رواية قلب اسود الفصل التاسع
اول مافتحت الباب شوفت سلمى قدامى مع عشيقها فى اوضة النوم
اتصدمت من المنظر وازاى بتستغفلنى علشان اعمى ومبشوفش
ومع ذلك كتمت الموضوع جوايا وعملت نفسي مش شايفها
رغم ان من صدمتى فضلت واقف شوية وسألتنى
= مالك ياحبيبي رجعت تانى ليه؟
وعلشان ملفتش نظرها ان انا فتحت وشايفها قولتلها
.. لا ابدًا انا افتكرتك بتندهي عليا
ومن فجرها كملت العلاقة بتاعتها وانا واقف ولا حتى استنت لما اروح اوضتى التانية
وقررت انى اكتشف البيت واحدة واحدة وهما مستعمينى لحد مااعرف كل واحد فيهم على حقيقته
اه هما اهلى ودلوقتى انا عندى خلط كبير بين شخصيتى وشخصية الطفل
لكن لازم اعرف كل حاجة بتدور فى البيت ده
رجعت اوضتى تانى وبصيت على اللوحة لقيت وراها الحيطة متشققة
شيلت اللوحة وبصيت وراها ودققت فى الشقوق دى لقيتها عبارة عن اوردة دم
والدم بيتدفق فيها لكن ممزوج بقطع سودا انا مش عارف هي ايه
مديت ايدى على الشقوق دى لقيتها اتملت دم ، حطيت اللوحة على الارض
وروحت بسرعة على الحمام علشان اغسل ايدى
ولما رجعت لقيت حاجة غريبة جدًا ، اللوحة اللى كنت سايبها على الارض
رجعت تانى على الحيطة واتعلقت مكانها والدم تقريبًا بيغطى ملامحها
الدم كان ماشى من ناحية ديل الثعبان ولقيت عين الثعبان اتغيرت فى اللوحة
وبقى لونها لون الدم بعد ماكان لونها اسود
حطيت ايدى على مكان الدم اللى بيمشى ناحية ديل التعبان لقيته بيتحرك
اتفزعت ورجعت مكانى على السرير حسيت بهوا شديد حواليا واصوات كتير
بتتكلم بلغة مش مفهومة ، سبت الاوضة وخرجت جرى وبصيت فى الساعة
لقيتها واحدة بعد نص الليل ، نزلت من على سلم الفيلا جرى
سمعت صوت جاى من ناحية اوضة مقفول فى القبو اللى تحت الفيلا
كل اللى استشفيته ان فيه اكتر من شخص تحت وبابا من وسطهم
وقفت ورا الباب ولقيتهم بيتمتموا بكلمات مش مفهومة وكلمات تانية مفهومة
الكلمات المفهومة رعبتنى جدًا ، لان كانوا بينادوا بأسماء شياطين وملوك جان
والفضول خلانى فتحت عليهم الباب ، وطبعًا عملت نفسى اعمى ومش شايف حاجة
اول مافتحت الباب علامات الذهول كانت على وشهم لكن بابا شاورلهم وحط ايده على عنيه
بيفهمهم انى اعمى ومبشوفش حاجة .
علامات الخضة بانت على وشى جدًا خاصة ان اللى شوفته مش قليل
حاطين بنتين متكتفين على الترابيزة ومقلعينهم هدومهم وراسمين على جسمهم
علامات ورسومات اثرية ، واول ماشوفت المنظر عرفت انهم قربان علشان يقدموهم
للارض ويطلعوا بيهم اثار ، مكنتش عارف انى اتنقلت فى جسم قذر من عيلة قذرة
وماخفى كان اعظم ، طبعًا بابا قالى:
= تعالى ياحبيبي اطلعك فوق، انت ايه اللى نزلك هنا ؟!
.. سمعت صوت غريب فى البيت فقولت انزل يمكن يكون فيه حاجة
= لا ياحبيبي انا قاعد مع صحابي شوية هنا بس ، اطلع اوضتك ومتشغلش بالك
وانا طالع حسيت بدقات قوية جدًا فى قلبي وكأنه بيخرج من مكانه ، وعرفت ان اللى جاى
صعب جدًا وان اللى جاى هيكون نهاية لموضوع كبير او ممكن يكون بداية مرعبة على العالم كله
....
