رواية خطايا واجتثاث الفصل السابع بقلم نور البصري
بدأته في تاريخ 15/5/2024
الساعه السادسه و سبع وثلاثون دقيقه المغرب
حال عون ......
إنه شسويت وتصوبني هيج صواب
ماكفاك أحبك من طرف واحد ؟
...........
اسمع صايح امي و نوري وهو يرزل
- كتلج رجعي البت لعمامها ابني واحد سگط واحد تربية سز كتلج عندي شاب بالبيت لميت نفسي زين خايفه منه
وهو واكف بيده العودة رافعها يريد يضربني احس غيرته هي غضبه مني بس ما ضرب ذب العودة و هو بصوت يرجف
- لا ترجفين معقولة حجي ابوي بعدج عني ليش عفتيني واني ما اكدر دونج ليش مريمتي املتيني كبرتي بين ايدي واني اكول اخت واردد اخت اقنع نفسي انتي اخت..
بس املتيني بيج و مثل حية تطوى دخلتي لگلبي وبسمج زرعتي حبج و تالي تعوفيني و تلوفين على ابن عمج
شناقصني ولج بيدي احفر الكاع بيدي ذن واجيب التحبيه هامل نفسي
شهك وهو يبجي وصاح يلتفت عالباب المقفول
- خالة ماكو شي اني مو معتدي ولا ما عندي ناموس و غيره لو ما اخاف الله يمكن اي مو ملتزم ما حصلت الي يربيني صح
بس ابد مو واحد يعتدي على شرفه نسيتي ابوها يصير مثابة عمي نسيتي هي دمي ولحمي بس اريد اتفاهم وياها
الصوت برى شبه انخفض بس تحول صوت بجي...
- خالة والله ما فكرت بس اول مرة انت هيج خالة بنيتي افتح الباب فدوة الك
- بس احاجيها وهذا الباب فتحته اطمئني بس اريد اعرف ليش سنين قشمرتني املتني وتالي تكلي انت مثل اخوي
فتح الباب ووكف جانب وبعكس ايده يمسح دموع عيونه ويشهك
- ولج اااااخ ليش الغدر ليش؟
بس اشهك و ابجي لسه مهبوطه من سحلني عبالي راح يضربني لو عبالي راح يسوي بيه شي مو شريف ظل واكف ينتظر جواب ليش تغيرت عليه ليش حكمت العقل بدل العواطف دخلت امي حضنتني و نوري الي كل كدرته بس رزله
- هاي تصرفات ما مقبوله خاف شارب شغلتك صارت علني
رد : ما شارب لو جنت ببيئة زينه ما تعلمت عليه انت السبب لمن وكع الفاس بالرأس وللعلم تاركه من ست اشهر لخاطر هاي..
هنا تقويت راددته
- واني بشنو انفعك ولخاطري تشرب ما تشرب حياتك هاي «عون» افهم اذا تركته لأجل ربك مو لأجل عيني
هد عليه يريد يضربني و لزموه نوري و امي وهم يطلعوه وامي تتلفت الي
- لسانج لو بيت عمج طلعوا عينج عليه وعلى «عيون» كلها خططهم هاي
لليل كلت بلكت عمي اجه من الشغل ويجي ياخذني عيشتيش هاي ويلومني عفته شحب منه اذا نفس ابوه بداها شرب باجر قمار وراها مدري ايش واني الي حياتي تدمر..
حجي بنات عمي و نصائحهن صح وهاي اني حكمت عقلي
جنت مراهقة وطفلة من املته بس مو معناتها لازم التزم وياه بديت اكبر وانضج واميز الصح من الغلط..
عزلت نفسي بغرفتي انتظر يطلع يشتغل بمطعم ويحل منهم ب 1 بالليل باوعت للساعة صارت ب 10 اكيد ميجي هسه
عاد طلعت واني الملم شعري بقراصه ومدنكه واريد ادخل الاستقبال اخذ التلفون احجي وي «سؤدد» لو وي بت عمي التهي وياهن..
بس وكفت..
طاح حظه صارت علني الشرب مو بالختلات اذا ماكو ابو يحاسب هو الابو خلي اول يحاسب روحه شلون كضيت عمري وي هيج ناس.
بس تخالطت المشاعر داخلي بين ذكرياتي وي «عون»
و شلون جان يحاول يلبي طلباتي حسب مقدرته شلون جان يحرم نفسه و يجيبلي..
باوعت للبيت الحيطانه من كد القدم صبغه طاح و طكع بالرطوبة وبين بيت عمي كلشي ببيتهم حلو
جاي اعوفة واطلع لا ينتبهلي وهو منبه بالليل ما انجمع وياه مكان واحد واعرف ليش ههه....
شفت مخلي ميز وكدامه بطل و محضرله مزة كالعادة من ظل يشرب علني الساعة 12 باليل هي ساعة محضورة افتر بالبيت او التقي بي بحجة يخاف علي من نفسه..
عيشتيش اروح بيت عمي افضل على الاقل ناس تصلي تصوم تخاف الله..
جاي اطلع وسمعته يدندن وصوته اول مرة اسمعه صوته رغم حلو بس غريب بيه بحه غريبة
انت متهني بهواك واني بأحزاني تهت..
وشهك درت من بين جتفي عيونه بياضهن خابط احمر ووجهة الحنطاوي كالب احمر منتشي بالسم اليشربة
بساع شردت لا ينتبهلي ويسويلي شي هسه عرفت ليش ميقبل بالليل اطلع يمه ولازم اقفل غرفتي بس رجعت بالممر كعدت منتجية عالحايط يم باب الصالة و ما ابين..
سهلة عندك يا حبيب من تجافي.
واني يالغالي حلفتلك وانه بالحب اقسمتلك
غير شخصك ما اوافي
شغير گليبك عليه يصير شاطي ينسى ميه..
سكت بسكته واني كاعدة مديت راسي اريد اشوف شديسوي لكيته يبجي بسكته ومخلي ايديه على وجهه شوي علا صوتة ينحب وهو يهمس يغني..
ادري تلكالك حبيب وتنسى ودي
وادري تطويني الليالي واظل وحدي..
وادري لو عاشرت غيري
وحتى لو عاشرت غيري تبقى انت الغالي عندي
وابقى ذاك انه احبك
مساهر وعيني على دربك لمن تذكرني وتوافي..
سكت خفت لا يرفع راسه يشوفني وخرت راسي بساع وبكومتي اريد اروح واني احس بمشاعر ما اعرف شبيه بين هاوية وغاوية بين «عون» وبين «نصير» وفلوسة وامكانيته وحياة مريحه مو متعبه
«عون» وضعه المادي صعب وهم تعلم سوالف الشرب من جماعته وابوه والاب ميحاسب ولا يهديه لان الاب سكط
رجحت كفه العقل كفة «نصير»رحت غرفتي و بطلت اتفاهم وي « عون» وقررت قرار
اترك «عون» و ادوس على قلبي
ما اعرف القانون يسمحلي اختار اعيش يم عمامي لو خيروني بينهم وبين امي لو القانون بس يخير بين الام والاب مو الام واقارب الاب الافضل انتظر اكمل 18 والله كريم..
بس لازم ما اخلي «عون» يشك يعني مو مثل الصار اليوم
ارجع علاقتي بي شقى و ضحك بس ما انطيه بعد اي امل بزواجنا
الزواج من «عون» مثل اليذب روحه بالنار الصبح كعدت من وكت سبحت و بدلت ملابس مدرسه تعمدت البس صدرية الجابها الي «عون»
يارب بس كون تصرفي مو اذيه «لعون» اريد بس اكف الشر بس كون ما يزيد تعلق بيه
شوي و اجه كعد ينتظر الريوك وراه دوام بالمعهد مبين تعبان و عيونه مورمه اباوعلة بسكته وهو رفع راسه و عيونه تلاكت بعيوني
جر نفس حسيته كوة يتنفس معرف شبي وجهه اصفر
آشرلي بيده على حلكه يعني اريد مي
رحت جبتله كلاص مي مد ايده يأخذه لمس ايدي وبقى لازمها وي الكلاص وهو يجر بيدي والكلاص صوب حلكه و يشرب و حابس ايدي الترجف بين اصابيعه
يشرب رشفة ويوخر يصفن بعيوني و يرد يسحب ايدي الازمه الكلاص ويشرب لمن كمله وخر اصابيعه عن ايدي ارتخت وراد يوكع الكلاص مني
لزم ايدي مرة ثانية و نزل الكلاص وايدي الازمته للطبلة الي كباله وخر ايده و همس بصوت شبه مبحوح
- شـكراً..
رديت واني جسمي يرجف من لزمته لأيدي و حتى خطتي تبخرت ظليت اجر النفس بالكوة
ابتسم بقهر : عساج بگلبي حتى تعرفين شعاني
- ا... ا... احم... مو متفقين بعدني صغيرة على هيج حجي عود اكبر و نتفاهم شتكول
ابتسم
- كبرتي يا حبيبة واني الي غبي منتبهت حبيت اوصل الأمانه قبل لا اتزوجج ردت ابنية ناضجه فاهمة ومثقفه مكملة دراستها بس جنت غبي و المي مشى من جواي
بساع صلحت غلطتي امس من جفصت بمشاعري لنصير
- انت جبرتني اكذب اني ما افكر لا بي و لا بيك افكر دراستي وبس يعني صغيرة بعدني على سوالف الحب والعشك مو مال احب واعشك
صفن بوجهي وايده تنقر الطبلة بطراف اصابيعه شهكت من سحبت هوا قوي وارتبكت ابتسم
- الزمال البدلتيني بيه هم مثلي يعرفج يمتى تكذبين
رديت بساع ووجهي احسه صخن مدري ليش هيج حرارة تطلع منه
- لا وين بالك ابد مبدلتك امس حجيت هيج بس لأن انت تعاركت وي ابن عمي ومخليتني اروح اتونس يم بنات عمي تدري اضوج هنا
وكف بساع رجعت ورى بخوف
- ممممم مفهوم يله وخري من كدامي اريد افوت
وخرت و بساع : ما تريكت
باوع لريوكه عالميز و كال
- معدتي هايجه عليه
اخذ اللفكس (قبل يستعملوه يخلون بي كتب ومحاضرات) بس طلع دردمت
- حقها معدتك من السم التسممه كل ليلة...
مد راسه من الباب
- صحتيني مسمعت شكلتي؟
عيونه تخزر اكدت سمعني وغلس هزيت راسي بخوف لا..
هز راسه اي وذب حسره وراح غميت روحي
هو ليش حافظني ويعرف شفكر؟ شنهاي عود لعد اذا هيج حافظني شعجب معرف ما كمت احبه و كبرت نضجت و اختاريت الي يعيشني مرتاحه و سعيده
بس ليش رحت للشباك اشوفه وهو ديطلع من باب الحديقه جنه حس التفت من بين جتافه وصاح
- انعل عمامج كلهم ال **** انتي الي و بس
وسعت عيني خوف من اصراره ويمكن امي سمعت حجيه لان طلعت من باب الصاله ومرة تباوع لشباك المطبخ ومرة تباوع «لعون» هو دنك و طلع بساع اجتني امي
- جنج تصالحتي وياه زين تسوين عمامج ميفيدوج الجلاب طلعوا يخططون ياخذوج مني شلون لواته عدهم
انسي كلامي مرة كتلج اختاري الفلوس والراحه والعقل على القلب و التعب
انسي ماما و عون خوش عون واسم على مسمى اكيد يختلف عن ابوه يشتغل مو اتكالي وسالفه الشرب انتي توبي منه من تزوجون
بساع رديتها : وانتي ليش ما بطلتي ابوه و توبتيه وخليتي يتغير و يشتغل
صارت صفرة : ابوه نذل «عون» طيب وبس عيبه يشرب ولا يصلي واكيد على ايدج يتغير
كالتها وعافتني طلعت باوعت للريوك اليوم محد عجبة يأكل اخذت خبزتين سويت كل وحدة لفة عملاقة لفيتهن بكيس ورقي حتى طعمهن مايتغير وخليتهن بجنطتي طبيعتي احب الاكل
طلعت لكيت «سؤدد»و ابن خالها يم بابهم يحجون شوي شافني الولد دنك و مشى صوب الشارع ينتظر فورت 18.. راكب وكفت يم «سؤدد»
- شعجب اليوم الاستاذ سهيل سيارته موجوده مو من الفجر يروح لدوامه
- ما اعرف؟
- عبالي اكتشف لقاءات «ماجدة» بأبوها
- لا ميعرف بس امي و «حسن» كلش متخوفين
- والله حقهم شوفي طلعت «ماجدة» تصيحنا
ماجدة : تعالن ويانه بابا سهيل يكول صيحي صاحباتج اوصلجن
همست : سؤدد لا ترحين ترى «عون» ما يقبل يكول عيب
- امشي طز «بعون» احسن مما نسحك مشي شو توصيلة وجتنا بلاش
- لا خية ما يرضى وما اكدر اكسر «لعون» كلمة
باوعتلي «سؤدد» من جوة جوة
- اي صحيح مبينه من ربطتي الايرث وي «نصير»
خجلت هاي ادب سز
- ترى «نصير» ما وعدني بشي اخواته كللي يحبني وهم لاحظته لذا حسيت بمشاعر تجاها
- والله اني مصادقة شلة جهال يكرم الله على كولة حبوبتي تاليتج يفلانه لاحظت برجيلها لا خذت سيد علي
- يـااا..سؤدد : اي والله ويكرم الله تردين اسولفلج سالفه سيد علي القشمر المرة وخلاها تطلك من زلمتها وما تزوجها
- لا عيني لتسولفين من النشرة الاخبارية التوج حجيتيها فهمت القصة
- چا بكيفج هاي «ماجدة» تأشر وها هو عمو سهيل طلع فدوة لطلته ترى يخبل رغم جبير يارب ثور بعيني وعين «مريم»
- عيوني جعله بعينج انتي اني شعليه قابل مثلج امشي واباوع ترى مقام ابو لا تظلين..
قاطعتني : اشاقى ولج يله باي اروح وي «ماجدة»توصيلة جتني وبلاش..
عافتني وراحت صعدت وي «ماجدة» شوي مرت السيارة يمي وكف عمو سهيل و آشرلي
- صعدي بابا ليش واكفه
جذبت لان استحي اصعد وياه وهم لا « نصير» يقبل ولا «عون» يعني اهلي من نوع ميخلوني اصعد سيارات وي ناس غرب..
- شكراً عمو انتظر ابن عمي كال يجي عليه
هز راسه و حرك سيارته وهو اليوم صاعد السيارة المدنية التخصه مدز على سيارته الحكوميه وسايقها
آشرتلي «سؤدد» الخاينه باي غميتها ومشيت وحدي واني افكر بهاي الدنيا بهيج عمر وشايلة هم المستقبل شنو ظاملي ما اريد اعيش حياة امي اريد استقر
هواي فكرت حاولت اشوف عذر «لعون»ماكو اليوم يشرب باجر عطال بطال و نفس تاريخ نوري يتكرر الحب مو كلشي
وكفت عند هاي الكلمة وقارنت مشاعري يم «نصير» و «عون» اكيد اني بوهم لأن مرة «عون» نسى اني امانه بيته وباسني وصار تقارب بسيط بينا بقت بذاكرتي فيتخيلي احبه لذا كلما اشوفه اتدوهن يمه
اتوكل على الله و انطي امل «لنصير» لا تجي بت حلال تصيده واظل اني بنفس وضع العاشته امي شبي «نصير»
وليش ما احبه شو كل صفاته افضل من «عون»
اولاً.. مهندس ومتعين وراتب
ثانياً.. غني وعنده امكانيه متخليني بعوز
ثالثاً.. عنده بيت ملكه ولمحلي من يزوج يعيش زوجته بعزال عن اهله حتى يدللها
رابعاً.. واهمها ملتزم صلاة صوم و يخاف الله وهذا اهم صفة بالرجل
مو امي الكلبت عليه و صارت متريد اخذ «نصير» ومن تالي صارت تريدني «لعون» و عود اذا يشرب انتي توبي واني اروح اعلم واتوبه وتعال متاب شلون اتورط
محسيت الا هورن سيارة طفرت لورى بساع و مد راسه شاب
- وعمى مشوفين بله دعمتج عشيرتج تسويج الي انتي المعيشه العيلة والعشيرة وحتى جوارين العشيرة..
خلا ورجع بك وراح بسبيلة واني ارجف بين مصدومه من كلامه شبي هذا وبين ردت اموت لأن امشي شاردة بفكري وممنتبهة للطريق
وصلت للمدرسة لكيت « ماجدة» و«سؤدد» ينتظرني يم الباب
ماجدة : عنيدة ولا يفيد الحجي وياج يعني عود من ما تجين ويانة شيسموها شنو راح نخطفج لو نغتصبج
اما «سؤدد» ام البلاوي عود تهدأ الوضع
- ذكرن الله ذكرن الله جبتلجن وياي خبز تمن والله لو عندي سمج طازة اسويه طابك الجن
هنا دارت «ماجدة» صوبها
- اي عفية وانام مستشفى تسمم مثل طابكج ذاك
ضحكت «سؤدد»
- لا ولج غير طلعت غلطانه سويته بطحين حنطه لازم طحين تمن خلي يوم الجمعه اعزمجن بالحديقه مالتنا و عود جيبن وياجن كيك و نساتل واني عليه خبز حرشي او طابك سمك.
لعبت روحي والنبي اني الي تعلوقتي ام بطن ونفس دنية لان اكل هواي مو مثل «سؤدد»النوب متسمن جنها سلبوح املح
- شلون نفس عليج ها صدك كذب وتاكلين كيك نساتل عصائر مع هذا الحريش مدري شني
ضحكت «سؤدد»
- هي معدة عبارة عن خباطه مثل خباطه السمنت تخبط الحصو وي جص وي رمل كلشي كلشي
دك الجرس واحنا نتعارك بقت «ماجدة» ساكته ضايجه مني مجيت وياهن هاي شيفهمها ما يقبلون اصعد سيارة وي جوارين او اي غريب انتهى هذا اليوم بخير وسلامه
ســــــــــــــــــــــــؤدد
اجه يوم الجمعه النوب متقيدة «حسن» ما يقبل اطلع وحدي قبل اني وامي وامي مرة فقيرة اكوللها رايحه للمكتبه العامة تنطيني مصرف و تكول روحي
جنت مثل الغنمه وين ما اروح اروح ارعى هسة سي السيد ميقبل وما اريد ازعله احبة هاي من صرت املك مشاعر بنات بعد ما تركت الصبينه اي على اساس تركت
امي : حسن ما تروح للسوك بعد امك اليوم جمعه و نريد بني اسويهن مرك
كمت : اروح وياه عازمه صاحباتي على حريش اريد اجيب سمج
صاحت بيه امي
- شنو هالعب بنعمة الله هي احنا وين لاكين اللگمة حتى تبذريها تعرفين امكانيتنا شنو؟
سكتت و كعدت مكاني انطت فلوس «لحسن» الي ظل يباوعلي حس بيه تفشلت لأن كدامه رزلتني آشرلي براسه اطلع وراه
التهت امي تعجن للوادم طلعت وراه جان بالمشاي يلبس بوتينه
- شكد سمج تحتاجي راح اجيبلج زوري لتباوعين على حسابي
خجلت وكتله : الله عليك لا تجيب شعندك اهلك يدزولك فلوس مصرفك ومنا كراوي ومنا امس اشتريت قاموس مصطلحات طبية كلش غالي لا حسوني ما اكلفك
- والعزيمة المهم المفروض تتعلمي شغلة لتصرفي من راسج اول استأذني امج حتى لا تنحرجي
- اخابرهن واكولهن اي عذر و اعزمهن العصر على بساكت وجاي عادي
ضحك : سوالف الجهال كلها بيج يكرم الله
دار ديطلع وجفصت
- وانت يمتى تخطبني؟
حسيته تصنم ودار على كيف وجهه احمر ومنصدم اني الي ابادر
- مبقى شي على العطله الربيعية هي خطوبة وعقدخجلت : ويمتى نتزوج اريد اعزل عن فوزية حسرة عليه اعزم صاحباتي..
ضحك : يعني حضر جيبك يا «حسن» للولايم خلي اول ننخطب وبعدين نفكر بموعد زواجنا
طلع واني ذبيت تنهيده وافكر بي شحلاتك مابيك غلطه سبحان الخلقك كون جهالي عليك يطلعون لزمت اية الكرسي الي بركبتي الي من اول يوم لبستها بقت حرز ليومنا هذا...
رحت خابرت صاحباتي ولغيت العزيمه خليها من اطلع بلكت الكى فروخ سمج بالبركة الي دوم اصيد منها بس من آخر الخريف ماكو اختفى وهسة احنا بداية ربيع..
ماكو جديد استمر الاستاذ لؤي يلاقي بنته ببيتنا رغم امي و «حسن» ميقبلون
خلصنا امتحانات وعطلنا وهنا «حسن» يروح لأهله
الليلة الي قرر يروح كضيتها ابجي واني احضر جنطته اله
تعلمت على وجوده شكد حلو من اكو رجال بالبيت بدل ما اني وامي بس ونحس مالنه والي ولا احد يحمينا.
دخل غرفته لكاني احضر ملابسه جانن عالحبل واسفطهن اله استحى واخذ مني فوانيله الداخليه
- ولج شنهي جابج لداري
يقصد (غرفتي)
- احضر جنطتك تعرف امي من التعب تنام من وقت
- لا تحضريها اني احضرها مايجوز يا روح «حسن»
ظليت مدنكه ما اباوعله واني اتهرب من عيونه ما اريد يشوف دموعي تقرب يمي وهمس
- سؤدد تبجين؟
رفعت عيني المملية دموع واني اهمس
- سؤدد ما تبجي.. ابوها يزعل بقبره ما نست وصيته
لا تبجين ابتسمي رغم الحزن حتى لو جابوني الج جنازة.
بس اخ اني ما انفذ وصيه
صوتي انبح و تبعثرت كلماتي بحشرجه لزمت بلعومي
وظليت ابجي بنحيب
- بس اني وحدة جذابة دوم اكول ما ابجي يا «سؤدد»
خليج وحدة بلا احساس سماجه و ضحك و فرفشة لا تهتمين ابد بس شسوي هذن الغبيات عيوني يبجن..
ابتسم : هاي طبيعه البشر عليش تبجين لو موش نعبر عن البداخلنا ننفجر
ابتسمتله وكوتلة
- راح اشتاقلك جنت ابجي عليك لأن تعودت عليك وانت باجر تسافر
صار احمر و احتار شيحجي ما ردت احرجه لذا طلعت
هو كال من يرجع نهاية العطلة يجيب اهله و عمامه يخطبون بس كتله لا تخليها رسميه معندي احد يجالس خوالي بس عمي ومهاجر بس جيب اهلك كافي
الليالي المرت وهو بعيد صدك بس افكر شيخلص العطلة
« مريم» راحت لعمامها ومناك تخابر تطورات قوية و«نصير» صارحها الله يهنيها
يومين وتخلص العطلة من الفجر وصل «حسن» وي امه وابوه و خالي سوادي شبيهي فدوة لروحه و خالي ابو «حسن» و خال ثالث ونسوانهم
عاد للعصر خالي طلبني لأن رجيوة بس تتحسر على بنات العرب الي مارادهن «حسن» و راح ياخذ الحضرية الملحه يعني الي هي اني طبعاً اتفقت امي وياهم تريد حفل مهر..
- خوية بنيتي الوحيدة واريد افرحها واعزم صاحباتها
ونسوان منطقتي اتباها بنتي
- خوية الترديه يجرالج بس المهر الخميس ولابد نجهزلة
طلع من جيبة فلوس
- اشتري «لسؤود»
ردت اغم روحي النوب طلعلي اسم جديد من سودة لسووعدد لسؤود دون همزة يا ناس اسمي سؤدد..
من نظرات «حسن» الي عرفته ظام ضحكته حس بمعاناتي التفتت للبقية صافنين عليه بتعجب ما اعرف شنو بس لا حجيت بصوت واني وحركات شفايفي الما ابطلهن شوي وضحكوا عليه و خالي باس راسي
- ابوج مالكا غير اسمج هذا تدلل جنتي ام علي
ابتسمت اجاملهم بس خجلت شنو ام علي تونا ما كلنا بأسم الله
- فوزية شلون كعدة «حسن» يمكم
- ليش خوية بعد كعدته هسه اضبط صار ازلمة بيتي وعاقد على بنتي
- خاف الناس تتحجى على بنيتج يبعد خيج
- لا هنانة محد بحال احد..
- انة اكول هو مهر وزواج..
- بس خاف تلتهي ما تدرس و مدرسة دوام
- اجازة اسبوع خوية لو يرجع للأقسام
صحت : لا شنو يروح الاقسام نزوج احسن
عضيت شفتي على جفصتي هسه شيكولون ما صدكت حصلتلها رجل و«حسن» باوعلي ودنك مستحي من اهله
- والله خوية بصراحه اريد ازوجه موش اغبل يبقى عزوبي وعاقد بنيتج يتزوجها ويبقون يمج يكملون دراسه و «حسن» يريد يعيش هنانة بالمدينه..
رجيوة : اييه انة ربيت ولغيري يصفون وانة ردته دختور بالسلف و اتشيم بي ويكوللي النساوين ام الدختور
خالي : خليه يشوف مستقبله لا تعرضين عرضتج فكر رجيوه حمدي الله وشكريه
رجيوة : والنعم بالله نحمدك نشكرك ربي
ظلو خوالي يسولفون و حددو المهر وكلشي واخر قرار ورى شهر الزواج والعقد الخميس هذا
عزمت صاحباتي و اني ببدلتي وجفوف ايدي و «حسن»
اجه بقاط صور وهلاهل وفرح ومن صرت مرته لبسني الحلقة والذهب تفاجأت بتصرفه رفع ايدي وباس حلقتي وهمس
- احــبج
دنكت راسي خجلانه منه ومن اهله و بيبي الي اجت امس وهن يضحكن حسيت بتصرفه يريد يبين الي اصوله ريف بس هو دارس فاهم مثقف اكثر مثقفينا اصول ريف
خلصت الحفلة واجن صاحباتي يهنني يردن يرحن لبيتهن
- طالعه تخبلين بس «حسن» احلا منج لا تزعلين..
- لا ولج «مريمه» ما ازعل بس عينج حبوبه لا تباوعيلة عفية اروحلج فدوة ترى اني اغار
ضحكت : وي صارت تغار على خطيبها اي عيني اي طلعي الانثى المدفونة بداخل تصرفاتج الصبيانية..
- ما يقبل نأجل الزواج للعطلة صيفيه وبعد شهر اكمل جهاز وهاي الامور نزوج بس دوام و امتحانات شهرية شلون بيهضحكت «مريومه» اما «ماجدة» ساكته بس تبتسم فطيرة بهيج أمور
مريم : ظلي غني شلون بيه شلون بيه طفر العتوي عليه
- صخام طايحه حظ شلون تخوفني
- تخوفين بلد متخافين
- اشش اجة من يم الزلم لا يسمعج..
سلم و كعد يمي لزم ايدي وخلا اصابيعه بين مسافات اصابيعي ممتعودة عليه يلزمني وبكل حرية معقولة السنة الداومها بالجامعه خلته جريئ لو اني ما اعرفه رومانسي طلع
همساته كل شوي يم اذني تدغدغني واحس برجفه و ضحكاته الحلوة بقت مطبوعه مع كل نبضه بگلبي تصيح احبك الحب الاول والاخير..
اجت عيني بعين «مريم» تغمزني و تضحك «ماجدة»
مستحية تبتسم و اثنينهن ذايبات بعصافير الحب احنا الكدامهن
رجيوة طشت جكليت وتهوس وامي تلاكيها بعد المعرس ابن خيها شلون ما تفرح
رفعت راسي لصورة ابوي بالاستقبال كدامي عيني بعينه صارت وتخيلي بعينه صارت لمعه حياة و ابتسامه فرح
بداخلي حاجيته بابا كبرت وانخطبت وراح اتزوج وبس يصير عندي ولد اسميه على اسمك
ابتسمت للصورة و غمضت عيني اتخيلة ابوي يدورني اله ويبوس كصتي جريت نفس انتشي ببوسة الابو الي بخيالي
بس من همسة بأذني جفلت من الخيال وفتحت عيني لكيت نفسي شبه محضونه من «حسن» وشفايفه على كصتي للمرة ثانية ورى ما همس شكد احبج
يعني مجان ابوي يحضني ويبوس كصتي جان خطيبي «حسن» ابتسمتله وهمست
- انت راح تصيرلي ابوي واخوي وكلشي انحرمت منه انت حبيبي و حياتي
تعجب من غزلي و لزم ايدي حيل لحضات تهامس بينا نسينا الفرحانين يركصون
اجت امه : كوم جوة بالديوانية (غرفة للضيوف ) يم عمامك المن مكابلنا البنات تريد تاخذ راحتها
كام واني مجلبه بيده ابتسم
- اروح من يرحون صديقاتج والجوارين نسولف وحدنا..
دنكت مستحية وتركته هو طلع واجن «مريم» من جانب كعدت و «ماجدة» من جانب واني بنصهن
- اي عيني اي «سؤدد» ولج خزيتينا النوب علني الغزل
استحيت : ها ما ادري «مريم» كافي من تنخطبين الا اوكفلج شوكه اني الج
ضحكت مريم
ماجدة : اكلج صار رجال بيتكم مو يعني ولي امركم خاف يرفض اشوف بابا «لؤي »
سكتت اعرف «حسن» متوجس من لقاءات «ماجدة»
بأبوها شكلك ليش نجيبلنا المشاكل..
- لا عيني عود من اكعد بيته يتحكم بيه هسة ببيت امي..
- هو انتي لمحتي امج رافضة ابوي يطب عليكم هم حقها بس شسوي بس خلي تصبرلنا وراها بس اصير بالجامعه يجيني للجامعه نلتقي هناك
- ان شاء الله حبيبتي واحنا خوات باجر اذا احتاجج متقصرين وياي «ماجدة»
- اكيد حبيبتي بلي اكدرله
ورى ما راحن و البيت فرغ بس من امي وبيبي و اهلنا
ظل يحوس و هم «حسين» اخوه طك صور النا هواي غير صور العقد وشفت مغامز بين « حسين» و «حسن»
مفهمت شكو شوي «حسين» اخذ امه وبيبي وامي
- تعالن اريدجن بشغيلة عليش هنانه لاطشات.
امي باوعتلي وكالت : ونعوفهم وحدهم
حسين : ولك «حسن» موش تبلعها ترى سوووعدد تسوي عسر هضم
وضحك وكمل
- تعالن عندي سواليف وياجن
اخذهن وهو يحجيلهن عن الجامعه لان «حسين» مرحلة رابعه هندسة
- حسن شعجب حسين قبل نبقى وحدنا مو سواله مشكلة وفشجت راسه لأن حجى بشرفي
ضحك حسن : حسين دارس وفاهم بس طبعه يتأقلم حسب المكان ما حجه بشرفج بس معجبه وضعنا بختله مزارع من خوفه عليج حاسبج
احسة يحاول يحجي مدينه بس الكسرة بالاحرف موجودة لكنته
- حسن حبيتك وانت ابن العرب الريفي رغم دارس فاهم لا تلبس ثوب مو الك خليك مثل ما انت حبيبي
لمعت عيونه وجر نفس مثل اليستلذ بغزلي.
- حسين يكول لازم نواكب المكان الي بي تعرفين عدكم بعض الوادم طباعهم يستهزؤون بأبن الريف ولهجته
- معليك بيهم خليك مثل ما انت حبيبي.
مر هذا اليوم و احس «حسن» يتحرج من امي حيل شددت مراقبتنا لو نكعد سوى لدرجه كاللها اكعد بالاقسام لمن ازوج ابقى عدكم عمة ومن نتخرج ااجر بيت وانتي تجين عندي وبيتج هذا اجريه مصرف الج
- لا يمة وين تروح للاقسام اعرفن اخلاقك وليدي واثقه بيك
هنا دخلت اني
- لعد صايرتلي حارس لشنو خاف مالج ثقة بيه
ضحكت امي : والله يمة انتي شلون اقتنع بيج «حسن»
موش اعرفن لان اشوفنج جثير بيج من الصبيان
سكتت رزالة نازكه عود و«حسن» ضام ضحكته وهو يدرس كدامه مصادر و محاضراته دنكت اريد اقرا كله انكليزي
- هو هذا القاموس الطبي
- اي نعم
- جيد
ردت بس افتح حجي وياه بس لو درس قفل شوي كال
- اليوم اوف اريد استغله عندي امتحان روحي شوفيلج مكان موش يمي شوشتيني شنهي طلابتج وياي
وكفت زعلانه ومحجيت عفته النوب مصاحلي بس يدرس شنو من خلك عنده كلت التهي دخلت غرفته ولكيت محاضراته كلت اكلب بيهم
المحاضرة كاتب شعر غزل شلون واحد صافن مو يم الدرس و اجاه شعر وكتبه شوي درت ا
