رواية عشق للأبد الفصل الرابع 4 بقلم سولييه نصار

سيبت بيت العيلة...البيت اللي كان فيه ذكريات بيني وبين مرام كتير ...كان قلبي بيتعصر وانا شايف مرام والدموع في عينيها ...كانت بتودعني من بلكونة البيت ...وقتها قررت ان مهما حصل أنا هتجوز مرام...أنا مش هسيب زهرة هي اللي تكسب......

   .....

نقلنا في شقة كان جدي هو اللي جابها ...كانت شقة واسعة وكان واضح سعادة زهرة بيها ...السعادة المؤقتة بتاعتها اللي ناوي أقضي عليها نهائيا.......كنت ببصلها بكره وانا شايفاها بتدور بسعادة في البيت ....كنت ببصلها بكره كبير وهي يتضحك وبتدور :

-بجد البيت يجنن يا كريم ...كان نفسي في بيت زي ده دافي من زمان 

-متفرحيش اووي يا زهرة لأني قربت هرميكي من البيت ده ...بعد  ما جدي  يعرف حقيقتك هطردك وأرجعك الشارع مكانك الاصلي....تعرفي دلوقتي عرفت ان اهلك كان عندهم حق يرموكي في الملجأ ... شيطانة زيك ده مكانها الحقيقي ...

محستش بالشفقة وانا بشوف الدموع بتلمع في عينيها ... بس قدرت تتدارى ورا قناع الجليد بتاعها وقالت :

-مقبولة منك يا ورحي ....

وبعدين راحت ناحية الحمام تعيط كالعادة .....

ابتسمت بتريقة وروحت انام...وانا مقرر خلاص ...أنا سكتت كتير وخضعت لجدي بس مش بعد النهاردة...أنا قررت مسكتش تاني ابدا.....عشان كده اللي في مخي هعمله ....

.....

تاني يوم .....

وقفت وانا مربع ايدي فوق رأس زهرة...كنت لابس وجاهز ...فتحت عينيها وفجأة شهقت وهي شايفاني قدامها.…...

-بسم الله الرحمن الرحيم ....ايه اللي موقفك فوق راسي بالشكل ده ..

ابتسمت بتريقة وقولت بأمر:

-جهزي نفسك هنروح لجدي ....

-نعم وده ليه ...

طلعت من الاوضة وانا بقول ببرود:

-قولت البسي مش هكرر كلامي ....

.....

في بيت جدي ....

كان الكل متجمع اهلي وام مرام ومرام وجدي وانا وزهرة ....

-خير يا كريم عايز ايه ؟!

قالها  جدي بهدوء شديد بس عينيه كانت بتبرق بعضب شديد

-أنا سمعت كلامك كتير يا جدي .....زهرة وقعتني واتبلت عليا ان حصل بيننا حاجة بس انا عارف وهي كمان أنه محصلش ...بس حضرتك اختارت تصدقها هي ....واختارت تكسر قلبي وقلب مرام عشانها...فضلت تربية الملاجئ دي عليا ...وده ليه عشان بنتك المفضلة اختارت تتبناها اعتبرتها حفيدتك خلاص !!!انت بتخليني اسمع الكلام بتاعك وبتهددني انك هتحرمني من فلوسك ..وانا معنديش مانع ...خلاص مبقتش عايز فلوسك ...وانا هطلق زهرة.....

جدي أنصدم بس زهرة كانت ملامحها باردة ...مهتمتش وبصيت لمرام وانا بمد ايدي وبقول:

-انا هتخلى عن فلوس جدي ...هتخلى عن كل حاجة ....مش عايز غيرك انتي ...تعالي معايا يا مرام !!