رواية لم يكن قراري الفصل السابع بقلم جمانه السعيدي
اتفاجئنا بطلب ام همام
هاي شلون مشكله كله اله اهل زوجت سجاد
شراح نكول وشنو العذر الي لازم ندبره
ياربي شني هذا من امتحان كل قسمه احسن من الثانيه
وكل واحد يجيني يخطبني احسن من الي قبله
بقينا اني وامي ساكتين وسرى تبوس بيه وتكول فدوه الجنتنا الحلوووه
امي طلبت وكت نفكر بس مو نفكر بلزواج نفكر بعذر
مايخليهم يزعلون من عدنا
يعني اني فرحتلي كم يوم راح يطلعن من خشمي
جمانه السعيدي
بليل اجا سجاد وكال اريد احجي وياج انتي وامي
كعدنا بلغرفه
سجاد اني سئلة على همام ولد طيب واخلاقه عاليه
خريج معهد تكنلوجي وجاي يشتغل
واهله ناس سمعتهم طيبه والحمد لله
واني ما اشوف سبب علمود نرفض
واذا علمود الدراسه لاتشغلين بالج همه ماعدهم مانع تكملين دراسه
بقينا اني وامي وحده تباوع بوجه الثانيه
هاي الي جانت لا على البال ولا على الخاطر
سجاد اتفقن بينجن على موعد ونحدد يوم المهر
سرى كلش فرحانه والكاع ماشايلتها كل شويه تحضني وتبوسني وتكول هله بجنتنا الحلوووه هنيالك همام
على هلقسمه
حرت ولله وحيرني زماني
مشكلتي مايرهم الها حل ابد
لليل كعدنا نفكر اني وامي بحل الهذا الموضوع وشلون راح نطلع منه
اذا كلنا دراسه يكولون كملي دراسه
واذا كلنا ماتريد تتزوج ليش ما تتزوج
واذا رفضنا ليش رفضتي شبي شنو ناقصه
فات اسبوع واجت سرى كالت اهلي يردون يحددون موعد
المهر
زادت حيرتي اكثر ومآ اريد ارد عليهم رد يزعجها لو يضوجهم من عدنا
لان همه فعلا خوش ناس مايستاهلون الرفض
وابنهم كل البنات تتمنى
صليت المغرب ودعيت ربي يخلصني من هاي المشكله
والكه الها حل يرضي كل الاطراف ومحد يزعل مني ابد
بليل تمددت واني فكره تاخذني وفكره اجيبني
وكل شويه احجي ويه رب العالمين
واسئله يساعدني لان محد يعرف وضعي ويقدره غيره
ومحد راح يلكه حل الهذا الموضوع غيره ابد
اجتني فكره بس كون تنجح ويقتنعو ن بيها ومحد يزعل مني
الصبح نزلت الامي وكتلها يمكن لكيت حل
اذا رب العالمين يساعدنا راح نطلع من هاي المشكله
جمانه السعيدي
امي اي كولي شنوووو
هناء راح ترحين البيت ام همام وتكولين الي راح اكلج علي بلحرف الواحد وإنشاء الله نطلع من هاي المشكله
للعصر امي راحت البيت ام همام وستقبلوها أجمل استقبال
وضيفوها
وطلبت تكعد بس هي وأم همام وحدهم
ام همام سدت باب الاستقبال وكالت تفضلي احجي اني اسمعج
امي احنا وياكم انشاء الله اهل وصرنا عائله وحده
وجيتكم اتخطبون بنتي هناء على عيني وعلى راسي
وابنكم من احسن الولد
بس اني ما اريد اغشكم اني لازم احجيلج الحقيقه وانتي قرري تردين هناء تكون زوجه الابنج لو لا
ام همام ... ولله اني الي عاشكه هناء اكثر من همام ادب وأخلاق وجمال الله يستر عليها
امي خل اكمل كلامي ترا انتي عزيزه عليه واني راح احجليج الحقيقه
قبل سنه ونص بنتي تمرضت حيل وبعدين كامت تتقئ
وتصرخ من بطنه اخذناها للدكتور بغداد
كال اني شاك عدها الزائده
سوينا مجموعة تحاليل واكدلنا عدها الزائده وسوينالها عمليه
همزين لحكنا عليها قبل لاتنفجر ابطنها
جمانه السعيدي
....اي عادي ترا الزائده عمليه كل الناس تسويها حتى الاطفال
...بس اسمعيني ورا العمليه طلعن تحاليل هناء والسونار
ومن ضمن التحاليل اكتشفنا هناء عدها رحم طفولي
....شنو رحم طفولي
....يعني رحمها مال اطفال رحم بي ضمور مايكبر ابد ومستحيل يصير عدها حمل
وتكدرين تسئلين بهاي الشغله
الكل راح ياكدلج البنيه اذا عدها رحم طفولي مستحيل يصير عدها اطفال
همام خوش ولد وبنتي هاي احسن قسمه اجتها
بس ما اكدر اغشكم واضحك عليكم
بالنهايه الناس تتزوج علمود الاطفال وهاي سنة الحياة
ومآ اعتقد اكو ام ماتريد تشوف جهال ابنها
وخاصه انتي بس هالولد عندج
اني ما اريدها تتزوج وبعد فتره يعيرونه بلجهال
لو زوجها يزوج عليها
اكيد مراح يبقى مكابلها طول العمر
ولله شنو يحبها اكيد يريد اطفال يملون علي البيت
جمانه السعيدي
اني كتلج واخليت مسؤليتي وريحت ضميري
وانتي بكيفج اذا ترديها جنه ابيتج
شرط عندي ابنج ما يزوج عليها طول العمر ولا يكول اريد اطفال ابد
اني بنتي عزيزه عليه وما اريدها تنقهر ابد
حتلو تبقى طول العمر بدون زواج عادي ولا احد يقهرها
ويحاسبه على شي هي مالها ذنب بي ابد
فكري زين وخلي همام يعرف بلموضوع واذا اقتنعتم
هله بيكم واذا لا عادي احنا اهل
واني اروح وياج اخطبله احسن بنيه بس يأشر عليها
امي رجعت وهي كملت المهمه على اخرها
ما اعتقد يقبلون ابنهم يبقى بدون اطفال
من ساعته بعد ما رجعو فتحو هذا الموضوع ابد
انسد من هاي اللحضه
صليت وسجدة الرب العالمين سجدة الشكر
لان طلعني من هذا الموقف ولكيت حل الهاي الازمه
همام امي حجتلي وضع هناء شكد ضجت حرامات
هذا الجمال والادب والأخلاق
حرامات مايصير عدها اطفال
لو امي تقبل ازوجها لان فعلا عجبتني حيل
بس امي تكول انت وحيدي واريد اشوف جهالك قبل لا اموت
هناء قررت بس ارجع للدوام اشتري حلقه حتلو برازيلي والبسها
بلدوام حتى اخلص من مضايقة الشباب اليه
اشتريت حلقه ولبستها البسها بس بلدوام من ارجع الاهلي انزعها
رجعت اداوم اول اسبوع ما شفت حيدر
اكول اني مالي علاقه بي بس ولله عيوني ادور علي
بعدين شفته اجا يوم بس مخبوص وبسرعه طلع
بعدين شفته مرتين وما لحكت احجي وياااا
مشتاقه اسولف وياااا
بعدها ما داوم ابد كتلني الفضول وبديت اسئل علي
جمانه السعيدي
كالو امه مريضه ضربتها جلطه كاعد يداريها
سمعت بعد فتره كالو حول دوامه مسائي
لان الممرضه تجي تبقى يم امه العصر وهو يروح للدوام
اخر السنه سمعت ازوج لان وحده مايكدر يداري امه
هذا كان آخر خبر سمعته عنه
اتمنى الله يسعده ويشافي امه حيدر انسان طيب
واكيد رب العالمين راح يكون ويااا
اني ما حاولت اتصل بي ابد لان ما اريد اتعلق بي
اني احبه واذا رجعلي احبه اكثر
خلصت سنتين الكليه بسلام والحمد لله ونجحت وطلعت من الاوائل
سجاد اشترا بيت واخذ زوجته وطلع
بقينا بلبيت بس اني وامي وعلي وزوجته وجهاله
سجاد صار عدا ولد يخبل
بديت ادور وضيفه اي وضيفه اقبل لان كعدت البيت ماتنحمل من اكعد بلبيت أضل افكار موزينه تجيني
واضوج حيل
كنت اقبل باي وضيفه حتلو بروضه
معلمه بمدرسه
كاتبه بس اريد شي يملي وقتي
والتهي بي
اني ومروه على اتصال دائما وكلما انروح للأمام الكاظم نمر عليها ونشوفها اني وامي
صار سنتين من تخرجت ومآ لكيت تعيين باي مكان
إلهي نفسي اطلع طبخات من النت واطبخ
لو اتابع مسلسلات وافلام
الحد مآ يوم خابرتني مروه وكالت اكو مدرسه يمنا محتاجين معلمه ماتجين اداومين
مديرة المدرسه خالتي اذا تحبين اتوسطلج يمها وداومين
سنه وقدمي نقل للعزيزه وارجعي داومي يم اهلج
