رواية عشق للأبد الفصل الثاني
-كريم ممكن تبرر اللي عملته؟!
كان جدي قاعد على الانتريه وهو بيطبطب على زهرة اللي عاملة نفسها بتعيط...بس كنت شايف الشماتة بوضوح على وشها ....اهلي كانوا واقفين وحاطين وشهم في الأرض ....وانا كنت ببص على مرام اللي بتعيط في حضن والدتها ....
بعدت زهرة شوية وقالت وهي بتعيط:
-قولي يبرر ايه يا جدي ...النهاردة ليلة فرحنا ....لما الاقي جوزي حبيبي في حضن واحدة تانية والله يعلم كان ممكن يحصل ايه لو مكنتش لحقتهم .....
بصتلها بغضب فلقيت مرام اتنفضت وبعدت عن والدتها وهي بتصرخ :
-اخرسي قطع لسانك ...انتي واحدة معندكيش أخلاق ....
-انا ...أنا اللي معنديش اخلاق ..اومال مين اللي عنده يا حبيتي. ..انتي ولا ايه ؟!....اومال لو مكونتش قفشتك في حضن جوزي من شوية....هو اللي عنده اخلاق اليومين دوول بيحضن حد ميخصهوش...ده انا الحمدلله اني معنديش الاخلاق دي والله .. .
-اخرسي قولت ....
قالتها مرام بإنهيار وهي بتقرب من زهرة وهتضربها ولكن جدي وقف في وشها وقال:
-زهرة عندها حق يا مرام ...مينفعش اللي عملتيه ده ....أنا لولا عارف ان ده صعب عليكي كان هيبقى عقابك كبير انتي والبيه....كريم دلوقتي متجوز لو سمحتي متخربيش بيته ...
بصت مرام لجدي بصدمة وقالت:
-أنا ...أنا يا جدي هخرب بيته ...أنا ...طيب وهي ايه ...ما هي سرقته مني واحنا مخطوبين ....اغرته لحد ما وقع معاها في الحرام وقدرت تت....
-بس خلاص...ملوش لزوم الكلام ده يا مرام يا بنتي ...اللي حصل حصل ...ودي مكانتش غلطة زهرة بس ...كريم كمان غلط ....وصلح غلطته واتجوز...وانتي كمان جه الوقت انك تشوفي حياتك بعيد عن كريم .. انتي حفيدتي كمان ويهمني مصلحتك!!
مسحت مرام دموعها وقالت ؛
-لا والله كتر خيرك يا جدي ....
وبعدين جريت على اوضتها وهي حاطة ايديها على بوقها وبتعيط. ...أمها راحت وراها وكمان اهلي انسحبوا بهدوء ....مفضلش غيري انا وزهرة وجدي ....بصلي جدي بحزم وقال:
-خد مراتك واطلع اوضتك واياك تقرب من مرام مرة تاني ......
.....
بعد شوية ....
-آه ...
قالتها زهرة وهي بتحاول تبعد ايدي عن رقبتها ....
-انتي بجد شيطانة....شيطانة ......مرادك مش هتنوليه قريب هرميكي برا البيت ده بنفسي .....
ابتسمت وقدرت تبعد ايدي عن رقبتها وبعدين راحت قعدت على الكرسي وهي حاطة رجل على رجل وقالت:
-بس أنا حصلت على مرادي واتجوزتك ...حوار اني اخد قلبك وعقلك كمان مسألة وقت يا كريم متقلقش...
-انتي مثيرة للشفقة.... واحدة معندهاش اهل ....ملهاش أصل ....واحدة تربية ملاجئ زيك متعرفش اصلا اهلها مين طبيعي تكون من غير اخلاق...
الابتسامة اللي على شفايفها ماتت وشوفت لمعان الدموع في عينيها صحيح تبان انها قوية ومفترية بس هي زي اي انسان ليها نقطة ضعف ....وقصة انها اتربت في ملجأ كانت وجعاها اووي ....
أخيرا ابتسمت ببرود وهي بتقول بمرح مزيف:
-مقبولة منك يا روحي ....
وبعدين قامت ودخلت الحمام ....كان واضح انها دخلت تعيط...أنا عمري ما كنت قاسي بس بصراحة مصعبتش عليا خالص ......
.......
تاني يوم ....
روحت من الصبح شغلي في عيادتي كدكتور بيطري ....كان الكل مستغرب من العريس اللي رايح شغله في الصباحية بتاعته بس مهتمتش ....
...
خلصت شغلي وفضلت في العيادة لحد بالليل....
.....
روحت البيت وانا شايف عربيتين قدام بيت العيلة بتاعتنا ...دخلت وانا مش فاهم حاجة....كنت سامع ضحك في صالة البيت .....لقيت زهرة قدامي
بتبتسم بخبث وشماتة
-مين دوول اللي مع جدي
ابتسمت اكتر وقالت :
-جاي للمحروسة بتاعتك عريس !!!
