رواية إخفاء فضيحة الفصل الحادي عشر بقلم جمانه السعيدي
بعد شهر من زواجنا اني وسيف اجاني بيوم وكال شنو رائيج نروح اني وياج سفره
رهف وين
سيف ابن خالتي بعد يومين زواجه وبيتهم بلريف بيتهم داخل بستان
المنضر يخبل نروح اليوم نبات عدهم وباجر نحضر العرس ونرجع
رهف خاف الطريق بعيد اني ما اتحمل اذا الطريق طويل
لا مو بعيد تقرببا ساعتين بلسياره
بس ولله المكان هناك ما يتفوت يخبل والعرس بلريف
غير شكل
رهف يمته العرس
جمانه السعيدي
سيف بعد يومين اليوم شفته جاي يشتري شوية أغراض وعزمني
رهف اوكي بس باجر اروح احف وجهي وارتب نفسي
تاخذني الاهلي ومناك انروح اني وماما
سيف ميخالف
ثاني يوم اخذني سيف العصر الاهلي ونزل سلم على امي
وبابا وكال اذا خلصتي اتصلي عليه واجي اخذج
رحنا للصالون اني ماحافه صار اربع اشهر
حفيت وسويت تنضيف بشره وغيرت موديل حواجبي
شويه كصرتهن
علما خلصت امي راحت اشترتلي فستان فستقي فاتح ومشجر والشال وياااا
رجعت للبيت امي صممت انزع الاسود
تكول انتي كاعده كل النهار بلبيت لا اطلعين ولا يجيكم احد
منو يشوفج خل يولي الاسود
امي صممت نتعشى عدهم اتصلت بسيف وعزمته للعشى
اجا قبل الاذان بخمس دقايق
اني لابسه الثوب الجديد والشال وعلى الحفافه تغير شكلي
١٨٠ درجه وشويه سمنانه على الحمل
رحت فتحته الباب راسا دنك راسه وسلم ما متوقع اني
رهف هاي شبيك سيف ادخل
سيف هذا الصوت صوت رهف رفعت راسي بشرفي طالعه تفلش
سيف السلام عليكم
رهف عليكم السلام
سيف الصوت صوت رهف بس انتي منووو
رهف لا تتشاقه ادخل خل أسد الباب
دخل وقرب عليه وكال شهل زين شهل الزين وين جان هذا الجمال كله
جمانه السعيدي
رهف ولله استحيت حسيت رجليه كامن يضربني وحده بلثانيه
دخل وسلم على اهلي وكال اريد اتوضا حتى اصلي
رهف طلعت ويااا للمغاسل اتوضا وهو كل اشويه يباوع عليه وعيونه كلها اعجاب
مثل الي ما مصدك
اتعشينا وبقينا عدهم للعشره بليل موتهم ضحك سيف بس يحشش وينكت
الكل متعجب بي وبشخصيته وكانما اول مره يكتشفون هاي الشخصيه
امي هنا فجرت خبر حملي حتى بابا يكون عندا علم اني حامل هو اني دخلت بلرابع وامي تكله بلثاني
بابا حضني وباسني ومكيف بلحمل وبارك السيف
ما يدري المكرود سيف ماله علاقه بلموضوع
ولا لامسني حتى
المهم الحمد الله عدا هذا الموضوع على خير
ومانفضحت وكدرت احافظ على ابن امير
جمانه السعيدي
رجعنا البيتنا بلطريق كال اريد اسئلج وين هاي ام الصالون
...ليش
...اريد اروحلها بلكت اطلع حلو مثلج
...ما تستقبل رجال نساء فقط
...عادي اتنكر بس كون اطلع حلو
...انت حلو شناقصك مثلا
...اني حلو برائيج
...اكيد
...وانحب
...ليش لا
...زين ارفعي اديج وادعي وياي وين الله والبنيه الي ابالي تكوم تحبني وتبقى وياي طول العمر
رهف اني افتهمت هو يقصدني بس ولله خجلت منه حيل
.... انشاء الله تحبك
...ما سئلتي منو هي
....منوووو
....اذا كامت تحبني انتي اول وحده اكلها الخبر
وصلنا للبيت واني دخلت سبحت ولبست تراك وردي طويل
يعني القميص طويل
وهو كاعد بلهول وعينه عليه
دخلت جففت شعري ونمت لان تعبت من الفره طول النهار
رهف حرت شاخذ وياي ملابس ولو هي ليله وحده ونرجع
اختاريت فستان نيلي كلش حلو وبي ورد حاشيه بصلي وشال بصلي
وجنطه وحذاء نيلي
وأحضرت دشداشه طويله وردن انام بيها
الجو حلو بنهاية التاسع
ثاني يوم نايمه وسمعت دك خفيف على الباب رهف رهف
رهف اي كعدت
سيف يله حضرت الريوك خل نتربك ونطلع
رهف جايه طلعت لكيته مسوي بيض عيون ومطلع جبن ابو الكلاص ومخدر جاي وخال الصحون بلفرن حتى يحمه
اتريكنا واني دخلت بدلت لبست النفنوف النيلي والشال البصلي وخليت مكياج خفيف
طلعت شافني وصوفر بصوت عالي
سيف اللهم صلي على النبي
رهف البس رداء لو اروح هيج لان الثوب طويل ومستور
سيف لا عوفي الرداء خل نطلع هيج
اخذت جنطه زغيره بيه الملابس الي ابدل بيهن ومعطر
وكلنس وطلعت
سيف لابس بنطرون جينز نيلي وبدي رصاصي بدون ركبه
وحالق طالع يخبل
اول ما صعدنا كام يدندن ويغني صوته يخبل
بعدين كال اكو كم حجايه واكفات بصدري اريد احجيهن اللج
رهف احجي ما طول الطريق طويل نتونس شعدنا
جمانه السعيدي
سيف يمكن اني ما جاي اكدر اتخلص من عقدت الوحده الي عشت بيها سنيين
جنت احس نفسي منبوذ والناس كلها تكرهني وتبتعد عني
والفضل بهاي الشغله الخاله هناء
كرهتني بدون سبب
من انتي دخلتي حياتي وهذا القرار بلبدايه انفرض عليج وعليه جنت خايف
من دخولج بحياتي خاف ما نتفاهم ابد
او اني احس نفسي ما اعرف اتعامل ويه الجنس اللطيف
هلكد ما عشت وحدي
انتي من دخلتي حياتي صار اكو حس بلبيت واكو ريحة طبخ
وصارت الناس تزورني ابيتي مثل اهلج وابوي
وصرت اصلي وهذا اهم تغير بحياتي
الفضل الرب العالمين بلاول وانتي من بعده
وكامت الناس تعزمني مثل اهلج البارحه
على فكره جنت مرتاح واني بيتهم ابد ما حسيت نفسي غريب بنصهم رغم ابوج عمي بس اني ما داخل بيته ولا ماكل من زاده ابد
رهف وبعدين
سيف البعدين ياعزيزتي اني تعودت على وجودك بحياتي ومآ اعرف شلون راح اعيش من ترحين مني
رهف ليش من هسه شاغل بالك بعد خمس اشهر منو عايش اتعلم تعيش اليوم ولاتشيل هم باجر ابد
اذا شلت هم باجر راح تكون حزين
كل يوم كول هذا اليوم احلى يوم بحياتي وعيشه بكل تفاصيله
سيف احلى يوم بحياتي من دخلتي بيتي
وصلنا للعرس البيت جبير ويخبل والخضار داير ميدوره
يجنن
من شافونا اجو علينا وكامو يرمون طلق كنوع من الترحيب بجيتنا
رهف اني عطت ولزمت سيف وختلت ورا
لان يرمون فوكنا
سيف من شفت رهف خافت ولازمتني وخالته وراي فرحت
يعني تحس بلامان وياي
صحت عليهم لا ترمون رجا ء زوجتي حامل واخاف عليها
بطلو رمي وسلمو علينا ودخلنا جوه
سيف.. بس شافتني خالتي فرحت حضنتني وبجت تكول انت من ريحة العزيزه اختي
وسلمت على رهف وبعدين كعدت تعتب عليه ليش ما عزمتها بعرسي
سيف خاله عرسي صار سكته لان تعرفين وفاة امير
عرسي صار بسرعه وسكته ومآ عزمنا اي احد
خالتي مو هي هاي عروست اخوك المرحوم
سيف ( ولله خالتي عليها سوالف ومصصمه تحرجني، )
اي خاله بت عمي واتشرف بيها وابوها كال اذا راح امير رهف اتسمت باسمكم اخذوها السيف
واني لو ادور العالم كله مالكه مثل اخلاقها وشرفها
مديت ايدي ولزمت ايد رهف
كنوع من الدعم النفسي لان حسيت سوال خالتي ضوجها
جابونا غدا اتغدينا ورهف راحت بم البنات واني رحت اساعد الولد
جمانه السعيدي
رهف اول بدايه ضجت من سوال خالته بس رد سيف عليها صعد معنوياتي
وحسيته صدك سند اليه ويكدر يحميني
ولله ما اعرف اسلوبه وياي جاي يخليني اتعلق بي
واتعود على وجوده بحياتي
بليل بدت الحفله الحفله النسويه عباره عن سطل نايلون
ووحده لازمته ودك علي باحتراف
ووحده تغني اغاني قديمه بس ولله حلوه
والباقيات من كل الأعمار صغار وكبار تركص ركص عجيب
ولله تونست الحفله تخبل
خلصت الحفله واكلن كلبي بلاسئله واني ما نايمه الضهر احس راسي صدع كتلهم اريد انام تعبت
دخلوني بغرفه وخلولي مندر وجرجف ومخده بدلت لبست دشداشتي وخليت الشال يم راسي ونمت
احس نفسي دايخه من الهوسه
سيف خلصت حفلة الزلم وكتلهم اريد انام
كالو احنا فرشنالك يم عروستك مايصير صارلكم شهر مزوجين وتنامون واحد بعيد عن الثاني
كتلهم لا اني انام يم الولد
خالتي صممت انام اني ورهف بنفس الغرفه شكد حاولت ميفيد الكلام
دخلت للغرفه لكيت رهف غافيه وشعرها طالع والجرجف واكع ورجليها نصهن طالع
وخالين فراشي بصف فراشها ساعته تمنيت هذا الزواج حقيقي واحضنها واخليها على كلبي وانام
قررت انام وما اغير مكاني يمكن هاي الصدفه بعد ما تتكرر
ابد بدلت لبست تراك وتمددت يمها
عيوني ما مصدكات اني هلكد قريب منها
ركزت بملامحها وتفاصيل وجها
اريد احفظ كلشي يخصها ولله خايف لا تعوفني بيوم من الايام
