رواية جثة مجهولة كامله جميع الفصول بقلم محمود الأمين
انا المقدم سليم عبد الغفار، شغلى هو أهم حاجة عندى ويمكن يكون أحد أسباب اني متجوزتش لحد دلوقتي، لدرجة ان في ناس بتقولي انت متجوز الشغل، وفي الحقيقة عندهم حق انا واحد بيستمتع بشغله وبكل تفصيلة فيه
ويمكن وجودى في القاهرة خلانى في قلب الحدث شوية، ولحد النهاردة فاكر اليوم ده 30 يناير 2025
نزلت من بيتى الساعة 8 الصبح وركبت عربيتي عشان اتحرك على مكتبي في مديرية آمن القاهرة، ولما وصلت دخلت المكتب عشان أبدأ شغلى، وقتها الباب خبط ولقيت العسكري بيقولى
_فى واحد بره عايز يقابل سيادتك يباشا
= واحد مين؟.. خليه يدخل طيب
...
دخل واحد لابس بدلة شيك ولكن باين عليه التعب، وملامحه بتقول انه منمش بقاله كام يوم واتكلم وقال
_ممكن اقعد بعد إذنك
= اتفضل اقعد
قعد الراجل قدامي واتكلم وقال
_انا عبد الله السيوفي، رجل الاعمال في الحقيقه انا مش عارف اقول ايه؟!.. انا كنت مسافر بره ولما رجعت ما لقيتش مراتي في البيت قولت يمكن راحت عند حد من اهلها او اصحابها حاولت اتصل بيها تليفونها مقفول ولما ما رجعتش روحت بالليل عشان اعمل بلاغ في القسم، لكن اتصدمت اني لازم استنى المده القانونية وبصراحه كنت هعمل مشكلة، انا ما نمتش بقالى يومين
ولحد دلوقتي مراتي ما رجعتش
= طيب رجعت عملت المحضر ولا لا؟
_ ايوه يا فندم عملت المحضر اكيد، وده رقم المحضر
= تمام، عاوز اسم مراتك ثلاثي والاقارب والاصحاب والناس اللي بينك وبينها مشاكل ويا ريت ارقام التليفونات
_ تمام يا فندم حاضر
= خد ورقه بيضة واكتب فيها اللي طلبته منك، بس كنت عايز اسالك لما رجعت البيت كان الوضع عامل ازاي؟!
هل في حاجه كانت متبهدله ولا عادي في حاجه ناقصه او مسروقه ولا كل حاجه في مكانها؟
_ كل حاجه مترتبه في مكانها، ما فيش اي حاجه غريبة
= طيب اخر مره كلمت المدام فيها امتى؟.. وهل حسيت من صوتها انها خايفه من حاجه او بتتعرض لاي حاجه؟
_ اخر مره كلمتها اول امبارح، وبلغتها اني انا راجع بس ما حسيتش من صوتها باي حاجه كانت عاديه زي اي مره بكلمها فيها
= طيب هي عندها عدوات مع حد من اهلها من الجيران؟
_ هتصدقني حضرتك لو قولتلك ما اعرفش، اه والله ما اعرفش انا عايش في السعودية وهي ما كانتش عايزه تروح معايا سبتها على راحتها برجع كل 3 شهور مرة بقعد شهر وارجع اسافر تاني
_ تمام يا استاذ عبد الله، انا عايز حضرتك تطمن وفي اقرب وقت هنكون وصلنا لزوجة حضرتك وان شاء الله تكون بخير
= يا رب
....
مشي الاستاذ عبد الله بعد ما ساب كل البيانات، وبصيت في الورقة واللي كان مكتوب فيها ريهام احمد كامل، السن 29 سنه
وكان ذاكر في العداوات واحد اسمه محمد عبد الرحمن وكاتب قدامه ابن خالتها وكان عاوز يتجوزها وهددها بعد الجواز بالقتل
وواحد تاني اسمه صلاح عبد المطلب وده بينه وبين الاستاذ عبد الله عداوه في الشغل
كنت لسه ماسك الورقة وفي الوقت ده خبط الباب ودخل الرائد ثابت، قعد قدامي ولقاني مركز في الورقة فسالني
_ خير يا باشا قضيه جديده ولا ايه؟
= انت جيت امتى؟
_ انا قاعد قدام حضرتك بقالي 10 دقايق، بس واضح ان حضرتك كنت سرحان شوية
= عموما انا كنت لسه هطلبك، انا عايز تحريات عن الاسم اللي موجود في الورقة ، عاوز اعرف كل حاجة من اول ما اتولدت لحد دلوقتي
_ حاضر يا باشا
= ثابت، قول لفريق البحث الجنائي يركز.. انا مش عاوزهم يسيبوا تفصيله حتى لو كانت صغيره تمام
_ تمام يا فندم
...
خرج ثابت من المكتب، وانا مسكت تليفوني وكنت بقلب فيه شوية لكن وقتها رن تليفون المكتب رديت واللي كان بيتكلم كان الظابط اللي في قسم مصر الجديدة كنت لسه هساله عن المحضر اللي عمله الاستاذ عبد الله لكن هو اتكلم وقال
_ وصلنا بلاغ عن جريمه قتل في طريق التجمع الخامس، اللي مقدم البلاغ واحد اسمه المهندس عيسى سلام مهندس معماري كان داخل الارض عشان المفروض الفتره الجايه هيتعمل عليها فيلا لكنه اتفاجئ بمشمع ابيض ملفوف في الارض ولما قرب شاف رجلين بني ادم خارجه منه ما رضيش يلمس اي حاجه وبلغ
=ابعتلي اللوكيشن
..
وبعد ما بعت اللوكيشن اتحركنا انا والرائد ثابت على موقع الحادث، ولما وصلنا هناك قابلنا المهندس عيسى كان راجل محترم في اواخر التلاتينات، الطب الشرعي فك المشمع وكانت الجثه لواحدة ست في اوائل الاربعينات لابسه فستان ازرق ومدبوحة.. الطب الشرعي بدأ يفحص الجثة ورجاله المعمل الجنائي كانت بتعاين الموقع، وطبعا ما كانتش محتاجه كلام ده مش مسرح الجريمة القاتل خلص عليها ولفها في المشمع وراماها في الارض
وقتها اتكلم رئيس المباحث المسؤول عن قسم مصر الجديدة وقال
_ دي نفس اوصاف الست اللي اختفت واللي جوزها جيه يبلغ عن اختفائها، الاوصاف اللي ذكرت في المحضر قريبه منها
= قصدك عبد الله السيوفي
_ ايوه يا باشا هو بالظبط
= عموما الطب الشرعي بعد ما يخلص الجثه هتتنقل على المشرحة وقتها هنشوف هل هي مراته ولا لا؟
...
وفعلا بعد معاينه المكان وفحص الجثه اتنقلت على المشرحة ووقتها اطلعت على المحضر اللي فيه اوصاف المجني عليها، الاوصاف كانت قريبه جداً لكن المشكله ان الجثه في تشوه كبير في وشها ومش سهل التعرف عليها، ولكن كان لازم ناخد الاجراء ده اتواصلت مع الاستاذ عبد الله السيوفي وبلغته اننا لقينا جثة بنفس الاوصاف اللي وصفها في المحضر ولازم يجي عشان يشوفها ويتعرف عليها
وبعد ساعتين كنت واقف مع الاستاذ عبد الله السيوفي قدام المشرحة، وقبل ما ندخل طلبت منه يكون هادي تماماً ويتعامل بحكمة، كان بيهز دماغه وساكت وبيبلع ريقه بالعافيه
دخلنا وطلبت من الدكتور الخاص بالتشريح انه يشيل الملايه من على وش الجثة، ووقف الاستاذ عبد الله قدام الجثه خمس دقايق ما كنتش عارف افسر الملامح اللي قدامي واحد ساكت تماماً لا باين عليه فرح ولا زعل، وعشان كده سالته
_ ها يا استاذ عبد الله، انا مستني حضرتك هي ولا مش هي؟
= لا مش هي، دي مش مراتي
_ طيب ده مؤشر كويس جداً، ممكن مراتك تكون عايشة انا عاوزه تطمن اننا مش ساكتين وبتدور على مراتك في كل حتة وان شاء الله في اقرب وقت هنوصلها وهتكون بخير
...
وانا بتكلم معاه جالي تليفون من الرائد ثابت بيبلغني فيه بوصول التحريات، فسألته
_ في حاجه في التحريات ملفتة يا ثابت؟
= حاجات يا فندم، بس اقدر اقولك ان جوزها اللي جه بلغ بعد ما حضرتك تقرا الكلام اللي في التحريات هيبقى المشتبه رقم واحد عندك
_ طيب انا جاي والاستاذ عبد الله معايا
...
قفلت مع ثابت المكالمه واتحركت انا والاستاذ عبد الله على مكتبي، ولما وصلنا هناك طلبت منه يرتاح شويه من المشوار ومن حوار الجثه اللي شافه وفتحت ملف التحريات.. واللي كان موجود فيه هيفتح سكة على مشتبه فيهم كتير
( اول حاجه مدام ريهام اتجوزت من الاستاذ عبد الله من حوالي 3 سنين كانت الجوازه بالاكراه، ريهام كانت رافضه عبد الله لكن اهلها اجبروها بسبب الظروف الماديه خصوصا ان عبد الله ابن رجل اعمال معروف، ومن يوم ما دخلت بيت عبد الله وفي عداوه بينها وبين اهلها لدرجه انها طردت اخوها الكبير قبل كده بعد ما اعتدى عليها بالضرب وعملتله محضر عدم تعرض
وبالتحريات اكتشفنا انه اخوها اسمه منعم وكان متهم قريب جداً في قضيه تعاطي مواد مخدرة وقضي الحكم وخرج قريب، في كمان تهديد معمول بيه محضر عدم تعرض للاستاذه صفاء ابو المجد ودي تبقى طليقه الاستاذ عبد الله السيوفي
لكن الحاجه الغريبه اللي كانت في التحريات ان والد ريهام الاستاذ احمد هو كمان في دايرة الاتهام والنقطه دي هي الاهم لان والد ريهام استلف منها فلوس من فتره قريبه والغريبه انها مضت ابوها وصلات امانه ولما اتاخر في الدفع هددته انها هتحبسه وضربها قدام الشارع كله)
بصراحة انا اول مره اقرا تحريات بالغرابه دي، ابوها واخوها هما اول المتهمين بجانب جوزها اللي هي اتجوزته بالاكراه وطليقته اللي اكيد شايفه ان ريهام اخدته منها
وفي عز ما انا بفكر ولسه هتكلم مع الاستاذ عبد الله جه بلاغ عن جريمه قتل جديدة كنت باخد العنوان من الظابط اللي اتلقى البلاغ قدام الاستاذ عبد الله اللي اتكلم وقال
_ ده عنوان اهل ريهام يا فندم، عنوان بيت ابوها!!!
...
اتحركت القوه بسرعه على مكان البلاغ واول لما وصلنا ودخلت البيت كانت المفاجأة.
