رواية ولنا في الخيال حب كامله جميع الفصول بقلم ملك ابراهيم
_فول!، هتشتغلي علىٰ عربية فول يا نور! وبعدين فيه بياعة فول معاها أيفون؟!.
_بصي يملوكة أنا لازم أشتغل وسيبت الشقه اللي كنت فيها علشان إيجارها غالي عليا وجيت لحارة، حارة يا ملك واديكي شايفة حال البيت، قِدرت بس أوضب الاوضه دي وأخليها بالشكل دا بأخر فلوس كانت معايا.
_طب المفروض تميم يصرف علىٰ بنتـ....
_مسمعش إسمه تاني يا ملك، دي بنتي أنا وأنا إللي ليا أصرِف عليها لحد ما تكبر وتشيلني هيَ، تميم برا حياتي من سنتين وأدينا مكملين من غيره.
_طب حتى تعالي عيشي معانا أنا وبابا وماما؟!.
_انتي سنه وخلاص هتتجوزي يا ملك، وبابا وماما مش حِمل مصاريف زيادة فخلاص، أنا هستقر هِنا بإذن الله وأربي بنتي وأفتح العربية إللي قولتلك عليها.
بصت ليها ملك وهيَ بتقولها بيأس:-
_زي ما تحبي يا نور، بس صدقيني مش هتسلكي في المكان دا، كله تجـ.ـار مخـ.ـدرات وصيـ.ـع، دي حارة شعبيه يا نور بعد ما كنتي عايشه في أكبر بيت فيكي يا إسكندرية، بقيتي فجأة كدة هتشتغلي بياعة على عربية فول!.
_وأشتغل الم زبـ.ـالة كمان بس أكل بنتي وبالحلال يا ملك، إنتي ضدي اه أو لا هعمل كدة، ولو بابا وماما عرفوا يبقىٰ مش هكلمك تاني.
_لا ياستي الله الغني، أنا هروح دلوقتي علشان سليم لسه مكلمني وقال هنخرج سوا.
_ماشي، ربنا يسعدكم يا حبيبتي.
ومشيت من قصادها، فضلت نور تبص عليها لحد ما مشيت وهيَ بتفتكر الذكريات، كل حاجه مرت بيها ليه مكملتش.
فاقت ونفضت الافكار دي من دماغها وشافت ليليان واقفه بعيد مستنيه تروح ليها وقالت ليها:-
_تعالي يا ليو قوليلي حبيبتي عاوزة ايه.
_مامي، بابي وحشني أوي يا مامي هو هيرجع إمتىٰ.
_بابا مش راجع يا ليليان، مشي ومش هيجي تاني، لازم نتعود على غيابه، أوعدك يا حبيبتي إني هكون أُم وسند وعوض ليكي لحد ما تكبري وتسنديني يا ليليان إتفقنا؟!.
_إتفقنا يا مامي.
_حبيبة ماما يا محلية أيامي، يالا تقعدي هنا وهقفل عليكي الباب متتحركيش من مكانك لحد ما أرجع مش هتأخر عليكي أبدًا.
_حاضر يا مامي هشغل التاب واتفرج على الكرتون لحد ما ترجعي.
_حبيبة ماما ربنا يهديكي.
وسابتها ليليان ودخلت اوضتها، مسكت نور القطة بتاعتها وقررت تاخد صورة ليهم سوا وكانت لابسه الهيد فون قبل ما تنزل لأول أيامها في شغلها إللي فرضته على نفسها، وسابتها ونزلت وهي بتقول:-
_يا فتاح يا عليم، يا رزاق يا كريم.
____________________
_زي ما بقولك كدة بالظبط، جهزت عربية فول وهتشتغل عليها من إنهارده، حساه عبث أوي بس مقدرتش اعارضها للأسف.
_أه، لا ليليان كدة في البيت، انا نزلت ومتأكدة انها نزلت ورايا.
_طيب خلاص هتعمل ايه؟!.
_ماشي، سلام.
____________________
_يا رب صبحنا وربحنا يا رب.
_عاوز واحد فول يا أبلة.
_حاضر يباشا.
_بس شكلك غريبه عن المنطقة هنا، حد نضيف كدة ازاي شغاله على عربية فول.
_النصيب، إتفضل الساندويتش، وتقدر تقعد على الترابيزة دي.
_تشكري يا أوستاذة، دا من ذوقك.
بصتله نور بإبتسامه خفيفة ورجعت تكمل شغلها لكن قطع كلامها وهي ماسكه المغرفه وبتحط الفول واحد بيتكلم وبيقول:-
_بقولك يا هندسه، انتي واقفه هنا بدون أرضية والمكان دا بتاع المعلِم عصام الطويل.
بصت نور ليه ورفعت حاجبها وقالت بمنتهى السخرية:-
_الطويل؟! طب وياترىٰ وهو جاي يقف قصادي، هيخبط في التندا بتاعت العربية؟!.
_خفة الدم دي يا جربـ.ـوعة تعمليها مع حد تاني غير عصام الطويل المعلم بتاع الحارة دي كلها وكلمته تمشي على أتخنها واحد فيها، وعلشان خفة دمك دي.
وبص لرجالته وهو بيقول بأمر:-
_يا رجالة ارمولها حاجتها ووقعـ.ـولي العربية دي للأرض دلوقتي.
وقفت نور قصاد العربية بتاعتها وهي ماسكه المغرفة وبتقول بكل عزمها:-
_محدش هيجي جنب العربية بتاعتي، فاكرين هتتكاتلوا عليا علشان انا واحدة ست، لا فوقوا أنا قدكم وقد عشره منكم.
حط المعلِم عصام ايديه على كتفها وهو بيقول:-
_طب وريني يا شاطرة.
مدريتش نور بنفسها غير وهيَ بتنزل بإيديها على خده بقلم يكاد الحارة كلها سمعت صوته وهي بتقول بغضب:-
_إبعد إيدك عني يا حيـ.ـوان.
_دا إنتي يومك معايا ملهوش شمس إنهارده.
وجه علشان يرد ليها القلم تاني لقى حد بيمسك إيديه وهو بيقوله بهدوء ما قبل العاصفه:-
_مينفعش مرا تمد إيديها علىٰ ست صح كدة ولا إيه؟!.
