رواية مزيونة الشيخ الفصل الثالث عشر بقلم شهناز العلالي
_خويه اخذني وياك للناصرية....
_هلاخيتي ...
اختي"
_شنو؟ ابقي ببيتج ...
زوج اختي"
_شبيج تنترين ب اختج ...
اختي"
_لا تبقى ببيتها احسن ...
ايمان"
_يخوي شفتها شلون تحاجيني من البارحة تنتر بيه...وهسه عبالك اهلها مو اهلي ..
_هينه خيتي تعالي عين غطى،عين فراش....
ايمان فتحت باب السيارة واني اتكرضم ...
فوكاها زوجي كام يحجي ويخزرني ..
جان واكف يمي وديخابر .....خلص المكالمه كتله"
_ليش ..هيج راح تخليها تجي ...
_اني اعرفج عاقله واصيله ..المره شالتج فوك راسها طول هالايام هيج تجازيها وانتي بنت عرب وكرم ماتردين تاخذين اخيتج تشوف اهلج..
_اختي واني وياها نتلاطش انت شكو؟
_ها
_العفو اقصد حريمات بيناتنا وانت زلمه حبيبي...
لزمني من معصم ايدي قوي عصرها ..
_لج مو كعدتي كم يوم ببغداد لكفتي العرامه وطوله اللسان ؟خليج ادميه احسن والله لا اطفي عينج طفي كلبه ....
_اخ ايدي عفيه شبيك ...خلص خلص التوبه وخليها تجي .
_ماتحجين حرف ...
_اي بس لاتسوي هيج منا الجهال .
صعدت واني اكل بروحي اكل هضيمه يربي
من جنا صغار يكولون لاتستوي النعجه الجرباء مع الصحيحه .....ويكولون اذا صاحبتج مو زينه اتركيها وابعدي عنها شحال لو هاي اختي ....رضيعتي .....طول الطريق واني بنار .....وصلنا لبيت اهلي نزلت هي وجهالها اني مانزلت ...زوجي استغرب ؟
_نزلي ل اهلج ؟؟سلمي ....
التفتت عليه زفرت نفس قوي ....كتله"
_اطلع للبيت .....كبل
طفى السيارة و التفت علية كال"
_شبيج .....
_اطلع للبيت .
_الله يهديج .
*ايمان/نزلت لبيت اهلي دكيت الباب اخويفتح الباب استغرب جيتي ..
اني شافتني دكت على صدرها "
_شجابج ولج ،اخيتج وين مويمج؟ احجييي ...شنو تعاركتي ويه زلمتي احجي ...؟
بصوت مرهق كتلها"
_لا....جايه استراح ...واخيتي بيت زوجها حسيت نفسي محتاجه اجي هنا ...استأذنت من صكر وجيت ويه اختي ...
_لعد ليش ما اجت ....سلمت
_يمه تعرفين ابنها مريض ...
_يلا ادخلي هاي وكت عشى صار غسلي وبدلي لجهالج وتعالي ع السفرة....
اني هم دخلت سلمت على ابوي ومرت اخوي وكعدت اتعشى....
امي"
_يمه تره زلمتج خوش زلمه حافظي عليه الف من تتمنى اظفرة ...الف من تريدون وتتمناه ....
اني هنا غصيت ....قدمتلي ماي امي....
شربت وكمت ...دخلت للغرفه لكيت الجهال نامو.....
ضليت ادك غلى فؤاد مغلق يربي شلون هذا وين راح فلت ووووينه ...؟
ثاني يوم طلعت بحجه ملابس اشتري اخذت مها وياي رحت لمطعم الي يشتغل بي فؤاد مالكيته عيني ضلت تلوج منا ...منا بلكن الكاه....بس مالكيته ...سئلت واحد يشتغل هناك...
_اخوي اكلك
_اامري؟
_اكو واحد خطيه خوش وليد اسمه فؤاد يشتغل هنا..
_نعم
_ وينه اشو ماكو ؟
_والله خيتي بطل من الشغل البارحه ...
ها...وين ...وين صار اقصد ماتعرف وين راح يشتغل؟
_لاوالله ماعرف ..
_ها خويه مشكور...
عفت كلشي ورجعت للبيت يوم ويومين وثلاث ايام ادك ومغلق وطول الليل اباوع من الشباك عسى يمر...النوب اني ماعرف شي عنه ...اهله وين ...فؤاد شنو؟ اه ربي فوكاها صكر رايد يجي ياخذني ...اوك اوك زين اختي شيضمن سكوتها ....شيسكتها؟ ...
رجعت بغداد يم زوجي كان شيئا لم يكن ...
*هو انت لو تسكت وتبيع ضميرك لو تحجي وتتورط . . .
شسوي ....شسويييييي ضليت بحيرة عصبيه زوجي ملاحظ عليه العصبيه اخ يا ايمان شصخمتي شلطمتي بروحج وبينا....وهذا زوجي اذا غرف اختي (ك....ه)من الدرجه الاولى هههههه هيهات يبقيني على ذمته والله ل اصير علج بحلوكاليسوى والمايسوى ....
خر شي قررت قرار ...و مانفذته ....بس من عرفت ب ايمان رجعت لبيتها تسودنت ....تسووودنت دهر اي والله ....
كتله لزوجي اريد ازور بيت اهلك ...طبعا هو استغرب ههه مستحيل اخترع وجهه بدة يضرب الوان ...
اني هم اخذت الجهال ووذبني هناك دخلت سلمت كعدت اكيد شبعت بسامير من عمتي تكول"
_والله زمان الجنه تاخذ الولد من امه ...غيرتي ابني عليه ...(هههه صح لولا احجن بشرفجن نص نسوان العراق سامعات هاي الجمله).
بس ماعلينا لان اني براسي شغله واريد انفذها ...
عفت الجهال وطلعت للاسواق حتى اشتريلهم باوعت عبر الشارع جامع ووكت غروب وكت صلاه يعني امام الجامع موجود.....اخذت صندوقين ماي كلاصات خليت ولد يشيلهم ووصلت عود اريد اسوي ثواب ...لان اني اساسا كلت ل عمتي ام زوجي الي تحبني هواي ...
اريد اودي ثواب للجامع...واكيد ابو جهالي يشجعني...
وصلت للجامع كومه زلم واكفين وكفت على صفحه ....خليت الولد يخلي الصناديك يمي على جهه ....وراح
ضليت واكفه قرابه ٥دقايق الى ٧....اجه رجل كال"
_امري خيتي ....
نزلت عيوني بالكاع كتله "
_ما يأمر عليك عدو ...خويه ..
اريد امام المسجد وين الكاه ؟
_خير خيتي محتاجه شي؟
_اي والله مسأله
هذاك اياه....اصيحه الج...
راح يصيح امام الجامع ...
ضليت اشابك اصابع ايدي بقلق ...ردت ادير وجهي وارجع ..
اجاني صوت ...
_خير بنيتي ...
_عمي قاصدتك بموضوع..
_اتفضلي
_عمي لو وحدة اعرفها زنت خانت زوجها وخلفت بالحرام طفله والرجل ادمي ويصلي ويصوم وموفرلها ابسط احتياجاتها واني عرفت بخيانتها اله حرت بين اكوله واكول ل اهلها واخلص ضميري وبين اتركها على نفس الطريق ووواعرف حتى النصيحه ماتفيد وياها ..
_انتي خلصي ضميرج ....او بالاحرى انصحيها ولاتتدخلين ...
_شيخنا بس الرجال ...الرجال راح يضل نايم ورجله بالفي شلون .....
_اسئلج تنصحيها ....
_شكرآ....شيخنا ...
*عفته ومشيت كلت صوجي جايه اسئل شيخ عود .....شسوي ياربي شهالحيرة حسبي الله ونعم الوكيل بيج ايمان شجاي تصخمين بينا .....
رجعت لبيت عيالي لكيت زوجي جاي ....اخذنا ورجعت للبيت ...
*ايمان:الي فترة مختنكه مانام اخاف اطلع منا لهنا مدري شنو سبب اعصابي ضعفت الف مره باليوم افكر ب فؤاد وينه؟ ....
وبيوم من الايام نايمين بالليل جان اشوف صكر واكف كبالي ...ضل واكف بدون مايتحرك ...كعدت بس رمشت عيوني لكيته ماكو ..علكت التيبلام لكيته صكر نايم بصفي ...هنا كلت شبيه جاي اتوهم ...
وره يومين وكت الغروب نايمه اشوف صكر ماد ايده ويخنكني اصرخ ادفر بي ماكو فايده ..ضليت اعيط دخلو جهالي مرعوبين ..
خالد"
_ماما شبيج ؟
_ابوك ...ابوك ....
_بابا طالع...
_اه راسي ااااه جسمي يرجف امشي روح جيبلي كلاص ماي ...
الي فترة اخلي اشياء الكاها بغير مكانها ...بس اصرخ وابجي واتهستر دخيلك ربي شجاي يصير وافكر بس انتحر ...
صكر يجيني بالحلم يضربني طلقة براسي وافز من نومتي الكاه يلعب بحاسبته لو يخابر أصدقائه ...
تعبت اعصابي ....لو اني بالبيت وحدي واسمع احد يدك الباب واروح افتحها ماكو ....لو الكه الشبابيك مفتحه ...معقوله هذا فؤاد ________
