رواية يعقوب والغرباء الفصل الثاني بقلم جمانه السعيدي
يعقوب...اتفقنا العصر نروح حتى نشوف العروسه
العصر بدلت وتعطرت وطلعنا اني وامي مرينا على خالتها راحت ويانا
أخذنا تكسي وطلعنا بيتهم موبعيد تقريبا ربع ساعه بلتسكي وصلنا
وصلنا البيتهم خالته كبل دخلت واني وامي بقينا ننتضر برا
شويه وكالت تفضلو
دخلنا جان ابوها موجود رحب بينا كعدنا
شويه اجت امها وخالتها كعدنا
كمنا نسولف اني وابوها على شغلات عامه
شويه وخالتها كالت يله دنيا وينج
طلعت خالتها ورجعت هي والعروس
خالتها شايله صينيه العصير وهي تمشي وراها
اول مارفعت عيني حسيت كلبي اطمن الها
حتى قبل لا اركز عليها
مو يكولون الكلوب الطيبه تلتقي
باوعت عليها شكله حلو مرتب جسمها حلو
لا بسه حجاب وثوب طويل
كعدت وبقت مدنكه راسها وشابكه اديها وحده بوحده
أشرت الامي تحجي وياها
امي عبالك رادار كبل فهمت الحركه
امي...خاله انتي اسمج دنيا
دنيا...اي خاله
امي...عاشت الاسامي
دنيا...شكرا
امي.. انت شمخلصه
دنيا...سادس أدبي رسبت وتركت المدرسه
امي..تعرفين تقرين وتكتبين
دنيا...اي اعرف
امي....عاد تعرفين اطبخين لو لا
دنيا....اي اطبخ واعرف اخبز
امي...عفيه مبينه معدله رحمله والدي على هاي التربيه
امي التفت عليه ورفعت حواجبه بمعنى هااا عجبتك
نزلت راسي مرتين اي
امي...احنا جايين على دنيا واي طلبات عدكم حاضرين
ابني مدرس رياضبات بمدرسة العزم
هسه ننطيكم العنوان وسئلو عنا
يعقوب...انشاء الله صار قبول واحنا .نتشرف بنسبكم اذا تصير القسمه
ابو دنيا.. النا الشرف اهلا وسهلا
بس نريد اسبوع نسئل ونشوف رائي البنيه وإنشاء الله يصير خير
امي...انشاء الله
يعقوب...راسا دنيا كامت طلعت من المكان
طبعا ابد مارفعت عينها ولا باوعت عليه شكد خجوله
وهذا الشي عجبني ببها اكثر
جمانه السعيدي
اتفقنا على المهر خطبه ومهر بنفس اليوم ونعقد عقد شيخ
بيوم العقد جانت طالعه تخبل
شعرها طويل وحلو جسمها منناسق
شكد حسيت نفسي سعيد بيها
انسانه خجوله ولطيفه
حددنا موعد الزواج بعد شهر
خلال هذا الشهر تقريبا رحت عليهم ست اوسبع مرات
لان من اروح ابوها وإخوانها يكعدون يمنا
حتى امها تجي تكعد ويانه
الحد مااجا يوم الزواج كام يوم حلو
الفرحه الي بعيون امي ابد ما تنوصف
كلشي تم مثل مااريد واحسن
واخيرا زوجتي نورت البيت
٣ ايام ومنى اختي رجعت البيتها
ودنيا استلمت البيت بدون مااعلمها او انطيها اوامر
اي واحد يجي يبارك الها هي الي تقدم العصير والجكليت
تكعد الصبح تنضف البيت
وتطبخ وتساعد امي
الحمد لله مثل مااريد واحسن
اول سنه ماصار عدنا اطفال بدينا نراجع كان عدها شوية مشاكل
بس تم الحمل ولله والحمد
بلشهر الخامس بين عدنا بنيه الحمد لله كلش فرحت
الحمد لله على كل حال
جمانه السعيدي
بلاشهر الاخيره بدت تتعب حيل
رادت تروح بيت اهلها بس اني ماقبلت
مايصير من جانت تكدر تخدمنا كاعده ويانه
وهسه من تعبت تروح بيت اهلها
يعقوب...اكعدي واني اخدمج حتلو اخذ اجازه
دنيا....لا انت عندك دوام وخالتي تعبانه اني اروح بيت اهلي
يعقوب...اني كلت لا يعني لا اكعدي واني اخدمج بعيوني
مايصير من تحتاجيني اتخلى عنج
امي استلمت الطبخ اما الخبز جاهز من المخبز
واني من ارجع انضف البيت واغسل المواعين
هي تخلي ملابسي بلغساله لو تقرب ميز الكوي وتكوي
منا امن وصلنا للولادة
ولادتها كانت كلش صعبه
تطلك من اليل الثاني يوم بليل تعبت بشكل
خطيه وجها صار اصفر وشفايفها بيض
طلعت من الولاده كلش تعبانه ودمها نازل
صممت تروح بيت اهلها علمود امها تهتم بيها بعد الولاده
وصلتها البيت اهلها هي وامها لان امها كانت حاضره الولاده
ورحت استوكت سمج ومعلاك وفواكه
ورجعت عليها
بقت اسبوع بيت اهلها ورحت جبتها
لان مااكدر استغني عنها ومشتاق الهبه
سميت بنتي هبه
اما اختي منى صار عدها ولد اكبر من بنتي بسنه وحده
الحمد لله سعيده بحياته وزوجها انسان محترم
من بعدا ما صار عمر هبه سنه بدت دنيا تحاول تحمل مره
ثانيه
جمانه السعيدي
يعقوب ...خلي هبه تكبر
دنيا....اريد ولد يحمل اسمك
يعقوب...اي يجي الولد وين يروح على كيفج
دنيا...لا حتى يكبر وياك شنو بعدين
يعقوب...حبيبتي هذا رزق من رب العالمين يمتى مايجي هله بي
دنيا...اي اني ماكلت شي اريد اراجع واسوي جدول
بلكت يصير ولد
يعقوب...مااريدج اتعبين واريد هبه تكبر
دنيا....الله عليك احاول
يعقوب...براحتج بس لا تخليني حجه تردن ولد بكيفج
ترا اني ماعندي فرق ولد لو بنيه نفس الشي
ياسبحان الله صدك لو كال المثل لو تجري جري الوحوش غير رزقك ما تحوش
حاولت اكثر من محاوله بكل مره تفشل
حتى تاخد ابر علمود تحمل بولد بس بدون فايده
لا ولد ولا بنيه
بس هي مصممه وماتقبل تقتنع
ماكانت تعرف هذا العلاج جاي باثر عليها تأثير سلبي
وهي دائما تشكي دمها نازل
وتعبانه
الحد ماصار عمر هبه ٣ سنوات يله حملت
الحمد لله على كل حال
بقت عبالك كاعده على نار تريد تعرف شنو نوع الجنين
بس اني مكان يفرق عندي ابد
وصلنا للشهر الرابع واكدت الدكتوره بلسونار
حامل بولد
ماكانت مصدكه نفسها ما تمشي على الكاع
اني كتت فرحان الفرحها
وامي ما بقا نذر ما نذرته علمود هذا الولد
بس وصلت الشهر السابع حالته الصحيه انتكست حيل
كانت واكفه تحضر بلاكل ومبين عليها التعب
بس تكابر وتكول لا مابيه شي
راسا زكعت من طولها ونزفت
نقلتها للمستشفى
الدكتوره أكدت حالته بخطر
بسبب الإبر الي ضربتهم علمود الحمل
صاير عدها حالة تسمم
الدكتوره أكدت هاي حاله نادره وماتصير هواي
صارت عدها ولاده مبكره اشتد النزف عليها
الدكتوره خافت من حالتها كالت أخذها الغير مستشفى
حالته مو زينه
نقلتها المستشفى على حسابي
بس شافته الدكتوره وجها انعقج
وخافت حيل
شافت أوراقها راسا دخلتها غرفه العمليات كبل
جمانه السعيدي
تخبلت كمت اصيح على الدكتوره مااريد الطفل اريدها تطلع سالمه
دكتوره اريد زوجتي فدوه العينج دكتوره
اريد دنيا نطلع سالمه
بس كلشي مقدر ومكتوب
هي والجنين ماتو بنفس اللحظه
من طلعت الدكتوره وكالت فقدنا الام والجنيين
تخبلت شنو فقدنا الام والجنيين
ليش ليش ماتت
اني كتله مااريد طفل بقت تلح وتأخذ علاجات
اني مااريد الطفل اريد زوجتي ترجعلي
دخلت للغرفه لكيته يابسه ووجها اصفر بسبب النزف
شلته وخليتها على صدري
يعقوب...حبيبتي دنيا حاجيني ليش هيج
احنا ما تفقنا تعوفيني
اني موكتلج مااريد جهال ولج بتج بعدها زغيره
شلون عفتيها
ليش تاخذين علاجات ليش هيج تنزفين
ولله لو باقين على هبه هواي احسن اني مااريد جهال
انتي كمتي تلحين
ليش هيج بعدني ماشبعت منج
معقوله اني وبتج مافكرتي بينا ولج ياولد هذا
الي ذبحتي نفسج علي
اني مو كتلج مااريد ولد
لو باقيه انتي كلشي مااريد منج
دنيا حبيبتي شلون اعيش وانتي ماكو
شلون ادخل البيت من دونج ليش استعجلتي على الموت
احجي وياها وحاضنها على كلبي
بس ماترد عليه
ماتت حبيبتي وبقيت اني وبتي وحدنا بهاي الدنيا
