 |
رواية في قبضة الفهد ج 3 الفصل الثاني بقلم جنات
صباح يوم جديد .
فى قصر الفهد .
الكل متجمعين حولين السفرة بيفطرو سوا كالعاده .
الفهد:كل حاجه جاهزة للاجتماع يا زين ؟
زين:كل تمام متقلقش الشباب جهزو كل حاجه .
حنين همست لحياه اللى قاعده جمبها:خلصتى التصميم ؟
حياه:ايوا وانتى .
حنين:خلصته امبارح وانا بنام وربنا يستر حاسه ان الفهد هيعلقنى على باب الشركه .
حسن:اخبار التصميم ايه يا بنات خلصتوه ؟
حياه:ايوا يا جدو خلصتو .
كنان:وانتى يا حنين ايه الاخبار خلصتيه ؟!
حنين:اكيد يا جدو .
ايان بهمس لفهد:كانت بتنام وهى بتخلصه وشكلها بدل ما تصمم منتجع هيكون محل كشرى .
فهد ابتسم .
الفهد:يلا عشان منتاخرش ..... فهد كلم مراد وادم ضرورى يحضرو الاجتماع .
فهد:حاضر .
كل واحد قرب من مراته وباس راسها زى ما الفهد معودهم وخرجو من القصر وركب عربيته وراح على الشركه .
وفهد وايان كل واحد اخد مراته معاه واتحركو .
تمارا:واحنا هنعمل ايه بقااا ؟!
مريم:كالعاده هنشرب قهوتنا الاول وبعد كدا نجهز الاكل .
جنه:انا وزينه هنجهز الاكل النهارده ارتاحو انتو .
جميله:وانا معاكو طبعاا .
زينه:اكيد يا جوجو .
مروة:وهتاكلو ايه بقااا يا حلوين ؟
جميله:على زوقنا بقا يا مرمر يا قمر .
تمارا:طب يلا ابهرونا زى العاده .
جنه وزينه وجميله دخلو المطبخ .
شروق:هقوم اعملنا طقم القهوة .
تمارا:ياريت يا شوشو .
بقلم الكاتبة جنات
ــــــــــــــــ★ـــــــــــــــ
فى ڤيلا ادهم .
الكل كانو بيفطرو سوا .
ادم:فهد كلمنى وقال لازم انا ومراد نحضر الاجتماع لانه مهم .
ادهم:ايوا عمى الفهد قال لازم الكل يحضر .
اسيل:انتى مش نازله المستشفى النهارده يا ديما ؟
ديما:لا يا سولا معنديش حاجه مهمه ناويه اقضي اليوم كله معاكى .
اسيل:ده ايه اليوم الحلو ده .
ادهم:هي قمرايتى لسه نايمه ولا ايه ؟
ديما:اه يا عمو لان اسيل بتقول انها نامت متاخر .
ادهم:اشوفها لما نيجى بقااا .... يلا يا ادم .
ادم:يلا .
بقلم الكاتبة جنات
ــــــــــــــــ★ـــــــــــــــ
فى شقه مراد وسيلا .
سيلا:يا مراد يلا هنتاخر على الاجتماع .
مراد خرج من الاوضه:خلصت يا حبيبتى خلاص .
سيلا:لسه هنعدى على ماما عشان نسيب يزن معاها .
مراد:مش هنتاخر يا حبيبتى وبعدين ڤيلا فى طريقنا يلا .
مراد وسيلا خرجو من الشقه ونزلو ركبو العربيه وراحو ڤيلا ادهم وسابو يزن مع اسيل وراحو الاتنين على الشركه .
بقلم الكاتبة جنات
ــــــــــــــــ★ـــــــــــــــ
عربيه فهد وحياه وصلت قدام الشركه .
فهد:انزلى يا حياه هركن العربيه وهحصلك .
حياه:حاضر .
حياه نزلت من العربيه ودخلت الشركه والاسانسير لسه هيقفل حطت ايدها عشان يفتح تانى ولسه هتركب الاسانسير وقفت لما سمعت حنين بتنادى عليها بصوت عالى .
حياه:فضحتينا يا بنتى ايه الصوت ده .
حنين:اركبي يا ختى اركبي .
حياه ضحكت ودخلو الاسانسير الاتنين وماكنوش شايفين اللى واقف وساند على المرايا وعينه عليهم من اول ما حياه وقفت الاسانسير .
حنين:ورينى تصميمك بسرعه .
حياه:ليه ؟!
حنين:ورينى بس .
حياه طلعت التصميم:اتفضلى .
حنين:يا لهوى على الجمدان ده حلو اوى يا حياه .... متاكده ان الفهد هيختاره .
حياه:متبقيش واثقه اوى كدا ده كل المهندسين هيتقدمو التصميم بتاعهم .... وبعدين مش الفهد اللى هيختار صاحب المنتجع اللى هيختار التصميم اللى هيعجبه .
حنين:انا لو الفهد شاف التصميم بتاعى احتمال يعلقنى على باب الشركه .
حياه ضحكت وحنين كمان ووقفو ضحك لما سمعو رنه فون والاتنين بصو للى واقف وراهم وبصو لبعض ازاى كانو اخدين راحتهم اوى كدا ومش اخدين بالهم من اللى واقف وراهم .
البنات بصو قدامهم والصمت كان سيد الموقف لحد ما الاسانسير وقف فى الدور المطلوب وخرجو بسرعه راحو على اوضه الاجتماعات .
حنين:مين الراجل الغامض الصامت ده ؟!
حياه:احنا مالنا يلا ندخل .
جاد ابتسم وخرج من الاسانسير وسال على مكتب الفهد .
والسكرتيرة قالت للفهد اللى سمح لجاد يدخل .
جاد دخل المكتب:اهلا بالفهد .
الفهد سلم عليه:ازيك يا باشمهندش جاد .
جاد:بخير .... ليا الشرف انى اتعرف على حضرتك .
الفهد شاور على حسن اللى قاعد على الكرسي:ده حسن شريكى فى الشركه ومن العيله .
جاد سلم على حسن:اتشرفت بمعرفتك .
حسن:اهلا وسهلا .
الباب خبط ودخلت السكرتيرة:غرفه الاجتماعات جاهزة وكل المهندسين منتظرين حضرتك يا فهد باشا .
الفهد:تمام روحى واحنا هنيجى ..... يلا يا جاد .
خرجو وراحو على اوضه الاجتماعات اللى كان فيها كل عيله الفهد متجمعين والمهندسين اللى مجهزين تصميم للمشروع .
الفهد دخل وقعد على راس تربيزة الاجتماعات الكبيرة والكل انتبه ليه والصمت حل فى المكان كله .
الفهد:طبعا كلكو عارفين اهميه المشروع ده ... وانا حبيت اخلى المهندسين الجداد هما اللى يصممو المنتجع .... وده زى اختبار ليكو اكيد .... بس الاول خلينى اعرفكو على الباشمهندس جاد ... وهو صاحب المنتجع اللى هتكون شركتنا مسؤله عن انشاؤه .
حنين بهمس لحنين:احييه بقا الراجل الغامض ده هو صاحب المشروع .
حياه:اسكتى .
جا:طبعا انا مبسوط جدا بتعاملى مع شركه كبيرة زى شركه الفهد .... المنتجع ده مهم جدا بالنسبالى .... وكان ممكن اى شركه من شركاتى بتصممه بس انا حبيت يكون فى تعامل مع شركه الفهد .
كنان:واحنا اكيد شرف لينا نتعامل معاك ... شاب فى سنك وعامل النجاح ده كله ماشاء الله .
الفهد:خالونا نبدا نشوف التصاميم .
زين:تمام .
بدأ المهندسين كل واحد يعرض تصميمه على الشاشه الكبيرة الموجوده فى الاوضه ويشرحه بتفاصيل .
وجاد مركز مع كل كلمه بيقولوها المهندسين ويدون ملاحظاته على كل مشروع .
لحد ما جه دور حياه اللى بدات تشرح تفاصيل تصميمها بكل ثقه وعيون العيله كلها عليها وخصوصا عيون جاد اللى متابعها من اول ما دخل اوضه الاجتماعات .
حياه خلصت وقعدت مكانها وبصت لفهد اللى ابتسملها بحب .
جاد شافها بتبتسم اوى وعينه جت على فهد اللى بيبتسملها اوى .
بعد ما الكل خلصو عرض تصميمهم .
راكان:الوقت الاختيار فى ايدك يا جاد .
زين:انت تقدر يا جاد تاخد معاك التصاميم وتقرر على راحتك .
جاد:مالوش داعى انا قررت انهو تصميم خلاص .
حسن:بالسرعه دى !
جاد:شغلنا فى مجال الهندسه عملنا نختار الانسب والاحسن لينا .
كنان:وانت اختارت انهو مشروع .
جاد فضل يقلب فى التصاميم اللى قدامه وطلع تصميم:اختارت ده .
حنين بهمس:العب يا معلم ده تصميمك يا حياه .
جاد:ده انسب تصميم وقريب جدا للمواصفات اللى كنت حاططها للمنتجع يا فهد باشا .
حياه كانت فرحانه جداا .
جاد:واتمنى المهندس اللى صمم المشروع هو يكون مسؤل عن تنفيذيه كمان .
اسر:ده تصميم الباشمهندسه حياه .
فهد:احنا عندنا المهندسين اللى بيشرفو على اى مشروع شرط يكونو رجاله صعب البنات يروحو مواقع البناء .
زين:ممكن حياه تشرف على المشروع من الشركه يا فهد مش شرط تكون موجوده فى الموقع لانه صعب يا جاد .
جاد:انا ماكنتش اعرف ان صاحب التصميم بنت .... بس المهم ان التصميم عاجبنى جدااا ..... دلوقتى ممكن نتكلم فى المشروع الاساسى اللى انا جاى عشانه .
الفهد:اكيد .
الفهد شاور لزين اللى طلب من كل المهندسين يخرجو وفضل افراد العيله .
مراد بهمس لادم:الواد ده غامض وغريب .
ادم:هو غامض ... بس اللى اعرفه عنه انه قليل الكلام وكثير الفعل يا معلم .
جاد:انا تقريبا ليا شركات فى بلاد كتير حول العالم .... بس فى الفترة الاخيرة فكرت كتير انه ازاى ماليش شركه فى بلدى ام الدنيا .... عشان كدا انا كنت حابب اسس فرع لشركاتى هنا فى اسكندريه ... وبتمنى تكون من تصميم شركه الفهد .... ومش بس كدا انا حابب يكون فى تعامل واتفاق دايم ما بينا .
الفهد بص لحسن عشان يتكلم:اكيد يا جاد ده خطوة ممتازة ليك .... وكمان البلد هنا اكيد هتستفاد من خبراتك فى مجال الهندسه .
جاد:وده اللى انا بتمناه ..... وبتمنى كمان الشركه تكون جاهزة فى اسرع وقت .... وياريت الباشمهندسه حياه تكون صاحبه التصميم .
حياه والكل اتفاجو من طلبه بس كانو فخورين بيها جدا .
الفهد:اكيد يا جاد .... ممكن تبقي تقول لزين او فهد على الاساسيات اللى محتاجها فى تصميم الشركه وحياه هتبدأ تشتغل عليها .
ادهم:وبالنسبه لعقود .... اكيد لما تكون الشركه جاهزة هيتم التوقيع .
راكان:سيلا يا ريت تجهزى الحسابات .
سيلا:تمام
جاد قام وقف وهو بيقفل زرار جاكيت البدله بتاعته:تمام ..... هستاذن انا .
جاد سلم على الكل وخرج من اوضه الاجتماعات .
اسر:مبروك يا حياه .
حياه:الله يبارك فيك يا بابا .
الفهد:متتخليش انا فخور بيكى ازاى يا حياه .... وحنين ياريت بعد كدا تكونى دقيقه فى تصاميمك اكتر من كدا .
حنين:اكيد يا جدو انا اسفه .
الكل باركو لحياه وخرجو من اوضه الاجتماعات وفضل الشباب والبنات الصغيرين .
ايان بص لمراته:دايما فضحانا كدا يا بنتى .
حنين:الله مافى ناس قدمو تصاميم اقل من بتاعتى بكتير .
فهد بص لمراد وادم اللى مش مراكزين معاهم اصلا:فى ناس موجودين هنا على عينهم .
مراد:ياعم انا مالى بالهندسه والتصاميم وكل ده .
ادم ضحك:ابقا روح قول للفهد لو جدع .
مراد:ما تقول انت يا خفيف .
سيلا:خلاص انتو هتتخانقو .
ادم:بس غريب جاد ده اوى .
ايان:غريب ازاى يعنى .
مراد:صح ده واحد عنده شركات فى كل حته تقريبا ... ليه لما يفكر يصمم منتجع بالاهميه دى يلجأ لشركه الفهد ده حاجه مش عاديه ولا ايه.
فهد:هى كانت تبقي مش عاديه ... لو شركتنا اقل من شركاته ... بس شركه الفهد صوتها مسمع زى شركاته واكتر كمان .
ايان:فهد معاه حق ... شركه الفهد مش قليله يعنى .... ولا احفاد الفهد وحياتك .
مراد:انتو ناوين تباتو هنا ولا ايه .
سيلا:يلا كل واحد على شغله .
الكل خرجو وفهد قرب من حياه وباس راسها:حبيبي اللى رافع راسي وراس العيله كلها .
حياه:مبسوطه اوى يا فهد اوى .
فهد:انتى تعبتى على التصميم يا حياتى ... وبصراحه محدش قدر ينافسك فى جماله .
حياه:الحمدلله ... هروح مكتبي بقا .
فهد:روحى .
بقلم الكاتبة جنات
ــــــــــــــــ★ــــــــــــــ
فى مكتب الفهد اللى حسن وراكان قاعدين معاه .
الفهد:خلى زين او فهد يبقو مع حياه يا حسن فى المشروع ده .
راكان:ليه يا فهد هو انت شاكك فى حاجه من ناحيه جاد ؟!
الفهد:مهما كان ده شخص غريب عننا وانا متعودتش اعطى لاى حد الثقه الكامله .
حسن:بس جاد شخصيه معروفه يا فهد .... كل الشركات تقريبا بيحسدونا على الاتفاقيه دى وان بتعاملنا مع جاد شركتنا هتترفع لفوق .
الفهد رجع ضهره على الكرسي واتكلم بثقة:شركه الفهد مش محتاجه اتفاق مع اى حد عشان تترفع لفوق يا حسن .... هو اللى من حسن حظه انه بيتعامل مع شركه الفهد .
راكان:طبعا هو احنا اى حد ولا ايه .
الباب خبط ودخل زين واسر .
زين:المكتب الخاص بجاد بقا جاهز .
اسر:والعقد الخاص بالمنتجع كمان بقا جاهز وواقف على توقيعه .
الفهد:تمام يا شباب .
الباب خبط ودخل ادم ومراد .
مراد:فهد باشا احنا هنمشي احنا بقاا .
حسن:مستعجلين اوى يعنى .
ادم:انت عارف يا جدى اننا ملناش فى الجو ده وبنيجى غصبن عننا .
راكان:لا وكمان جريئ اوى يالا .
ادم:مش تربيه الفهد .
الفهد:طول مانتو فى اجازة تيجو الشركه وكلامى مش بحب اكرره ... مفهوم .
ادم ومراد:مفهوم يا باشا .
حسن ضحك:محدش بيقدر عليكو غير الفهد .
بقلم الكاتبة جنات
ــــــــــــــــ★ــــــــــــــ
بليل الكل رجعو على القصر وكانو الماميز مجهزين الغدا والكل اتجمعو مع بعض حولين السفره واتغدو سوا .
وبعدها كل واحد طلع مع مراته على اوضتهم .
بقلم الكاتبة جنات
ــــــــــــــــ★ــــــــــــــ
فى ڤيلا جاد .
جاد دخل الڤيلا وكانت فى استقابله واحده من الخدم:حمدلله على السلامه يا جاد بيه ... تحب اجهزلك العشا .
جاد:لا شكرا .
جاد طلع جناحه ودخل اخد شاور وخرج قعد فى بلكونه جناحه الكبيرة .
وجه على باله حياه بكل حركه وكلمه قالتها وقام دخل الجناح وفتح اللاب بتاعه على صور التصميم اللى هى عملته.
جاد ابتسم وقفل اللاب وحطه على الكمود عشان ينام .
بقلم الكاتبة جنات
ــــــــــــــــ★ــــــــــــــ
تانى يوم فى شركه الفهد اللى قاعد فى مكتبه والباب خبط ودخلت السكرتيرة الخاصه بيه:مستر فهد الباشمهندس جاد برا وحابب يدخلك .
الفهد:خليه يدخل .
السكرتيرة خرجت وسمحت لجاد يدخل .
جاد:صباح الخير يا فهد باشا .
الفهد سلم عليه:صباح النور اتفضل يا جاد .
جاد قعد على الكرسي .
الفهد:مكتبك بقا جاهز لو حابب تشوفه اخلى السكرتيرة توصلك ليه .
جاد:شكرا يا فهد باشا ... انا وانا بدرس التصميم بليل حبيت انى ازود شويا حاجات عليه .... فكنت عايزة اشوف الباشمهندسه حياه عشان ترجع تظبطه ممكن .
الفهد:اكيد ممكن .... حياه اكيد الوقت فى مكتبها تقدر تسال السكرتيرة على مكتبها .
جاد قام وقف:تمام عند اذنك .
الفهد:اتفضل .
جاد خرج من المكتب والفهد بعت مسدج لحفيده فهد يقوله يروح مكتب حياه عشان متبقاش لوحدها مع جاد .
بقلم الكاتبة جنات
ــــــــــــــــ★ــــــــــــــ
فى مكتب حياه اللى قاعده بتشتغل على تصميم جديد .
الباب خبط .
حياه:اتفضل .
جاد فتح الباب:ممكن ادخل يا باشمهندسه ؟
حياه قامت وقفت:اكيد اتفضل يا باشمهندس .
جاد مد ايده عشان يسلم على حياه اللى اتوترت ومدت ايدها تسلم عليه وسحبت ايدها بسرعه وشاروت على الكرسي:اتفضل يا باشمهندس .
جاد قعد وحياه كمان .
حياه:حضرتك تحب تشرب ايه ؟
جاد:قهوة ساده .
حياه رفعت السماعه وكلمت السكرتيرة:لو سمحتى يا رحمه هاتى فنجان قهوة ساده بسرعه .
حياه نزلت السماعه وبصت لجاد اللى مركز مع كل حركه هى بتعملها
حياه:خير يا باشمهندس ؟
جاد:بصراحه انا كنت بدرس التصميم بتاع المتتجع امبارح وفكرت انى اضيف شويا حاجات على التصميم ... ممكن ؟
حياه:طبعا ده حقك .
الباب اتفتح ودخل فهد:ماكنتش اعرف ان عندك حد يا باشمهندسه .
فهد بص لجاد:اهلا باشمهندس جاد اخبارك ايه ؟
جاد سلم عليها:بخير يا فهد .
حياه بصت لفهد اوى:اتفضل يا فهد ... الباشمهندس كان حابب يضيف شويا حاجات على التصميم .
فهد:اه اكيد ... كان ممكن تبعت اللى حضرتك عايزه على الايميل الخاص بالشركه وكان هيوصل لحياه .
جاد:انا بحب تعاملى يبقي شخصى مش بحب جوا الايميلات .
حياه:طب حضرتك ممكن تقولى ايه الاضافات وانا اكيد هضيفها على التصميم النهائى .
جاد:اكيد .
حياه مسكت قلم ونوت خاص بيها وبدات تدون كل اللى جاد بيقوله .
فهد كان عينه على جاد وملاحظ انه مش بيبص على حياه ابداا وبص على حياه اللى مركزة فى الكتابه وابتسم .
جاد:دى كل الاضافات يا باشمهندسه .
حياه:تمام ... لحظه .
حياه مسكت ورقه رسم كبيرة وبدات ترسم بشكل سريع .
بعد دقايق معدودة حياه مدت ايدها بالورقه لجاد اللى انبهر بمهاراتها فى الرسم .
جاد:بجد تسلم ايدك يا باشمهندسه حياه ... ده اللى انا عايزه بظبط ..... بجد اول مرة اشوف مهندسه بخبرة ومهارة دى .
فهد ابتسم وقام من مكانه وقرب من حياه اللى وقفت جمبه:طبعا لازم تكون بشطارة والمهارة دى ببساطه لانها من عيله الفهد .
جاد باستغراب:من عيله الفهد !
فهد ضم حياه ليه:حياه تبقي حفيده الفهد بذات نفسه .... وكمان مرات حفيد الفهد اللى هو انا .
جاد:مراتك !
فهد:ايوا مراتى يا باشمهندس .
جاد قام وقف:ماكنتش اعرف انها من العيله بس كان لازم اعرف ده لوحدى لان ماشاء الله افراد عيله الفهد كلهم على كفاءة عاليه جدا فى شغلهم .... وعلى العموم انا اتشرفت بيكو جداا .... استاذن انا .
فهد:اتفضل يا باشمهندس .
جاد خرج من المكتب وراح على المكتب الخاص بيه وبعدها خرج من الشركه كلها ورجع على الڤيلا بتاعته ......
