رواية قضية سعدية الفصل الثاني بقلم جمانه السعيدي
سعديه....امي جانت خايفه باعتبار اني صار عمري ١٨ سنه
يعني كبرت وضاعت عليه هواي فرص بسبب ابوي
كانت هاي الشغله حيل موترتها
تقريبا فات ست اشهر واني مثل مااني محد اتقدملي
كلام امي طول النهار على شغلة زواجي خلاني اخاف
اخاف ابقى بدون زواج
وكان الزواج شغله مصيريه واني بدون زواج راح اموت
طبعا فرص الزواج بلنسبه اليه قلة حيل
مو مثل من جنت بعمر ١٣ و١٤ سنه
بعد ست اشهر اندكت بابنا
مره جبيره بلعمر جايه تخطبني
اول مادخلت للبيت امي استقبلتها
كعدت وبدت تسئل عني
اجت زوجت حسين تركض
...تعاي سعديه ولج هاي المره جاية خطابه
سعديه...خطابة تحجين صدك
...اي ولله اني سمعتها تسئل خالتي عليج
سعديه...فرحت واخيرا اني راح ازوج حالي حال البنات
شويه وزوجت حسن راحت قدمتلها الجاي
واجتني تعاي امج تكول المره تريد تشوفج
سعديه...عدي ثوب حلو ماروني ضامته من عرس اخواني
اني ما مشتريه هدوم طلعه
لان ابد مااطلع
اخواني مايقبلون اطلع من البيت
ومنا ابوهادي لازم الباب ٢٤ ساعه نسيت شكل الشارع شلونه
لبست الثوب وخليت الحجاب على شعري وخليت عطر
وطلعت عليها
سلمت على المره وبستها وكعدت
ام صلاح...هله خاله شلونج
سعديه...الحمد لله
ام صلاح...خوش بنيه الله يستر عليها
احنا منا من هاي الناحيه بس احنا بلاطراف
كون تنشدون عنا بس تكولون بيت ابو صلاح
اني ولدي الكبار ثنيينهم مزوجين الجبير عدا ولد ثنيين
والثاني عده وليد وبنيه
باقي بس هذا الزغير اريد ازوجه قبل لا اموت
الدنيا ما مضمونه
ابني اسمه رحيم كون تنشدون علي
امي....انشاء الله خير اني احجي ويا ابوها واخوانها
ويصير خير كون الكم نصيب يمنا تاخذونها
سعديه...طبعا امي طايره من الفرح ودها تكول اخذوها
احنا موافقين
مو لان اني حمل ثكيل عليها
بس لان تخاف ابقى بلا زواج وخاصه هاي صار سنه
محد دك الباب علينا
المره من طلعت كالت يومين وارد عليكم
من طلعت امي طارت الفرح وكانت متحمسه ومنتظره يجي ابوي
حتى تحجيله عن خطوبتي
فعلا بس دخل ابوي حتى قبل لا يدخل للبيت جوه
تلكته بلباب
امي...البشاره ابو حسن
ابوي.. هااا خير
امي....سعديه اجو عليها خطابه
ابوي...يالله بيتمن ياهو ابوهم
امي...تكول احنا بيت ابو صلاح ووصفت بيتهم
وين البيوت اول الناحيه بيت اصفر عالي
تكول انشدو علينا الناس كلها تعرفنا
جمانه السعيدي
ابوي...اني اخلي حسين باجر يروح ينشد عليهم
سعديه...اني ضميت روحي ماطلعت استحي من ابوي
واخواني خاف يكولون فرحانه بعرسها
ثاني يوم راح حسين يسئل عنهم
رجع وكعد ويا ابوي وحسن وامي كعدت وياهم
سعديه...اني رحت على كيف اريد اسمع حجيهم
حسن...الناس سمعتهم طيبه وولدهم اوادم
بس يكولون شويه بخله نشدت عليهم كل المنطقه
ماعليهم سمعه موزينه
بس يكولون شويه بخله
امي...ميخالف ايجوز حريصين على حلالهم
الناس مايعجبه العجب
ابوي....انتم شنو رايكم
حسن...اني اكول خل تمشي بنصيبها البنيه مالها غير بيت زوجها
حسين...اني هم اكول هيج خليها تصير بحكم زلمه
احسن ماباقيه هنا ترا سعديه موزغيره
ابوي.. اني ما متعايز منها بس خاف تكبر وبعد محد يجيها
امي....هاي هي خلها تعرس هاي السنه كلها محد دك بابنا بس ذوله الناس
خاف نردهم وبعد محد يخطبها
سعديه...انتهى الاجتماع بالموافقه على هذا العريس
يومين ورجعت ام صلاح تاخذ الموافقه
امي..هاي هيه خيه شايفين كل الخير
ام صلاح...خير الي بوجهج
امي...شوفو يايوم يناسبكم للمشيه
ام صلاح...كبل المشيه اني مشتريه الذهب
والغرفه وحتى الملابس اني اشتريتهن يوم المشيه اجيبهن وياي
احنا تقلدينا ما نطي للعروس فلوس احنا إنجهزها
امي...ميخالف بعد هي صارت بتكم بكيفكم
ام صلاح ...خوش اتفقنا
سعديه حددو المهر بعد اسبوع
امي ماقبلت احف اله قبل العرس بلمهر ماكو حفافه
عيب من ابوي اخواني
اخذت ثوب من مرت حسين لونه وردي وياا شال وردي فاتح
بس سبحت وتعطرت ومرت حسين خلتلي كحله بعيوني
اجت مشية الزلم
والنسوان اجن بس امه ونسوان اخوته وخالته
جايبات النيشان بجنطه زغيره مو كلش جبيره
طلعن الذهب حلقه وتراجي وكلاده زغيره
كلش خفيفات والمكياج قلمين حمره وقلم كحله
ومعطر واحد وبوادر دشداشتين وثوب سمائي
وشالات ثنيبن وشحاطه ناصيه
وملابس داخليه من كل نوع ثنيين
هو هذا جهازي كله كتلكم جنطة زغيره شلون هاي الرياضيه
سعديه...اني وأهلي ابد مجان همنا الملابس لو الذهب
احنا اهم شي مشترين رجال
رحيم كان عمره ٢٦ سنه من تقدملي
يعتبر جبير لان الشباب بمنطقتنا كلها تزوج بعمر ١٨ لو اكثر شي عشرين هو شعجب باقي لهذا العمر بدون زواج
مااعرف
جمانه السعيدي
المهم عقدولي وعقدو الرحيم
لا دخل عليه ولا شفته امه لبستي الذهب
وخالته هلهلت شويه وطلعو
بس طلعو ابوي اجا باركلي
وشال ٢٠٠ الف كال اشتري اي شي يعجبج
واخواني كل واحد اطاني ٥٠ الف
بس اني شني ميته من المستحه عبالك مسويتلي مصيبه
استحي من ابوي واخواني
راحت امي بعد يومين جابتلي محبس ذهب بلفلوس
الي اخذتهن من ابوي واخواني
وهي اشترتلي بعد دشداشه وشال وعطر
وجنطة ايد بيضه وفرشة جربايه حلوه ست وردي
جان موديلها بوكتها
تحدد العرس بعد اسبوع
لان همه مشترين الغرفه ويردون عرس بسيط
قبل العرس بيوم امي اخذتني البنيه خفافه بمنطقتنا
حتى تحف وجهي
وامي اتفقت وياها تجي ثاني يوم تمكيحني قبل العرس
وجيبلي بدله بيضه وياها وامي تدفع إيجار البدله
امي تكفلت بكلشي لان هما مادفعولنا ربع
فلوس الحفافه والمكياج بيوم العرس وإيجار البدله
من رجعنا من الحفافه امي مشغوله اتسلم على جوارينا وابوهادي شافني
ووجهي احمر صاير من الحفافه
جان كال بصوت عالي
ابو هادي....اخخخخ اخخخخ يلعروسه ياريتي العريس
اله ارجع شباب
سعديه...من سمعته مشيت بسرعه ودخلت للبيت
شويه وامي دخلت وراي
امي..شبيح مو المره سلمت عليح
سعديه. ماشفتي هذا مرض واكف بلباب
امي. .... مرض شنهي مرض
سعديه.. ابو هادي لا يستحي ولا يحسب حساب الجوره
امي ماسمعته شكال
سعديه...يكول ياريتني العريس
امي. خل يولي رجال مريض هذا عده مرض اسمه النسوان
لا تحجين كدام ابوج وأخوانح اخوانج بس يسمعون
يرحون يكتلونه
سعديه...اله تخبلت حتى احجي كدام خواني
بس باجر وراح افتك منه
وبعد مااشوف وجها صارلي خمس سنوات ممنوعه من الطلعه ومحبوسه بلبيت بسببه الله ياخذه ويخلصنا منه
سعديه...اجت البنيه الحفافه ثاني يوم تعجبت بشعري
ثخين واسود وطويله
سوتلي تسريحه كلش حلوه
ومكيجتني مكياج حلو طبعا كل المكياج منها
لان اني مكياجي قليل وعادي
من شافت مكياجي كامت تضحك عليه تكول هذا من حاجه بربع ليش مارحتي انتي اشتريتي
سعديه...سكتت لان اني لا أعرف بلمكياج ولا اعرف منيين يشترونه حتى ماأحب اخلي مكياج
لو ما العرس فلا اخلي شي على وجهي
البنيه خلصت مكياج وبعدها بنص ساعه اجت الزفه
عباره عن سيارتين زغار
وحده اني والعريس وامه وامي كوه انحشرنا بيها حشر
والثانيه جايات بيها نسون اخوته وخالته وعمه
اني طبعا ابد ماشفت شكل العريس
كنت مغطايه ببرنص وعبايه كلشي مااشوف
المهم طلعت وياا صعدنا بلسياره
امه كاعده بلصدر واني ويا وامي كعدنا ورا
جمانه السعيدي
ووصلنا البيتهم البيت حلو وبنائه حديث
مو حديث كلش بس أحدث من بيتنا بهواي
دخلنا للهول هو عافني وطلع
نسوان اخوتي رفعن عني البرنص والعبايه
شويه ودخلوني غرفتي
الغرفه كلش زغيره والاخشاب مبين قديم ومصبوغ
يعني الغرفه يمكن ٣ ونص باربعه ماباقي مكان
واحد يفتر لو يكعد بلكاع
عرسهم كان بسيط ومابي معازيم هواي بس كم واحد من اقاربهم
جابولنا العشى تمن على شعريه وقطعة دجاج
وخبزه احنا اربعه من غير الجهال
زوجات اخوي ثنيينهن وامي واني والجهال ٣
جابولنا بس ٣ مواعين هنا اكلن واني ماكدرت اكل
مو لان الاكل قليل بس اني احس نفسي ما مرتاحه
خوف على قلق على ارتباك
احس مشاعري مخربطه
كملن اكل شويه وكالو راح يزفون العريس
طلعن امي ونسوان اخوتي من الغرفه شويه ودخل العريس
وكفت بس بقيت مدنكه مارفعت عيني علي
رحيم...شلونج
سعديه...زينه
رحيم...اكعدي اخذي راحتج
سعديه...رجعت كعدت
وهو بدل لبس دشداشه وطلع من الغرفه
رجعت عليه امي
امي...شو مابدلتي
سعديه...هسه ابدل ساعدتني امي نزعت البدله
ولبست ثوب ابيض طويل
شويه وامي ونسوان اخوتي راحن
امي كعدت توصيني صيري حبابه ومطيعه الزوجج
لا تفشلينا بتي ارفعي راسنه
سعديه....مااعرف ليش ضجت عبالك الوداع الاخير بيني وبين امي
ودي ارجع وياها البيتنا
من طلعت امي بقيت ابجي
اول مره احس نفسي غريبه وبمكان مو مكاني
يمكن لان اني مااطلع من بيتنا ابد
وما اختلط بلناس احس نفسي مخنوكه
قلقه ومتوتره حيل
ساعه كامله واني كاعده بلغرفه وحدي
الحد مااجا العريس للغرفه بس دخل اني زاد خوفي وقلقي
وبطني كامت توجعني
