخبل
فتح الباب : انت من صدك مهددة امي واختي
- مهددت احد .. بس كلتلهم اني فعلا قتلت ليش دا اكذب
- مو كايلتلهن ما راح اتردد اكتل شكو واخد يضوجني ..
- بلي كلت
- وهذا مو تهدييييد
- تهديد للي يضايقني يكف عن المضايقة ويحترم نفسه بدل متطلب منهم يحترموني ويبطلون تعاملهم المجحف بحقي .. تجي تحاسبنييييي
- لا ترفعييييين صوتج
- ولا تحاسبني
- اني ما محاسبج بس ما اسمحلج تهددين امي ولا اسمحلها تضايقج واحجي ويتكم اثنينكم ما جاي يفيد الحجي وياكم .. ترا طكت رووووووحي
- واني شنو متونسة .. اني المتحملة امك مو انت ..
- شمتحملتها منظفة ملابسها شايلتها مساعدتها خادمتها شتحملتي منها مصارلج يومين من كابلتيها تضيحين متحملة شتحملتيييييي
- هذا كله وتكووووول ما متحملة شتريد تضربني واكعد امسحلها واكولها ايدج ابوسها حتى ترضين عليه وترضى انت
- ما كايلج بوشي ايدها امي مررررررريضة كلامج هذا يأيذيهااااااا
- ومياذيني كلامها من تغلط وتتعامل ويايا بهالاسلوب .
- انت الكلام وياج ضايع .. اكوم اطلع منج اشرفلي
توجه للكنتور يطلع ملابس واني اكوله :- لان ما عندك كلام تكوله تتهرب تعرف امك غلط
اندار عليه:- اني كايلج امي صح .. يا بشرررررر اكلج اني مرييييضة مريييييضة شسوي
- ومريضة تمرضنا وياها اني شلي علاقة
- هاي خوش عاشت ايدج .. هاذهو
كام يلبس ملابسه .. والصوت برا هدا الظاهر طلعوا .. وهو دنك فتح الخزانة طلع حذاء .. حجيت : وين حتروح ؟
- لاي مكان اريح راسي من هالهوسة
- وتتركني بالبيت وحدي !
- راجعي نفسج
- ما مسموحلك تعاملني بهشكل
- اني مو موظف عندج تسمحيلي لو ما تسمحيلي .. راجعييييي نفسج .
طلع غسل وجهه وراسه ووكف يرتب شعره .. ويلبس حذائه وسحب العطر يريد يرش
حجيت : عمرت نفسك ورشرشتها حتى تعجب النسوان وتعوفني وحدييي بالبيت اني ما اقبل
- مو انت ما تريدين اليزعجج .. مو تريدين ترتاحين .. هاي امي واختي راحن واني اروح وانت ارتاحي
- تعرفني علمود امك
- امي هاااااي اتأدبي من تحجيييين بيها
- واني سبيتها دا اكولك تعوفني على مودهاااا ؟
طلع ومجاوبني
تبعته .. حجه وهو بالكراج : طلعة من باب البيت ممنوع ..
- وتتأمر !؟
طلع وسد الباب وراه ..
اتضايقت منه كلش شلون يعاملني هشكل .. اني مسويت لامه شي بكد ما هي سوت معايفتني بحالي ليلها ونهارها تغلط وتتعارك ومرايدتني العبالك متزوجتها مو متزوجة ابنها .. شنو هالمجتمع الضحل وشنو هالبيئة الحقيرة اللي حطيت نفسي بوسطها .
ضليت افتر بالبيت
اتضايقت كلش صرت ابجي ..
رحت خابرت ماما حجيتلها الصار .. الشرطة هماتين جايين لبيت ماما كايلتلهم : ابيت ابوها .. اجوي الحماية مال ابوها اخذوها من بيتي .. حتى يتواصلون ويا ابويه ويصير عنده علم بامر الاستقدام ويتصرف .
بقت ماما تحجيلي
لا تسمحيلا يتمادى وياج .. وعفية عليج رديتي امه وهججتيها وختولي وبقت تشجعني .. بس من داخلي ممرتاحة بالكلام .. احس هالافعال ترجعني وحدي
وما اعرف شأسوي .. احاول اتحمل .. انفر واشوف اني مو طاقة تحمل .. وبنفس الوقت اكره ابقى لوحدي .
مرت ساعات ومحد اجا ولا انفتح الباب
لحد ما صارت الـ ١١ بالليل سمعت الباب انطبكت .. عدلت الماك بوك كدامي .. وسويت نفسي اشتغل ع الماك
دخل للغرفة بدون سلام .. تقرب من السرير حط اكياس ع الميز الجانبي .. ومشى ينزع بقميصه .. روائح اكل صارت تجي لانفي .. ما بادر ولا نطق ويايا اي كلمه .. بدل وطلع للصالة اختنكت كلش ..طبكت الماك بوك ودرت وجهي .. عيوني دمعت .
كمت من مكاني امسح عيوني
مشيت للصالة هو كاعد على سرير امه ومثبت اديه على اطراف السرير ومدنك يفكر بدون ما يشغل تلفزيون او تليفون
حس شال راسه باوعلي ..
حجيت : اسلوبك وتصرفاتك ممقبولة .. اني مدا اضايقك بس انت دا تضايقني .
- بشنو ضايقتج ؟
- اني تركت ابويه يزعل حتى اجي وياك وارضيك وانت تفضل امك عليه ! اني تركت كل شي حتى احظى بيك بس بالمقابل اني مدا اشوف منك اي تضحية !
- شنو نوع التضحية عندج كليلي ؟ اعوف امي حتى ارضيج هاااااي امي .. افتهمي انت عادي عندج تتركين امج ابوج وتزعلين وتمشين وتنطكرين اني ما اكدر وامي زعلانة مني ويا انت يا هي .. فتشوفيني وين حتى تكليلي انت ما جاي تضحي !
اتركي عنج دور الضحية
حسي بالناس المقابيلج .. حسي اكو بشر جاي تتأذى
- بس اني ما اذيت احد
- وتهديدج ما اسمينه اذييييية
- بس رد فعل على اذيتها
- وراح نبقى بهالدوامة ما تفض ..
- انت تشوفني متشوفها
- لا ما اشوفها اشوف روووووحي امي عافتني وغضبت علي وادعي .. عمي زعلان مني وخالي زعل واخوي متضايق واختي زعلت واخذت جهالها ومشت .. كل هاي عدج مو اذية .. اني من الاول كتلج عدي بس امي اتحمليها لا تتحملييني عمي اذيني احجي صيحي تعاركي راضي .. بس امي مرييييضة اتحمليها وياي مو تهججينها .
- يعني هسه الصوج بيا !
تنهد : فيان جبتلج عشا روحي اتعشي .. وعوفيني ارتاح
- ما اريد
تركته ومشي برا بالكراج .. كعدت على الحافة
ومتضايقة ودموعي دا تنزل .. من كلمة حسبها عليه ميحسب كل الكلام الامة تسممني بيه !
شوية وصاح : شعندج كاعدة هنا .. احاجيج
انداريتله باوعتله .. واتجاهلته وبقيت على كعدتي صاح : كومي جوا
مجاوبت
اجا : مو احاجيج
-معاجبني
-ليش
-بكيفي
-كومي بابا .. كومي اكلي بطلي هالتصرفات .. يلا
-معليك
حجيتها وبجيت واني اضغط على عيوني وامسح الدموع منهم .. تقرب مني وباس راسي : ليش تبجين .. فيان .. شو حاجيني شبيج ليش تبجين
- ما بيه شي عوفني
سحب ايدي وكعد يمي وسحبني لحضنه : طفلة يربي ولا عبالك مرة شكبرها .. هذا فكره الياخذ مدللة .. شيخلصهااااااا ههههه
باسني بكصتي : كلبي شو باوعيلي
-وخر ما اريد
-بس كليلي شتردين
-اني اتروجتك حتى ما ابقى وحدي بس انت دا تعوفني وحدي ودا تأذيني مدا تفهمني .
-شعايفج وحدج ولج طلعتلي كم ساعة ورجعت شلون بالله نبطل نكابلج ونكعد ؟
مجاوبت وامسح بوجهي : شوفي فيون .. يمكن حياتنا شوية تختلف عن حياتكم .. اول متعرفت عليج كتيلي حياتكم حلوة .. لان شفتينا مجتمعين وواحد يحب الثاني .. هذه الحياة اللي انبهرتي بيها ومعجبتج من عشتيها عايشينها على تحمل بعض اني اتحمل امي وامي تتحمل تصرفاتي وويا اختي واخوي نفس الشي واحد يتحمل الثاني الكلمة والعركة والهوسة .. مجبرين ببعضنا ما عدنا منطق مالي علاقة باخوي ومالي علاقة باختي .. احنا هيج انخلقنا واتربينا ..
اني احبج بس هم احب امي وهواي مو شوية يعز عليه اني واختي طالعات من البيت زعلانات لان مرتي مهددتهن بالقتل ادري وين كاعدين بفلم الرسالة رحمة لاهلج .. ماكو منطق اهدد انسان بالقتل لمحرد ضوجني .. ضوجتج اكعدي بغرفتج واتجاهلي ومن اجي عمي موعي اذاني بالحجي راضي واحاجيها واحاول اخل موضوع بس ما مسموحلج تتجاوزين عليها ابد هي مرة چبيرة !
- اني دا اتحملها بس هي مرايدتني مو متحبني .. هي تريد نتطلق
- مو بكيفها نسايرها اي نتحملها اي بس نمشي بكيفها لا بس مو معنى هالحجي ما نحترم .. هذه ام واني تعتبرني الكعدة مالتها هسه غير هي يم اخوي وعلي كلبها نار علي وتريد بس تشوفني رغم رحتلها وما طلعتلي .. بس اعرفها هي امي هيج اني عدها غير اخوتي .. ما اكدر اخذلها وهي متعلقة بيه هيج
كومي اكلي وارتاحي
بس اوعديني ..
باوعتله !
: نروحلها باجر تعتذرين منها ونرجعها للبيت ما اتحمل تنام زعلانة والعباس
- اي بس... قاطعني
- ادري والحسين ادري هي ماذيتج بس هي جبيرة اخذيها على كد عقلها وهالشي يكبرج ما يقلل منچ .
هزيت راسي
: حبيبتي رحم الله والديج
باس راسي : يلا كومي كومي خل نتعشى حتى ننظف البيت صاير مزابل
- بس اني مموصخة
- كتلج انت موصخة اني الوصخته دكومي
كمنا اتعشينا ورحنا نلملم البيت ونغسله سويا
تونست ويا وضحكنا هواية لحد ما تعبنا ونمنا
رغم امه زعلانة بس هذه اول مرة نتونس ونفرح وناخذ راحتنا من صدك .. وانام مرتاحين .
ثاني يوم هو طلع للشغل من الصبح واني بقيت نايمة
لحد الساعة ١ الظهر كعدت لعبانة نفسي لحد ما استقريت .. لكيت عباس جايب ع الكاونتر الصبح بيض و اجبان وصمون
سويت بيض عيون اثنين وجاي بس طلع كلش اسود .. كعدت البيت هدووووووء ولا صوت رغم البيت متواضع عادي بس احسه اجمل من بيتي هناك مرتاحة لو ما امه ومضايقاتها .. لو نبقى لوحدنا بدون طرف ثالث جان عشنا احلى اثنين
دا اريد اصب شكر .. حسيت الباب انفتحت
باوعت صار عباس كبالي وهو ينزع حذائه .. فزيت من مكاني واني اكومله افتح اديه ابتسم وهو يكلي : عركان عركان لا تشبكيني
- عادي
حضنته باسني : شلونج حبيبتي
هاي شنو مسوية اكل مطورين مطورين طاكتلج بيضتيييين يوم للبرياني
ضحكت : تاكل
- بس خلي اسبح
- اكل وبعدين اسبح هو ابيض زفر
- جا فتحي المبردة كلش محتر
- من دا افتحها شو تطفى الكهرباء لويش
- يعني حمل زايد مطفية المبردة جوا
- لا بس الجوه حارة
- ما ترستيها ؟
- عباس هوايه هواية اشياء لازم اتعلمها !
- متعرفين تترسين مبردة !؟
- ما اعرف يعني هالامور دا تصير خبصة عليه صعبة
- ترستها الصبح حطيت الصونده بيها ورحت جبت ريوك .. لازم اترسينها لحد ما تصب
- زين المكيف ليش ما يشتغل ؟
- بس ع الوطنية غير
- وليش بس ع الوطنية !؟
- جا غير ما تتحمل السحب
- ليش متتحمل ؟
- ساحبين ٥ امبيرات
- مو قليل ؟
- دخل الزملي شغلة زينة وارفع امبيرية
رحت طفيت الجوا وشغلت الكدامنا
حجيت : اشتري مثل المولدة اللي اباب بيتنا وتنتهي الازمة منحس بعد بهيج امور
- لا بابا غالية
-مو
ب١٨ مليون دا تكول
-ابوي كحف عمره كله وما جاب ال١٨ مات وعافنا بالاجار وهاي تكلي ١٨ عبالك ١٨ الف ..
- اني اشتريها
- اوووو رجعتا لهالسالفة اتحملي المبردة لحد ما تجي الوطنية وتبردي .. ما دام عرفتي تكلين بيض كومي طكيلي اكثر من ذن
كمت للمطبخ سويتله الباقي من البيض وجبته اله كام ياكل بيض وجاي حجيت : حتنام
- لا اريد اروح لامي
- بهالظهر! ارتاح وروح
- لا ما اكدر ارتاح .. روحي وياي
- اليوم
- جا باجر
- بس اذا مقبلت
- سويتي اللي عليج اقلها يصيرلي حجي ويا عمي خالي اخوي اكلهم الصوج امي مرتي احتي اعتذرت وامي نا جاي ترضى .. صدك ما سالتي امج شصار على قضيتج
- ناطيتهم عنوان بيت بابا
- ويا مفرزة تروح لبيت ابوج !؟
- تبليغ ممكن يبعثوه دا افكر اروح لمركز الشرطة واحل الموضوع بدون ما ادخل بابا باموري
باوعلي باستغراب : شتكليلهم اني كتلته سوري منكم !؟
- لا .. اخابر المحامي واروح اشوف شنو عدهم ..
-لا تركيها ابوج يتصرف
-ما اريد يشيل الموضوع اني اكدر اتصرف
-شتتصرفين الموضوع ما بيه محامي وجيب وودي لو طلبوا كاميرات البيت بذاك اليوم شتكولين
-عطلانة
-حتى تتورطين اكثر وتجيبين الشك اكثر عوفيها لابوج مستحيل يقبل تنسجنين وانت بته
-اني اعرف شي وانت تعرف شي محابه بابا يدخل
-ولا انت تدخلين ..
-اكو بحقي استقدام ليش دا اتهرب !
-انتظري ابوج شوفي شيتصرف هي مال مراكز وتكعدين يحققون وياج ترا واكفة
-شلون واكفة ؟
-شني شلون شايفة معشر الضباط لو لا ؟
شايفتهم شلون يحققون ويا الواحد حتى البريء يكلك اني مجرم بس خلصني .. وانت مرة تصيرين بنصهم حجي هذا .. دكومي كومي خل نروح ..
ضليت اباوع عليه ..
كام وهو يكلي : يلااا
-بس قبل لنروح اني حتعذر ماكو مشكلة بس بالمقابل لازم تتفق وياها على احترام ومتتصرف بهشكل تكعد تمنع اجيب مساعدة للبيت ويستنكفون يغسلون ورايا ماعون مو هيج ..
-راح نحجي بس كومي
كمت للغرفة وهو شال المواعين وداها للمطبخ واسمع يرتبهم مدري يغسلهم .. بدلت صار يباوع على ملابسي : القميص مو كصير !
- شلون يعني قصير ؟
- لو ينزل شوية البنطرون كله مبين من ورا
- وشبي
- يعني هناك يحجون ها شوف شماخذله ملبسها هيج محد يكول هذا لبسها .. يعيبوني اني
- قصدك البس اطول !؟
- اذا عندج يا ريت
كمت ادور قمصاني كلها قصيرة
رحت طلعت فستان عريض البسه بالمصايف والتسوق لما اروح شقلاوة لو بيخال .. من شافه كالي : اي هذا يخبل عاشت ايدج يموت عليج
ابتسمت من كلي هشكل
رحت حضنته وطلعنا من البيت .. مشينا الشارع كله دا احس افحط من امشي رغم الحمل بعده تقريبا نهاية الصالث بداية الرابع هيج بس بلشت افحط من امشي .
اخذنا تكسي وصلنا لبيت اخوه
مرت اخوه فتحت النا الباب سلمت بس على عباس وكالت: طبوا طبوا .. عمتي جوا
مسلمت عليه !
مع هذا مهتميت دخلت
هول صغير بيت تعبان بس مرتب .. امه نايمة
وعلياء متمددة من شافتنا كامت فاتت جوا .. اجا محمد ضرب ايد بايد ويا عباس وكاللها : حسناء .. جاي جاي بسرعة
كعدت امه وعباس كام يمها يفرك بظهرها : ها ام احميد شني شو شو طولتي بزعلتج ترا هاي جيتي من الشغل بالعباس ما ارتاحيت اجيتج
- الله يطيك العافية يمه .. عليمن تعبت روحك
- اذا عليج ما اتعب جا عليمن اتعب
- اعلى العكبت من تالي
- يمه عكبت شني جا شلون بالله ما انزوج ما استقر هم حالي حال الماس رايد استقر وتصير عدي عائلة
- اي بالعافية .. خلني اكومن مالي خلك تعبانة
- يمه اجتي تعتذر منج وهي تعرف غلطها وياج
- لا تعتذر ولا اريدها اخذها وامش .
- يمه ما يصير .. هيج
- ابد
كامت من مكانها ومشت طبت جوا
ومحمد يكله : اتركها هي شوية شوية تتقبل الموضوع
- وتضل زعلانة
- جا شتسوي العليك سويته ضل مرلها يومية .. والله كريم ..
- كاعد يسعهم المكان
- خير وبركة
طبت مرته وهي شايلة جاي وتكله : ما عدنا شي بس الجهال خوية سبونا سباية والعباس الواحد ما يكدر يحط راسه ع المخدة لا ما تكب وتعال فاكك هاذ وذاك .
حطت جاي كبالي ومحمد يكوللها : جهال تصير
- اي جهال بس
خزرها .. غيرت وكالت .. بعد يم الله
- محمد ما يطيني كلبي امي تضل هنا شلون كلي
- والله حجيت وياها ما جاي ترضى تكلي ها جاي تطردني
حجت مرته : طبيلها كومي تلحلي بوسي راها بلكت ترضى تتصالح وترجع وياكم كومي جا كاعدة متبسرة شلون ترضى .
عقدت حاجبي .. : العفو ! ويايا !!؟
- يا شوف الحظ والوعد
عباس : تكدرين تطبيلها
- ليش دا ادخل خلي تتفضل نتكلم ونتفاهم واذا غلطانة بحقها اعتذر ليش دا تتهرب واني ابقى اتبعها يعني ما اعرف اشون يكون الكلام هشكل !
محمد : اي مو هي زعلانة منج طبيلها بوسي راسها واعتذريلها وراضيها كومي
ضل يباوعلي عباس عرفني مدا اتقبل هيج وضع كاله : غير تجي امي حتى نحجي .. كاملها وهو يصيح : يمممه .. يمممه
دك تليفوني ..
وهو ديكوم باوعته .. بابا
كلت : اعتذر لحظات
كمت من مكاني طلعت برا دست رد : الو
حجه : مو تكدرين تتدبرين مشاكلج مو قادرة على حلها .. تبعثيهم الي ع البيت ليش حتى اسدلج الموضوع
- مدازتهم الك ع البيت ماما دزتهم .. واني عزمت على ان اروح لمركز الشرطة واشوف شنو يردون واحجي اللي عندي ..
- حتى سيرتي تصير على كل السان من باجر .. بنت كاكا دلشاد بالسجن بقضية قتل هذا اللي اجني منج انييييي زوجج وين مو يتحمل مسؤليتج .. وينه عن الموضوع تنصل من وصلت للصدك
- وزوجي شنو اله خص .. هو مو طرف بالموضوع
- اذا يقبل مرته تدخل مراكز وميهتم لسمعته .. اني ما اقبل تنحسبين علييييه افتهمتيييي ولو ما حليتي الموضوع هذا راح اضطر اورطه بالقضيييية كلها وعندي كامل الادلة اللي ادينه
- لحظة لحظة انت شنو دا تهددني بيه !؟
- وصليله الكلام واحذري ... مع السلامة .
قفل الخط باوعت التليفون تنهدت
صرت ابحث رقم المحامي بين الارقام صاح عباس : فيان تعاي وكت تليفون هسه ..
تركت التليفون ودخلت جوا ..
حجه وهو يغمزلي وينصي صوته : صدك تحجين طالعة تخابرين
- اسفة ، شنو صار
- ادخلين تحجين وياها
- لا
اخذ نفس : هاهية لعد خل نمشي ما دام هيج
- لتزعل اجيت حتى نحجي واعتذر منها مو الحكها من مكان لمكان حتى ترضى عني ..
- هاذهو .. خل نروح
محمد : شني هسه
- خل امشي تعبان
- ها .. بعد بكيفك
- محتاج شي
- لا .. بس
سحبه على صفحة : امي ما عدي اشكال بيها بس اذا تكدر تقنع علياء تروح وياك الجهال صايرين ثريد والمرة زرفت راسي ما يتوالمن وهالتشوف البكان ضيك ما يسع الهوسة والجوكة
- عليااااء .. يلا
كوموا خالوا
اجتي علياء : ابقى يم امي
- لا خوية كومي .. خلي امي ترتاحلها كم يوم هنا .. امشي
- لا ما اكدر اعوف امي مريضة لو عفتها ياكلها التفكير وتموت والله
حجه محمد : اني وحسناء يمها لا تخافين .. خليها هنا ترتاح هي تعبت هاليومين
حست بمحمد ما رايدها
هزت راسها ومشت .. دخلت جوا وهي تصيح على ولدها يبدلون صاح عباس بدون تبديل بس خل يلبسون احذيتهم راح اجيب تكسي للباب
طلع واني كعدت
حجه محمد ويايا : انت مو عندج بيت بالمنصور .. بيتج لو لا
- بلي بيتي ليش ؟
- لو تنتقلون بيه مو احسنلكم من الايجار !؟
- بيت بابا وعباس ميقبل
- هو بيتج لو بيت ابوج ما فهمنا
- بيتي بس بابا اشتراه وحاليا مختلفين ..
- ترا عباس ما يكول امس مداين من واحد صاحبنا ٥٠٠ الف وهو جاي يشتغل عماله شيسد انت هم مرته ساعدي .
- هو اتصال مديقبل اخابر على شغل شلون اساعده !؟
- عدج احد عده شغل ياريت اني اريد .. شنو الشغل .
- ما اعرف اشوف معارفي
- اذا هو ما يشتغل اني اشتغل بس خابريلي خوش .
دخل عباس : يلا .. وين علياء .. علياااااااء يلا
طلعت وهو يصيح ومحمد يكولي : مثل ما وصيتج لا تنسين .
طلعت ركبت التكسي ..
طلعت علياء عيونها مدمعة مبينة باچية
صعدت هي واطفالها يمي ورا بس حصروني ويا الجامة كتله لعباس : اخذ تكسي لاخ مدا يكفي
- رهموها شلون ما جان مو بعيد شمرة عصا .
كل واحد بيهم شايل علاكة وخلوها يم رجلية والثاني اندحس ويايا .. ضايقني كتله : حبيبي بس ادنى شوية بطني .
حجت : شسوالج داس بيها شبيج انت الثانية
- عكس ايده ديصير على بطني اتأذى
عباس : اششش يمعودين
اندار يخزر السايق كاعد .. وصلنا البيت فاتت كامت تحجي وتندب حظها واني وين ما احطها سودة مصخمة الله ذابني ع الجناين وحدة انذبني للثانية .. وكامت تصيح بنص البيت وهو يحاجيها ويكوللها : شني السالفة خوية البيت بيتج .. ياهو الطاردج
كامت تحجي وتبجي
تركتهم ودخلت لغرفتي .. بدلت شي خفيف وفتحت الماك بوك وصياحها بعده مستمر دخل : فيان كومي خطية طيبي خاطرها بكلمتين
- ليش
- متحسسها عبالها ما تريدينها بالبيت
- هو مو بيتي حتى اريدها لو ما اريدها .
- ميخالف كومي
- اكوم ليش اني مكلتلها شي
- انت كلمة طيبة متعرفين تكوليها لانسان
- ليش اكولها !؟
- اووووووو شني انت سالفتج انتتتتت
ضرب الباب وراه
مفتهمت شبي يعني ليش دا اكوملها
عجيبين امه زعلانه لوحدها تريد احد يلحكها يبوس راسها .. اخته لوحدها زعلت وتعالوا صالحوني .. بينما هم يتجاوزون ويصيحون وعادي لازم اني ما عندي شعور ما اتضايق منهم !
بقيت اشتغل ع الملف الخاص بالعقد
حتى احاول ابذل كل العندي واكسب الوكالة الالمانية بالعراق ..
تواصلت وياهم .. وصار بينا اتصال ونظمت وياهم موعد فدزولي دعوة لالمانيا .. حتى نحجي بتفاصيل العمل .
خابرت ازاد وبلغته ان الشركة الالمانية دزولي دعوة بعد ميحتاج انت تسويلي دعوة ..
لما استلمت الدعوى
ودا اريد انظم ملف اقدم بيه فيزا لالمانيا فكلت ابلغ عباس قبل لا اقدم الملف للسفارة الالمانية بالعراق ..
عباس من عرف تخبل
شنو تسافرين وحدچ .. ممنوع
يمعود شغل شنو ممنوع هذه فرصة العمر ابواب السما كلها تتفتح بوجهنا لو كسبنا العقد ع الوكالة
يكولي عساها ما انفتحت تسافرين لاوربا وحدج وحامل مخبلة انت عاقلة ممنوع
حاولت بالغزل بالدلع بالجدال بالتقنيع
جابها من الاخير لو سافرتي والله ارمي الطلاك وتحرمين عليه حرمة اختي مو اني المرتي تفر الدول وحدها بلا رجال
حجيت ويا امي
تكولي دخل يولي هذه فرصتج عوفي وسافري عود من ترجعين صالحي .. بس اعرفه لو سويتها ينجن .. حسيت مو صحيح اسافر بدون رضاه .. ما اكدر .
حجيت ويا ازاد ..
يخابره يتعرف عليه بلكي يكدر يكوله ان اسافر على ايطاليا وبالمطار هو يستقبلني ..
ازاد مكال شي ..
كالي انطينياه .. حرجته وانطيته التليفون كتله : ازاد اخوية ديريد يحجي وياك
خزرني واخذ التليفون سلم عليه .. ورحب بيه
وكام عباس يكوله مرة وميصير واني مو ما اثق بيها بس صعبة مرة وحامل تطير وحدها هذا طريق وكلشي يصير وما امن .. وازاد يحاول يقنعه بس عباس قافل كلش .
اخر شي عباس كاله : تعال لهنا .. هم نشوفك ونتعرف عليك وهم تسافر وياها وهيج ما عندي اعتراض اذا انت تسافر وياها .
انحرج ازاد وكاله .. ان شاءالله اشوف وضعي
انطاني التليفون كتله: ها ازاد
- رجلج هذا منين جايبته متكوليلي
- ليش
- يمعودة فد واحد قديم وين بقى ميامن مرة تصعد طيارة ها خاف يصير شي شيصير هي طيارة شيصير مثلا .. يريدني اني اجي اخذج اني عندي شغلي شلون
- متكدر حتى لو بالويكند اجازة سريعة الله يخليك اذا فقدت الشغل مو بصالحي ابد وعباس مدا يعرف اهمية هالشغل ابد
- ما اعرف اشوف اموري
- مو تشوف .. رتب امورك بداعتي ازاد اول مرة اطلب منك شي مهم طلب رجائي لتردني
- لك مدا اتصورج والله فيان اللي حتى كاكا دلشاد بكبره ميكدر يملي اوامره عليج .. تاليته خلك زلمة جان يشتغل عندج حارس يامرج ويحكمج .
- زوجي غير
- يلوكلج دور الزوجة المطيعة
ضلينا نضحك ووعدني يرتب اموره ع الوكيند يجي للعراق ونسافر سوا .. عباس مجان عنده اشكال اذا ازاد هو اجا للعراق وسافرت وياه
لانو السفر لالمانيا او ايطاليا ميصير بدون فيزة والفيزة كلش صعبة لعباس اذا ما عنده حساب بالبنك وبيت وسيارة وممتلكات يكدر يدخل بيها اوربا .. وما اكدر احصله دعوة من الشركة لانه مو شريك بالعمل ..
واني رحت قدمت فيزة بالمكتب على السفارة الألمانية .. وخليت بيها الدعوى ..
خلال اسبوع تقريبا خابروني رحت استلمت الفيزة من المكتب وخابرت على ازاد كتله : استلمت الفيزة رتب وتعال على بغداد بأسرع وقت ..
اتفقنا وراح .. مرتب ايام شغله ويا ايام الويكند عدهم .. فرجع خابرني وكال : طيارتي الجمعة بعد الظهر .. لازم ارجع لايطاليا الأحد .
خابرت ماما حتى تجهزله غرفة اله
خطية كلش فرحت بجيته .. لان صار سنوات مشايفي .. من لما سافر واتزوج مجنسة ايطاليا استقر هناك وصاروا عنده اطفال ومشت حياته مرجع بعد .
ماما واكرم على خلاف كبير وواصلين للطلاق خصوصا بعد ما عباس تعرضله بالبيت .. اتفقت هي وياه ع الانفصال بس صارت سكتة السالفة .. وحسب مكالت امي اكرم ماخذ زوجته الاولى ومسافر حتى يضايق امي ويذلها قبل ليطلقها لهذا متأجل موضوع زواجهم لحد ميرجع
فجيت ازاد فرحت ماما هواية وغطت على سوالف اكرم
راحت محضرتله شكو اكلات عراقية .. دولمة كردية باللبن .. وكبب وحلوياتنا من كليجة وبيتفور وغيرها من هالاكل والحلويات .
رتبت البيت هي والمساعدة ..
وعزمت عباس حتى يجي ع العشا .. ويتعرف على ازاد بنفس الوقت .. بس ازاد اتأخر .. ترانزيت تركيا ساعتين وكان مفترض ب٨ هو بمطار بغداد
بس ماكو
اني وماما اخذنا السايق مالتها ووكفنا برا ننتظر
لحد مصارت بالتسعة وشوية لمحته من بعيد كلتلها : ذاك هو
وركضتله وهي تصيح : حامل يولي حتىكعي للطفل انتبهي
شافني هو ترك الجنطة وركضلي
كمزت عليه وحضنته كام يبوس بيه واحضنه حيل مشتاقتله .. بقينا دقايق واني حاضنته صار سنين مشايفته .. هو الوحيد الباقيلي من ذكريات الطفولة ويا اخواني ..
تقرب على امي وسلم عليها سلام بارد
ماما حضنته وبجت مشتاقتله هو باس راسها بس مبادرها اللهفة مثل مبادرني ..
ورجع فتحلي اديه وهو يكولي : شو شو .. لك لك لك شنو هذا متغيرة
- احلى لو أسوء ؟
- لا لا .. حلوة حلوة بس جنتي سمينة خديداتج مدبدبات لويش ضعفانة ؟ مباقي بيج شي يعيني
- بعد الدنيا متسبش حد في حالو
- زوجج وين اجا وياج
- لا كالي كبل لتوصلون للبيت خابرني اتوجهلكم
- وين كاعدة هسه انت
حجت ماما : بزريبة بالسيدية حشاك حتى الحيوان ميكعد بيها
- ليش
- ماما تبالغ البيت متواضع
- ولويش بيتج وين ؟
جاوبت ماما : خير دلشاد بس اله يحبيبي .. لتتصورون يورثكم وينطيكم تعبه ثقوا يورثه للكلاب والكحا* وينطيكم فلس من خيره ..
ازاد : اي ليعوزنا لخيره .. فيون بحيل الله لو لزمت عقد الوكالة ويا الشركة الالمانية .. مو بس تعبر دلشاد وتعبر جد جده لكاكا دلشاد
ابتسمت بمجاملة واني اكوله : منا
مشينا للسيارة صعدنا واتوجهنا للبيت واني خابرت عباس حتى يطلع كدامنا للبيت
لما وصلنا بعده عباس مجاي ..
ماما سبقتنا ودخلت وازاد يباوع بالمنطقة الحديقة
حجيت : مشتاق للغداد
- لا مشتاق لهولير هواية
- نروحلها باجر ؟
- نلحك
- نحجز طيارة ونروح ونرجع هشكل حتى نوفر وقت
- متفقين
دخلنا وهو يباوع الحديقة : بس يبقى العراق اله لون ورائحة مختلفة
- شلون ؟
- هناك كلشي تحسه جامد مثل اللوحة الجميلة البلا روح .. بس هنا تحس اكو حياة
- للاسف ماكو حياة الوضع للاسوء ببغداد ..
- طبعا اذا ابوج وامثاله مستلمينا ويحكمونا شي طبيعي للأسوء
- لتظلم بابا لان هولير صايرة جنة وحتعجبك هواية اكثر من بغداد .
- ونروح لبيخال ؟
- وييي يدلل حبيبي
- هههههه
دنفوت سمعت الباب اندكت ..
اجا عباس
- شصار مو كلتي ما اخذ عربي ولو بيدي احط العرب بمحر/ قة ؟ شو عباس
- لتحجي هالحجي كدامه يضوج
- وتدورين رضااااه .. علوم زينة
- ههههههه
تبعني واني فتحت الباب لعباس ..
باوسني وازاد صار ويايا .. سلم عليه عباس ..
ازاد سلم عليه بغير اهتمام وهو يباوع لوضعه
دخلنا جوا وماما تصيح ع المساعدة وتنصب بالاكل ع الطاولة .. اشرت لعباس يجي يكعد هنا .. تقرب ازاد وكعد كدام عباس .. واني يمه ماما كعدت على راس الطاولة
وهي تامر المساعدة تصبلنا لبن
ازاد مركز بعباس : خريج شنو ؟
باوعله : ابتدائي
ضحك : صدك مدارس ؟
- اول مرة بحياتك تسمع احد ما دارس
- بس غريبة شلون تعرفتوا انت وفيان يعني بهيج تفاوت ...
- اشتغلت وياها حارس شخصي وشفنا نفسنا نرهم .. مدري ما شفنا ..
ابتسم باستفزاز وهو يباوعلي .. ابتسمت بحرج
حجه ازاد : شنو اللي جذبك بفيان لعد بشنو انعجبت
- ما انعجبت بشي
عقد حاجبه ازاد ضحكت وباوعتله : يعني انت معاجبك شي بيه
عباس : لا بس ما اتزوجتج بناء على اعجاب اصلا من جنت حارس من صدك جنت اطك روحي منها ومن عيارتهت ما انعجبت بس هيج فجأة حسيت نفسي خايف عليها وشايل همها .. واحسب لزعلها احساب .. وافكر بيها هواي .. فعرفت اني احبها .. وهالمشاعر مو اعجاب .. حب
ازاد : الحب ما يصير بيوم ويومين .. حتى توصف البينكم حب
- المحبة ما تنقاس بزمن تنقاس بالمواقف بالتضحية تنقاس بشكد انت مستعد تضحي للكدامك ؟
ازاد: - تشوف نفسك ضحيت ؟
- الله أعلم
-الله اعلم شنو ؟ والنعم بالله بس .. انت متعرف بنفسك اذا مضحي او لا
- اليحجي عن نفسه فارغ .. المواقف اللي تحجيلها وهي تجاوب .
واشر عليه ابتسمت بخجل
توتر الوضع بينهم شكله عباس مستلطف ازاد ولا ازاد استلطفه .. نغزت ماما بايدها حجت : اكول لو تعوفون الحجي وتلتهون بطبخي شوية ترا تعبتلكم امدحوووني كلولي شلونه اكلي
حجه عباس : غيرج لحد يطبخ
ضحكت امي وهي تكوله : هاااااا صدك
- والله غير يموت
- يفدوة لحلكك هذا الحجي الحلو ..
التفت لاخوية : ازاد ؟
- طيب
- شكلك ممشتاق للاكل العراقي ..
- لا طيب .. فيان جهزتي امورج للسفر
- ان شاءالله ما عندي شي .
- حتكدرين بهالحالة باجر لهولير ووراها لايطاليا..
- ننزل بايطاليا !
حجه عباس : هوليير ؟
- اااا ازاد قبل لتحي بدقايق اقترح عليه نشوف اربيل مشتاقلها كلت اكولك لما نكمل اكل
رفع حاجب ونزله بحركة سريعة بدون ميلتفت لي
حجه ازاد : هههههههه زمن
باوعتله : شو ؟
- اكول زمان فيان ترتبك وتاخذ اذن .. نسى اللي يتضايق ويلم جنطته ويسافر بدون ميبلغ احد .. تتذكرين سفرة تركيا وانت عمرج ١٨ لما طرتي من عمان لاسطنبول واحنا ندورج ومنلكاج .. تغيرتي
حجه عباس : المرة بيد خيالها .. المالكت خيال .. تضيع وتضيع نفسها .
مديت ايدي على عباس ندسته
وامي بسرعة غيرت الموضوع على الشغل : انت حتروح وياها لامانيا
- طبعاً .. فيان لازم تاخذ هالوكالة وتكسر خشمه لدلشاد ديتعلم شلون يشوف نفسه علينا وعليها .
حجت ماما : الله هيج وتحصل الموافقة ع العقد الا يتخبل و ألله .. دا اتخيله لوجه دلشاد شيصير بيه .
ازاد : بس عفية على فيان .. كان لازمها وحاسب نفسه مسيطر ومشتريها بفلوسه .. تاليتها شمرت فلوسه واملاكه بوجهه وراحت تكون نفسها .. اني مستعد ادعم فيان بكلشي عندي حتى اشوف دلشاد مكسور خشمه ومذلول .. اتصور من القهر حتى سرطان يصير بيه
ضحكت ماما .. اني رفعت ايدي من الاكل وكتله : الله ليكولها
- ليش ميكولها .. يكولها ان شاءالله ونشوفه باتعس حال
- بس مهما يكون هذا بابا .. صح مختلفين لكن متوصل ندعي عليه بهيج مرض
حجت ماما : ليش السوا بيج مو مرض ما عقدج وعلى حافة الموت خلاج تتوسلي تموتين وميقبل .. نسيتي الصار وياج
- منسيت بس هم ما انسى هو ابويه .
ضحكت ماما وهي تكول : لج انت مثل بزون تحبين خناگچ
حجه عباس : بس ابوها ما جان خناكها كل الهي بيه بفضله
ماما : بفضله ! هههههههه شوالها ضيع سنين عمرها على واحد مثل شوان تاليته اتفق وياه حتى يعتدي عليه هذا فضله انت بالذات المفروض رأيك يكون مختلف
كمت من مكاني بسرعة وتركت الطاولة
رحت للمطبخ .. لحكتني ماما : شبيج ليش هيج فزيتي
- اشون تحجين بموضوع الاعتداء كدام عباس ماما هذا زوجي
- وليش قابل ميعرف
- ماما ارجوووج
- واني شكلت
- ارحمي شعوري ليش دا تجيبين هالذكرى هذه وتخليها بنصنا .
- اسفة ماماتي مجان عبالي حتتضايقين هشكل
دخل ازاد : شنو صار ليش كمتي
- ماكو شي
- شوان شنو مسوي
- نغزته ماما : بعدين احجيلك
- حروح اشوف عباس خاف محتاج شي .
مشيت للصالة .. هو مكامل وديريد يكوم .. حجيت : ها
عاقد حاجبه ميحجي ويايا راح للحمام غسل واني بالباب انطيته المنشفة .. مسح وحجه : تتفقين تسافرين لاربيل واني اخر من يعلم
- ممتفقة بس حجينا
- خل يكون بعلمج روحه لاربيل ماكو
- شنو السبب
ذب المنشفة عليه ومشى وهو ياخذ تليفونه ومحفظته .. حجيت : تروح هسه
- تروح ! قصدج نروح
- ازاد هنا
- امج موجودة وراح تسافرين ويا
- بس عيب صارله سنين مجاي لهنا وبعدين بهالسرعة حتروح .. بعدنا مشربنا قهوة
- خلي الكهوة لاهلها وبدلي بسرعة يلا
- عباس بس ازاد هسه اجا
- راح تشوفينه وتشبعين منه شوف
- مراح اكدر اروح
- قصدج تعانديني
- مو اعاندك بس ما اكدر هسه
- واني اكول هسه .
- عباس الله يخليك لتعقدها والله خطية هسه جاي
- اخوج هذا زبالة الزبايل ولو مشيتي وراه تعضين اديج ندم وتتمنين ايام ابوج .. فتحي عقلج واحذري من امج واخوج ما متعاطفين وياج ولا هامهم وضعج كل الرايدينه ينتقمون من ابوج بيج .
- اني اعرف شنو اليضرني والينفعني منهم
وكف كبالي : امشي جيبي جنطتج بسرعة
- ما اكدر عباس الله يخليك
هز راسه .. عافني ومشى طلع من البيت
لحكته مقبل يوكف .. طلع من البيت فوراً
رجعت دخلت للبيت ..
ازاد جان واكف : انت متأكدة من قرارج
- ليش دا تكول هيج
- هذا ميليق يصير حارس عندج مو زوجج اشون رضيتي وقبلتي
- اترك موضوعه ازاد
- انت مقتنعه بيه وباسلوبه وين دا تريدين ترجعين للعصر الحجري بتخلفه وعقليته ؟
-احبه
- الحب ميكفي .. وراح تندمين اخذيها من مجرب
- تعال اترك عباس واكعد خلي اسمع اخبارك
- ما تسر احد اخباري
- شلونك انت وزوجتك
- على وجه طلاق
- ليش
- مدا نتراهم اعتقد الحب وحدة كافي اتزوج البانية متجنسة ايطالية ونعيش عادي ميفرق بس بكلشي نختلف حتى على تربية الاولاد ..
- انت الرايد الطلاق لو هي
- اني
- واطفالك
- باسم اطفالي اقضي عمري كله ويا امرأة اني ممتفاهم وياها وما احبها
- هيج صار الحب طار !؟
- صدكي واتذكري الزواج مقبرة الحب .. الواحد يعيش بلا زواج افضل
- هالشي ميناسب مجتمعنا .. هنا متكدر تعيش بدون زواج .
- دا احجي عن الوضع بايطاليا .. الحياة هناك مو مثل هنا ابدا .
جابت ماما فناجين القهوة وقدمت النا .. ابتسمت الها وكلت الها : تسلمين يا اجمل ام .
- واحلى بنية بالعالم
ازاد : زوجج وين
- الله انطاه والله اخذه
- يعني راح تطلقين من اكرم
- هيج شي
- ووين راح تكعدين
- ابيتي هنا وين اروح يعني
- بيتج لو بيته
- اشترالياه غير باسمي
- مناويه ترجعي
- قنادر احسن ارجعله شنو مكافي استحملته واستحملت قرفه .
- لتصدكها لو يجيها باجر يكوللها خلي نرجع تكوله فداك
ضحك وهو يكولي : هيج
وامي تدافع عن نفسها .. بقينا كاعدين نسولف ونسولف اخبار بعض لبعضنا .. كل هالوقت وعيني ع التليفون عباس كرجع خابر ولا حتى دز رسالة
مدري اني اتضايقت مدري بطني صدك صارت تلويني
كمت احوس بمكاني وازاد يكولي : بيج شي
- احس ممرتاحة بطني دا تاذيني
- روحي ارتاحي .. اني هم نعسان
- اني اكول لو ارجع للبيت افضل ما ارتاح هنا
- شيرجعج بهالوقت !
- تكسي
- بس الوقت متاخر
- وان .. اوصل اقلها اخذ راحتي
حجت ماما : لا متوجعة ولا ما مرتاحة كل القصة تريد ترجع لعباس
ازاد : يمكن هيج
اتصلت بعباس مجاوب .. رجعت اتصلت هم ما رد
اتضايقت حيل وهم يحجون ويايا ممركزة بيهم كمت لبست السترة ودا اطلع كال ازاد : لحظة نوصلج
- تمام انتظرك برا .
طلعت وهو اخذ السويج من ماما واجوي هو وياها الطريق كله اتلوى من بطني والحقيقة من عباس .. وصلت البيت .
سلمت عليهم ومشيت للبيت فتحت الباب ..
دخلت الكيلدور شفت حذاء عباس .. فتت الاستقبال
اتعجبت امه جايه وهو نايم يم راسها .. وهي كاعدة شافتني دارت وجهه مني .
اتضايقت حيل
لان امه جايه استنكف يرد عليه
مشيت للغرفة اخذت ملابس سبحت وغسلت اسناني ولبست روب ستن لحد ركبة رجلي .. ودخلت نشفت شعري .. حاولت انام مكدرت .. اتكلب بفراشي ..
كلش شعور سيء .. اتضايقت جداً
بس متحملت رفعت الغطا من عندي وكمت بسرعة
فتحت الباب ومشيت للاستقبال .. هو نايم وامه كاعدة تكشر برتقال وتاكل .
دنكت عليه وندهته بقوة
صاحت : يعابيج العباس زرفتي صدرة الله لا ينطيج
فز هو بسع ضل يباوع عليه وحواليه
حجيت : كوم فورا يلا دا اريد انام ..
- ولج انت شنهو من بت.. زلمة نايم روحي انطمري
سحبت ايده : كووم
جر ايده : امشي نامي
- كوم كدامي
- امشي مني كتلجججججج
- ما راح امشي وراح تكوم غصبا عنك .. يلا
فتح عيونه وكام مستغرب وامه تصيح : يا يا يا فلك فلكج كون يالعرمة
شمرت الغطا عليه ومشيت وهو يصيح : تعاي تعاي اعلمج الغصب عنه ولج منو هذا التتجاوزيييين عليه .. تعااااااي
وامه تكله : لو ضابها ومعلمها الاصول جا ما تجاوزت عليك
ضربت الباب ورايا بقوة ومشيت للجرباية انام
دخل للغرفة واتقرب بعصبية سحبني من هدومي بقوة : منو هذا الغصب عليه لجججج انت ليش ما تحترميييييين
-عوف هدوووومي
امه تصيح: عفية ابني ربيها
وهودفع خدي : لا تتواكحين وياي فيااااان ومحمد اشكج شك افتهمتيييييي
ابتسمت : اي مرتك وبكيفك
ملامحه كلها عصبية من كتله هيج دفعني من ايده ومشى وهو ينصي صوته : بنت الاوادم كدام امي تتجاوزين
-متجاوزت كتلك غصبا عنك تجي .. ووووو
ابتسمت
اندارلي يباوع .. انداريت وانطيته ظهري وهو يبدل بعصبية ويكول :لا حول ولا قوة الا بالله العلي العظيم
عفت الغطا على اطراف رجليه ومنداره عنه
بس تقرب يريد يكعد ادنيت اخذت مكانه .. كام دفعني حيل وكعد رجع ادفع بيه بظهري
صاح : هسه شني راح اطيح
حجاها دفعته حيل .. اندفع من السرير
صار فوكاي بكل ثكله اختنكت كمت ادفع بيه وهو يزيد بثكله عليه : هسه احسن ها هيج احسن
-لا لا اختنكت والله اختنكت
نزل من عندي صار وراي .. حضني دفعتي نفسي عليه لمني بحضنه وباسني جوا اذني وهو يبعد الشعر من ركبتي : منو جابج
-معليك
جر شعري حييييل: مو اذيج
-لا لا والله امي وازاد لا ..
-ليش مخابرتيني
-خابرت مرتين مجاوبتني
-عليه !
وين تلفوني يم امي يمك.
انداريت من مماني حسرت راسي بحضنه ؛ ليش عفتني ؟
-جا ما ترضين شلون اجرج من راسج
- مكدرت ابقى يمهم ..
-ليش ؟
-ما اريد غير يمك
كام يبوس بكصتي بخفة
باوعتله .. باسني واخذني اله .. وبقيت بحضنه للصبح مرتاحة .
للصبح هوا المبردة صار جهنم ومبيه حيل اكوم شمرت الغطا مني وكمت اتكلب بمكاني .. كعد هو .. حس ع المبردة صارت حارة راح ترسها .. اجتي الوطنية والمكيف متوجه عليه .. من ضربني الهوا ارتاحيت ..
تقرب مني رفع البطانية لحد خصري .. وبعد الشعر من وجهي وباسني بخدي ومسح على راسي وطلع من الغرفة ..
صوت اسمعه يسولف ويا اخته وجهال اخته ويتريك وياهم مكعدت مبيه حيل .. بقيت لحد الظهر نايمة اسمع التليفون يرج ع الطاولة بس ما بيه حيل امد واشوفه ..
دخل هو انتبه ورد حجه ويا امي
كاللها : هسه اكعدها واخليها تخابرج .
شده منها واجا يمي : حبيبي فيون
يحجي ويبعد بشعري ومشي ايده على زندي : امج جاي تخابر حبيبتي منتظرينج مدري شنو
رجعت ظهري للسرير وباوعتله : ديريدون نروح لاربيل .. عوفها .
- متروحين
- مو متقبل !
ابتسم : لا بابا ما عندي شي روحي بس طيارة وسفر وهوسة راح تأذيج وانت حامل راح تروحين وترجعين اليوم طيارة وباجر تشافرين تركيا طيارة ومن تركيا لايطاليا .. ومن ايطاليا وراها المانيا لا تاخذج القوة بنفسج تروحين تتأذين
- يعني ما اروح
- ما جاي امنعج بس رتبي نفسج بطريقة احسن مثلا لمي هدومج وروحي اربيل وباتي هناك ومن مطار اربيل اطلعوا تركيا ولتروحون لايطاليا اطلعي بوجهج على المانيا .. اقلها توفرين على نفسج وقت روحه جيه بالطيارات بهذلة
- مو ازاد عنده شغل
- وانت ترتبطين بشغله
- هو متجنس اذا يدعم الملف ويحضر ويايا يكون الموقف اقوى
- وياج ما جاي اكلج لا تاخذينه بس راعي وضعج صحتج اهم .. يلا كومي غسلي حتى تتريكين وخابريهم اتفقي وياهم
فتحت اديه اله واني نايمة
ابتسم وهو يدنك يحضني : يلا
- اذا مو باليوم تلث اربع حضنات ميتسمى يوم .. جرعة حب اطيب ع الروح من جرعة دوا .
باسني : حبيبتي انت .. يلا حبيبي كومي .
كمت للحمام غسلت ..
ورجعت لكيته واكف ديخوط كدام الطباخ علياء كالتله : شدسوي
- حليب
- شتسوي بالحليب
- هيج مشتهي اشرب
تركتهم ودخلت امشط بغرفتي دخل وكوب الحليب بيده : هاج اشربي
- اي
ابتسمت ومديت نفسي بسته بخده حضني
حجيت : شو دا احسك متضايق اكو شي
- لا بس على اساس اطلع للشغل اليوم ابو الشغل خابرني كالي لا تطلع
- مو افضل
- وين الافضل شناكل شنشرب كوه لميت فلوس الايجار
- لو حصلت هالعقد مشاكلنا كلها تخلص
- اني مالي خص بهالعقد فيان شغلج هذا .. ماي خصني ولا يخص اهلي
- بس تساعدني بيه
- ما افتهم بيه حتى اساعد
- محد طلع من بطن امه يعرف تتعلم وهشغل بيه مستقبل كلش جبير
- ما اريده .. مو اني الينكالي دلدول ويشتغل عد مرته ما اريد وما اقبل .
ابتسمت : مو هيج قصدي القصد اساعدك .
- مو مشكلة تدبر .. اشربي وخابري امج حتى اوديج .
اتصلت بماما واني اشرب الحليب
رد عليه ازاد : وعودج متغيرة وين صاحبة الوعد لما تكول توفي
- اي واني عند كلامي
- لا والله كلامج صار بيد غيرج منتظرين من الصبح يولي
- راح اجي بس خلي ببالك نبات باربيل ونطلع من اربيل
- شلون نطلع من اربيل اني حاجز تو وي ..
- واني محاجزة لحظة اتاكدلك من تذاكر الطيران لتركيا ..
- حجزي ايطاليا كبل لتحجزين تركيا وهناك هن نكعد
- مو منلكى اوربا .. خلي اشوف
قطعت الخط واتصلت بصديق بمطار اربيل كلتله على حجز لايطاليا ..
كال موجود بس اترانزيت قطر
حجزت وحضرت جنطتي .. وصلني عباس لحد باب بيت اني ..
طلعت ماما حاجزتلنا على مطار بغداد ..
توجهنا كبل لمطار بغداد منه الى مطار اربيل نزلنا وخلينا جنطنا ببيت ماما .. ورحنا طلعنا اخذنا اكل ورحنا لبيخال كعدنا كدام الشلالات سولفنا ضحكنا لعبنا .. واكلنا ورجعنا على شقلاوة اتمشينا هواية .. لحد ما تعبت حسيت رجليه اتبندوا ما اكدر بعد ..
رجعنا للبيت اني نمت وماما بقت تحضرلي الجنطة
لحد ثاني يوم كعدنا اخذنا غراضنا وطلعنا لمطار اربيل .. توجهنا لقطر .. من قطر توجهنا لايطاليا ..
جان بيت صغير رحب بيه هو ودخلت
نزع حذائه اباب البيت ومشى .. سويت مثله
حجه : وصيتها تحضرلج غرفة اريان
-هي مموجودة
- لا هيج وقت تكون بالشغل
- احد مو عطلة تشتغل بيوم العطلة
- لا ربما طالعة ويا اصدقائها
حجاها وطلع شرب من الثلاجة صب : تريدين
- لا لا شكراً
- ارتاحي اذا تعبتي ..
- لا بس اريد نت حتى اخابر عباس اطمنه وصلت
اخذ تليفوني حطلي نت
خابرت عباس طمنته .. دخلت الغرفة سرير واحد
الجوا اطيب من بغداد واربيل .. مو حارة بس اكو مروحة ارضية في حال احتريت .
تمددت وشغلتها على صوت المروحة
دخت ونمت .. ورا شوية كعدت على ريحة طيبة
طلعت لكيت ازاد ديسوي عشا .
كعدت كباله نحجي صبلي اسباغيتي قدمت الصحن وهو يكولي : لحظة بارميجانو ..
برش فوك السباغيتي بارميزان .. وصار كدامي ياكل ونسولف ويشرب .. دخلت زوجته وتراكضوا اطفاله يحضنوه وهو يبوسهم
فاتت زوجته باوعتلي كالت ( چاو ) وعدت
صار يحجي وياها ايطالي ويصيح عليها ( جوليا جوليا )
اولاده هم حجه وياهم بالايطالي ومشوا من عنده
كالي : لحظة
وكام .. راح يتعارك وياها ويتصايحون ..
هو شارب وكلامهم ايطالي ما افتهمه .. شلت المواعين وباوعت موجودة غسالة صحون حطيتهم بالغسالة ومشيت للغرفة .. الاولاد موجودين .. اخذت تليفوني وكعدت بالصالة ..
لكيت عباس مراسلني
اتصلت بيه مجان عنده نت .. فتحت التلفزيون كله ايطالي ما افتهم منه شي .. بقيت ع التليفون لحد ما اتصل عباس : ها حبيبي كعدتي
- اي
-شلونها ايطاليا
- كآبة كلش يمكن لو انت موجود تصير حلوة
- محتاجتلي ايطاليا حتى تصير حلوة ولج
- اني المحتاجتلك مو ايطاليا .
- تعبانة يروحي
- لا الحمدلله بس احس اشتاقيتلك اتعودت يمك
- اروحلج فدوة عمري كملي شغلج وارجعي باسرع وكت ..
- هو دزيتلهم على مود موعد مقابلة وانتظر منهم خبر .
- ان شاءالله خير
دا نحجي اجا ازاد كتله : يلا حبيبي بعدين نحچي .
كعد : مراح اكدر اكمل وياها ابداً
- لخاطر اولادك .. خطية شفتهم اشون يركضون عليك لما دخلوا
- ختولي .. اتركينا منها .. اخذتي موعد
- تواصلت وياهم ومنتظرة تحديد موعد
- تمام ، تصدكين افكر اترك ايطاليا والشغل هنا وارجع للعراق نلزم هالشغل اني وياج ونفوت بعين اكبر واحد
- اذا هيج اشجعك ع الطلاق ههههههه
- هههههههه ، عجيب هالحياة حتى من تاخذ على حب ما ترتاح .. بس تتزوج تحس الحب جان وهم .
- مو وهم .. بس ربما الاختيار
- تقنعيني اختيارج لعباس صحيح
- شوف قبل كم يوم كالك كلمة الصراحة بقت ابالي وراجعتها براسي هواية لما سالته شعجبك وكالك ولا شي .. شفت كلامه صدك .. لما نختار شخص لان معجبين بجماله او بماله او بفد امر معين .. بعد فتره هالامر يصير شي عادي اذا حلو تتعود على شكله ويصير عادي واذا فلوس تصير مالها قيمة من تصير بيدك .. شفت الحب مو اعجاب ولا تعلق .. الحب من صدك تضحية لابد للانسان يصفن ويشوف هو مستعد يضحي لو لا
مو بس بالحب .. على صعيد جميع العلاقات
مرات تكون ام اللي ينضرب المثل بحب الام لاولادها بس تلكى ام ممستعدة تضحي بحياتها وتتحمل لخاطر اطفالها ومرات اب .. واخ واخت .. الكل يكدر يكولك احبك بس منو مستعد يضحي من اجلك ؟
فشفت الحب مثل ميشوفه عباس تضحية لو مهما كان الكدامك فقير قبيح اي ان كان ظرفه انت مستعد تعيش وياه ؟ .. هذا الحب .
- والحقيقة كذب محد مستعد يضحي .
- الما مستعد يضحي هو نفسه اللي يكول ماكو حب .
ابتسم : واليكره ؟
- اشون ؟
- اني اكره ابويه من اعماق اعماق قلبي
- بعدك حاقد عليه
- وبنفسي اكسر خشمه وانتقم منه .. بنفسي اشوفه مفضوح والدنيا كلها تحجي عنه بالسوء .. يوم اللي اشوفه مهيون ومذلول وخسران كل تجارته ..
- كل هالحقد دافنه بقلبك لبابا
- ميستاهل كلمة اب هذا نكرة .. تجارته وفلوسه وامواله ومكانته فوكنا كلنا والدليل كدامج اختي ماتت محرك ساكن لا وبقى مصاهر اللي قتلوها ليش ؟ حتى ما تخسر تجارته .. يوم اللي عارضته ووكفت بوجهه جردني من كل شي وطردني .. ونفس الشي ماما واخيرنا انت .. منو بقى ما طرده بابا وذله بفلوسه ؟ اني مستعد ادعمج وانطيج كلشي تريدي في سبيل اشوف ابويه مذلول وهالعقد راح يفرك وجهه بالتراب .
بقيت اباوعله وهو يحجيلي عن حقده لابويه .
حدولي يوم للمقابلة
تحضرنا اني وازاد ورحنا على برلين دخلنا الشركة وكعدنا حجينا وابدينا عروضنا وطموحنا ازاد جان اشطر مني بكسب رضاهم .. فقبلوا واتفقنا على توقيع عقد .. وربحبوا بالفكرة .
طلعت منهم طايرة من الفرح ..
خابرت عباس واني احجي بحماس واحجيله عن المشروع .. هو فرح على فرحتي .
كملت كل شغلي بالمانيا .. ازاد رجع قبلي لايطاليا واني بقيت بس كلت لعباس ازاد موجود لان محيقبل بدولة وحدي .. ومحيتفهم انو اكمل شغلي .
كملت حجزت على بغداد .. ترانزيت مصر
نزلنا بمطار القاهرة ٥ ساعات لحد ما رجعت الطيارة كملت لمطار بغداد .
جان عباس منتظرني برا ..
هستوني نزلت بالطيارة دا يختمولي دخول .. باوعلي الضابط كال : تفضلي ست
- وين
- تفضلي ويانا
- لا شكرا اختملي الجواز دا اريد اطلع
- بس عدنا اجرائات بسيطة
- شنو هي الاجرائات ؟
- اتفضلي ست
- محتفضل لمكان قبل لتفهمني .. احجي فضها شكو
- ست اكو بحقج دعوى قضائية ومطلوبة للقضاء وما ممتثلة
- طيب
مديت ايدي حتى اخذ جهازي من جنطتي
سحب الجنطة من عندي والتليفون : العفو ست تفضلي
- شنو هالتصرف انطيني الجنطة حتى اخابر المحامي
- مو قبل التحقيق نحولج للمركز وهناك خابري المحامي
- مراح اروح لاي مكان وتليفوني يرجع هسه
- براحتج
اشر لبنات لابسات زي عسكري : اخذوها
لزموني من اديه بسرعة كمت اتصايح وياهم وابعد بيهم .. رفعت ايدي صارت بوجهه الضابط ما احس الا ضربة قوية على راسي وكعتني للكاع ..
