 |
رواية الشقة المغلقة الفصل الاول بقلم اسلام فرغلي
ـ يا فندم حضرتك مش عايز تصدق ليه ! .. بقولك الشقة دي مفهاش حد ساكن و مقفولة من سنين .
ـ طيب حضرتك بس ممكن تفتحلي الباب ادخل ابص بصة نشوف حاجة و نخرج تاني
ـ حضرتك بتقول أيه ؟ .. هو ايه اللي نفتح نبص بصة دي و نخرج ؟ .. هي بطيخة هنشوها حمرا و لا قرعة ! .. و بعدين انت عايز تفتح تشوف ايه جوا
ـ مانا قولتلك اني سمعت صوت من الشقة دي بينادي عليا و بيستغيث لو مفيش حد تفسر بأيه الصوت اللي سمعته
ـ دي تهيأت يا بيه متخدش في بالك , روح لحالك يا بيه علشان اعرف اشوف شغلي
مشيت و انا عارف و متأكد اني سمعت صوت واضح خارج من الشقة المقفولة , الصوت كان بينده عليا و كأنوا عارفني كويس , و الاغرب انوا بيستغيث بيا و كأن في حاجة جوا خايف منها , رحت الشغل و انا دماغي بتودي و تجيب من الصوت اللي سمعته , هو انا فعلا بقي بيتهيألي حاجات !؟ , قطع تفكيري صوت رامي صحبي و هو بيقول " أيه يا ابو علي .. مالك سرحان النهاردة .. هو حد اخد عقلك النهاردة و لا ايه " , , ضحكت معاه و انا بقولك " انت بتقول فيها " ,
رامي بطل ضحك و اتكلم عادي وقال " ايه في حد اخد عقلك بجد و هنفرح بيك قريب ؟ " , رديت و انا باصص في الاب توب " ياخي لا مش اللي في دماغك دا .. انا في حاجة فعلا شاغلة دماغي من امبارح بالليل " , رامي رد باستغراب و قال " ايه هي دي يا تري " , بالليل انا كنت نايم في الاوضة بتعتي و سمعت صوت بينادي عليا , كانت ساعة عدت واحدة بالليل , انا مش معايا حد في الشقة و عازب زي مانت عارف , قومت من مكاني علشان اشوف صوت مين اللي بينادي عليا , لقيت الصوت مش في الشقة بتعتي , الصوت كان جاي من برة , بس في حاجة استغربتها اوي امبارح عير الصوت " , رامي سأل و هو متشوق " ايه هي ها ؟ " , كملت و انا بسيب الاب توب و ببصله و قلت " لقيت باب الشقة بتعتي مفتوح ! , رغم اني متأكد مليون في المية اني قافل الباب قبل ما اروح انام "
, رد رامي " ما يمكن نسيت و انت مش واخد بالك "
, اتكلمت بتعجب و قلتله " يعني هدخل انام و اسيب باب الشقة مفتوح ! , اكيد لا يعني , المهم اني خرجت علشان اشوف الصوت اللي بينادي عليا جاي منين , و لما خرجت لقيت الصوت جاي من الدور اللي تحتي علي طول , يدوبك نزلت السلم و عرفت الصوت جاي منين , كان جاي من شقة مقفولة , الغريب ان الشقة عليها قفل و مقفولة , قربت من الشقة الصوت سكت تماما , حطيت ودني عندي الباب علشان اسمع أي حاجة جوا , لكن مفيش أثر لاي صوت , اتحركت علشان امشي , لكن وقفني صوت حد بيستغيث من جوا الشقة , رجعت تاني و بصيت ناحية الشقة الصوت سكت , قربت علي الباب مرة علشان اسمع حاجة لكن مفيش , الصبح سالت البواب عن الشقة دي , قال انها مقفولة من سنين , ولما قلتله علي الصوت قال انوا بيتهيالي " , رامي سكت شوية و هو بيفكر في كلامي و بعدين قال " دا ايه فيلم الرعب دا , الحاجات دي بسمع عنها في القصص و افلام الرعب , لكن متخيلتش انها ممكن تحصل في الحقيقية " , رديت عليه و قلتله " انا مش عارف هل حد فعلا جوا الشقة و لا دي تهيأت , أصل انا بقالي من امبارح بس ساكن العمارة دي بعد ما سبت الشقة القديمة , علشان كده لسه معرفش مين اللي ساكن في العمارة معايا , بس البواب قال ان مفيش حد ساكن الشقة دي و قال انها مقفولة من سنين " , قطع كلامي رامي و هو بيقول " ايوااااه ..ليه بقي مقفولة من سنين و مدش بيسكن فيها زي باقي الشقق !؟ " , فكرت للحظة في اللي قالوا رامي و قلت " فعلا هي ليه مقفولة من سنين , انا النهاردة هسأل البواب السؤال دا " , بالليل فعلا و انا مروح من الشغل عديت علي المكان اللي جوا سور العمارة اللي بيقعد فيه البواب لكن ملقتوش , دخلت جوا العمارة و انا بدور عليه في الدورالاول بردوا مش موجود , و في الدور التاني بردوا , هي العمارة ليه هص هص كده , مفيش أي صوت في العمارة و مش لاقي أي حد اسألوا عن البواب , انا ساكن في الدور الرابع , طلعت للدور التالت اللي فيه الشقة اياها , الدور الوحيد اللي لقيت اللمبة بتاعته بترعش , فجأة اللمبة طفت خالص و بقيت في ضلمة دامسة , في اللحظة دي سمعت باب الشقة المقفولة بيفتح مش عارف ازاي رغم ان عليها قفل , جسمي بدأ يترعش و مش قادر ابص ورايا , كنت حاسس بصوت حركة ورايا و فجأة لقيت ايد مسكت ايدي ..
