رواية خطايا واجتثاث الفصل السادس عشر 16 بقلم نور البصري

أنا خايف منك

وخايف عليك

أخاف أگلك روح… وتفهمني غلط

دوّرت لك حلّ وسط حتى أستراح

وما لگيت لروحي گبلك حلّ وسط

يا نقاط شنو أحطها أعلى الحروف؟

وهي نص حروفنا … بلايه نقط 💔

ـــــــــــــــــــــــــــ♡ـــــــــــــــــــــــــــــ

 

 مــــــــــــ♡ــــــــــــاجدة

نزيت وجفلت جفلة مثل الي نكمشت بالجرم من الشخص الصاح وراي بس من شفته ماجد.. جريت نفس أهون ولا غيره و انفضح و اصير ماجدة.. ام الرسائل وتخرب سمعتي.. 

وكفت واجهته وجهي احمر انفاس خجولة شبه انهت من التوتر وبيدي تلمس الورقة وحاله هو اكثر توتر مني 

: لاااا ولج هنا لا تقرين استحي اشوفج تقرين احاسيسي فراشة وليدة غادرت شرنقتها وفردت اجنحتها الزاهية الألوان وبحبج فردت جنحانها على اسطر حطت على الورقة شوفي رجعي للبيت واقريها.. 

ابتسمت و ضميتها بجنطتي ظل واكف و مدنك وهو يهمهم كلماته وخدوده حمر من الخجل ردت أضحك عليه هذا طلع يستحي ابو لسان.. 

: ذمة برگبتج لا تضحكين على احاسيسي التي سطرتها على الورق كأنها أجنحة فراشات خطت تعانق أجنحة الحمائم لترسم لك أجمل كلمات.. 

كالها و ركض شارد بعيد قبل لا اجاوبه حتى استغربت كلامه ممترابط شنو اجنحه فراش تعانق جناح حمام 

فكرت و اني احس بنغزة قلب ورعشه امتدت حتى لضهري يسموها بعالم الروايات العاطفية و احسست  بقشعريرة ما اعرف ليش هاي المرة 

هناك مشاعر..؟ 

زين ليش ما اجرب الحب مثل صاحباتي شوي خجل حسيته حرك خدودي لا شنو حب عيب مو مال حب اني امي متقبل..! 

كمت و شفت مكدر اكمل محاضراتي ظليت اسخت يم صاحباتي لمن خلص الدوام والسايق الي مأجريه أجه عليه..

ركبت و جاي اعدل بكذلتي واني اباوع بمراية بجنطتي رفعت راسي شفت نظرات ماجد.. بيهن سؤال كلت يمكن مستغرب اضرب الدوام..

بس رجعت للبيت مكدرت ما افتح الورقة و اشوف شكاتب هذا الخبل وسعت عيني على الكاتبه وكعت عالجرباية ميتة ضحك.. 

كاتب : بسم الله الرحمن الرحيم

اما بعد نود ان نعلمكم ان ماجد أسم علم مذكر، ماجدة أسم علم مؤنث ،

انا اعرف قواعد ونحو لكن لكل عبارة مقصد... لذا اختصر العبارات بكلمة احبك.. 

ماجد يحب ماجدة وماجدة تنكر قلب و حب ماجد فما الحل مع ماجدة..؟

(لغة رسائل جيل الطيبين فصحى) 

رغم بساطة التعبير بس مدري ليش ابتسمت ورجعت اضحك من كل قلبي مضاحكة بحياتي هيج 

والله لو مسولف هالرسالة افضل شو بالسوالف يعرف يحجي كلمات مترابطة وحلوة عكس الرسائل.. 

صوت امي تدك باب غرفتي نززني من مكاني بساع ضميت الورقة بصدري قبل لا تدخل 

دخلت امي.. 

: تضحكين شكو؟! 

اشتغلت هديل خانم الست المديرة محقق دوم امي متشددة بتربيتنا 

رجعت سألت بفضول.. 

: بيج شي ع شنو تضحكين ام وحيدة خابرت تكول ضاربة ثلاث محاضرات

: الله يأخذ وحيدة و امها شنو جاسوس عليه شوفي ماما اني مو طفلة تعامليني طفلة بخوفج عليه ترى مو حالة هاي.. 

انصدمت امي من رد فعلي واني اطلع ملابس و اباوعلها .. 

: ماما ممكن تطلعي اريد ابدل ملابسي 

بس طلعت ماما نفخت دوم تعتبرني طفلة قفلت الباب و رجعت طلعت الورقة عبالك رسالة غزل وهي خرابيط بس قررت احتفظ بيها.. 

اول رسالة من شاب و اول إعجاب بحياتي بدت تأخذني أحلام وردية زين شنو الرد يريده 

ضحكت كلبت الورقة شفت رقم اهاااا باوعت التلفون ضغطت أيدي عالأرقام و اتصلت بي طلع صوت مرة. 

: منهووو منهوو اذا ما تحجون ليش تخابرون صجيجة 

شوي وصوته جنه اخذ التلفون واسمعه يحاجي المرة

: لا ترفعن تلفون مدام اني بالبيت اني ارفع الخط بله واحد طايح حظ يسمع صوت بنات النوب يجلبلنا... 

شوي اجاني صوته 

: الووو....  

جان يجر الووو يمكن حس اني ظليت ساكتة و هو بنعومه يتهامس وينعم بصوته عبالك يغازل.. 

: احجوا انتو منو راح ارزل.. 

مدري ليش تذكرت الي على أساس رسالة وضحكت مردت اضحك بس مكدرت سديت التلفون بساع عزا بس لا عرفني يله ميعرف رقمي طفرت من دك التلفون معقولة الفقير عنده تلفون كاشف رقم رفعت السماعه.. 

: بابا امج تكول ممداومة ضاربة ثلاث محاضرات

: بابا سهيل..امي تسمع كلام ام وحيدة ووحيدة غيورة لأني شاطرة كذابة داومت.. 

: اني خفارة بنتي لا تتعلمين ضرب محاضرات 

ورى ما كمل مني سده رجع دك التلفون من غير مشوف الكاشف يا رقم توقعت بابا لؤي.. رايح للجامعة و ملاكيني و خابرني فتحته وبتسرع كول..

: الوو بابا لؤي.ترى مضربت محاضرات اليوصللكم كذاب و غايته مغرضة

استحيت من سمعت صوته يجر الكلمة بهدوء

: الوووو جمال صوتج سمفونية بتهوفن

رجع صوته يضحك و عقب على كلامي من عبالي بابا لؤي.. اتصل 

: والله انتِ كذابة ههههه مو اني بشعبتج و ضربتي المحاضرات

: انت منيلك تلفون كاشف رقم؟! 

: ليش مو من حقي؟! رجال شاغول و اني اشتغل واشتري عاب تكبرج عبالك سعره بمليون.. 

: ماجد.. لو حسو اهلي تتصل بيه ترى تختفي لتكول منبهتك اني وحدة مو مال احب و انعشك و تحمل خطايا جديدة مبيه حيل فدوة عوف سالفه احبج وحبيني ونبقى زملاء أفضل.. 

سكتت تلفون مو مال احجي تفاصيل..

: ماجد.. فدوة لا تتصل بعد والله اتأذى و انت تتأذى أكثر.. 

: كولي أحبك 

سكتت : كولي يله 

: باجر نحجي هسه عوفني لا تتصل

سديته ونزلت اتغدة امي كاعدة تدرس اختي و اخوي يلعب اتاري

: ماما جوعانه.. 

: ذاك المطبخ و صبيلج.. 

ورى ما اكلت لكمه ظليت متخوفه لا يتصل و يسببلي مشاكل هذا عباله اني من عائلة فري وعادي يتصل بيه 

ظليت كلش متخوفه لا يتصل مسحت رقمه بساع من كاشف تلفونا

شوي دخلت امي رغم اكو تلفون عدنا بغرفه ماما و بابا سهيل بس ميقبلون اخليلي تلفون بغرفتي لذا تعرف من اتصل بصاحباتي أخذ تلفون الصالة لفيشة غرفتي.. 

: صايرة هواي تستعملي تلفون لو تهتمي بدروسج بدل ما كاضيتها سوالف انتي و صاحباتج.. 

: ابتسمت بس داخلي يرجف وهي دنكت تريد تفصل التلفون وترجعة للصاله رن لحد الان أذكر نغمته صوت عصافير كناري رفعت التلفون

: الو.. الو.. منو.. لا يا طايح الحظ اني كد امك بس شباب هذا الوقت الله يستر منهم.. 

سدته وهي تدردم شلون تربية ادبسز يكولي احبج جيجي احبج ماجي ماجيتي انتِ وجيجيتي بله هذا شحاجيه..

بخوف همزين اني اهلي ميدلعون اسمي ولا تعرف جيجي وماجي الي هي اني و دلع طلعه الي ماجد.. 

عرفته هو من الدلع عود كتله لا تتصل و تسببلي طلايب بس لا تشك بيه النوب تبطلني امي متسلطة و معدها مانع ابتسمت اشاقيها اضيع السالفة.. 

: اي عيني معجب ويدلع بيج

متقبلت الشقى غمتني... 

: طايحة الحظ شحصلت من معجبين قبل حتى احصل من هسه شوفي بعد لترفعي التلفون اذا دك اني مرة جبيرة وتغزل بيه لا يسمع صوتج النوب يلطش وابوج سهيل.. يسكت؟ لا والله

هي تحجي وتكلب بالكاشف وسجلت رقمه بورقة خفت كلش صخام الصخمني هاي بس لا تسلمه بيد بابا سهيل.. راح الولد

بعدني احس بالذنب حسن.. اختفى من وراي وما اعرف بابا سهيل.. وين خفاه عايش لو ميت شنو وضعه.. 

بعدني احس اني حماله الحطب و احساس الذنب يرافقني لو ما اني اعاند بابا سهيل.. واستقبل بابا لؤي.. ببيت صاحبتي ما اعتقلوا حسن.. و انتقم لأن فتحوا بيتهم لبابا لؤي.. بس شكد ظالم بابا سهيل.. 

بس اكمل جامعتي لازم اعوف امي 

و رجلها اعيش وي بابا لؤي.. بلغت 18 والله افكر اعوفهم من هسه.. 

بس لازمني اخواني انتصار.. و حارث.. اكيد يمنعني بابا سهيل.. من شوفتهم ويتبرى مني.. 

ظليت محتارة وهم اكيد يسبب لبابا لؤي.. فد مؤامرة ويمحي وجوده وهنا يعني اموت اذا خسرت ابوي اكيد يدبرله إعدام لو اي تهمه ويختفي مثل حسن..

مااريد اصير اني سبب ولو غير مباشر بأذيه ناس كافي الصار بسببي لحسن.. كافي سؤدد.. بعيونها انرسمن فقدان و حزن زائد خسرتها كصديقه 

اعرف محملتني المسؤولية شكد حاولت تلمح الي ما اجيب بابا الهم 

و احرجها بس بعد اني اغلس شسوي محتاجة بابا التقي بي

مجنت اتوقع بابا سهيل.. مجرم ممكن يأذي ناس اصدقاء عائلته 

امي وامها صديقات قبل لا ام سؤدد.. تشتغل بالخبز و الطبخ شعور الذنب حيل بداخلي وحسيت اني شكد فكر 

ياريت ما قبلت بمقترح سؤدد.. نلتقي ببيتها ياريت من بدت تنسحب شفت حل حتى لا بابا سهيل.. يأذيهم قررت من اكمل جامعة اعوف هذا البيت و ابدي حياة يم بابا لؤي.. 

راقبت امي وتبعتها بحجة احجيلها عن الجامعة وعن صاحباتي وهي تنصحني لتعلين صوتج لتضحكين لتحجين وي ولد يكولون هاي خفيفة بيها مجال للتكبيل انتِ بنت تربيتج واخلاقج لازم تخليهن بين عينج ثقتنا بيج..

شفتها ضمت الرقم بالكومدي يم جربايتها هي ليش اخذته مكالت خاف واحد غلط بالمكالمة بس امي و اعرفها 

راح تبدي تجيك كل مكالمة مجهولة و تقارن الرقم يتكرر اذا لح و كرر اتصاله هنا تسلمه لبابا

: تدرين ماما اصواتنا تتشابه و هواي كالوا اني وانتِ نتشابه هواي

: انتصار تشبهني اكثر منج انتِ تشبهي  كلش هواي بيج منه.. 

وصفنت بعيد وذبت حسرة وعيونها دمعت 

: اي عيوني على بابا لؤي..

باوعت ورجعت لقساوتها من بابا لؤي.. توها كالت بيج منه هسه عصبت.. 

: شجاب لجاب عيونج أحلى و لونهن صافي.. 

هزت ايدها وطلعت من غرفتها والتلفون بعده بيدها 

والله احجي وياها و گلبي يم التلفون هسه يخابر هسه يورطنا وي امي وبابا سهيل.. شلون قنقينة ذول ظليت لازمة گلبي بيدي ع يا ساعة خاف يتصل..

من اخذت تلفون وياها غميت كصتي ضربتها و اي ادردم

: اخذته بيها الخير

مديت راسي اباوع ترجع لو لا شفتها نزلت جوه ترجع التلفون بمكانه و اكيد للمطبخ تلتهي بطبخات معجنات بهيج وقت وهناك تنسى نفسها..

بساع اخذت الرقم كاتبته بقلم رصاص اخذته من غرفتي و بساع طلعت مساحه مسحت من النص رقمين 

و غيرتهم بأرقام من يمي حتى لا تشك 

غيرت البدالة مال المنطقة قبل كل منطقة الها بدالة بداية الرقم خليت بدالة منطقة بعيدة كلش عن مركز المدينة 

شفت ما بين أثر شي ممسوح بساع ركضت خليت الرقم بمكان الي ضمته و طلعت سديت الباب.. 

هسه شلون انبه ماجد.. لا يتصل لا يعم عليه وعلى روحه 

بدلت برمودة و بدي و تركت شعري محلول كان شعري بوقتها كلش طويل لبست طوك الملم من الاعلى رحت للمطبخ بست ماما

: ماما اروح لأم وحيدة اخذ محاظرات 

باوعت امي الي.. 

: مو كذبيتها وكلتي انتِ مضاربة محاضرات

اضطريت اعترف

: ماما دخت تعرفين عيني توجعني والله كلش مالي خلك وضربتهن بعد متنعاد

صاحت ماما 

: حارث حارث وينك ماما تعال وصل أختك.. 

: عوزها كبر وين اوصلها هذا موديل جديد دومها تطلع و تطب شعليها.. 

غمته امي

: عود اعلمك تخاف على اختك بس انت اغم روحي ماما ولا تتأخرين

: اي صار.. 

طلعت بسرعه رحت ركض لبيت جيرانه ام سؤدد.. حتى لو ميتقبلني هاي حاله ضروريه دكيت الباب طلعت امها بعدها تحت شيلتها عصابه و لابسة الاسود حيصير اكثر من سنتين ولا ذبته

: خالة بسرعه لازم اتصل ضروري

باوعتلي بعيونها وجع و حرقه قلب ودموع مكتومه دارت وجهها عني

: بنتي ردي بيتكم بعد شعندي واخسر بس بنتي البقت ساعة السودة العرفناج بيها فال شؤم.. 

بلعت كلامها حقها بسببي خسرت اخوانها وابن اخوها مختفي محد يعرف اراضيه شوي و طلعت سؤدد.. 

: منو يمه وي منو تحجين؟ 

شافتني و دارت وجهها وكالت

: ها شكو...؟  

من طلعت سؤدد.. امها فاتت داخل البيت 

: سؤدد.. ماجد.. بخطر راح يلحك حسن.. لازم انبهه فدوة ولج فصلت فيشة تلفونا على ماانبهه خليني اتصل بي.. 

هي استغربت شنو ماجد.. شنو انبهه 

: ليش شنو بينج و بين ماجد.. 

وخرتها وفتت للحديقة

: ما بينا شي بس مو وقت تحقيق وياي و استعلام لازم الحك اتصل 

آشرتلي بأتجاه التلفون وهي رافعة خشمها جان شعرها مبلل محلول طويل من اختفاء حسن.. 

بطلت تقص شعرها شعثة مبينه جانت بالحمام و تمشطة هي جوة الدوش حتى تسيطر على ردة الي بشعرها 

لملمته و دخلتني من باب الصاله 

بحنين لذيج القنفة ياما كعدنا اني وياها و مريم.. و نسولف راحت ذيج الايام كله من رجل امي دمر اجمل صداقة كعدت وهي واكفة بملل تباوعلي

: لا تطولين لا وادمج تنجلب علينا.. 

شوي و تراجعت عن كلامها بحذر همست

: محجيت شي اوكي اهلج ميقبلون تجينا ولا تلتقي بينا لذا خلصي بساع وروحي لأن لو عرف ابوج يمحي البقى بينا

: اي بابا سهيل.. كلش طلع ظالم بس تخرج اهج من بيتهم..

باوعتلي و همست

: وين تولين؟ 

: لبابا لؤي.. 

دنكت وكالت

: خلصي مكالمه بساع لا يعتقلني اني وامي احنا ناس فقرة مابينه اهاليتج 

وتعلمي شغلة ابد لا تنكرين الايد الي تنمد الج مهما يكُن زوج امج هو الرباج و الأفضل متعوفين امج اتعجب عليج! 

الحوار بينا كان ثواني واني افر الرقم طلع الي صوت مرة

: منهو.. آلووو

جانت تمد اول حرف واخر حرف تجره مبينه من لهجتها مناطق شعبية

: أأأ... العفو ممكن ماجد.. 

ردت المرة : وانتِ منهي وتردين  ماجد..

سكتت بقلق معرف شكوللها بس لازم احاجي 

: زميلته اريد واجبات آخر محاضرات ما حضرتهم.. 

شوي و اسمع يمها درمه دجيبي مو كتلج لترفعين تلفون و هي ترد عليه 

: حقك حتى يخلالك الجو عيني بنية عليك.. 

ردها مستغرب

: بنية؟! مااعرف بنات فسخت خطبتي من البنت الوحيدة اعرفها بنت عمي بنات الجامعة اخواتي.. 

جان يحجي والظاهر السماعة بيده لأن صوته قريب شوي حاجاني..

: الووو منو حضرتج؟ 

: ماجد.. فدوة لا تتصل بيه اليوم باجر افهمك بس لا تتصل

: ماجدة؟ استغربت الرقم مو الج هذا رقم ثاني عدكم؟ 

بأستغراب رجع عاد الكلام وكال

: شنو كم خط عدكم هذا طلعلي مو نفس رقمج

: رقم سؤدد.. الي بشعبه ج..

حجيت متردده وعيني على سؤدد.. غمتني ودردم

سؤدد : دتشهرينا هسه يتوزع رقمي 

رجع ماجد.. يحاجيني

: شبيج شصاير مساع اختلط صوتج عليه عبالي انتِ و اني طايح غزل طلعت امج فد استحيت كلت بس لا حست

: شوف لا تتصل وباجر اني افهمك الحجي مو مال تلفون

: خوش من صوتج خايفة عليه الله والله العشك شكد حلو خوف على لهفه على.... 

قاطعته : لازم اروح لبيت ام وحيدة.. خاف امي تدز حارث.. وراي لبيت ام وحيدة.. الفتانة او تخابرها اني كتلها اريد تأشرلي الدروس بالمصدر لأن ما افهم المادة هاي لذا قبلت اطلع بدل ما اتصل بيها..

: لو متصلة بيه ومحاجيتني كوحيدة

: لا اخاف من هيج شي بله اخذت السماعة أم وحيدة.. صديقة ماما

بس رجع ضحك 

: زين وهاي وحيدة.. لويش تسمينها الفتانة وحارث.. هذا النوب منو؟ 

: مو وقت تفاهاتك العليه نبهتك تريد حياتك لا تتصل بيه لمن باجر أفهمك

ضحك : اويلي زين منو وحيدة.. هههه 

شوي سكت وهم ضحك مليق والله صفيق.. 

: ها وحيدة الي بشعبتنا أمني متحجي بعد لأهلج شي هاي حبيبة صاحبي نصار.. راح أحاجيه بس حارث منو؟! 

: اولاً حارث.. اخوي وثانياً اني معليه بيك ولا بيها ولا بصاحبك يله باي نبهتك ترى حياة او موت لا تتصل ولا تستهين بكلامي.. 

رد بشقى : أويلاه.. 

ولا عبالك مصدك الوضع صدك خطر على حياته سديته تشكرت من سؤدد.. الي تباوعلي بعين ونص عود شنو بينكم انتِ و ماجد.. بس اني ترخصت و طلعت ركض لبيت ام وحيدة.. 

: هلو خالة اريد وحيدة الواجبات اريدهم منها

: اي خالة تفضلي توها اتصلت أمج ظل بالها يمج..

: خالة عثرت وكعت ورجلي كوة امشي واوكف لو اكعد أرتاح لمن وصلتلكم.. 

: دخلي يم وحيدة.. جوة و اني هسه أتصل بماما أطمئنها عليج بس دارت ظهرها تسبقني غميتها فكر بس سوله نقل كلام

مممم وحيدة طلعت مصاحبه ولا ادري هاي يمته كبلت بس خوش خلي أكرص أذنها حتى متوصل بعد اي كلام لأمها

دخلت وأخذت واجبات و انطيتها المصدر تآشرلي المهمات الي الاستاذ يريدهن.. 

و اصلاً جيتي تمويه لأمي لا تشك بطلعتي لأجل شنو ووين...؟ بأثناء السوالف كتلها 

: طلعتي مكبله اكول ليش اشوفج ورى الجامعة تلتقين بنصار.. و اني عبالي هو يركض وراج و انتِ متقبلين

تلفتت وأرتبكت... 

: اشش لا تسمعج امي ترى أنذبح يردوني لأبن خالتي خلي و اني اريد نصار.. 

: مممم لعد مدام هيجي شيصير وياي بالجامعة تسكتي بس تفتني أفتن عليج.. 

حجيتها وكمت : يله أروح أتفقنا 

بخوف كالت : أي أي أتفقنا يله روحي. 

الأدبسز خافت لدرجه بس تريد اطلع رجعت للبيت سويت روحي أعرج تلكتني أمي بقلق 

: غير تمشين عدل الفاهيه شبيج خوثة لو مكسورة رجلج

ابتسمت ام وحيدة اول مرة تنقل شي لصالحي

: ما انتبهت دعست حجارة وكعت على ركبي

: تعاي نزعي برمودتج خلي اشوف اكيد تزلغت.. 

: لا ابد بس هيج من أثر الوكعة.. 

باوعت لبرمودتي المتربه و امي جنها أقتنعت

: فوتي سبحي و درسي.. 

ردت اصعد الدرج صاحتني امي بنظرة عينها تساؤل 

: من اتصلت اني بأم وحيدة.. لكيت فيشة التلفون مفصوله 

يكرم الله مو بيت محسسيني بمعتقل وتحت التحقيق المستمر.. 

: خاف انتِ ما ركبتيها من رجعتي للكلدور. 

: متأكدة ثبته..! 

: ما اعرف شوفي انتصار.. او حارث.. محركيه.. 

: والله دايخه جائز ما ثبته زين ومن اختج نظفت محركته.. 

: احتمال بس ليش تسأليني اني شكو؟ 

تعمدت هيج احجي حتى ابين مو يمي الشغلة وعقبت

: شنو يعطل لو يخرب لو يفلت بغراضكم اني أبتلي

ردت بحدة 

: غراضكم؟ لهجتج ادبسز صايرة هيج الجامعة تخرب.. 

تعمدت اعلي صوتي ابين ظليمتي

: والله شيعطل صحتو ماجدة.. 

غمتني : صايرة قليلة أدب من يوم الي... 

قاطعتها 

: قابل كذب ما انسى حرمتوني من بابا و حسن.. ذمة برقبة رجلج

: رجلي أسمه بابا سهيل.. خوش لهجة جديدة لا تذبين تهم على عباد الله

وظلت تحجي متقبلت.. 

: كل التحجي ميقنعني لأن أعرفج تردين تغسلين عقلي.. 

حجيت وركضت من هدت عليه تريد تضربني بس ملحكتني و اني اصعد الدرج محسيت الا شحاطتها أم كعب بظهري 

لزمت ظهري ابجي و دردم واني اكمل صعدتي وهي هم متسكت ظلت تغلط عليه 

ثاني يوم بالجامعة عيوني تدوره بقلق ما اعرف ليش بس الخوفة الرهبة الي صابتني من امي سحبت رقمه من الكاشف خلتني أعرف عندي مشاعر اله

دخلت القاعة قبل موعد المحاضرة شفته هو وصاحبه يتبسبسون من شافوني سكتو و شوي صاحبه طلع

وكف و أجاني 

: بعد نص ساعة على المحاضرة ترحين للكافتريا عازمج ريوك

رديت بخجل و بساع 

: متريكة ماما متقبل نطلع بلا اكل ولا نأكل بهيج أماكن... 

: متقبل ماما داحس داحاجي بنت الست سنين.. 

رجع صفن بخدودي وكال 

: من خديداتج مبينة كله تشريب 

وسعت عيوني شبي هذا

ضحك : اشاقى يله نشوف قضية الحياة او موت.. 

بطلعتنا تلاكينا اني و وحيدة مرافقها نصار.. الي ابتسم لماجد.. و ذب بسمار

: ها ماجد.. هاااا نكول مبروك..

رزله ماجد

: انجب وولي مثل مكتلك ما اريد تفتن يم اهل ماجي.. 

حيل استحيت ديدلعني يم جماعته دنكت ومن رفعت راسي لمحته يخوزر بوحيدة الي دنكت بخوف أصلاً مني مو منها تخاف أفتن.. 

: هلو ماجدة.. شلونج

سلمت هي عليه تبين حسن نيتها هنا بررت تواجدي يم ماجد.. 

: ماجد ممثل شعبتنا لذا أجه كالي أروح وياه لرئاسة القسم يريدني بشغلة نقص مستمسكات مدري شنو

: اي اي روحي براحتج اني لا شفتج ولا انتِ شفتيني

افتهمت تلميحها بس ما حبيت عبالك لازمة لزمة عليه هذا نصار شنو كايللها عني بس لا مسويني حبيبة لصاحبه يمة صخام فشلة و النبي عيب.. 

: ماشفتيني بشنو يعني؟ مفهمت؟! 

وتقدمت على ماجد.. بأتجاه رئاسة القسم اسوي تمويه على وحيدة الي خلت وطلعت هي ونصار الكضاها يتمضحك ابو حلك فاهي تلفتت ماكو عاد رجعت و ماجد.. جان بعده بمكانه واكف بس يضحك..

: انت هواي تضحك ترى هاي قلة أدب  شوي ثگل ولا احب الولد خفيف مو رزن.. 

سكت صافن بعيوني وتجاهل رزالتي

: هاي عيونج بلونهن تحرق مشاعر قلبي..

نزلت نظري للكاع احرمه من نظرة عيني الي تغزل بيهن

: روح لحال سبيلك ونصيحة اذا تريد روحك و ارواح وادمك واهلك لتلزكلي اني وراي ناس مراح يقبلون بيك والله تروح ورى الشمس لازم اسوي مايمليه عليه ضميري مااريد تحمل ذنب جديد

ردت اجفص بسالفة حسن.. فسكتت

امشي وهو بصفي وسألني 

: ليش الملائكة تذنب؟

باوعتله نظرة جانبيه وبصراحة صارحته لا باجر يلومني اني نبهته.. 

: وممكن تكون سبب إعدام او اعتقال او حتى دمار..

رد يتظاهر بالتعجب.. 

: أويلاه كل هذا من ورى الملائكة يصير لعد لويش آسمهم ملائكة خوب ابالسه واهون عليج توديني إعدام.. 

جريت نفس و اني اتوجه للمكتبة

: هناك نحجي وهم اكمل التقرير

: لوتية هسه عرفت مجرجرتني وتهنبلين براسي حياة وموت حتى اكتبلج التقرير لأن تقرير الجهال القدمتيه مجاب درجه بيها خير.. 

سكتت هذا بالع مسجل مدري إذاعة كعدت بالمكتبة بعد ما سحبت كتاب و اسجل معلومات واحاجيه بهمس واتلفت

: ماجد.. لا تتصل لأن زوج امي كبير بالحزب و من نوع ميتقبل تصرفاتك و توقع تطخ بعقله ينفيك لتحملني ذنب جديد على كتفي لتحملني أهلك يدعون عليه لأني سبب أختفاءك أو موتك..

دمعت عيني تذكرت حسن.. وحسيت بلچمة داخلي و شهكة دموعي تنزل والله ما اريد اصير سبب إعتقال شاب آخر كلامي بگلبي حجيته بس هو ردد

: ذنب جديد؟ ليش اكو قديم انتِ شنو سالفتج محيرتني والله كل حجاية وكلتي اهلي امي متقبل و داحسج  منطوية.. معقدة.. مستفزة.. وطاح حظه هذا الي مختار الا التلوعه... 

وهو يضرب صدره جهة قلبه.. 

كمت معصبة

: هو اني هيج و اكو امور مو يمك ولا كرباك لتسأل بيها كل العليك بطل تتصل

ساومني

: لعد انتظر أتصالج انتِ حتى لا احملج ذنب جديد ولو معرفنا القديم

جريت نفس 

: خوش تساومني يطبك طوب تتصل وتكرر اتصال رقمك بالكاشف امي سحبته بس خليها بعقلك انت بخطر..

شفته وجهه اصفر وصار خايف متوتر

: راح شتسوي امج برقمي بس لا امج هم حزبية

: اي الأفضل تخاف وتعوفني أوكي.. 

مكتله اني غيرت بالارقام لا يتصور احبه و اخاف عليه رد بحسره

: لو ما هذا يدك بس الج وإلا المثل زوج امج صعب يتناسب خصوصاً للي مثلي اخوة اخواته من ابوه انعدموا.. 

سكت ومكمل بس ذب حسرة وعافني  حمدت الله سمع الكلام جريت نفس مرتاحه بس رجع التفت وبعناده همس

: أحبج لدرجة هلا بقيود و أصفاد هلا بحبل المشانق لأجلج تنراد.. 

هزيت أيدي 

: اي بيها الخير من تصير صدك عود بالقبر أو معتقل ظل كول الشعر و اني اظل طول عمري متحملة ذنب خطايا أجتثاثك. 

تركته ولحكني 

: ترى احبج هواي تتهربي مني ليش

اكو بعمامي من العشيرة منتسب للحزب بلكت واسطة.. 

رد گلبي ينغز بي

: ممكتوبلي اعيش قصه حب ما اعرف شنو تاليها لا تزعل بس المثلي أهلها ينطوها الك؟ 

رد بكبرياء : لأن فقير

: لا بس لأن سمعت من الطالبات اخوتك إعدام واهلي عائلة حزبين و انت بنفسك أكدت اخوانك معدومين.. 

همس يتلفت

: اولاد مرت ابوي مخاوين اخواتي الزغار يعني حتى مو من عشيرتي هم.. 

: و اذا هم يأثرون على علاقتنا.. 

كلتها و طلعت من المكتبة ظل هو واكف مكانه مثل المضروب مصفن بس هذا الواقع وما بيه حيل لنزاعات و صراع وملاحم حتى يوافقون عليه لأن اعرف هنا مصيره يقتلوه.. 

      

   شــــــــــــ♡ــــــــــــيلان 

جنت بالمحاضرة من شفته من الباب ابتسمت و ترخصت من الأستاذ.. 

: اكدر أطلع... 

آشرلي طلعي لميت اللفكس و أخذت جنطتي وطلعت مديت ايدي اسلم عليه

 

: بروان مشتاقتلك.. 

ظليت ابجي وبيد امسح عيوني وهو يبتسم حوارنا كان بالكوردي.. و انتبه بعض الطلبة لكلامنا و ابتسموا بفضول.. 

ضحك : الشوق جابني الج

: صدوك عود

جر نفس

: ايي و انقلت هنا.. 

: يعني راح تستأجر هنا لعد اطلع من الاقسام داخلية و اكعد يمك.. 

بساع رفض : لا.. 

تحول احمر اكثر مما بشرته حمره 

: اكيد بس وصلت اجيتني.. 

شفته انحرج بحزن عقبت

: تمام اكيد نمت و ارتاحيت يمتى اجيت 

: امس بالليل مكدرت اجيج للاقسام كلت ممنوع.. 

: تعال ويايه.. 

لزمت ايده حسيت رجفت بين ايدي 

: شبيك؟! من يمتى مني تجبجب؟ 

سكت ودنك وهو يماشيني و اني حاضنة اصابيعه بين اصابيعي كعدنا بالحديقة

: شخبار امي و أهلي بيت عمي؟ 

: زينين..  

: والله مشتاقتلكم احسب لعطلة نصف السنه حساب

: شيلان.. اني كلش داشتاقلج والله اعرف ناس من الجنوب خليتهم يوفرولي شغل هنا حتى ابقى قريب منج الى ان تكملي دراستج مكدر افاركج افكر اطلبج واليصير يصير

فرحت اخيراً نطق ابو الهول رديت ابسمره

: و آدم.. 

دنك : مثل ما اني سنين مضحيله بكلشي اجه وقت الأختبارات و تبين هنا بالمواقف اخوته.. 

ثقي لو تحبيه اله و متحبيني انسحب هنا و اضحي لأجل حبكم لذا أنتظر بالمثل يعاملني.. 

: خاف تخرب خوتكم بسببي..

دنك : هو الاكبر بينا لازم يكون أنضج و ميدمر حبنا

: هو ميعرف بحبنا تتوقع يتقبل؟ 

ذب حسرة 

: ما اعرف ما اعرف الي اعرفه الأب الروحي الي أبوه دومه وياي وينفذ شريد.. 

ظليت اباوعله فرحانه اخيراً قرر يخطب وبين خايفة لا ينرفض ويعني هنا ينطرد 

بس قلبي مطمئن من عمي يموت على بروان.. يتيم الأم والأب مجهول المصير وميخلي شي بخاطره بقت العقبة زوجة عمي و آدم.. وأبويه

مديت ايدي قطعت وردة وخليتها بجيبه و ضحكت أبتسم ودنك يباوع لجيبه والوردة ورجع يباوعلي و جر نفس..

لزمت ايده هو رغم تربى يمنا أقصى الشمال بس أصوله من قرية منكوبة بإحدى المحافضات الشمالية هو فيلي و اني مو فيلية.. 

: هواي أحبج..

: و اني هم.. 

و اخيراً نظراتنا صارت وعود و جهاد حتى ننجمع ببيت الزوجية.. 

        

  مــــــــــــ♡ــــــــــــريم

من يوم الفتنت على نصير.. قرر يترك منطقة أهله الى منطقه ابعد بحجة  اقرب لشغله بس الواقع يريد يأخذ راحته.. 

صوته يلعلع و اني ارزم ملابس الي و لياسر.. و لوازمه خليت لفكس الكتب بالجنطة لأن أمس كال اسبوع ميجي عنده شغل و كال ترحين بيت أهلي مقبلت فعاركني.. 

: ليش انتِ بنت باشا و تستنكفين.. 

: مالي خلك مشاكل اني وأمك 

جر شعري من يوم الي طلعلي وجهه الثاني وهو رجع تصرفاته وياي دمار نفسي وجسدي..

: لج تاج راسج أمي على الأقل مو مثل جرفتج فكر كم صفقة اخسر من يوم اخذتج ساعه السودة. 

رغم وضيفته بالحكومة هو عنده مكتب وتاجر مرتب وضعه بغرفه التجارة ودوم يسافر للأردن لهذا الغرض.. 

: عوفني والله مو حالة هاي شبيك تخبلت عليه شجاك ارجع لصلاتك لعقلك لدينك ارجع قبل ليفوت الأوان.. 

طك راسي بالحايط وهو يكول

: روحه لأمج ماكو معاجبج أهلي عندج بيت جدي وتنجبي هناك

رديت بقهر : صار.. 

: تكسيات ماكو ترحين تجين فورتات..   

: لويش أبو الخط وينه

: طردته مرتاحيتله و انتِ شكو تسألين عنه لازم عاجبج و تردين........  

انصدمت بفشرته ظليت أستغفر.. 

: دصيري خوثه و جربي تكسرين كلامي الا اطلع حليب امج الجلبة النكسة من خشمج بنت ال........

راددته

: شبيه خوثه و بطل الفاظك ترى أنت صرت ابو ياسر.. يعني اب يعني مسؤولية بربك ما تستحي من الفاظك لو من يكبر إبنك يسموه ابن ابو العرك شجاك تغيرت مو جنا عايشين ومرتاحين مستورين... 

تجاهل نصايحي كالعادة 

: ديري بالج يم جدي لو أبويه لو يم اي شخص من اهلي تجيبين سيرة بعدني اشرب صرتي تعرفيني مريم.. 

تكفي شري ساعة السوده اخذتج شورطني بيج دشوفي النسوان شلون تونس زلمها شلون تستقبله وتريحه الا حظي من همداني.. 

ظل يرطن ويرطن ويشتم اليوم الاخذني واني مفهية أباوع و اكول لويش تغير زين وين اروح 

ازعل يم امي ما عندي ظهر وحتى السند العشت استند عليه بعته برخص ميوكفلي بعد لا والله اول شماتي يصير هزيت راسي اي.. وسألته

: ابو الخط لويش ميجي عليه مو انت آجرته الي .. 

رد بملل

: كتلج مرتاحيتله ارتاحي يله لأن تعاركت وياه و طردته شبيها الفورتات لو الا بنت الباشوات سايق يجيبها ويوديها شو كلج تربيه امج ام ال........  لو رجلها النصاب يدور دكات عشائرية.

رديت بملل

: تمام يله لازم اروح فاتتني اول محاضرة

: طز مال ابطلج بس جدي ااخ واكفلي وكفه  

دك التلفون و رفعه خفت لا شيلان.. واتفشل من يحاجيها بفضاضة لأن أمي خالتها يعني ضمن القائمة السوداء كل مرة تتصل هو مسافر لو بالمكتب 

حمدت الله مو هي باوعلي آشرلي روحي من وجهي طلعت بس أنتجيت على حايط ممر قريب من باب الهول اتصنت اسمعه يحجي 

: شوي و اجيج يمعودة المن غيرت منطقتي و تبعتج و كعدت مكابلج والله مكدر افاركج لذا يمج سكنت..  

رحت باوعت من شباك المطل عالشارع مقابلينا يا بيت من ذوله البيوت نزلت دموعي على حالي بمنطقه عشيقته يا مرة تقبل الى متى تسكتين مريم.. وتغطين أفعاله 

داخلي سؤال هم يجي يوم وأنتفض و أتركه هم يجي يوم أجتث جذوره من حياتي ظل سؤالي دون جواب وفززني صياحه

: يمتى تولين يله...؟! 

كلت بگلبي مستعجل اطلع حتى يروحلها اخذت الجنطة وابني وطلعت احس ثكل الهموم و التهميش والاهمال الي أعانيه أثقل من حمل الي شايلته بجنطتي راس الشارع آشرت لفورت و صعدت....

       

   ســـــــــــــ♡ـــــــــــؤدد

مكدرت اداوم اليوم احس بخمول و اعتقد تمرضت أمي اليوم مدري شبيها كل شوي تباوع للشباك و ترجع تتحسر

: شبيج يمة؟ 

: ما ادري أحس گلبي يرفرف و يدك واجد.. 

: لويش ينبض حيل خفقان شنو اخذج مستشفى.. 

: لا مو مريضة هي الدنيا خفگتني وخسرت خياني وولد خيي باقيلي بس جلال اخوي من ابوي الله يحفظه ولا يراويني بي شر بس اليوم توجس  شي  داخلي مدري شمالني يمه استاهد داخلي شي ممعروف.. 

ظليت مثلها اباوع كل شوي من شباكنا لباب الخارجي كلت يا ربي شنو هالإحساس معقوله يرجع حسن.. امي نقلتلي عدوة هاجسها 

فكلت احسن شي توضى واصلي ركعتين لوجه الله بعدين كعدت اندعي لله احساس امي يطلع بـ رجعة حسن.. 

 

ظلت امي اليوم كله مثل الحمامة ترفرف مرة للباب تباوع مرة من الشباك وتذب حسرات وتحجي وحدها

: ياربي مدري شبيه اليوم عيني عالشباك وعالباب سؤدد.. يمه زهبيلي لگمة من الصبح مامش على لحم بطني.. 

: اي يمة .. 

: يا نظر عيني لا تتعبين رويحتج باذنجانة و گليها وهاي هي..

: ما ماكله شي يمة على لحم بطنج..  

: ميخالف يمة ميخالف هي البطن تتقشمر حتى لو بشربة ميه..

رحت للمطبخ ما هان عليه تأكل باذنجان فتحت الثلاجه شبه فارغه بتيته باذنجان شوي خضرة طماطة ماكو غموس (لحوم و دجاج سمك ) 

جريت نفس وطلعتلها باذنجانة… أوف ربي يمتى أمي ترتاح ويثمر زرع صبرها؟ 

مديت راسي من المطبخ اباوعلها امي زغيرة بعدها لأنها اصلاً تزوجت بعمر 12 ولدتني ورى سنه زواج بعدها شابه وترملت ورى كم سنة زواج اني طفلة وقتها كون هسه مرتاحة وكاعدة مدلله 

يمتى يِمة الله يفتحها بوجهي واعوضج عن كل شي يمتى تحصدين زرع صبرج

رجعت للمطبخ وسديت الباب وراي

كلت اسويلها جاي اعرفها زين ما تأكل نواشف الا تشرب وياه لبن لو جاي 

كملت كلشي بس صوت بجي جذب سمعي ضربت صدري اركض يمة شبيها امي دخيلك ربي ملكيتها بالصالة وباب الطالع لبرى مفتوح ركضت لباب الكراج 

وكفت بصدمه و امي و شاب يتحاضنون الطول الهيئة المألوفة

: يا يمة رديتلي أوف يا بعد طوايفي وعويناتي البجي عماهن والله ولك بهمومي اغص وبهمك انت بحدك كفه   اووووف ولك موش مصدجه وكاد لنجنيت..

لزمت أية الكرسي التزين رقبتي و گلبي يرجف بفرح وجسمي مكدر كوة شايله نفسي.. 

مكدرت بعد رجلي خانني وكعت على ركب رجلي و اني كوة مسيطرة ما اغمي عليه اي ولج رجع اي سؤدد.. اي 

هياته نفس شعره ظهره هو طوله اي رجع رجع و صحت أصيحه الغايب رجع حسن.........