رواية خطايا واجتثاث الفصل الخامس عشر بقلم نور البصري
بدأته 6:37 صباحا.. يوم الجمعة
تاريخ 2024/7/5 ــــــــــــــــــــــــــــــــــــــــــــــــــ
وگولوله العشگ مو شوف
من الله العشك ينحس
مرات الذهب إنسان
مو شرط الذهب محبس🌚
مــــــــــــــــــــــــريم
المشكلة انحلت الأمن طردوا عون..
و نصير.. من دخول الجامعة
صعدت بالسيارة وكعدت يمه وهو ساقها بسرعة بخوف نبهته
: طلاب لا تدعملك واحد..
: لأنعل ابوج لابو الطلاب بنت الكلب تستغفليني وتلتقين بي من وراي..
ظل يضرب الأستيرن واجت ايده على الهورن و رجع يسوق بهدوء يستغفر بس صوت المحرك كسر الصمت الثگيل اللي صار بيناتنا
جنت احس بالهوا داخل السيارة صار خنگة كأنما عون.. بجيته هاي للجامعة شمر جمرة حرقتنا اني ونصير..
لاحظت عيونه منططهن مصلبة على الطريق حتى مفاصل اصابيعه اللي ضاغطة عالستيرن جانت بيضة من كثر العصبية..
حجيت بصوت بي رجفة و خوف حسيت نفسي سعفة بنص اعصار..
: نصير.. وحق الله مالي ذنب بجيته ولا انطيته وجه ولا چنت ادري بي راح يجي..
ما رد بس حسيت بفچة كد ما ضاقط على سنونه مبين مشدود وعيونه صارن خابطات حمر فجأة ضرب الستيرن بكل قوته صرخة مكتومة طلعت منه وهو يضرب فخذي بظهر إيده..
: هذا النذل ما يفيد وياه الكتلة ولا التكسر الدوم ياكلهن مني ولج فهميني سمعتي ضاعت شيكولون عليج ما فكرتي شيكولون متزوجة ومصاحبة؟! ولج اني سمعتي مريم.. سمعتي اهم من كلشي! حتى منج!
انكمشت على روحي احضنها بخوف واني لزكت روحي بباب السيارة ابجي بصوت عالي دموعي النزلت مو من وجع ضربته بس من وجع الخوف..
رجعت بذاكرتي لأول أيام زواجنا للشك اللي جان يأكل بروحه اذكر حتى من اصفن واسرح واشرد لحلم يقظة يضربني
ها بيمن تفكرين بي مو؟ جنت أخاف اتنفس بصوت عالي لا يكول تتنفسين عون..
: الا اكسر رجليه ال........... اريد اشوف شلون بعد يجيج للجامعة اني اله اذا ما انعل والديه الكلب ابن ست طعش كلاب..
حاولت اهدئه.
: نصير.. اعتبره مخبل ساحل روحه اهم شي اني مخاينتك ولا منطيته وجه..
ظل يستغفر بصوت عالي وجهه انكلب ألوان وفجأة وكف السيارة و دنك براسه وهو يحضن بيديه وجهه ويجر نفس شهيق زفير ورجع هم يستغفر..
رجع هم جر نفس وباوعلي مبين هدأ
شوي صفن من جامه الي بجهتي التفتت اشوف شنو شبي يباوع مناك..
ماكو شي بس استغربت يركز بالمحل عبالك شي مهم محل كرزات نزل وهو يرزل بروحه ثواني ورجع وبيده كيس وجهه هدأ شويه بس عيونه بعدها بيها عتب..
مد إيده بالكيس وطلع فستقة قربها من حلكي وهو يحاول يبتسم بوجع
: يله كافي بجي مسحي وجهج
وعيونج..
مد ايده لعلبة كلينس وانطاني كلينسة وهو يتصنع المرح يراضيني
: فستق للفستق يمعودة والله حقي الغيرة تحرگ بگلبي حرك الناس شتگول من تشوفه واكف وياچ؟ وأني يومية بيدي اجيبچ وبيدي ارجعچ يعني يعرفوني رجلچ فأكيد يستغربون منو هذا الواكفة وياه زين هذا الما عنده غيرة شجان يريد منچ؟
بلعت شهكة كد ما بجيت ظليت لا إرادياً اناشغ و أشهگ حچيت بصدق يوجع.
: يگول حلمت بيچ يگول تعبت دونچ واجه يطمن عليه ويروح..
نصير.. شاط من جديد بس هالمرة لزم أعصابه وظل يدعي عليه
: كون تعبه البين إن شاء الله! كون الله ياخذه ويريحنا منه..
لزمت ايده جانت باردة وترجف
: نصير.. الثقة مهمة بين الأزواج كافي تغار منه اني اختاريتك الك وهاي هي تزوجنا خلي نبني حياة سعيدة لخاطر هالطفل البطني والله سولفتلك كلشي مثل ما علمتني ما اضم عليك ضمة إبرة..
بس فدوة لا ترجع مثل أول أيامنا لا تخلي الشك يدخل بيناتنا من جديد ترى اني تعبت..
سحب إيدي وباسها بلهفة كأنما يعتذر عن كل لحظة خوف سببها الي
: تعرفين وقتها ابن الحرام ترس راسي شك اني اتخبل من فكرة أحد غيري يلمح طيفچ احبچ مريم.. والثقة موجودة بس نار الغيرة ما ترحم..
درت وجهي عالجامة من ورى غيرته معرفت شصاير بالجامعة سيارات الأمن والطلاب المسحولين تذكرت سؤدد.. و حسن.. تذكرت شلون الوجع يجي فجأة وياخذ الغالي..
عــــــــــــــــــــــــون
: تركوني عوفوني ممسوي شي!
صرخت بيهم بس قبضاتهم جانت اقوى من صوتي و ما عافوني إلا بعد ما طلعت روحي من سحلهم الي و تهديداتهم ترن بأذني مثل الجرس
: المرة ثانية نسلمك للأمن وتنسجن..
كلماتهم جانت رصاص يرموه بوجهي حتى يخوفونيلكيت نفسي مكنمبص كاعد مكابل باب الجامعة وظهري مسند لحايط جامد يشبه حالتي..
النفس يطفر من صدري بشهكة وبجي مكتوم تترجم بس شهكات ونشيج
وطعم الغدر بحلكي مرّ يوجع أكثر من ضرباتهم..
«مريم» سنة كاملة احاول ألتفت لروحي اغمض عيوني حتى ما أشوفج بس ملامحج حتى باطن جفوني إنطبعت وتجيني بالحلم تسرقين راحتي كلت اشوفج وأنهي هالعذاب بس الظاهر العذاب هسه بدأ.
رجعت للبيت جثة هامدة شمرت روحي على الكرسي عيوني راحت لبعيد والحنين للشرب بدأ يوزني ويستفحل بشرايني إدماني
بس طيف خالي وكلامه وكف بوجهي كمت توضيت وصليت ركعتين ردت بيهن أفرغ النار اللي بصدري..
طلعت جدر المرق اللي عافته مرت خالي بالثلاجة ذول الناس شالوني شيل و ابوية الله يسامحه جان حارمني منهم ومن حنيتهم يمكن لو رابي يمهم جان صرت غير إنسان..
مو هذا الضايع اللي كاعد كبالكم
سحبت التلفون اصابعي يرجفن افر الرقم خابرت الحجي أخو جدي
: حجي.. بشنو ادعي عليك؟ قشمرتني وبعتني أوهمتني انت وبنت ابنك الخاينة طبختوها سوا وغدرتوني
ما اگول غير الله لا يوفقكم
عسى حرگت گلبي تطلع بأعز ما تملكون كون تتحملون خطيتي وتجتثكم بأعز ناسكم عسى گلبك يحترك مثل ما حرگت گلبي وبالنار اللي شعلتها بيه كون تورثون وتحركم ناري حرگ..
رد بصوت بارد مثل الثلج
: انت وينك ولك؟ سنة كاملة غاط لا حس ولا خبر وهسه جاي تتهجم؟ البنية لأبن عمها والموضوع انسد وتزوجت وعيب بعد تحجي بيها لو تجيب سيرتها حرام ميجوزلك شوف بوية نبقى أهل وعمامك سندك لا تخسرنا علمود مرة..
ضحكت بوجع
: أحتاجكم؟! الله لا يعوزني الكم ولا يوگعني بشدة وتمرون ببالي لو اموت ما ادك بابكم تبريت منكم يا خونة
اني مو نوري.. اليدور طلايب وفصول ويجيبكم تفزعوله اني أعيش من عرق جبيني وما امد إيدي للي غدر بيه
سديت الخط وسلمت أمري لرب العالمين مريم.. ضاعت وفكرة الزواج من بنات خوالي مرت ببالي
بس شلون گلبي لسه ينبض بإسم الخاينة وما أريد اظلم بنت خالي وياية ..
الخطأ ميتصلح بخطأ وجميلهم ما اجازيه بدمار بنتهم ماراح أتزوج إلا لما أطفي هالنار و أنسى (وصالي المفقود) وغدرها..
صفنت بالفراغ وروح الأنتقام بدت تتسلل لدمي مثل السم أبتسمت ابتسامة باردة ومكر وخبث
اني الك نصير.. اعرف نقاط ضعفك واجه وقت الي اراوي ست مريم..
سحبت التلفون وحضنته كأنه سلاحي الأخير..
اني إلك يا نصير.. وهسه بدأ الحساب
صوت الشخص المشترك بينا اني ونصير.. ابتسمت واني احاجي...
مــــــــــــــــــــــريم
رجعنا للبيت وبكراج حديقتنا جاي انزل وصلنا للبيت بس الجو جان بعده مشحون..
اعرف طبعه رغم حاول يراضيني بس بقت الغيرة للأن هايجه بداخله لأن بس طلع من السيارة طبك الباب حيل..
نزل بدون ميباوع بوجهي جريت نفس متوتر ونزلت وراه رجليه كوة اشيلها احس البيت قفص اتهام ينتظر والقاضي الفتح باب الاستقبال ينتظر محاكمتي..
بداخلي تأففت ابد ماطلعت صوت ولا تذمرت ياله اهدئه بس والله مو تفاهمنا بالسيارة بعد لشنو الملحة..
دخل گدامي واني وراه ذب مفاتيحه عالميز بصوت عالي نزيت بتوجس لا يرجع يعصب..
نزع سترته وشمرها وگعد عالقنفة حط راسه بين إيديه أنفاسه مسموعة صراع داخلي بطلها الشهير ، الغيرة و التملك اللي سحنن روحه سحن
تقربت منه بخطوات حذرة خليت جنطتي واللفكس مال كتبي على القنفه وگعدت على طرف القنفة القريبة منه مديت إيدي أتلمس چتفه بس ترددوا اصابعي خفت من الصد.
: نصير.. لا تظل هيج تفكر بالموضوع خلاص انتهى بوقته لا يرتفع ضغطك والله اخاف عليك تتمرض..
رفع راسه و عيونه التعبانة تجاهي مو عيون نصير. اللي جان يصيح بالسيارة لا عيون واحد الغيرة اخذت منه هواي
حسيته مكسور بغيرته عليه باوع بوجهي وسألني بصوت مبحوح..
: مريم.. قسماً بذات الله لو ما ادري بيج نظيفة وما عندج ذنب جان اليوم ذبحتج وذبحت نفسي وراج
بس يوجعني گليبي يوجعني من تخيل هذا النذل باوع بعيونج لو حجة وياج كلمة أحس روحي جاي تطلع..
نزلت دمعتي هالمرة دمعة قهر على حالنا حسيت الغيرة والشك مرض عنده ومقيدة سعادتنا..
: والله ما انطيته وجه وداعتك نصير.. كتله اني بذمة رجال ومتزوجة وعيب عليك كتله مرتاحة بحياتي عوفني بحالي بس هو حجه عن الحلم والتعب نصير.. انت سندي لا تخلي يكسر هالسند بظنونه ويحول حياتنا جهنم..
سحبني من ايدي بقوة بس هالمرة حضني قوي كأنما يريد يحبسني بين ضلوعه يضمني عن عيون العالم وعن ماضي اسمه عون..
: اخاف عليج مريم.. اخاف يجي يوم وتضعفين او هو يسوي مكسورة تخليني افقد عقلي وأخسرج..
و اني بحضنه شميت عطره المختلطة بريحة زعل اتنفسته اكبر مني صح يمكن هذا يخليني احب بي جانب ابو وزوج ايضاً همست :
: الموت اهون عليه من ضياعك بس نصير.. عون.. مو سهل هذا واحد بايع ومخلص
واني خايفة باجر يرجع للجامعة
سكران و يعاركني لو يتصرف تصرف ميعجبني والله طابوكه واخليها براسه
والله النوب يسويلي فضايح و الأمن مو بس يسحلوه لا النوب يسحلوني وياه وانت تدري بالوضع ما يتحمل..
فز من كلامي يمكن جفصت بدل ما اهدئه من ظليت احجي على عون.. وسويته كلش حتى ابعد شكه بيه وابينله عون.. ما احبه..
وخرني عنه شويه وباوع بعيوني بعصبية..
: للجامعة بعد ماكو روحة!
وكعت الكلمة عليه مثل الصاعقة ردت اسد باب انو اني ما افكر بعون.. النوب فتحتلي خوش باب خوش فطنته لشغله يبطلني من الجامعة
: شنو؟! نصير.. عفية مابقالي غير هالسنة لا تحرمني من حلمي بسببه!
گام نصير.. و ظل يروح ويجي بالصالة رجعت العصبية تضرب براسه واني استاهل صوجي والله اجيت اكحلها عميتها..
: تردين اتركج تروحين وهو يترصدلج اليوم الأمن طردوه باجر يجوز يتبلى عليج يجوز يجرج من إيدج كدام الطلاب! مريم.. كرامتي وسمعتج فوگ كل شهادة لو گعدة بالبيت لو أروح أني اكتله و أشرب من دمه وأخلص!
وگفت كباله و آني صايرة بين نارين نار حلمي الي تعبت عليه ونار رجلي الي لغيرة تجري بدمه و عمت عيونه..
: نصير.. إذا بطلت معناها هو انتصر معناها كسرنا خليني أروح و أوعدك بس اشوفه من بعيد ابتعد داخل القسم وأصلاً هو خاف من الأمن اليوم ما يرجع..
سكت لحظة وباوع عالشباك يفكر بشي ابعد يفكر بـ عون .. و شلون ينهي وجوده من حياتنا نهائياً مو بس يمنعني من الدوام من وكفته وصفنته هيج تراوالي يفكر..
: اخذيلج قيلولة نامي يا مريم.. نامي هسه، تنحل بألف حلال بس خلي بالج شعرة وحدة تمسج أحرك الدنيا وما بيها..
عافني وراح للمطبخ يشرب مي رحت لغرفتنا بدلت وتمددت تعبانه ايدي على بطني و أحس بخنگة غريبة..
الغيرة والشك الي حاصرني بي نصير.. صار مثل السجن الجدرانه من حرير بس برودته تكتل..
ظل نصير.. يدللني بس كلش تضايق من كثرة سفرياته للأردن و بديت احس متغير من يرجع يسهر هواي بيوم اجه تلكيته..
: تأخرت وخفت عليك..
فتح باب الهول بالمفتاح ودخل وقفلة حضنته اشم بي واني خايفة مدري ليش.. بس رجعت لورى من ريحة مألوفة حسيتها بي ضربت خدودي الطم و اني متخبلة وادور حول روحي..
: لا يا الله لا يا الله
وهو بس يباوع الي و يضحك صخام الصخمج مريم.. لا يا الله ابجي بقهر رحت هجمت عليه اضرب بي..
: سكران نصير.. مو؟! انت الكلت على عون.. طايح حظ ابو عرك لا صلاة لا صيام ولك شورطك منو ورطك..؟!
ضحك و هو يجر كلامه جر..
: الدنيا ربيع و الجو بديع و اقفل على كل المواضيع..
گرص خشمي وضحك يطوطح سترته بأصبعه على جتفه معلكها و فات للغرفة..
ضربت صدري اول تالي نصير.. يشرب نصير.. الي ما يفوت فرض دخلت ما اتركه الا اعرف وين جان وي منو لكيته خدران بسكره و نايم ندهته
: اكعد يله اكعد ولك اني الي عفت عون.. ما اريد أعيش حياة امي وي سكير عربيد تجي انت تشرب..!
ولا يمه نام يشخر ظليت مكابلته و كاعدة بالكاع و عكس أيدي عالجرباية مسنود وچفي ساند خدي صافنه بالسالفة الجديدة الطلعتلي
صافنة بنصير.. بله من اخابر جدي وأهله واكلهم تعالوا تفرجوا هم انلام؟!
ظليت مترددة بس لا ما اسكت بس اسكت يتمادى وجرب الشرب اليوم راح تتكرر مرة ومرة ومرة لمن يتحولي لعون... المدمن العرك.
غيرت ملابسي وغسلت وجهي لبست حجاب وخابرت جدي
: جدو جيب عمي ابو نصير وعمامي وتعالوا لحكوا عليّه !
: شبيج ولج؟!
: تعالوا شوفوا ضيمي تعالوا لنصير.. كبل لا يصير مثل عون.. ونوري..
: فهميني؟
: تجي وتشوف بعينك!
دقائق وهم يمنا آشرتلهم للغرفة
: أجاني سكران طينه و سيارته ماكو الظاهر مدري منو موصله جدو شوفولي حل مدام بدايتها قبل لا يتعود..
هو و نايم ميدري تقرب جدي منه ولزمه من خناكة وجره فز گعد مختنك ويكح عيونه حمر مبين بعد بي آثر الشرب يباوع بعيونه و ضحك
: اهلا بكم لج مريم...
يحجي الكلمات جر وعت وكوة ينطق من الشرب
: جيبي بطل مدري وين ضيعته حجي ما شفت البطل اويلي يابه شلون زلال عالقلب
ضربه جدي
: أصحى لا يا كلب ابن ست طعش كلب هذا انت الجبير إللي كل إعتمادي عليك
ظل يضرب بي تكترت بعيد بين خايفة عليه بين كلت يستاهل حتى يربوه لا يعيدها
طبعا مكتلكم ولدت ابني من فترة
و الي اعرفه اليصير أب اذا اعوج ينعدل مو اذا عدل ينعوج ويمشي بدرب المشروب والله يدري شوراه بعد..
المهم إبني كعد على هوسة عمامي والحجي رحت حضنت الولد اهزهزة و اني بس اباوع ما تدخلت من دكة نصير.. كتلوه كتله معدلة وسحلوه برى الغرفة للحمام يسبحوه حتى ينتبه
من طلعوه مبلل جان يبجي و يتوسل يسامحوه بس مبين هم مو كلش واعي تركتهم يبدلولة وغطوه ينام و اخوه جابلة كهوة بيده وخر الكوب وتدثر باللحاف حتى راسه غطاه وهو يبجي..
دمعت عيني مقهورة شوكعك وانت ملتزم عاد ثاني يوم حاجوه و نصحوه وراحوا باوعلي بعصبية..
: انت كتيلهم مو؟ هاي عود الزوجة لازم تكون ستر وغطى..
: ستر وغطى بالحق مو باطل..!
كام و دفعني : انتِ حقيرة
تركته حتى يهدأ بس تهجم عليه ضربني كلش أذاني
: تتجاهليني بنت الكلب..
: ابوية شهيد..
: لنعل ابوج لأبو الخلفج تبيعين عليه التزام مو؟
: ما اريد تصير مدمن تدمر حياتي اشوف أمي و دمعتها الما نشفت من ورى نوري.. رفضت عون.. حتى لا اعيش ضيم امي تجي انت تتعلم تشرب يعني هنا اني ما سويت شي..
: يعني رفضتي لأن يشرب لو ما يشرب مترفضيه مو تحبيه لازم..
و نزل بيه دك منا الغيرة و منا معصب
لأن انكتل من اهله بسببي تركني و طلع وهو متحلف بيه..
: بنت الكلبة لو ما يشرب مترفضه عاشكته ولج اسلخج و اسلخ الخلفتج بنت القندرة..
ظل يغلط سكتت عنه و اني بديت اشوف حياتي تتدمر يوم ورى يوم و نصير.. بسبب ولد الحرام حتى الصلاة تركها و صار يجي ليلية سكران وبديت اعيش معاناة امي..
وتهديدات نصير.. فني الفكيت حلكي و حجيت لأهله يطلكني و ياخذ مني ابني..
ظل سؤال بعقلي المعروف الإنسان يتوب لله عن المعاصي ويتقرب لله بس إنسان يتحول للمعاصي هذا شي حيل أستغرب..
يعني هو مو جاهل معرفه لو جان جاهل معرفه بالدين مثل عون.. اكول بي مجال ينحرف بس نصير.. تربى بيت صلاة وصيام والتزام شلون كدر يعوف ذن وينحرف؟! بقى سؤالي يتيم دون جواب..
مـــــــــــــــــــــــاجدة
انجريت لورى و باوعت وجاي انتر ايدي شفت بابا هنا همي صار بأبوية فأخذته بعيد..
: بابا...! شجابك...؟!
: اجيت اشوفج من كتيلي أمس بالتلفون مضروبة بوكسي و سولفتيلي الصار واني مكدرت أنام ولا يقبل سهيل.. اجيج و اشوفج ظليت بس افكر بيج عاد كلت اجي للجامعة اطمئن عليج..
: زينة عيني الحمد لله..
: يا زينه مؤرمة عساه كسر السواها
دمعت عيني
: تورطت حجيت لسهيل.. و يمكن هو ورى الأمن أخذوه الولد ورفع بي كتاب بابا فدوة تكدر تحاجيهم..
: بنتي خلينا بعيد تردين يجرجروني مو حمل سحل وتعذيب لو ما يعرفونه عنده شي ضد الحكومه ما تقربوا منه..
: اني ما أشتكيت بالعماده عليه لأن كلت هو مو قصده يضربني جان يتعارك شلون هسه..
: تعاي بابا ارجعج للبيت مبينة مريضة.
حسيت بابا مقهور عالولد من نظراته للولد وهو عيونه خبطن حمر حسيته راد يبجي..
: يله بابا اوصلج للبيت وخليني بعيد عن صلاحيات سهيل.. واعتقالاته للأبرياء لا يذبني ورى الشمس لو يعاركني و هم نتيجتها أذية..
: لا بابا ما اريد يتعارك وياك سهيل.. اعرف يأذيك هذا حظي يربيني مجرم بلكت الولد يعوفوه..
نمشي اني و بابا و لمحت ماجد.. هو وشلته جانوا يضحكون من شافونا سكتوا و ظل ماجد.. يركز ببابا لؤي..
و بعيونه نظرة إستغراب.
حضني بابا وهمس ضايج يفارگني..
: راح أسافر للعاصمة ترقية و دورة..
: الله يوفقك بابا ويعلي مراتبك..
إبتسم : شجيبلج مناك شتردين أمري ؟
: ما اريد شي ؟ بس سلامتك يا رب تروح وترجع بالسلامة..
: قنوعة بنتي بس هديتج تجيج مناسبة ترقيتي..
ركب سيارته و بقيت أتابعه وهو يآشر بيده سلام و راح
التفتت شفت ماجد.. وحدة مصفن و يباوع عليه مشيت وآني ما مهتمتله تبعني..
: صاير شي هذا ليش هيج وياج و يحضن بيج هذا شيقربلج؟!
درت عليه و تجرأت..
: و انت شعليك والله يا الله عجيب ناس بلا أخلاق وتربية أما صدوك عالم بس تصجم ببنات العالم( قبل ماكو كلمة تزحفلي او تزحف على بنات عالم )..
ومشيت سريع بس هو ركض و صار كدامي أمشي و هو مكابلني ويرجع يمشي لورى
: منطيج مهلة ترديلي جوابج لا تنسين..
حجاها و راح خب دولي ناقصني بس ماجد..
مريت للأنكليزي مالي خلك أروح للمحاضرة وهم هذا ضارب المحاضرة وگاعد على دجة جبيرة وعالية ويمه طلاب العربي والتاريخ والأنكليزي لاحظته شخص أجتماعي كلش
شافتني رحاب.. وجرتني
: تعاي نگعد هنا هسه شمس.. تطلع راحت للحمامات..
كعدنا مصطبه و ظهرنا صار للدجة و مسافة قليلة عنهم سمعته يسأل جماعته..
: يا ولد شنو أُنثى الأسد..
رد واحد و هو يضحك..
: اكيد لبوة شبيك ماجد.. ؟!
رجع الصفيق بتكلم.
: هو غير لكل شي أُنثاه الأسد لبوة و العتوي بزونة و ماجد.. شنو أُنثاه...
ضحكوا و حجه صديقه طالب لغة عربية.
: قصدك مؤنثه مو أنثاه...
صاغ كلماته بتفاهة
- يا ولد للضرورة الماجدية تصبح أنثاه بدل مؤنثه ها هو هي هو ها هو هي هو آني اكوللكم ماجد.. أُنثاه ماجدة.. بيها شي عايل بأحد لو شاتم أو ساب احد اني مصر اطالب بحقي أريد أُنثاي..
حجاها و ضحك ضحكوا جماعته ورد واحد مبين بالعربي
: اكول ترى انت جغرافية عوف العربي لا تصير سيبوي شنو ماجد.. والله انثاه ماجدة.. ترى يسموه مذكر ومؤنث فماجد مؤنثه هي ماجدة.. لا تلعب كيفك...
: نفس الشي هم المؤنث هم يعني نثية و آني نثيتي مشتقة من إسمي..
لعبت نفسي من كلامه و رحاب.. تسمع وياي وتباوعلي همست على كيف
: شبيج متوترة وحمرة؟ من طاح حظه شلون ولد ادبسز على هذا المنطق والتلميح امشي يله خلينا نغير المصطبة حسسني بحضيرة حيوانات المطي اليدور نثيته..
صفنت وخلت ايدها على شفايفها انتبهت لجفصتها ضحكت وباوعتلي
وكالت : sorry ممتقصده ههههه ولا انتبه من كلت حسسني مطي يدور نثيته هنا يعني انتِ مطيته.. لأن هو ديصجم بيج حياتي هذا الشقندحي الصفيق معجب بيج ههههههه خوما زعلتي مسحيها بوجهي حبابه يله حسسني بذكر الحمام يدور نثيته..
كمنا نتمشى نغير المصطبه واحد من جماعته سأله
: اكلك انت جنت تلمح للبنات ترى عيب والله عبالي هيج تشاقى جاي لقسمنا و تتحرش ببناتنا..
ضحك
: شعليه ببنات العربي لا الانكليزي ولا تاريخ ولا الرياضيات والفيزياء الكيمياء عليه ببنيتنا يمكم خطار..
: قصدك هاي الي يم العلوية رحاب.. ممم هاي انتظر رد منها صارحتها و شكد ألمح بس ثولة..
حسيته يتمشى ورانه هو وربعه ويشمر حجي درت عليه خزرته ردت أهجم والله لو ما عيب وينتقدوني أكتلة
شكد تافه بس رحاب.. جرتني وهي بعيونها الملونه تخزرهم وياي وذبت إلهم حجاية
: ماكو غيرة ولا اخوة
سكتت ورجعت هددت
: هسة اروح اشتكيكم...
وتركت كلامها معلك وهي تسحبني رحنا بعيد بس نشوفهم كل شوي أباوعله مبين ضايج..
: شعندة وياج؟! معقولة مجرد معجب لو سرسري يلطلط؟
: مو سولفتلجن! هو هذا نفسة المزعج إللي متعبني بتصرفاته وكتلكم صارحني بس اني مو مال أكبل وعلاقات امي ما تقبل وآني هم أخاف
و استحي عيب و مو تربيتي أصاحب ولد.
: زين يجوز غايته شريفه الي اعرفه عن هذا راسه يابس و ما يقلد للبنات و علاقاته محدودة كد السلام و جان خاطب و فسخ هو منو ما يعرف ماجد..
من العام هو بس ترك سنه أجلها لأن يشتغل ومكدر يداوم وقتها هيج سمعت من رند.. هاي طالبة ويانه بس لاطشتله تريده بس يصاحبها وهو مغلس وهم هي عايدة سنه رسبت..
فگالت عنه رجع السنة يداوم هو شاطر وهم سمعت من سؤدد.. تمدح بي تكول خوش ولد..
حنيت لسؤدد.. يعني مدام قيمته يجوز حجيها صح هزيت راسي لا شنو تفكرين تكبلين شكد عيب..
: شبيج ماجدة.. تهزين راسج؟!
: لا ماكو شي ماكو شي..
كلتها و اني ما اعرف شجرالي كمت أخذت اللفكس
: أروح..
مشيت و رحاب.. تباوعلي مستغربه
كلت اسخت للمكتبة دخلت و رحت ادور بين الرفوف
اخذت مصدر وبديت ادون ملاحظات عن تخصصي شوي و دخل وحده گعد يمي وهو بيده مصدر ويكتب ويحجي
: اذا تردين أساعدج بالتقرير معلوماتي تفيدج
محجيت هسه هذا شجابه وراي
: لا شكراً احب اعتمد على نفسي..
باوع للمصدر بيدي و اني آخذ منه معلومات عن التقرير هو أبتسم
: مصدرج هذا ما يكفي لازم أقل شي من ثلاث لخمس مصادر
: قابل بحث تخرج!
: بحث التخرج فوق العشر مصادر هههه لكل باب عدة مصادر تكتبين تقرير لازم ما تعتمدين كتاب واحد..
سكتت قرب لأتجاهي مصادر العنده ودنك تجاه السجل..
: ممم إذا تقبلين أكتبلج التقرير اني عندي معلومات حتى اعرف رقم صفحة معلوماتي وبيا مصدر
دفعت المصادر تجاهه
: لا شكراً انت أهتم بشؤونك ومعليك بيه..
: كيفج مراح تجيبي درجة بهذا تقريرج تقرير الروضة..
بلعت إستهزاءه بأمكانيتي واستمريت بعنادي و اني اكتب تقريري فقط من مصدر واحد..
باوعت للساعه و اني أقتطع أوراق التقرير إللي طلبهن منا الأستاذ
: وخر أريد طريق راح تبدي المحاضره
لح : مكتيلي أُنثى ماجد.. شنو..؟
صفنت بي يبتسم يتعمد يحرجني ويلمح هواي..
: ليش متعرف لازم تكول مؤنث اولاً ثانياً تريد تعرف شنو مؤنث ماجد..
رد بتلهف : اي اي..
: ماعز. هم نفس وزن اسمك صجيجه گبر انت مزعج يا يا شو تضحك..
شو هذا فحط من ضحك مشيت اريد اطلع عايفته استمر بضحكته و ركض وراي..
: ما اسمحلج تحجين على أُنثاي مممم النوب تكول على روحها ماعز ليش ليش ولج ما أقبل..؟
عزا فرها عليه لا اله الا الله هذا شنو من بشر؟
: واني شكو بيك..!
: غير اني أنتظر ردج..
التفتت عليه : مرفوض
عفته و بين ضاج يطكك طكاك شكد واحد ملطلط كعدت مكاني
ورى دقايق دخل الأستاذ ووراه ماجد.. يسولفون شكد ذب لوگير يا نمرة مال طيارة..
: اكعد ماجد.. مفهوم مقترحك حلو..
كعد الاستاذ مكانه و اجه ماجد.. يريد يكعد يمي مقعدي خليت اللفكس عليه كلت يكعد يم ستيج اللفكس
شال اللفكس خلاه فوك عالمسطر مال الكتابة و كعد صفي التفتت صوبه ونفخت بهدوء لا يحس احد جر نفس نفختي و همس
: يا بعد ريتي شو انفاسج علج بوبي احب عطر هذا العلج ضميت أنفاسج جريتهن بريتي منعشه دخيل الله شكد عالچه علچ بوبي..
جان يهمس كلماته بأسلوب عبالك يكول غزل رجع هم همس بصوت كلش ناصي..
: خرب خيالي انتِ وعطر البوبي لو تعرفين شنو تخيلت بشفايفج هاي..
همست : ما جاي اعلج للعلم ذبيت العلج قبل لا ادخل محاضرة لأن عيب واكو شي اسمه احترام للأساتذة..
وشتقصد تخيلت وشجاب شفايفي لخيالك ترى اكول لماما عليك تجي لأمك وتشتكي حتى يربونك اهلك يا ما متربي..
: كوة ضام ضحكتي ولج شنو احنا جهال وتجيبين عمتي المستقبليه هههههه تريدي تشتكيني يم عمتي المستقبلية..
سكت وسكتت من شفنا الأستاذ بدا يصيح الاسماء وهاي اني كلما ياخذون الغياب لازم كون منتبهه..
همس : ما اتوب منج لمن محبس زواجنا بأصبعج بوياي شلون أصابع مبرومه برم..
استحيت : راح أشتكي عليك
: وحيد أهلي وعندي تسع أخوات تدخلين بخطيتهن لو اخذوني..
: اقصد مو للحزب اشتكي برئاسه القسم
: شتكوليله بروف اشكيك ماجد..
تعلك گليبه بهوايه وما شاف النوم لو تكوليله دكتور اكو ولد عاشگني رايدني بالحلال
نفخت بس نزيت نفس الوقت على الأستاذ يم ستيجنا
: اثنينكم طلعوا برى كملوا سوالف..
و نطردت من ورى التافه ماجد.. طلعت معصبة وهو وراي لأن رافعه خشمي كال
: ما طار طير و أرتفع الا كما طار وقع بينج وبين التواضع خيط واحد و انكطع دوم الج بلكت من تطيرين توكعين بحضني..
درت عليه معصبة وبوزت بشفايفي
ورجعت عقجت شفايفي اقلد صوته اخشن بصوتي..
: توكعين بحضني؟ گبر لف هالشكول
انطردت من وراك وفاتتني اهم محاضرة ما يسوى التقرير..
اني احجي ودموعي صبن عود ليش مثل الطفلة ظليت ابجي هو صافن باوعلي و طلع جفيته و خلاها بيدي
جانت جفية رصاصيه قماش ومثل اطار يحيطها ومربع داخل مربع مشهورة جانت بوقتنا.
: نظيفة مسحي دموعج يمعودة ما تسوى ياما انطردت..
: اني ممتعوده شكد زحمة كدام الطلاب..
: اكول ليش ما تتحجبين ترى فات ولد و صفن عليج أغار هيج النوب يباوع لشلالات العسل الواصله تحت خصرج وركز هناك والنبي ما اتحمل لجبريني اعارك الطلاب من وراج..
وسعت عيوني اني وين احجي وهذا شيحجي
: ولك...
و عفته و اني معصبة رد لحكني خلا مدري شنو لزمت جنطتي لكيتها مفتوحة
: شفتحها؟! شهالخفة الأيد العندك عجيب!
: شمدريني بيدي خفيفة اول مرة اعرف و كولي لروحج بيمن مصفنة من فتحتها اذا بيه اعذرج بس آذا بغيري أقتلج..
يا الله هذا شيحجي لكيت ورقة بجنطتي يمتى فتحها وشمر الورقة باوعلي ابتسم..
: لا ترجعيها إقريها زين وبيها رقم تلفوني اذا بلا زحمة ترديلي جواب تتصلين بيه..
خلا وراح ظليت ارجف دايخة يمتى فتحها ومحسيت لو معقولة اني من لملمت الأقلام مسديتها وهو شافها مفتوح السحاب فشمر ورقته..
رحت كعدت بحديقة الكلية و اني بفضول اريد أقرأها طفرت من مكاني فزيت من الشخص إللي صاح......
