رواية مريم الفصل الثاني بقلم جمال الحفني
أنا واحدة من اللي نزلوا تحت الأرض, أكيد ناس كتير منكوا سمعت عن حكايات لأشخاص نزلوا تحت الأرض وخطفهم الجن واختفوا بالأيام وبعدين رجعوا تاني, أنا هحكيلكوا اللي بيحصل معاهم لأنه حصل معايا, هحكيلكم اللي بنشوف إيه تحت والموضوع بيتم إزاي.
أول ليلة شوفت فيها الجن كانت في الشتا, كنت صغيرة وقتها وعندي 8 سنين, كنت نايمة في أوضتي على سريري وحسيت بحاجه بتسحب البطانية من عليا وتنزل لتحت السرير, كإن فيه واحد مستخبي تحت السرير وبيسحب البطانية ناحيته, مكنتش اعرف إن فيه جن وعفاريت والكلام دا.
افتكرتهم اخواتي وبيهزروا معايا, وتاني يوم رحت اشتكيت لابويا وأخويا وأختي حلفوا إن محدش منهم دخل أوضتي, أبويا قالي يمكن كنتي نايمة أو بتحلمي, والموضوع عدا.
لما وصلت 14 سنة بدأ يحصل تواصل والمعرفة بيني وبينهم خصوصا إن البيت بتاعنا فيه اّثار وحد منهم ملازمني.
كنت بكون نايمة على السرير عادي وييجوا بالليل حد منهم يسحب رجلي لتحت وأنا اسحبها منهم, ويحاولوا وأنا أحاول لحد ما قررت اعمل معاهم اتفاق.
كنت بحكي لأهلي بس محدش منهم كان بيصدقني وقررت اعمل اتفاق معاهم لإنهم كانوا عايزين مني أنزل معاهم تحت الأرض واقعد معاهم على طول!
بس أنا رفضت وعرضت عليهم أنزل معاهم واطلع تاني مفضلش دايما تحت.
كنت اسمعهم يقولولي انتي مكانش مش هنا, انتي مكانك معانا تحت وهتبقى الملكة بتاعتنا ولازم تنزلي تعيشي معانا, احنا خليناكي تعيشي فوق 14 سنة وجي الوقت اللي تنزل تكملي حياتك معانا تحت.
لكن أنا كنت ارفض واقولهم شرطي الوحيد للنزول معاكوا اني اخرج تاني فوق الأرض وفي نفس اليوم يعني مغيبش عن أهلي أبدا.
غابوا فترة من الزمن محدش فيهم بقى يكلمني لحد ما ظهروا تاني وقالوا إنهم موافقين وبدأت رحلتي معاهم يوميا, من نص الليل لحد قبل الفجر.
أول ليلة نزلت معاهم وعشان اوضحلكوا الصورة تحت, كل حاجه بتكون لونها أسود شفاف, أسود بس معالمه واضحة, وعلى يميني شوفت منهم اللي بيسجد لي (استغفر الله العظيم) وعلى شمالي بينحنيلي, وفي اّخر الطريق كان فيه كرسي من دهب وجمبه تاج, بصيت على نفسي لقيتني لابسه ملابس خفيفة كدا وتصميمها زي تصميم ملابس المصريين القدماء أو شبههم.
قعدت على الكرسي وواحد منهم حط التاج على راسي وتوجوني ملكة. وبعدين طلعت فوق الأرض تاني.
منزلتش تاني غير لما يكون في قضايا مهمة المفروض أحكم فيها أو يستشيروني فيها, وفي كل مرة انزل الوضع بيكون زي ما هو على يميني ساجدين وعلى شمالي منحنيين وفي الاّخر كرسي بروح اقعد عليه واتنين واقفين جمبي, وواحدة واقفة ورايا وهي المسؤولة عن حمايتي وخلال 3 سنين ونص نزلت 3 مرات بس.
المصايب بدأت تحصل معايا من بعد ما اتجوزت لإنهم كانوا رافضين الزواج وعايزين افضل كدا معاهم على طول لإن الملكة بتاعتهم مينفعش تتجوز, ومن ضمن المشاكل والحمد لله على قضاء ربنا طبعا إني لحد دلوقتي مخلفتش, عندي 37 سنة ومتجوزة من وقت ما كان عمري 18 سنة ومفيش خلفة مع إني أنا وزوجي روحنا لدكاترة كتير ومفيش مني أو منه أي مشاكل تمنع حدوث الحمل.
كانوا يقولولي في المنام إني مش هخلف, ولو اتجوزت هتطلق وفعلا انا اتطلقت بعد ما اتجوزت بيومين, واتجوزت جوزي تاني, وبقينا اعاند فيهم.
مكنتش بخاف منهم لكن لما بقيت اسمع عن قصص الناس مع الجن والعفاريت بدأت اخاف منهم واعرف طباعهم اللي بيتعاملوا بيها مع غيري من الناس.
كانت بتحصل مشاكل معتادة, تعب في الجسم, مشاكل مع جوزي, وكنت بنقل مع جوزي نعيش في القاهرة وأحيانا نرجع نعيش في الصعيد.
وفي مرة سكنت في شقة في القاهرة هي مسكونة أصلا وبدأت أشوف فيها حاجات جديد, مثلا في مرة شوفت واحدة لابسة اسود طلعت من الأوضة دخلت المطبخ!
مرة تانية شوفت طفل صغير بيحبي على الأرض!
في يوم لقيت عيل صغير بيصحيني عنده حوالي أربع سنين فقولتله انت مين يا عسل, قالي انا ابن فلان وقالي اسم واحد من الجن, كان واقف جمب السرير وانا نايمه ومدياله ضهري ولما قالي كدا لفيت ناحيته عشان اكمل كلام معاه لقيته اختفى!
كمان كان معايا تعبان ساكن في منور الشقة وكل يوم يخبطلي على شباك المطبخ السلك.
لحد ما قررت ادخل عالم الروحانيات واتعلّمه, وكنت بشوف شيوخ كتير في المنام, بيظهرولي وبيكون الواحد فيهم طالع منه نور قوي جدا ويقولولي تعالي زورينا, بس أنا بصراحة مكنتش بروح.
