رواية أبناء ابليس الفصل الثاني بقلم محمود الأمين
المنظر جوه كان صعب جداً.. ناهد كانت علي السرير جسمها منفوخ وازرق كأنها غرقانة.. طالع من بوقها رغوة بيضة كبيرة.. عينيها كانت مبرقة.. وعلي الارض طفل صغير لسه مولود حالا
أيوة ناهد بعد ما خلفت الطفل ماتت.. كلنا كنا واقفين علي وشنا علامات الذهول من المنظر
أتكلمت أنا وسألت أبوها اللي كان منهار علي منظر بنته الصعب وعلي موتها
..
_هو اي اللي حصل يا عم عوض؟!.. مين اللي عمل فيهم كده؟!
الراجل مكنش عارف يتكلم.. عمال يعيط ويقول يا ضنايا يا بنتي.. حقك علينا أحنا السبب
ايوة احنا السبب يا ناس احنا السبب في موت ناهد كل واحد فيكم مسؤول عن موتها وموت جوزها
احنا اللي بنعاير بناتنا بعدم الخلفة وكأنهم هما السبب انهم ميخلفوش
يا جهلة قولتلكم كتير دي حكمة من ربنا.. أنا مش بدافع عن نفسي انا السبب زيكم... انا السبب زيكم
...
وقع عم عوض من طوله وفقد الوعي.. مقدرش اقول حاجه عنده حق في كلمة قالها
ومن كتر الجهل يا أستاذ.. الناس مربطتش اللي حصل ده بالعامر والكل كان مستني والد ناهد يفوق عشان يحكي اللي حصل
رجعت البيت انا ومراتي واحنا ساكتين يمكن عشان احنا عارفين السبب في ده.. وعارفين ان اللي حصل ده بسبب الزفت اللي اسمه العامر
ناهد حكت لمراتي وبس.. ومحكتش لحد تاني
فكرت أطلع وأكلم الناس لكن مراتي اترجتني وهي بتقولي
_ لا بلاش أنت هتواجه واحد معندوش رحمة وتعامله كله بالسحر والجن والقرف
أبعد عن طريقه هو من طريق واحنا من طريق يا عزيز
_ مش قادر يا صابرين.. مش قادر اشوف الظلم ده ومتكلمش
_ طيب ولو أتكلمت هو مش هيسيبك وهينتقم منك أكيد
_ طيب أعمل اي يا صابرين؟
_ اصبر علي الاقل نشوف والد ناهد هيقول اي لما يفوق وبعدين نتصرف
_ هنشوف.. هنشوف يا صابرين
..
مش قادر أوصفلك كمية الغل اللي كانت جوايا كان نفسي اواجه الكافر ده واقتله بايدي.. لكن صابرين كان عندها حق انا مش ضامن اي اللي ممكن يحصل
وطول منا بعيد يبقي خلاص.. او بيني وبينك كنت فاكر اني بعيد
أكيد جيه سؤال في بالك دلوقتي اي مصير الطفل
هقولك يا أستاذ
_ الطفل راح لوالدة ناهد.. جدته يعني عشان تربيه وكلنا ايوة كل اهل البلد روحنا لعم عوض عشان نسأل عليه
الراجل كان احسن من الاول
قعدنا معاه شويه وبدأت الناس تنسحب واحد ورا التاني لحد ممبقاش حد غيرنا في البيت عنده.. أتكلمت أنا وبدأت الكلام
_ البقاء لله يا عم عوض شد حيلك كده
_ الشدة علي الله يبني.. الحمدلله
_ عاوز اسألك سؤال.. ممكن؟
_ أنا عارف سؤالك.. اي اللي حصل يوم الحادثة صح؟
_ ايوة عندي شغف اني اعرف
_ كله بسبب شيطان الانس اللي اسمه العامر.. ده دجال كافر حول بنتي لواحدة جاحدة معندهاش قلب
كل هدفها انها تخلف وبس حتي لو هتغضب ربنا
العامر طلب منها حاجات كتير حرام وهي وافقت للأسف
وكانت طول التسع شهور لا تصلي ولا تذكر ربنا
ولو حد اتكلم عن الدين كانت تسيب القعدة كلها وتمشي
بنتي اتحولت لواحدة انا معرفهاش
بقت تتعصب عليا أنا أبوها.. ومكنتش عارف ان ده هيحصل
في اليوم ده ناهد تعبت بسبب الحمل ورقدت في السرير وجوزها كان راجع من الشغل ولسه داخل من الباب
كان جايب معاه مصحف دخل عليها الاوضة وهي نايمة وقعد جمبها وقالها الف سلامه عليكي.. بصي انا جيبلك مصحف عشان اقرالك شوية انا عارف انك بتحبي تسمعيني
ناهد كانت بترفع ايدها وكأنها عاوزة تمنعه وتقوله لأ متقولش
لكن جوزها فتح المصحف وابتدي يقرأ.. وفي لمح البصر نار ملهاش اي مصدر مسكت في جوزها اللي طلع في الصالة ومن بعدها الشارع عشان يعيش الناس في مشهد ولا افلام الرعب
وناهد فضلت تصرخ لحد ما دخلنا عليها لقيناها بالمنظر ده اللي أنت شوفته
بنتي ماتت بسبب الدجال ده.. ماتت وانا معرفتش احميها من نفسها اللي مرضيتش بأمر ربنا
_ أنا عايز اقولك حاجة
_ حاجة اي؟
...
لكن في الوقت ده سمعنا اللي صدمنا وخلاني قومت من مكاني زي المجنون.. صوت آذان العصر
هتقولي واي يجنن في كده
هقولك اللي كان بيأذن هو العامر هو صوته.. هو اللي عايز يخدع الناس ويداري ورا عباية الدين
خرجت زي المجنون علي الجامع وورايا والد ناهد اللي كان بيمشي بالعافية.. وكان المنظر قدام الجامع مخجل جداً
الناس كلها متجمعة قدام الجامع عشان ياخدوا البركة من صاحب البركة
هو واقف قدامهم وفي عينه فرحة متتوصفش.. بني آدم او شيطان وصل لمرحلة جنون العظمة
دخلت وسط الناس وانا بقولهم ابعدوا عن الدجال ده.. ده بيخدعكم متخلوش الجهل يتحكم فيكم ده شيطان عايش وسطنا صدقوني
ووالد ناهد قال هو السبب في موت بنتي وجوزها.. ده قال لبنتي متصليش ومتقراش قرآن في واحد يعرف ربنا هيقول كده.. ده كافر دجال محدش يعظمه.. العظمة لله وحده ده لازم يموت
..
في ناس بدأت تقتنع بكلامنا ووقفت معانا وناس تانية جاهلة كانت ضددنا وكانت عمالة تقولنا محدش يتكلم كده عن مولانا العامر
البلد اتقسمت ودخلتها الفتنة.. وكله بسبب الشيطان اللي اسمه العامر
اللي كان واقف وعلي وشه ابتسامة نصر وكأنه نجح في اللي هو عاوزه.. لدرجة ان الناس كانت هتموت بعضها وسط مؤيد ومعارض للعامر شيطان الانس
رجعت بيتي في اليوم ده مضروب علقة موت.. طبعاً الاكثرية كانوا لصالح العامر ومعظم اللي واقفين معانا اضربوا.. مكنتش مصدق المرحلة اللي وصلتلها البلد قعدت على الارض وانا مش عارف اتصرف ازاي؟
..
في الوقت ده باب البيت خبط تحاملت علي نفسي عشان صابرين كانت عند اهلها.. فتحت الباب كان الشيخ صلاح
شيخ البلد الراجل التقي الطاهر وقلي
_ اتسرعت يبني للظلم نهاية لكن مش بالطريقة دي.. البلد اتقلبت لحرب اهلية بسبب تصرف اهوج زي ده
_ مقدرتش استحمل ان الشيطان ده يستعمل الدين عشان يضحك علي عقول الناس الجاهلة دي
_ الصبر وما صبرك إلا بالله
_ ونعم بالله يا شيخ
..
مشي الشيخ صلاح ودخلت أنام بعد يوم صعب.. رميت جسمي علي السرير ونمت وشوفت كابوس مش مفهوم
شوفت نفسي واقف في المستشفى سامع صوت صراخ مراتي.. اتحركت ناحية مصدر الصوت اللي كان جاي من اوضة العمليات
ومن الشباك شوفت مراتي بتولد وكانت بتبصلي وبتضحك.. لكن فجاة برقت وبوقها اتعوج سنانها اتكسرت ورقبتها اتكسرت
مشهد صعب ومفزع.. قومت من النوم مفزوع وباخد نفسي بالعافيه.. لقيت الباب بيخبط قومت من علي السرير وروحت لحد الباب وفتحته
كان عم عوض اللي قلي
_ تعالي معايا يبني هنجيب عربية ونروح نزور ناهد الله يرحمها
_ حاضر يا عم عوض.. حاضر
..
روحت معاه لحد البيت.. فتح الباب ودخل البيت ودخلت وراه لكن الباب اترزع واتقفل ببص ملقتش عم عوض
فضلت ادور عليه هو راح فين مش لاقيه
لحد ما فتحت اوضته..
