رواية عيون المها الفصل الثاني عشر بقلم ظل الياسمين
الشخص الملوث داخليا لا يستوعب ابدا وجود بشر انقياء ؛
حميت المي علجوله وكعدت اعجن وما احس ولد واكف يباوعلي
كمت من مكاني
_خير خويه تريد شي
_اني عماد اخو ناظم رجل خيريه انتي شنو اسمج
_وليش تسال من رخصتك روح منا ومره ثانيه استاذن من تجي
_هههههاي استاذن منج والله حلوه تره هذا بيت خيريه مرت اخوي
_هذا بيت جدي اشتراه النه اني وبيبي وهيه اجت علحاضر اخذتهه
هو يباوعلي بتركيز واني اميل بنفسي واتختل اشو هذا اجه يتلمس بوجهي
وخرت ايده بنتر
_وخر ايدك لا اكسرهه
_منو ولج لتكسرين ايده ودفعني قوي انحصرت بلحايط وسحب ربطتي من شعري دخل الدنبوس بلعومي وخنكني كمت ارافس ضربته برجلي ابطنه حيل صاح اخخخ
ركضت والجوله مفتوحه عليهه مي اخذت المي وطشيه عليه بوجهه
_يا بت القنادر اني الج طفرت وهو وراي ما لحكت ادخل للحمام لزمني كمت اصيح قوي وكلبي يرجف لازمني من راسي ومخلي جوه ابطه ويكفخ بيه وضربني على وجهي بوكسات واني اصرخ طلعتو كلهم على صوتي واكو رجال جبير وياهم صاح
_عماددد عوفهه
دفعني واني اكح واجر النفس كوه وملابسي انشكت ركضت وره الرجال وكتله دخيلك عمو
_ولك انته ليش مو ادمي اكو رجال يضرب مره ما تستحي مو عيب عليك صاح خيررريه منو هاي
_هاي بت اخوي كلت اكسب بيهه ثواب امهه تزوجت وابوهه مات
_وليش كاعده يمج
_ما عدهه مكان تروحلهه
دارت وجهه على عماد كالتهه ما تكلي شعجبك بيهه اشو جربه وماكلهه الوسخ
كالهه _ما تاكلين خ..... اني انعجب بهيج شكول بس حبيت الطفهه اشو كلبت المي الحار عليه بت الكوووو
_صاح الرجال الجبير كافي دماغ سزز السانك متبري منك روحي بابا روحي
محد يتعرضلج واني موجود
جريت نفس وكلي ارجف الله لا يوفقج خيريه على هاي العمله
كبل تغطيت وضليت خايفه الليل كله اون من الالم تلمست عيني امرمه وراسي وبلعومي يحركني
كعدت الصبح مثل عادتي خبزت واجت خيريه كالت الحجي ودالج فلوس ويريد خبز 🍞
_انطيتهه وما اخذت فلوس راحت وهيه تهز بيدهه
_بس لو اعرف على شنو شايله خشمج
اشو فكر وكاتلج الضيم
_عايشه بشرف واكل لكمه حلال وراضيه الله يكفي ضميري مرتاح وما ماذيه احد
_امداج على هيج ضمير سزز
غمتني بثنين اديهه وراحت
اخذت الخبزات وطلعت بس وصلت لكيت ام صلاح تصيح وراي تعال مهاوي
رجعت كالت اليوم عرس ابن اخو الحجي وصوني على خبز همزين لحكت بيج
امشينه نوديهن الهم تقربت منه وهيه صرخت
_يمه منو مسوي بيج هيج
_كمت ابجي واحجلهه وراسي مسطور كالت اروح انعل والدي والديهم
_عوفيهم ناس ما يخافون الله
فدوه خاله اريد باب واريد سياج يحميني منهم تعبت واني يوميه اشبع قهر
مشينه لبيت العريس واخذت الفلوس وجملتني وانطتهن لابنهه يجيب باب
للعصر جابوه
واني على نومتي احس مريضه مكان الضرب صار ازرك وخلقتي انكلبت كمت احمي مي واخلي عليهه ثاني يوم رحت للمستوصف ولزمت سره اني بقمه الالم ولمحت نصوره بت اخو امجد اجت عليه
وباوستني
_اشلونج مها حبيبه
_الحمد لله انتي شلونج اخبارج
_اني زوجت وحامل وجيت اخذ لقاح مال حوامل وجهج شبيه جنج مكتوله
_وكعت على وجهي اترخص منج
_تدرين حوبتج اسوت بيهم
_كافي نصوره ما اريد اسمع شي البيه مكفيني بجيت بهضمه
_مسحت ادموعي بديه
رجعت للبيت واحس روحي مريضه
اكلت لكمه كوه ونمت ومرت الايام
جمعت مبلغ وكلت لعمو يسويلي سياج بلوك بيني وبين خيريه
_عمو مهاوي يكلف
_فدوه عمو اني جمعت ذني واريد اخلص من شر هاي الوادم الما تخاف الله
اانعرفت بلمنطقه الخبازه اخبز من الصبح افتح الباب والجهال يجون ياخذون لاهلهم وكمت اسوي روبه وكيمر ورحمه الله واسعه كمت احصل ولو قليل بس ساده عيشتي لضحى اعزل وابقه اخيط ملابس بيدي الي ومرات لام صلاح يعني علخفيف اجه عاشور وخيطنه ملابس اني وام صلاح نفس الدشاديش كلش حلوات انكسر ظهري يلله كملتهن ومن لبسنه كلهه اتعجبت بخياطي
اول مجلس عد بيت ام صلاح ما رحته لان ابوهم ما يقبل ادخل الهم واني احترمت قراره
وراحت المله لبيت ام علي بصفهم طلعت وراهه وكامت تنعه صوت حنين وكع على جرحي واخذني لعالم الاموات كمت اناشغ من كد الالم الي شايلته فرغت كل حزن بيه واباوع النسوان تباوعلي
يا ستار يا ربي شكو
ام صلاح/اشمالجن ويه البت تره شابعه ظيم وقهر وانتن فوك الظيم
_شحال بيبيته فضلهه عليجن كلجن هسه من ذبهه الوكت صارت ما تراد محد يكعد يمهه الله يكطع بلكاطعين
_كامن وحده وره الثانيه تباوسني وتسلم عليه احس المجلس صار من نصيبي
وهيه تسوالف وتحمد بيه
رجعت للبيت لكيت عمو مسوي السياج حمد الله وشكرته وكلت لازم اسوي ثواب لاهل البيت عليهم السلام
وثاني يوم رحت اسوكت وطبخت وخليت كاسيت نعي وقصيده ولتمت الناس تاخذ ثواب سبحان الله صار بيه بركه وصاحت خيريه من وره السياج
_شعدج اليوم ريحه طبخ وقصايد تره الحيطان الهه اذان لا تجيبين العين والاثر لنفسج
_شنو جايه تهددين جيبي جدرج انطيج ثواب بلكي الحسين عليه السلام يهديج
_لا عيوني مخليه الهدايه الج ولامثالج
عوووع ام الوسخ تطبخ وناكل من طبخهه
تعوذت من الشيطان وكملت شغلي
اجت ام صلاح ورحنه للقرايه العصر واحس كل خطوه تسجلهه سيدتي ومولاتي فاطمه الزهراء عليها السلام
خلصنه ورحنه وجبنه وحده من الجيران جايبه طفل.؛
صفت واني اتامل اني ام وبحضني طفل وريحته بيهه بوطره واخذتني الصفنه لامجد من جنت اكله اتمنه اول طفل يشبهك نفس العيون ونفس الملامح وهو يجاوبني ولج اغار ياخذج متي
واني اضحك من خاطري واكله انته الاصل محد ياخذني منك
كطعت صفنتي المره كالت ها مهاوي وين صافنه اكلج عيوني باجر اريد منج خبيزات فدوه كون قبل الغده تجيبهن كتلهه صار من عيوني امسحت وجهي بديه وكمت
هنه بعدهن يسوالفن واني ترخصت ورحت اركض عفت ام صلاح وراي
ثاني يوم كعدت من وكت وبعت القاسمه الله ورحت للمره ولكيتهه امدده نفسه خطيه دخلت ونضفت بيتهه كله وطبخت الهم وسبحت جهالهه ورتبت البيت وطلعت صاحت وراي تريد تنطيني فلوس حلفت ما اخذ
تشكرت مني ورجعت واكفه باب البيت افتح بلقفل درت وجهي واشوف امجد صار اشهر ما اشوفه اللحيه طويله والسبحه بيده وسمران وضعفان
مر من يمي مدنك ضليت مركزه وياه ودخلت بكلبي حسره واريد ابجي كعدت انعه مثل المله وابجي
اجت ام صلاح وسمعت صوتي كالت يمه صوتج حنين جنه صوت حجيه صفيه من تنعه باجر اكل للمله تقرين وياهه
_لا عفيه استحي من النسوان ما عدي جراءه
_ولج شبيج ذني القريتيهن باجر اتغشي وقريهن والزهره حاضرتج
_الله كريم
رحنه ثاني يوم وكالت المله تعالي يمه مها يمي هاج القصيده اقري اول مره رجفت بعدين نخيت ام الحسن وبديت وضليت يوميه اقره وياهه وكامت اطلعني وياهه مجالس ضخمه وخلص عاشور
بس بقينه على تواصل وصارت النسوان الي تصير عدهه فاتحه تاخذني انعه واقره لابو عبد الله عليه السلام
مره اجتني عذراء بت ام علي كالت اريدج اجيبلي من السوك دشداشه حلوه
_ولج شسوين بيهه عدج كومه
_ها مو ما كتلج هذا الأسبوع يجون عليه ناس واريد ابدل
صفنت واخذتني حسره هسه اني اشكد صار عمري ولا مره اجتني ناس ولا مره حجو بيه حتى بيام بيبي الله يرحمها
كطعت صفنتي كالت هسه شكلتي اريد لون حلو على ذوقج
_صار من عيوني تدللين باجر اروح واجيبه الج
رحت لسوك واكفه يم القماش واسمع وحدهه كالت مها اشلونج
درت وجهي هاي ميعاد صاحبتي تباوسنه وسلمنه وكالت
_وين صفه بيج الدهر
_انتي اشلونج ازوجتي لا
_اي تخرجت من الكليه وتزوجت ابن عمي وعدي اثنين بنات ولد
_كتلهه اني على حطت ايدج لا ازوجت ولا تعينت ولا تخرجت
_هههه ليش ولج انتي احله وحده بينه قبل كله تغار منج حتى المدرسات
_هاي بعد الحمد لله على كل حال
_والي يجيبلج رجل ههه شنو تنطينه
_لا عفيه ما مستعده لشلاع الكلب♥️
طلعت ورقه وقلم كالت هذا رقم الارضي مال اعيالي اتصلي بيه خل اسمع اخبارج
__انشالله يلله يروحي مع السلامه
رجعت للبيت وفكره اجيبني وفكره تاخذني واسال نفسي اني ليش ما اكمل دراسه ليش ما اقدم وضعي صار احسن
لا لا كبرت وماراح يقبلوني
عاد اسوي انجاز واحد بحياتي اخذ شهاده جامعيه واتعين
رجعت للبيت ولكيت النار شابه بيه
