رواية خادمة الفصل الثاني بقلم جمانه السعيدي
بشرى...تحملت المسؤليه من عمر زغير
ابوي المريض والبيت كله على راسي
الحسنه الوحيده بلموضوع حالتنا الماديه شويه صارت احسن
صار عندي هواي ملابس صح ملابس مستعمله
بس احسن من الماكوووو
مشت بينا الحياة واني عايشه داخل بيت اهلي
مااطلع الاي مكان
امي متكلفه بلمسواك واي شي نحتاجه
امي بيوم عطلتها تطلع للسوك اجيبلنا من مسواك
حتى علاج ابوي نص اجيبه من المستشفى
ونص تشتري من برا
ابوي ابد ماعنده تحسن بلعكس حالته كلما يفوت وقت اكثر تنتكس اكثر
المسكين هدر صحته وعافيته من وكت
اشتغل بكل طاقته بشبابه وهسه للتواليت كوه يوصل
من وصلت ١٥ سنه ابوي مات
من اليل اتخربط امي من شافت هاي حالته
عرفت راح يموت مااعرف شلون عرفت لان اني كلشي مااعرف بهاي السوالف
اني بلنسبه اليه مثل كل يوم
بس هو بليل ما قبل ياكل اي شي حتى العلاج ماقبل ياخذه
امي بقت تراقب حالته الصلاة الفجر
تغفى شويه وتكعد منا لمن كعدت للصلا
ولكته ميت مسلم روحه للباري الله يرحمه
كامت امي تعيط التمت الجوارين علينا
بشرى...اني من شفت امي منهاره وتبجي ماكدرت اسيطر على دموعي كمت ابجي وياها
ابوي عزيز عليه بعمره ما قصر وياي
ولا يضربني ولا يغلط عليه
وخاصه بااخير فتره من عفت المدرسه وكعدت بلبيت
حيل اتعلقت بي حتى وهو مريض
من جانت امي تطبخله اكله طيبه ما يقبل ياكل
اله تجي بشه تاكل وياي
جمانه السعيدي
راح ابوي راح السند بقينا بس اني وامي نسوان
ثنيبن من غير والي
صح ابوي مريض صار اكثر من تسع سنوات
بس اسمه رجال بلبيت
اخذت امي اجازه الحد ما تخلص العده
وراتبها يوصلها كل شهر للبيت
ام محمد تجينا كل يوم تطمن علينا وجيبلنا وياها
شغلات بسيطه واذا احتاجينا مسواك
امي ادز بيدها فلوس الابو محمد يجيبلنا لاشياء الي محتاجيها من السوك
بشرى...ابوي ترك فراغ مو طبيعي بيتنا
عبالك مو واحد ومات وكانما عشيره كانت ساكنه ويانا بهذا البيت
كل الوقت كنت افكر شلون لو امي رجعت للشغل
بلمستشفى
شلون راح اكدر ابقى وحدي بلبيت
هذا الموضوع سببلي قلق مو طبيعي
مااعرف شلون راح ادبرها وحدي بلبيت
خلصت العده ورجعت امي الشغلها وعافتني وحدي بلبيت
امي...اذا تحتاجيني شي روحي الام محمد
بشرى...شلون راح ابقى وحدي اضوج
امي....شلون اعوف شغلي هذا الشغل معيشنا ومااكدر اخذج وياي انتي مو زغيره جبيره وتفتهمين
قابل افتر بيج بلمستشفى
بشرى...كلام امي معقول لازم اقبل بلواقع واسكت
من تطلع امي الصبح اقفل الباب عليه
اخلص شغلي مرات انام لو اسبح منا لمن ترجع امي
نتغدا سوه ونام منا للمغرب
العشى يكون بسيط اغلب الوقت ناكل جبن وخبز وجاي
مرت الايام وبديت اتعود شويه شويه على البيت
مرات اطلع للخياطه بنفس الشارع
لو اطلع الزباله لو محتاجه معجون للطبخ اشتري وارجع للبيت
من عمر ١٨ سنه حسيت سعدون عينه عليه
هسه راح اكوللكم منو سعدون
سعدون جيرانه بيتهم مقابل بيتنا بلضبط
جبير وما مزوج يعني اني عمري ١٨ سنه
هو عمره ٣٢ سنه
قبل جان يشتغل عامل بناء بعدين بطل
ابو مات وراتب ابو صار بجيبه عنده اخ ازغر منه
مزوج وعنده ٣ اولاد
عدهم عم بلريف انطا بنته هديه الاخو سعدون
انطاها اللهم بلاش اخذها اخووو وصار عنده ٣ اولاد منها
اخو سعدون عنده ستوته يشتغل عليها
ومعيش عائلته
وبعد وياهم بلببت امهم مره جبيره
اخو يشتغل على الستوته ويجيب مسواك
زوجته تطبخ وياكلون سوه هما وسعدون وامهم
بقا راتب ابوهم ياخذه سعدون
يشرب جكاير يدور نسوان عنده سوالف مكسره هواي
كل يوم يفرش بلشارع ويطلع النركيله
وتجمع ويا جماعته يبقون من العصر لليل
كاعدين ويسولفون
الشارع كله يعرف سعدون سمعته موزينه
بس اخو الازغر منه احسن منه الف مره محترم
يشتغل ابد مايكعد بلشارع
ولا اله شغل بلجوارين ولا يسوي مشاكل
النهار كله يستغل حتى يوفر لكمه الاهله
جمانه السعيدي
سعدون عايش براس اخوووو
لان هو الجبير اخو ساكت مايكدر يحجي ويااا لو يناقشه بموضوع الشغل ابد
سعدون مكيف ماعلي اي مسؤليه المسؤليه كلها على اخووو
مخلصها لو نايم لو كاعد بلشارع هو وجماعته
لو رايح يسهر ويا وحده منا منا
اني جنت اخاف منه اذا اشوفه كاعد بلشارع وعينه عليه
بس اني مااطلع هواي طلعاتي كلش قليلات ولازم شغله مهمه اطلع علمودها
بعدين هو بكدي مرتين اني ووين وهو ووين
المهم اني من اطلع ابد مااباوع علي ومالي شغل بي
لان هو لازم الشارع ٢٤ ساعه
ماكو وحده تطلع وتدخل اذا مايعرف هي وين رايحه ومنيبن جايه فضولي بشكل مو معقول
جمانه السعيدي
اني قبل من جان ابوي موجود حتى الباب ماافتحه
يعني لا شايفته ولا منتبها عليه
بس هسه من كمت اطلع اشوفه يبا ع عليه
يله انتبهت علي
كلما ترجع امي للبيت اشتكي من الوحده
جاي اضوج من الكعده بلبيت طول النهار كاعده وحدي
اني سريعه بلشغل اخلص شغلي بسرعه
وابقى كاعده كلش اضوج
بشرى...يمه شلون ولله ضايجه
امي...قابل اخذج وياي اكعدي واسكتي
بشرى...شلون ابقى هيج
امي...بلكت يجيج ابن الحلال وتزوجين
بشرى...مااضن هاي السالفه تصير
امي...ليش ماتصير
بشرى...يمه منو يباوع عليه انتي نفسج تكولين الملحه
اكو واحديباوع الوحده ملحه
لاشهاده ولا جمال ولا اصل ولا بت عائله راقيه
حتى بيتنا عبالك كبر
على ياساعه يوكع علينا انتي تشتغلين عامله
بله منو يجي يخطبني برائج
امي...شبيها العامله اشتغل بشرف حتى نعيش وما نمد ايدنا الاي احد
بشرى....شفتي ماكو عندي ميزه حتى يتقدمولي يخطبوني
امي...مو بعيده على رب العالمين
لازم تزوجين بيوم من الايام
بعمر ٢٠ سنه اجتني فرصه عمل اجنن
بيومها رجعت امي من المستشفى فرحانه
امي...خايبه بشيره لكيتلج شغل
بشرى...شغل اني اشتغل تحجين صدك
امي...اي وخوش مكان
بشرى...اي يالله وووين هذا الشغل
امي...دكتوره امال زوجت دكتور عدنان يردون
وحده تنضف بيتهم وتطبخلهم
ويطوج راتب محترم كل شهر ٦٠٠
الطبخ مو كل يوم مرات هما يسافرون تاخذين اجازه
ومرات يجيبون اكل جاهز
بس اذا يشتهون طبخه من البيت تطبخيلهم
بس التظيف كل يوم
ترحين الصبح وترجعين العصر لمن تخلصين كل شغلج
اليوم اني سمعت الدكتوره تكول اريد وحده ثقه
تنظف البيت وتطبخ
اني راسا فكرت بيج كلت بشرى نادره تشتغل بيت الدكتوره وهم تحصل كم فلس
ليش كاعده بلبيت
رحت للدكتوره وكتلها بتي تشتغل بتي نادره
وشغلها يخبل
دكتوره امال....اهم شي الثقه اهم شي الثقه
ومن بعد الثقه النظافه
امي....الثقه خليها على مسؤليتي اذا راح شي من بيتج
ارجعه اللج عشره
لاتخافين بتي متربيه وتخاف الله
بيتج امانه عدنا
دكتوره أمال ...خل تجي باجر تستلم الشغل
اذا ما عجبني شغلها افض هذا الاتفاق مو ازعلبن
امي...اصلا راح تتمسكن بيها انتي شايفه نظافتها
احنا بيتنا خرابه ومسويته يلمع لمع
والطبخ اذا كلت بيضه ماتشبعين منها عدها نفس بلطبخ يخبل
دكتوره امال...خلاص تجي باجر على مسؤليتج
امي...اي بمسؤليتي
جمانه السعيدي
بشرى...يايمه اشتغل خدامه
امي...ولج انتي بيت دكتوره امال هم تعتبرين نفسج
خدامه
اكل وشرب وونسه هما بيتهم ما يتوصخ
الصبح ثنيبنهم بلمستشفى
يرجعون يتغدون بلبيت ويطلعون للعياده
مايرجعون اله بليل
انتي قبل المغرب ترجعين للبيت
لأعدهم اطفال ولا عائله جبيره بس نفرين
حتى تنظيف بيتهم بسيط ومابي تعب
شوفي روحي كم يوم واذا الشغل ما عجبج
بطلي واني اطلع عذر ولج ٦٠٠ بلشهر بكد راتبي اله شويه
حتى تشتريلج قطعة ذهب ملابس بيهن خير
انتي مو تكولين اريد اطلع
يله اطلعي اشتغلي ولمي روحج
بشرى...اذا ماعجبني الشغل اعوفه
امي.. اي عوفي براحتج بس بعد لا تكولين اطلع
من البيت اني ضايجه
بشرى.. يمتى اروح البيتهم
امي...باجر الصبح نطلع من وكت اني وياج اخذج البيتهم
اعرفج على الدكتوره
واطلع للمستشفى ومن ارجع امر عليج
اطمن اذا مرتاحه لو لا
بشرى....اي موافقه
بشرى..بليل سبحت وعدلت نفسي وحضرت احلى ثوب عندي
مااريدها تشوفني وتلعب نفسها مني
اريدها تشوف نظافتي وطبخي
اذا شافتني نظيفه تكيف بعد ماوتعوفني ابد
ثاني يوم طلعنا من وكت اني وامي
اني كاشخه ومعطره والمع من فوك ليجوه
حتى امي تعجبت بيه
وصلنا البيت الدكتوره ودكينا الباب الساعه بثمانيه
اله ربع
فتح الباب دكتور عدنان
امي...صباح الخير
دكتور عدنان...صباح الخير تفضلو
امي...الدكتور كالت اريد وحده تساعدني بشغل البيت
دكتور عدنان...اي عندي علم تفضلو ادخلو
بشرى....البيت يخبل يخبل الحديقه شكبرها
وبيها أشكال وأنواع الورد ولا شجار المستوردة
دخلنا من باب المطبخ
لكينا الدكتوره لابسه روب وكاعده تتريك
بشرى...صباح الخير
دكتوره امال...صباح الخير
امي...دكتوره هاي بتي بشرى شتردين تشتغل
وشوفي شغلها اذا ما عجبك بعد ما توصل بيتكم ابد
دكتوره امال....خلاص عوفيها وروحي اني هسه
اشوفها الشغل قبل لا اطلع
امي...اي اني اروح للمستشفى وهاي هي كدامج
بشرى...طلعت امي اني بقيت لا بسه عباتي وواكفه
بمكاني بلمطبخ
دكتور عدنان بس دخلنا بعد ما شفته دخل يبدل بغرفته
الدكتوره كملت شرب الجاي وكالت تعالي وراي
باعي اريد تنظيف عميق كون كلشي بلبيت يلمع
غيري جرجف غرفة النوم
نزلي الستائر وطلعي من الكنتور غيرهن
القديمات نظفيهن وتكوين وارجعهم بلكتتور بمكان الجدد
بعدين اطلعين للطرمه والحديقه
واليوم نريد باميه وتمن ابيض عندج لحم بلمجمده
والتمن والبقوليات تلكيهن بالمخزن
هذا المخزن
بشرى...رجعنا للمطبخ اكو باب بلمطبخ
دخلنا بيها كلشي بحافظات وعلي اسم
كل البقوليات ولتمن والسكر والجاي والبهارات
دكتوره.. امال اليوم اختبار نشوف شغلج
بشرى....انشاء الله اكون عد حسن ضنج
امال...نشوف
جمانه السعيدي
بشرى...بقيت كاعده بلمطبخ منا لمن طلعو من البيت ثنينهم
نزعت عباتي طلعت الحم بلاول
خليته على النار ونكعت تمن وطلعت باميه
من المجمده
كمت افتر بلبيت شنظف ياربي البيت يلمع
مو وصخ ابد
نزلت البردات اخذتهن للحمام اريد اغسلهن بايدي
بعدين لكيت غساله
اني شايفه غساله بيت ام محمد
وشايفتهم شلون يشغلوها
فتحت المي انترست وخليت زاهي وشغلتها
طلعت للبيت
كمت انظف الصراحه اكو مكنسه كهربائيه
بس اني مااعرف شلون اشغلها ولا كانسه بيها قبل
عود من ترجع الدكتور اخليها تعلمني عليها
طلعت البردات شكلتهن
وغيرت الجرجف بغرفة النوم فتحت الشباك علمود التهوية
يعني شغل كله سهل وبسيط
طلعت نظفت الطرمه الحديقه ورجعت للمطبخ
طبخت ونضفت المطبخ
شغل البيت ابد مو متعب كلش سهل
لان هو اصلا نظيف
الساعه ١١ خلصت طبخ وتنظيف
بقيت كاعده بلمطبخ
ياربي هاي الناس شلون عايشه واحنا شلون عايشبن
البيت يخبل ركن على شارع عام
الحديقه اجنن
الأثاث ما شايفه مثله ابد
اكيد اذا هو دكتور وهي دكتوره لازم بيتهم يكون هيج
خو مومثلي وعيت للدنيا
البيت خرابه واثاث ماعدنا
وملابس بيها خير ماعدنا
نتغدى ما نتعشى اكيد دكتوره امال ودكتور عدنان
عدهم اهل زينين واغنياء
ساعدوهم حتى يكملون دراستهم ويوصلون الهذا المستوى
الدنيا تعلب لعبتها ويااا الناس
ناس اصعدهم فوك وناس تنزلهم جوه
كلشي قسمه ونصيب بهاي الدنيا
واني هذا حد قسمتي ونصيبي
الحمد لله والشكر
