رواية بنت المصري ومؤذن الحي الفصل الثاني عشر بقلم جمانه السعيدي
منى...بقت ٣ ايام ام عبدلله بلمستشفى بهاي الايام اني جنت الها اكثر من ممرضه
صح اني اساعد الناس كلها بس مااعرف اني ليش انشديت الهاي العائله يمكن لان جيرانه من زمان
يمكن لان اعرف اخلاق الشيخ والشي الأكيد اني حبيت عبدلله
حبيته حب مو معقول بحيث الصبح اول مااوصل اريد اصعد اشوفه وكل يوم اجيبله شي وياي
هو هم ينحب سوالفه تخبل بس ادخل للغرفه ويشوفني يجي يركض عليه يحضني
مااعرف هاي محبة من الله لو شنوووو
شكلي حنيت للجهال وراح افكر اعيد التفكير بفكرت
الزواج
حلو و احد يكون عنده عائله واطفال
اليوم الرابع ودعتهم وطلعو من المستشفى عبودي اجاني للغرفه يودعني
طلعو حسيت المستشفي صار فارغ قبل من اخلص شغلي اصعد يمهم اشوفهم واسولف عليهم
منى...ماما اليوم ضجت عبودي وأهله طلعو من المستسفى
امي...اي همزين طلعو خبصتينا بيهم خبص
منى...ماما انتي كلبج طيب وتساعدين كل الناس
ليش ضايجه من عائلة الشيخ هيج
امي...لا ما ضايجه بس اخذوج مني كل وقتج تحجين بيهم
حتى نسيتي نفسج
منى...همه عائله تنحب
امي....الله يوفقهم ويبعدهم عنا
منى...بقيت على تواصل ويا الشيخ كل يوم اتصل اطمن علي واحجي ويا عبودي شويه
يكعد يسولفلي على لعباته وعلى أصدقائه
وشلون ابو ما يقبل يطلع بلشارع
حافظ سورة التوحيد ولاخلاص يقراهن اليه بلتليفون
حافظ الله ربي محمد نبيي الإسلام ديني القرءان كتابي
حافظ من الواحد للعشره
اني صرت مدمنه على صوته لازم احجي ويا كل يوم
اذا نسيت او انشغلت هو يصمم على الشيخ اله تتصل عليها
واحجي وياها
اشتريتله لعب وتراكات ودزيتهم بيد السايق
اتصل عليه الشيخ يشكر مني
الشيخ...الف شكر ولله ماعرف شلون اجازيج
منى...اني وعبودي اصدقاء وهذا شي بينا مو عبودي
الشيخ...سمعت منى تكول اصدقاء
اخذ التليفون من ابو وكالي اني احبج
الشيخ...ولك عيب خاله مايصير
منى....عوفه خلي يعبر عن مشاعره انت شنو تغار من
حبنا اني ويااا
الشيخ....الله يستر عليج بس مااريده يتعلم هاي السوالف
التعلم بلصغر كلنقش على الحجر
منى...طفل بعده شلون صارت ام عبدلله
الشيخ...ولله تعبانه وماعدها اي تحسن تشكي وتتالم
اني لو الكي متبرع حتلو ابيع البيت بس اصير زينه
منى...الله كريم الله يشافيها ويعافيها
جمانه السعيدي
اقل الشهر ورجعت ادهورت حالة ام عبدلله مره ثانيه
الصبح جاي ابدل واتصل عليه الشيخ
الشيخ...صباح الخير عمو
منى...صباح الخير
الشيخ...البارحه بليل اتخربطت ام عبدلله وجبتها للمستشفى
يكولون اليوم الدكتور مايداوم مجاز
منى...هسه بس ابدل واجي
سمعت امي المكالمه
امي...شكوووو
منى...ام عبدلله اتخربطت ونقلوها للمستشفى
امي...هم رجعنا الهاي السالفه شلون مانخلص
منى...ماما ليش هيج كارهتم ترا عمل انساني
امي....اي موساعدتيهم ليش هلملحه ماكو غيرج ممرضه بلمستشفى
منى...وشكو بيها اذا ساعدتهم ترا مايصير شي
طلعت للمستشفى بس مستغربه موقف امي منهم
ليش هيج كارهتم ليش ما تقبل اساعدهم
اكو سر بلموضوع لان اني اعرف امي كلش زين تحب تساعد الناس وكلبها طيب
وصلت خليت جنطتي
وصعدت سلمت على الشيخ
الشيخ.... همزين اجيتي يكولون دكتورها مجاز
منى...هسه اشوفلك منو الدكتور البديل واجيبه يشوفها
نزلت جوه كالو دكتور فراس البديل بس بعد ما وصل
ضليت واكفه وكفه لمن وصل
منى..دكتور حاله حرجه الله يخليك
الدكتور....المريض من اهلج
منى...اي دكتور فدوه اريدك تشوف المريضه
قبل شهر تقريبا كان عدها عمليه شألت الكلى
الدكتور. .هسه دقيقه بس اسجل بصمتي واجي وياج
منى ...بقيت واكفه وكفه لمن أخذته وياي صعدته
شافها
بس شاف علاجها وشاف التحاليل ...
الدكتور....محتاجه غسل كلى
منى...كلى وحده وتعبانه وغسل خاف ما تتحمل
الدكتور...اي ماتشوفين شلون وضعها صاير
انطيها ابره مهدء
منى...صار دكتور
الشيخ...خوفني هذا الدكتور
منى..... خل انطيها الابره وارجع احجي ويا
نزلت جبت الابره وانطيتها لزمت ايدي تريد تبوسها
منى...استغفر الله
أم عبدالله....لا تعوفيني
منى...لا مااعوفج ابد شلون اعوفج
نزلت للدكتور أأكد على غسل الكلى هذا اخر احتمال
لان وضعها تعبان
رحت الغرفة الغسل وحجزتلها
رجعت صعدت على الشيخ
منى...الدكتور اكد على الغسل
ام عبدلله...لا مااغسل خليني اموت اخاف
الشيخ...شلون تبقين هيج لازم تسمعين كلام الدكتور
منى...بلكوه قنعته تجي وياي
خطيه تبجي وخايفه دخيلك ربي
عبدلله بس شافها تبجي كام يبجي عليها
وصلتها للغرفه بقى الشيخ يمها واني اخذت عبدلله
اشتريتله حتى يسكت
عبدلله...اني اريد امي
منى....اي هسه بس تخلص اكل نروح الماما
الممرضات مو يشوفني محتاره بي اسكته اغسله
اوكله
سئلني عنه .... ... هذا حب مو طبيعي هذا ابنج لو ابنج ما تهتمين بي هيج
منى...صفت شويه وكعدت احسب لو الطفل الي جبته باقي
الهاي اللحظه جان هسه بعمر عبدلله
بس مستحيل يكون حلو مثل عبدلله
لو هيثم طالع رجال وجاي طالب ايدي جان هسه عندي طفل بعمر عبدلله
الحمد لله على كل حال الخيره فيما اختاره الله
رجعت للغرفه لكيتها طالعه والشيخ خال ايده على راسها
ويقرا قراءان بصوت حلو وهادء
ركض عبدلله يريد ينام بحضنها
أخذته منها كعدت على صفحه واني اشوف الشيخ شلون مهتم بيها وشلون خايف عليها
كلت بكلبي لو كل الزلم مثل الشيخ جان النسوان ما طلكت
شلون مهتم بيها
الله يسعدهم ويهنيهم
شويه اجت بيبية عبدلله
شكد متلهفه على بتها بس مالها شغل بعبدلله ولا ادنت علي ولا باسته ولا عبالك حفيدها
صدك ليش الشيخ يجيب عبدلله ويا للمستشفى ليش ما يعوفه يمها
دنكت على عبدلله بصوت ناصي تروح تسلم على بيبي
عبد الله...مااحبه
منى...ليش
عبدلله...هيه ما تحبني تكول الماما اني ماأحب عبدلله
منى.. استغربت من كلامه المفروض عبدلله اعز شي على بيبته لان امه بقت هواي يله صار عدها عبدلله
وطفل وحيد امه بعد ماصار عدها غيره
ليش بيبته ماتحبه
هذا طفل يكدر يميز للي يحبه من الي مايحبه
جمانه السعيدي
نزل عبدلله من حظني وراح الامه بس قرب بيبته دفعته
وصاحت بي
روح منا ما تشوفها شلون تعبانه
ردت فعل بيبته عجيبه ليش هيج تتصرف ويا بلاخير هو حفيدها وزغير المفروض تاخذه وياها أدير بالها علي
ولله مااعرف هاي الناس عجيبه غريبه
اخذت عبدلله نزلنا اني ويااا افتر على الردهات
وهو وياي انطيته سرنجه شلت النيدل منها
وانطيته حتى يلعب بيها
عبدلله...اني اعرف اضرب ابره
منى...شلون بلله
عبدلله...جيبي ايدج اضربج
منى.. يله اضربني ماتوجع انت خوش دكتور
عبدلله.. اني من أكبر اصير دكتور مثلج واشتغل هنا
منى..اني مو دكتوره
عبدلله...لا دكتوره
منى...الله يخليك رفعت معنوياتي
منى....هم ترحون البيت جدو
عبدلله...لا ماما ماتروح لان بيبي ماتحبني
منى...ليش ماتحبك
عبدلله....ماادري بس ما تحبني من اروح عليهم ويا ماما تبقى أصيح عليه وتضربني
منى...تلعب وياك
عبدلله...لا ماتلعب وياي انتي تلعبين وياي بس هيه ما تحبني
منى...شفت بيبية عبدلله نزلت
أخذته وصعدت فوك
منى...هااا شلون صرتي
ام عبدلله...الحمد لله زينه بس بعد مااغسل ابد
موت ووجع مااكدر اذا اليه عمر اعيش واذا الله ماكاتبلي عمر اموت
منى...اسم اله عليج عمرج طويل
شويه وجا الشيخ جايب غده
الشيخ...جنت ادور عليج جوه
منى...عليه ليش
الشيخ ...جبتلج غده لازم تتغدين ويانا
منى..راح يخلص دوامي وارجع للبيت اتغده ويا امي
الشيخ...اذا ما تاخذين غداج ازعل وياج اني وعبودي مو عبودي
عبدلله...اي اني هم ازعل
منى..اخذت الغده وسلمت عليهم وطلعت للبيت
بس صلت سئلت امي السوال الي بقى يدور ابالي
منى...ليش بيبية عبدلله تكرها ماتريده
( امي بوقتها كانت تعرف الاجابه بس بقت تتهرب )
امي...شمدريني
منى. يعني بلمنطق بتها بقت خمس سنوات ماكو اطفال
والدكتوره أكدت مراح يصير عدها اطفال
بعدين رب العالمين التفت عليها بطفل يخبل
ليش تكرها ليش ماتريده
امي...من تشوفيها اسئليها
منى..اذا اني الغريبه هلكد احبه وتعلقت بي شلون هيه ماتحبه
جمانه السعيدي
بعده الغده اتصلت على الشيخ ( بوقت التليفون العادي بدون كامره )
سئلته على ام عبدلله شلونها
كال نايمه بسبب المسكن بس عبدلله وكح واذانا
وكل شويه يريد ينزل جوه يكول اروح المنى
منى...اجي اخذه
الشيخ...يتعبج
منى...الله عليك اريد ماما تشوفه اني احجي بي كل الوقت
الشيخ...راح توصلين للبيت وترجعينه
منى...ميخالف واذا بقى هنا مايقبل يرجع
الشيخ...عبودي تروح ويا منى للببت
عبدلله...اي اروح
جمانه السعيدي
منى...ماما من رخصتج هسه ارجع
امي...وين رايحه توج اجيتي
منى...شغله مهمه شويه وارجع
طلعت اجرت تكسي وصلت للمستشفى
طلبت ام ابو التكسي ينتظرني صعدت جبت عبدلله ونزلت رجعت بنفس التكسي )
.دخلت للبيت صحت مفاجئه
امي بقت تباوع علي وساكته
منى...عبود سلم على بيبي
راح قرب عليها باسها بخدها ورجع يباوع عليها
وهيه صافنه علي
منى...عبودي بعد بوس بيبي عبود هاي امي
رجع قرب عليها وباسها بخدها مره ثانيه ورجع عليه
منى....هذا عبود ابن الشيخ
امي...ليش جبتي
منى...خفت امي تحجي حجي يسمعه عبدلله ويضوج
شلته دخلته بغرفتي
رجعت عليها ماما ليش هيج تكولين كدامه طفل زغير خطيه وأمه مريضه
امي...يروح بيت جده
منى...مايردونه طفل محبوس بلمستشفى خطيه
امي...انتي ما مسؤله عنه
منى...لا مسؤله من الناحية الانسانيه
مسؤله عملي كممرضه يخليني مسؤله
امي.. واي واحد.يجبب ابنه للمستشفى راح اجيبينه بيتنا
منى...اي اي واحد محتاج مساعدتي اساعده
ومااقصر ويااا
امي...بكيفج
منى...مستغربه شبيها الناس ليش كلها ماتريده
طفل زغير لا حول ولا قوه
امي ماتريده وبيبيته ماتريده ليش كلهم مايحبونه
رغم هو طفل حلو وينحب
دخلت بلغرفه وبقينا نلعب اني ويااا
بعدين أخذته وياي للمطبخ صعدته على الكاونتر
وحضرت عشى وهو شاركني بلتحضير
للحظه حسيت نفسي متلعقه بي واحبه
واتمنى يبقى بحياتي للابد معقوله اذا ازوجت وخلفت راح يصير عندي طفل مثله هيج حلو
بعد العشه اتصل الشيخ فتحت خط وانطيت التليفون
العبدلله
الشيخ.. هااا عبود اجي اخذك
عبدلله...لا ابقى يم منى
الشيخ...عيب كول خاله منى
عبدلله...خاله مني
منى...كول بس منى احنا مو اصدقاء
الشيخ...لا لازم يتعلم الاحترام
منى...يعني هو اذا كال منى راح الاحترام
الشيخ... راح يسمي كل الناس باسمائهم
منى..اني معليه بلناس اني اريده يكول منى
ضحك عبودي
الشيخ...اجي اخذك
عبدلله...لا اريد ابقى هنا
الشيخ...لا تعب منى عيب صير حباب
عبدلله...اي
الشيخ...انطيني خاله منى
منى...هااا شيخنا
الشيخ...اي وقت اضوجين منه اتصلي واني اجي اخذه
منى...نام شيخ مراح اضوج منه
الشيخ...ولله مااعرف شلون متحملته
منى... ولله محبته بكلبي عبالك من سنيبن
الشيخ...الله يديم المحبه
تصبحون على خير
منى.. وانت من اهل الخير
كل شويه يروح يم امي يتحرش بيها بس هيه ما تنطي وجه
ليش مااعرف
لو يبوسها لو ينطيها ريمون التلفزيون
شافها تعبت راح جابها مخده
جاب المي خلا كدامها
منى...عبودي مصمم يخليج تحبينه
ابتسمت امي
عبدلله...اني احبها
منى...يابويه تعال اكلك شلون عيدها مره ثانيه
عبدلله...اني احبها
منى...اعتراف صريح بعد شتردين
امي...ابن الناس مالنا منه شي
منى...حتلو ابن الناس اني هم احبه
امي....انتي مخبله جايبه طفل غريب وحايره بي
منى...اتمنى يخلونه يمي
عبدلله...اني اريد ابقى يمج
منى....اوي فدوه الحبيب كلبي
امي بس تباوع عليه جنها عدها قصه
ومتعجبه منها شلون الدنيا هيج زغيره افترت ورجعت
جمعت منى بهذا الطفل
الي تخلصت منه قبل خمس سنوات
جانت متوقعه مراح يرجع الحياتنا مره ثانيه
عبالها صفحه وانطوت هاي القصه عبالك قصة ام نبي الله موسى خلته بلبحر وراح بيت فرعون
رب العالمين قسملها يرجع الحظنها مره ثانيه
الفرق موسى راح بيت فرعون الضالم
وعبدلله راح بيت شيخ متدين حافظ علي وحفظه
من الناس والدنيا
يمكن المقارنه صعبه لان عبدلله لقيط او ابن حرام
بس يبقى روح رب العالمين قسملها تعيش
تعيش بيت انسان مؤمن حتى يحافظ عليها ويحميها
من هاي الدنيا الصعبه
بلاخير عبدلله ماله اي ذنب اذا كانت امه منى وابو هيثم
طفل بريئ مايعرف شي عن هاي الدنيا
ياترى شنو الي قاسمه رب العالمين المنى
قاسملها يرجع طفلها الحظنها
لو لا راح نشوف بلاحداث الجايه
