رواية عيون المها الفصل الثالث عشر بقلم ظل الياسمين
في بعض الأحيان نبتلى لا لنظهر ضعفنا بل لنكتشف قوتنا
كعدت بلكاع وادموعي اصب اني شنو سويت من ذنب والله جاي يعاقبني لكيت ولد من المنطقه يطفون النار وطلعو الغراض المحتركه دخلت لكيت حتى المنظم مايع والغراض والفراشات منتهيه ما باقي شي ابد استغفرت ربي واجن نسوان من المنطقه يواسني وام صلاح كالت
_مهاوي بنيتي لا تهتمين دفع الله ما كان اعظم
_الحمد لله والشكر على كل حال
تعب اربع سنوات راح برمشه عين كل الي جنت احصله اخليه بلبيت لبخته وعدلت الارضيه وشتريت فراشات ونضد وخليت شبابيك وبيبان ورتب هواي بيه
كعدت بزاويه وبجيت 😭
وحده من النسوان كالت خاله لا تبجين الله يريد يختبر صبرج اني راح اوديلج فراش واخلي ابني يصبغلج الحيطان
والثانية كالت مهاوي عدي منظم جديد راح ادزه الج وام صلاح تشكرت منهم
للعصر واني ارتب واعزل هلكت من التعب وكل اهل المنطقه تقريبا ساعدوني
الحمدلله حب الناس نعمه
لليل اندك الباب طلعت لكيت ناظم رجل خيريه
_اشلونج مها بيتج شحركه عمتج مريضه وما كدرت تجي تشوفج
_مشكور ما اعرف شحركه شجاهه انشالله باجر اجي اشوفهه عدهه العافيه
_يلله اترخص اذ تحتاجين شي بس دكي الباب
_رحملله والديك
كلت منهم من الشيطان جايين يسالون عليه لا وجماله يعرضون المساعده
باوعت الصوبه محتركه والجو بارد خلي اشغل الجوله وادفه
سويت جاي واكلت خبزه حجيت وي روحي لو اني فكر لو فعلا الله يريد يختبرني كمت صليت على الكاع وبجيت 😭 بحركه الك بيهه حكمه
صبح الصبح واني ميته من التفكير كلما اكول تهون ارجع لنقطه الصفر
خلي اتوكل على الله واروح لوصال واشوف بلكي الله يسهل امري
اخذت اوراقي صورت بطريقي واخذت فايل جاي امشي ولكيت عماد راكب سياره هو شافني وهو عفس وجهه
كلت بكلبي عابت خلقتك الزفره
دخلت الدائره الغذائيه وسالت على وصال كالو اشويه وتجي
كعدت بره انتظرهه ملابسي قديمه من وكت بيبي والحجاب من الشموس صاير احمر وحال الظيم حالي تالي الوكت لحكتي على الغراض وحركهن
جريت حسره وحمد لله والشكرته
باوعت لكيته واكف ومنتجي على الحايط ويدخن اضن عده معامله
اجت وصال شافتني وسلمت عليه
_وينج يمعوده صارلج فتره مختفيه ورادو موظفات هنا وخليت اسمج بس يردون مستمسكات تصوير ونرفعهن منا
_فدوه اروحلك ذني صورتهن
_كالت بعد تاييد سكن
_اليوم ماالحك اجيبهن باجر اجيج
_اي استعجلي راس تنسد
رجعت مشي وتعبانه كلش واحرص على كم فلس ضالات عدي
طبك بصفي السياره ونزل صاح مها
وكف كلبي ❤️
_ها شتريد مني
_تعالي صعدي اوصلج
_صدك عود تحجي الناس شتكول عليه صاعده وياك توكل خويه رحملله والديك
_يضربج مرض عبالي ادميه مو مال احترام صوجي
كام يهز بيده وما راضي
مشيت مسافه وحسيت بدوخه وصار عدي هبوط لكيت فئ وكعدت بيه
ورجع شريط الذكريات
من جنت امشي ويه امجد ويكلي تعالي بلفئ لا تلوحج الشمس وخدودج يصيرن دم
بجيت وكلبي عصرني معقولة هنت عليك
معقولة كل البينه جذب ليش اني ما جاي اتخطاك ليش كلبي ❤️ وعقلي لسه يمك
تعوذت من الشيطان وكملت رجعت للبيت ونمت للعصر
كعدت على دكه الباب اجت ام صلاح
وينج يمه مهاوي تعال جبتلج لفه ولبن وتمر تعالي يبعد روحي اكلت وكتلهه
_خاله فدوه اريد تاييد سكن يردونه مني بلغذائيه
_خلي اودي وياج واحد من ولد صلاح للمختار ويسويلج تاييد بس اخذي صور
رحنه وكام يسال انتي بت منو وين ساكنين بلاخير كال هااا حجي فلاح
دار وجهه عليه وكال
_اكلج هو من يوم الطلع بعد ماكو اخبار عليه ولا اجاكم احد ولا انطوكم شهاده وفاة
_كلبي رجف كتله لا عمو ماكو اخبار
انطاني التاييد ورحت
رجعت بطريق كلت خل امر على بيت خيريه اشوفهه ولو ما تستاهل
دكيت الباب محد طلع
اجتني مره كالت فدوه مها ما عدي غاز اريدج باجر تاخذين القناني وترسيهن واطيج الله قاسمه كتلهه ميخالف
رحت وياهه وجبتهن دفع بشارع اني والجهال ودخلتهن جوه بلبيت
رحت مره ثانيه دكيت الباب هم ماكو
كلت يجوز طالعين
البيت اظلم رحت لعمو سالم وحجيتله عن البيت اشلون احترك والويرات احتركت
كال سهله اني اجي اشدلج ضوه والمروحه واطاني فلوس ما قبلت كوه شمرهن كال مصرف بين مدبرين امرج
ثاني يوم الصبح كعدت الفجر خبزت واسمع صوت بيت عمتي كلت خل ادور وادك الباب واخذلهم خبزات
دكيت طلعت مره جبيره
_صباح الخير
_هله يمه صباح النور تفضلي
_عمتي خيريه هنا
_اي خطيه مسويه عمليه اليوم طلعناهه
_يا عمليتيش وينه اكدر اشوفهه
_اي تعالي
دخلت لصاله لكيته نايمه وجهالهه نايمين
_خاله هذني خبزات واي شي تحتاجون اني بلخدمه
_مشكوره بنيتي اني مره جبيره وما اكدر تكدرين اطبخين غده وتنضفين البيت كتلهه اي بس خلي اكمل شغلي وارجعلكم
طلعت اركض
اخذت القناني وترستهن وديتهن للمره وحصلت كم فلس ورحت لوصال انطيتهه التاييد ورجعت لعمتي
لكيتهم كاعدين سلمت عليهم
_السلام عليكم
_كلهم ردو رحت للمطبخ وبديت اغسل بلماعين فتحت الثلاجه وطلعت لحم كصصته وخليته على النار ورجعت انضف كملت سويت شوريه وقدمتهه الهم ورحت سويت تبسي وتمن
خليتلهم بصينيه انعجبو بطبخي
_ماشاء الله عليج عدج نفس بطبخ يموت
_تسلمين حجيه
_خيريه /مهاوي ابقي يمنه اليوم واني اطيج فلوس تعبج
_لا ما اكدر عدي شغل ومعاميلي اني يمكم اشوكت ما تحتاجوني بس ودي الجهال
كالت كوميني خل ابدل كعدتهه وديتهه للغرفه بدلت وكالت عمه مهاوي ليش مبهذله روحج تعالي يمي واسويلج غرفه وكعدي حالج حالنه
_ما تقصرين ما اريد اكلف احد اني مرتاحه وانتم يمي من احتاج شي مو بعيدين
طلعت وتلاكيت ويه ام علي
_هله ام علاوي اشلونج
_اشلوني يمهاوي هاي عذيره راح تزوج وتعوفني واني ما اكدر على فراكهه وكامت تبجي
_كولي يلله لا تبجين الله يهنيهه ويوفقهه
_اشوكت ياخذوهه
_عسبوع الجاي
_التسهل من الله
_اكلج مهاوي سمعت ام عبد مريضه بلفراش واتفقت ويه ام صلاح نروح الهه
ترحين ويانه انتي كلبج جبير وهيه مره جبيره وهسه ما هي طيبه
صفنت واخذتني الرجفه المره الي اتهمتني وفضحتني وشوهت سمعتي اروح اشوفهه وهيه مريضه
اي ليش لا
اني عمتي هم لعبت بحالي لعب ورحت الهه الله يسامح اني بشر ما اسامح
كتلهه اروح وياكم
اشوكت ترحون
_باجر اذ الله راد امر عليج العصر
_انشالله
رجعت للبيت واني بالي مشغول وذكرت امجد جان يحب امه موت
الله يشافي كل مريض
ثاني يوم مشينه كلنه نسوان المنطقه وكعدنه بغرفتهه وسلمنه وتحمدنالله على السلامه دارت وجهه عليه كالت خاله مها ابريني الذمه ورانه موت عليج بداعه بيبتج الحجبه الخيره
دمعت عيوني كلت بكلبي عكب شنو
حجيه مبريه الذمه
طلعنه ومرت الايام ورحت لوصال اريد اشوف وين وصلت المعامله
_مها حبيبتي لا اضوجين رفضو اسمج اجه عليج رفض من الحزب
صدك وصال ليش شنو السبب واني مخليه املي كله بتعين
انطتني الورقه وكالت شوفي مخلين جوه اسمج خطين حمر دواعي امنيه راجعي الفرقه الحزبيه التايعه الكم
كعدت بلكاع وبجيت 😭
ربي انته اعلم بحالي اذ كان هذا يرضيك فخذ حتى ترضى
رجعت الطريق كله ابجي
ليمته اظل تايهه لا مستقبل لا اهل لا زواج
اخخخخخ غوشن عيوني من البجي
اخذتني رجلي لعمو ابو حازم
