رواية عيون المها الفصل الرابع عشر بقلم ظل الياسمين
الطيبون تنقذهم ✋ الله مهما بلغت خسائرهم
رحت لعمو ابو حازم
_هله بيج عمو ليش تبجين
_قدمت على تعين ورفضو اسمي بحجه دواعي امنيه
_صدك خلي اشوف الورقه
انطيته الورقه وكلبي معصور وابجي
_كولي ياالله كافيج اني راح اشوفلج صاحبي وكال عدي عرف بغداد
واخليه يعينج اليوم اروحله اطيني مستمسكاتج ولو الراتب ما بيه حظ بس مطول رغبتج راح اسعى بيهه
_عمو لاتزرع الامل بيه وتالي الحزب يرفضني وانهضم
_لا انشالله اليوم اروحله واذ وافق اجيج للبيت ابشرج روحي صوري
_صورت وخليت الفايل يمه وطلعت بوجهي للبيت صعدت الفورت وكعدت يم الجامه واني روحي خاويه
كعد ولد يمي كال
_السلام عليكم
_وعليكم السلام ودرت وجهي عجامه
_اشلونج مها
_منين تعرف اسمي
_اني ماجد وراكم بشارعين والله انتي سباعيه كله تكول عليج خوش بنيه
_رحملله والديك انته الاحسن خويه
يمه ولد واكف غمزله كله خويه
حسيت جاي يتغامزون عليه راسا وكفت كتله نازل وانطيت الكروه كال واصل خزرته كتله ماكو داعي لهيج حركات اشويه احترام
كال اسف نزلت واني ارجف وامشي سريع ليش هاي العالم ما جاي تعوفني بحالي
فوك ظيم الوكت
رجعت للبيت ونمت لليل واني صاعده الكأبه عدي كمت توضيت وصليت وعجنت
اندكت الباب صحت منو سمعت صوت عمو حازم
_مهاوي فتحي الباب خلي ابشرج
_لبست الربطه وطلعت ها عمو
_بنيتي باجر اخذج واروح لصاحبي يشتغل بلمصرف كال اكو تقديم
_صدك عمو الله يبشرك بلخير ربي يحفظك
فرحت وانزرع الامل بداخلي
نمت مرتاحه واسمع هوسه عد بيت عمتي خيريه كلت صار يومين ما اروحلهه وهيه مريضه خلي اروح اسلم وارجع
درت ودكيت الباب طلع ابنهه كتله ماما هنا صاح ماما
_ها مها تعالي امبدله ولابسه كوستم وارفعه شعرهه وميشته
_اشلون صرتي عمه
_الحمد لله احسن دخلي جوه هسه الخطار على جيه
_لا اروح عدكم خطار
جرتني ودخلتني غصب دخلي ولج ظاله كاتلج الفكر
كعدتني على القنفه وكامت تحضر وهيه تتلوه من الالم
_عمه كعدي اني احضر كمت احضر كلاسات ودوالك مي وانضف واسمع ناس داخله واصوات ترحيب وضحك
صاح رجلهه خيررريه مي
_عمه مها اخذيلهم الدولكه رحت وهيه شافت وضعي كالت تعالي وراي
طلعت من الكنتور جبه مرتبه وحجاب حلو كالت لبسيهن
كلش انزعجت كتلهه اذ تبقين اتلحين اطلع وبعد ما اجيج خليني على راحتي
_تره الناس الجايه النه كلهه واصله وراقيه اطلعين بهدومج ذني الجربات
_عمه اني جيت اشوفج واتحمدلج بسلامه بس الضاهر اني غلطانه
هميت اطلع وصاح رجلهه مها اشلونج جيبي المي وتعالي استغفرت واخذت الدولكه ودخلت وانصدم نسوان وزلم كومه سلمت وكمت اوزع واني مدنكه
واسمعهم يكولون هاي البنيه تشتغل عدهم بعد شتريد خيريه هانم
تعوذت من الشيطان رفعت راسي واشوف عماد كاعد بطرف ويدخن شافني كام
_اشلونج مها
_الحمد لله
ساله الرجال الكاعد يمه تعرفهه كله اي بت اخو خيريه
اني طلعت واسمعه يكله والله عدهه عزة نفس ما تقبل حتى واحد يساعدهه
ضحك الرجال وكله
_عزه نفس بهزلك يمعود كول غيرهه
اني رجعت اوزع جاي وعصاير وكيك وكل شويه اخذ شي ورتبت المطبخ وهميت اطلع واسمع واحد يصيح وراي
_عماد/ مها ردت اسالج ذاك اليوم اشعدج بلغذائيه ومنين تعرفين وصال
استغربت لسواله
_وصال صاحبتي من ايام الاعداديه ورحت ادور على تعين وقدمت ورفضوني
_لا عليج الله ليش
_ههه دواعي امنيه وتحت اسمي خطين حمر
اشو هذا انكلبت خلقته صدك تحجين لو تشاقين
_والله وداعتك ما فهمت ليش
زمخ بيه ماكو داعي تفهمين
هميت اركض لزمني من الردان وسحبني كال مها لا اصيرين غبيه تره كتاب الحزب معناه عدكم معدوم وهذا الشي يضرج لا تورجين احد وديربالج من اقرب الناس
خفت كتله اولهم انته
_اني حباب ما اخوف
عفته ورحت ركض للبيت دخلت وكلي ارجف اشلون الكتاب ضل عد عمو ابو حازم باجر اكله عليه
نمت واني حسبه اجيبني وحسبه تاخذني
اذن الفجر واني اضن ساعتين ما نايمه كعدت راسي مسطور
كوه اكلت لكمه وشربت جاي خبزت وفتحت الباب وبعده ضوه الشمس ما طالع لكيت عماد بلباب كال اريد خبز 🍞
طلعت خبزات وانطيته هواي
_وديهن لعمه خطيه مريضه
_اشكد فقيره انتي الخطيه دار وجهه وراح سديت الباب وراه رجع دكه كال هاي افلوس الخبز
_هلمره عليه
ضحك كال لا ما اقبل ابد مثلج اصير اخذي يلله
_اخذت ورجعتله الباقي
ضحك بصوت عالي وكال ما تصيرلج جاره
عافني وراح
بعت وكملت باوعت ملابسي تعبانه بيمن اروح لعمو حازم كلت خلي اروح لام صلاح واشوف زويزه
دكيت الباب طلعو الجهال وصاحو بيبي هاي مها اجت تركض ها يمه مهاوي تعالي تفضلي
_خاله اريد اروح ويه عمو ابو حازم نشوف صديقه علمود التعين وما عدي ملابس 😓
_يا يمه صدك جذب هسه اشوف زويزه واجيج
دخلت جابتلي تنوره وقميص رجعتهن كتلهه اريد صايه لو جبه
دخلت وهيه ادردم قابل انتي جبيره لبسي مثل البنات اخذتهن وطلعت
لبستهن ورحت اركض لعمو تاخرت عليه وبطريق وكف اكبالي ماجد
_ ها خويه شتريد
_ههه دكولي صباح الخير
اريد اعبره اعترض طريقي واني مستعجله بيدي فايل دفعته بلفايل انته شتريد
_اريد احجي وياج
_هاي اشلون طلابه من الصبح وخر من طريقي احسلك
_اليوم اريدج تمشين وياي وتكعدين يمي وكام يجر بيه
كمت اصيح وخر اكلك انته شنو من بشر دوخرررر وما احس الا واحد زنكه من ياخته كله مو جاي تكلك وخررر ليش ما توخررر سحلهه صار مثل الطلي بيده اني من كد ما مستعجله ركضت صعدت بلفورت وكفه
وصلت العمو الهث واشوف عمو عصبي
_مها وين صرتي هلكد تتاخرين وتدرين عدنه موعد ويه الولد
_اسفه عمو تاخرت بلفورت
همينه نمشي واني اسولفله عن الورقه وشمكتوب بيهه كتله عمو لا اطلعهه خطره هاي وكف وصفن عليه كال
_منو كلج هذا الكلام
احتاريت شنو احجي كتله عمه خيريه كالت بس الي عده معدوم يرفضون تعيينه
وصلنه للولد سلم وكعدنه عده ميز وكرسي وكل شويه تجي موظفه تنطيه اوراق يوقعهن
_الله بلخير
_الله بلخير والعافيه
هاي بنيتي مها حطهه عد عيناك ذكيه وشاغوله واريدك تخليهه يمك اريد امن عليهه
_تدلل ابو حازم انطيني الفايل وروح
بس اريد موافقه امنيه
احنه كمنه واحد يباوع لثاني كله عمو لازم كتاب منكم واحنه انجيب جوابه هسه خل يقبلوهه ذيج الساعة اني اجيبهه
طلعت فرحانه ونزرع بيه الامل
رحت للبيت فرحانه ولكيت عمتي منتظرتني اباب البيت
_ها عمه شكو
_هذا الكوووو..... ثكل بشرب وطردني اني والجهال
_تعالو دخلو جوه
فتحت الباب ودخلتهم كالت صايره احوال ولابسه جديد
_ههه مال جيرانه الجبه هسه انزعه وادزهه الهم
_مها انتي ليش ما تردين تعيشين مثل الوادم ليش مبهذله روحج
_اضن حجينه بهذا الموضوع هواي وكتلج اذ مو بلحلال ما اخذ شي مو الي ومو من حقي
_اكلج مها ابوي الله يرحمه صدك ما راضي عني
صفنت كتلهه اني جنت زغيره من كال اخذت غصب عني واحد بعثي وابعدت وما عندي امل برجعتهه
اشو هاي كامت تبجي وتناشغ خطيه الجهال خافو طلعتهم بره الغرفه
_مها ابوي هم يسامحني ويرضه عني
_اذ الله يسامحج اكيد جدو بلاخره يسامحج ويرضه عنج
كمت طلعت اكل وحميته وخليت خبز وخضره وزلاطه وكعدو اكلو
للعصر وراحت لبيتهم قبل لا تطلع كالت مها ديربالج من عماد تره مزاجي لا تنطيه عين
هزيت ايدي اني ما اطيق الزلم ابددد سواء هوه او غيره
انتظرت اسبوعين وعمو كلما اروحله يكلي بعدهم ما موافقين على التعين
ايست وما كمت اسال والتهيت بشغل واركض على اللكمه ليل ونهار وحياتي ما تخله من التحرش والكلام الوسخ
هذا الولد ماجد مطلع عليه اشاعه بلمنطقه هاي مثل عمتهه مصاحبه ضباط امن
وما اعرف اشلون ومنين جابلي التهمه رحت لام صلاح كتله وهدت عليهم
امه كامت تعتذر بس للاسف الكلام السئ ينتشر بمجتمع مريض 💔
مرت الايام ومره جاي اخبز واجاني عمو ابو حازم/مهاوي طلع اسمج
_صدك عمو الله يبشرك بلخير
يلله بدلي خلي نروح استحيت من اكله ما عدي ملابس كتله روح واني اجي وراك
كال تعالي للمحل يلله اودعناكم
