رواية لم يكن قراري الفصل الثامن بقلم جمانه السعيدي
ضليت محتاره شلون اروح اداوم بغداد ووين اسكن
اكيد خواني مراح يقبلون
كلت خل افاتح امي بهذا الموضوع واشوف شنو ردها
ولو اني شبه يائسه منه
هناء يمه لكيت وضيفه معلمه بمدرسه
امي يالله بيها الخير
هناء بس اكو شغله
امي شنو هي هاي الشغله
هناء الدوام بغداد خالت مروه مديره مال مدرسه وكالت تعاي داومي بلمدرسه
امي بغداد شلون يمه وين تكعدين ومنو يروح وياج
هناء حرامات اضيع مني الوضيفه هاي
اذا اداوم سنه لو اكثر شويه انقل هنا وارجع اداوم بولايتي
امي شلون وين تسكنيين ومنو يروح وياج اني اخاف عليج
هناء يمه انتي تعاي وياي نسكن هناك نأجر مشتمل لوبيت زغير
انتي عاجبج حالي هذا ترا اني بس الوضيفه تعوضني
اني ما عندي اي مستقبل غير الوضيفه
امي خل احجي ويه اخوانج بلكت يقتنعون
رجعت خابرت مروه
هناء مروه امي شبه اقنعت بس السكن شلون
مروه احنا قسمنا جزء من بيتنا وسوينا مشتمل زغير كلش
وانريد اناجره بس بعدا ما كامل بعد شهر يله يكمل
تعالو اكعدو عدنا ومن يكمل المشتمل انتقلو بي
هناء خلي اشوف امي وارجعلج خبر
هناء يمه مروه عدهم مشتمل من بيتهم طالع نسكن بي
شنو رائيج يمه فدوه وافقي حبيبتي نعتبر نفسنا طالعين سياحه فدوه اذا انتي وافقتي تكدرين تقنعين اخواني
امي احجي وياهم واشوف
هناء يمه ترا مو عجيبه اكو بنات تطلع للخارج تدرس
واكو مهندسات ضروف عملهن تجبرين يوميه بمكان
واذا شفنا الوضع صعب علينا ومآ نكدر
نرجع البيتنا محد طاردنا والحمد لله
يمه فدوه وافقي الله يخليج
اجا اخوي علي وامي خابرت سجاد واجه
وامي حجت وياهم بلموضوع بلبدايه ما قبلوا
بعدين كالت اني اروح وياها واكعد وياها هناك
وكل اجازه نجيكم
بعدين عطلة نص السنه وعطلة اخير السنه كلهن نجي هنا يمكم حرامات اضيع منها هاي الفرصه
درست وتعبت على روحها ومآ كو شي يضمن مستقبلها غير الوضيفه
واني رجلي على رجلها واذا شفت الوضع مو تمام اجيبها وارجع
بعد عدت محاولات من امي الله هداهم ووافقو
اول مره راح وياي سجاد من قدمت اوراقي وشاف المشتمل
الي راح نسكن بي
بعدين أجرنا تكسي اني وامي واخذنا غراضنا ورحنا
اول شي كعدنا تقريبا عشرين يوم بيت مروه
وبعدين انتقلنا للمشتمل
طبعا مروه ماقبلت تاخذ اجار
بس اني صممت لازم تاخذ مني ايجار لو ما اسكن يمها
بعدين اتفقنا على مبلغ معقول
المشتمل عباره عن غرفه وهول زغير ومطبخ
من سكنا بلمشتمل اجا ورانا سجاد وزوجته وجهاله لان صارت عندا بنيه بعد
وجابولنا ثلاجه زغيره وطباخ
وبعدين اجا علي وجابلنا ويااا تلفزيون وصوبه لان جانت شتا
كل أسبوع يجي واحد منهم يزور الكاظم ويمر علينا جايب ويااا مسواك النا
طبعا المسافه موحيل بعيدا ساعتين بلسياره ويوصلون النا
داومت ما احجيلكم على الراحه النفسيه
حسيت نفسي انسانه ثانيه
نشاط موطبيعي مروه هم اتعينت بس بغير مدرسه
اتعينت بثانويه مروه عدها واسطه محد يخاف عليها ابد
امي الصبح تطبخ ولو تروح يم ام مروه لو ام مروه تجي يمها
همزين اكو احد يونسها من اني اغيب عنها لان يضل بالي يمها
حبيت الجهال وحبيت التعامل وياهم
اكو جهال تعاند واكو عصبيين واكو مهمللين
مدرستنا مختلطه بنات وولد
الجهال كلها تحبني لان اتفاهم وياهم واصادقهم وحتى اللعب وياهم
اني داومت النص الثاني يعني بعد نص السنه
طلابي كلهم يحبوني وكلهم نجحووو
اجت العطله الجبيره ورجعنا البيتنا
بس اني حيل تغيرت
بطلت اللوم على نفسي وصار عندي هدف
لا موهدف واحد اهداف اريد احققها
يمكن اقدم ماجستير ووراها دكتورا لازم انجح
ومآ اقبل لاي شخص يهبط معنوياتي لو يرجعني ورا
كنت احسب يوم يوم يمته ارجع للمدرسه حبيت حياة
الاستقلال حبيت المسؤليه الجديده
رجع الدوام ورجعت الطلابي كل فتره اشتري مجموعت
هدايا بسيطه واكافى بيها الطلاب الشاطرين
والكسلان ما اعاقبه لا اساعده حتى ينجح
ادرسه بطريقه مختلفه حتى يحب الدرس ويتعلق بي
اني ادرس صف اول
بيوم اجيت وشفت طلاب اثنيين صف اول يبجون
ولد وبنيه اعتقد توم كلش حلوين بس همه مو بشعبتي
بغير شعبه يدرسون
اخذتهم يمي وسكتتهم
كل شويه يبجون نريد بابا نريد ماما
سئلت معلمة صف اول شبيهم ليش يبجون
كالت ذوله اخوان توم بدايه المدرسه يوميه امهم اجيبهم
للمدرسه توصلهم وترجع
قبل فتره امهم اتوفت انتلت بلكهرباء وماتت
وابوهم اليوم جابهم للمدرسه وراح وهمه بس يبجون
هناء ياعيوني خطيه
اني راح احاول اسكتهم ولله خطيه
اشتريت الهم نستله وكمت اسولف وياهم واحاول اعبر الوكت
منا لمن سكتووو
اخذتهم الصفهم كان عندي شاغر
البنيه اسمها زهراء والولد كرار
كعدتهم وبديت العب ويه الصف كله علمودهم
كسرو كلبي
الحد ماسكتو يله طلعت
تعرفون صف اول صعب التعامل وياهم
رحت اخر درس اطمن عليهم لكيتهم ساكتين
كتلهم اذا تجون للدوام يوميه وماتبجون اني اجيبلكم هدايه
انتي زهراء شتريدين
زهراء اريد لعابه
وانت كرار البطل
كرار اني اريد سياره
هناء تمام باجر اجيبلكم سياره ولعابه بس تصيرون حبابين
وماتبجون ابد
اتفقنا صاحو اثنيبنهم اي اتقفنا
ما اعرف ليش تعلقت بيهم يمكن لان ماعدهم ام
لان بعدهم زغار لان اني احب الأطفال
لان يمكن واني كاعده اللعب وياهم اعوض النقص بداخلي
ما اعرف بس اني حبيتهم حيل وتعلقت بيهم
يوم جاي اللعب وياهم واجا الشرطي الحرس بلباب كال ابوهم اجا ياخذهم
كل يوم يجون واني اقريهم واكتبهم ادرسهم
واللعب وياهم
ولله العضيم كلش كاسرين كلبي
من تاخذون عشره بلامتحان اجيبلكم حلويات حتى اشجعهم
ترا اصعب مرحله الأول اذا الطفل يفتهم بلاول
يعني لاتخافين علي راح يطلع شاطر
ومره نزلت للسوك واشتريت الهم كل واحد تراك
ثاني يوم من اخذوهن اجووو كالو بابا يكول كولو المعلمتكم شكرا
فات شهر ونص تقرببا على معرفتي بيهم
بس يشوفوني يجون عليه يشبكوني ويبوسوني
يوميه احجي الامي عليهم
بس اني ما شايفه ابوهم من يخلص الدوام يجي الحرس باب المدرسه ياخذهم
فديوم بلدوام المديره كالت ابو زهراء وكرار يكول اني راح اتأخر شويه ممكن تعوفوهم يم الحارس
اني كتلها لا اني راح ابقه يمهم لمن يوصل ابوهم حتلو بتاخر
خطيه ما اكدر اعوفهم ابد
كمنا نسولف اني وياهم واقصلهم قصص
اني ابد ما افكر اسئلهم على امهم اكول خطيه اذكرهم بيها
بعدين بدينا نلعب ونضحك حتى الوقت شويه يمر
المدرسه فرغت بس الحارس بلباب
واني وياهم كاعدين بغرفة المعلمات
خابرت امي وكتله راح اتأخر شويه طبعا هي تعرف قصة هذوله الاطفال وتكول ذوله الي يداريهم ويدير باله عليهم الله من فوك يرحم حالهم
اخر شي كمنا نلعب ختيلان اني وياهم
اني ختلت ورا البرده واكلهم منو راح يلكاني
زهراء الحلوه لو البطل كرار
همه يشوفوني ورا البردا ويضحكون
وصل ابوهم بس ماشافهم يم الشرطي نزل مرعوب وين جهالي
الشرطي لاتخاف استاذ موجودين ست هناء ما طلعت علمودهم كاعد وياهم جوه تلاعبهم
ما قبلت تطلع وتعوفهم
....اريد اسلم على ست هناء واشكرها ولله تعبانه وياهم الله يجازيها خير
الشرطي اي تفضل
دخل الشرطي وأبو الجهال اثنيينهم
واني واكفه ورا البردا سمعت صوت الشرطي يكول
ست هناء ابوهم اجا
فتحت البرده
شفت الشرطي بس الواكف يمه صدمني
جمدت بمكاني
حتى عيوني ما يرمشن ابد
الصدمه اكبر من عقلي
هوووو اي لله هووووو
ابوهم
هو يباوع عليه واني جامده بمكاني بعدني واكفه ورا البردا
بس لازمته بايدي وطالع راسي من وراها
الجهال يضحكون واني متبسمره بمكاني
زهراء اطلعي لكينا مكانج هياتج امبينه
كرار بابا تلعب ويانه
هناء اني بحقيقه لو حلم زهراء وكرار ذوله جهال حيدر
اشرتلهم 👉 ابوكم
اثنييمهم صاحوووو اي
هو ضل واكف وبس مصدوم من الي شافه
أشر عليه وكال هناء
