رواية خطايا واجتثاث الفصل الحادي عشر بقلم نور البصري
مابين الدمع والخد موضوع انفتح وانسد
واحساسين مختلفات گلب أبيض وحب أسود
والف نعلى على ذاك الجابلي الغربيل
من يوم اللزمته وما بقالي أحد
مــــــــــــــــــــــــــــريم
خلا ايده على حلكي وهو يهمس يم اذني
: خفتي اي مريمتي.. خافي مني
من احس بخطر خسارتج اتعدى كل الاخلاق واخذج قبله..
شوي وتراجع
: بس بعدني محتفظ ولو قليل من اخلاقي..
وخر جانب و كال
: روحي و حاجي جدج كوليله اريد افسخ بعدني صغيرة مو مال زواج وانت فعلاً صغيرة فد خمس ست سنين تتخرجي من الجامعة عقلج ينضج عود لاحكة عالدنبكة و ال... ****
وسعت عيني من الكلمه محبيتها منه ولا توقعت هيج يفشر عليه
سكت وذب نفس وهو محتار شلون يقنعني اني غلط وقراري متسرع و غير ناضج شلون يقنع وحدة خلاص اخذت القرار النهائي..
اسايره لا ينفذ تهديده فهزيت رأسي اي لأن كلش خفت منه
: خابري كدامي..
اتصلت طلعتلي مرت عمي
: شلونج عمة اريد جدو..
نزلت بية اهانه
: وجه الفكر ابني متوقف من وراج انت مثل امج يوم خلت العشيرة تنقسم وطلايب من اخذها ابوج و عاند اهله
سكتت وعيني على عون.. الي رجع ورى وهو مكتف ايديه حسيته حتى لا يستخدمهن ويضربني لأن عيونه متربصة بلي راح احجيه.
: عمة انطيني جدو فدوة..
يمكن اني مو صاحية توني اريد افسخ و اخبر جدو وهسة حجي عمتي عليه حفزني اعاند..
هاي بينت حقيقتها كالت الي امي هي تجاملج ما قابلة بيج معقولة تعوف بنت اخوها وتأخذج انت بنت الكردية
: خلصيني منج مريم ما اريدج من هسة كصتج فكر بينت بأبني والله اخاف ابني نهايته مثل ابوج من ورى امج..
مكدرت اسكت ونسيت عون.. الي عيونه على حلكي شحجي رغم قساوته بس القلق والخوف بعيونه فضحه
: اكلج عمة امي شكو وشايلتها و داكتها ابوي بالقصف استشهد من ترك الملجأ مال منطقتنا ورجع وسط القصف للبيت ديجيب بطانية و ذهب امي نستهن وخافت بيتنا ينقصف فدزته..
عضيت شفتي ولساني يم كلمة دزته وعيني على عون.. الي ابتسم و ظل يعيرني.
: مرت عمج تحجي على امج حياتج وياهم تصير ريشة وسط ريح لا تقبل تطير ولا تقبل تطيح لأن يكرهون امج الكوردية فتوقعي شنو نوع الحياة وياهم تصير رجعي لعقلج الحياة مو بس جيب عامر بالفلوس..
تجاهلت تحذيره يعني شيريد يسوي اذا اصريت اخذ نصير.. و اشتري راحتي ما اريد اعيش بفگر واكضي حياتي اركض للعيشه ولمصاريف جهالي المستقبلين..
: شوفي عمه عيب كلامج و نصير.. اخذه اخذه وها حضري روحج اعزل بي بيت وحدنا الا اندمج على حجيج وياي..
وسديت التلفون بوجه عمتي.. الي علنت عداوتها لكل طموحاتي ولكل اهدافي وخليت عيني بعين عون.. بعناد..
: لا تباوع بعصبية وخلينا أخوان وبس مو قسمتك اني وخر و انطيني طريق اروح انجب بغرفتي
بس هو عصبي لدرجه مد ايده علي وكتلني..
: انت شلون تتعدى الحدود ترى دورك انتهى اني بذمه رجال وهو صار مسؤول عني منو انت وتضربني اصلا انت كلك حي، الله ابوك ابن عم ابوي..
: انت شكد حقيرة وناكرة جميل لا عبالج ترتاحي والله بيه حوبة تكسرج تكسر..
ما انكر اني مو ملتزم بس ربج ارحم والطف بيه منج و ما تعدي لعبج بعواطفي..
لمن ابن عمج انطاج عين ووجه فضلتيه عليه لأجل فلوسة حرامات صرت واحد قشمر و زوج شلون بنية مثلج ضحكت علي دمرتي مستقبلي
اشتغل واخلي بيدج واني طالب سادس هملت نفسي ولبسي و دراستي بسبيل اشتغل واملي بطنج و البسج ملابس حلوة وانيقه
وهسة صرت مو زين رجعيلي كل تعب تعبتة بيج وراها توكلي لنصيبج بس مال تطرحيني زوج و قشمر ما اسمح بهذا..
اني ما اعير بيج واجب علي اتكفلج ابوج دمي ولحمي بس موقفج جبرني لا انت بقيتيني مجرد كفيل و قرايب ابوج ولا انت البقيتي على العهد
ولج املتيني بحبج و وعود و احلام وردية هسة بعتيني ورى ما طاح حظي من وراج..
طبعا اعدد افضالي عليج بلكت حصوة ملح تخلين بعينج و تستحين على نفسج و تكولين عون.. بشنو قصر واجازيه خيانة ونكران
زين ليش ما من اول مرة قطعت الامل اله و ما املته بيه ليش لعبت بعواطفه خوب من اول اخلي حدود و ابقي علاقتي بيه مجرد اخو..
مو اعلقه بيه و اعشقة حتى بظلي مو بس بيه تالي اعوفه وامشي لغيره..
طولت الحجي وياج ياريت ما تكفلتج جان هسة اني اعلى كلية و افضل امكانيه و تستاهلني الاجمل والافضل والاطيب منج يا خبيثة حية ركطة طلعتي..
دفعته حتى اروح واني معصبة لأن ضربني راشدي و ظل يرزل وكل شوي يضرب خدي لو يضرب جتفي بوكسي..
متحملت عاد مديت ايدي وكمشته من كذلته
: لا تظرب والله اكسر ايدك التنمد علي..
اني حجيت هيج وتخبل عليه ما حسيت الا جرني من جتفي وهو يدفر بيه وسد باب الكلدور قفله وهو يصيح
: اليوم انعل والديج ال ** بنت ال* ولج التبيع نفسها لاجل فلوس يسمونها***
ظل يحجي حجي ما يلبس عليه ثوب صدمني الفاظه و امي تدك بالباب: عون عوف بنتي لا انت والزمن علينا ردتك عون.. لو فرعون كافي علي بيت جدها وعمامها الي هدفهم بكل وسيلة يسلبوني بنتي
تركني عون.. وهو ينهت عصبية باوعلي بغضب
: بختج بأمج بس كولي لو ما هي الا اترك بيج عاهة اعوقج بيها وعود خلي نصير.. يحير بيج..
حجاها وطلع وهو ينكث بيديه الظاهر وجعنه كد ما ضربني..
اباوع لأمي بملامحها الكوردية ونظراتها الي..
: تستاهلين الكتله بس خفت لا يتهور بشي هم خفت شارب وميحس بروحه و يصخمج ولج شلون تعقدين دون علمي وضيعتي تعب سنيني بيج..
هذا راسي المتروس شيب من وراج ورى ضيمج ما كسرت خاطرج انت بسببج نوري.. داخل طالع يعيرني
يكلي بنتج الما انطيتيها لأهلها وهي طفلة بس كبرت نكرت تعبج باعتج بسهولة و حتى عقدت زواج دون علمج..
حجتها وهي تلوي لحم ايدي بكرصه وتدفر بيه.
: شلون قشمروج ام الطلايب؟
ما سكتت ذبت الصوج بيه واني من فطنت وهي تكلي اخذي من بيت عمج من الأول غني احسن من ابوج الفكر عيشني فكريات ما يعرف يشتغل
لو نوري.. القشمرني وبيعني ذهباتي لا تاخذين عون.. خليفة ابوه بس يكبر يصير مثله
هسة صرت اني غلط وهسة متريدهم من حست كل همهم بس يسحبوني منها و تبقى مطرودة منهم ما تستفاد من فلوسهم.
: لو منطينج وجه جان كبعتيني و انطيتيني الهم بأرادتج بس رجعتي على عون.. من شفتي نصير.. ما نطاج وجه كلتي ما اخسر المشيتين عون.. فايدني..
وكعت بالكاع وطك راسي بحاشية الحايط ورى منطتني راشدي
: ادبسز تحلمين تزوجين نصير..اخيسه بالسجن بتهمة خطف قاصر اصلاً يا غبية تبقين بعقد سيد لمن تبلغين 18 يا الله محكمة تصدق زواجج بس انت ثولة..
: ما بقى شي واصير 18..
حجيتها بألم واني كوة امشي جريت روحي لغرفتي دايخة راسي احسة يون علي و حتى دم طلع من جانب راسي..
يمكن عون.. جان يراقب بسكته عركتنا لان انتبه الظاهر للدم برأسي واني الف حجابي الجره نزعه مني الملم شعري من طلعت من يم امي دك الباب
: فتحيه..
: وخر وروح الله ياخذك الله لا يوفقك كلة منك عساني موت
: اللهم يطولج يا روح الصبر منك ربي فتحي عيني خلي اشوف راسج
: مابيه شي بس انت لا تدخل بحياتي واطلع منها وهي اموري تنعدل..
استمرت امي بصراع و بيت جدو وعمامي و رجعت الهم ذكريات زمن الاخذت بي ابوي وطردوه و تبروا منه.
وصل بيهم يشترون نوري.. بفلوس حتى يقنعها تتنازل و يطلع نصير..
بيوم اجت وهي تباوعلي من فوك لجوة
: الج رغبة بنصير.. ما راح اوكف بطريقج..
كالتها وطلعت ولليل اجه نصير.. و هو وعمامي وجدو
: يلة تجين ويانه
: بس امي باوعت الي و حجت
: لهنا وفيت وياج وكفيت انت هم ما بقى شي وتصيرين بعمر 18 اتفقنا اني وبيت جدج تطلعين من بيت جدج لبيت عيالج هذا بيت نوري.. مو بيتي واطلعج منه عروس..
رحت وي جدو لبيته و استمرت مكالماتنا اني ونصير.. ومن شروطي عليه اعزل بيت وحدي.
اول استغرب طلبي بس الظاهر امه مسوية مشاكل وياه تريده يفسخ مني
وهذا خلاه يقرر عزال افضل مما يمهم و يومية ندوخه بطلايبنا واصلا هو من الأول ناوي على بيتنا وحد...
المهم اول لذة انتصار حسيتها من اخذت نصير.. من امه وهي متعلقه بي
لدرجة اجت لبيت جدي و تتوسل بيه اقنعه نكعد يمها.
: ما عندي بس الولدين نصير، و قصي ترضيها ابني الجبير فتشة عيني بعيد عني باجر تخلفين تعرفين قيمة الضنا بنتي واذا اني عصبية حسبة امج و غلطت وياج بس لا تحرميني ابني الجبير فتشة عيني...
: بعد امي كردية ما عليها عتب والله عمه انت طلايب وراج اول تالي نعزل بس تسوين مشاكل يهدد هدوء حياتنا لذا اختصرتها من البداية ليش نتخارب
هي سمعت كلامي وهدت علي تكتل بيه..
: الجايفة بنت الجايفة فتريتن على ابني وبكتنه من حضني مثل سواية امج من اخذت ابوج من اهله
خلت وطلعت وهي تبجي صراحة اشوف العزال افضل تتعود على بعد ابنها ولا يومية مشكلة و يجوز تخلي نصير.. يردني لأمي هنا يشمت بيه عون.. و امي..
خابرت امي بحجيها مراضية بس يمكن نوري ضاغط عليها لأن ضايجة على عون.. من راجع و ما لاكيني مكسر البيت على نوري وامي
و ظال يشرب للصبح راجع للشرب هاد على نصير.. بمكتبه وهذا خلا نصير.. يستعجل بالزواج
زواجي دون صاحباتي عزمت ماجدة.. تعذرت امها ما تقبل تجي اما سؤدد.. ما قبل نصير.. اعزمها بسبب حسن.. صارت عليهم علامة اكس.
حسيت بماجدة.. والله مقهورة ولمحتلي تتهم رجل امها سهيل.. انتقم لان تلاكي ابوها ببيت سؤدد.. وبينت مو على حال وياه ينكر التهمة.. وحتى ضارب ماجدة.. و من جايهم ابوها طارده و متعاركين عركه جبيرة ومانعه من ماجدة..
فكرت الصراع بين لؤي.. وسهيل.. نتيجته ضحايا هم ماجدة.. و حسن.. وسؤدد..
خاصة حسن.. راح بالرجلين كل ذنبة استقبل ابو ماجدة.. وعاند قرار سهيل.. الحزبي الجبير..
حسيت نفسي وحيدة جدو ما قبل امي تجيني على الأقل بيوم عرسي تروح وياي للصالة تهدأ من خوفي ورهبة العرس
ظليت وحيدة بيبي مرة جبيرة ما بيها حيل فرة مشترى الجهاز بقيت برحمه مرت عمي الصغير الكاعد ببيت جدو..
لان ام نصير.. رافضتني حتى العرس ما تقبل تروح للقاعة..
حجز نصير.. العرس بقاعة المهندسين
حتى البدلة مو ذوقي ردت موديل الحورية بس مرت عمي كالت عوع انت سنفورة كصيرة و نحيلة لا صدر لا ورك هاي البدلة تلوك بالطوال الي انوثتهن مملية انت تفيدج النفشة تنطيج شوي انوثة..
يكرم الله بأنتقاداتها حسيت نفسي صبي مو بنية من وصفها جسمي مع العلم اني اصلا جسم مملي مدبدب..
اباوع بالمراية مكياجي، برونزي،(بني مذهب) رغم موديلة بهاي السنة بس محبيته شنو شفايفي برونزية والظل برونز و رمادي مدري شنو
خوب لاطشاتلي بطرف العين نجمه
ناقص بس الهلال و من يطب علي نصير.. اكولة رمضان كريم هل هلالك يا رمضان
شعري منسدل على طولة مبروم و مرفوع على شكل بكلة من نص هامتي مثبته بتاج و مطافر منها شعر مبروم
و الكحل مجرور جرة شطولها مجرور شوي يطخ بالحاجب منا عيوني واسعه اصلا منا جاريلي الرمين و الرموش ايباه..
زين هن رموشي معكوفه وطوال المن يا مرت عمي كتيلها لكوافيرة لطشيلها رموش خل تبرز عيونها
لا واخر لمسة هو كيف تتحولين بروجكتر رشني لماعي شعري و صدري يمكن حتى خدودي
ومن طبيت بيت جدو النسوان تصلي عالنبي لا انحسد دوكفن يمعودات من شنو انحسد..
شو طلعتني مرت عمي بذوقها لمبة حتى التريد تباوع وتحسد اللماعي يصد عينها والحسد يروح..
اجة نصير.. عيونه تتأملني و بيهن لهفة عريس ابو النصر المن متلهف مرتك سونها بروجكتر والمضحك المبكي يهوسن اول ما دخل...
نصوري طفي الضوة خدها و الكلوب سوى..
باس كصتي و همس يم اذني
: تخبلين جنج لعابة...
ابتسمت و بگلبي كلت ذوقك على مرت عمك عبالي عندك ذوق لو عون.. موجود جان صنف عليه و ظل يصيح كلة ابو اللمعه لاطشيج ايبوكسي وبنتلايت..
اعرف عون.. يحب كلشي هادئ وطبيعي ما يحب هيج مكياج ولا ذوقه هيج..
هزيت راسي ابعد افكاري عنه اني تركته وتزوجت الانسب الي ماكو حاجة افكر بي
نصير.. حباب ما يستاهل خيانه افكار مني واني احبه لنصير.. يكفي وياه ما احس بعوز..
رحنا للقاعة وبقينا قبل الاعراس تطول يمكن لل 11 كالوا نزفهم..
زفونا لبيتي وصلونا للباب دخلت الحديقة وهو يشحت بولد عمه و اخوه..
: تصبحون على خير يلة مزعجين روحوا من وجهي
بينهم يضاحكون واحد من ولد عمه شاوره وضلوا يضحكون حسيت هنا برجفه و رهبه واني انتظره يم باب البيت الداخلي..
اجاني وهو يبتسم ويدندن بأغنية
فرحان بيه عيني على سيارات ولد عمنا الي ركنوها يم بيت اهله هم جيرانه..
ما حسينا الا عون.. عبر سياج الخشبي الصغير مال حديقة الي ارتفاعه متر عليه متسلق ورد قبل جان هذا نوع من الاسيجة منتشر خاصة مناطق الراقية..
جان يمشي قليل يترنح يمكن شارب بس واعي ماعرف حسيته منتبه
: ولك عون.. شجابك بيتي
: جاي اخذ مرتي..
عصب نصير..
: مرتك شنو يلة روح سكران انت روح لا اتصل بالشرطة..
: اروح اني وعروستي يلة مريم.. يا وصالي المفقود امشي وياي..
جان يبجي وهو يباوعلي خفت لا يتعاركون دفعه نصير..و عون.. حجه
: مرييييم.. سنين طارحتني اني زوج اربي واكبر اصرف و انتظر الوردة بيتي تكبر تتعلم توصل تتخرج امراة كامله تصير حتى تنور حياتي
ولج احلامي هاي شنو ذنبها هاا ليش ما بيه حوبة ربييي احلم بيها ليلية هالحلم الما شاف الحقيقة وبقى بس محبوس بمخيلتي ما اله حوبة..
احجييييي مرررريمممم خاااينننه...
لانعل ابو الحب..
ضرب صدره وقلبه وهو يصرخ
: لانعل ابو هذا لابو الخلاه ينبضلج ولج امس جنتي طفلة معقولة بساع كبرتي وتعلمتي الغدر شبساع ما علمتج عالغدر
حاجيني يمريمتي.. وصالي المفقود.. الامل الي انتظره بعد يأس خسارات بنص بيئة العشتها وي اب جان سبب بتيتيمي ردت وياج حياة مختلفه و امل
ضحك بصورة مجنونه وهو يصفك ايد بيد ويكمل
: كل هذا بح راااح كل الحلم راح اي يا عون.. راح و رجعت ذاك الي مالك هدف تسعاله مو انتِ جنتي الهدف حتى احقق امنيتي بيت متكامل
بيت يختلف عن الحيتة وي نوري..
بعتيني يالحبيبة بالمرسدس و كم فلس و الذهب و الحياة الي بهيج بيت
أشر على البيت ويضحك ومرة يبجي واخر شي كام وهو ظل يدبج عبالك يركص او يفتر على روحه
مدري العرك الطافحه مأثر برزانته مدري الصدمه مدري الاثنين ظل يكمز لو يفتر وهو يصيح باعلى صوته..
: ياااناس عون طلع زوج.. يا نااااس عون.. طلع غبي ولكم يا ناااس ههههه عون.. طلع بدون مريم.. ولكم....
شهك شهكه غريبة ضل يضرب بصدره عبالك كوة يتنفس
: اااخ يمة النفس حار اااخ يمة كوة اتنفس اااخ يمة نااار جمرتج يا مريم.. تحرك اااخ اويلي خطية اني خطية ولج جان كلتي خطية...
تحول للبجي ويرجع يهز ايديه عبالك ينوح لو يدور شي ضايع منه
: ليش ولكم خطبتها قبله يا مسلمين يا اهل الدين ما قريتم قول الرسول لا تخطب على خطبه اخيك ولك اخيك اني نصير.. اني خطبتها..ههههههه هاي مدعرف اصوغ الحجي يمكن سكران اني لا لا يجوز سكران بس اني العرك ميسكرني
حتى لو اسكر بس انتبه هسه شبيه ههههه...ااااهــ...ااأخ اويلي
(صوت ضحكه وبجية دمج) اي اني سكران بمريمتي..
ظل يطك اصبعتين
: وباجر يخليج نصير.. تغنين هاي خلاني وكتي وياك ريشة بوسط ريح.. واها اها ودمبك دك دمبك دك لا تقبل تطير لا تقبل تطيح واها ها دمبك تك.. وانه المسجينه انه... اهلي ضلموني ولنصير.. نطوني... اروح للملى علي واكله يا ملة علي......
اوووف شوي من خلص الاستعراض مالته السكران الطايح حظه اجاني يريد يجرني
: يلةةةة ولج يلة ماكو عرس ولا ملى علي ولا نصير.. يا مسجينه.. يلة وياي
ظل نصير يغلط
: تروح منا لا نكسرك وندزك لأبوك مكسر تكسر يا ابو العرك تحترم نفسك لا تجيب سيرة مرتي
دفع نصير.. الي وكع فرفسه عون..
: تنجب لك ابو وجهين ولك اني واضح ما اتظاهر بالأدب الخلوق المتدين واني هة هووو هة هووو مو اعرف سوالفك ولج هذا ليغرج شوف ولك اروح اني وعروستي يلة مريم..
يا وصالي المفقود امشي وياي..
جان يبجي وهو يباوعلي خفت الوضع تأزم وكف نصير.. وتولاه دفع وبوكسيات
: روح منا يا الله روح هه يكول مرته وتمشي وياه انت مخبل صاحي.... اكيد مخبل....
نتر عون.. ايد نصير.. ولواها ولا جنه شارب.. وتوه يترنح رغم عون.. اقصر من نصير.. مع العلم اثنينهم مو طوال قامه...
: اكتلك تذكر كلامي اني كتالك يا نصير.. بس تأخذها مني بس تتقرب منها والله ادفنك و اذبحك الا انحرك بيدي.. واخليك سالفه للطوايف اني كتالك ولك اي فرصة تجيني الا انهيك تأخذها مو بس والله حياتك الثمن بس اصبرلي...
ظلوا يضاربون بينهم اهل نصير.. بشارع واحد وي اهلة الظاهر من دفر عون.. برى البيت للشارع وهناك تطاحنوا انتبهوا ولد عمه من العشيرة وعمامي ففزعوا هم و إخوانه وحتى جدي والكل موجود جان بالشارع..
صوت طلقة صرخت واني شفت دمه ظليت ادك والطم...
: ولك قتلته ولك مات ولك شسويت ولك راااححح قتلته.......
مـــــــــــــــــــــــــــــــاجدة
سهيل : ليش ما تجي تاكل بنتج ولا جني ربيت تعبت فوكها على مود رجل صاحبتها الـ غوغائي شكد نصحت وحجيت بس هو اعوج و يستاهل الاغم.. اغم...
سمعت حجيه وتخبلت شنو من بشر اني مصدومة بي بابا سهيل.. الطيب يطلع كل هذا منه..
كوة امشي من ايام تاركة الاكل منعني من كلشي عقدني مو حال هذا وفوكاها بلغ على حسن.. ويسميه غوغائي و يمي يكول نصحته و ما اخذ النصح هو ذب روحه بتهلكه
جذاب لا نصح لا شي والا كالت سؤدد.. مو تباوعلي بأتهام صامت حاز بداخلي نظرتها الي مسكين حسن.. شاب ملحك يتهنى وبعرسه بقاطه اخذوه
رجع بابا سهيل.. يلح كال عائلة سؤدد.. ما تتعاملون وياهم ما بيه مشاكل اني و الحكومة موقعي حساس..
انتفضت شلون اعوف سؤدد.. الي ياما توكفلنا احنا صاحباتها بكل ضيق شلون اعوفها وحدها تعاني..
بس ما باليد حيلة هذا هو سهيل.. من عمري اشهر اجتثني من اعماق جذوري وحرم ابوية مني ولا زال و هسة يتحكم بعلاقاتي وي صديقاتي
ورى اعتصام ايام نزلت على الغدة
باوعلي من جوة نضارته ورجع يقرأ الجريدة متجاهلني
: ما اسامحك طول ما اشم النفس قتلت حسن مو؟ صفيته مو؟ عاد بلغ اهله ليش متلوعين عليه
كام و شمر الجريدة بوجهي
: حجيت وياج و فهمتج مصرة تتهميني مو؟ شوفي الموضوع تنكسر بي ركاب توكع و انتِ لو تتوبين تنقلين لأبوج والي يحارب الحكومة غوغائي
عود ما اوصيج هم نقلي هذا لأبوج كلامي و تحركاتي الي يوم ابوج اسلمه للمحكمة العسكرية بتهمة الفقها اله واخلص منه..
كالها وطلع
: ما اريد اتسمم تسمموا دوني
شوي سمعت سيارته تغادر
ركضت اتصل ببابا
: مشتاقتلك بابا..
وحجيت وياه دون خوف مراقبة تلفونات حجيت عن ظلم بابا سهيل لحسن..
واسمع صوت ابوي مختنك ببجيته وهو مقهور على شاب عريس ملحك يتهنى
: الله لا ينطي سهيل شاب يخبل وابن اوادم كسره وضيعه.
توسلت ببابا بلكت واسطه..
: ما تكدر انت تتكفل قضية حسن..
: شبيدي اني يا بنتي لو اكدر ما اقصر بس ما بيدي شي حسن.. ضاع بين الحيتان الكبار امثال سهيل..
يبجي و هو يحاجيني نزلت دمعتي ابجي على ظليمة حسن.. و سؤدد.. و عرسهم الي ما تم و انتهى بمجزرة اعدام اخوالها...
ما اتحمل بعد قررت اروح لسؤدد.. اكيد تحس وحيدة بسهولة انباعت الصداقه بس شسوي شنو بيدي واهلي مانعيني..
لبست برمودة جوة الركب بيها سير دكم و بدي مموج الوانه غريبة تمويجاته قماشة عبالك لاستيك نوع من الفيزونات نهايات تسعينات مشطت و كالعادة لبست طوك على راسي
طلعت اتلفت بسكته ركضت عبرت الشارع و بفارق كم بيت دكيت باب بيت سؤدد..
فتحته عمتي ام سؤدد نحلانه ضعفانه لابسة اسود و عصابة جوة شيلتها
وجهها الابيض الشاب لمرة ثلاثينيه.. صاير اصفر شاحب شافتني بجت وكالت..
: كطعتي بسؤدد.. يا ماجدة.. هي هيج كالوها هي هاي الصحبه يعمه..
: بابا سهيل.. ما يقبل اجيكم اجيت محد يدري..باوعت بقلق وراي
: خالة روحي لأهلج ما بقالي بعد احد يروح بس بنيتي وهاي شرف لا يضيع يمه روحي لا يحس ابوج
: خالة صيحيلي سؤدد.. اشوفها بساع
: لا خالة ما بينا طلايب ابوج حقة يخاف عليج
: ليش شبيكم ويخاف كافي بابا سهيل.. هو الي....
سكتت مريد ازل يمها يجوز ما شاكين بي ولو تلميحات سؤدد.. بينت العكس
بس خالة على كيف طلعتني وهي تبجي واخر كلام كالته النوب سدت بابها بوجهي
: احنا بينا يمة.. اي بينا..
ضجت الخوف تخلي العالم تقر تعترف بشي ممسوينه ليش هذا الظلم ربي شلون اتقبل بابا سهيل ..بعد شلون
والله لو بس ابلغ 18 الا اعوف البيت وما اقبل بعد اعيش وي قاتل..
واني اريد اعبر الشارع لبيتنا شفت سيارة بابا لؤي.. يم بيت اهل مرته وتوه نزل وياه مرته و اخواني التؤام..
وجهها ضمته بأبنها من شافتني هي ليش تكرهني ما تحب تباوعلي دوم تسوي هاي الحركة من اتلاكه وياها..
حضنت ابوية
: بابا مشتاقتلك....
لمس شعري يشاقيني وعدل الطوق
: افيش عطرج ظال حركة بگلبي يبعد ابوج الي حرموه منج..
دمعت عيني ورديت حضنته بعدين التفتت لمرته
: شلونج..
سلامي بارد لأن احسها ما تحبني
هزت راسها وهي متباوعلي
: هي عود ليش ما تحجي وياي
باوع بابا لمرته وهمس بصوت..
: عوفج منها هاي متحجي خرسة..
: بس سامعتها تحجي شنو خرسة قبل اسلم تجاوب.
: من مات ابوها انشل لسانها عود بقت امها تصبر عليها مو حبيبتي
هزت راسها ب اي وعيونها تصر دموع حزن على ابوها هزيت راسي بشفقة
: خطية ما تستاهل بعدها زغيرة..
: انقهرت على ابوها من مات و فقدت النطق..
كولش انقهرت عليها خطية واني سأت الظن بيها.. عاد سلمت على بابا
: لازم اروح بابا على جيه و خاف يشوفنا و تصيرلك طلابه لا النوب يضيعك مني مثل ما ضيع حسن.. من سؤدد...
ســـــــــــــــــــــــــــــــؤدد
اباوع من الشباك للباب واشوف امي تسده بوجه ماجدة..
شهكت امسح دموعي واني اتذكر حسن.. الي راسه يبين من تاج الباب لأنه طويل ابتساماته شقاه
: حرقه بگليبي لفتني ااااخ يمه
همست واني الوم روحي
: كله مني اني الي تدخلت وردت اسوي خير اني الي الجبتها لروحي لويش الوم ماجدة.. الذنب ذنبي اني الي اقترحت يلتقون بيتنا..
ما اخذت حجيك يا حسن.. يا رويحه گليبي..
بس رجعت الوم ماجدة.. صارت شوفتها كدامي تذكرني شخسرت...!
دخلت امي باوعتلي
: ها يمة سؤدد.. من يوم الصار وانت كوة تبلعيلج لكمه يمة اخافن ترحين مني..
حضنت امي واني ابجي بصدرها..
: يمة اندعيله انت تصلين ملتزمه..
: هذا اختبار من ربج عالصبر..
شــــــــــــــــــــــيلان
لان (الحوار بين شيلان و اهلها بلغتهم الكوردية )
مشيت على كيف جان كاعد ع طوب حجري ويباوع للمزارع لابس كاسكيت وسروال و فانيلا نيلي مرهم الكاسكيت وياهن...
: شبيك ضايج.
: ما بية شي.
بساع كوتله
: ويمتى تخطبني
دنك وهو يضحك
: المفروض اني الي اكولج يمتى اجيب عمج و نخطبج..
لحيت
: اي صدك يمتى..
ظل ساكت فضجت بس لا غير رأية وما يخطبني
: بروان!
: مممم
: انت مترزل من عمتي مو؟ لان انت ربيبنا مو ابنا..؟!
عضيت شفتي ادري بي يضوج من هاي الكلمة بس الغريب ما بين هاي المرة ولا عصب بالعكس كبل ناقشني
: هذا واقع و حقيقة لو اعرف وين اهلي اروحلهم من سنه 88 تفرقت عنهم من جنت بقريتي المنكوبه بالسلاح الكيمياوي..
كعدت يمه
: بس ابوك عايش المشكلة ما يكدر يرجع ولا يكدر يدز عليك صراحه لا بابا لا عمو يجازفون يرحلوك للبلد الي ابوك هرب اله..
دنك ضايج من وضعه لزمت ايده
: لا تضوج والله انت عدنا عبالك دمنا و لحمنا
التفت الي وهو مهموم
: تدرين مرت عمو تلمح تخطبج لأدم..
شيلان.. فهميني ما اكدر انكر جميل عمو آزاد.. صاحب فضل عليه من جابني لمحافضتكم جنت خايف ضايع لا اهل ولا صحة و فوكها حروق جسمي جانت ملتهبة..
غمض عيونه و رفع وجهة حسيته يستذكر واقعه قريته حسيته راح بعيد بأفكاره و دمعه غدرته وهو يشهك..
: ماكدر انسى صورة امي و التشوهات و الحروق بسبب غاز السيانيد اخواني الي لكيتهم ميتين عائلتي التدمرت والي شرد و ترك القريه..
ابوي سنين تصورته مفقود او ميت
لو ما كدر عمج يحصل اخباره من جيش ال ++++***الكوردي المعارض للحكم ما اكول الا حسبي الله ونعم الوكيل بلي كان سبب..
: ما اتزوج غيرك للموت ما اخلي رجال غيرك...
استحيت اكمل كلامي وبگلبي كملت وكلت يلمسني..
انتبه هو لأنحراجي و ابتسم ونفس الوقت عيونه السود حزينه ذب حسرة و سكت
: اطلبني من بابا...
: شيلان هسة احنا ننتظر نكمل و الله يكتبلنا الي بي صالح النا
: والنعم بالله انت مبقى شي وتصير مهندس بعد تتخرج الا اني مشواري طويل
حجيتها و خليت ايدي على خدي
: الربيع طول..
: لا ما طول بعدنا اول الرابع..: بالجنوب من رحت يكولون جو بي برودة بس عندي حسيته دافي يميل لحرارة خاصة ظهر..
: لأن ما متعودة جوهم..
: اكو بنية سمرة بس حلوة صح شعرها واكف هيج
بشعري حاولت اعكشه بيدي بس يرجع مي سرح اريد اقلد شعر سؤدد
: اسمها سؤدد.. بس حبيتها تدري خطيبها يقرا كتاب الحكومه مانعته
وصفتله الكتاب و اني اكولة
: خابرت مريم.. ما فهمت كالت حسن.. راح خطيب سؤدد.. ما فهمت شنو راح تلميحات اسأل تكول ما اكدر احجي بالتلفون خاف مراقب..
: ما يراد ذكاء اعتقلوه و يجوز هسه اختفى حالة حال الراحوا ومنعرف الهم أثر
: الله يعلم..
شوي اجه آدم.. و كعد يمنا درت وجهي اللزكة اجه استمر بروان.. يسولف وياه شكد يحبه بساع آدم.. كال..
: راح نخطب شيلان.. اني تخرجت و اريد استقر
هنا اني انتفضت و بروان.. دنك وما حجى ولا دافع عن حبنا هنا اني الحجيت..
: شنووو تحجي انت بيا حق من كيفك تحجي انت كملت دراستك اني بعد
وما موافقه دربالك تعيدها سالفة اخطبج
ذبيت الوردة البيدي عليه ورى ما جعصتها ونفضت روحي و ركضت بين مراعينا كبل للبيت
بيت عمي عايشين ويانا بيتنا جبير و اهاليتنا اصحاب مزارع و منتجات البان واجبان وهاي الأمور..
بروان.. من كبر عزل ببيت زغير مثل كوخ بحديقة بيتنا..
شافتني مرت عمي واني مبوزة..
: خير...
: اي خير وابنج لازكلي شوفي عمة اني مالي نفس بأبنج.
جاي اطلع صاحت..
: لعد الج نفس بمنو؟ بالغريب الدخيل المكطم لا عبالج ما منتبهة الكم..
: بروان.. مو دخيل ورجاءا عمة بعدي آدم.. عني..
: شنو عاشگة لازم...
صرخة بابا.
: ام آدم ...
: قابل اكذب بنتك عينها على الربيب.. تخيل املاكك تروح للدخيل..
: كلامج هذا وراه طلابة فأنت تحترمين نفسج لو شلون...
: لعد ليش ترفض ابني اذا ما عدها شي يلة كوليلنا شنو بينج و بين بروان..
جاي احجي بس بروان.. سبقني بالكلام وهو الظاهر سمع كولشي..
