رواية خطايا واجتثاث الفصل الرابع 4 بقلم نور البصري

شحلاته وليفي من يضحك 

ضحكته صير بعيوني... 

ــــــــــــــــــــــــــــــــــــــ

وكفت واني خايفه هذا مات لا عزا العزاج «سؤدد» النوب المعجب تحول لعدو يطالب بثأر اخوه ماعندي حل الا الشرده لحضن جدة خايبة جدة لحكي علي اركض واني لو شفتوني يمكن تراب رجلي وراي كد السرعه

بعد جدي ما يلام سماني الزيطه لو زلمه سوادي مشت عليه سوادي بالريف يكولون اشبه خالي سوادي وجان اسمر طوخ عكس اخوته  

 

: جدة جدة جدة

فزعت جدة على صياحي و ثغيبي  

: تحچي ولج مصيوبه شنهي شلفاج 

: كتلت حفيدج ابن ابنج مو تضوجين 

انتبهت شصخمت شنو مو تضوجين؟  

: شنهي... 

: كتلته طكيته ما اعرف مات عايش لحكي عليه 

زين هي تلحك عليه واني شبيه وتلحك عليه خوب تلحك «حسين» الساح دمه..

مرة احاجيها ومرة الوم بروحي صرت ما اعرف اعبر كلمات ملائمه للحاله ظلت جدة ترجف وهي تريد تكوم تبيردت 

: قوي روحج جدة.. 

سندتها توكف واني ارزل روحي بگلبي مو بصوت فوك شينه كوات عينه النوب اني صاحبه راهي وكفت وهي ما تعرف شصار

شوي طب «حسين» متنچي على جتف «حسن» المعجب الولهان والي هددني بثأر اخوه الي طلع ما مات

جان البيت نصه بيت طين ونصه بنوه طابوك ويردون على بيع حصاد السنه يكملون البيت طابوك. 

ضربت جدة صدرها وهي تصيح 

: يا يمة يا يمة «يحسين» يجدة..

: جدة لحكي علي انفشك راسي من ورى بت بتج العرمه.. 

باوعتلي جدة وهي معصبه الوجه

: تنوعيلي خايبه شنهي عامله بالصبي 

ما اعرف ليش وكفت عبالك اصطفاف مدرسه واني القي كلمتي.. 

: دفاع عن عزة النفس و الكرامة جدة عن انفتي اني وحده جدا انفه 

عضت اصابعها وهي تتوعدني ..  

: شنهي هاي انفه وانفتجي تنوكل تنشرب يااع ولج طاكه الصبي من صوبج الله ترحين ليهم سبع نذور وفدوات وليدات رحيم

جان «حسين» يريد يحاول يتناوشني رغم مظروب ومظبر راسه و كل البلا بي عمي شلون صبيان ماينجرعون ظل يغلط و يعير بيه 

: سوادي ابو القواطي عليش تفشجين راسي انتي وحدة حرمه موش صبي وتعارجين مثل الصبيان خلني ساكت موش اريدن اتحچه 

دخل خالي «رحيم» واصله خبر شيفكني منهم كون اروح بيت خالي الي بالمدينه عيشة الريف ما توالمني هنا لازم البس شيلة وعباه

والله لو تشوفوني شلون متوزرة بالعباه همزين سنفورة «ماجدة»  

و سنفورة «مريم» ميشوفني واني عود اقلد الريفيات حتى التقليد لاعبة طوبه بي سألني خالي

: ليش طكيتي الصبي وعيبة بت تطك صبي..  

: يغلط عليه تقبلها خالي

: لاع

رحت بست خده واني اباوع «لحسين» بخباثه و«حسن» سكت اعرفه خايف من «حسين» يفتن علينا جنا وحدنا بين الزرع وكفتنا اليفوت يكول عدهم سويلفه على كولت كلمات ومعجم اهل السلف.. 

: خالوو تقبل اني وي جدة بس شوي راحت للبيت واني واكفه جن «حسن» يكلييي ها اكول لابوكم شنو كالي «حسن»

ظل «حسن» خطية ينطي الوان و «حسين» عينه على اخوه كال بساع 

: بوية حديثه و كاضه الطريج للرايح والراد صح موش حلوة و تشبه عمي سوادي سودة وجلحه بس هاي عرضنا واكفه بالطريج 

و الزلم تفوت تعاين موش تغبل تغدي للدار چا شنهي مامش عدنا جلمه عليها بس حاجيناها زحمه عيب موش عوايدنا نساوين تلزم الطريج 

ما هيست الا بحجارة فشجت راسي ربك ستر موش فشجه گوية 

باوعتلهم بقهر يعني اني مو حلوة بس زين ما حجوا الحقيقه النوب القهر الاكبر خالي شلون يضحك ويكول

: عوفوا سوادي مامش حد يتنوع لجهامه الف،ـرخه (هنا من باب يقصد الطفله) 

 

طلع خالي و انسد الموضوع واني مكدر اسكت 

: جدة اني مو حلوة؟ 

ظل «حسين» الخبيث كاعد و«حسن» يمه يلف براسه والله كلت على ضربتي طارت الجمجمه بس مو راس يكرم الله مصلبخ من كاعه ظل يشاقي جدة و هي جنها نست العصبية وكعدت تنصحني

: خلفه فوزية ولا تعجبني موش مرامنا شنهي عودن هي تمندنت.. 

صححت : جدة تمدنت

: اي هية هاي يمة تنوعي علي سودة سوعدد بتي يمه انتي حديثه موش صبي يتحجى وياج وليدات خالج لازمن تدنجي تستحين يبعد طوايف جدة الحيا تاج على راس البنت والصوت الناصي للعاقلة المسنعه

صحت : يا استحي منمن من حسيون و حسوني و بعدين اسمي «سؤدد» شنو سودة شني سوعدد لو تشبهوني بخالي سوادي

صفنت صدك شو بس هذا خالي اسمر والنوب اني عفت ابوي اليخبل وامي الجمارة و طلعت على سوادي محتركه من المعمل..  

: جدة جدة

: يبعد نظر جدة.. 

: ليش خالي سوادي لونه قهوائي مدري شني بس لا تنسيتي بي بذنجان لونه اسود قلبه ابيض 

ضحكت

: خايبه انتي و عشايرج ترحين فدة ونذر لسوادي تصنفين عليه عودن تشبهي

غميت روحي : من سوء حظي طبعاً 

كرصتني : انطمي خاب انتي تلحكينه ترحين فدة لريوله 

رديت : يع المصنهرات جدة 

احجي و «حسن» صافن بيه مبتسم طاح حظك جنك جمارة و تحب وحدة تشبه عمك سوادي شكلت لربك لا والنوب ما يلفظون همزة الواو بأسمها مرة سودة ومرة سوعدد اما «حسين» حس نظرات اخوه كل شوي انطاه عكس و يدنك «حسن» مستحي..  

: سنعي شيلتج يبعد جدة نص راسج مفرع.. 

: جدة اني مو محجبه ما اعرف البسة بس انتم من اجيكم تجبروني 

هنا حسن همس 

: تحجبي سوعدد والله احلا من السفر.. 

«حسين» هنا خبيث جان يكوله 

: ههههه حتى تصير عمي سوادي لابس حجاب

ضربته جده بعوجيتها 

: تنجب زلمه سوادي فنكم تلحجونه.. 

سألتها : مكتيلي ليش هيج خالي سوادي اسمر وعم عليه ورثت لونه و ملامحه

: كلمن على هلة يمه... 

- وين هلة حمران برصان وخيرهم البي شوي سمار مخلوط بلون احمر الا خالي سوادي اجلح املح مصلبخ مصنهر و سلعومة علباته اطوخ من وجهه 

: جده يكولون على ابو جده هيجية جان بس شنهي زلمه حوك مرة حافوا حلاله شيخ جويسم رده بليلة ما بات حلاله غادي عند الحوافه 

: هذا جويسم جد امي مو 

: يمه يصير ابو جد امج و خوالج

: هاااا على اساس فهمت.. 

: شنهي يمه

: لا جدة ماكو شي

: شنهي ماكوش (ماكو) يمه سعليني سوعال وانه افهمنج جنج موش فاهمة شي جويسم الله يرحمه ازلمه مصلصل فيا جدة الازلمه موش بشكله الازلمة بفعايله يبنيتي تنوعي حذاي سوعدد باجر اغديج لأمج انه موش حمل مسعوليتج

حجتها وتعاين «لحسن» الي خلا وكام ضايج دخلت مرة خالي مبوزة زعلانه لان ظربت ابنها «حسين» شسويلة زلمه شكبره بنية مثلي فشخته..

: مرت خالو كواج الله.. 

بس هي خلت طشت الجبنه يم جدة وراحت« لحسين» تكلب براسه 

: يما فشجتني بنية عمتي..  

: كسر ايدها الحضرية موش سنعه ولا خلت حيا وترادد إلزلم و تفشج روس ماكوش تربيه هاي بنت مدينه..

ضحك «حسين» 

: ماكوش شي لا تخافي وليدج گوي

: جيرة بفرگج الحضرية ولج سوعدد لو ميت وليدي منهي اليفكج مني.. 

: ها خاله الله يفكني منج

ضربت زيجها

: يع اللسان شوفوا شلون حضريه برعه.. 

ردت تشتغل وهي تعبي الجبن الي بطشت بمواعين بيها قبق جدة ما ردتها انقهرت كلش خلتها ترزل بيه تخوزر و تجاهلت الموضوع و حاجتها تخلي صوغة لأمي من خيرات الريف. 

 

: رجيوة عزلي لفوزية جبينه وكيمر و رويبه و زبيدة و دهن حر يمه من نرد سوعدد لأمها تأخذ صوغتهن وياها

بس رجيوة جنها بعدها متحملة عليه بساع كلتني بكشوري

: موش بنية يكرم الله صبي جيرة بفركج.. 

سكتت مابيه حيل احجي وياها وقررت ارجع لمدينتي.. 

: جدة اريد فلوس شغلي عاونتجن بالجبن و الزبدة

مرت خالي هنا ردت 

: لا صايرة ولا دايرة بنوة من بنياتنا و تأخذ حك شغل شنهي يمه فرهود

غمتني وكملت جيرة بفركج حضرية موش بنت خير ولاش قنعانه بس جدة طلعت جيسيه من جيبها و فتحت القيطان طلعت الي مبلغ ونطتني ياه ضحكت اخيراً ردتها 

: هج يمة تناوشي مني يمة صرتي حديثه بعد موش تلمين القواطي من ورى امج ترحين تبيعيهن وزن صيري معدلة يبعد طوايفي كبرتي هناك غادي عند امج لا تطلعي شوارع الوادم تكول بت فوزيه كوية وكحة تخور مثل الصبيان بالشوارع

ردت التفتت لرجيوة

: شوفي رجيوة الحلال حلالي و بنية فوزية شتطلب يجرالها لا عبالج مرت رحيم و تتعديني ترى وروح هلج لا اسويج فرجه لخلك الله وانتي يمة مثل ما وصيتج موش تطلعين هناكه لا يبوكونج و انتي بنية حديثة وحليوة

فرحت يعني اني حلوة..

: حبوبتي (بمعنى بيبي) ما اطلع مو جاهل اني هسه جبيرة نجحت للرابع اعدادي بس اروح للجوارين.. 

: لا حبوبة لا موش يصلح تخورين بالبيوت.. 

فكيت حلكي ابتسم 

: مو خوارة انتم هنا مو ناس تطب على ناس حتى هناك رفيجاتي الروح بالروح.. 

: سوعدد يبعد حبوبتج هنانه ناس كرايب ناس موش غرب يطوايفي

 

اخيراً رديت لدياري تركت «حسن» متأمل و قبل جيتي همس لا تزعلين ترى انتي حلوة موش تاخذي على خاطرج من «حسين» يشاقى غبر هيجية شقاه.. 

هزيت راسي وهو يكول

: يمتى تكليلي اعشگنك

دنكت وجهي وما حجيت بس خجلت.. 

ضحك : لا تستحي مني هاچ. 

خلا بيدي كلادة سنسلة بيها ايه الكرسي زغيرة ..

: بنت مدينه موش يعجبج ذهبات نساوينا ولا ضوقهم راح اثغف مثلج وادخلن جامعه اجي ليمكم ادرس 

: الله كريم.. 

ادري يلفظ الهمزة بإسمي بس يتعمد يلفظها مثل اهله 

: شنهي سوعدد يعني تبقى بنفسي موش ناوية تكولينها ريحي گليبي وكليلي احبنك.. 

اخذت الكلادة غيرت موضوع وسط حسرته بقهر مكتله رادته

: سؤدد لو موش حرام بيدي البسنج ياها سؤدد تحجبي لخاطري

: ان شاء الله من اقتنع.. 

دخلت سيارة خالي انتظره يجي «حسن» دنك يحاجيني 

: حلوة عليج الشيله وعديني موش تنزعي كلادتي هنانه گلبي يوجعني عبن بس تنزعيها احسن موش تحبيني امس بيتتها بحضيني ابوسن بالكلادة وانه اقرا ادعية وايات الحفظ ان شاء الله تحفظج من كل شر ينظر عيني وصبيها وتبقى كلادتي حرز يحميج..

ابتسمت ومن طلع خالي خزره ابتعد بعيد وبعيونه نظرة بيها عشكه الي «حسن» كلش يحبني واني حيل عاجبني شكله و طيبته وقتها كلش حبيته.. 

أشرتله باي وهو استحى من ابوه بس رفع ايده بحجة يعدل شعره اشر بساع باي.. 

خالي : اريدن اخطبنج من امج «لحسن» 

خجلت عود

: موافقه بس شرط اكمل دراستي وهو هم يكمل دراسته ويثقف

باوعلي خالي و ضحك

: يكرم الله شعاجبه بيج عبالك صبي حشا موش بنت 

انحرجت و سكتت يمكن لان انطيته موافقتي اعتبر بيها جرئة صبي

 

  (مــــــــــــــــــــــريم) 

مديت راسي من باب الغرفه «عون» كاعد و هو يلعب دومنه معشوقته الدومنه.. 

: دو جهار

: سي

مدري شنو ولا اعرف اسماء الارقام يحجوها.. 

صاح : دومنت

عصب ابوه ورد ضرب الاحجار الدومنه طشرهن 

: عون غشيت

: ابد انت ما تعرف 

شافني رجل امي وكال 

: مريم جيبي ماي.. 

من ايام يعارك امي يريد تردني لعمامي عشتو عود استندت بأبن عم رجلها وتزوجته حتى يربي بتها و يسندها بس الصار يتضايق مني مدري براسه موال بس ورى مدة امي كللها 

: بنتج كبرت وعندي شاب بالبيت رديها لأهلها و هم زوجيها ابن عمها المريش

هنا «عون» رفع راسه لأبوه

: شفتك يم «نصير» هو الي دفعك مو؟ بشكد اشترى «مريم» حتى تطردها لعمامها

وكف وباوعلي اخيراً تحرك الصخر شكد المحله شكد املته وهو مينطي وجه اعرف يخاف 

رحت لملمت المطبخ شوي دخل «عون» يشرب مي ويباوعلي جان متردد 

: مريم اني.... 

رجع سكت متردد

: «عون» لا تخاف ما اروح لبيت عمي ما اعرفهم مايوم شفتهم شلون اعيش وياهم وامي مدامها ممقتنعه محد يكدر يجبرني اعوفكم والله انت وماما اغلى شي بحياتي 

ابتسم وكال

: لو ما زغيرة حجيتلج الي بگلبي والله لو تفتحين گلبي و تشوفين شكد بي انتي

ضحكت من ارتباكه و خجلت منه معقولة حس بيه شكد اعشكه معقوله؟ بس دائماً يلمحلي بعدني صغيرة على هالسوالف ولازم من نكبر وبالحلال 

ما ردت منه شي بس اريد افتهم وضعي وياه و ابقى انتظره لحد امس جيرانه ام ايمن طلبتني لأبنها بس امي كالت صغيرة واريدها تكمل دراستها

: امس خطبوني

صارت عيونه حاده وهنا ابو الهول مكدر يسكت حجى

: اق،تل كلمن يوصلج خليها ببالج يا «مريم» انتي «لعون» واني محترم عمرج الصغير ومنجب ساكت بس مال متونسة خطبوج واني مشتعله عشيرتي لا والله.. 

ضحكت : تغار؟ 

رجع سكت بدل موضوع

: اهتمي بدراستج و كبري بساع وامج اذا خيرتج تردين لبيت عمج رفضي ولج عده شباب شلون تعيشين بنص شباب 

هنا باوعت عليه بدلع

: ذكول ولد عمي اخوتي يعني واني هنا هم عايشة وي شاب و حي الله ابوه ابن عم لأبوي الله يرحمه

وكف وهو منفعل

: ديري بالج تختبري صبري.. 

طلع من جيبة فلوس وخلاهن بيدي

: مصروفج اليومي.. 

وطلع معصب ضايج من تلميحاتي على بيت عمي باوعت للفلوس يشتغل هو وكادود رغم يدرس 

تقريباً هو شايلنا اني وامي لأن ابوه مابي خير وكل شغله كاضيه عالسهرات و الشرب والعربدة 

باليل امي متقبل اطلع يمهم تكول عمج نوري ديشرب وما يقبل تجين يتخربط المزاج يمه

لذا اكعد بغرفتي واوقات يمر عليه «عون» باب الغرفة يوصي لا تطلعين وقفلي الغرفة رغم ابوه ما تجاوز الحد

جنت خايفة لا «عون» يورث طبع ابوه وهنا دماري يكون لو اخذ طباع ابوه

نجي احجيلكم عن عمي نوري واحد كدر يقنع امي تزوجه بس خلصت العدة مال وفاة بابا يملك سياسة اقناع رهيبة يمكن لو ما مسلم لكلت بيه رس (ي ــهودي)  

اكثر وقته عطال بطال واغلب شغله يدور فصوله ومشاكل وعرايك يتعمد يسوي عركه ينطك بيها و يجيب عمامه تعالوا فصل

وهذا طبعه و عيشته عايش عالمشاكل والفصولة الياخذها من الوادم وصل امي ملت منه ومن طبعه تندعي الله بلكت بيوم من الأيام بعركه من عركاته تجيه رصاصه تكتله لو فشخه بيافوخه يموته وتخلص منه وطبعاً «عون» يسمعها و يأخذها بالضحك..  

: خالة كافي دعاوي كلمن وقدره ومكتوب بكصته يمتى تنتهي خبزته بالدنيا مو اخاف يا خالتي دعوتج حدها ينشل ويبقى عليج عالة وتعب شايلته وحاطته..

التفتت اله.. 

: عاجبك وضعه نص شغلك بجيبه وللعرك اليطفحه و النص الثاني الي وبنتي وانت هامل روحك وانت يا خالة شاب و تحتاج 

دنك منحرج حيل يحترم امي

: خالة ترى اني هم من دم بنتج ابوي ابن عم ابوها دم واحد وعشيرة وحدة وهي بمثابة.....

سكت محتار معرف شنو يوصفني عيونه تباوعلي بحب وعشق ولسانه كمل... 

: اختي.. 

: الله يجازيك كل خير ابني من تكفلت مصاريف و لبس هاي اليتيمة ربي يرزقك بحلاله و يبعد عنك اولاد الحرام خالة «عون» مستحية احاجيك بس والله ما اريدك تتعلم تالي مثل ابوك تشرب فهمتني يمة مو..؟ 

دنك وهو ساكت ومجاوبها استغربت شنو صاير؟ باوعت «لعون» من امي كامت تكفكف بالبيت همستلة 

: عون.. ليش امي بسمرتك شنو مسوي 

رد بساع وكام متهرب مني

: ماكو شي لازم اروح لا انطرد من شغلي لا تنامين اجيبلج وياي كرزات

رديت بساع ما اريد اكلفه

: بس غالي عليك لا خوية

تعمدت ابسمرة من كال لأمي مثابة اختي عاد هنا ركزت بخوية جان مدنك بس سمعني رفع راسة تدريجياً لمن عينه بعيني بينت ملامحه بيهن لمحه مرح و ضحكه ترست ملامحة دون ما يضحكها ابتسم وكال

: خوش خوش كبرت مريتي و صارت تفتهم وتعرف تلوف الحجي وتبسمر لا ومن سنتين بدت تلمح الي و تتحارش بالحجي 

تدور اعترافات مني وتريد اصارحها شنو مشاعري ترى اعرف مشاعرج بس اكول صغيرة مو وقتها.. 

حيل خجلت يحس بيه من اول مرة كبرت مشاعري وصرت احبه بس ساكت دنكت ابرد خدودي بيدي ضحك هو.. 

: تريديني يعني شكول لأمج؟ مريتي المستقبلية ولج هم هيج و يصيحون كبرت البت وعايشة يم شاب مو محرم عليها ولازم ترجع عمامها.. 

النوب ترديني احجي شنو هي مشاعري لا يا «مريم» اكيد اكول مثابة اختي وداخلي استغفر الوصف لان ما اعتبرج اختي من بدت انوثتج تبرز وبدت تتغير مشاعري الج مكدرت الا اعشقج يلة تردين اعترف مو؟

أولا ولج انتي صغيرة قاصر انتظر تبلغين ال ١٨ سنه حتى عقلج ناضج و هنا تفهمي شكد احبج واني هم مو جبير نحتاج وقت ننضج بي بس انتي مصربعه ما تنطين مجال وصرت اخاف من ابوي وعمامج لا يسلبوني اجمل شي بحياتي

سكت يجر نفس يمكن اول مرة بحياته يحجي هلكد كلمات متواصله خاصه طبعه قليل الكلام رجع وهو بنظرته حزن

: فطنت عالدنيا واني مظلوم مشتت بين ام يومية زعلانة لان الأب مو خوش و فطنت ابوي الوحيد بأخوانه وولد عمامه فقير لأن ما يعرف شغل ولا هو سنع ولا معدل

رفع راسه وتجاه بالحايط وهو يضم دموعه ميحب يبين ضعف بس غدرته دمعه تسرسحت عالخد و مشت بحال سبيلها للحنج والركبة هناك اختفت.. 

: داخلي كلش مهضوم ومربط مكدر ارد حق امي الي راحن فلوس ورثها عالقمار والشرب والنسوان 

و البقالها خوالي اصلآ منطوها كل ورثها هي خسرت حياتها واني الظليت يم ابوي شابع ضيم

دار على امج ارملة وحلوة بيعها ذهبها وفلوسها اخذهن تخاف تكول لا وهسه اعرف شيفكر اني خايف يا «مريم»

لا يروح لبعيد حتى يستولي على ورثج الي عند عمامج و نفس الوقت ابن عمج مريش.. 

بخوف : شتقصد؟! 

: ابوي هواي يلتقي بعمج وولد عمج 

: شتقصد.. 

: واضحه يا حبيبة بقت على الله و عليج كونج ما تغدريني «مريم» والله احرك عشايرج و اقتل كلمن ياخذج مني 

: بس اني احبك انت.. 

: تحبيني مشايفه غيري وفطنتي يمي يم «عون» الفقير اليحفر الكاع ويجيبلج لبسة لو جنطه مدرسة لو لوازمج كافه لو لعابة عجبتج

بس لو ترحين بالعكل لعمامج و تشوفين الجاه و الغنى اصدك ما تغرج الدنيا وبعد يا «عون» بيش الكيلو 

ابتسمت : هو امي كالت بس بالعطل ترحين حتى نكف الشر لا تخاف اني قاصر وقانوناً امي ولي امري واني حالياً مخيرة وي منو اعيش اكيد اختاركم

التفت الي وطلع مصاصه شمر وحدة الي ووحدة بحلكه فتحتها احب طعم الكرز لذا شمرها الي وهو صافن بالسكف ما اعرف شيفكر

: والله ترى مالهم حق قانوناً بيه اني لأمي و اذا لا سامح الله صار طعن بأمي اني مخيرة يم منو اعيش اختاركم

: تختارين امج اني مالي حق بيج الا اذا.. 

ردت : اذااا؟ 

: صرتي مرتي

: اخطبني لعد من امي

دنك بقهر 

: هنا لازم من جدج و عمامج هيج الاصول..  

: ترى مالهم حق يمنعوني اولاً مو ابوي ثانياً ولا متكفلين معيشتي رابعاً جدو يحبك بس هو ولي امري من بعد بابا 

ترى سائلة مدرسة الاسلاميه عن زواج البنت

وسع عينه

: فلك طرج

خجلت : مكتلها عليك خفت تدز على امي..  

: اي بلة وشكتيلها

: هيج سؤال فقهي وبس.  

: مريم هاي انتي دتكبرين عمرج ١٦ سنة وهذا «عون» بكبره گلبي صار بين ايديج يا تصونيه يا بعد نبضي يا تخونيه وهنا تقتلين عونج.. سولفنا هواي و راسي صدع ينبض قلبي

وكف وهو يعدل بملابسة

: هم يا الله اروح وراي شغل.. 

تدلعت : جيبلي وياك من تحل من الشغل سمسمية.. 

: تستاهلين 

وكفت و طخيت بي وكفتي صارت غلط جاي ارجع ورى وصفن بيه ودنك وجهة على شفايفي...... بعدها دفعني وهو مرتبك و معصب ونزل بيه رزالة وراشديات هنا دخلت امي و عمو نوري.. 

: شنو صاير هنا ليش ضربتها؟ 

عين عمو نوري.. على دكم زيك تشريتي المفتوحه رجع تلفت لأبنه و رجع الي..  

الفصل الخامس من هنا