رواية خادمة الفصل السابع بقلم جمانه السعيدي
بشرى....حاولت اطوي حزني وارجع الشغلي
لان اذا ابقى على سعدون يكتلني الجوع مايهون يصرف ربع على البيت
اذا ماكو اكل بيتنا كبل يروح الاهله ياكل عدهم
واني مومهم اهم شي هو يشبع بطنه
اني ابد مااعاتبه لو احجي علي لان جربته اكثر من مره مايفيد الكلام وياااا عبالك احجي ويا الحايط
كنت أحاول كد مااكدر اخلي قريب مني
مااريده يعوفني بعد ماعندي احد غيره بهاي الدنيا
وبعد عندي امل يصير عندي طفل حتلو طفل واحد يملي عليه الدنيا
اني احب سعدون احبه ومتعلقه بي
هو أول رجال يدخل حياتي
اعرف كله عيوب بس احبه مو بيدي يكولون الحب أعمى
بهاي الفتره حديث سعدون كله على بيت الدكتوره
جان يحرضني بطريقه غير مباشره
حتى اخون الامانه
سعدون.... كلما اروح الاهلي امي تسئلني ليش ماحبلت بشرى
بشرى...خفت من كلام سعدون خاف اهله يحرضو
يعوفني بحجة الجهال
بشرى...اي امك ليش مستعجله الدكتوره طمنتني
تكول قريبا راح تحبلين
سعدون...يمتى قريبا هاي صار سنتين وانتي تصرفين راتبج كله على العلاج
وكلشي ماكوووو إلى متى
بشرى...قابل هو بيدي رزق من رب العالمين
سعدون...ايجوز انتي لو تعرضين نفسج على ذوله الدكاتره بااربيل لو هاي المستشفيات
الخاصه بهاي السوالف تحبلين
بشرى...صدك اكو مستشفيات تعالج حالتي
سعدون...ليش ماكووو كلشي اكووو بس هيج مستشفيات
محتاجه فلوس هيج بالملايين
وانتي راتبج يله للعيشه حتى مجاي اطلبين زياده بلراتب
انتي خايفه عليهم
نايمين على الفلوس يوميتهم مليونيين يعني اذا زودو راتبج شراح يخسرون مثلا
حتلو مليون بلشهر ترا اذا بقيتي على هذا الراتب
بعمرج مراح تتطورين ولا يصير براسج خير
راح تبقين خدامه طول عمرج
جمانه السعيدي
بعدين فلوسهم وذهبهم جوه ايدج لو اخذتي كل مره شويه
مراح يحسون بيج
لان هما واثقين من امانتج
بشرى...شلون اكيد اذا اخذ شي يحسون بيه
شنو هي تايها يعرفون كل غراضهم وفلوسهم بلبيت
بعدين اني مستحيل أمد ايدي على حلالهم
مااكدر شلون اخون الامانه
سعدون...زين ابقي هيج كاعده بهاي الخرابه طول عمرج
وابقى تاخذين علاجات أشكال واللوان
مخلصه راتبج على العلاج بدون فايده
اني يمكن اصبر عليج سنه ثنيبن خوما اصبر العمر كله
اني من حقي اكون اب حالي حال جماعتي
بشرى...كلام سعدون حيل اثر عليه منا اني حزينه على امي
منا هذا العلاج الي اخذه جاي يخربط هرموناتي
منا سعدون كاعد يغثني
ياربي وين اروح شلون بيه اني تايها ومااندل طريقي منيبن
بشرى...كلما اروح للشغل واشوف فلوسهم كدامي والذهب مشمور على الميز
اذكر كلام سعدون سعدون صار شيطاني
الي مرافقني وهما هم ليش هلكد متهاونيين
بهذا الخير كله
اكو مثل عد اامصريبن يكول ( المال السايب يعلم السرقه)
يعني الفلوس الي ماعليها رقيب تعلم البوك
شلون بيه من سعدون يقر براسي راح يخرب اخلاقي
مااكدر اخون الامانه اني مو طبعي هيج
ولا متربيه على الخيانه
يوم جمعه الصبح الدكتور والدكتوره ما يطلعون
بس العصر للعياده
طبعا اني ابد مااشوفهم كاعدين يسولفون لان وقتهم كله للشغل واني مااادقق بكلامهم
اريد بس اخلص شغلي اليوم الي يكونون بي بلبيت
مااكدر اخذ راحتي بلشغل
لان هما موجودين
اشتغل على كيف حتى لا اطلع صوت يزعجهم بيوم راحتهم
هذا اليوم سمعتهم يحجون عن ورث
فضولي دفعني اسمع كلامهم
امال....شلون بمصطفى ( مصطفى اخو امال ازغر منها ) كل شويه داز عليه واحد
تنازلي اتنازلي اي ليش اتنازل عن حقي
عدنان...يعني هو ما مكفيه حصته ماخذ بكدج مرتين
وعينه على حصتج
امال...مااتنازل لو كلشي يصير
هذا حقي ومااتنازل عنه
جمانه السعيدي
البارحه دز عليه خالي
يكول مصطفى امال عدها خير من الله شنو هلطمع يعني اذا تنازلت عن حصتها
راح تموت من الجوع
هو شنو علاقته بيه يمتى هو ذاكرني يمته
جاي يسئل عني من جنت ادرس يحرض بااهلي
خل تعوف الكليه شدعوه هلكد تصرفون عليها
عود شنو تصير دكتوره
قحط دكاتره بلعراق يخاف اصير احسن منه
من يوم ازوجت لليوم محاربني ويحسب وراي
اي شنو اني ماخذه حلاله صدك بخيرهم ما خيروني وبشرهم عمو عليه
وهسه تعاي تنازلي عن حصتج انتي مو عايزه
عايزه مو عايزه هو شعلي قابل معيشني
هذا الخير كله بتعبي
عدنان...معليج واي احد يدخل كوليله مالك شغل
اني واخوي اطلع انت من هاي الشغله
امال...ولله لو كلشي مااتنازل ما محتاجه بس مااتنازل
مادام هيج جاي يحرجني كدام العالم
عدنان...شكد حصتج تطلع من الورث
امال....٢٥٠ مليون ايجوز اكثر
ليش اعوفهن اله اشتري بيهن عقار واستثمره
احوله مجمع طبي
عدنان...لاتحركين دمج عوفي يحجي ويسكت
امال...اخر مره اتواصل وياي اذا ما تتنازلين
اني انطيج حصتج بس بعدها اسافر للخارج
وانسي بعد عندج اخ
طول عمري مراح اوكف عليج لو تموتين مراح اسئل عنج
اطلع برا وبعد ماارجع للعراق ابد
واقاطع كل اهلي
شسوي بهيج اهل يحبون الفلوس اكثر مني
عدنان...هو صح يريد يسافر
امال...اي هو من زمان يريد يسافر ويعوف العراق
يمعود هذا لا خبره ولا معلومات ولا حكمه بلتصرف
عود يفتح مشروع بلخارج اذا ما طشر فلوسه بيومين ورجع حافي للعراق
طول عمره يركض ورا المظاهر كل خير مابي
ليش انطي فلوسي يطشرهم بيومين
ويرجع عليه
اني اريد استثمرهن بمشروع زين
جمانه السعيدي
عدنان...اسكتي بعد لاتردين علي منا لمن يجي
ينطيج حصتج يله تتنازلين
امال...هو هم هيج اذا مااستلم الفلوس بايدي
مااتنازل عن حقي
قبل ابوي سجل الكراج باسمه عود حتى يصير براسه خير
كال هاي حصة مصطفي
تالي بس مات ابوي باعه وصرف فلوسه
ورجع يشاركنا بحصصنا باقي الاملاك
هو شبقالنا بيت اهلي والبساتين ثنيينهن
احنا خمسه هو مو بس عليه مفتر على خواتي
تعالن اتنازلن عن حصصجن
لو بي خير جان حافظ على حصته مو باعها وطشر
فلوسه مايعرف ريحة المسؤليه
عدنان...مالج شغل بي اذا اتصل عليج لا تتواصلين ويااا
جمانه السعيدي
بشرى...اشتغل واذني يمهم
حيل يعني هذا الخير كله الي عدهم والنوب راح يجبهم ورث
حقه سعدون من يكووول بيتهم متروس فلوس
هسه شيصير لو اتعالجني بمركز اطفال
قابل تخسر شو محتارين ووين يخلون فلوسهم
النوب مو بس فلوسهم جاي تجيهم الفلوس من كل مكان بدون تعب فدوه اروحلك ياربي
ناس حسره عليها الفلس وناس تلعب بلفلوس لعب
بشرى...من رجعت للبيت كعدت سولفت كلشي
صار بيت الدكتوره بلحرف الواحد
موقصدي شي بس ردت سعدون ينبهر مثل مااني انبهرت
من سمعت هاي السالفه
سعدون....تحجين صدك راح تجيهم ٢٥٠ مليون
بشرى....اي ايجوز اكثر تصور هذا الخير كله الي عدهم
والنوب تجيهم بعد فلوس وهما كاعدين لا شغل ولا عمل
سعدون...خرررب ذوله شني بنك فلوس
شني هذا الحظ الي عدهم
اسمعي اسمعي زين هاي فرصه واجتنا
بشرى...شلون يعني
سعدون....اريدج تراقبيهم يمتى تجي الفلوس
ووين يخلوها يمتى يسافر مصطفى
ذني الفلوس النا منحقنا مو حقهم
راح تتعالجين ويصير عندج اطفال
ونهد هذا البيت ونبي بمكانه بيت حديث
واشتري سياره اشتغل عليها
وبعد انتي تكعدين وتسكتين تصيرين اميره
مو خدامه بيتهم راتب امج على شغلي بلسياره
نعيش احلى عيشه
بشرى...انت شجاي تكول شلون ناخذ الفلوس
اكيد راح يعرفون اني اخذتهن
ويشتكون عليه
هاي اذا ماخلوهن بلمصرف كبل
سعدون......باعي انت ماعليج غير تراقبيهم وتسمعين كلامهم
وأهم شي يمتى مصطفى يسافر
واني راح اخطط شلون نحصل ذني الفلوس
بدون مايشكون بينا
بشرى...اني اخاف انت تريد تورطني
سعدون...باعي بشرى لو تساعديني ناخذ الفلوس
لو اني من طريق وانتي من طريق
اني ما مستعد اكمل حياتي بهذا الفكر
اربد اعيش حالي حال الناس
اني كلشي ما حصلت من هذا الزواج نفس وضعي بيت اهلي بلعكس اهلي طول النهار وياي بلبيت ويخدموني
وانت طول النهار برا البيت
مااشوفج غير بليل
تجين تنظفين وطبخين وتنامين من كد التعب
وكل يوم نفس الحال ترا اني رجال وعندي احتياجاتي
وماكو واحد يقبل زوجته تطلع الصبح وترجع المغرب
اذا أخذنا هذا المبلغ
مراح يأثر بكد الشعره على حياتهم
هما اصلا عدهم فلوس مالها عدد
بس احنا هيج مبلغ يفرق ويانا حيل راح ينقلها من الكاع للسما
نبني بيتنا وتتعالجين ويصير عندج اطفال
حتلو اطفال انابيب
نبني بيتنا تكعدين بلبيت واني اشتغل واعيشج احسن عيشه
جمانه السعيدي
بشرى...اقتنعت بكلام سعدون فعلا هيج مبلغ مراح يأثر على امال وعدنان
بس اني وسعدون راح نعيش مثل الناس
ناكل ونشرب ونسافر ونبني بيتنا
سعدون...صفنتي مبينه اقتنعتي بكلامي طبعا لازم تقتنعين
لان كلام منطقي
هاي الفلوس حقنا شوفي شلون انت سمعتي
بلفلوس وشلون اتحمستي
باعي اريدج من باجر تحاولين تفصلين الكامرات
حتى إذا رادو يعرفون منو الي اخذ الفلوس
الكامره عطلانه واريدج تعرفين يمتى يسافر مصطفى
بشرى...ليش تريد تعرف يمتى يسافر مصطفى
سعدون...راح اخذ الفلوس بيوم الي يسافر بي مصطفى
ونكول هو الي اخذهن
بشرى...شلون اني خايفه يكشفونا
سعدون ...ادعي بس كون يجيبون الفلوس للبيت
وانتي مالج شغل عوفي كلشي عليه
بشرى...اشوف راح اراقبهم وارجعلك خبر
الله يستر من الجاي يمكن راح اضيعنا بهاي افكارك
سعدون...كولي راح تعشينا بهنى بهاي افكارك
بشرى...فعلا ثاني يوم لعبت بلكامره وعطلتها
من رجعو الدكتور والدكتوره للغده ابد ماانتبهو
للكامرات
هما رابطيهن على شاشه زغيره بالهول
من يجون كبل للمطبخ ياكلون ويبدلون ملابسهم
ويطلعون للعياده
بقيت ادعي كون ما ينتبهون الشاشه فاصله
فعلا هلكد ما مشغولين ما انتبهو للشاشه
هما اصلا صار سبع سنوات كاعدين بهاي المنطقه
محد قرب على بيتهم الناس هنا كلمن بيته
محد اله علاقه بلثاني
اسمعهم يسولفون رحت قربت على باب الغرفه
وسويت نفسي امسح بلاثاث حتى لايشكون بيه
امال...مصطفى مستعجل عكب باجر يسافر بلعشره الصبح
حاجز طيران
اليوم يكول تعاي وقعي وأخذي فلوسج
بس بعد لا انتي اختي ولا اعرفج
عدنان....خلاص باجر من نطلع من المستشفى
نروح اني وياج وقعي ونجيب الفلوس ونجي
امال...اي اريدك تجي وياي خاف يتهور مصطفى عليه
اني كلشي اتوقع منه
بشرى...من رجعت للبيت حجيت كلشي السعدون
الفلوس باجر توصل للبيت
ومصطفى عكبه يسافر الساعه عشره الصبح
سعدون...باجر يجيبون الفلوس للبيت لان ماكو مصرف
العصر
وثاني يوم عدهم دوام يعني الفلوس راح تبقى بلبيت
انتي عطلتي الكامره
بشرى...اي عطلتها وابد ما انتبهو ثنيبنهم عليها
مشغولين بمشكلة مصطفى لان كل شويه ايدز عليهم واحد
سعدون...تمام اليوم الي يسافر بي مطصفى
اني اجي اخذ الفلوس وراح اضربج
واربطج للكرسي من يرجعون الدكتور والدكتوره
راح تكولين مصطفى اجا دك الباب
اني فتحتله لان اخو امال
ضربني وربطني وأخذ الفلوس وراح
وكال ذني حقي كولي الآمال بعد ماتشوفني
اني مسافر
بشرى...ولله خايفه وما مقتنعه
سعدون...اذا تخافين راح ننكشف واني اشمر كل هاي السالفه براسج اكول هي كالت تعال اخذ الفلوس
انتي راح تنسجنيين
قوي كلبج وتخيلي هاي الفلوس صارت من نصيبج
بشرى...ماادري
بشرى...ثاني يوم من رجعو الدكتور والدكتوره
جابو وياهم جنطه فلوس
بس دخلت امال تحجي ويا زوجها وهي شايله الجنطه بايدها
اني اباوع عليهم من شباك المطبخ
امال...مامصدكه اخذت حقي من مصطفى
اخيرا اخذت حقي منه
عدنان...تستاهلين حبيبتي
امال...باجر يسافر واخلص منه شكد اناني
شكد عينه ضيكه هو ماله حصه ويانا حصته الكراج
باعه ورجع على حصتنا
بس صوج ابوي ليش ماطلعه من الحصص
هسه هو اكل اكثر من حصته
بشرى....سلمو عليه ودخلت الجنطه للغرفه
عدنان... يومين واخذهن اخليهن بلمصرف
هلايام عدهم جرد سنوي علمود راس السنه اتصل على ابو عدي واشوف يمتى يخلص الجرد اخذهن
اخليهن بلمصرف بحسابج
امال...ماعليهن شي بيتنا امان حتلو يبقن اسبوع بلبيت
كلشي ما عليهن
بشرى...طلعو يتغدون واني بقيت واكفه انظف
امال...ليش ما تتغدين ويانا
بشرى...مااشتهي بعدين اكل على كيفي
كملت شغلي ورجعت للبيت
لكيت سعدون منتظرني بلشارع
قبل لا واصل للباب
سعدون...هااا جابو الفلوس للبيت
بشرى...اي جابوهن وباجر طيارة مصطفى الساعه بلعشره الصبح
دخلنا للبيت
سعدون والكاميرات خوما انتبهو عليهن
بشرى...لا اطمن ماانتبهو عليهن فرحانين بفلوس
سعدون...باجر نصير اغنياء
باجر نودع الفكر ونعيش حالنا حال الناس
