رواية خادمة الفصل الثامن بقلم جمانه السعيدي
بشرى... بقى سعدون اليل كله يعيد عليه الخطه
وياكد عليه شلون اتصرف وشلون ابقى مسيطره على اعصابي
سعدون...كلشي راح يصير بسرعه ومراح تحسين بشي
بس اهم شي من يرجعون الدكتور والدكتوره للبيت
تضغطين على نفسج
وتمثلين الدور زين
بشرى.... كون ما ننكشف
سعدون....مراح ننكشف صدكي
بشرى...نام سعدون واني ماكدرت انام خايفه
شلون خاف يلزمونا شلون بيه
اني مجبوره انفذ لان احنا محتاجين هذا المبلغ
هما ما محتاجينه هاي الفلوس راح تغير حياتنا
جذريااا
بلنسبه الآمال وعدنان بشهر واحد يطلعون هيج مبلغ
بس اني لو ابقى اشتغل العمر كله
مراح اكدر اجمع نص هذا المبلغ
بس غفيت شويه كعدني سعدون يله اكعدي
واريدج اصحصحين زين
وتنفذين كلشي كلت علي بلحرف الواحد
كمت اسحل بروحي سحل خليت بيض بلجدر على النار
وطلعت خبز شغلت الصوبه وخليت القوري على النار
كعدنا نتريك
اليوم سعدون كاعد من الصبح علمود الفلوس
كل يوم اطلع من البيت وهو بعده نايم
الله يستر من الشي الي راح يصير
سعدون شيطان وتخطيطه تخطيط شياطين
خاف اطيح براسي اذا ابطل سعدون يموتني
اذا ضاع منه هيج مبلغ مو بعيد يذبحني ذبح
وصلت البيت الدكتوره فتحت الباب ودخلت
لكيتهم بعدهم نايمين يمكن اني جايه من وكت
اي جايه من وكت كله بسبب سعدون
مستعجل عباله لعبه الله يستر ويعدي هذا اليوم على خير
فتحت المطبخ شغلت الصوبه طلعت صمون
خليته بلمايكرويف
كعدت الدكتور شافتني تفاجئت
امال...صباح الخير اليوم من وكت
بشرى...اليوم كعدت من وكت كلت خل اروح حتى اخلص شغلي من وكت
امال....اني لو ادور الدنيا كلها مالكه وحده مثلج
شكد رب العالمين يحبني الي خلاني التقي بيج
بشرى...تحبون احضر شي معين
امال...اني اريد حليب بلكركم والباقي انتي بكيفج
بشرى...صار من عيوني
طكيت بيض وطماطه وطلعت جبن وقشطه وزيتون
خدرت جاي وحليب بلكركم
طلع الدكتور راح يغسل شافني
عدنان...صباح الخير
بشرى...صباح الخير
عدنان..... بس شميت هاي الريحه الطيبه جعت
بشرى...الف عافيه
كعدو يتريكون صاحو تعاي اتريكي ويانه
بشرى...اتريكت قبلكم الف عافيه
جمانه السعيدي
طلعت لحم خليته على النار اريد ابقى بلمطبخ حتى اسمعهم خاف اكو شي جديد
طلعت باميه طلعت طماطه افتر يمهم بلمطبخ
وهما ابد ما جابو طاري الفلوس
يسولفون بس بشغلهم
عفتهم بلمطبخ ورحت الغرفة النوم اتأكد الفلوس موجودات
فتحت الكنتور اطلع جرجف للجربايه شفت جنطة الفلوس
بلكنتور
غيرت الجرجف وأخذت الملابس الوصخه وطلعت للحمام
كملو ريوك واني رجعت للمطبخ انظفه
علما دخلو للحمام سبحو وغيرو ملابسهم
والدكتوره تمكيجت وتعطرت اني خلصت شغل المطبخ
رحت للحمام اطلع الجرجف من الغساله
صارت الساعه تسعه يله طلعو من البيت
رحت ركض اتأكد خاف انتبهو للكامره وصلحوها لكيتها
نفس وضعها ما مشتغله
كلشي تمام
اتصل سعدون
سعدون... هااا طلعو لو بعد
بشرى...اي طلعو تعال بس البس شي على راسك
خاف واحد يشوفك
سعدون..اي فهمت
بشرى...تعال من الباب الثاني لا تجي من الباب الرئيس
سعدون....تمام
بشرى...رحت فتحت الباب الجانبي دخل سعدون
ملثم كلشي ما مبين منه
دخلنا للبيت
سعدون...وين الفلوس
بشرى...هاي الجنطه بغرفة النوم
فتحت الكنتور طلعت الجنطه التفت سعدون
شاف علبة الذهب على الميز
شالها حول الذهب بجيبه
بشرى...هاي شنو احنا كلنا بس الفلوس
سعدون...ما اتسكتين على اساس هيه محتاجه
الذهب باجر تشتري اكثر منه
افتر سعدون وشكو شي ثمين اخذه
سعدون...هي اسمها بوكه ليش ابقي شي وراي
اخذ كلشي هاي الشغلات احنا أولى بيها
جمانه السعيدي
جاب كرسي من المطبخ
سعدون...اكعدي خل اربطج
بشرى...على كيفك
سعدون...اذا على كيف راح يشكون بينا ياثوله
بشرى..كعدت على ااكرسي
طلع حبل جايبه ويااا ربطني حيل على الكرسي
سعدون...هيج تمام بعد لازمج كتله زينه
حتى التمثيليه تكمل
بشرى...مو حيل على كيفك
بشرى...جان بلش بيه ضرب وضرب
بشرى...كافي موتتني
سعدون.. اتحملي المبلغ يسوه
بشرى...وجهي صار احمر من الضرب
ضربني على ايدي حيل
بشرى...اخ اخ موتتني انت ما صدكت
عافني وراح طلع سجينه من المجر
سعدون....راح اجرح ايدج
بشرى...راح اعيط والم الناس عليك انت شنو اليوم تريد تنتقم مني
سعدون...اسكتي بس اسكتي هو جرح بسيط
مراح تموتين بسببه
بشرى..جرحني احس روحي شاغت
الله لا يوفقك شسويت بيه راح ابقى انزف
منا لمن يرجعون يخلص دمي
سعدون...جنج حصان كلشي ما عليج
بشرى.. رجع اتلثم حيل وأخذ جنطة الفلوس
و الذهب وكل الشغلات الزينه وطلع من نفس الباب
بقيت مربوطه على الكرسي وايدي توجعني بسبب الجرح
الدنيا بارده الضربات توجع
وهو عبالك ما صدك تكول يطلبني ثار
الساعه ١١ ونص رن تليفوني
الدكتوره دائما ترن عليه تسئلني شطبخت
لو توصيني اغسل ملابس معينه
لو تكول دزيت فلان شغله للبيت افتحي الباب
بقه التليفون يرن اكثر من ربع ساعه
بعدين كطعت عشر دقايق ورجعت رنت عليه مره ثانيه
رنت اكثر من عشر مرات
بعدين سكت التليفون
بشرى...انشاء الله تجي وتفتح الحبل كطع اديه
الله لا يوفقك سعدون على هلدكه الناقصه
رجع التليفون يرن هلمره دكتور عدنان
رن اكثر من خمس مرات
هيج الشك دخل كلوبهم اكيد راح يجون ويخلصوني
من هاي الشده
الله ياخذك سعدون منيين اجيب هاي الافكار
ولك انت غلبت حتى الشيطان
باوعت للساعه ب ١٢
ربع ساعه بلضبط وانفتح الباب الخارجي
حتى امثل الدور زين واخليهم يصدكوني بس سمعت الباب انفتح
كمت اصيح
بشرى...الحكولي الحكولي فدوه راح اموت
دخلت الدكتوره تركض والدكتور وراها
الدم الي نازل من ايدي صاير طكعه جبيره بلكاع
ووجهي ازرك من الضرب
الدكتور ...ياستار ياستار هاي شبيج
بشرى......الدكتوره.تفتح بايدي وتكول ولله عرفت صاير شي
ادك عليها ماتجاوب
منو سوووا بيج هيج
بشرى...اخوج اخوج مصطفى
فتحت اديه
الدكتور راح جاب عدة الاسعافات الاوليه
وبدا يعقم ايدي ويربطها
وخله لزكه يم حاجبي لان مجروحه جرح زغير
الدكتوره راحت جابت ثلج خلته على وجهي
امال...شلون دخل للبيت الله لايرضا علي حرامي
فوكاها حرامي
بشرى...دك الباب كلت منو كال اني مصطفى
اخو الدكتوره فتحتله الباب
امال...ليش فتحتي الباب
بشرى...يااا غير اخوج شلون ماافتح الباب
اني خدامه بهذا البيت مو صاحبته
امال...وبعدين
بشرى...دخل للغرفه كبل فتح الكنتور
كتله شسوي
كال اريد فلوسي هنا خليتهن يم امال
اني شكيت بي كتله خل اتصل عليها واسئلها
راسا التفت عليه وزمخ بيه وانتي شنو علاقتج بلموضوع
كلج خدامه هنا
كتله مااكدر اخليك تأخذ اي شي من البيت
راسا ضربني على وجهي ودخل للمطبخ جاب سجينه
اني خفت يذبحني
دفعته بايدي ايدي اجت على السجينه ونجرحت
من شفت الدم خفت منه
خفت يذبحني مبين بعيونه الشر
رجعت ليوره طلع حبل وكال اكعدي على الكرسي
وربطني حيل
من شفته شال علبة الذهب والغراض الزينه كلها
كمت اصيح علي
خاف مني خاف يطلع صوتي والناس تسمع
رجع عليه موتني كتل
سكتت دكتوره خفت خفت اموت هنا
ومحد يدري بيه
جمانه السعيدي
امال...فدوه اللج اهم شي انتي زينه
الدكتور...خل اشوف الكامرات
بشرى...راح يتاكد من الكامرات لكاهن عاطلات
عدنان...هاي شنو الكامرات من اول امس طافيات
شلون مانتبهت عليهن
عدنان...لازم نشتكي علي
بشرى...امال خاله ثلج على وجهي كالت الزمي جيس الثلج
امال...لا ما نشتكي
عدنان ...شلون ما نشتكي
امال...الفلوس هسه راحن وهو سافر وخلص
اذا اشتكينا علي شنحصل بس السمعه الموزينه
اذا اشتكينا مراح ترجع فلوسنا ابد
بس راح نصير حجايه بحلك العالم
اخوها دخل بيتها وباك فلوسها
اني سمعتي بين الناس مثل الذهب
معقوله اضحي بيها علمود هيج مبلغ الناس ما تصدك تلكه سالفه تحجي بيها
الله يعوضنا خير انشاء الله يصيرن نار علي
وما يتهنى بيهن ابد
الشكوى كلشي ما تفيد بعد سافر
هو مخطط الهذا الشي ماطول انطاني الفلوس
مخطط يجي للبيت من نطلع وياخذهن
شنو من بشر هذا شكد طماع
طماع وحيال الله ياخذه حقير
هسه تلكا فرحان كدر ياخذهن مني بس مراح يتهنى بيهن ابد
مادام فلوس حرام ما يتهنى بيهن ابد
عدنان...ليش ما نشتكي لو وين ماكان يجيبونه
امال...مااريدهن خليهن يولن اهم شي سمعتنا
بين الناس
اني صار سنيين اشتغل وسمعتي ذهب
الناس كلها تحلف بيه ناس تجيني من غير محافظات
هسه علمود هيج مبلغ
اخلي الي يسوه والي مايسوه يشمت بيه
وخاصه الدكتورات الي نفس اختصاصي
العوض على رب العالمين
بشرى...اني كاعده وسمعت كل هذا الحجي
كلت الحمد لله همزين مراح تشتكي
اجتني امال
امال....بشرى عيوني امسحيها بوجهي طبعا انتي من حقج تشتكين على اخوي لان ضربج
بس اني راح ادفعلج تعويض وتسكتين الخاطري
هلمره
اني اعتذر لان صار بيج كل هذا بسببي
بشرى....اني مستحيل اشتكي على اخوج انتي صاحبت فضل عليه
واني دافعت عن بيتج وحاولت احافظ علي
بس ماكدرت احافظ على حلالج اعذريني
امال...انتي وين اكو منج
ذهب انتي ما تتعوضين ابد
اعتذر منج مره ثانيه اخذي اجازه كم يوم لمن تصيرين زينه
بشرى.. فتحت جنطتها .طلعت منها ١٠٠ الف وانطتني
وكالت عدنان شوف سياره توصلها للبيت
بشرى....ولله خطيه امال مكسوره بشكل مو طبيعي
وهي تتوقع اخوها اخذ فلوسها
تحس اخوها كسرها كدام زوجها
وقلل من قيمتها
بشرى ...طلع الدكتور ااجرلي سياره ودفع الاجره
رجعت للبيت كلش ضايج
وصلتني السياره للبيت
دخلت بس شافني سعدون كال هاااا
بشرى ....ووجعاااا ليش هيج تضربني هاي فوك ماجاي اساعدك
سعدون...احجي شكو بشي
بشرى...اني طلعت ممثله عبقريه مثلت عليهم الدور
محد كدر يشك بشي
وفوكاها انطوني ١٠٠ الف تعويض عن الضرب
سعدون...بعد عليمن ضايجه
اني اكيف واحد يضربني هيج وينطيني ١٠٠
اصير دوشك ضرب بس احصل ١٠٠
بشرى...وووين الفلوس
سعدون...ضميتهن بمكان امين ممنوع تحجين بيهن
ولا بلحلم
لان بس نطلعهن يشكون بينا انضمهن فتره
منا لمن تبرد هاي السالفه
وبعدين نشتغل صح
بشرى...اليوم الغده عليك لان تعبانه من الضرب
سعدون...مو تدللين راح اجيب كباب ومقبلات
وبببسي اليوم يختلف
احنا راح نصير اغنياء
بشرى...زين اني حتى عشى مااطبخ
سعدون....اني اطبخ عشى مو تدللين
بشرى....صدك لو كالو الفلوس تغير النفوس
