رواية ضحية امي الفصل السابع بقلم جمانه السعيدي
خالي كومي بنيتي شدي حيلج الدوام بدا لازم ترجعين تكملين دراستج
لقاء مااليه خلك ابد شلون راح اكدر اداوم واقرا واكتب واني هذا وضعي
النوب تاخذ الراتب كله تنطي اله ومآ فكرت بيه ابد منيين اصرف شلون اعيش
خالي تردين رائى لازم ترفعين قضيه وتاخذين حصتج بلراتب ترا انتي اللج نص الراتب
مو تكولين خالي تعاجز مني وما يريد يصرف عليه
ولله اخليج بعيوني
بس حرامات واحد مثل هذا ياخذ فلوسج يتونس بيهن
لقاء كلامك صحيح من باجر اشوف محامي واخلي يرفع قضيتي بعد ما اعوفله حصتي ابد
ثاني يوم رحنا اني وخالي عينا محامي ونطينا توكيل يمشي بلقضيه
اني عندي كلاده ذهب وسورات وزوجين تراجي ومحبس
قررت ابيع السوارات وانطيهن اله مقدمة اتعاب للقضيه
ومن تخلص واكسبها انطي باقي اتعابه
وفعلا المحامي بدا يمشي بلقضيه وشهرين يله كملت
استلمت نص الراتب اني اليه مليون وربع وامي الها مليون وربع
سويت حساب بلمصرف وكمت اجمع بي فلوسي
كلبي يوجعني على امي
معقوله كلبها ما يوجعها عليه
هيج بسرعه نستني
ولكم حتى البزونه دافع على جهاله اذا واحد قرب عليهم
وهي عافتني بكل سهوله
هنا استاذ حمودي من كام يستلم نص الراتب حب ينتقم
مني ويندمني طول عمري
خله امي تكتبله تنازل عن حصتها بلبيت
قنعها راح يشتري بيت زغير ويكعدون بي بدل الإيجار الي يدفعونه كل شهر
وخصوصا الراتب نقص للنص
وبهذا التنازل كدر يبيع حصته على واحد دلال
ومآ حسيت غير هذا الدلال صار شريكي بلبيت
ويريد يبيع حصته
وكل شويه يدز عليه تبيعين حصتج
واني رفضت اي هذا اخر ضمان اليه
شلون ابيعه وابقى بدون بيت الزمان ما مضمون كلشي يصير
شهرين يتفاوض وياي اخر شي كال اريد اهد حصتي
للكاع
اذا هد حصته يعني البيت يوكع كله
حسبي الله عليك حمودي الله يفرق بينك وبين صحتك
مثل ما فرقت بيني وبين امي
اضطريت ابيع حصتي علي وخليت الفلوس بحسابي بلمصرف منا لمن اجمع عليهن واكدر اشتري بيت
وأسكن بي
قابل راح اعيش العمر كله بيت خالي
الله يحفظ خالي ابد ما قصر وياي بشي ابد
بس عمامي جانت توصلهم اخباري ولا يوم سئلو عليه ولا اهتمو الحالي ابد
حتى البيت الذكرى الوحيده من امي وابوي راح مني
بسبب نزوة امي وطيشها
خلصت هاي السنه الدراسيه واني ما داومت ابد
بيوم اجاني خالي
كال اكو ولد يدور عروسه يزوج
هو موضف بلري وعندا شقه وسياره وحالته الماديه ميسوره
شنو رائيج تشوفينه يجوز يعجبج
مجرد اكعدي واحجي ويااا اذا عجبج توافقين
واذا ما يعجبج ارفضي
كعدت افكر اذا انسان زين ليش لا على الاقل يصير عندي بيت وانسان اعيش ويااا
يتحملني واتحمله اكيد بعد الزواج راح تصير محبه بينا
اتفقنا على موعد يجي بيت خالي ويشوفني
حضرت نفسي لبست فستان نيلي والحاشيه ورد ناعم وردي
وشسورت شعري وخليت مكياج خفيف وعطر
كعدنا العصر ننتضرا
اجا ولد شاب عمرا ٣٠ سنه طوله تقريبا ١٧٥ جسمه حلو
لابس نضاره واصلع من كدام
كعد شويه هو وخالي بلاستقبال
واني دخلت علي بلعصير والماي خالي كال اكعدي بابا
كعدت وهو رفع عينه وشافني
ياسين اهلا وسهلا شلونج لقاء
...الحمد لله تمام
ياسين اني موضف والحمد لله وامي وابوي متوفين
عندي اخوان ثنيين مزوجين وكل واحد بيته وحده
عندي شقه وسياره
واني انسان ملتزم والحمد لله
خالي نشرف بيك
ياسين اليه الشرف
اني ما اخفي عليكم لقاء عجبتني حيل
واذا توافق وعدها شروط اني مستعد اسمعها
خالي كال من رخصتك اني اعوفكم تحجون براحتكم
ياسين سبحان الخالق جمال مو طبيعي
لقاء شكرا
ياسين انتي عايشه بيت خالج
...اي
...ولو فضول مني اهلج وين
...اني اهلي ميتين بابا عقيد استشهد بأحدث الموصل
...الله يرحمه وامج وين
...امي ماتت بحادث مؤسف دعمها ولد شاب ساقط مستهتر وضيع عمرها
...الله يرحمها ويغفر اله اني كدامج تكدرين تسئليني اي سوال يعجبج
....ليش الهسه ما مزوج مع انو انت موضف واكيد وياك موضفات
ومو زغير ومتمكن
...ما حبيت ارتبط واني ما مكمل كلشي
اشتريت شقه وسددت القسط واشتريت سياره والحمد لله
والصراحه ما صارت كدامي وحده لفتت انتباهي ابد
بس انتي ما شاء الله جمال وكمال
لقاء احتاج وكت افكر بي وارجعلك خبر
ياسين اخذي راحتج تكدرين تسئلين عليه بلدائره مالتي
وماكان سكني اني ماعندي شي اخاف منه
بس ترجعلي الموافقه ان شاء الله راسا نزوج لان اني مكمل كلشي حتى غرفة النوم مشتريها
طلع وهو الابتسامه على كد وجه
اني شبه اقتنعت اني بعد ما اريد احب وانحب اريد ازوج واستقر وخلاص
اريد الكه مكان يلمني ويصير عندي اطفال واعيش بسلام وبس
....
خالي قرر يروح يسئل عنه بمكان عمله ومكان السكن
الكل كالو انسان عادي يروح بطريقه ويرجع بطريقه ومآ ياذي اي بشر
اخلاقه زينه ومآ عندا اي مشاكل بحياته
انطيت الخالي الموافقه
وفعلا رجعلنالهم خبر موافقين
حددنا يوم المهر دزلي فلوس كال اشتري ذهب
اشتريت ذهب وفستان بصلي مقسم جسمي وحذاء فضي عالي وحجزت بلصالون
ما اعرف ليش بيومها امي كدام عيني
كلش احتاجيتها
البنيه مالها غير امها تفهمها
معقوله راح ازوج وامي موجوده وماتحضر عرسي ابد
مسحت دموعي واستسلمت للواقع
ام الصالون رفعت شعري نص ونص وخلتلي غصن فضي جه وحده ومكياج سموكي يخبل
ورجعنا للبيت وصلنا قبلهم اجن نسوان إخوته ثنيينهن
وجهالهن ومره جبيره بلعمر تكول اني عمته
اول مره يشوفني كلهن
التعليقات كانت حلوه تخبل جنها لعابه
كملنا العقد ودخل لبسني الذهب باسني وكعد يمي
ما اعرف ليش ماكنت سعيده ابد
رغم كلشي جاي يصير صحيح ومابي اي غلط
يمكن لان بعدني ما احبه ويمكن لان امي ما موجوده وياي
امي كسرتني كسر ما ينجبر ابد
كملت الحفله واخذ رقمي كال نتخابر اي شي تحتاجينه خابريني
كل شويه يخابرني فرحان ما مصدك راح يزوج وحده ازغر منه ب١١ سنه شابه وحلوه
وحتى ماعدها طلبات هواي
خلال اسبوعين كملت كلشي وحددنا موعد العرس
بيوم العرس حاولت اتصل على امي اريده تكون موجوده وياي رغم اني كلت الياسين امي ماتت
بس جنت اتمنى تحضر عرسي
بس الرقم يطلع خارج الخدمه
زفونا الشقتنا كانت زفه حلوه كلش
دخلنا هاي اول مره ادخل للشقه رغم هو لح عليه هواي كال تعاي شوفي بيتج
واذا تردين تغيرين اي شي اني مستعد
حلوه الشقه ومرتبه والأثاث حيل نازك
بدلنا وتعشينا ودخلنا انام ما كان عندي اي شعور اتجاها ابد بس استسلمت للواقع
خلص كلشي بسرعه ومآ اتاذيت ابد
هو كبل نام واني سبحت وعيني ما تاخذ نوم يمكن لان المكان متغير عليه
بقيت افتر شويه بلشقه واتفرج عليها بعدين تعبت ونمت
الصبح كعدت على صوته يخابر
اخو الجبير يخابر يطمن علي
كعدت صباح الخير
ياسين صباح الخيرات على احلى عروسه بلدنيا
...احضر الريوك
...اي بين ما اسبح واطلع
...
طلعت اجبان وقشطه ومربى من الثلاجه وطلعت صمون وخليته بلفرن
طلع من الحمام وتريكنا اني ويااا واني بقيت ارتب بلمطبخ
ياسين العصر يجون اخواني وعوائلهم يباركولي حضري نفسج
لقاء ان شاء الله
ردت اطبخ غدا لكيت اكو كباب جاهز طلعته حتى يحل
شويه للغدا
هو كعد يخابر واني جهزت كلشي
تغدينا ودخلت سبحت وبدلت لبست فستان فستقي
وسرحت شعري وخليت مكياج
العصر كلش يله وصلو استقبلناهم وكعدو تقريبا ساعه وراحووو
ياسين امشي نطلع نتعشى برا
طلعنا تعشينا وبقينا نفتر الجوو يخبل
اتصل خالي وكال نريد نجي نشوفكم
كتله احنا طالعين خليها على باجر ننتظركم
جان كلشي عادي اني صحيح عايشه ويااا بس بدون مشاعر
هو هم ماعندا شغلات وسوالف وضحك
احسه انسان عملي كلش
مدري الصوج بيه من كد ما كفختني الدنيا ما اعرف اتفاعل
ويه الموافف الي كدامي ابد
ثاني يوم اجا خالي وزوجته وجهاله وجايبلي محبس ذهب هديه
شكد فرحت بجيتهم اليه
هم بس الباقين من اهلي
الايام بعدها جانت تمر عاديه اكعد الصبح نتريك اني وياسين ويبدل ويطلع للشغل
واني ابقى انضف واغسل ملابس واطبخ
يرجع بلثنتين نتغدا ونام
للمغرب نكعد ابدي احضر العشى ونكعد شويه على التلفزيون لو كلمن لازم الموبايل ومكنك
صحيح حياتي ويااا كانت كلش عاديه ومآ بيها شي جديد
بس المهم اني مستقره وماكو مشاكل ابد بينا
او اني ما اريد مشاكل
كلشي يكول اكله حاضر
اريد احافظ على حياتي ومآ اريد انتكاسات اكثر
وأهم شي ماكو طرف ثالث يدخل بحياتنا ابد
كل شهر خالي يروح يستلم راتبي ويخلي بحسابي بلمصرف
وياسين ما يعرف اني عندي حساب بلمصرف
ولا يعرف اني عندي فلوس ابد
اما اخوانه ما نشوفهم بس بلمناسبات
عايشه حياة عاديه جدااااا بس المهم مستوره
