رواية تبديل عريس الفصل الثاني بقلم جمانه السعيدي
سلسبيل....تكررت زيارات بابا البغداد تقريبا بلاسبوع الواحد مره او مرتين
وكل مره يروح للدائره الي تشتغل بيها امي حتى يشوفها
ماما كانت سعيده بهاي العلاقه
كأنما كانت تعرف بابا من زمان وتنتظر تلتقي بي
هو فعلا كان يحبها وهي الحب الاول بحياته
كان مستعد الاي طلب منها
بس تستمر هاي العلاقه بينهم
من غير التليفون ماكان يفوت يوم اذا ما يكعدون يحجون كل تفاصيل يومهم بلتليفون
ماما كانت سعيده بشكل غير معقول
هو هذا الإنسان الي ممكن يفهمها وتكمل حياتها ويااا
سلسبيل...العلاقه بين ماما وبابا استمرت ٣ اشهر
مكالمات تليفونيه ولقائات اللقاءات بينهم محددوه
من يكون بابا عنده شغل بغداد يتفق هو وماما
ويطلعون مكان
كانت العلاقه بينهم علاقه محترمه مابيها اي تجاوزات
فقط كلام عن حياتهم الخاصه
من بعدها اتفقو على الزواج
جمانه السعيدي
امي ماكان عدها اي شرط ولا مطالب خاصه فقط الشرط الوحيد تعيش بغداد
ما تروح تسكن يم اهل بابا هذا الشرط الوحيد
اما باقي الأشياء متفق عليها
ووافق بابا على هذا الشرط لان يعتبر شرط بسيط
بلنسبه اله
امي...اني مثل السمج مااكدر اطاع من بغداد اذا اطلع اموت
محمد...عادي ماكو مشكله بس مراح اكدر اكون متواجد
طول الوقت هنا لان شغلي الأساسي هناك
سميره...ليش ما تنقل شغلك هنا بغداد بيها شغل خير من الله
محمد....مااكدر عندي شغل ما ينقل هنا ابد
عندي قضايا تخص العشيره ومكتبي هناك وعندي ناس
وزباين متعودين عليه
صعب انقل شغلي هنا
اخوي يعتبرني اهم ذراع للعشيره
سميره...براحتك ايجوز بعد الزواج تغير رائيك
محمد...مااعتقد
سميره....نشوف ايجوز تتغير بلنسبه للسكن اني وياك شلون
محمد...نستأجر بيت وناثثه ونسكن بي الحد ما نشوف الوضع شلون يستقر بعدين
سميره...ابقى وحدي منا لمن تجيني اذا عندك قضيه
محمد...لا راح انزل جمعه علمودج واذا عندي قضيه
هم اجي يمج
سميره....بس جمعه ابقى منتظره لو تصير قضيه
محمد....تعاي نعيش بمحافضتي
سميره...لا لا مااكدر اني مااكدر اطلع من بغداد
اذا اطلع من بغداد اموت
محمد...وراح تصبرين على فراكي شوفي اذا
ما اسبوع اسبوعين وكلتي اخذني وياك مااكدر اصبر على فراكك
سميره...واذا انت اجيت وكلت مااكدر على الفراك اريد اكعد بغداد
محمد....تعاي نشوف منو الي راح يتنازل ويروح يسكن يم الثاني
سميره....خل انشوف منو الي يكدر على البعد ويصبر
محمد...خاف يومين وتكومين تبجين لا تعوفني مااكدر على بعدك
سميره....لا مراح ابجي اطمن
جمانه السعيدي
محمد...اخذي موعد من أخوج حتى اجيب اهلي واجي اتقدملج
سميره...انشاء الله بس احجي ويا اهلي بهذا الموضوع
بيومها بليل قررت امي تفتح هذا الموضوع وياا اهلها
وخاصه هي سئلت عن ابوي وعرفت اهله فعلا ناس
محترمين وشيوخ والناس كلها تحلف بيهم
سميره...امي انتي وأركان اريد احجي وياكم بموضوع مهم
بيبي... اي كولي ترا اني حاسه اكو شي
هليام هواي تحجين بلتليفون وهواي تكعدين بغرفتح
اركان...اكو شي جديد اني مااعرفه
سميره. اكو شخص يريد يتقدملي
اركان. اي بيها الخير منو هذا نعرفه وياج بلدائره
سميره...لا محامي من محافظات الجنوب ابن عشائر
وناس محترمين اجا عنده شغله بلدائره
وشافني ويريد يتقدملي
بيبي...يااا من المحافظات لا يمه شلون تعوفينا وترحين
المحافظات اطباعهم مو مثل اطباعنا وانتي مراح تكدرين تعيشين هناك
سميره. .لا اني راح ابقى هنا بغداد
اركان...يعني هو يجي يعيش هنا بغداد
سميره...لا يبقى شغله هناك ويروح ويرجع عليه
بيبي. وهذا هم ينحسب زواج لا يمه
سميره...ولله خوش انسان مايتعوض ابد عاجبني
اول مره اشوف انسان وهلكد اقتنع بي
اركان.. شلون تزوجين واحد عايش بمحافظه وانتي بمحافظة
سميره...بلبدايه راح اقبل بهذا الوضع بس اني متاكده
بعد فتره راح يبقى هنا لان هو يحبني ومتعلق بيه
اكيد راح يغير رائيه
بيبي..بكيفج بس اني اشوف هذا الزواج مراح يستمر
سميره...ليش تكولين هيج
بيبي...اي مبينه انتي ماتكدرين اطلعين من بغداد
وهو مايكدر يعوف محافظته ويجي يكعد هنا
شنو من زواج هذا كل واحد بمكان
سميره...متاكده بعد الزواج راح يجي يعيش هنا
اركان.. منو يكول ايجوز يجبرج ترحين ويااا
سميره.. انتم ليش هيج تحجون علي وانتم بعد ما شفتو اني متاكده بس تشوفو راح تقتنعون بي
اني حيل عاجبني ومراح اكدر ارتبط بواحد غيره
اركان...خلاص اذا انتي مقتنعه هاي هيه
بس انتبهي انتي الي اختاريتي وانتي الي راح تتحملين مسؤلية اختيارج
سميره. اي اني اتحمل مسؤلية اختياري
هااا امي شكلتي
بيبي...بكيفج انتي الي تزوجين واذا تكولين اعرفه
هاي هيه اني من زمان اتمنى تزوجين واشوفج عروسه
سميره.. يمتى يجي حتى يفتح الموضوع وياكم
اركان...باجر يجي واحجي ويااا
سميره.. انشاء الله
امي كانت مقتنعه بهذا الزواج ١٠٠/١٠٠ وكلام اهلها
مااثر على قرارها لان هيه برائيها اهلها مايعرفون
محمد مثل ماهيه تعرفه
اتصلت ماما على بابا وحددت موعد التعارف بينهم
ثاني يوم اجا ابوي على الموعد كاشخ وحالق شعره
طالع يخبل
استقبله خالي اركان دخل للبيت سلم على بيبي
واجت امي كعدت وياهم
كعدت تعارف عرف ابوي عن نفسه وعن اهله
وعن منطقتهم الصراحه بابا كان مقنع
بلنسبه الاهل امي لا تنسون هو محامي وابن عشائر
يعني الكلام لعبته
ماطلع اله متفق وياهم على كل التفاصيل ومحدد يوم
المهر
ابوي...اني عندي اخ وحيد هو الشيخ راح يحضر بلمهر
وعندي اخت مزوجه بغير محافظه عدها اولاد بلمدارس
مااعتقد تكدر تجي لان ماعدها احد بيتها
بس اذا تصممون تجي اروح اجيبها اما زوجت اخوي
مريضه ماتكدر عدها انزلاق بضهرها ماتكدر تكعد بلسياره
٣ او اربع ساعات
اذا تقبلون نجي اني واخوي الشيخ أبو قائد
واذا تطلبون ناس اكثر ماعندي مانع
ولو راح نكلف الناس لان احنا مو نفس المحافظه
الي راح يجي ويانا راح يعوف شغله وعمله ويخلص نهار
بين مايجي ويرجع
اركان...الي تكدر علي احنا مانريد انكلفكم
محمد...المهر الي اطلبو اني حاضر بس اجيبه وياي بيوم المهر
لان مااكدر اروح وارجع كل يوم
عندي شغل مااكدر اعوفه
اركان...تمام على راحتك
كل طلبات امي واهلها ابوي وافق عليها يأجر بيت
قريب على بيت جدي وياثثه ويدفع المهر المتفق علي
ثاني يوم خالي بقه يسئل على أهل ابوي وكل الناس كانت تحمد بيهم وبسمعتهم الطيبه
كل الي يسمع اسم عمي الشيخ يكول والنعم منه ومن اصله
هيج خالي اركان اطمن على مستقبل امي
جمانه السعيدي
اما بلنسبه الامي كانت متاكده راح تكدر بعد الزواج
تخلي ابوي يعوف محافظته ويجي يكعد بغداد على مودها
وهذا الشي شجعها حتى تكمل هاي الزواجه
رغم رفض اهلها بلبدايه
تحدد الموعد المهر وامي راحت اشترت فستان
وردي وحجزت بلصالون وعزمت كل الموضفات الي وياها
وكل اقاربها والجيران
ماكانت مصدكه ابوي راح يصير من نصيبها
بعد كل هذا الصبر والا نتضار
واخيرا راح تاخذ الشخص المناسب الها
فعلا اجا ابوي وعمي وياهم واحد اسمه ابو حازم صديق عمي فقط ذوله التلاثه اجو بلخطبه
عرفو عن نفسهم وعن اصلهم وتاريخهم الي الناس كلها تشهدله
قدمو المهر وعقدو عقد شيخ
وهيج ماما وبابا اتزوجو بلفعل
سلسبيل...ماما تكول ابد ماجنت مصدكه نفسي
معقوله هذا الانسان الحلو الشخصيه صار من نصيبي
بيومها تكول ماكدرت انام هلكد ما فرحانه
امي كانت مشترية قطعة ارض قبل سنه بس ماحجت هذا الشي البابا تعتبر هاي القطعه ضمان الها للمستقبل
برائيها مستحيل راح تخلص عمرها كاعده بلايجار
اكيد بابا راح يشتريلها بيت
بابا ليش يعرف هيج شي عنها هاي القطعه اشترتها بتعبها
بقت موضوع قطعة الأرض سر ماحجت عنه
بيبي وخالو يعرفون هيه عدها قطعة ارض
جمانه السعيدي
بدت امي ادور سكن قريب على بيت جدي زواجهم كان متوقف على السكن
بعد شهر تقريبا لكت بيت صالح للسكن يبعد عن بيت جدي
كم شارع البيت حلو مناسب للسكن
اتصلت على بابا حتى من يجي البغداد يمر عليها يشوف البيت واذا عجبه يبدون ياثثون البيت
فعلا بعدها بكم يوم اجا بابا شاف البيت واقتنع بي
وطلعو هو وامي يشترون الأثاث للبيت
اشترو غرفة نوم على ذوقهم وشغلات المطبخ
وبابا عاف باقي التفاصيل امي تشتريها على ذوقها
بعد شهر ونص تقريبا امي كملت البيت وجهزت نفسها للعرس
اتحدد يوم الزواج بيوم الزواج ماحضر من اهل ابوي غير عمي ابو قائد وزلم ثنيين ابو حازم وبعد ويا واحد
زفو ماما وبابا البيتهم
واخيرا تكلل هذا الحب بلزواج
بقا بابا ٣ ايام بغداد ايام عرسهم كانن أجمل الايام بحياتهم
بس انتهى العرس وبابا لازم يرجع الشغله
يرجع المحافظته
محمد....باجر لازم ارجع الشغلي اكو قضايا اتأخرن هواي
مااريد الشغل يتكدس عليه
سميره....شبسرعه
محمد...٣ ايام واني مكابلج وكاعد
سميره....شلون تعوفني ولله مايصير
محمد...تعالي وياي
سميره...لا مااكدر اجي
..محمد...كم يوم وارجع
سميره....بس يوم واحد بعد
محمد.....مااكدر احنا متفقين من البدايه
سميره...هذا هم تحسبه عليه عرس
محمد...انتي تعرفين ضروفي قبل الزواج وانتي الي طلبتي تكعدين بغداد
سميره....ضجت
سلسبيل...امي ما تحملت كامت تبجي فعلا ماتكدر تستغني عن ابوي كانت تتوقع الموضوع سهل
بس طلع صعب كلش صعب وماتكدر تتحمل بعده عنها
معروف المره رقيقه وحساسه وماتكدر تتجاوز هيج مواقف
محمد...ليش تبجين حبيبتي
سميره...لا تعوفني
محمد....شلون مايصير لازم اروح شغلي تعطل
سميره...اهيييي اهيي
محمد...لا هاي شلون مشكله
سميره...انت شلون تكدر تتحمل تعوفني
محمد...لو ما شغلي حان كعدت كبالج بس طبيعة شغلي
هيج
سميره...انقل شغلك هنا
محمد...رجعنا الهاي السالفه
سلسبيل...امي تكول بقيت اليل كله ابجي وماكدرت انام
بس مع ذالك عافني وطلع
حسيت كلام امي معقول مايصير هيج زواج كل واحد بمحافظه يمكن بمكان ماارتاح جبت شلعان الكلب النفسي
كان لازم أجبره يعيش وياي بغداد
اكيد هو يحبني وراح يقبل اني استعجلت حيل
اريده يبقى هنا مايرجع المحافظته
