رواية السر المخفي كامله جميع الفصول بقلم يوسف مصطفى
شهرين وأنا على الحال دا.. نايم في البيت مش بخرج منه بسبب الكسر اللي في رجلي اللي حصل بسبب حادثة موتوتسيكل ..
خلاص كلها أيام وهرجع الشغل.. فكيت الجبس وبعمل علاج طبيعي ، لكن مؤلم جدا وبيطلع روحي .
لكن الدكتور بيطلب مني أتحمل وأعمل التمارين بإنتظام علشان أخف بسرعه
نسينت أعرفكم بنفسي أنا مايكل عندي 25سنه
عايش في شقة لوحدي وبشتغل دليفري في مطعم كنتاكي
عيلتي شبه مفككة اب وام منفصلين وأخ صغير عايش مع ماما وانا قررت ابعد واستقل بنفسي من 3 سنين
بعد ما خلصت جامعه ..أشتغلت كذا حاجة
ومن 6 شهور استقريت على شغل المطعم دا اللي تطلب مني اني انقل من مكان سكني اللي كان بعيد عن الشغل الجديد
قعدتي في البيت خلتني ألاحظ حاجة غريبة جدا
العماره المقابله لي وتحديدا الشقه اللي قصاد شقتي
واللي بيفصلني عنها حوالي 6 أمتار عرض الشارع
بلاحظ دايما نور الشقه بيشتغل وبيطفي
3 مرات في نفس التوقيت الساعه 2 صباحا
مابين كل مرة والتانية عشر دقايق
بينور النور الساعه 2 بالظبط وبعدها بعشر دقايق يطفي
ثواني ويرجع تاني ولمدة عشر دقايق وبعدها يطفي
تاني وبعد ثواني ينور للمرة التالتة لنفس المدة
وبعدها يطفي للصبح!!
الموضوع لاحظته أول مره وانا سهران في البلكونه
وحاطط الهاند فري في وداني وبسمع ميوزك
استغربت في الأول.. ولكن اكتشفت ان الموضوع بيتكرر كل ليلة بنفس الشكل وفي نفس الموعد
في حاجة مش طبيعية بتحصل في الشقة دي..ولازم أعرفها
فضلت أفكر في طريقة تخليني أدخل الشقه دي واعرف ايه اللي بيحصل فيها ..
بعد أسبوع رجعت الشغل والموضوع لسه في بالي منسيتهوش خصوصا وانه لسه بيتكرر كل ليلة وبنفس الشكل
وصلت لطريقة تخليني أعرف ايه اللي بيحصل في البيت دا
وفي نفس التوقيت الساعه 2 صباحا . كنت واقف قدام
باب الشقه وبرن الجرس وانا بلبس الشغل
مر دقيقة وانا في حالة ترقب وانتظار..فتح لي الباب طفل في عمر 7 سنين وهو بيبص لي بإستغراب
ابتسمت ليه وانا بقوله انا الدليفري ودا الأكل اللي طلبتوه
بدون تردد أخد مني الأكل ودخل ..سابني واقف
طبعا محدش اتصل وطلب اكل.. دي كانت حجه عشان اخبط على بابهم في الوقت دا.. واقولهم اني غلطت في العنوان
لكن اللي حصل دا مكنش متوقع..الطفل خد الاكل ودخل
وساب الباب مفتوح
فضولي زاد جدا ودفعني أني أدخل من الباب
هي بصه بس اشوف في ايه في الشقه دي
خصوصا انه عدى وقت وانا واقف ع الباب كدا
دخلت الشقه كانت الصاله فاضية مفيش فيها أثاث
فجأة النور طفا.. بصيت في موبايلي لقيت الساعه
2:10 ..باب الشقه أتقفل لوحده ..وفضلت واقف متسمر مكاني في الظلام ..حسيت برعشه في جسمي
برودة غير طبيعية..وبعد ثواني رجع النور تاني
وشوفت أبشع منظر ممكن اشوفه في حياتي ..
