رواية عشق للأبد الفصل الثالث
حسيت وكأن مية ساقعة اتكبت عليا مكنتش قادر اتنفس وهي بتقولي كده ...كنت شايف أن الدنيا بتتهز بيا ...البنت اللي بحبها اكتر من حياتي هتبقى لغيري ...دمي كان بيغلي وانا بتخيل أنها تكون لغيري...محستش بنفسي غير وانا بدخل الصالة وانا بزعق:
-مرام مش هتكون لغيري...اطلعوا برا .....
ايد جدي اللي كانت ماسكة العصير اتهزت ووقع العصير وبهدل السجادة الغالية ...كان الكل مصدوم واكتر واحدة مرام اللي حطت عينيها في الارض وهي بتعيط...وبتفرك ايديها.....
قام ابو العريس وقال :
-ايه الهزار ده يا هاشم بيه ؟!
قام جدي وهو مش عارف يتكلم بس كان بيبصلي بغل ....
-زي ما ابنك عارف يا جمال بيه أن مرام كانت مخطوبة لكريم بس كريم شاف حاله واتجوز....مفيش حاجة بينهم بس دي لحظة انفعال من كريم .....
-لا يا بيه احنا منقبلش بكده ..بنتكم عندكم ...انا غلطان اني سمعت كلام ابني اللي بيحبها وسمعت لزنه....بنتكم عندكم اهي تقدروا تخلوها جنبكم .....
وبعدين مشيوا بغضب ....
......
بعد ما مشيوا كلهم البيت ولع.....واللي خلى البيت يولع اكتر هي زهرة هي فضلت تنوح لجدي...
-خلاص لو أنا مبقاش ليا أي اعتبار في البيت امشي يا جدي وخلاص...مادام حفيدك مرخصني بالشكل ده...أنا هطلع من البيت ده للأبد....
انفعلت وانا بقول :
-ياريت بقا تغوري من هنا ...ياريت تمشي من هنا ونخلص منك ...
-بس خلاص اخرس خالص وليك عين تزعق يا بجح مش كفاية اللي عملته ... امتى هتكون راجل وتتحمل نتيجة أفعالك ...امتى هتصلح من نفسك ....انطق .....
كنت بغلي وانا بتهزق منه زي العيل الصغير ...في الوقت ده زاد كرهي لزهرة أضعاف ....كنت محتقرها....معرفش ازاي إنسانة تحمل الكم ده من الكره والحقارة .....
بص جدي لمرام وقال:
-أنا عايزك تبعدي عنه يا مرام ...
بصتلي وهي بتعيط بعدين بصوت مكتوم وبتقول :
-ما أنا بعيدة أهو عنه ...أنا حتى وافقت على العريس اللي انت جبته اتخرست خالص ...أعمل ايه تاني ....لو عايزني يا جدي اسيب البيت أنا وماما قولها صراحة وانا همشي .....
قامت زهرة بسرعة وقالت:
-لا مفيش داعي ...أنا اللي همشي ......أما امشي لوحدي واتطلق ..اما كريم يطلع معايا ....
اتكلم جدي وقال:
-مفيش طلاق.....الاسلم زي ما قولتي أنكم تطلعوا برا البيت انتي وكريم ...كريم ومرام مينفعوش يكونوا في نفس البيت ....
دموع مرام نزلت وهي بتفرك ايديها بتوتر...في الوقت ده أنا كرهت جدي ذات نفسه لانه بيتحكم في حياتي بالطريقة دي....قررت اني هطلع مع زهرة بس هعيشها اسود ايام حياتها .....كنت يببصلها وانا بوعدها في سري اني هعيشها في الجحيم ...
-انا موافق على القرار ده يا جدي ....
قولتها بهدوء بس النار كانت جوايا بتزيد ...
