رواية ميراث الدم الفصل الواحد والعشرون 21 بقلم ليان احمد

أنا النصفُ الذي ضاعَ في العتمةِ

يبحثُ عن صوتهِ وسطَ الزحمةِ

أحملُ صدري كمن يحتضنُ

جرحًا تشظّى بدونِ تَرحمةِ

كأنِّي انقسمتُ على غفلةٍ

وتركتُ روحي بلا وجهةِ

أنا والصدى وجهٌ ممزقٌ

نحيا ولا نعرفُ الرحمةِ

صالح: ماااتكدرين تجين تكولين الحمدلله على سلامتك عمي بت السطعش كلببب ساافلة مكيفة بلي صارلي مووو عبالج خلصتي من سالفة الزواج .. لاتفرحين الليلة جاي الرجال يعقد عليج وعمج صادق بمكاني .. فنج ترفضين وتكولين لا .. اختج تنسحل بمكانج وهل مره لو جثة تصير بينه ادية هم ازوجها ...

تركتهم وطلعت روحي تفووور قهر بقيت افتر بالبيت وافكر بحالي .. 

شما احس بديت اوصل لبر الامان يرجعوني لنقطة الصفر.. يلزموني باخواني.. ويهددوني بسلوى ويعرفون سلوى مريضة ومستحيل تتحمل الزوج والمسؤولية .. اذا هي مجرد تتحرك شوية تتعب وتصير كوة تتنفس .. ولا اكدر اعاند واعرضها للضغط وممكن تطيح طيحة بعد اقوى من السابقة ..  

عدنان الي فكرت هو راح يخلصني .. مكالمة امة كلبت كل موازيني .. وين اروح وعدمن اعيش اذا اني حتى خال برأسه حظ ماعندي .. ما شفته بيوم دك بابنه وسأل عن جهال اختة .. عمتي حتى شكلها ناسيتة .. ولا اندل مكانها 

بس الي اتذكرة هي حنينه وتحبنه .. 

كعدت وبقيت ادعي واستنجد .. بلكي الرجال ما يجي اليوم .. بلكي تصير معجزة تغير كلشي .. بلكي يموت الرجال .. ومثل العادة دعيت ودعيت ودعيت واستنجدت 

بس رب العالمين .. يمكن يريد يأجرني من يأخر الاستجابة ويريد يمتحن صبري أكثر بعد .. يمكن يشوفني اني اقوى من هيج واكدر.اتحمل أكثر 

جريت نفس بتعب وكلت بروح ممرودة : لا اعتراض على حكمك يارب الي تشوفه انت اني راضية بي .. 

حتى لو تزوجت هل رجال .. خلي احط الاحتمال الزين .. بلكي يطلع خوش رجال .. واطلب منه اخواني يبقون وياي 

بلكي اكدر اتحرك وامشي براحتي .. 

صفنه تأخذني وغيرها ترجعني .. وصوت صالح المتوجع كل شوي ينبهني من صفنتي ويشفي كلبي ..  

                                          

              

                    

رحت للمطبخ كلت اسوي شوربه تمن حمرة لإخواني يحبوها .. وبالذات من افرشها الهم بصينية .. قررت اليوم ما اخلي اي شي ياذيهم لو يقهرهم .. اريد أفرحهم .. اطفال تعبو وماشافو غير التعب والاذية .. قررت اخصص اليوم كله الهم .. واخلي الي بكلبي بكلبي .. ميخالف كلشي يهون .. املي برب العالمين حيل جبير واكيد ما راح يتركني بحالي .. 

دست على وجعي .. ولبست قناع الابتسامة المزيف .. 

ورحت للمطبخ .. طلعت تمن غسلته ونكعته .. فتحت الثلاجة.. طلعت منها فلفه خضرة وكرفس .. جبت راس بصل ووفصين ثوم .. وبلشت اسوي بيها مثل ما هم يحبوها بطريقتي .. 

اسلك التمن الابيض.. لحد ما ينمرد كلش .. وعلى صفحه بطاولة احمس بصل وفلفل اخضر وثوم وكرفس وفوكهن ادير المعجون .. واديرة على التمن الابيض واسويها خفيفه شوي مو كلش ثخينة .. واتركها على التهدير 

حيل يحبون هذه الطريقة وافرشها الهم بصينية تبرد .. 

سويتها الهم بكل حب .. وبعد ما كملت وصبيتها .. اخذتها للغرفة ودخلت.. لكيتهم يلعبون دعبل وسلوى تباوع عليهم 

بسملة:شووووفو شنووو سويت الكم اليوم هي هي عيوني 

فزو من مكانهم فرحانين حجى وعد

: الله ولله شميت ريحتها وعرفتج جاي تسويلنه الشوربه الي نحبها 

بسملة : الف عافيه سويت جدر شكبرة اكلو وشبعو وإذا تردون اصبلكم بعد .. يله سلوى عمري اكلي 

سلوى : ريحة الشوربة تجيب التايه من شميتها جعت 

حجيتها متباهيه بروحي :مدي ايدج يله وذوكي عمايل اختج 

: اليوم الوجه يضحك .. اكيد فرحانه بالي صار ؟ 

حجيت واني اخذ خاشوكة : ليش شصار 

سلوى: الي صار بعمي صالح يعني 

اخذت من الشوربه وخليته بحكلي ورديت

: الشماتة مو حرام .. بس اني شمتانه .. وان شاء الله ابو زايد .. ومع ذالك مو هذا الي مفرحني اساساً ماكو شي مفرحني ..

سلوى: مو اشوف يعني الج واهس جنج مرتاحة 

دنكت راسي وابتسمت ابتسامة جذابية وسحبت نفس : ايي .. مجرد ذبيت حملي على ربي هو يتكفلني لأن تعبت 

من المكافش 

            

              

                    

حجت بخوف وارتباك واضح على ملامحها

: يعني شنو بعد اذا تعاركو ويانة ما تدافعين النة.. لو راح تقبلين يزوجوني لرجال جبير 

خليت عيني بعينها

: سلوى اني من كلت الج نطلع منا ونبني حياتنه بعيد عنهم .. واكسبكم واكسب نفسي .. انتي شنو جان ردج ؟ تتذكرين اكيد .. من كلتليلي لتصيرين انانيه وتبهذلينه .. كلتي وين نروح و وين ننطي وجهنا .. كلتي اني ما اروح وياج لمكان واخسر احساسي بالأمان 

مو هذا كان كلامج ؟ اني قررت اخذ بي وما اصير انانية وافكر بنفسي .. ولخاطرج اني راح ابقى وما نروح لكل مكان . 

سلوى: يعني شنووو راح تقبلين يزوجوني لا بسمة فدوة اروحلج ولله اموت 

بسملة: لتخافين اكيد ما راح اخليج تتزوجين .. اني الي راح اتزوج 

سلوى: وتردين تعوفينه وتتزوجين واحنه ما فكرتي بينه شصير اذا رحتي وتركتينه .. ليشش بسملة من اكلج انتي انانيه تزعلين مني .. يعني وافقتي تتزوجين .. ما كلتي اخواني وين اتركهم.. 

إنفعلت عليها من قهري

: شسوووويي كولي شنو اسووووي اذا بكل الحلول انتي ما قابله شسووووي وشتصرف فهميني .. تدددرين محد اناني غيرج .. 

يااااريت ياااااريت مثل ماجبت عمري افكر بيج مرة وحدة بسس انتي تفكرين بيه .. 

قبل ما ادوس وياها زايد بالحجي واضغط عليها لزمت اعصابي ولساني و غمضت عيوني بقلة صبر ولعنت الشيطان .. كااافي سلوى كااافي ... 

أشرت بايدي على خشمي بزعانه 

: تررره هناااا وصلتت هنااااا 

نفس منج ما اريد اسمممع بعد .. وتركيني اني اتصرف وانتي الج الراحه وبسس .. مثل ما ساحبه نفسج من كلشي .. اسحبي نفسج من هذا الموضوع هم .. 

رعد حجى بعصبية اطفال : سلوووى انتي شبيج ويه بسملة ليشش تقهريها .. بسمة تحبنة وكل مره تكوم تبجي من وراج .. 

باوعت سلوى اله بعيون مدمعة

: حتى انتو تكروهوني لأن خوافة ومريضة وما ادافع الكم .. انتو تحبون بس بسملة لأن هي تدافع الكم بس اني ما تحبوني .. 

حجت هيج وبجت وجعت كلبي بدموعها وكلامها باوعت لرعد بزعل خليته كام الها من مكانه وتقرب يمها

: لا سلوى ولله نحبج احنه .. نموت عليج 

            

              

                    

وعد : اي ولله سلوى غير انتي اختنه نحبج 

بسملة: كافي سلوى هسه انتي من كل عقلج تبجين من كلامهم شبيج .. 

حجت وهي مخلية اديها على وجها وتبجي

: لا اني مقهورة من نفسي .. حقهم اذا ما حبوني .. اني باقية بس كاعدة بمكاني مايوم دافعت الهم ولا يوم خدمتهم ولا يوم اشتريت الهم .. كله انتي .. 

بسملة : كلشي مانريد منج اهم شي تكونين بخير حبيبتي كافي لتصيرين زعطوط عاد وتزعلين من حجيهم كاافي .. 

بقت الدموع بعيونها .. وكملت اكلها بصمت .. من كملو اخذت الصينيه للمطبخ اغسلها .. قررت العصر اروح للسوك 

اجيب كم شغلة لاخواني افرحهم بيها .. 

صوت الجرس مال باب ندك .. طلع عمي صادق للباب لأن اليوم بقى ما راح للمحل خاف يجي احد خطار .. 

وصوته يهلي ويرحب وصوت زلم .. واضح خطار على عمي صالح .. دخلهم للستقبال.. ورجع راح لغرفة صالح .. ساعدة يكعد على عربانة.. والثاني يتألم بقوة وبصعوبة كعد على الكرسي وطلعه من الغرفة يدفع بي .. 

طلعت من المطبخ وصارت عيني بعينه .. منضرة .. لو واحد بمكانه جان صدك كسر خاطري.. ماباقي بي عظم صاحي .. رجلي ثنيهم مصبوبات وحده بس القدم لحد الكاحل والثانية مصبوبه لحد فوك الركبه .. الرأس ملفوف والوجه ازرك والادين ملفوفات باندج .. وركبته مخليلها مسند .. يمكن لو باقية كدامه لحضه بعد جان طكيتها ضحكة بوجها بس لزمت نفسي ودخلت المطبخ بقيت اضحك وكوة كاتمة صوتي .. 

طلعت جبرية تصيح :عمررران .. وين عمران ؟

بسملة: ما ادري بي شعرفني 

طلعت فلوس من جيبها : هاااج روحي جيبي قواطي بسببي وسفن بسرعه من المحل .. 

بسملة: اني اروح بهل ضهاري للمحل تردين 

جبرية: وشنوو راح يصجموج بالشارع لو تنخطفين .. امشي ولي جيبي وتعالي بساع وجيبهن باردات اقدمهن للعالم يله .. 

جريت الفلوس منها ورحت لبست عباية خليتها شلون ما كان على راسي وطلعت للمحل .. الدنيا ضهر وتحمس حمس .. اكو خطار يجي هيج وقت ؟ شكد ما عدهم ذوق .. 

بسرعة ركضت للمحل جبت قواطي بيبسي واشتريت بطريقي لخواني ورجعت انطيتهم لجبرية ورحت انطيت الجباسه لرعد و وعد ورجعت كعدت بالهول اباوع على التلفزيون .. 

واسمع كلامهم بالاستقبال لأن بابها صاير على الكليدور مفتوح نصه وهم أصواتهم عالية .. واضح ذول اصدقائه اهل المحلات الي بالشورجة جايين من سمعو بالي صاير وياه .. 

وهو كعد يشرح ويسولف الصار وياه .. نصيت التلفزيون وفتحت اذاني عندي فضول اسمع .. .

            

              

                    

صالح: جان عندي زبون مشيته .. وصادق طلع قبلي .. كتله أعزل واجي وراك .. عزلت وركبت سيارتي وراجع للبيت .. لنص الطريق حسيت سيارات ثنين لاحكاتني .. وصارن يمشي بصفي من الجهتين .. حاولت أفلت منهم 

ردت ماكو بقو وراي وراي .. وكتها تأكدت ذول قاصديني ..بقو يجيبوني منا ويردون مني .. لحد ما شفت روحي دخلت بشارع اظلم .. وفارغ كسرو سيارة كدامي وسيارة وراي .. 

زرفو السيارة بالرمي .. اول ما رمو على التايرات فششوهن رجعو ماخلو جام ولا خلو بيبان .. 

واضح كلش زين ما جانو رايدين يموتوني .. لأن لو رادو يموتوني جان طلقه ضربوني وفضوها .. بس نيتهم يسلبوني .. المهم .. اني نمت جوة الكشن احمي روحي من الرمي .. 

وره شوي سكت صوت الرمي .. ونفتح باب السيارة ونجريت .. وبنص الشارع اربعة هم بالتواثي فلشوني .. رجلي من الضرب تكسرن وصرت ما اكدر احركهن من غير البوكسيات على وجهي وعلى بطني والدفرات .. واخر شي ختموها .. بالرشاشة على راسي 

ومن ضربوني على راسي اني بعد ما حسيت بشي الدنيا طفت بعيني .. فتحت عيوني بالمستشفى.. والسيارة مادري بيها وين راحت وبيها فلوس دخل ما يومين المحل كله راح 

يحجي هو واني كأنما جاي يعزف سمفونية على اذني .. 

حجى واحد من الكاعدين 

: ولكم كل هذا الرمي ما واحد من الجيران شالته الغيرة وطلع يشوف شكو 

رد علي واحد ثاني : خويه بهل وكت الناس تخاف وكلمن يكول ياروحي محد بحال أحد .. يله ابو مهدي فداك كلشي وان شاء الله تكوم بالسلامة كله يتعوض السيارة والفلوس بس العمر ما يتعوض .. 

صالح : اوووف شيعوض فلوسي دخل مال المحل والسيارة بذاك الحساب ماصار سنه من جبتها خرطوها خرط واكيد هسه سلبوها هي والي بيها 

رد نفسه الي جان يحجي : يمعود صدك جذب المهم طلعت بريشاتك ياسيارة يا فلوس .. 

بقو يسولفون بأوضاع البلد وشلون نصها هاجرت وشلون الدنيا تخوف .. مر ربع ساعة ترخصو وراحو .. 

وعمي صادق طلب من مهدي ينزل الجرباية مالته ام النفر بالاستقبال لابو لأن خطار يجي ومايكدر كل شوي يروح ويرجع .. نزلوها ونصبوها بالاستقبال وضل عمي صالح .. بيها لحد ما صارت عصرية كمت بدلت ورتبت روحي .. وأخذت من الفلوس وصحت لوعد 

: تروح وياي للسوك 

وعد: صدك ؟ شنو تشترين 

: اريد اجيب الكم ملابس تعال وياي 

رعد: لعد واني ما تاخذيني 

بسملة: رعد حبيبي ما يصير سلوى تبقى وحدها وانت قوي وسباعي اريد اخليك يمها واني ما أتأخر 

            

              

                    

ضاج بس ما علق : لعد اريد طوبة عمران ما ينطي الطوبة مالته نلعب بيها 

بسملة: من عيوني اجيلك طوبة تخبل وبعناد عمران 

قشمرته وتركته يم سلوى وأخذت وعد وطلعت 

جبرية بالاستقبال يم عمي صاحتني

: تعااااي وين رايحة شو بكيفج انتي تطلعين وتطبين؟ لو شفتي عمج تكسر كلتي امشي بكيفي .. ؟ 

دخلت واني احاجيها وعمي نايم نومة عميقة 

: الحمدلله ما يوم مشيت بكيفي .. وما اطلع الباب اذا ما عندي شغل ضروري 

حطت اصبعها على خدها باستهزاء

: وشنو يما شغلج الضروري هسه بس لا الشركة اتصلو بيج محتاجين توقيعج .. لو خاف تردين تشردين ولج 

لزمت لساني وماردت اتعارك واني وعدت نفسي اليوم ما اسوي شي يغث اخواني

: ولو اريدة اشرد اخلي سلوى ورعد يمج ؟ .. رايحة اشتري ملابس لاخواني ملابسهم تشككت عليهم .. وبلكي احصلي تلفزيون قديم اخلي بغرفتنه بدل ما باقين حسرة علينه نتابع شي 

باوعتلي بشك : ومنيلج فلوووس شنووو طالع ورث الخلفوج وماندري 

بسملة: ولله اذا على ورث الخلفوني انتو اعرف بي وين والمن رايح .. ما ماخذة من جيسج .. ذهبات امي الي ضلن من ريحتها راح ابيعهن واشتري ملابس لاخواني 

رجعت ضهرها على القنفه وحجت

: خوشش لعد روحي وبطريقج جيبي لج هدمة حلوه لبسيها لخطيبج احسن ما تطلعين كدامه بهاي الجروايد .. 

جريت وعد من ايدة وطلعت لو ابقى يمها بعد شوي اسحلها من شعرها وانومها بصف رجلها .. 

طلعت للشارع ومشيت ركبت نفرات تذبني بالسوك القريب يمنا .. وعد رغم طلعه حيل بسيطة بس شفت فرحة جبيرة بعيونة .. حلفت وأخذت عهد على نفسي ما اقصر وياهم بشي كد ما اكدر .. 

نزلنه للسوك وصرنه نفتر بمحلات الملابس .. وعد يمشي ويتلفت واحس عيونه تريد تشتري كلشي .. بس ما يحجي. حبيبي حقه وين شايف سوك هو من صار ودار هو ورعد ما دخلو سوك لو احد اشترالهم لو فرحهم .. 

اخذتله ملابس طلعه وبيت على ذوقة وخليته يختار لرعد هم لأن هم نفس الذوق ونفس الجسم كلش 

اخذتلهم أحذية .. وأخذت طوبة الهم .. وجيس دعابل 

دخلت محل ملابس نسائي .. اخذت لسلوى والي دشداشة وملابس داخليه ونفنوف طلعة وحذاء مرتب وقراريص شعر ومعطر وشامبو ومرطب .. 

حملت علاكة شكبرها .. وبطريقي مريت على مصلح كال تلفزيونات كلت اشوف بلكي احصلي تلفزيون ..

            

              

                    

دخلت لكيته حاط راسه يصلح بتلفزيون : السلام عليكم عمو 

التفت إلي وترك الدرنفيس من أيده : وعليكم السلام بوية 

: عمو احصل عندك تلفزيون للبيع يكون شغال ونضيف 

اشر بايدة على مجموعه تلفزيونات احجام كبار : اي ذني للبيع وكلهم شغلات وصورتهن حلوة .. 

رحت اباوع عليهن واختاريت واحد جبير وسالت على سعرة: بيش هذا 

: هذا ب٨٠ 

: عمو بس هو موجديد شدعوة 

: ولله اخو الجديد ما مستعمل غير كم يوم وصاحبه احتاج وباعة .. 

: مابي مجال كلش 

: لا ولله اني صاير عليه ٧٥ يعني ربحي بس خمسة 

واني شغلي اشتري الحاجة وابيعها حتى اربح وهو صاحبه محتاج وباعه بهيج سعر الا هو اغلى بعد 

: ماشي راح أخذه هذا .. 

: بالعافية .. تردين وياه تسلايت هم عندي مستعملات هن والصحن 

: اي ولله اريدلي ستالايت هم 

جر ستالايت .. هذا هم مستعمل بس شغال هو والصحن .. ب40 الف .. 

وعد: صدك بسمة رح تشترين النه تلفزيون وستيلايت هله هله 

بسملة: اي حبيبي بعد تباوعون براحتكم محد يضوجكم .. 

نطيت فلوس التلفزيون والستلايت واشتريت واير وفيش بس حرت اشلون اشيلهم .. شفتلي عربانه دفع أجرته وخلاهن بالعربانه .. واجرتلي تكسي مو مال نفرات واحوكل بالتلفزيون .. 

همزين من رجعت لكيت محمد ابن عمي كاعد بالباب على الأقل هذا بي هدة .. 

بسملة: حمودي فدوة ساعدني اخيتك 

محمد: ها هاي شنو جايبه تلفزيون 

: اي ولله اخلي بغرفتنة واريدك تنصب النه الصحن وتسويلي القنوات لأن ما اعرف بي فدوة 

رد ووهو شايل التلفزيون يدخله جوة

: صار بعيني اليوم اطلع الج كل القنوات الي ترديها.. شتردين بعد ؟ 

: اريدك سالم ولله بس انت الوكفاتك حلوة 

: تددلين يمعودة 

وعد دخل كدامي يركض شايل العلاليك ويبشر برعد اجانة تلفزيون ورعد طلع يركض ما مصدك 

مجرد فرحتهم الي ملت كلوبهم من شفتها أحسها خففت عن كلبي حمل شكدة وشكبرة .. 

            

              

                    

لاكتني فاطمة وصادق كاعدين بالحديقة يشربون جاي صاح عمي صادق : تعاي تعاي  

رحت وكفت كدامه وحضرت نفسي لكم كلمة وسمم الكلب : كول عمو 

حجى يستفسر بشك : شو محمله وجايبه تلفزيون وستيلايت وعلاليك منيلج هاي الفلوس ؟ 

: عمو اخواني ملابسهم مجرودة .. والتلفزيون كل مايكعدون بالهول يباوعون محد جاي يخليهم بعت ذهب امي هن قطعتين .. باقيات منها نجبرت ابيعهم جبت ملابس الهم وتلفزيون قديم مستعمل 

اخذ شربه من استكان الجاي ورجعه الصحن

: وانتي بكيفج رايحه تشترين وتجيبين سألتي احد اخذ رأي أحد لو من كيفج 

: واني وين رايحه قابل .. شنو اول مرة اطلع السوك شو جبت عمري جاهل واني اروح وحدي اجيب دوة لسلوى وارجع .. أحد سال كال هاي بنيه خاف يصير بيها شي .. واحد منكم بيوم اجه جايبله ملابس جديدة النه وكال ذول يتامة ملابس ماعدهم .. اشوو باقين محد سائل بينه ولا جن عايشين وياكم بنفس البيت جهالكم كل شهر ملابس جديدة كل عيد وكل دوام ملابس جديدة واحنه نباوع و نتحسر .. وهسه من رحت اريد افرح اخوتي بشي صار حرام عليه وتحاسبوني شنو مسوية جرمت .. 

فاطمة: شوف شوف اللسان لسان دلالة حية وتبخ سممم 

عوفها عيوني عوفها تولي لاتحرك كلبك من وراها .. 

سكت فاطمة ورجع يحاجيني : اسكتي انتي .. 

ولج بسملة بسملة من تحجين وياي عينج خليها بالكاع ولله افكسها الج هاي عيونج الصلفة لاتخليها بعيني وتجادليني .. وحق الخلقج افنيج تفهمين لو لا افنيج ولله 

ودوس عليج برجلية .. 

تعمدت اخلي عيني بعينه أكثر واكله ببرود : انت اكبر مني .. بالعمر وبالقوة وبالمال تكدر تضربني وتفنيني وتكدر كلشي تسوي .. بس مدام رب العالمين من فوك يعرفني مظلومة.. جاي يمدني بالقوى من يما ويخليني مقاومة .. 

رد عليه بصوت عالي : منو انطاج الإذن تتصرفين بكيفج وترحين تبيعين ذهب أمچ، وتجيبين تلفزيون وستلايت وعلاليك مترسه 

رفعت راسي، وثبّتت عيوني بعينه… نظرة قوية، جامدة، عدوانية تعبر عن كل احساس بدوخلي اتجاهه 

: إنت من الناس اللي مايوم سالت ولد اخوك شنو لبسو بعيد لو بمدرسة .. اخواني من يكعدون يباوعون على التليفون بالهول ينهانون ويجون الدمعة بعينهم مطرودين . اليوم تحاسبني عالتلفزيون؟ تحاسبني عاللعبة بيد طفل يتيم؟ 

ذهـب أمي؟ إيه بعته صح غالي عليه وبيعته وجعت كلبي بس مو أثمن من كرامة أخوتي اللي تنداس يومياً بهذا البيت وهمَّ يتحسرون على هدمة زينة لو افلام كارتون يشوفو بالتليفزيون 

            

              

                    

سكت لحظة وصفن ، حسيت نبض عينه يرعش حتى اني استغربت سكوتة .. بس كملت كلامي 

:إنتو چنتو أولى تسألون بينا … وين راح حق ابوي ليش إحنا نتحسر وأنتو تنطون لأطفالكم كل شي جديد وحلو وتفرحوهم ؟ ليش ما حد سأَل عن اختي المريضة الي كل يوم اكعد الصبح اكول يمكن ما صبحت 

صادق بلع ريگه، حاول يبعد نظره، 

:أنا ما طلعت أطلب فضل ولا ردت انزل نفسي اكثر واطلب من أحد فلوس لأن ضايكة الذلة من أريد منكم شي .. طلعت أفرحهم شوية بلبسه جديدة … بس حتى هذا ما عجبكم لازم نبقى مجرودين ومذلولين حتى كلبكم يرتاح .. وكأنما احنه خلفة غريب وانتو متصدقين علينه بكعدتنه مو خلفة اخوكم .. 

بس لتنسى شي، عمي… اني بت صابر وسمية صح.. بس اني لا نفس صابر ولا نفس سمية .. اني رب العالمين زرعني برحم امي مخصوص حتى اعوضهم عن كل الي صار بيهم .. 

صادق ظل لحظة ساكت، گأنه السانه تخدر . باوعلي بنظرة مو بس غضب… بيها شي ثاني، شي يشبه الخوف، بس يحاول يخفي بستار الغل والقوى المزيفة .. 

رفع استكان الجاي بسرعة، شربه بنفس واحد، بعدين رجعه على الصينية بقوة، وانكسر طرف الاستكان.

"لج انتي شنو؟ شنو صاير بيج؟ منين طالعلج هالصوت؟ ها؟ كل يوم ابقى صااافن ومتعجب على كمية الصلافة الي شايلتها انتي .. انتي مو بشر انتي اآفه 

قام، نفض دشداشته، وسحب صدره للكدام ، يتقدم يمي .. 

بسملة : ربك يسلط آفه على آفه 

خله وجها بوجهي : صرتي تصيحين بوجهي؟ نسيتي نفسج منو؟ نسيتي منو رباچ وگبرچ نسيتي كل هذا وهسه واكفه تلاسنين بيه ولججج 

: الضيم والقهر والألم والحرمان هن ربني واني وربيت اخواني ومحد اله فضل علينه بشي 

:انتي وحده مايفيد وياها الطيب الضاهر لا گدرنا نربيج، ولا صلحناچ طلعتي مثل عمتج ، راسج يابس، وصلفه وحاقدددددة .. 

صاحت فاطمة : هااااا بس بس صادق، شبيك؟ الدنيا نهار، الجيران يسمعون صوتك يمعود طبها مرض عليمن أنت حارك كلبك .. وحده عايقة 

صادق رجع باوعلي، يحاول يرجع صوته ناصي 

:لتسوين روحج قوية عليّه، تره آني أعرف شلون أكسرچ… وأخليچ تتمنين الموت ولله .. 

رفع إصبعه بتهديد.. اني الج يا بت صابر .. هذااا لسانج اذا ما بترته ما اطلع زلمة طالع من ضهر ابوي 

كل شي تسوينه محسوب عليچ… وكل خطوة تخطيها ضدنة راح تندمين عليها ولله والي اسمه الله .. ديربالج على نفسج مني ..وخلي ابالج تره تاركج وساكتلج بمزززاجي ..

ولي جوه… خلقتج ماريد اشوفها اليوم لحد ما يجي الرجال ياخذج ويخلصنه منج .. 

            

              

                    

بقيت واكفة، ما تحركت، بس گلتله بهدوء.. 

الله فوكك، كل ما تريد تأذيني… لا تنسى هو أقوى منك .. واذا هو راد ينصرني ماكو قوى بالكون راح تكدر تكسرني ..  

طلع محمد من بره بعد ما راح دخل التلفزيون ونصبه اجة

: بسملة خليت التلفزيون على الكومدي والستلايت فوكة بقى اصعد انصب الصحن واشدلج الفيشة 

: تسلم محمد ما قصرت احسن من غيرك سبحان 

فاطمة: انت شنو صاير ابو ستلاياات وتنصب وين تعرف تسوي ستلايت 

محمد: يوم شنو يرادلها شبيج  

عفتهم يحجون ودخلت للغرفة .. لكيتهم مسويها سوك هرج الملابس مطشرة ويكدرون بيهن هن والاحدذية وطايرين فرح وسلوى واكفة تكدر بالثوب وترش من العطر 

سلوى: شكرا بسومة على هاي الاشياء 

بسملة: لاتشكريني سلوى اني ما مسوية فضل عليكم ولا من جيبي هذه الفلوس من امي .. 

سلوى: بس انتي الي جاي تقدمين ألنه كل هذه الأمور 

رحت يمها حضنتها من ضهرها وهي واكفة

: حبيبتي انتي لو اكدر اسوي اكثر من هذا ما اقصر ولله 

تركتهم بفرحهتم بالاغراض وبقيت يم محمد يسوي بالصحن ويثبته بمكانة .. رجع نزل رتب الستلايت ووشغل التلفزيون خليته على كومدي خشب قديم مال امي .. مخلين بي كتب رعد و وعد .. شغلة وكعد يرتب بالقنوات ويبحث .. طلع النه كل القنوات الي نريدها 

رعد. وعد يصيحون تريد سبيستون .. وسلوى تريد.الmbc تشوف عليها مسلسلات تركية وتريد روتانا سمينا تشوف افلام مصرية 

كل واحد يريد شغلة الا اني .. ماعرف شبيه .. ماعندي هواية بشي .. لامسلسل مفضل .. لا قناة مفضلة .. ولا اي شي مجرد اباوع ويه اليباوعون .. 

لحد المغرب كلش يله كمل محمد التلفزيون وطلع قناة سبيستون وكعدو رعد وعد كدامها اصنام ما طلعوا من الغرفه طايرين فرح بالتلفزيون 

واني كل ما يتقرب الليل .. كلبي ينعصر أكثر. أكثر .. عيني على الساعة واذني يم الباب خاف يجي هذا صدك .. 

الكل تعشى ومرتاح .. واني كلبي نار لا راحه مرت بي ولا اطمئنان .. وكفت بالمطبخ اغسل مواعين العشاء بعد ما كملو وصاحتني فاطمة اغسلهن .... كوم اماعين ادي تطيح لحد ما اخلصهن .. ومنى بت صادق مددللة عود من الكاع ما تشيل .. وذيج الثانيه مثلها 

رجف كلبي قبل ايدي وفلت الماعون مني غمضت عيوني حيل وبلعت ريكي ويه وصوت جرس الباب .. 

بقيت بمكاني ثابته وصوت عمي صادق راح فتح الباب وهو يهلي ويرحب ودخل رجال واحد للاستقبال 

حسيت دكت ساعة الصفر .. واذا عاندت راح يرجعون على سلوى اسلوبهم الحقير حفظتة .. قررت بلا اي صياح ولا اي هوسة اوافق .. ورب العالمين يتولاني .. 

دخلت عليه غراب البين فاطمة 

: عوووفي كلشي من ايدج وروحي بدلي ولبسي شي مرتب يله الرجال جاي يشوفج .. 

باوعت الها ساكتة ورجعت حجت

: ما تفضيها شبيج واكفه تاخذيلي صورة ؟ روحي بسااع .. 

سالتها بكلب متعوب وحزين : تقبلين وحدة من بناتج هيج يصير بيها 

فاطمة: يما اسم الله على بناتي بيش طالبتهم 

بسملة: دعوة يتيمة مكسورة خاطر مهضوة .. اريد كون تشوفين يوم يفرفح روحج للسماء وينزل راسج للكاع ورأس رجلج للكاع ..

ويه ما تقربت تريد تهد عليه دخلت جبرية  

: امشششي ولج امشي عدلي روحج فضيها 

فاطمة: ولججج خليني اكص لسانها هل كح***ة تدعي علينه 

جبرية : مووو وكتها هسه مو وكتها .. وانتي ولي فضيني لبسيلج شي برأسه حظ يطلع بيج شوفة لايشرد الرجال من يشوفج مبهذلة. 

تركتهم ورحت للغرفة .. مستسلمة الأمر الواقع .. طلعت الثوب الجديد الي اشتريته .. سلوى واخواني فاتحين عيونهم على التلفزيون طايرين بي وحاولت ما احسسهم بشي ابد 

سلوى : ها راح تدشنين ثوبج من هسه 

بسمة: اي كلت البسه وافرح روحي بي شوية عود انزعة قبل ما انام 

سلوى: اني ضميته البسه بالعيد 

بسمة: يمج عيد يمعودة لبسي واني اجيبلج غيرة عود 

اخذت الثوب وطلعت بدلت بالحمام ومشطت شعري على مراية الحمام .. صاحتني جبرية لغرفتها .. تركت المشط ورحت وراها دخلت 

بسمة: ها عمة 

جبرية: تعاي هاج حطي كحله وشوي حمره خفيفه حلكج ابيض وعيونج عمص 

بسملة: ماكو داعي احط شي هاي اني بدلت وعدلت روحي بعد شنو ترودون اكثر 

جبرية: ومرض بصووتج .. لايسمعج الرجال عررررمه هاااج حطي. ونجبي .. وشوفي سمعيني زين .. تدخلين تقدمين العصير وجهج كون يضحك مو مكلوب.. وتكعدين ما تطلعين وشنو يسالج تردين عليه .. تفهمين لو لا .. شايفه اذا سويتي شي وفشلتي عمج كدامه ولله يا بسيمة ازوعج العافية.. تره عمامج متحلفين بيج حلفه وكوة لازمتهم اني منج هذا صادق على طلعتج اليوم حالف يحبسج بالمخزن الي بالسطح بنص الحر .. وتعرفين بي يسويها 

بسملة: ايييي اكيد اعرفه شغله الحبس بالم

ب

المخزن مو جديدة عليه .. 

جبرية : خوش لعد مدام تعرفينه ما يتشاقة تحترمين نفسج وتجرين عدل وشنو يكولوج تكولين تم .. واذا سويتي عكس الي يردون بكل سهولة سلوى موجودة وذيج لاتفتح حلكها ولا تتنفس .. كبل تخاف وتكول اي .. 

هاااج تكحلي يله واريد وجهج مبتسسسم .. مفهوم ؟ 

الفصل الثاني والعشرون من هنا