رواية اختفاء عمران الفصل الثاني بقلم محمود الأمين
_ اختفاء مدبر، طيب في دليل على الكلام ده؟.. موضوع انه كان بيمول الجماعات تمام ما فيش غبار عليه ده جاي من امن الدوله، لكن احنا عاوزين اثبات انه هرب مش اتخطف.
= اكيد يا فندم.. احنا هنمشي ورا الموضوع، وباذن الله في اقرب وقت هنوصل.
_ ان شاء الله ربنا يوفقك يا ايمن واتمنى انك تعرف تثبت ده في اقرب وقت.
.....
بعد مرور شهرين من البحث، اتلقينا بلاغ من عامل بنزينه على طريق مصر اسكندريه الصحراوي، كان بيقول في البلاغ انه كان بيشم ريحه وحشه جدا بقاله كام يوم.. وان الريحه كل يوم بتزيد ولما قرر يمشي ورا مصدر الريحه دي، لقي جثه متحلله عليها لبس متقطع وكانت ملفوفه في ملايه كبيره، اتحركنا على مكان البلاغ، وهناك لقينا جثه حرفيا وصلت لمرحله الهيكل العظمي، متحلله تماماً، الهدوم اللي كانت على الجثة كانت بدلة كاملة ولونها اسود وعلى الارض جنبها كان فيه ساعه وخاتم
...
كنت بحاول افتكر مين كان مبلغ على اختفاء حد بالمواصفات دي، مسكت التليفون واتصلت بالرائد اسامه وطلبت منه يتاكد من حاجه معينة، وما فيش 10 دقايق ورن عليا واكد على المعلومه اللي عندي، وهي ان البدله والساعه والخاتم.. دي حاجات كان متبلغ انها متعلقات رجل الاعمال عمران الالفي.. معنى كده وبنسبه تتخطى 90% دي جثته، لكن لازم الجثه تتنقل للطب الشرعي وهما هيتاكدوا من خلال الحمض النووي هل دي جثته ولا لأ؟
بعد ما خلصنا كل الاجراءات واتنقلت الجثه للطب الشرعي، عرفت ان الدكتور المسؤول هناك اسمه الدكتور حسان، روحت واتكلمت معاه ولما عرف الموضوع طلب عينه من ابن المشتبه فيه عشان يتاكد اذا كانت دي جثه والده ولا لا، وطبعا بلغت الكلام ده لعزيز الالفي اللي جه واتاخدت منه العينه فعلاً والدكتور حسان وقتها قال:
_ النتيجه هتطلع بعد 72 ساعة إن شاء الله
= ما ينفعش قبل كده يا دكتور.
_ حضرتك عارف ان الجثه وصلت لمرحله كبيره من التحلل يعني الموضوع مش سهل بس ان شاء الله خير.
= ان شاء الله يا دكتور.
....
نزلت من عند الدكتور حسان، ورجعت على مكتبي، كنت عايز الوقت يعدي بسرعة عشان اتاكد من النتيجة والقضيه دي تتقفل بقى، بس المشكله ان الدكتور حسان اتاخر جداً والمده اللي حددها تخطاها، قدرت اجيب رقم تليفونه واتصلت بيه:
_ الو.. ايوه يا دكتور حسان، معاك المقدم ايمن.
= اه حضرتك بتتصل عشان التقرير، انا اسف جداً للتاخير ان شاء الله هيكون عندك بعد نص ساعه
_ طيب طمني هو طلع عمران الالفي ولا لا؟
= ايوه يا ايمن بيه، هي جثة عمران الالفي فعلا.
_ بشكرك جدا يا دكتور ومنتظر التقرير.
....
بعد اللي اتقالي ده كان المفروض اعتبر القضيه خلصت، التقرير وصل واعتمد خلاص وكان دورنا دلوقتي نعرف مين اللي خطف وقتل عمران الالفي واتفتح التحقيق
لكن في اليوم اللي بعد اليوم ده، ولما كنت رايح اجيب بنتي سلمى من المدرسة، وقتها شوفت حاجه غريبه جداً، شوفت الدكتور حسان نازل من عربيه احدث موديل، وانا اللي اعرفه ان الدكتور حسان معاه عربيه صغيره واللي اعرفه برضه انه راجل على قد حاله، كده الموضوع كان في إن
...
رجعت المديرية ودخلت للعميد مصطفى، واول ما شافني اتكلم وقال:
_ اهو الراجل طلع مات اهو، والقضيه اتقفلت يعني لا هرب ولا اي حاجه من الكلام اللي انت كنت بتقوله.
= ما ماتش يا فندم.
_ نعم، انت بتقول ايه؟
= بقول لحضرتك عمران الالفي ما ماتش.
_ ايه الجنان اللي انت بتقوله ده؟... الراجل مات وتقرير الطب الشرعي اثبت ان الجثه اللي انت لقيتها هي جثه عمران الالفي.
= وانا جاي لحضرتك عشان كده برضه، انا كنت خلاص اقتنعت ان عمران الالفي مات، بس انا شوفت حاجة والحاجة دي ملهاش تفسير بالنسبالي غير ان عمران الالفى لسه عايش.
_ حاجه ايه دي بقى ان شاء الله؟
= الدكتور حسان يا فندم، دكتور الطب الشرعي اللي كتب التقرير، قبل موضوع عمران الالفي كان راكب عربيه صغيره متعملش 50 الف جنيه، لكن دلوقتي راكب عربيه احدث موديل، ما تقلش عن 10 مليون جنيه او اكتر.. فممكن حضرتك تقولى هو جاب العربيه دي منين؟.. سؤال اجابته واضحه الدكتور زور التقرير واكيد اخد من عزيز الالفي.. رشوه عشان يثبت ان ابوه توفى.
_ عجباني اوي نظريه المؤامره دي يا حضره الظابط، خلاص عزيز الالفي وابوه بيمشوا الدنيا على مزاجهم مش كده
= يا فندم احنا ممكن نحقق في الموضوع، صدقني انا حاسس ان هو لسه عايش
_ حاسس؟!.. هو حضرتك شغال معانا بالاحساس ولا ايه؟.. حضرة الظابط الموضوع مش احساس الموضوع يستلزم ادله واضحه وملموسه عشان نقدر نفتح القضيه من تاني، احنا دلوقتي قضيتنا مش اختفاء عمران الالفي، خلاص الراجل مات وطلع تقرير اكد ان الجثة جثته، مهمتنا دلوقتي نعرف مين اللي خطف وقتل عمران الالفي، مفهوم يا حضره الظابط ولا مش مفهوم؟!
= مفهوم يا فندم
....
طلعت من عند العميد مصطفى وانا مصمم على رأيي، انا واثق ان الموضوع ما انتهاش، طلعت من مكتب العميد على الطب الشرعي، لقيت عربيه الدكتور الجديده مركونه هناك، طلعت المكتب فوق لقيت الدكتور حسان بيتكلم في التليفون واول ما شافني اتخض وبان عليه التوتر:
_ ايه يا دكتور شوفت عفريت ولا ايه؟
= لا يا باشا العفو، بس زياره مفاجأة، خير يا باشا هو في حاجه ولا ايه؟
_ انا كنت جاي اباركلك على العربيه الجديدة، اللي جابهالك عزيز الالفي
بلع ريقه بالعافيه وقال
= عزيز الالفي مين؟
_ مش عارف عزيز الالفي، اللي خلاك زورت التقرير يا دكتور، بس بصراحه العربيه تحفه
= انا ما اسمحلكش تشكك في ذمتي
_ ذمه مين يا ابو ذمه، انا عارف انك اخدت رشوه، زي ما انا عارف ومتاكد انه عمران الالفي لسه عايش والجثه دي مش جثته
= انا عملت شغلي بما يرضي الله، ولو عندك دليل واحد اني مرتشي ممكن تقدمه للنيابه، لكن طالما ما فيش دليل فحضرتك ممكن تتفضل عشان انا ورايا شغل
_ بتطردني يا دكتور، ماشي
...
خرجت من عند الدكتور حسان، ورجعت على البيت ارتحت شويه من تعب اليومين اللي فاتوا، وقومت من النوم متاخر عشان اوصل بنتي للمدرسه، ركبنا العربيه واتحركنا كنت بتكلم وبهزر معاها وانا معدي من مفترق طرق، لكن فجاه لمحت عربيه نقل جايه بسرعه جنونيه ناحيتي، حاولت اتفاداها لكن للاسف ملحقتش والعربيه اتقلبت كذا مره ورا بعض
فوقت لقيت نفسي في المستشفى، ايدي مكسوره ودماغى مربوطه بشاش، سالت عن بنتي بس محدش كان بيجاوبني، الاجابه كانت واضحه في عيونهم، بنتي ماتت، ما كنتش مصدق كنت حاسس اني في كابوس، فضلت اصرخ واضرب في السرير وحاولت اقوم من مكاني لكن الدكاتره ادوني حقنه مهدئه، كانت خسارة بنتي كسرت الضهري الحقيقية، واللي من بعدها حسيت ان الدنيا دي ملهاش طعم ، كل ما كنت اغمض عينيا كنت بشوف العربيه النقل وهي جايه بسرعه ناحيتنا وبتخبط في الناحية اللي كانت قاعدة فيها بنتي، ومن بعدها جسمها بيترمي في حضني وبفقد السيطرة على العربية اللي بدأت تتقلب بينا .
3 شهور في المستشفى، منهم شهر كنت بتعالج نفسيا وبعدها خرجت، خرجت وانا ناوي اني ما اسيبش عزيز الالفي في حاله، انا عارف ومتاكد ان هو اللي دبرلي الحادثه، انا هاخد حق بنتي منه حتى لو وصلت لاني اقتله
كلمت ادم في التليفون اللي اول ما سمع صوتي اتكلم وقال:
_ حمد لله على السلامه، الحمد لله انك خرجت
= ما فيش اخبار جديده عن عمران الالفي؟
_ عمران الالفي ايه بس، ما تركز في حياتك وكفايه اللي راح
= ارجوك جاوبني، عزيز الالفي هو اللي دبر الحادثه وانا مش هسيبه لا هو ولا ابوه.. ارجوك جاوبني
_ انا عندي دليل ان عمران الالفي لسه عايش، والمفروض انه في اجتماع بكره عشان نحقق في الموضوع
= دليل ايه اللي عندك ده؟
_ مش هينفع الكلام في التليفون، تعالي عندي البيت هبعتلك اللوكيشن على الواتساب
....
قفلت معاه واتحركت على اللوكيشن اللي بعتهولي على الواتساب، ادم كان ساكن في المعادي واول ما وصلت قدام العماره رنيت عليه لكنه ما ردش عليا
بس هو كان سايب في الرساله انه ساكن في شقه 7، اخدت الاسانسير وطلعت على الشقه، واول ما وصلت قدام الباب لقيت.
