رواية عيون المها الفصل التاسع عشر بقلم ظل الياسمين
من ظن ان الباطل سينتصر يوما على الحق فقد اساء الظن بلله
لحيت على عمو نروح لخوالي بس هو يوميه ياجل وزوجتهه مريضه واني كمت اداريهم انضف واطبخ واساعده وكمت استحي منه لان كاعده عدهم رعم زوجته اشكد تدعيلي وتمدح بيه كدام ام صلاح
فديوم كالت ام صلاح
_مهاوي يمه اكو روحه للامام الكاظم عليه السلام تروحين ويانه
_خاله بعدني ما اكدر اواجه الناس والعالم
_وانتي شعليج بيهم زوري وصلي ومناك ياخذونه لسامره وثاني يوم نرجع لكريله ونجف والكروه عليه روحي غيري من نفسيتج واخلي واحد من الولد يروح ويانه
_ها خل اشوف عمو سالم وانطيج خبر
_وداعتج عمج ما يكول شي طلعي من الضوجه ورجعي مها ام وجه الحلو الكل الناس تحبج وتحترمج
_ميخالف لازم اخذ رأيه
عمو اجه بليل وكتله اريد اروح ويه ام صلاح لزياره كال مو تدرين بلمره مريضه والجهال تعودو عليج بس يلله طلعي
خلي نفسيتج ترتاح شال فلوس وانطاني
طلعنه ساعه 2بليل ظلمه واني لابسه عبايه وتلثمت وما اريد اشوف احد ولا احد يشوفني استحي من الناس
هواي مشت بينه السياره وصلنه هناك اول مره ازور الامامين العسكريين صلينه وزرنه بست الشباك وكعن ادموعي مسحتهن بشباك ودعيت الله ياخذ حقي من كل ظالم
ثاني يوم بنهار كالو اروح لكربله وتفاجئت امجد واخوه ويانه بلحمله وماخذين سماعه ويقرون على الحسين عليه السلام
صوته يبجي الصخر وكام يقره على الام لان امه ما صار هواي من ماتت
هذا كله واني دايره وجهي لجامه بس ادموعي ما سكتن وكل شويه ام صلاح لو ابنهه يسالني تردين شي محتاجه شي طلبت اشرب مي
وخرت اللثمه وشربت وما احس الا امجد يباوعلي بتركيز
استغفرت وضجت كلش
عود ردت محد يدري بيه نزلنه من السياره وصار وراي كال اشلونج مها
ما جاوبته كام يحجي بصوت عالي ويه اخوه ويسمعني
_الله لا يوفقه كلمن فرقني عنك الله خصيمه يوم القيامه كلمن لعب بعقلي وخلاني اعوفك
لو تدري اشكد متندم عليك لو يرجع الزمن ما اتنازل عنك
كلت بكلبي _هذا حجي خل يفيدك لو يصبوك ذهب ما اباوع لخلقتك عكب ما ازوجت وخلفت جايني
رحنه زرنه واشكرت من الامام العباس عليه السلام
ونخيت الامام الحسين عليه السلام بجاهه عد الله يتغير حالي 😓
اخذونه لبيوت بدرابين غسلنه وصلينه وجابو اكل جانت سفره موفقه بيه التزام ديني وقراءه قران ومحاضرات
كملنه ازياره ورجعنه للبيت دكيت الباب وطلع عمو
_هله بيج بويه زياره مقبوله
_الله يقبل اعمالك اشلون صارت زوجتك اليوم
_على الله الحمدلله على كل حال
لكيت الصينيه بلكاع ما شايلينه والوسخ والزباله
كمت المم واني امشي وغسلت الماعين رحت لجهال لكيتهم نايمين بلكاع
كمت فرشتلهم وشلتهم واحد واحد وطفيت الضوه
لكيت عمو كاعد يصلي ويقره دعاء بصوت حنين....
رحت توضيت وفرشت مصلايه وكعدت اصلي وزوجته ماتنام من الالم خطيه
كال _بويه مها الله يوفقج جاي اتعبين ويانه ما اعرف اشلون اجازيج
_عمو اريد مجازتي من سيدتي ومولاتي فاطمه الزهراء عليها السلام
فدوه عمو اريد اروح لخوالي ولو لحيت عليك هواي
_لا تكولين هيج اوديج والله بس خل اجمع كم فلس ولو احنه محتاجيج هنا الجهال اتعودو عليج
_عمو اني ما اريد اثقل عليك
_اصلا انتي جاي تكسبين اجر وثواب بينه
اكول لو تبقين هنا يمنه لحد ما الله يفرجهه وبعدين روحي
سكتت بس كمت استحي منه اشلون لازم الكالي طريقه اروح لامي
حجيت لام صلاح كالت كعدي وسكتي هو وضعه متخربط من وره مرته لا تلحين عليه
بس اني كمت استحي ابات عدهم كالت رجعي لبيتج وبنهار من يطلع تعالي كمت كل يوم اروح اداري زوجته وهيه بنازل صارت جلد وعظم خطيه وما تكدر تكوم
جهاله بصفحه زغار ويحتاجون عنايه بس همه ياخذون الحجي عقال
اجت خالتهم مره وحده وكامت اشمر حجي
_اكلج انتي كل يوم تجين هنا
_اي علمود عمو وزوجته
_ها اسميه عمو عود شوفوني بحجه عمو وجهاله ادنه الهم تره بعدهي ما ماتت تردين تاخذينه هو وجهاله
_انتي اجاي تحجين عيب عليج عمو سالم صاحب فضل بكد الدنيه واني اردله الجميل
_اي بحجتك يهواي اترس وابدي
_بلله شكلج تعالي انتي داري اختج وجهالهه وكسبي بيهم ثواب بمكان ما جاي اذبين حجي
خلت وطلعت واني من القهر خليت وطلعت للبيت بوجهي لفراشي نويت اروح للبصره وحدي ماطول ما يقبل ياخذني
ثاني يوم اندكت الباب
طلع عمو سالم كال بويه البارحه ما جيتي
_عمو تعذرني بس هاي الناس ما ترحم وما تعوفني بحالي
اشكد حاولت ابتعد عن خلك الله بس محد يعوفك لازم اذب سم عليك
_عمو مها انتي شريفه وغصبن على اليسوه والمايسوه عليج ابداعه الحجيه صفيه منو حجه وياج وذب سمه عليج
دنكت وبجيت كتله خاله جهالك
_شفته صار عصبي كال بسيطه ايصير خير لا تهتمين
راد يروح صحت عمو دار وجه
_باجر اروح للبصره
التفت عليه كال وحدج كتله اي
_الجمعه اخذج انتظري بس هاي الكم يوم
عمو مها اني محتاجج والجهال وامهم تعودو عليج واذ تحبين الحجيه صفيه لا تهتمين بكلام الناس
باجر تعالي والترديه يصير
كتله انشالله باجر يمكم
ثاني يوم تعمدت اتاخر حتى ما الكاه وصلت للبيت هوسه وزوجته تون من الالم حجيت بيني وبين نفسي لعد اختهه مو اذب سم ما تعرف تجي ساعه وادري اختهه
سرفنت وكمت انضف واغسل واطبخ واساعد مرته تكوم تغسل ضهري انكسر من الشغل
رجع عمو المغرب صبيتله لكمه وترخصت ورحت هو عافني براحتي ما ضغط عليه
وصلت للبيت مهدود حيلي
سبحت وصليت ونمت وجه الصبح بعالم الرؤيه جن شعري كله ابيض وكاعده وحدي وادعي فزيت مخروعه
ساعه بسته اندكت الباب كلت يا رب سترك وعفوك سمعت صوت عمو
_عمو مها فتحي الباب ام الجهال انطتج عمرهه
_لا اله الا الله 😓 انا لله وانا اليه راجعون
فتحت الباب وبجيت 😭 بصوت عالي
_عمو بسرعه تعالي الجهال وحدهم والبيت فارغ
رحنه ركض للبيت لكينه خواتهه ومرت ابوهه وخوتهه شالوهه وطلعو واني بقيت اعزل بلغراض والجهال نايمين كعدو على صوت الصريخ والصايح
خلصت الفاتحه والجهال متعلقين بيه كامو يرحون وياي للبيت همه اثنين ولد وبنيه ازغر طفل متعلق بيه كلش
اجت خالتهم مره تاخذهم كامو يتباجون ما يقبلون يرحون كوه قنعتهم ساعه ورجعو
بقيت اسبوعين وره وفاة امهم همه يمي وابوهم متاثر كلش على وفاتهه رغم جان يعاني منهه الله يرحمهه برحمته الواسعه
_عمو اشلونك البقاء بحياتك كلنه لهذا الطريق
_حياتج الباقيه هواي زحمتج وياي عمو تدرين اني محد الي بهاي الدنيه بس الحجيه صفيه وراحت لرحمه الله وهسه ام الجهال هم راحت
ومحتار وين اخلي جهالي وهمه زغار مها اعتبريني اخيج عمج وتعالي كعدي وياي
_عمو انته تدري اني ما ارتاح غير ابيتي وجهالك اخليهم بعيوني بس تعرف حجي العالم واني يا مستوره انستري
كله ضدي الوكت والعالم ما ترحم
_خلص نتعاون على تربيتهم بنهار يمج من ارجع من الشغل اخذهم ومصرفج ومصرفهم ماشي
_انشالله
مشت الايام واني متعلقه بيهم الجبير حمودي والزغير زيودددي والبنيه نرجوسه
كمت اموت عليهم
واذكرت الحلم وفسرته موتت امهم وشبعت قهر على الجهال تيتمو من زغر
مره كاعده الكط تمن وندكت الباب
_منو
_فتحي مها اني عمتج خيريه
فتحت الباب اجت شبكتني وبجت
_ها خير حلمانه بيه
_ولج والله ميته قهر عليج اشكد حاولت امنع عماد ياذيج ما كدرت
_كافي ارجوج صفحه وانطوت وبفضلكم حتى كمت ما اطلع من البيت
_ذول جهال سالم خطيه امهم شبيهه بسرعه ماتت
_تمرضت وراحت لرحمه الله
اكلج عمه اليوم شعجب جايه
_تردين الصدك وداني عماد كال اذ تقبل اتقدم الهه والترديه يصير
استغربت هذا مخبل عاقل
_كليله لويضل بس هو بدنيا ما اقبل بيه وما اريد اسمع طاريه
_تدرين مها عماد من يوم الي وكع وصار بيه صرع تغير صار مكسور وما يحجي هواي
الله يخليج كافي ما اريد اسمع اي شي عنه هو مجررررم وماراح اغير نضرتي عنه لو اخر يوم بحياتي
بس اريد اسالج عن امي وخوالي 😓
وين الكاهم اشلون اوصل الهم
_امج مزوجه هناك ومستقره وبفلان مكان وعدهه اولاد وبنات شتردين منهه
_اريد اروح الهم
_صدك اذ تردين اخلي رجلي ياخذنه ونروح سوه اني هم امر على عمامي
_اسوين فضل جبير اروح الهم واشوف خوالي بس انطيني علم اشوكت ترحون
سلمت وطلعت واني اباوع لجهال وين عمو يخليهم اذ رحت
اشلون بيهم ما صار لامهم هواي من ماتت ومحد يسال عليهم مره وحده خالتهم اجت وبعد محد بحالهم
توضيت وخليتهم كلهم يتوضون وصلينه واني اعلم بيهم واحجي قصص واعلم للمغرب يجي ابوهم يرحون ومرات زيودي نايم يبقه يمي
اجت عمتي كالت نروح الجمعة لان ابونه عده عطله ونرجع بنفس اليوم
اشلون اكل العمو وافتح الموضوع وياه
حاجيت ام صلاح وهيه تكله والجهال راح يبقون يمهه
_عمو مها خلي بالج من نفسج وهاج هاي فلوس خاف تعتازين شي
_عمو والله اني خجلانه منك وانشالله ما اتاخر
رحنه الطريق كله اتخيل شكل امي اشلونه واشلون عايشه هم تعرفني كل شويه يسالوني خاف مضايقه خاف جوعانه
وصلنه وهناك كامو يسالون عن العنوان افترينه هواي ومحد يعرفهم
ردنه نرجع كتلهم اسالو ابو المحل حسيتهم ضاجو نزلت بنفسي وسالته
_بلا زحمه بيت فلان امهم اسمه فلانه تعرفهم كال لا بس خل اصيح اخوي يعرف الوادم
اجه اخوه وكام يباوع بوجهي كال سبحان الخالق انتي امج فلانه طفرت كتله اي وين بيتهم
اجه ويانه دلانه ودكينه الباب صاحت منو
الرجال صاح اني فتحو اجوكم خطار من بعيد
فتحت الباب مره جبيره وشافتني وكامت تصرخ بعلو صوته
_يمه مها يا بعد روحي 😭ولج يمه مهاوي وتماطلنه اني وياهه بلكاع ونتصارخ
اكثر من ساعه كلساع نتشابك ونبجي تتلمس بوجهي وتبوس بيه
_يمه اخذوج كوه زوجوني كوه يمه انتي قطعه من روحي من البارحه احس بنغزه بكلبي اثاريج جايه وكلساع تبوسني كالت بعد ما اعوفج تبقين يمي سلمت على عمتي ورجلهه ودخلتهم جابو الاكل اصناف والسفره عامره عدهه بنات بعمري وازغر واولاد....
عمتي كالت _مها احنه تاخرنه صار لازم اروح
_عمه روحو اني ابقه ويه امي كم يوم واجي
_مها تجين وحدج
_امي كالت/خيريه بتي تبقه يمي كافي حرمتوني منه من هيه زغيره ومن كبرت هم تحرموني منهه
راحو واني بقيت يمهم ما حسيت بغربه ابددد من كد ما شايلين محنه وكلساع نبجي وسولفت الهه على كل الصار بيه وهيه تكول يا يمه سوووده عليه
اول يوم لصبح بقينه كاعدين ثاني يوم اسمع رجال جبير يحجي ويه امي بلمطبخ
_تدري اسماعيل اصاير بتي شابعه ظيم وقهر الناس ما راحمتهه الوكت الاغبر لاعب بيهه لعب 😓
_الله يكون بعونهه خليه ترتاح هله بيهه من تكعد خل اسلم عليهه
ما يدرون اني متعلمه على كعدت الفجر
كمت توضيت وصليت وهمه رجعو نامو واني بقيت كاعده اقره قران
