رواية عيون المها الفصل الثامن عشر بقلم ظل الياسمين
كل شي في هذه الحياة اما ان يتركك او تتركه الا الله 😓ان اقبلت اليه اغناك وان تركته ناداك
كال اليوم اضلين يمنه لحد ما نتاكد من الكتاب لمزورته
دخلنه رعب اني وعمو سالم
_عمو سالم كله/من رخصتك خالي اني ابقه يمكم وتاكدو براحتكم وهيه خل ترجع للبيت
_لا ميصير هيه المزوره الكتاب وهيه تتحمل تبعاته
دار وجه عليه كال مو هيج ست مها
كتله _عماد عمو مرته مريضه خل يروح
_اي عادي خل يروح ما عدنه شي وياه احنه عدنه كتاب نريد نعرف منو الي مزوره وخاتم بختم الفرع
كام على حيله وصاح فارس اجاه ولد كاله
_فارس سويت الكتلك عليه
_نعم سيدي
_مها منو الي سوالج الكتاب وهذا الختم منين حصلتيه
_ارتبكت وكتله / الكتاب اجه بلبريد اني مالي شغل اسال الموظفيين
_خلص تبقين يمنه لحد ما نتاكد ونجيب صحه صدور بلكتاب
حجه عمو سالم/كتاب شنو شيكول
جاوبه بوقاحه
_تكدر تتفضل اليوم مها ضيفه عدنه
_على بختك اعوف بت الحجيه صفيه واروح هذا الشي ما يصير ولا راح يصير
جر عمو من ياخته وسحله كله هاي البت خطره على الدوله جاي ازور وراهه عصابه
اطلع منا لا اخليهم يسحلونك
اني وكفت وره عمو وهو مد اديه من وره كال عمو صدك انتي مزوره كتب
بجيت بخوف كتله والله لا مزوره ولا اعرف عن شنو يحجي
_فدوه عمو روح لعمتي كله خل هيه تتصرف
_جر عمو قوي وطلعه بره هو وفارس
واني اخذني الخوف والرجيف شجاني اجيت برجليه هو يريد فرصه
كمت اردد يا غياث المستغيث يا حبيب قلوب الملهوفين
يا حسين يا شهيد يا ابا الفضل العباس
مرت ساعه واني كاعده وحدي بلغرفه
مثل الحرب النفسيه استخدم وياي اسمع ناس اصيح وتصرخ
كلبي ❤️ وكف من الخوف
لو يذبحوني ما يلكون قطره دم بيه
اجه فارس جايب اكل حطه على الميز وكام ياكل بطريقه مقززه
درت وجهي للحايط وهو كل شويه يطلع صوت لعبت نفسي
يربي اشلون نخيت اهل البيت كلهم
احجي بكلبي ويه الامام العباس ع
سيدي يا ابا الفضل العباس اليوم اني دخيلتك واريدك اطلعني من هاي الشده
كلي ارجف ما اعرف اشكد مر من الوقت واجه عماد مبدل وكاشخ
_اي مها سولفي منو انطاج الكتاب ومنو ساعدج وليش زورتيه
_اضن جاويت كتلك اجه بلبريد وما اعرف كلشي عنه
_ولج اني قشمر عندج بت الكل.....
بت القنادر....... رفسني حيل وكعت من الكرسي كام يركع راسي حيل
صاح فارس كوم ذبه بسجن كووووم طيرت البيك الماخذه
_كاله فارس/خوش صيده اليوم نسوي حفله هههههه
_اكل نعل هاي تخصني
كومني يسحل بيه من الحجاب وهو يضحك ادري اذ تخصك توديه لسجن ليش
وذاك يجاوبه/مالك علاقه اسمع ونفذ
دخلني بمكان اظلم ما بيه ولا لمحه ضوه
دفعني حيل وكعت على ركبتي وحسيت بحراره الدم سمعت اكو احد يون صحت منو كالت انتي منو
_اني مها انتي منو شنو اسمج
_اني ابتسام العلويه احبيبه لا تبجين شده وتخلص فدوه اذ طلعتي روحي لامي ام حسين العلويه بفلان مكان كليله ابتسام اخذوه من المدرسه ولا تخاف عليه اني بخير
_يا خير وانتي تونين وحالج مثل حالي 😓
كرفست روحي بظلمه واردد
امن يجيب المضطر اذ ناداه ويكشف السوء
يا ابا الفضل العباس
نادى عليا مظهر العجائب تجده عونا لك في النوائب
كل هما وغما سينجلي بوليتك يا علي يا علي يا علي
كمت اصيح بصوت عالي يابا الحسن ادركني
ما اعرف اشكدبقيت اضن للفجر لان اكو ضوه صار من جهة الباب
كمت ازحف وصلت لضوه وتلمست الباب وكمت راسا وكعت رجلي مدري شبيهه
شويه واسمع ناس تحجي واني داخله رعب كمت ادك بلباب
محد بحالي والريحه مقززه واني احتاج تواليت وملابسي بيه دم
الهي انتقم من كل ظالم يا رب 😭
ضليت وقت كلش طويل اضن يومين ومحد بحالي
اجه واحد كال كومي يردوج
كمت وما احس رجلي من الركبه توجعني كلش ما اكدر ادوس عليه
جرني قوي وطلعني يسحل بيه
دخلني غرفه عماد
_ها مها اشلونج اليوم
_كتله اريد تواليت واريد مي
_تدللين تقريب مني ولزم زندي واكو اثنين واكفين يمه وشاورني اكلج شنو رايج اخليهم يطلعون ونبقه بس اني وياج
_كعدت بلكاع وبجيت 😭 بصوت عالي
انته ما تخاف من الله شتريد مني
الله ينتقم منك يا حيوان
طردهم وكام يملخ بملابسي وكام يرفس بيه تشوغ روحي كمت اصرخ يا ابا عبد الله يا حسين يا مظلوم
يا ابا الفضل العباس ادركني
ملخني تمليخ وكطع ملابسي كعد على الكرسي فحطان
وكع على وجه وكام يرافس مثل المصروع
اني اباوعله والم بروحي وهو يرافس بيه ما بيه كمت فتحت الباب ورحت للحراس كتله هذا عماد مدري شبيه
راحو يركضون وخلو بحلكه وصله وغسلوله واني بقيت بره والملم بروحي والدم من كل مكان
حاولت اطلع بس واحد من الحراس زمخ بيه وكعدت يم الباب
شفت عمو سالم واكف بعيد مخلينه بشمس وياه مدري منو
توسلت بلحارس اريد تواليت كال تعالي وراي
دخلت وغسلت وشربت مي وتوضيت
طلعني بسرعه كال يردوج
رحت امشي خاويه روحي رايحه مني
كعدت بلباب وطلع فارس كال روحي مها لا تبقين هنا واذ على عماد ما يريد يشوف وجهج
كمت من مكاني وطلعت وهو اشر للحراس وطلعت بره واشوف عمو سالم يبجي
_عمو مها شسولج اولاد الحرام عمو طلعوني من يمج كوه 😭
جرني كوه كتله رجلي اضن مكسوره
صعدني بسياره همزين العبايه ساترتني
وجهي خرايط وجسمي مزلغ حسبي الله ونعم الوكيل بيكم
اخذني عمو لبيته دخلت لكيت مرته نايمه مريضه تون
كعدت وهو كعد كبالي كال
_عمو مها تحجين لو تخلينه لباجر
_اشرتله بعدين خلي اكوم اغتسل اريد ملابس ركض جابلي واجه دخلت الحمام غسلت وتوضيت وطلعت طلبت مصلايه جابلي وقران
كعدت شبكت القران وكمت انحب واخذته وكعدت بمكان اظلم اريد اتواره عن الناس الوحوش
لصبح واني شابكه القران وابجي اشكد حاول عمو سالم يطلعني ما قبلت
كال بويه مها تعالي اكلي روحج خلصت من البواجي جرني وراح اشويه واجت ام صلاح
_يمه مهاوي يمه سووووده عليه اشلوووون هيج يصيرررر بيج يا بعد عمري يمه مهاوي شبكتني واني مثل الجثه ما الي كل رده فعل دخلت بحاله صدمه
اشوف العالم تحجي واني ما جاي افهم الي يحجون ولا عدي ادراك بس شابكه القران وليحاول ياخذه اصرخ
خلوني بمكان معزول وما اعرف اشكد بقيت كل يوم يحجون وياي ويغصبوني اكل واشرب الا ان مر شهر واسمع عمي سالم يحجي لام صلاح
_والله يم صلاح شكلج اني ما اعرف اذ همه معتدين عليهه لو لا بس هيه طلعت منهم بلمعجزه لان تدرين ليدخللهم بعد ما يطلع
اني صوجي اخذتهه بيدي عبالي استدعاء دائرتهه
_الله ينتقم منهم هسه انته شراح اسوي مرتك مريضه والبت فاقده والناس يمه ما ترحم اكول لو توديهه لخوالهه لو عمامهه
_افه عليج هاي امانه حجيه صفيه وكام يبجي خويه صفيه الامانه ما حافظت عليهه
هذا الحجي كله سمعته وادركت اني صرت عاله على عمو
كمت على حيلي غسلت وتوضيت واجيت يمهم كتله عمو اريد عنوان امي
_صلوات على محمد وال محمد بويه مها تحجين الف الحمدلله والشكر
_ام صلاح/يمه مهاوي فدوه اروحلج احجي اصار وياج اسوو بيج المايخافون الله
كمت احجي وابجي ولتفت العمو كتله اشكد بقيت هناك كال خمس ايام
_حيييييل كل هذا الوقت وما ادري
كمت مديت المصلايه وصليت شكر لله ولابو الفضل العباس عليه السلام
كمت اقضي صلاه واقره قران اباوع البيت فارغ سالت عمو
_عمو اولادك وزوجتك وين
_كال مريضه وديته لختهه اداريهه والجهال وياهه
عمو فدوه اريد اروح لخوالي كالت عمتي خيريه بفلان مكان بلبصره ومن العشيره الفلانيه
_اي عمو بس خلي افرغ اني اوديج
كومي خلي اخذج لطبيب ايشوف رجلج امرمه ويجيك وضعج
_ام صلاح/اني اروح وياكم بعد ما عوفج ابدددد
رحنه لطبيب واخذنه اشعه كال تمزق بلاربطه ولازم صب صبوهه ورجعنه
كبل نمت من التعب النفسي والارهاق
مرت الايام ومره اندكت الباب وطلع عمو
اجه فارس/ هذا كتاب لمها خل ترجع اداوم بدائرتهه
_سالم /وضعهه الصحي مو تمام
_من اصير زينه خل تباشر
اجه عمو كال مها ابشرج اجه واحد وانطاني كتاب كال خل تروح تباشر بدائرتهه
_حجيت بكسره عمو اني بعد ما اداوم ابد اني فكر وين ما اخلي حضي يعكس حتى مو مثل البنات لا اهل ولا عزوه
_انتي مؤمنه وهذا ابتلاء واختبار والحمد لله نجحتي وتفوقتي بلامتحان ربج ما ضيعج نصرج واني متاكد شارتج سوت بيه هيج
_اني بس سمعت تخيلت الصار كله كمت انفض وابجي كوه كمت رحت كعدت بلغرفه وسديت الباب
للعصر عمو جاب زوجتهه واطفاله
كمت اتخطه شويه شويه والتهيت ويه الجهال يحجون وياي دخيل الله اشكد ابرياء وما عدهم وسخ دنيا
اسمع ام صلاح تحجي وي عمي تكله
_يمه سالم بت الحجيه دخلت امن والمنطقه كلهه تحجي عليهه ناس تستخطيه وناس تذم بيهه وكلمن يالف قصه شكل
بس والله ولدنه ما قبلو على مها لا همه ولا ولد ام عبد ورادو يجون يشوفون مها وياخذون من خاطرهه
_ام صلاح انتم جيران العمر وهيه بتكم ما طلعت المزينه منهه بس شسوي هذا حضهه وقسمتهه
طشت بلمنطقه اني مظلومه والامن مستهدفني اجو لعمي ناس من طرف السيد الص.....
كالو خل تحجي مظلوميته واحنه انساعدهه اجه عمو وكالي ورفضت بشكل قاطع ماطول الامام العباس واكفلي بكل شده ما اريد اطلب من احد ابدددد
لحيت على عمو ياخذني للبصره وهناك راح تبدي حياة جديده
