رواية جريمة عائلية الفصل الثالث بقلم محمود الأمين
واحد واقع على الارض، وفي حاجه بيضة نازله من بوقه قربت منه عشان اشوف ماله، لكن كان خلاص مات
رجعت خطوتين لورا، وعرفت ان الشخص ده على الاغلب يعني ميت مسموم، على طول طلبت رجاله الطب الشرعي والمعمل الجنائي عشان فحص مسرح الجريمه والجثه وطلبت من الرجاله ماحدش يلمس اي حاجه لحد وصول المعمل الجنائي
اتمشيت في الشقه شوية، ولمحت في المطبخ فنجانين قهوة.. وقدام المطبخ كانت في اوضه نوم مفتوحة، دخلتها بحرص ومن اللي شوفته جوه الاوضة عرفت ان الراجل ده كان معاه واحده هنا
وبعد شويه وصل رجاله الطب الشرعي والمعمل الجنائي، وبداوا يشوفوا شغلهم، لحد ما لقيت واحد من رجاله الطب الشرعي بينادي عليا وبيقول
_ لقينا معاه محفظته يا فندم، وفيها بطاقه باسم عاطف علي حمدان
وبكده اتاكدت ان هو ده عاطف، اللي كنا بندور عليه، واضح انه شريكه في الجريمة شافني بقرب منه فقال يخلص عليه، وبعد ما تم رفع البصمات فتشنا الشقه كويس واللي لقيته في مكتب عاطف كان كارثه بكل المقاييس
لقيت ورق، الورق ده بيقول ان عاطف واللي كان معاه شغالين مع ناس من بره البلد، واضح ان الناس دي من موقع الديب ويب
لكن مش باين في اي بيانات، الورق ده كان عباره عن تحويلات ماليه كبيره جداً من الناس دي لعاطف، ولقيت كمان فلاشة شغلتها على الكمبيوتر الخاص بعاطف ولقيت عليها شرح مفصل لتشريح الجثث، واضح ان عاطف ما كانش عنده اي خبره في الموضوع وعشان كده الناس دي كانت بتقوله تعمل ايه
من الحاجات اللي كانت مختفيه ومش موجوده هي تليفون عاطف، واضح ان اللي خلص عليه اخفى كل دليل ممكن يدينه
بعد ما خلصنا شغلنا رجعت على مكتبي وانا راسي هتنفجر من الصداع حرفيا، الموضوع ما طلعش سهل، عشان كده كنت متوقع اول ما هوصل المكتب هيجيلى استدعاء لمكتب العميد زكريا، قومت من على مكتبي واتحركت على مكتب العميل زكريا، دخلت وطلب مني اقعد، واتكلم وقال
_ طبعا انت عارف ان الموضوع كده اختلف، في البداية كان الموضوع مجرد جريمه قتل عادية من اللي بتحصل كل يوم، وحصل جرايم اصعب من دي بكتير كان اخرها جريمه شبرا الخيمه، بس احنا بنعيش دلوقتي نفس التفاصيل بتاعت الجريمه دي تاني، والموضوع اتكرر وده دليل ان الناس دي مش بتخاف، واللي حصل ده هيتكرر تاني وتالت وعاشر، طول ما في ناس مغيبه بتصدقهم
عشان كده احنا لازم نوصل لشريك الشخص اللي اتقتل ده، اكيد هو عنده تفاصيل هتفيدنا جداً في القضية
=اسمحلى يا فندم، ممكن تكون واحده مش واحد، انا لما دخلت اوضه نوم عاطف، شوفت لبس واحده ست جوه، وبالتحريات اللي عملناها عليه، عاطف مش متجوز أصلاً وده معناه انه كان على علاقه بواحدة، وهي اللي خلصت عليه وهربت قبل ما يتكشف امره وامرها
_ هو تحليل منطقي، بس انت بنيت التحليل ده عشان لبس الست وبس؟!
= لا يا فندم، الطب الشرعي قال ان التشخيص المبدئي هو تسمم، وده باين من شكل الجثه واللي هيأكده التشريح، ولما بصيت في المطبخ كان في فنجانين قهوة وكانوا لسه مشروبين معنى كده وانه بنسبه 90% التسمم حصل بسبب القهوة، ومين عنده الوقت والصلاحيه انه يقف ويعمل القهوه في شقه عاطف، ما اهو مستحيل يا فندم ضيف هو اللي قام عمل القهوه اكيد حد عنده صلاحيه يدخل المطبخ ويعملها
_ كلامك منطقي برده بس كله مبني على استنتاجات، استنى لما تقرير الطب الشرعي يخرج ووقتها نشوف هل كلامك صح ولا لا؟
= تمام يا فندم
...
رجعت على مكتبي وانا بفكر، مين الشخص التاني؟
من كتر التعب نمت وما حسيتش بنفسي وانا قاعد على كرسي المكتب، صحيت على رنه تليفوني وكانت اللي بتتصل الست صابرين واول ما فتحت الخط قالت وهي بتعيط
_ اسامه كان متجوز عليا يا باشا، رجع مراته الاولانيه بعد ما طلقها
= مراته الاولانيه؟!.. هو مش انتى مراته الاولانيه برده يا ست صابرين؟
_ لا يا باشا هو كان متجوز قبلي واحده اسمها نعمة، بس طلقها بسبب انها مش بتخلف ومن كام شهر لقيتها قدام باب شقتي جات وهددتني بالقتل ما اعرفش ليه في الوقت ده بالذات، وفي الوقت ده شافت الواد، وكانت بتبصله بغيظ، هي اللي قتلت ابني يا باشا انا متأكدة
= بصي يا ست صابرين، الموضوع ملهوش علاقه انتي متاكده ولا لا؟.. دي تحريات وادله وتحقيقات هي اللي بتبين مين اللي عمل كده؟.. اهم حاجه دلوقتي انك ما تحسسيش جوزك باي حاجة، وانا هعمل تحريات عن الست دي وتاكدي لو هي اللي عملت كده انا مش هسيبها وهنقبض عليها
_ حاضر يا باشا
...
قفلت مع الست صابرين بعد ما اخدت منها اسم الست اللي قالت عليها اللي اسمها نعمه ثلاثي وكلمت نبيل من البحث الجنائي وطلبت منه تحريات شامله عن الست دي، اكيد هي اللي عملت كده في الواد وهي اللي كانت مع عاطف
وبعد يومين اتاكدت شكوكي لما ظهر تقرير الطب الشرعي وطلع عاطف اتقتل بالسم الزرنيخ، والكميه اللي كانت محطوطه في كوبايه القهوة قادره انها تقتله في وقتها وكالعاده تقرير البصمات ما فيهوش اي بصمه لحد غريب في الشقه البصمات كلها بصمات عاطف كانت حاجه غريبه فعلاً
بس في الوقت ده لقيت نبيل جاي وبيقولي على حاجه غريبه جداً
_ فاكر يا باشا كلام رحيم في النيابة اللي قاله على الست صابرين انها كانت بتتعالج نفسيا
= ايوه فاكر
_ ده طلع بيتكلم جد مش بيهزر ولا بيحاول يرمي بلى، الست صابرين كانت بتتعالج في مصحه نفسية بسبب ان جوزها الاولاني وقع من البلكونه ومات قدام عينيها، واسامه اتجوزها بعد خروجها من المصحه ب3 شهور
= هي معلومه مهمه طبعاً، بس عملت ايه في التحريات اللي انا قولتلك عليها اللي تخص الست نعمه
_ دي هنا المفاجاه بقى الحقيقيه يا باشا، واللي هتحل لغز القضيه ده، الست نعمة كانت مدرسه في نفس المدرسه اللي كان فيها الاستاذ عاطف بس بصراحه التحريات ما اظهرتش اي علاقه ما بينهم بس اكيد مش صدفه يا فندم
= انت لما قلت مفاجاه هتحل القضيه، كنت مستني منك انك تقولى ان كان في علاقه ما بينهم
_ ما انا جايلك في الكلام يا باشا، اسامه شاف نعمه في المدرسه وفي نفس الوقت عاطف كان صاحبه ولما كلمه عليها عاطف راح مع اسامه وهو بيتقدم لنعمه يعني نعمه تعرف عاطف كويس كان مدرس معاها وهو اللي مجوزها لاسامه
= يعني في احتماليه كبيره ان هي اللي كانت معاه
_ ممكن يا باشا وليه لا؟
= بس يفضل السؤال المهم، ايه اللي جاب الدبله بتاعت رحيم في الشقة اللي اتقتل فيها الولد
_ مش عارف يا باشا، القضيه دي فيها سر فيها حاجه مش مفهومة حد بيلاعبنا
= هنوصل ما تقلقش، مهما حصل هنوصل
...
قام نبيل وخرج، وشويه والباب خبط ولقيت العسكري بيقولي
_ الاستاذ اسامه عاوز يقابلك يا باشا
= خليه يدخل
دخل اسامه وكان باين عليه الزعل، واتكلم وقال
_ انا عرفت مين اللي قتل ابني، وجاي عشان اقدم بلاغ رسمي في اللي قتله
= مين اللي قتله؟
_ لما حضرتك لقيت دبلة رحيم فى الشقه اللي اتقتل فيها ابني، كنت زي المجنون مش مركز، بس لما قعدت وهديت افتكرت ان انا اللي اخدت الدبله دي من بيت اخويا عشان وجود اي ذكرى من مراته كانت بتتعبه نفسيا، ولما هديت افتكرت الدبله دي كانت مع مين واكيد هو اللي رماها في مسرح الجريمه؟
= مين يا اسامه؟
_اللي قتل ابني يبقى.
