رواية جثة سليم الفصل الثاني بقلم محمود الأمين
= الراجل اللي اسمه زكريا، هو هدد حامد في الشارع وقاله هتدوق فراق ابنك زي ما انا دوقت فراق ابني
_ طيب حضرتك عندك دليل غير التهديد ده؟
= لا بس انا متاكده، ما حدش ليه مصلحه انه يخلص من ابني غيره
_ مدام زينب، انا مقدر كويس جداً الحاله اللي انتي فيها، وعارف يعني ايه ام تخسر ابنها، بس احنا بنعتمد هنا على ادله واضحة وملموسة، مش كلام وظنون
= بس انا قولت لحضرتك اني متأكدة
_ ما هو ده مش دليل يا مدام زينب، حضرتك ممكن ترجعي بيتك وترتاحي وفي اقرب وقت هنقبض على اللي عمل كده، سواء كان زكريا او غيره اطمني وثقي فيا
...
خرجت مدام زينب من عندي، وهي منهاره من العياط، كنت مقدر حالتها جداً.. وبصيت على تقرير الطب الشرعي وتقرير المعمل الجنائي
تقرير الطب الشرعي اثبت ان الطفل سليم ادبح في البداية بآله حادة، وبعدها القاتل استخدم منشار كهربائي عشان يفصل الجثه ويقسمها نصين، وفي على صدر الطفل كلام وحروف متفرقة وما لهاش معنى
الجريمة حصلت قبل 48 ساعة ما بين الساعه 1 والساعه 3 العصر
اما تقرر المعمل الجنائي فزي ما هو متوقع، قال ان الجريمه ما حصلتش في نفس المكان اللي تلاقت الجثة فيه، وان البصمات اللي على صندوق الزبالة كتير جداً صعب تتحدد كلها
..
بصيت للرائد اسامه وقولتله
_ القضية دي مش سهله يا اسامه، رئيس النيابه كان عنده حق اللي قتل الطفل ده، قتله بدافع الانتقام، ولو جينا بصينا على المتهمين هنلاقي انه اكتر واحد عنده دافع انتقام من حامد هو زكريا العطار اللي ابنه مات على ايد سليم ابن حامد وعلى حسب كلام الست زينب دلوقتي، بتقول ان زكريا هدد حامد بقتل ابنه
بس احنا ما عندناش دليل على زكريا ده، كل اللي هقدر اعمله اني هحقق معاه بسبب التهديد ده
بس اه صحيح، في تقرير الطب الشرعي في حاجه اتذكرت على صدر الطفل كان في حروف متفرقة، وما عرفوش يحددوا ده ايه؟!
= مش عارف يا فندم، ممكن يكون سحر مثلا
_ سحر ايه وكلام فاضي ايه بس.. مش عايز ادخل في السكه دي خلينا بس نحقق مع زكريا ومع اخو حامد واخته ونشوف بعد كده هنوصل لفين
...
كان ملفق مع التقرير، صوره للحروف والكلام اللي كانت على صدر الطفل سليم، مسكت الصوره شويه وبصيت فيها وكل شويه كلمه الرائد اسامه تتردد في وداني ما يمكن ده سحر
المهم طلع استدعاء من النيابة لزكريا.. وربيع.. وفوزية للتحقيق معاهم والادلاء باقولهم
وبعد ساعات التلاتة كانوا قدام مكتبي
دخل زكريا اول واحد وبعد ما اخدت الاسم الثلاثي وعنوانه في محضر رسمي بدات اتكلم معاه
_ انت عارف انت هنا ليه يا زكريا؟
= في الحقيقه لا يا باشا، انا جالى استدعى وجيت عشان اشوف عاوزين مني ايه؟
_ اكيد قابلت بره الاستاذ ربيع والست فوزيه مش كده
= اه قابلتهم يا باشا، ومش فاهم انا ايه علاقتي بيهم
_ انت هنا عشان متهم بقتل سليم ابن الاستاذ حامد، ايه معقول مش عارف انه اتقتل؟
= هو في حد في المنطقه يا باشا ما عرفش، الكل عارف انه اتقتل طبعاً وربنا يجازي ولاد الحرام اللي عملوها
_ههههههه.. لا حلوه، بجد حلوه يا زكريا اول مره اشوف واحد بيدعي على نفسه
= لا يا باشا انا بدعي على اللي عملوها، انا مستحيل اعمل كده
_ بس انت هددت الاستاذ حامد في الشارع انه هيدوق فراق ابنه زي ما دوقك فراق ابنك
= كان كلام في لحظه عصبيه يا باشا وساعه شيطان راحت لحالها، لكن اقتل اعوذ بالله ما عملتهاش ولا هعملها يا باشا
_ طيب كنت فين ساعة وقوع الجريمة؟.. من الساعه 1 للساعه 3 العصر؟
= كنت في البيت يا باشا، انا بروح بعد ما بصلي الضهر وبريح لحد الساعه 3 ونص وبعدها بخرج وافتح المحل من تاني
_ عندك شهود انك كنت في البيت وقتها؟
= ما عنديش غير مراتي يا باشا، ما اعرفش بقى هتاخدوا بشهادتها ولا لا؟
_ طيب يا زكريا امضي على اقوالك وروح بس اعمل حسابك ممكن نستدعيك تاني في اي وقت
= تحت امرك يا باشا وتحت امر الحكومة
...
خرج ودخل الاستاذ ربيع وقعد قدامي وكان باين عليه الحزن الشديد واتكلم وقال
_ خير يا باشا، حضرتك استدعتني؟
= البقاء لله يا استاذ ربيع شد حيلك
_ الشدة على الله، الله يرحمه كان غالي علينا كلنا
= الله يرحمه، حضرتك عارف انت هنا ليه؟
_ في الحقيقه لا، بس اكيد حضرتك عاوز مني معلومات يمكن تفيد التحقيق
= لا هو الحقيقه، انت متهم بقتل ابن اخوك سليم حامد
_ حضرتك بتقول ايه؟.. انا متهم بقتل ابن اخويا، ده تهريج.. حضرتك عارف بتتهمني بايه؟
= اهدى يا استاذ ربيع، انا عندي معلومات انك كنت على خلاف مع اخوك الاستاذ حامد، وانك اتخانقت معاه خناقه كبيره اوي وهددته
_ ده حصل فعلاً، بس ده كان بسبب الميراث، مال سليم بالموضوع ده؟
= يمكن تكون حبيت تنتقم من اخوك، فقررت تخلص على ابنه عشان تقهره
_ مستحيل اعمل كده، مستحيل.. انا ما قتلتش ابن اخويا وما اقدرش اقتل حد أصلاً
= طيب كنت فين وقت وقوع الجريمة، من الساعه 1 الضهر للساعه 3 العصر
_ كنت في البيت، وقبل ما تسال يا باشا عشان عارف الاسئله دي ما عنديش شهود على اني كنت في البيت، بس كل اللي اعرفه اني ما قتلتش سليم
= طيب يا استاذ ربيع امضي على اقوالك وتقدر تتفضل، بس ممكن نستدعيك في اي وقت عشان نحقق معاك تاني
_ تحت امرك يا باشا
...
ودخلت فوزية كانت ست باينه عليها مش سهله قعدت قدامي وقالت
_ خير يا باشا؟
= انتي عارفه انتي هنا ليه يا فوزيه؟
_ لا يا باشا ما اعرفش عرفني؟
= انتي متهمه بقتل سليم ابن اخوكي حامد.. ردك ايه على الكلام ده؟
_ هو حامد اتهمني، معقول يتهم اخته؟
= لا حامد ما اتهمكيش يا فوزيه، انا اللي بحقق معاكي دلوقتي
_ تبقى مراته القرشانه، بتاعت السحر والاعمال
..
الجمله خرمت ودني فبصيتلها وقولتلها
= سحر واعمال ايه يا فوزيه؟.. هي الست زينب كان ليها علاقه بالسحر والكلام ده
_ ايوه يا باشا، كانت بتعمل اعمال عند واحد اسمه عمار والبلد كلها عارفه الكلام ده بس ساكته
= بس انا على حد علمي انه في مشاكل بينك وبين اخوكي حامد
_ المشاكل العاديه اللي بين واحد واخته يعني، لكن ما توصلش اني اقتل ابنه
...
خلصت تحقيق معاها، وطلبت تحريات كامله ومفصله عن الست زينب زوجة الاستاذ حامد
وفعلا بعد 48 ساعه اتعرض علينا التحريات، والست زينب طلعت فعلاً كانت بتلجأ لدجالين.. بس معقول؟!!
معقول الست زينب هي اللي قتلت ابنها؟
يعني كل اللي شوفته ده كان تمثيل، ده انا يومها صعبت عليا مش قادر اصدق انه في ام تقدر تعمل كده في عيالها
لكن في وسط التحريات، عرفت انه اتقبض قبل كده عليها في زار، والزار ده اللي بيعملوا الدجالين والسحرة عشان يوهموا الناس لكن في الحقيقه هو جهل وتخلف
وفي الزار ده اتقبض على عزت الصغير وده واحد اشتغل مع دجالين مصر كلهم واتحبس كذا مرة وهو دلوقتي في السجن بيقضي عقوبة
فكرت كتير بس في النهايه قررت اروحله جايز يفيدني في موضوع الحروف والكلام ده
وفعلا تاني يوم كنت عنده في السجن واتكلم وقال
_ كريم باشا الشوربجي بنفسه، السجن نور يا باشا والله
= انا جاي عايزك في مصلحه.. عاوزك تساعدني فيها
_ الله، ومن امتى الحكومه هي اللي بتلجأ للدجالين؟
= لو وريتك حاجه تقدر تقولي السحر ده اتعمل عند مين؟
_ والله لو اعرف هقولك؟
= طيب الصوره اهي
...
بص عزت في الصوره شوية وكان مبرق وبعدها رجعلي التليفون وقال
_ اللي في الصوره ده سليم يا باشا مش كده؟
= انت عرفت منين؟.. الصوره مشوهه اصلا ومش ظاهر فيها غير الحروف والكلام
_ انا عارف مين اللي قتل سليم يا باشا، وكنت انا اللي هنفذ القتل فيه، لكن اتقبض عليا قبلها
= طيب مين اللي قتل سليم؟
_ اللي قتل سليم يبقى..
وقبل ما يتكلم لقيت..
