رواية خطايا واجتثاث الفصل الثامن بقلم نور البصري
ظهرا
(في داخل كل قلب مدينة لم تُبْن بعد .....وشوارع لم تُسلك ؛ وأحلام تنتظر من يدلّها على الطريق )
فتحت عيوني كوة اتنفس و «حسن» حاضني
- شبيج تنفسي تنفسي
مكدر اتنفس وهو يصيح لأمي
- صارت زركه شسوي شالني يريد مستشفى ورجع مثل الي تذكر افضل شي اسعاف اولي اني واعيه هنا منتبهه بس مكدر اتنفس مشكلتي معرف ليش مكدر اتنفس حيل ضاقت بيه الدنيا من القريته
- تنفسي..
مددني عدل و رجع راسي لورى وعينه بعيني و سد انفي بأصبعه و حلكي فتحه وهو يسويلي قبلة الحياة
اكثر من اربع مرات لمن كحيت وجريت نفس بس بعدني بيه رجفه وهو جنه رجع جر نفس و دنك لشفتي
امي ركضت تفزع جوارين علمود سيارة للمستشفى وهذا ملتهي بقبلة الحياة
ردت اوخره : جاي اتنفس
همس : للأحتياط خاف ترجعلج الخنكه
رد لشفايفي يدفع هوا ريته بريتي و بدل ميوخر عني جرني اله بحضنه واللوتي يدري تنفست بس عجبه يجرب بوسة رومانسية بين مخطوبين
كمزنا على صوت امي.. و«عون» و مرت ابوه
- تفضلوا منا تفضلوا..
همست : امي معدها شغل وعمل المن جابته هذا
عدلت كعدتي و «حسن» كاعد يمي
حسن : كطعوا رزقي الله يكطعهم عبن حظي واعرفنه موش حظ اوادم
ضحكت ودنكت خجلانه يمكن لو ما الخجل الي مدري شلون اجاني جان كتله حظ بقر.. دخلت امي لكتني كاعدة
: ها جبت «عون» ومرت ابوه جانت تشتغل ممرضة وتعرف يمكن رد الربو الولادي لبنيتي
ام مريم : الربو ميرجع اذا ولادي بس عدها تحسس واختنكت بس اشوف مبيها شي حتى وجهها مورد
ركزت امي بوجهي الصاير احمر من انفعالات مشاعري وي «حسن» من جنا نسوي قبلة الحياة الاخيرة الي بالحقيقة بوسة مخطوبين
- راح اخذها دكتور شنو هاي الخنكه الجديدة مصايرتلها اختنكت بساع بساع
حسن : عمة تنفست بساع بساع ما يحتاج طبيب تدلع عليه
وسعت عيني وهو يباوعلي بعتب تذكرت هنا دفتر المحاضرات اللوتي ببوساته نساني الشفته
بقت ام «مريم»و «عون» شوي
عون : عندي سيارة صاحبي مخليني سايق بيها اشتغل و ناوي اشتريها منه خليني اخذكم مستشفى لا ترد عليها الخنكه
حسن بغيره من عون : لا ما يحتاج
دنك «عون» بسبب نظرات «حسن» و ترخصوا منا هو وامه وهنا «حسن» انهد بعمته الي هي امي
- ادري شبساع سفيتي يعمه المن فزعتي العالم..
سكتت امي و شوي هدت عليه
- شبيج مساع تغلطين على «حسن»
هنا رجعلي غضبي و جريت المحاضرات الي صارن جواي من وكعت واني بعصبية اكلب بالدفتر و اطلع الورقة واخليها بعين «حسن»
- هذا شنو «حسن» تعرف لو هذا وكع بيد الميخاف الله تضيع و تضيعنا
صفن و عكدة حاجبه وهو يجر الدفتر
- الدفتر طلبته طالبه مني و ما كلبته من رجعته اقسم بالله مو اني الكاتب الحجي هذا
- لعد المن تنطي للطلاب دفاترك ترى ياما ناس راحت ورى الشمس بعدين شنو طالبه تأخذ دفترك ما اقبل
كلتها واني اشك الورقة و اشككها وصل وصل
- بيك بوكسي يكرم الله اورم خشمك الحلو..
امي لطمت من كتلها شنو مكتوب
- كاتبين بمحاضراته يسقط الريس يسقط الحزب يمه لو محاضراته شايفهن احد والنبي غير يكرفونا كلنا ويضيع ذكرنا
ظلت امي تخرط خدودها
- حسون ولك يمة استر علينا اشوفنك تريد تروح اقسام داخلية تريد تصخمنا وينك وين هاي السوالف والله يا «حسن» اردنك لأهلك وما تشوف ذيال بنتي
حلف ماله علاقة و الشغلة ما يعرف منو الكاتب اكيد مستحيل البنية هنا بغيرة حجيت
- و ليش تدافعلها بلغ عليها وطلع روحك لا يبلنك انت صاير مو «حسن» الاولي من تعلمت على الجامعه صرت بدروب البنات ابو البنات الطايح حظ
رد خزرني : لسانج حصانج لا اكصه الج واضح سووودة
تعمد ميلفظ الهمزة يغثني كام يريد يطلع
امي : وين رايح يمة؟
- عمة ام سووعدد اختنكت اطلع شوي اشم هوا...
الخبيث يتعمد يقلد على اسمي هم جفصت
- ولويش تطلع اليختنك يسوله قبلة الحياة وفضت
خليت ايدي على حلكي هو منطيني ضهرة ايدة على يدة الباب الفتحه يريد يطلع تجمد مكانه اهتز ظهره مثل اليضم ضحكتة بصدره التفت براسه بس من بين متونه وضحك وهو يهمس
- طاح حظج متونسة ام قبلة الحياة.
خجلت وامي ما فهمت شكو بس سألتني
- عود شنهي هاي قبلة الحياة يمة
سكتت رد «حسن» وهو يضحك
- درس طبي اسعاف اولي يعمتي
نفضت نفسي بغضب وكمت واني اخزره..
- ما عندك امانة طبية..
ظل يضحك و اني من الخجل شردت لغرفتي رحت اعدل ملابسي شبابيك غرفنا صوب باب الحديقه فباوعتله وهو يطلع
اندار يسد الباب من ورى ما طلع بابنا الي بي تاج حديد يبين راسه منه و عيونه اجت صوب شباكي رجعت البردة وخليت ايدي على خدودي
يارب احميه يارب حرسه يارب لا تكشف عليه عدو خلي الي ما عندي غيره هو وامي ما صدكت صار عندي زلمة يحمينا اني وامي
طلعت البوم الخطوبة واني اكلب بصورنا ابتسامته و ضحكته التارسة وجها
مجنت منتبهه لشقاوته الا من عقدنا وصرت حلاله جان دومه مدنك ومؤدب رغم اوقات الكفه يباوعلي ويتحداني بكلامه- اعترفي سووعدد انتي تحبيني ليش تخليها بنفسي اعترفي
مـــــــــــــــــــــــاجدة
كلش منحرجة من «سؤدد» احس نفسي اضغط عليها حتى اشوف بابا
بس شسوي ماكو حل غير هذا من ايام احسها قلقة و هواي تتحسر بديت احس على روحي واحس بأمها و «حسن» متضايقين من جيات بابا الهم..
نزلت للطابق الجوة لكيت امي و بابا سهيل.. يسولفون تصنتت بالممر.
- شي غريب مستغرب لؤي من فترة طويلة لا طالب ببنته ولا سوى فعالياته يأخذها لأهله فد يوم ......
ردته امي : ملتهي شغله صار مو مثل قبل شغله قليل يتواجد بالبيت
- وانتي شمدريج؟
ارتبكت : نسيت احنا خوات جنا ماخذين اخوان فإني خلعته واختي بقت اكيد تكلي بالاخبار...
- تمام مفهوم..
- ها شو كمت؟
- واجب بالفرقة وخفارة..
- الله يحرسك ان شاء الله..
صاح : مجدي ماجد مجودة ابوها
انتظرت شوي اترك مجال وقت لا يكول تتصنت ورة دقايق طلعت من ورى ممر
- بابا صحتني جنت ادرس
- لؤي.. هم يجيج للمدرسه ذمه ما اقبل تنطيه وجه
دنكت : لا وين اشوفه انت ما تقبل بس ليش بابا خلي يجي خطية والله مبي اي ازعاج بس يشوفني وهاي هي
ليش الظلم ترى هذا ابوي انت حتى بيت جدو متقبل اروحلهم خاف يجيني ابوي هناك انت طيب كلش فلا تصير ظالم
ردد مستغرب انتفاضتي
- اني ظالم؟ هاي جزاء رباي يا «ماجدة» كوليلي انتي تلتقين بي وسمم افكارج ضدي مو؟
يمكن بين بوجهي ضامه شي لأن بساع كال
- يصير خير
وطلع يوصي امي تنتبه للبيت وتقفله لأن اليوم هو خفر واجب بالفرقة بس طلع اجتني امي
- لمحت سيارة ابوج من ايام بشارعنا وكلت بس لا شافج وحاجاج وقتها معزومه يم «سؤدد» امنت كلت يجوز شغل عنده بمنطقتنا خاصة هنا اهل مرته
شوي و اخوي اجه وهو لازم آذان اختي
- لكيتها عالسطح تباوع للجيران شوفي حل لبنتج
صاحت امي
- حارث انت ما عندك شغل بس عرايك وي خواتك خليك حنين عليهن انت سندهن الوحيد
- ليش الوحيد مو هاي ماجدة.. صار عدها اخوة توأم من ابوها اني اخو «انتصار.. الوحيد بس هاي عدها غيري
فرحت يعني زوجة بابا اخيراً ولدت اخر مرة شفته كالي حملها صعب و جانت زالكه من الدرج و انزلاق عدها
طلبت بس تجيب يراويني الطفل
انتبهت من صفنتي على امي تعترض طريقة كلام اخوي
- اختك جبيرة عيب ماما سياج السطح عالي لا تصير قنقينه
خابرت ابوي «لؤي » بسكته تباركتله و طلبت اشوف اطفاله اهل مرته بفرعنا و دوم اشوفها شكد توكع مرته دومها مضبرة ويشكي منها يكول عدها مشاكل بالعظام..
نظرتها الي عادية و اسلم عليها وترد ماكو مشاكل ولا بينا تواصل مجرد من تصدف بيت اهلها بالصدف اشوفها ببابهم او جانت طالعة نتلاكه ..
بس مبين مدللها يعني الذهب تارسها ترس من هنا اتصور ابوي راتبه صار قوي و تحسن وضعه المادي خاصة هو على مشاكل وي ابوه وميروح بيت اهله الا لخاطر امه يشوفها سبق رجع يعيش وياهم بس من تزوج للمرة الثانية ثانية فضل يسكن بيت وحد
هواي مظلوم شكد اكره الظلم من بشر يحب يحرم بشر من ضناه شكد سولفلي وهو يبجي يكول حاربت اهلي علمود اعزل بأمج تالي ضحك عليها «سهيل» وخذاها مني مدري هي التفت عليه حتى تحرمني منج جبرني بسلطته وهددني وقعت تحت التهديد بالسلاح على تنازل تام عنج
كلش قهرني وكلش ضجت من بابا «سهيل» بأي حق يستعمل سلطته حتى يفرق اب عن بنته عمومًا بس ابلغ سن الرشد اروحلة زيارات اقسم نفسي بين ماما و بابا و هذا الحق الي لازم يصير..
مــــــــــــــــــــــــريم
بالحديقة مال بيت عمي اني وبنات عمي غمزتلي بنت عمي
- نصير جاي وي جدو تدرين يكدر يزوجج غصب عن امج لان جدو مكان ابوج يعقدلج بس جدو كال خلي تكبر بعدها زغيرة بلكت على سنة تجي من تصيرين 18..
- نصير امس اخذ مني وعد ما اقبل بغيره..
- اي عيني يحبج و حيل مقهور كاعدة بيت رجل امج و عنده شاب شراب عرك صح «عون» منا وبينا ومن اولاد عمامنا بس مكسراته عامة عليه وعموماً «نصير»ابن عمج اخو ابوج واقرب واحق بيج من «عون» ترى نعرف بعون يحبج..
رفعت راسي مستغربة
- شلون يعني..؟
- اجه «عون» لجدو يريد وعد مينطيج لغيره لو شايفته شلون اجه يتوسل ويكولة
- جدي رايدها منك والله هي عافيتي والله ما عندي زايدة ناقصه و اذا على الشرب اتركه احلفك بروح جدي غانم اخوك..
باوعله جدي و كله
- خوما اجبرها شوف بوية «عون» انت وليدنا بس ابوك طلع من الطريق و جانت سوالفه سبب موت اخوي غانم
شوف وليدي انت توب و صلي و اذا هي قسمتك الك لو ورى مليون سنة الك الك..
باوعت لافنان : اكول «نصير»يحلفني ما اقبل بغيرة اثاري جدي مسويها منافسة لا عيني فكرت و «عون» خاف يصير نسخه ابوه شلي بهاي الطلابة
خليت و كمت لجدي بست ايده و اني اريد اوصله فكرة «عون» بالنسبة الي اخو بس مكدرت احجي..
جدي : امج خابرت تكول ترجعين باجر من تطلعين من المدرسة يجي عليج عمج يوصلج الهم..
ضجت باوعلي جدي
- جنج ما مرتاحه بيت امج تردين تبقين يمنا اروح لأمج واتفق وياها شتكولين بويةجرني الحضنه وهو يشم بيه ريحه ابنه الي استشهد من وكع صاروخ على بيتنا القديم نتيجته امي جهضت و خسرت الرحم و اني طلعت بأعجوبة و ابوي توفى
- اخاف امي تزعل اني ما اريد اتركها كلش بس اريد اجيكم يمتى ما اريد ما تقيدني.
- الله كريم بنيتي لابد نحلها..
خلا وكام وهو يكول تعبان جيبولي لغرفتي جاي بس كام جدو اجه «نصير» يمي
- عون يلح على جدي و جدي يحبه يكول معدل لو بس يصلي و يترك الشرب يكول ما بي من ابوه لو لاكي الي يربيه صح ما يروح للشرب و ترك الصلاة ابوه من شبابة نصاب ومكسرات و سوالف يدور فصول و طلايب هذا شاغول ومعدل..
شوفي حبيبتي هذا الحجي ما ينفع خاف جدي يقتنع «بعون» السكط و ترحين مني
ما اعرف ليش كرهت كلمة السكط لان «عون» مو سكط بس الدنيا ما نصفته ومشى وي جماعه تشرب وتعلم منهم وهم بيئتة تربى ببيت الاب يسكر و ميصلي.
- عون مو سكط..
جر ايدي حيل و نترها عافها
- انتي شنو الترديه بالضبط خاف حنيتي اله وتردين تنهين علاقه حبنا
- لا بس ما اقبل تسمي سكط لأنه مو سكط يعني ربيت وياه و هو اذا ما املكله مشاعر الحبيب املكله مشاعر الاخو هو جان سند الي من عمري سنتين الى يومنا «نصير» لا تخلي غيرتك تهين «عون» يمي
وكف و هو معصب
- ولج ينافسني بيج ادري بت عمي والي شنو طلابة لو فرهود لاحكني عليج
- بس نتزوج بعد يشوف حياته بس انت كافي تندك بي ترى سمعت امك وهي تكلك بطل تروح «لعون»بالمطعم بمكان شغله تهينه و تستهزأ بي اذا سكتلك لخاطر انت من دمه ولحمه و ما يخسرك لخاطر مرة..
دنك : ولج قاهرني كلش يعني من ترحين بيتهم اني هنا ما انام بالي يمج اخاف يدك الناقصه يعتدي عليج لو اخاف يقنعج تعوفيني
ابتسمت : عون مستحيل يعتدي عليه ولك «عون» اصلاً منبه عليه ورى العشا ومن امي تنام بغرفتها اقفل غرفتي تدري ليش يخاف لا يشرب ومو بوعيه يسويلي شي يعني حريص عليه..
تذكرت اليوم الخان «عون» الامانه و اني بيتهم وباسني و حضني و حتى وصلت بينا امور بسيطه وراها عصب عليه كلش لان ضعف وخان الامانه هي هاي المرة الاولى والاخيرة الي تحارش بيه وراها يتجنب يبقى وياي مكان منفرد لوقت طويل بس هم كلام «نصير» صح لأن مدام مرة تحارش خاف بيوم يكررها لذا حذرة من يشرب انعزل غرفتي واقفلها
- اطمن «نصير» واحنا بالعطلة الصيفية اصير 18 و هنا يقبل جدو يزوجنا..
- بيني وبينج هواي سنين بس والله احبج
- ما يهمني الفرق البينا واذا عمرك 30 اصلا رجال متزن ولا شاب مسربت..
تثاوبت : جني تعبت واريد قيلولة حتى العصر اكعد و ادرس
- اي شي عندج بالانكليزي لو الرياضيات اني حاضر..
- اي عندي امتحان انكليزي اني زينه بي بس اريد تشرحلي عن المرادفات
- ذن حفظيهن ميحتاج شرح
- اقصد ترجمتهن و عندي هم بالاصغاء ما افتهم دوم درجتي قليلة..
- ولج ذن سهلات عموما بالليل ادرسج انتي كملي واجباتج
- صـار..
ابتسملي و الوردة الي بيده خلاها يم خدي ومررها عليه رجعت ورى واني احس جسمي كزبر ضحك فجريت الوردة منه بعناد
- الوردة للوردة الي هي اني
ضحك و شاقاني : منو يكول
- اووو لا تصير مثل «عون» خبيث
عضيت شفتي من الجفصه وهو عصب وكال بغيرة
- شنو عون منطيج ورد ومدري
- لا اقصد دوم يقلد عليه يكلي دبية
ردت الزكها متلزك هو بخزرة مصدكني جر الوردة من ايدي حيل شمرها بالكاع و دعسها و طلع ما همة صرختي من جر الوردة والشوك نبتت بيدي ونكسرت جواتها
فتحت ايدي كلها دم ومشخطه ظليت ابجي من قسوته هذا عود الزين الي ملتزم والله عشيرة مخابيل متدينهم و المرعبل البيهم نفس الشي كلهم خباثه و خبالات.
ســـــــــــــــــــــــؤدد
ورى جمعتين عزيمه عند «ماجدة» جمعه الثانية عند «مريم» خجلت لازم اعزمهن..
فتحت الثلاجه كالعادة منسوك الا كد الوجبه السمج نشوفه مرة بالشهر و اللحم بس بالاعياد اما الدجاج بالمناسبات الدينية بس يعني ايفاء نذر وفاة نبي لو ثواب لأبوي
ذن شعزمهن هسه عمتي رجوة من تجي تشوف ابنها غير تجيب صوغه فد دجاجه و ديج عرب حتى اني ااكاثرهن يفيدنة بيض و هم نشبع دجاج
والله مسكين «حسن» متعلم وين الاكلة الزينه لحم سمج دجاج الريف غني بكل هذا وكابلني عالفكريات تمن ماش تمن عدس تمن ابيض وروبة مركه باميا جنهن بطات تسبح بالشط
كد متخففها حتى تكفينا كم يوم من احجي تردني هذا الموجود كملي دراستج و نرجع يم اهلي تشبعين هناك خير الارض وافر حجتها امي دراستي ومصبرة روحها عالمدينه بسببي بس لا هي متفارك المدينة تعلمت عليها..
هسة شطبخ الهن ذن وعيب اعتذر من عزيمتهن ندور بالبركة بلكت حتى لو فروخ سمج ونقشمرهن بس شيطلعني وهذا «حسن» منبهني ممنوع اطلع بعد واسرسح بكيفي من هسة و حاكمني لو نزوج شيسوي
مشطت شعري الجنه شمسيه لأن قصير لو عندي فلوس اجيب العصارة الحمرة مال مسرح ولو ريحتها كهرباء بس تسرح الشعر
لبست الطوك ابعد شعري الاجعد عن عيوني ولملمته بقراصات واني امد راسي بالممر امي ملتهية بالمطبخ..النوب فوك الخبز كامت تطبخ للموضفات والله بلوة اليشم انواع ريحه الطبيخ يكول بيت ام «سؤدد» نيالهم يومية اكلة دسمه ميدرون بس بالصيت دخلت للمطبخ واني امد خشمي بوياي ريحه لحوميات
- فوزية..
- تأدبي
- امي امي امي انطيني شوية بس اضوك
- لا عيب وحرام امانه هذا غدة بيت ام جواد
- اكول من الفجر تطبخين..
- اي حتى بس احررة وادز الغدة ب 11 الهم وراي معاجن الخبز
- زين مكالتلج فد صحن لبنيتج اليبست من التقشف والمجاعه الي بيتنا
التفتت الي : حمدي الله وشكريه غيرنا ملاكي لگمة يأكل
- على اساس لاكينها كافي وحش الطاوة كد ما اكل باذنجان زدت سمار
ضحكت : طاح حظج..
- اليوم جمعه شعجب ام جواد متطبخ ماكو دوام اليوم
- شلون تفتر على رزقي ولج مرة وتريد تكضي الوقت يم جهالها وزوجها وتريد تدلل روحها هم ناس مقتدرين لا عاد تخلين عينج لتطيرين رزق العالم ويطير رزقي وياهم الله يرزقهم ويدللون نسوانهم حتى اطبخلهن واخذ اجرتي.
- زين خوش اروح ادرس لحد يزعجني بغرفتي..
- روحي والله يوفقج و تجيبين اعفاء.
- ان شاء الله هذا الشهر يحدد الاعفاء بس لو تنطيني درجتين للعربي انعفي عام بس خباثه
قبل لا اتسرسح و اطلع دك التلفون رفعته جانت «مريم»
- هـلو..
- هلاوات اكلج «سؤدد» اعرف وضعج هو حصار وكلنا بالهوى سوى بس شوي اني و«ماجدة» افضل من وضعج لتشيلي هم الاكل «ماجدة» تجيب وياها سمج شوي واني عليه الطرشي و الخضرة والتمن انتي عليج بس الخبز و اللبن عاد عمتج رجيوة عدكم من يومين
- سافرت لأهلها الفجر
- اي بس ما تخلا من الروبة
- اي هو صوغتها روبة جبن كيمر من كد ما تجيبه يجي يوم تسلمن عليه ب هلوو واني ارد السلام بـ مااااااااع انكلب جاموس
ضحكت «مريم»
- المهم واذا بيها مجال اريد طابك سمج من ايدج بهيج عليج خبز سمج مدري شسمونه انتم و لبن وخبز حنطه
ترى خالتي و بنتها عدنا لأن بيت عم شيلان شالوا من محافضتهم لخاطر ابوهم توضف بالمعمل بمحافظتنا
وهم ولدهم كملو استماراتهم على جامعتنا فبيت خالتي اجو وياهم يومين ويردون محافظتهم كعدو مكان بيت وسيم المخبل البيت الي بصفنا
- حلو قنعيها تجي تدرس بجامعاتنا
- متفيد علمي هي بس واكعه وكعة بأبن عمها عزمتها تجي ويايه اعرفها بيجن وهم نسولف عندي الج هواي تطورات وي «نصير»
وي وي اعترفلي اخيراً بصريح العبارة لا وفوكها خايف من «عون» لا يأخذني منه ههههه عزا «عون» اجه يلة باي نلتقي ب 12 الظهر..
سدته و غميت السماعه ام بطن تتنسى على طابك الحرشي منين اجيبه السمج بعد ما بيها مجال من فترة امر بالبركه ماكو بلكت اليوم حضي والكى فريخات سمج
لبست بنطلون برمودة اشبع بلبسي والسفر لان لمح «حسن» بس نتزوج اتحجب ميقبل مرته سافرة
طلعت وبيدي شبكه سويتها من التول و واير المنيوم
امشي مرة واركض مرة لمن وصلت للبركه واشوفهن ملح مثل حالي اكيد يكبرن يصيرن ذن زوري و بني و سمتي املح مو احمر صدتهن و ااني اخليهن بالعلاكه
عمتي رجيوة جابت طحين تمن عنبر هو عود بجيتها علمتني اسوي عجينه سياح لأن ابنها يحب يتريك كيمر وسياح لو بيض وسياح وهي كالت كل اسبوع تمر وتجيب النا المقسوم
شنو من محنه لو ما ابنج ما شفنا خيرج عمة هيج وقتها بسمرتها
اول ما وصلت دخلت على كيف واني اريد انزع حذائي واجاني صوته العصبي وزمخته
- وين جنتي ست والطرطور العندج ميعرف..؟
رفعت نفسي واني ابتسم اريد امتص غضبه
- حشاك من الطرطرة ترى رحت بس اصيد سمج واجي والله مو قصدي ما اكلك بس صارت
اجه صوبي هاد واني شردت كلت حنضرب
- يمه لحكيني يمة...
وامي اجت : اسم الله شبيكم صوتكم عالي
- يريد يكتلني
حسن : طلعت دون اذني.
ردت امي : ودون اذني هم ولج اثنينا موش بعينج
نزعت الشحاطه و نزلت بيه كتلة و«حسن» بدل لا يعاقب تحول لحاجوز
- عمة عوفيها لخاطري عقل مجعوص موش تفهم بس نتزوج تكبر وتفهم غلط التسوي بينا..
- خليني ولك خليني اااخ يا قهري ام الخوارة كبرت و ما بطلت فرفرة ولج سويدة قوطية ام القواطي..
هنا من حسيت «حسن» صار حاجوز ونسى هو اساس المشكلة وكفت وراه شاردة من امي و اتحامى بي واني ارادد امي..
- جمعتين مشايفة جهرتي نعزم يم البنات ليش تحرجيني تطبخين للوادم والي لا اريد اوكل البنات افضل اكل اتباها شوفن امي شنو تطبخ لعزيمتي الجن
انتي جبرتيني اطلع دون علمج واجمع قواطي ابيعهن عالوزن بصغري حسرة عليه الفلس والمصرف لو اجمع بقايه الخبز وابيعه بالوزن حتى اشتري الي اشتهي وهسة تعيريني
دهاج صدت سمج و الا تسوي طابك لصاحباتي مو عمتي رجيوة جابتلج مطابك شو ركنتيه انتي بت عرب تعرفين احسن مني شطالبه منج
شو «ماجدة» حجيب جدريتها وتجي و «مريم» تكمل الباقي من عزيمتنا الا اني سوده بوجهي هن سمجات فريخات سمج دهمنيهن و فضيها
وها لبن رجيوة نريد منه للعزيمة لبن عمتي جابته مو مشتريته فلا تمنين عليه
وسعت عينها عليه
- حسن وخر خلني ادوفنها الجلبة هاي شلون ترادد طلع لسانج سواديظل «حسن» يحاجز امي عني وضامني وراه
امي : منيلج السمج احجي منين ولج..
- قابل اول مرة اطلع اصيد تعودنا حقج ملتهيه بخدمه العالم وبنتج طز
حسن : ذكرن الله وانتي منين اكو فروخ سمج مو موسم تفريخ يمكن شهر ويبدي الموسم شوداج للشط لو غاركه
- يا شط غير للبركه رحت هو اني اخاف اصلا من الشط لا اغرك بس هاي ما تعلمتها اسبح
حسن : يكرم الله خاطبلي صبي مو بنية شو جيبي سمجاتج اشوفهن.
انطيته العلاكه فتحها و انصدم وهو رجع باوعلي و سألني
- سووعدد ولك سوادي سودة قوطية ام القواطي ام الخبز ام الدعاميص كم مرة صايدة وموكلة صاحباتج من هذا
رفعت خشمي : هواي كل ما اشوف بالبركة سمج
- غبرة انتي موش سنعه وغبية معقولة ما ميزتي الدعاميص يا ام دعاميص
- شنو دعاميص النوب تكلي ام دعاميص لتمشيها عليه كافي سودة وسووعدد و سوادي
- يعني ابو ذنيبة يعني فرخ عكاريك ثول معقولة علوم اول متوسط مدرستي ترى مار عليج قبل لا تدخلي ادبي لو انتي الثول عندج والغباء فول
باوعت للعلاكه : اكول اسود املح مو فضي.
شرك بضحكته من عقجت وجهي
- عزااا لو يدرن شموكلتهن النوب ما اكل اني حتى يكفيهن اكول «ماجدة» تسممت.
- تردين اسكت ما افتن بشرط بعدين نتفاهم عليه وانتي عمة شو تبجين
غمت امي كصتها
- على حضي يمة زين مموتت بنات العالم شيفكني اخ لو ما العوز مراحت الخوثه تصيد عكاريك.
اخذ العلاكه و ذبها واني معدتي كلبت تقيأت الخبزات الاكلتهن الصبح هن بس خبز وجاي تريكت و تقياته ضامة الجوعه لغدة «ماجدة» المطبك و التجيبة «مريم»
باوع لساعة ايده وضحك
- بدل هاي الهوسة وطالعه ومندري بيج لو طالبة مني ترى انتي مرتي..
كالها وطلع
امي : وين يمة..
- شوي واجي
راح وجاب زوري بس شنو يرد الروح
- يلة عمة والله لو ما مصاريف الدراسة المصادر اشتريهن مشترى ادللكم لو الحك على دراستي الصعبة اشتغل اي شي ولا هاي ام نفس دنية تأكل وتوكل صاحباتها عكاريك.
بس بعد لازم الكا حل اول تالي مرة بركبتي عود اعتمد حصتي من المحصول يدزهن ابوي وي امي
سوتلي امي الأريده واجن صاحباتي محملات اكل وهم فرحن وتعرفت على «شيلان» بنت خالة «مريم» كلش جميلة ومن ملامحها من محافظات شمالية..
- هاي المرة الزوري كبار مو توة مفقس وزغار بحيث ينمرد منفهم من خبزج بس نقاط سود بي
- اي اي مسواك حبيبي تسوكلي مصدت..
تفاخرت : حقجن ممخطوبات متعرفن لازم زلمتجن يقبل تطلعن و ها الغيرة يمة شكد يغار عليه بوياي يلة شفهمجن بسوالف خطوبه ومخطوبين
- ديلة احجيلنا
- دخلي نتغدة اول..
كملنا وشربنا جاي و هنا اندك الباب طلع «حسن» وهو كالعادة بيده سجل شوي و دخل وراه عمو «لؤي» اشرلي «حسن» اطلع
- خوية «ماجدة» ابوج يريد يشوفج
كامت «مريم» و «شيلان» وراي وهم الباب اندك و هنا صياح عمو «سهيل» على امي وهو يكسر حرمة بيتنا ويفوت
«حسن»من ارتباكه جان مدنك يريد يأخذ كتبة من الصاله حتى يدرس غير مكان بس وكع من بين السجلات كتاب دنك عمو «لؤي» بساع و هو يباوع للكتاب وينطي «لحسن» الصار اصفر
- ضمه لا الارعن يشوفه
جنت يم «حسن»لأن من وكعت كتبة اجيت المهن وياه واني متوترة نخاف بذاك الوقت من هيج كتب رغم دينية وما بيها اي سياسة بس ممنوعه.
انتبهت لعمو « سهيل» عين على الكتاب و «حسن»و عين على عمو «لؤي » وجهة يرجف غضب بس حجى بهدوء وهو يباوع للكتاب و لؤي و لحسن
- لؤي...
حتى ما حاجاه على كسره لأوامره ويقابل « ماجدة» بيتنا بس جان كل عينه على الكتاب
اما العم «لؤي» جان يبتسم بهدوء وثقه عكس العم «سهيل» بين بعينه حجي مكتوم....
