رواية ام للايجار الفصل الثاني بقلم جمانه السعيدي
بديت اشتغل بلبدايه كلشي صعب عليه الشغل
لان اني بعمري ماطالعه لأي مكان وحدي
النوب اكعد بلشارع طول النهار
هواي ناس تحاول تستغلني
يعني لويشمرون حجي عليه
لو ياخذ جكاير ويكول بعدين الفلوس لو يشمرون زباله كبال بوسطيتي
بلبدايه جنت اسكت ومااحجي ابد
بس عرفت الي يسكت بهيج مكان ينوكل حقه
ومحد راح يدافع عنه
كل واحد ملتهي بشغله
خومايعوفون شغلهم ويكعدون يمي
كنت ناويه اكعد واسكت وماليه شغل باي احد
بس ولله الي يسكت يتوكل حقه عيني عينك
جمانه السعيدي
الي يستغلني واعرف يريد ياخذ بدون مايدفع فلوس
اخذ منه الجكاير
واكله تدفع بلاول اني ماابيع بلدين ابد
الي يشمر زباله كدام البوسطيه
اجمعه وارجع اشمره كدام المحل مالته
بس كلشي بحدود واحترام
يعني فارضه احترامي على الناس
لا اضحك ولا اسولف وي اي احد الي يسئل اجاوبه على
كد سواله واسكت
الحد ماتعودو عليه وكامو كلهم يحترموني
اخذ وياي بطل ماي واكل من اطلع من البيت
ومرات اشتري لفه اكو عربانه تبيع لفات قريبه على مكاني
واذا اريد للتواليت اكو تواليت قريب
اصيح على ابو حسين ينتبه للبوسطيه علما ارجع
مراح اكللكم شغلي سهل لا بلنسبه الوحده مثلي كلش صعب
راح تكولون شغله سهله ونضيفه تبيعين وتاخذين فلوس مابيه اي مجهود
والكعده طول النهار بلشارع حتى ضهري اتشنج
من الكعده
والشخصيات الزباله الي تشوفيهم بلشارع
راح اكللكم شي حتى امي ماتدري بي
كم وواحد وواحد ناقص اجا يساومني على شرفي
اطلعي وياي ساعه وحده وانطيج شغل يوم كامل
ليش كاعده بلشارع بلحر والبرد
ساعه وطلعين الفلوس الي تحصلين بيوم كامل
كل يوم اصادف كم واحد من هاي النماذج
اغلط عليهم واطردهم بس مااحجي الامي ابد
اكيد راح تكلي عوفي هذا الشغل
اخاف عليج
كنت اكلله كلشي تمام لاتخافين عليه ابد
اريد الدنيا تمشي وياي وبس
جمانه السعيدي
بعد اسبوعين كمنا نشتغل بلكبب والبورك وبسعر بسيط
كلش اخذ وياي عشر مواعين
اول يومين مابعت بس خمس قطع
بس بعدين كمت اخلصهن بسرعه وبديت ازود الكميه اكثر
من ارجع للبيت الكه ماما محضره الحشو وطابخه التمن
ونكعد نلف اني وياها ونخلي بمواعين سفري
واخذه الصبح وياي
تعبت حيل تعبت من كعدت الشارع الشمس والبرد والتراب
كلشي متحمله حتى اعيش بشرف
جمانه السعيدي
هسه راح نحجي عن بطل القصه
اني قصي مواليد ٨٥ هواي يشبهوني لهيثم يوسف
اني هم صوتي حلو من اغني
مرات ادندن بيني وبين نفسي
لو من نجتمع اني وجماعتي
طولي ١٧٥ ابيض ملامحي حلوات
عدنا شركة استراد وتصدير مال مفروشات
نستورد من كل مكان بلعالم
من مصر من ايران من تركيا من ماليزيا
شركتنا كلش قديمه وعدنا فروع هواي
بس أكبر فرع بغداد
بلشورجه بشارع الضمان
اني مزوج بت عمي سودد ازوجنا عن حب
سودد تخبل جماله مامعقول
اني وياها واحد يحب الثاني واحنا زغار
ازوجنا سنة ٢٠٠٨ اهلي واهله من أصحاب الشركات
أمورنا الماديه احسن شي
بس فرحتنا ماكملت ابد
سودد عدها مشكله بلحمل شكد راجعنا وشكد حاولنا
بس رب العالمين مارايد النا يكون عدنا اطفال ابد
بس هذا الشي مانقص حبنا ابد
بلعكس حبنا كل يوم يزيد اكثر واكثر
احنا ساكنين بيت وحدنا
حاولنا نسوي طفل انابيب بس بعدين اني رفضت
هاي الفكره
راح اكللكم ليش رفضت
لان كل التحاليل أكدت سودد ماعدها مبايض
والدكتور صارحني
لازم تكون البويضه من وحده ثانيه
يجيب بويضه من وحده ثانيه ويلقحه بحيمل مني
ويحاول يزرع برحم سودد
احتمال تنجح او تفشل هاي المحاوله لان احتمال رحم سودد مايستقبل الطفل
والشغله بيه خطوره على حياة زوجتي لذلك رفضت
اي رفضت لان وجودها بحياتي احلى من كل الأطفال الي بلدنيا
جمانه السعيدي
اني ادير فرع الشركه الي بلشورجه ومقابيل فرعنا
تكعد سميه بوسطيته المتواضعه
يعني بيني وبينه فرعين شارع ذهاب وشارع اياب
صار فتره اراقبه يوميه الكه نفسي اباوع عليه
اني مكتبي بالطابق الثاني
وصاير على الشارع واكو جام اشوف بي كلشي
الجام صاير على الشارع
تعجبني شجاعته وستره وتحمله الكلشي صعب
وشلون لافه نفسه
وكلشي مامبين منه بس عيونه
بيوم شفته كاعده وخاله كارتون على راسه من الشمس
انطيت فلوس للعامل يروح يشتريله مضله جبيره
وينصبه اله
خطيه مبينه ضروفه صعبه
بلبدايه ماقبلت بس العامل ضل يلح عليه كوه يله قبلت
ينصب المضله
يوميه اكعد اباوع عليه تعجبني شخصيته حيل
اكو هواي يبيعني مو بس هيه
بس مو مثله يجن خالات مكياج ويتحارشن بلرايح والجاي
واكو عليهن سمعه مو تمام ابد
بس هاي البنيه تمام يمكن الصدفه جابته وخلته كبالي
طبعا اني من اطلع بسيارتي افوت من يمه ومن اجي للشغل هم افوت من يمه
لان اكو استداره قريبه عليه استدير من يمه وواصل
للشركه
ام سميه الله يساعدج
سميه هله يمه
ام سميه عساج ماتعبتي
سميه لا كل تعب ماكوووو
ام سميه بعتي اليوم
سميه بلنسبه للبورك كله خلص والكبب بقت بس وحده
رجعته وياي خلي البنات يكلنه عشى النا
ام سميه يايمه ولله جاي اتعبين صاير خط جوه عيونج
سميه بس ارتاح شويه يروح
نسيت ماكتلج هذا صاحب شركة قصي للمنسوجات
اليوم دزلي مضله بيد العمال
ونصبوها اليه
ام سميه بس لا يريد منج شي
سميه ههه شيريد مني مثلا
ام سميه ديري بالج يمه ذوله الناس الي شبعانيبن
ماينطون شي لوجه الله
سميه لا تخافين اي شي يطلب اكله اخذ المضله مااريده
يمه فدوه لاتخافين عليه
اني محد يكدرلي لان رب العالمين واكف وياي
مادام محترمه نفسي
ومااسوي شي غلط لا تخافين عليه ابد
....الله يحفظج من كل مكروه حرامات هاي السنه خلصت
جان هسه باقي سنه وتتخرجين
سميه بس يتعدل وضعنا شويه ارجع مره ثانيه
ام سميه الله يجازيج خير انشاء الله متحملتنا
سميه لاتكولين هيج ماما لو شما اتعب مااجازيكم ابد
...الله يوفقج ويوكفلج اولاد الحلال
سميه امين يارب العالمبن
جمانه السعيدي
تعشينا ولفينا كبه وبورك وسبحت وغسلت ملابسي ونمت
لان كلش تعبانه
قصي ثاني يوم كان ازدحام والسياره وكفت كبال
سميه
كانت كاعده مثل الجبل
رغم عباته صايره ملحه من الشمس
اشرتله سلام
سميه تفضل
...اريد جكاير
...اي نوع
...من هذا
....تفصلي هاي عشره وخلي الباقي اللج
...لا شكرا ما أخذ مساعده كلمن ياخذ حقه
سميه فتحت جنطتي اني لابسته صفح اريد ارجعله الباقي
راسا الاشاره تغيرت ولهورنات اشتغلت وشغل سيارته
سمعت هذا الي بصفي سلم علي
شلونك استاذ قصي
مالحكت اطلع الباقي
رحت سئلته منو هذا
...هذا قصي مدير هاي الشركه الي كدامنه
باوعت السياره فعلا وكفت كبال الشركه ونزل منه
...كتله دير بالك على البوسطيه هسه ارجع
عبرت للجه الثانيه
بس دخلت العمال كالو هااا خير
...اريد استاذ قصي
..شتريدين منه
...اريده بشغل
...واحد صاح اصعدي والثاني كال لا
بعدين كالو اصعدي
صعدت فوك
سميه صباح الخير
قصي تفاجئت جايه وراي
سميه استاذ مالحكت ارجعلك الباقي
قصي اني كتلج الج الباقي
سميه لا شكرا اني اشتغل خير من الله خليته على الميز وطلعت
كل هذا الكلام بدون ماارفع النقاب ابد
قصي تعجبت من ردت فعله رغم العوز الي مبين عليه
بس نفسه عزيزه حيل
وماقبلت تاخذ مني فلوس
رغم اغلب الي مفتحين هنا يدخل بلعين وياخذ فلوس
