رواية جثة نعمات كامله جميع الفصول بقلم محمود الأمين
انا ايمن عثمان ظابط في قسم داخل مركز باحدى محافظات الصعيد، مش مهم محافظه ايه ومركز ايه؟!
اقدر اقول ان المكان اللي انا فيه من اقل الاماكن اللي بيحصل فيها جرايم.. كل البلاغات اللي عندنا بتكون عن سرقه، او اتنين ضربوا بعض في الشارع او واحده جوزها ضربها
كلها حاجات سهله وبسيطه خالص.. عشان كده القسم غير مؤهل تماماً من ناحيه عدد العساكر والرتب والصف
وفي الحقيقه دي حاجه كانت مريحاني جداً، لحد ما في يوم يجي بلاغ عن جريمه قتل في قريه تابعه للمركز ده
اخدت القوه المتاحه من القسم واتحركت على مكان البلاغ، اللي بلغ بيقول
انه كان متعود يعدي كل جمعه على ست كبيره اسمها نعمات ويعطف عليها بمبلغ مادي خصوصا ان الست دي اهلها مش بيسالوا فيها ولكن الجمعه دي راح عند البيت وفضل يخبط كتير ولكن ما حدش فتحله الباب، في البدايه افتكر ان الست مش موجودة ولكن لما قعد شويه قدام البيت وهي ما جتش بدأ يقلق خصوصا انها ست كبيره وحركتها قليله
فرجع تاني يخبط على الباب يمكن تكون نايمة ولكن برضو مكانش في اي رد!!
وساعتها الشاب ده قرر انه يكسر الباب لعل وعسى تكون الست دي تعبت او حصلها حاجة ولما كسر الباب ودخل لقي الست على السرير ميته وفي البدايه افتكر انها ماتت موته طبيعيه لكن لما قرب وبص على الجثه كويس شاف اثار واضحه على الرقبه، والاثار دي كانت عامله حز الرقبه وموضحه الخنق كويس، ووقتها الشاب ده بدل ما يبلغ اهل البلد قرر انه يبلغنا احنا
وصلنا لمكان البلاغ، وطبعا الشاب كان بلغ اهل البلد بمعلومه ان الست نعمات اتقتلت وانه بلغ الشرطة وعشان كده اول ما وصلنا قدام الباب لقينا اهل البلد كلهم متجمعين وطبعا لقلة الامكانيات في القسم وفي المركز عموما، بلغنا المديرية واللي بدورها كلمت الطب الشرعي والمعمل الجنائي وطبعا دول خدوا ساعه على ما وصلوا من المحافظه لحد القريه اللي حصلت فيها الجريمة
في الساعه دي انا دخلت البيت بعد ما فضيت اللمه اللي كانت واقفه قصاده.. البيت بسيط جداً من بيوت زمان مبنيه من الطين
ولما دخلت الاوضة شوفت جثه الست نعمات، ومن النظره الاولى كده هي ست في الستينات من عمرها لابسه جلابيه سودة من بتوع زمان وباين عليها الفقر فعلاً.. يعني الست دي ما حالتهاش اي حاجة ودي طبعاً نظرة تقديرية مني ان القتل هنا ما كانش بدافع السرقة.. الست دي فقيرة يعني ما عندهاش اي حاجه ممكن تتسرق!.. ممكن يكون القتل تم بدافع الانتقام مثلا
...
بعد ساعة وصل المقدم عزت عبد الغفار ومعاه رجال من الطب الشرعي ومن المعمل الجنائي وعربيه اسعاف عشان تنقل الجثه للمشرحه بعد المعاينة دخلت رجاله الطب الشرعي لفحص الجثه ورجاله المعمل الجنائي لمعاينه مسرح الجريمة
واسيبكم مع المقدم عزت يكمل الحكاية
اول ما وصلت لقيت قدامي بيت صغير ولما دخلت شوفت العفش اللي جوه البيت اتفقت مع وجهه نظر الظابط ايمن ان القتل هنا ما كانش بدافع السرقه، ولكن واحنا بنتكلم طلبني دكتور الطب الشرعي الدكتور هشام ولما دخلتله
لقيته بيشاور على ودن المجني عليها واتكلم وقال
_ رغم شكل البيت والعيشه الفقيره، الست دي كانت لابسه حلق واتاخد منها وواضح انه اتاخد بالقوة ده باين من الجرح اللي في الودن الصغير ده.. وكمان الست كانت لابسه غوايش في ايديها، الاثار بتاعتها واضحه في الايد جداً
= يعني ممكن القتل يكون بدفع السرقه بس؟!
_ ممكن طبعاً.. ولكن مش اكيد يعني ده بقى تتاكد من ان انت يا حضرة الظابط في التحقيقات
= تمام يا دكتور هشام، اكيد كل حاجه هتبان في التحقيقات
...
دخلت لجوه البيت شوية ولقيت مكنه خياطه واضح ان المجني عليها كانت بتشتغل خياطة وده بيفتح احتمالات لحاجات تانيه خالص
خياطة معناها ان في ناس كتير كانت بتدخل البيت عندها، وده هيوسع دايره المشتبه فيهم.. ولكن في التحريات هيبان مين المشتبه فيه ومين اللي لأ
وكان لازم قبل ما اتحرك وارجع تاني على مكتبي في المديرية اني اتكلم مع بعض الجيران ومع الشخص اللي بلغ، وبدات مع الشخص اللي بلغ
_ اسمك ايه؟
= عماد يا فندم
_ انت تقرب ايه للمجني عليها؟
= في الحقيقة يا فندم انا مش من قرايب المجني عليها، والدتها الله يرحمها كانت بتخيط عندها الهدوم وقبل ما تتوفى وصتني عليها وانها ست وحدانية وابنها الوحيد سايبها من زمان مش بيسال فيها، وطلبت مني كل فتره اروح واديها مبلغ مالي صغير تساعد بيه جنب شغلها، بس انا كنت بعمل كده كل جمعه وكنت بسمع منها احلى دعوه يا فندم ربنا ينتقم منه اللي عملها
_ طيب بما انك كنت قريب منها كده، تفتكر مين اللي عمل فيها كده؟!.. يعني هل الست دي عملت مشكله مع حد قبل كده قدامك او في حد عاوز يأذيها؟
= خالص يا فندم، الست بس كانت عاوزه ابنها يسال عليها هي دي الحاجه الوحيده اللي كانت بتضايقها وكل ما كانت بتسمع سيرته كانت بتعيط
_ طيب تفتكر ابنها رجع مثلا وطمع في الحاجه اللي معاها وقتلها، وقبل ما تستغرب بتحصل اليومين دول كتير
= ما اعتقدش يا فندم ان ابنها اللي عمل فيها كده، هو مسافر القاهره من زمان.. اتجوز وعاش هناك واتبرى منها
_ طيب يا استاذ عماد، احنا هنستدعيك طبعا عشان ناخد اقوالك في محضر رسمى او بمعنى اصح هيستدعوك في القسم بتاع المركز تمام
= تمام يا فندم انا تحت امركم
...
وبعد ما خلصت معاه الكلام.. اتكلمت مع كذا حد من البلد وعرفت ان في واحده كانت بتيجي تساعد الست نعمات فى نضافة البيت واسمها امينة، عرفنا عنوانها وتم عمل استدعاء ليها والمفروض انها هتتعرض علينا في المديرية، لكن المحضر اللي راح عشان يسلمها الاستدعاء راح وخبط على الباب كتير ومحدش فتح ولما سال الجيران.. قالوا انها رجعت فجر الخميس ومن ساعتها ما خرجتش تاني وان ده من عوايدها هي مش بتخرج كتير، طيب مش بتخرج ماشي مش بترد ليه؟!
وهنا كانت الكارثة عشان لما راحت قوه من القسم على بيت امينه لقيوها مقتولة هي كمان ب 11 طعنة ده غير الكدمات اللي كانت على وشها.. والسؤال كان هنا
هل في رابط ما بين الجريمتين.. ولا دي مجرد صدفة؟!
عملنا تحريات عن الست نعمات وامينه وفي نفس الوقت قدرنا نوصل لابن الست نعمات اسمه خليل ولما عرف ان امه اتقتلت جه عشان ناخد اقواله خصوصا لما عرف انه لو تغيب عن ده هيكون متهم في القضية
وبدأت تحقيق معاه
_ استاذ خليل، على حسب التحريات اللي قدامي حضرتك منقطع عن زياره والدتك من زمان الموضوع داخل في ست سنين
= دي امور عائليه بيني وبينها، المرحومه كانت رافضه الجواز من البنت اللي انا متجوزها حاليا وانا ما كانش ينفع اسيبها
_ فاخترت انك تسيب امك وتتجوز البنت اللي بتحبها، طيب على الاقل كنت اسال عليها
= للاسف هي صدرت للناس اني شيطان، رغم اني حاولت كتير اسال عليها بس هي اللي رفضتني
_ طيب بعيدا عن الامور العائليه، التحريات بتقول انك سافرت صباح الخميس من القاهره للصعيد بس ما قدرناش نحدد وجهتك كانت فين بالضبط؟.. ممكن تقولنا انت نزلت الصعيد ليه يومها؟
= انا بشتغل مهندس عقارات، وليا شغل في جميع محافظات مصر وانا نزلت الاقصر كان معايا شغل هناك وتقدر حضرتك تتاكد بنفسك من صاحب الشغل ده
_ اكتب اسمه وعنوانه هنا ورقم تليفونه
= تمام يا فندم
_ وبعد ما خلصت شغلك رجعت على القاهره على طول؟
= ايوه، خلصت على المغرب وركبت ورجعت ووصلت على الساعه 5 الصبح
_ ايه المواصله اللي اخدتها عشان ترجع على بلدك
= للاسف ما كانش في قطر ساعتها، فاضطريت اركب اتوبيس ودي التذكرة
_ طيب يا استاذ خليل، تقدر تتفضل بس خليك عارف ان احنا ممكن نستدعيك تاني
= تمام يا فندم انا تحت امرك
...
ما فيش دليل عليه تماماً.. وعشان كده بدانا نواصل التحقيقات لحد ما وصل قدامي تقرير البصمات في الجريمتين
في الجريمه الاولى ما فيش بصمات في المكان، ما فيش غير بصمه المجني عليها والبصمه التانيه تخصها امينه ولكن بصمات امينه مش على الحبل المستخدم في الخنق
لكن الصدمه الحقيقيه في البصمات اللي في الجريمه التانية لدرجه ان فضلت متنح في التقرير عشان اتاكد اني مش شارب حاجه ولا بيتهيألى عشان دي تبقى بصمات...
