رواية عشق للأبد الفصل الخامس
كنت مادد ايدي ....ببصلها برجاء انها تمسك ايدي ...تبكي معايا ...بس هي كانت واقفة مصدومة وهي بتبصلي .... بعدين بصت لجدي وأمها بتوتر وبعدين بصتلي وهي بتقول بصوت مهزوز:
-لا مش هروح حتة معاك ....انت متجوز خليك مع مراتك .....
وشي شحب وانا ببصلها ....حسيت نفسي انكسرت لما رفضتني ...شوفت الشماتة في عيون زهرة وابتسمت بتريقة عليا ....كنت حاسس بالصدمة ..لسه مادد ايدي ....الدموع حرقت عينيا وانا ببصلها بصدمة كبيرة .....
جدي رفع راسه وقال:
-اظنك سمعت اهو...مرام قررت تحترم نفسها وعرفت أنك رجل متجوز يارب...عقبالك ما تحترم نفسك وتعرف أنك راجل متجوز وتحترم مراتك اللي انت مش عاملها أي اعتبار ودايما تكسر فيها !!!
.....
بقلب مكسور روحت لبيتي الجديد أنا وزهرة.....
قعدت زهرة على السرير وهي بتهز رجليها وبتبتسم وقالت:
-غريب ان مرام جبانة ومعندهاش نفس الشجاعة اللي عندك ....أنا لو منها استغل الفرصة وامسك ايديك وميهمنيش أي حد ...بس متزعلش يا بيبي...هي كسرت قلبك وانا هصلحه ....
كنت معمي من الغضب محستش بنفسي غير وانا بقرب منها وبخنقها جامد .....زقتها ناحية السرير وانا خانقها بغل .....كانت بصالي بصدمة وعينيها مدمعة ....الغريبة أنها مكانتش بتقاوم ...حسيت انها انفصلت عن الواقع .....بعدت ايدي عنها وانا ببصلها بحيرة حاستها لسه منفصلة عن الواقع ...مكانتش معايا خالص ...
-زهرة !!
قولتها بحيرة بس مردتش عليا.....كنت اول مرة تكون قريب منها بالشكل ده ...وشي كان قريب من وشها ..اول مرة اشوف انها جميلة بالشكل ده ...ملامحها كانت اجمل ملامح اشوفها في حياتي ....من غير ما أحس لمست وشها وقربت منها .....فجأة كان وعيها رجع ....زقتني وهي بتصرخ لحد ما وقعتني على الأرض :
-لا متعملش كده ...ابوس ايديك متعملش كده....
كنت ببصلها بصدمة وانا على الأرض فهي حطت ايديها على وشها وقعدت تعيط .....فضلت تعيط لدقيقتين تقريباً ...وانا في مكاني متسغرب ....فجأة بطلت عياط وقامت قعدت على السرير وهي بتبصلي بخوف:
-متعملش كده تاني .....
قالتها وقامت بهدوء وجريت على الحمام ....
قومت وانا متضايق وطلعت برا البيت وانا بسأل نفسي ايه العبط اللي عملته ده !!
....
مر يومين .....
وقدرت اقنع مرام اخيرا تقابلني .....
كنا قاعدين في الكافتيريا بتاعتنا وببصلها بلوم وبقول:
-انتي كسرتيني يا مرام .... كسرتيني لما رفضتي تمسكي ايدي ....أنا كنت مستعد اتخلى عن الكل عشان خاطرك ....كل الفلوس والعز اللي أنا فيه ....
-عايزهم يقولوا عني خطافة رجالة !!!
-الكل عارف ان الوحيدة اللي خطافة رجالة هي زهرة مش انتي خالص ....خروجنا مع بعض من بين العيلة واعتمادنا على نفسنا هيثبتلهم ده وانا وقتها هقول كل الحقيقة ومش هيهمني جده ولا غيره ...بس انا محتاجك عشان اعمل كده ...محتاج ايديك تكون في أيدي !
-ماشي بس بشرط نثبت الاول براءتك من اللي اتهمتك بيه زهرة عشان وقتها جدي يطردها ونفضل احنا ...
-انا مش مهتم اثبت حاجة لحد احنا هنسيبلهم البيت ونمشي ومش عايزين حاجة منهم ؛!
-عايزانا نمشي من البيت ونسيب ثروة هاشم بيه لزهرة !!!!
قالتها مرام بهدوء
