رواية خطايا واجتثاث ( كاملة جميع الفصول) بقلم نور البصري

نهاية شغلي طلعت من المستشفى امشي بين الثلوج كلش بارد ثلج هذا البلد والانواء تكول عاصفه ثلجيه اليوم 

لذا حذرت الانواء الجوية البقاء بالطرقات العاصفه احتمال بالليل تبلش لازم ارجع لدفو بيتي لوحدتي.

ركبت سيارتي و اني اسوق بين الثلوج بس وصلت لبيتي بساع ركنت سيارتي بالكراج المخصص الموجود على مسافه من منازل المقيمين امثالي

الحمد لله هاي المرة جيراني ما كرج سيارته بمكان سيارتي من هددته ابلغ السلطات

طلعت من سيارتي بساع ورفعت كبوس الكوت الفرو على راسي 

جمال الثلوج تساقط خفيف مثل زغب ريش...

دخلت لبيتي الخالي من الحياة من ضحكات عائلة ومن دفو حبيب.. 

غيرت ملابسي تراك مبطن بفرو خفيف و لبست الكوت و الكبوس ولفاف غطيت الرقبة وحتى تنقبت نص وجهي وغطيت حلكي من حسيت الهوا بارد سكين يقطع ريتي... 

طلعت وكفت بساحه الخارجية اباوع للبرد الديوكع لحياتي هنا سنين اااخ.. واني الماضي جمر يحركني.. 

كعدت بالمرجوحه الثلج الواكع عالارض مثل جليد غلفني هيج اني هسه 

بيه برود موت حسيت بالبرد يمكن راح اتجمد لو ابقى اكثر اكوم احسن

 تجمدت من البرد صوت سلاسل المرجوحة صدعتني خاصة تكسر بقايا التجمد عن السلاسل واني اتحرك اهز المرجوحه برجلي

 

بيدي النقال ورجفه اخذتني البرد جمد عظامي دخلت بساع لبيتي رحت للمطبخ واني العب بشعري القصير كلش الشعر الي بيوم من الايام جان طويل..

ابتسمت بحنين وين صفى بي الزمن هم عايش لا! بعد هاي الاحداث المرت بالعراق اخر مره لمحته جان مخيف وي جماعات متوقعت بيوم يرافقهم وقتها هربت منه من الموت المحتم هم رجعت افكر بي

انتبهت لمحضرة القهوة جهزت اخذت الكوب كعدت كبال الشباك على جربايتي الحديد بصورة جانبية يم الشباك حبيت هيج مكانه..

اباوع للحديقة و المرجوحة الي جنت كاعدة عليها شلون الثلج تزايد وثقل بالهطول غطاها بالكامل كتله من الثلج مكان جلوسي هناك. 

راسلت صديقتي والفضل الها بحياتي اول ما فتحت عليه خط وصاحت اسمي كتلها 

- تدرين شتمنى..؟ 

- شتتمنين يا خيتي 

- حضن محب و بنت اتمناها مجرد امنيات خيتي ماتت امنياتي بخطايا أجتثاثي.. 

: واجهي الماضي دوم اكلج انتي جبانة وخوافة لازم تواجهين.. 

رديت واني ارجف 

: اخر شوفتي اله مو ذاك الحبيب التعلمت حنان حضنه اخاف فهميني لج بأي وجه اباوعله وشلون اواجهه «بنتنا» ماتت و اني سبب دماره و البينا صار حاجز ما ينهدم بس ارجع يموتني اخاف

دفنت نفسي ببرودة هلبلد ااي صيفه اقل من شتاه وحفرتلي مقبرة جليد صعب صعب ولج... 

بجيت واني اشرب القهوة وكملت. 

: حقه شيسوي بيه حقه دون قصد جنت دماره وبنظره اني اوف ربي..

صوت نحيبي علا وكملت بصوت متقطع..

: لذا افضل ابقى بمقبرة اجتثاثي يمكن اني ميته بالنسبة اله تلكيه عاش حياته اني يجوز هسة اسوء ذكرياته يخيتي او يجوز محاني و كمل حياته

: اكولج اذكر بس اسمه الاول مممم انتي متدوريه تبقين جبانه انطيني اسمه كامل. 

: لا مكدر خليني هيج اخاف تدوريه وتعرفين كمل حياته وعايش واني هنا وحدي المتت بالحياة بس تدرين حقه والله واتمناله السعادة بس هم مريد اعرف..

بس هي لحت ودوم تلح وهلمرة لحت كولش. 

: انطيني اسمه الكامل واني هسه اطلعلج ياه اني نسيت اسمه تدرين من كم شهر سوو كروب خريجين محافظتنا بلكت اسمه موجود.. 

: خايفة ما اريد اعرف عنه ورى هاي السنين الطويلة اخاف لا اني صرت بالنسبة اله مجرد ماضي وانتهى هاي اذا عايش ورى الطائفية لو حروب ميليشيات النسمع بيها

- والله المثله عتوي بسبع ارواح يموتنا وما يموت و اذا يحبج صدك ميحملج مسؤولية الماضي انتي شنو ذنبج ضحيه... 

غمضت عيني بقهر همست

- اني لا تبررين ذنوبي وخطاياي انت اكثر وحدة تعرف شكد جنت سبب بدمار.... 

سكتت مكملت لاني حامله على كتفي كل اخطائي حتى مع صديقاتي..

جريت نفس اكمل

: اذنبت الخوف الرهبة مجان موضوع سهل حتى اقاوم تتوقعين راح ينطيني عذر لج مشفتي اخر نظرته الي اااااااخ لو من شفته من الشباك باليوم الي اقتحموا بيتنا تعمد رمى على شباكي بس لمحني لج حاقد عليه 

ظليت ابجي بعلو صوتي واشهك همومي قهر

: كافي سنين تتهربي من مواجهة الماضي سنين وانتي بقوقعتج بس تعالجتي و خلاص الصار صار لازم تواجهي ماضي 

حاولي تتصلي بي لنفرض تزوج خوما يبقى شتتوقعين ينتظر المستحيل ديلة عاد جيبي الاسم كامل نسيت اسم ابوه و جده اسمهم نسيته جان اسم مميز اذكر 

هسه ادور كروب الخريجين الي مثله ما يهتم يسجل حضور بكروبات تخص الخريجين والتعليم تذكرين جان مجتهد وصاحب كاريزما وحضور رغم من طبقة فقيرة جداً و شكلة عادي كولش حتى بأختيار ملابسه. 

سدت المكالمة واني مأيسه وين تلكاه التهيت انظف وارتب وراها نوبة من ألم اجتني تمددت انتظر رحمة الله تخلص موجة الحالة شوي ارتخت اطرافي تنفست بعمق وألم مثل ضرب ابر بكل جسمي

لو تدري بلي تعرضتله هم تلومني رجعت ابجي خايفه شوي و صوت مسج وصلني دزتلي رابط بروفايل الفيس بوك وصوره اله دزيت بصمه صوت

: قبل لا افتح بروفايله شتكولين متزوج! نساني اكيد مو؟ معقولة نسى ذيج الاشواق و اللهفة و العشرة الملحكت نتهنى بيها...

دزتلي بصمة 

: فتحي بروفايله تعرفين كولشي يله حبيبي اروح عدنا مقابلة مع الباحث الاجتماعي خايفة من ورى اعصابي الي ما اسيطر عليها لا يوم يحولونا محكمة الاسرة واخسر ابني بصفتنا عائلة مفككه مشتته غير ملائمة لتربية طفل

ضحكت ودزيتلها بصمة ابتسمت بحنين اشتياق واني ادخل رابط البروفايل واقرأ اسمه

: كبل لا اكلب ببروفايله و الله جبتي هاي المرة ركزت بالصورة كلش عكس مساع شكله العادي الوسيم نفسه بس مبين وضعه المادي متحسن ملابسة مبينه غالية

وجهة مرتوي بالراحه جذبني نظرة المرح والبشاشة بوجهة و بعيونه تبدلت لنظرة حزن و قسوة وملامح حادة جامده

اي حسيت نظرة حادة كأنما متوجهة الي بلعت ريكي بخوف ومرت بيه مشهد اقتحامه البيت وهو مسلح.. 

رجعت اعاتب يا ترى هم جانت سنينك قحط مثلي وهم انظلمت لو عايش متونس وكدرت تتعايش و تكون عائلة من جديد

غمضت عيني وابتسامه رحمه البريئة جافتني هزيت راسي بكل قوتي اشهك غصتي وايدي اضغط صدري حيل وجع هنا جافاني

اكلب بالصور صور ببلدان الظاهر متحسنه حالته ما بعد سقوط نظام سابق ارتفع احوال ناس وناس اخرى نزلت حالتهم شياكه و اناقه 

رجفة بگلبي اخذتني و تنفسي ضاق مدري شبيه اخذت كوب المي يمي كعيته كله واني اقلب صورة قديمة تصوير كامرة عادية قبل ظهور النت ناشرها وكاتب بوست 

«انا و طيفي من ذكريات ماضية»

وذاكرتي بنتنا بقت عندي سنه يمكن مدري سنتين وسعت عيني حيل هنا صورتها كبرانه كد عمر سبع سنين

حسبت يعني هلصورة بعد سقوط النظام بكم سنه شنو هي مو ماتت لا خاف مو هي خاف اتزوج وخلف اي بس هاي تشبهني هواي

الشك و اسم الطفله اكدلي استغفلوني وبنتي عايشة الصورة لابس عسكري شايل «بنتي» حاضنها همست بنتي عايشة...! 

لمست صورة«بنتي » بيد ترجف و شهكات وجعتني رحت كبل للتعليقات و منا اكتشفت بنتي مماتت 

احس بملوحة يم شفتي رفعت اصابعي و بطرف صبع السبابة المبتور لمستوى سلامية واحدة.. 

مسحت دموعي واني احترك انچوي بنيران ماضي و تراجف واهمس مشتاقه ااااااااااااااخ صرخه مني صادفت مع اصوات العاصفة ما ميتة بنتي عايشة

ظليت للفجر محتارة اراسله لا اخاف بس بنتي شلون بيه سنين ميتة بالحياة سنين متت وراها وتطلع عايشة! 

لمن قررت بحساب وهمي واسم حركي دزيت طلب صداقه راسلته مرحبا ممكن نسولف.. 

خرب غيرتي هسه شيكول زاحوفه انتظرت لا هو الوافق طلب صداقتي 

و لا طلب المراسله و بقيت معلكه بخانه طلبات رسائل 

مثل حياتي التعلكت سنين بخانه مقبرة الاجتثاث بالمختصر انضربت بوري ابو اربعه انج

سحبت صورة من حسابه و صوره هو و«بنتي» و اني افكر اطبعهن و اخليهن بغرفتي والصاله احسهم عائلتي ولو من بعيد يسلون وحدتي

مرت شهرين واني اراقب ستورياته بصمت ما وافق على الصداقه بس تابعته ومحتارة برجعتي للعراق بنتي عايشة اذا خسرته لازم استعيد بنتي

رجوعي يكون لاجل بنتي اما اهلي فصاحبتي عدهم بيت بلاين اهلي كل فترة اقاربهم يستلم الايجار يحوله لأم صاحبتي وصيتها مرة يسأل عنهم وعرفت راجعين للوطن بس مصارتلي جرأة اواصلهم بعديش بعد ما جنت سببب دمارهم... 

ظليت لشهر بين اريد اطلع من اجتثاثي واشگ الكفن و ارجع للحياة لبنتي اطلب الغفران من اهلي هسه شكد عمرها ياربي ظليت احسب واني ابتسم كبرت واني بعيدة

نزلت دموعي صار حسابه هاجسي كل يوم اتابعه بنقالي بلكت ينزل شي تطلعلي تعليقاته لأني تابعته 

بس شعجب ما حضرني او وافق صداقتي وسأل شريد منه زين شنو هاي الجرئة العندي انطي لايك لكل تعليق اله هواي يعلق عالحكومة ومعترض على سياستهم

شوي اشعار نشر منشور بساع ضغطت عالاشعار و اني مصدومه انهاريت بي صورة طفل رضيع وكاتب بالبوست

«من بعد سنين انتظارك ابارك لنفسي واهلي ولادتك من بعد سنين علاجات نور حياتي وليدي سندي رحبوا معي بسند»

غضبت بداخلي سنين عايشة ميته وهو عاش حياته و اني الخسرت اني الي خسرت رغم احيته حسيت احساس المظلوم انسرق مني كلشي هو وبنتي وحتى الصبي المفروض اني اخلفه صاروا كلهم بخت وحدة ثانية غيري

رجعت بريك ستوووب احييته؟ ليش منو دمره بررت بس اني شعلي والله هم ضحيه جنت

لزمت بلوزتي الهاينك من الرقبه احاول اوسع مجال اتنفس ورى ما حسيت بوادر اختناق عضلاتي تشنجت ورعشات شهكات و تدرر لا ارادي واني اتمرغث واكعه بالكاع ثواني و هدأت النوبة..

و حسيت الم بعضلة القلب عرفت راح ادخل ذبحه صدرية زحفت للتلفون و دكيت على طواريء الاسعاف و بلغتهم   

لمن صارت الدنيا سودة بعيوني واظلمت الاماكن مثل ظلمه الي لمست روحي سنين 

ايد لزمت ايدي حيل نبهتني من ظلامي و ريحة مألوفة تعودتها من وكعاتي ومن شغلي ريحة مستشفيات فتحت عيوني وجهها بوجهي شوي يطخ الخشم بخشمي ما تبطل هاي سولتها باوعت لصاحبتي سندي بغربتي

: اني متت مو؟ هم لاحكتني للبرزخ استغفرك ربي 

ضحكت و جرت خشمي حيل.. 

: لا ما تموتين انتي قوية ذكري الله

: بنتي عايشة اوف بنتي ولج عايشة هسه يعني عمرها شكد

نزلت دموعي... 

: حبيبتي هسة طفلة مراهقة... 

شوي و باوعتلي بمشاكسه رفعت ايدها بتراجديا واني اباوعلها بغضب

: من وكعت وكع عليه كوب القهوة شوفي ايدي فقعت تشوهت ومنا الذبحة صدرية ألم بالتنفس.. 

نزلت شفتها لجوة تريد تنسيني الأمي 

: لج دراما دراما دومج تحبين الدراما ششوهتي هن فقاعتين بيدج والدكتور اكد مجرد اغماء بسبب صدمة وانتي مصابة ببرد ماكو ذبحة صدرية

ظليت ابجي : يوجع.. 

: ديلة عاد عبالك ممجربة وجع اكبر من هذا كبرتي على التنعوص

: لا شنو كبرت بعدني ترى والله شنو شفت من حياتي لتكولين عليه كبيرة و لا تذكريني بالماضي واوجاعه هناك متت وهسه اني قيد الموت لا شنو موت لازم اعيش بنتي عايشة ولا مصدكه روحي

ضحكت فرحانه.. 

: الله خبر بنتج فرحني بس موتيني بسلبيتج يا فقعت يا تشوهت يا ذبحة صدرية كلشي ما بيج مجرد اغماءه كولي يا الله مو كتلج تحبين الدراما ولج كم فقاعه هن يطيبن تدرين ايدج ام الفقاقيع بشنو تذكرني

رديت بفضول

: بشنو..؟ 

: بفالول من جنا صغار تذكرين الفواليل الطلعن بيدي

 

شفتها اشمأزت من الذكرى ضحكت

: واو بنت باشا عيان شبيها عيني هن كم فالولة من جنت العب بالدعاميص (فرخ الضفادع)

: كبر لفج يا ام الوسخ الطم هسه شذكرتيني ام الدعاميص من كتلج شنو بيدج بكل ثقة تكلي فالول مال دعاميص ام العكاريك

تقربت من جربايتي وسعت عيوني مستغربة شتريد تسوي دنكت تقربت من وجهي حتى راد يطخ خشمها بخشمي وكالتلي اكو سر واريد اتخلص منه افضفض

: اريد اعترفلج اعتراف كلش خطير

: شنووو؟ لكيتي باقي شلتنا شلة السنافر... 

و ذكرت اسم اعز صديقه من صديقاتنا بس رد صاحبتي صدمني..

: لا ولج يا نعال وين الكاها هاي اختفت بس عندي اعتراف مهم والله وقديم عمره دهر

: الله يستر شنو كولي؟! 

باوعت لأيدها وهمست

: مو تلعب روحج ذمة مذممتج لا تلعب روحج

وسوست منها 

: الله يستر ولج احجي ظل بالي كلش شكو؟ 

: سر كبير مو مال احجيه هيج دخل اجي اشاورج

بفضول 

: اي موافقة شاوريني بس خلي افهم شكو يا ستار

تقربت من اذني و خشنت صوتها بصورة وحش زومبي

: هو فد شغلة لا هذا لا ذاك ولا حتى اولئك

صحت : دحجي وفضيها شنهاي. 

: الطابك سمك الجنت اعزمكم عليه فروخ السمك الجنت اصيده من النهر واطبخه بالخبز واسويه لفات الكم تكولون طيب تدرين شنو طلع

طلع دعاميص العكاريك وجنت مخدوعه بي عبالي فرخ سمك لو ما حسن ينبهني

لا تتخوئي لج بس لا تردين تتقيئي يعني الفالول مو لأن العب بالشاخة (بركة مياه صغيرة ضحله)

يا ويلي يا يمه غير روحي طفرت من خشمي غير احس الدنيا فرت بيه

غير اذا عدت ما صابني ذبحه من وكعتي هاي المرة من ام العكاريك ردت انجلط دفعتها لعبانه روحي 

: نعلااااا هو شلون قنعتيني اكل وياج خرب غيرتج لج راح اتقيأ هسة سالفه قديمة شذكرج ولعبتيها لروحي.. 

: لا تنقهري وتضوجين يلة بروتين وكولاجين 

: اششش عزا بعينج يومها اذكر تمرضت تسمم وامي ترزلني تاكلين من اماكن قذرة طلعت من ورى سمجاتج

: قصدج عكاريكي

: استغفر الله بس ولج عمي منو خابرلج ما اريدج طلعي برى

: انتي مخلية رقمي للطواريء واتصلوا بيه.... 

: امشي طلعي برى يلة فوك ضيم الحرق تلعبين روحي.. 

    

بقيت عند صديقتي الى ان اطيب 

يمكن هذا الشهر شهر رجوع للماضي.. 

كالعادة اقلب بالفيسبوك واتبع تعليقاته نشره هاجس صار بحياتي وروتيني اليومي

 اجاني اشعار نزلت صديقتي ام لين منشور زراعي فعلقتلها و ظليت اقرأ اراء الناس وتعليقهم شكيت بحساب علق لأم لين.

باوعت لصاحبتي ومديت راسي هم دتابع تعليقات وعيونها مضيكتهن هاي من تسوي هلحركه يعني لزمت شغله

: خير؟ 

باوعتلي... 

: ام طيوفه الحاسة السادسة بدت تشتغل و خشمي صار يحكني معقولة هلتعليق لأم ياسر

اشرت بنقالها لتعليق مديت راسي... 

: مممم ممكن اي ممكن لا.. 

قريت اسم الحساب جان اسم وهمي على اسم مسلسل رائج بذاك الوقت... 

التعليق كان «والنعم من مهندستنا بالتوفيق احلا مزروعات حياتي.» 

: حدخل ابحوش حسابها بلكت نصيد ام ياسر المختفية.. 

ابتسمت

: النعال ضحكت لان ذكرتها شنو نعتتها سابقا. 

: والله عليج سوالف ممم حساب سلبي وحزين... 

هنا الفضول من كلام صاحبتي خلاني افوت لحساب البنت واني ادور كله سلبيه ونشر حزين و عن الغدر..

دخلت للي يعلقون اكيد اولادها هسه شباب هي اول وحده بينا تزوجت من قبل لا تدخل جامعه

بس الي شفته معلق شاب اسمه باهر.. على صورة البروفايل تعليق باهر كان

«لو ورودك بيضاء تليق بقلبك اكثر» 

همست صاحبتي

: وهذا باهر منو بلة....

نقلتلي الفضول منو هذا هم دخلت حسابه والكف من اصدقاءه شخص اعرفه كان شخص مهم لام ياسر حب اولي.. 

: شنو ما فهمت معقولة رجعت العلاقات المنقطعه وهذا باهر طلع ابنه زين لويش ديعلق لام ياسر.. 

: منو يكول هاي ام ياسر يجوز هاي زوجه الشخص الجان حبيب ام ياسر و باهر معلق لأمه.. 

باوعتلي

: زين هاي منين تعرف ام لين اذا هي مو ام ياسر.. 

كولش فضولي هنا اشتغل... 

صاحبتي : شو دخلي ارزل ام لين و ادكلها مكالمة.. 

ظليت صفنه بصاحبتي الي اتخذت الهجوم والاتهام وسيلة دخلت دغري عالبنت.. 

: ليش ولج ها ليش.؟! 

فتحت المايك حتى اسمع. 

: سلام قول من رب رحيم شبيج. ومرض؟ دومج ملكوفة! 

: الي علقتلج هاي بت خالتج لا تكولين لا بس استغربت ولد اسمه باهر و من فتحت حسابه لكيته معلق لشخص نعرفه كلنا تذكرين....

و ذكرت اسم الشخص و كملت.. 

 

: رغبتها و هي جانت ما تتفاعل بالفيس استغربت علقت يمكن نست انتي و ام طيف بينا صداقه...

 

: طز بيج و بيها نكارات وفى شو ما فهمت علاقتها بالشاب احس هنا بعقلي صار اصطدام سيارة بشاحنه هي ام ياسر لو اني ناسية اسم ابنها

: نطيني مجال احجي عزاا لوك لوك لوك كله هذر كلام.. 

 ما انطتها مجال.  

: شنو ضامه علينا ذيج العوبة شنو عود ما تريد نتواصل... 

دزت صاحبتي طلب صداقة لام ياسر ما جاوبت عاد راسلتها رزالة ناشفة جدا خلي ابقى معلكة بالطلبات بس اهم شي ارزلها

يمكن ام لين حاجتها عاد للعصر واني ببيتي اجت موافقة عالصداقة ورد عالرسالة. 

 

: اني تدمرت حياتي اعتذر موقفي

وخابرتلي جريت نفس بعدني معصبه فتحت خط بس ما حاجيتها.. 

: هلو اعتذر منج على برودي بس بنت خالتي مالها ذنب لا تلوميها البيه مكفيني وحياتي عبارة عن حطام واني الي رفضت تنطيكم اي رقم او حساب الي 

: كلنا ترى مرينا تجارب كلنا ترى ليش اكو اكثر من الصار النا كلنا مو بس انتي تحطمتي بس ما نكرنا وفى ولا صداقه..

 

: اعرف كولشي عنكم حجتلي ام لين.. عنج و عن ام طيف احنا انحس شلة شلة سنافر منحوسه... 

و بجيت..

: كولي ياالله شنو هاي السلبية العندج يا ام ياسر

: ياسر ؟! 

وشهكت و هي تكمل 

: كافي الصاري دمر ثقتي بكل البشر

لو تعرفين قصتي عذرتي ابتعادي عن كل شخص نفسيتي مدمره

: كلنا مرينا بظروف بس ما نكرنا صداقتنا.   

انطتني لمحات عن الصار وسدته دون حتى متكول باي بس الحجته صدمني كلش بقيت مصفنه..

ام ياسر..... 

سديته و جان يدخل وكفت منتصبه بغضب 

: شلون دخلت البيت.. 

: الولد فتحلي باب ليش ممنوع ادخل بيتي..  

: اي ممنوع اطلع براااا 

: مكافي تعبنا والله وكبرنا كافي

اخذت المزهرية و ركضت هاجمه عليه 

وهو لزم ايدي بساع و دفعني واندفع وياي عالقنفه واني امر بهستريا

: عيشتني بوهم خبلتني انت وياهم ولك ليش عبالكم ابقى للابد واني مخدره العقل رجعت ورجعلي عقلي..

: اني حميتج وهاي جزاتها  

: هة.. كذاب لوتي قا،تل..

: ابد..

: اششش ايديك تلطخت بالد،م اشش

انقطع اعتراضي بشفايفه الحضنن شفايفي يسكتني عن الكلام دقات الساعة القديمه وحركة الرقاص وعيوني تروح و ترجع تتبع الحركة.. 

تركني انسانة رماد الخشب اذا احترق شيرجعه و الكلاص الينكسر صعب يلم. 

كمت من الجرباية واني اباوع لوجهي بالمرايه اكره روحي واكره كلشي بي هو لزمة حسيت بنفسي انكس طهارة..

التفتت للسرير وعيني عليه نايم شفايفه مبتسمه برضى شعره مبعثر خالطه شيب متناثر....  

كون افلش ابتسامتك مثل ما روحي تفلشت اكص ايدي من العكس اذا ما الك ايد بالصار... 

بخبال رحت جريت اللحاف حيل واني بيدي الزم ايده اسحلة اريد اشمره من جربايتي اريد اوخره عني عن مكاني عن بيتي اريد اطلعه ولك شهلزكه دعوفني عاد فتح عيونه وهو يصيح

: شنو شكو شبيج ناوية نلعب لعبة جديدة تعاي نامي حبيبي بعد وقت مشتاقلج والله... 

اول لعبة هي اميرة البيت لأن بيتج مو قصر حتى اكولج اميرة قصر.. 

ضحك

: للاسف القصر والفلوس مجرد احلام اليقضة صحيتي منها للواقع المهم طلعتي بس عفية خوش تلعبين يعني مثلا لازم اني احل لغز اللعبة وطريقه افوتلج للبيت هههه يلة اني فتت 

كعد استند بظهره على تاج السرير وخلا وراه مخاد اباوع لصدره العريان بنظرة اشمأزاز وجنه لكف نظرتي كال

: What 

رجع بالعربي

: شنو نظرتج هاي انهجم بيتج يارگة ولا جنج توج بين ايدي ذايبة..

هذا الشي غثني كولش 

: مستحيل اذوب بواحد منافق مثلك واحد اشك اله ايد بـــالصارلي... 

قاطعني وكف عالجرباية وبدل ما ينزل مثل الاوادم طفر هو اصلا ليش وكف خوب يكوم منها مثل البشر بس هو مو بشر اكيد يتصرف بهمجية شكد همجي يا الله همس وهو يطفر من الجرباي. وصاح يستهزأ

: قفز الأرنب

رد صفن بيه و احتدت عيونه و كمل كلامه

: تلمحين لموضوع خطير ويا حلوة الحلوات كبرنا و عقلنا فبلا تهم باطله والا... 

: دتهددني حضرتك.. 

: لا دا اسوي عرض ازياء الج.. 

حجاها وخلا ايد عالخصر و يمشي يقلد لعبت روحي من تصرفه... 

هزيت ايدي وطلعت

: بدل ملابسك ويلة برى رجاءا.. 

: على كيفج ترى اني ابو الجهال 

وكالها وضحكت غمضت عيني اعرف يلمح لشنو لليوم الي انتبهت لليوم الي صحيت و لكيت روحي بحياة غير حياتي وترني كلامه وجنه حس 

: صابر عليج وترى طلاق ما اطلقج تحلمين خلي بعينج حصوة ملح وكولي هذا ياما وياما جانلي وطن بزمن انباعت بيه الاوطان.. 

سكتت..  

: عايفج براحتج بس يا بعد گلبي لا تحمليني شي مالي ذنب بي اني اصلا الفضل يرجعلي انتي عايشة.. 

رجعت باوعتله و سكتت واني اواسي حالي لا تشكو جرحا انت صاحبه هو كل همه الانتصار كل همه حقق شي وهو انتصر علي ونفذ كلامه بيوم من الايام كالها..

«يجي يوم ماكو سبيل ابد الا اني تذكري كلامي زين» 

دوم كلمته هاي خلتني بشك بي هو ورى الصار هو المنفذ هو الي يمكن انهى اجمل احلامي و اجمل سنيني انتهت بيده.. 

: دوم تكول سبيلج الي وتحجي بثقه لذا انت المشكوك بي الاول 

كلتها واني الملم البيت متجاهلته وهو مصفن بعيد هنا رجع لزم ايدي وهمس 

: صدقاً مالي ذنب حجيتها بساعه غضب بس متوصل بيه مواصيل اتحمل هيج ذنب ويبقى بركبتي ذمه و ادخل النار 

ضحكت باستهزاء

: ههههه وعاد انت من الديانه تخرخر منك دولي برى لازم معندك جلسة شرب و قمار وسوالفك مكسره

: ما اشرب استغفر الله استغفر الله انتي دواي وبيج اسكر المن بعد اشرب تاركه من زمان 

 

: بابا انت واحد ما تستحي... 

: وانتي هم لا كل شوي تكولين انخدعت بيك هي هاي حياتج و هذا الموجود و يطبني طوب اذا حنيت و الشرب تاركه من زمان بس انتي ما تصدكيني عبالك اشرب من وراج

حجاهن وعود زعل زعلتهم تلفتت

: وشعلي بيك رايحة طلابي ينتظرون من تطلع سد الباب و بعد لا تجي. 

طلعت وسمعت فشايره شوي و عود هم يستغفر ابو العرك.... 

: هذا بيتي و طاردتني ملكي بيتي وانتي و اولادي كلكم الي..

: ولا تصيرلك جارة الاعوج اعوج.. 

سديت الباب و رحت لغرفة بنيتها بالحديقة للدروس الخصوصية احلم بيوم من الايام افتح مدرسة اهلية او معهد مدام انحرمت من التعين.. 

كعدت انظف الصف اليوم عطلة بس بكروب نزلت رسالة يجون حتى ندرس

وهاي اني هم مستفادة امارس مهنه انحرمت منها و دامارس تدريس خصوصي.. 

سمعت صوت السيارة باوعت من شباك الصف اووف راح الله لا يردك ولو طلابي التجي الي بفضله هو مكدر انكر فضله.. 

شوي بدوا الطلاب تتوافد و بديت الروتين اليومي ورى ما فاتت ثلاث ساعات صرفت الطلاب وبقيت اصحح اوراق الامتحان الي امتحنتهم

دك تلفوني ابتسمت لأسم المتصل.. 

: اتأخر لايظل بالج من المدرسة ورى الدوام اروح اني وجماعتي معزوم يمهم 

: والله اخاف عليك 

: لا تخافي..  

: الوضع مو امان ولد الحرام هواي..  

: لتخافين علي اني نجر على ابويه..

عقجت وجهي وهزيت ايدي و كملت مكالمة..

: اعرف وسواسية عبالج اتعلم دروب الشرب ترى اني تربيتج لا تخافي....

شوي ضحك من حس بعدني بخوفتي   

ضحك

: شنو يمة خايفة علي وين عايشة يا زمن جنج ب ٢٠٠٤

سكتت دون قصد ابني رجعني لذيج السنة شهكت

: الو.. الوو..  

سديته وايدي ترجف بلعت غصتي و حشرجت بلعومي واني ارجف بساع طلعت حبوب الضغط..

و اني كوة استند للحيطان و مر طيف مجرد طيف يوم الفتحت الباب و استلمت ذيج الگونية خليت ايدي على صدري و اني اجر نفس كوة ومحسيت الا وكعت.. 

 

(ام لين...) 

صوت الدي جي العالي ازعجني رحت كمت بكل همة لغرفة بنتي فتحت الباب رفعت ايدها الي بعلامه هلو

واستمرت ترقص زومبا اجت سحبتني 

: يلة ماما ترى الشحوم باردافج تاتنفجر

وخرتها 

: انجبي ادب سز ترى اليوم عطلة وانت ضوضاء اريد ادرس.. 

: يعني قررتي تكملي دراسات.. 

: اي 

: واذا بيوم طلب المستثمر نفرغ البيت

ابتسمت واني افكر بالمشتل الي ديزدهر وكلام العم برواش ومديحه الي بينلي ذول مستحيل يتخلصون مني

: مراح يستغني عني لأن المشتل وارده قوي و هو مبين طماع من مشاريعه السكنية مستحيل يتخلى عن كفاءتي 

واذا على البيت نأجر اني مدخرة اموال من صاحبنا المجهول و راتب عدنا غير راتب الرعاية تدبر ماما وين جنا وين صرنا جنا حسرة اللكمه من بعد دكة ابوج النذل.. 

تغير وجه بنتي و عضيت شفتي..  

: اسفة يبقى ابوج..  

دنكت بنتي ووجهة تغير وحتى مودها طفت الديجي و طلعت كتبها تكلب بيهن 

: ماما اذا تطلعين سدي الباب وراج عندي امتحان وفرصة عطلة خلي اركز بأمتحاني.. 

باوعتلها و سكتت سديت الباب واني اسمع شهكه بجيها اعرف تنجرح هواي من اجيب سيرة ابوها واعرف عدها ذكريات عنه ومتقبل احد يحجي عليه 

بس اني هم لازم تعذرني ابوها رجعني قرن لورى ابوها دمر حياتي لو الزمن يعود الا اشرب من دمه.. 

اخذت جنطتي وطلعت كالعادة الحارس انطاني ظرف

: ست هذا الج.. 

: كالعادة ينرسل بيد مندوب مو؟

و ميقبل يفصح عن جهة المرسل.. 

: اي هاي المرة دراجه والله اشك بي مندوب جائز هو نفسة المجهول و متنكر.. 

ضحكت على خيال الحارس.. 

: اوك سواء مندوب او مدري منو المهم شنو الغاية من هاي المساعدات و ليش ومنو هذا..  

تركت الحارس دايخ مثلي بصاحب الرسائل الغامضة امشي بممر مقرنص من كم سنه بلطه المستثمر

واني افتح الظرف كالعادة مبلغ مالي وحسبته بي زيادة و قريت القصاصه. 

(اجمل خطوة نسير الى الامام ولا ننظر الى الخلف ان نخرج من الركام الى مستقبل واعد تحياتي لكِ حلوتي «ذات العيون الذهبية». 

قربت القصاصة الصغيرة كالعادة انيقه و مزخرفه و بيها عطر مميز ما انكر احيانا تمر بيه ظروف الاموال هاي اصرف منها

رغم مضايقه من الي يعتبرنا اجر وثواب و ديتصدق علينا بس كلامه كلام شخص مثقف كولش.. 

شفت اليوم عمال تشتغل رغم عطلة

واني اتمشى لمحت سيارة و توة صعد رجال داخلها ملحكت اشوف ملامحه زين 

بس استمر بداخل سيارته يحجي مع العم برواش وهو ماد ايده يأشر تجاه الدونم الي متروك مهجور من سنين و سابقا جان حضائر 

هذا الدونم موقعه بعيد عن الدونمات الي تحولت الى سكن يمكن ناوي يرجع امجاد تربية الحيوانات خاصه بعيد عن ازعاج سكان البيوت.. 

قربت اوصل للسيارة بفضول اريد اشوف هذا المستثمر الي تصادف جياته واني برى البيت 

وصلت وسلمت جان رجال عجوز ابتسم الي و باوع للعم برواش بس جان شكله مألوف و بعينه لهفه

ظليت صافنه وين شايفتك يا وين؟ 

: هاي مهندستنا المبدعه برواش عين مكافئة للست على الابداع بالمشتل

ابتسمت وتشكرت المستثمر ركزت بعيونه مالوفه وانطيه بالعمر ٧٠ سنة.. 

: العفو استاذ اني يمكن اعرفك مدري وين شايفتك؟ 

بس سكت و التفت يدور بعيونه

: ابني تأخر و لازم نروح... 

: هذا ما صدك يشم ريحه هاي الارض ومعرف وين راح تأخر وورانا روحه للبنك نسحب رواتب الموظفين و راس مال المشروع الجديد. 

بكلبي كلت ناس فايخه ترخصت و مشيت بطريقي درت لجهة المزرعه الي مثل توقعي تتحول هاي لاستثمار تربية الحيوانات مورد زين للحوم والبان.. 

و قررت امشي للحضائر واني بين ضلوعي قلب مكسور ذكريات وي كل خطوة كم سنه اتجاهل هاي الاماكن

كم سنه اتجنب اجي هنا لأن الي بيهن ذكرى مؤلمه مرت بخاطري ذكرى من جابوه لبيتنا و لمحافظتنا

بعد مجزرة قرية بمحافظته بالثمانينات جان بوضع نفسي كولش صعب و عنده بعض الحروق ونظرته للعدم منطبعه بعقله الجثث المرميه و الوضع التركه بقريته

يومها اني طفلة اقتربت منه واني امد بيدي رغيف خبز رقاق النسويه بالشمال باوع للخبزه يومها و رجع دنك وهو يشهك 

ويباوع لعمي الي تكفله 

: بعد ماكو اهل.. 

جاوبه عمي

: اني اهلك..   

: ابويه عايش؟ ماكو جثته.. 

دنك عمي وباسه 

: اني ابوك.. 

كلامنا كوردي احنا اكراد هذا الوطن

و كان الولد من عشيرتنا بس من سكنه غير محافضه 

هزيت راسي و رجعت اباوع الى مكان الحضائر و حياتنا قبل و مراهقتنا و حتى الصار  

شهكت مختنكه بالذكريات خاصه من تذكرت ذاك اليوم الي انكسر بيه قلبي 

حسيت على روحي اصيح بكل قوة كل بالي ذاك الوقت والموقف انعاد من جديد اصيح 

ما اسامحك ولك ما اسامحك خذلتني 

جريت نفس واني اشوف نفسي كاعدة بالكاع نفس المكان و من غير وعي اردد نفس العبارات المرت عليهن سنين طويلة

صوت العم برواش و المستثمر بقلق و فضول 

: بيج شي بنتي اجينا نركض على صياحج الكاع مهجورة من زمان وعبالنه عقرب لو شي لدغج

مدنكه عالكاع و اني اتنفس كوة تمر الصور مزدحمه داخلي بس صوت بنتي التبجي وتهمس

: جنت اريد اطلع وشفت العمال تركض وسمعت صوتج ماما بيج شي.. 

رفعت عيوني الها اطمئنها ابتسم بس الابتسامة اختفت من الواكف ورى بنتي وهو يهمس بصوته البيه نبرة عميقه تحسس المقابل بمثاليه هذا الحقير..... 

الفصل الثاني من هنا