رواية خادمة كامله جميع الفصول بقلم جمانه السعيدي
بشرى مواليد ٩٠ من عائله بسيطه تكدرون تكولون فقيره
ابوي ازوج امي وهو عمره ٣٥ سنه وامي بوقتها كانت ٣٠
سنه ثنيينهم من عوائل ريفيه فقيره
الفقر والعوز خلاهم يتأخرون بلزواج الهذا العمر
اهل ابوي بلولايه عائله فقيره ابوي يشتغل عامل بناء
زواجه من امي صار عن طريق المعارف والأقارب
بيبي جانت دور عروس الابويه
وصت الجوارين وحده من الجيران كانت أقارب امي
وهيج صارت القسمه
ابوي ماكدر يقدم مهر غالي ولا ذهب
زواجهم كان تلزيك ثنيبنهم نفس المستوى
رهمو واحد على للثاني
اهل امي اعتبرو هاي اخر قسمه ممكن تحصله امي
بعد ما وصلت الهذا العمر
ماكان يهمهم الفلوس بكد ما يهمهم امي تتزوج ويصير عدها بيت وتستقر
بعد زواجهم بسنه يله امي حملت
اجيت اني للدنيا وحيده لا عندي اخ ولا اخت
هلكد ما فرحانين بيه سموني بشرى
من بعدي اتعذر على امي الحمل وماتعرف السبب شنووو
احنا من سكنت إحدى المحافظات الجنوبيه
ساكنين منطقه شعبيه
منطقتنا شعبيه عاداتهم قديمه الجوارين ممكن يتعاركون
علمود الجهال او الاتفه الاسباب
والزلم العصر يكعدون بلبيبان جاي وجكاير
يكصون الرايح والجاي
وحديث عن اعراض الناس ومرات عن السياسه
بيتنا بسيط بسيط جدا غرفه وهول ومطبخ وصاله زغيره
بناء قديم تعبان تعبان وبناء ناصي عن الشارع بس اهم شي ملك
عيشتنا معتمده كليا على عمل ابوي
مثل ماكتلكم ابوي يشتغل عامل بناء
هاي شغلة ابوي من كان شاب عمره ١٥ سنه
وما يعرف يشتغل غيرها
من كبر ابوي بعد مايكدر يشتغل من قبل لان كبر وتعبان
وهيج شغله يرادلها حيل
ضروفنا حيل صعبه بحيث اني بلمدرسه ماعندي بس صدريه وحده وقميص وحذاء لا ستيك
ذني كل يوم اروح بيهن للمدرسه
امي لا تقرأ لا تكتب وابوي نفس الشي
كنت معتمده على نفسي اني اقرا واكتب وحدي
مستواي الدراسي وسط لا كسلانه ولا شاطره
وسط اعرف اقرا واكتب بس بعض المواد صعبه عليه
جمانه السعيدي
بلنسبه الشكلي اني سمره وضعيفه عيوني زغار
اسناني شويه عاليات يعني مو حلوه
شكلي عادي وأقل من العادي
فوكاها امي ما تصيحلي غير ((الملحه ))
اكله ليش تكولين هيج
تكول اني مجذبه غير انتي ملحه
اما ابوي يصيحلي بشه ادري مو اني بنيه ليش بشه
على اساس يدلعني
المهم من وصلت صف خامس ابتدائي ابوي وكع مريض
مايكدر يطلع للشغل مثل قبل
تعب حيل وخاصه شغل العماله يريد حيل
وهنا دخلنا بمرحلة العوز الحقيقي نتغدا ما نتعشى
مرات الجوارين يدزولنا اكل
لو تمر لو توله (خباز) مرات شويه طماطه
كل هذا مجاي يسد جوعنا
اغلب الوقت ناكل خبز وجاي
ابوي جان محتاج علاج عمامي دزولنا فلوس علاج كم مره
بس هما وضعهم نفس وضعنا كلهم يشتغلون عماله
وعدهم عوائل
مايكدرون يوفرولنا فلوس العلاج دائما
وابوي مبين وضعه راح يطول
ما مبين راح يتحسن وضعه بسرعه
فاتت علينا سنه سوووده من كد العوز والضيم
وحده من الجوارين كانت أزور امي بستمرار
امي تخبزلهم
والمره تنطينا هلقاسمه الله مسواك
لو فلوس قليله
بيوم اجتنا جايبه العجين امي تخبزه الها
كالت بلمستشفى محتاجين عامله
ليش ما تقدمين احسن ماكاعده وحسره عليكم
الفلس وزوجج محتاج علاج
امي...صدك واني يقبلوني
جارتنا...ليش ما يقبلون يكيفون
امي...بلاول احجي ويا ابو بشرى واشوف رايه شنهي
وتالي اردلج الخبر
ابوي ماكان بس مريض لا حالته النفسيه متأزمه
بسبب الوضع الي احنا عايشين بي
وهو يشوفنا جوعانين وماعدنا شي نمشي بي يومنا
امي...ابو بشرى ام محمد تكول يردون عاملات بلمستشفى
شنو رايك اشتغل بلمستشفى
احصل راتب نمشي بي حالنا
ابوي...هيج اني بعد ما مني فايده انتي تشتغلين وتعيشينا
امي...لا انت ابو بيتي بس هلتشوف وضعنا
حسره علينا اللكمه اشتغل منا لمن تصير زين
وابطل من الشغل
ابوي...وياج نسوان لو بس انتي ويا الزلم
امي.. لا له تكول شكثر نسوان يشتغلن هناك
انا كون اشوف الشغله ما توالمني ومااكدر عليها
لو بيها هواي زلم ابطل هااا شكلت
ابوي...خوش روحي شوفي الشغل
بشرى ....راحت امي ثاني يوم وراحت وياها جيرانه
عدها معارف هناك شرحت موقف امي
ووضعنا التعبان وشلون احنا محتاجين هاي الشغله
لان ابوي مريض وماعدما فلوس العلاج
كدرت جارتنا ام محمد اتأثر عليهم بلمستشفى
امي واكفه وتباوع بعيونها
بلنسبه الامي بعده الطابع الريفي غالب عليها
خجوله ماتعرف تحجي ووتتفنن بلكلام وتأثر على الناس
مثل ام محمد
جمانه السعيدي
ام محمد جابت ملف وخلت بي كل المعلومات الي تخص امي امي هم ماخذها احتياطاتها ماخذه كل الأوراق الي تخصها جنسيه وبطاقة سكن وماخذه الاشعه
والتحاليل الي تخص ابوب
حتى اتأثر عليهم ويقبلون يشغلوها وياهم
بلمستشفى اخذو كل هاي الأوراق وكالو الامي تعاي الاسبوع الجاي وراح تستغلين هنا
رجعت امي فرحانه وهي كلها امل تشتغل بلمستشفى
ويصير عدها راتب وهيج وضعنا المادي راح يتحسن
رجعت امي وحجت كلشي الابوي بلتفصيل
اني جنت كاعده من سمعت كلام امي فرحت الفرحت امي
مااجنت اعرف شغل امي راح يااثر على مستقبلي
بقينا ننتظر هذا الاسبوع يخلص نحسب يوم يوم
على امل امي تشتغل وحياتنا تتغير
فعلا رجعت امي بعد اسبوع ولكت اسمها طالع
وياا اسماء الناس الي مقدمه تشتغل بلمستشفى
رجعت للبيت طايره من الفرح
عبالك مو راح تشتغل عامله لا راح يسجلون المستشفى
باسمها
امي....ابو بشرى غبلوني اشتغل بلمستشفى من باجر اروح للشغل
جمانه السعيدي
ابوي...بلعافيه بس عندي وصيه اللج
امي.. اي كووول شنهي الوصيه
ابوي...تلمين روحج ملابسج عراض لا تحجين ويا الزلم
ولا تقربين عليهم
تحترمين نفسج تحترمج الناس
مااريد تجيني حجاية تالي عمري سمعتي لو لا
ترا الناس ما تصدك تلكه سالفه تحجي بيها
امي...صار ما يحتاج توصيني اني معلمه روحي
كبل لا انت تعلمني مراح تسمع كلام عني مو حلو
راسك يضل مرفوع دوم
ومحد يكدر يحجي عليك
من ثاني يوم كعدت امي من الصبح حضرت الغده
بيومها طبختلنا توله وخبزت خبز ريكتنا اني وابوي
وطلعت للشغل
واني من بعدها بشويه رحت للمدرسه
فات اسبوع على شغل امي بليوم الرابع
اني رجعت من المدرسه
للبيت لان اني ارجع قبل امي
لكيت ابوي متخربط حيل مااعرف اتصرف شلون لان اني بعدني زغيره يله بلخامس ابتدائي
طلعت رحت الام محمد جبتها واجيت للبيت
ام محمد...هااا خويه سلامات
ابوي لا يكدر يتحرك ولا يحجي
راحت ام محمد جابت ابو محمد ونقلو للمستشفى
وصلنا للمستشفى بعده الدوام ما خلص
دخلو للطوارئ ابو محمد بقا ويا ابوي
واني وام محمد رحنا ندور امي بلمستشفى
طبعا اني بعدني بملابس المدرسه ملابس كلش تعبانات
مالات العام السنه مااشتريت ملابس جدد بسبب ضروفنا
الماديه الصعبه
وحذائي لاستيك
مخيط من كل الجهات
لكينا امي بس شافتنا اني وام محمد راسا وجها صار اصفر
امي....هااا خيه شكووو
ام محمد...ابو بشرى تخربط وجبنا للمستشفى
تعاي ويانا شوفي
عافت امي شغلها واجت ويانا للطوارئ
الدكاتره من شافو امي وعرفو ضروفنا حبيل اتعاطفو ويانا
وخاصه من شافو منظري وشكلي شلون رايحه للمدرسه
بقينا ساعتين بلمستشفى شويه حالة ابوي صارت احسن
ضربو ابر ثنيين ونطو علاج شويه وضعه صار احسن
الصراحه انطونا علاج مجاني
وانطو الامي اجازه يوم واحد الحد ما حالة ابوي تتحسن
جمانه السعيدي
رجعنا لللييت
امي نومت ابوي على فراشه وغطته وحضرت الغده
ابوي حان ياخذ علاج قوي لازم اكل زين
مو هذا اكلنا بيومها غدنا جان توله وخبز وطماطه تكلا
ام محمد بس رجعت البيتهم جابتلنا تمن علي شعريه
وصدر دجاج بمركه صفره بس شنو من ريحة الاكل تشبع
مدري شلون طابخته يخبل
امي غدت ابوي ونام
لليل امي طلعت بقرار دمر حياتي
امي... بشرى بعد ما تروح للمدرسه تبقى هنا يم ابوها
اليوم جان مات لان وحده بلبيت
لو ماجايه بشرى وصايحه على ام محمد جان مات
احنا شنسوس بلمدرسه
بشرى تبطل من المدرسه وتكعد يم ابوها
ابوي بس سمع راسا وافق لان وحده مايكدر بلبيت
وامي ماصدكت لكت شغل حتى تحسن مستوانا المعيشي
شلون تعوف شغلها وتبطل
بشرى...بطلت من المدرسه وكعدت بلبيت
بدت امي تعلمني واني بهذا العمر العجين والخبز
والطبخ وكلشي يخص التنضيف وغسل الملابس
والعنايه بابوي المريض
شلت مسؤليه جبيره اكبر من عمري بهواي
واني بهذا العمر جان لازم اتحمل جزء من المسؤليه ويااا امي
من بعد ماابوي راح كم مره للمستشفى والناس
عرفت حالته وحالت امي ووضعنا التعبات
بدو بلمستشفى يساعدون امي
ينطوها ملابس مستعمله احذيه مستعمله
ملابس رجاليه قديمه الابوي لو زوليه قديمه بطانيه مستعمله
امي تجي طايره من الفرح بيوم اجيب وياها تبرعات
من الموضفين
ما تصدك توصل للبيت تبقى تشوف ابوي بيهن
حاجه حاجه
بدا وضعنا يتعدل بعد شغل امي
صار عدنا ملابس هواي صح مستعملات بس احسن من قبل
وبيتنا الفرش احسن من قبل
وامي اشترتلنا صوبه مستعمله ندفا عليها
بيوم اني تستلم الراتب احلى يوم عدنا
لان امي اجيبلنا دجاج ولحم وبيض
نبقى الدموع كامل ناكل تكل طيب
وعلتج ابوي جانت اجيبه من المستشفى بدون فلوس
ؤنطونه الها مساعدات
